رواية وحوش بشريه الفصل الرابع والعشرون 24 - بقلم Rozaya1122

#البارت الخامس والعشرون
#وحوش بشريه
#روزايه

بية حرگه ..
وبية ونه ..وبية صوت. .
وأاااااخ  يا درب المحطه ..
متاني من ريلك يفوت ..
ردلي غبشه
ردلي نسمه. .
خلي أشمك ..وانه بس باچر وأموت

( بارت مفاجئ هديه للحب سارونه Hamzayhoocom1996 مواعدتهه ببارت هديه من زمان وهسه يله حصلته😂)
......

اسماء: يمه منو كتل براء؟؟

فضه: يايمه شمدريني اشو هي تاهت ناس تنهش بلحم ناس...

شمه: عمه خاف ضرغام؟؟

فضه: يايمه اسم الله وليدي صار قاتل وبدم بارد يوميه قاتل واحد...

لا ياربي دخيلك لا تخلي الحقد يسيطر على وليدي ويضيع مني...

ضرغام عمره ما اذى نمله ومن صغره يصوم ويصلي ويخاف ربه يكتل بشر ...

اسماء: يمه على كيفج هسه هو مجرد تخمين اصلا ضرغام طلع ويه اصدقاءه...

فضه: امشي خابري اخوج شوفي وين؟؟
اسماء: ماعندي رصيد

فضه: من كون غمه ولج قبل يومين خليتلج تاكلي ...

اسماء: هسه يجي وسام ونخابره بس اسكتي شورطنه وحجينه...

شمه: اني اسمع وفرحانه بكلبي حيييل عساهه ميته وماتكوم منهه ...

بس خاف صدك ضرغام ويروح بيهه بسجن...

ضلينه انلوب بمكانه واحنه لانكدر نطلع ولا نشوف شي...

انفتح الباب وجان انشوف علاهن العملاقه مدت ايدهه من فوك وفتحته ...

ركضنه استقبنالهه ونسأل شنو شصاير؟؟

علاهن: جنت طالعه واشوف الوادم تتراكض كل الي الزمه يكول براء ماتت...

من كون موتت الجلاب السود هاي الهاشه لانفع ولادفع مخليهه سلمان تحفه اثريه...

بس تلكاني وسام يكول مضروبه طلقات اثنين اثنينهن برجلهه و3 زلم ماكدرو يشيلوهه...

جنهه فيل حاطهه سلمان يعلف بيهه جنهه ثور..... 

فضه: عمه سلمان يوميه سالفه شنو القضيه؟؟

علاهن: هذا مسودن اكل فلوس الدنيا واخواته واخوته ويبيع شرف كدام الوادم ...

غير ابنج قيصر حاد اسنونه عليه جان من زمان طكيته طلقه واكومه بكاعه ...

بس هذا قصيران حاط دابه من داب علاهن ...

فضه: ياعمه غير يحبج ومايريدج تنفعلين ويخاف عليج...

علاهن: قيصر مايحبني ولج يفضه ابنج واكفلي سجينه خاصره ...

وحسره عليه اخطي خطوه اذا ماالكا فوك راسي وعبالك مراقبني....

هسه اريد اروح باجر مسويه ثواب للشيخ والمرحوم تعالن من وقت ...

موتجني خطار انتي والمهندسه والدختوره ...

فضه: ياعمه صدوك جذب نجيج على راسنه من الصبح احنه يمج نساعدكم...

علاهن: يله اودعناكم....

اسماء: يمه شبيج لسه تخافين منهه؟؟

فضه: يمه ما اخاف هسه بس كلهه مسأله احترام مره جبيره قابل اصيح بوجهه...

ولجن حاجني بضرغام كلبي نار علي...

كومي دوكي مسكول على قيصر خلي يخابرج كوليله كيت وكيت السالفه خلي يجي يشوفلي حل ...

راح يموتوني ولد حسين هسه ياوليدي البنيه راحت لحال سبيلهه تكفى الشر...

شمه: راحت اسماء دكت على قيصر كالهه هاي راح اوصل البيت جاي بطريق ...

صدك ورا شويه طب قيصر تلكينا كلنه وعمه فضه سولفتله...

هستوه طلع موبايله يريد يخابره جان يطب ضرغام...

يمشي طبيعي وحته اسلاح ماكو بيده يمشي بنفس البرود

حجت ويا امه وهو ساكت ولا حجه حرف واحد...

مد ايده قيصر على حزام ضرغام وجر المسدس من عنده الظاهر يعرف بسوالف اخو...

فضه: ياصخام بوجهج فضه ولك تخبلت كتلت البنيه وراح تحمل ذنبهه طول عمرك...

ضرغام: بعدي عني لا احط طلقه براسي واخلصج مني  وما اخليج تلكيلي اثر...

اااي اني ضربتهه واكتل سلمان وسعاد وواحد واحد اقضي عليهم ...

وخلي الكل يسمع اني ضربتهه برجلهه وضهرهه وخليتهه معوقه طول عمرهه...

ماردت اكتلهه وتموت وترتاح اريد اعيشهه العذاب طول عمرهه منا لمن تموت...

ولو كادر اطب بيتهم جان حركتهه هي وعدله واحسسهه بنار كلبي...

بعدوا عن طريقي ترى والله ماخليكم تشوفوني بعد لاتخلوني اطلع عن طوري ...

صعد لغرفته واحنه ساكتين والمسدس بيد قيصر وصافن حته ماحجه ...

فضه: راح يضيع الولد قيصر احجيلك كلمه...

قيصر: شحجي ما اكدر الومه لان لو اني بمكانه من زمان كتلتهم ....

عوفي يمه ضرغام يسوي الي براسه ومحد يكدر يمنعه لذلك لاتعبين نفسج...

شمه: مامكتوبلنه الفرح اذا مايمر يوم وتصير مصيبه الحمدلله محد شافه...

لان لوشايفه احد جان سلمان من زمان هد علينه....
يارب احفظ ضرغام من كل مكروه....

بعدهه سمعنه من قيصر ضرغام صاعد دراجه وملثم ومراقب براء يوميه تروح لبيت اختهه ...

وجان الشارع فارغ ومستغل الوضع ضاربهه ومنهزم لذلك لحد الان سلمان يدور على الضربهه...

شهد مادور على الي حطمهه بس براء العجله تخبل عليهه ...
....

ثاني يوم رحنه لعلاهن علمود نساعدهه لكيت عماتي كولهن موجودات واكو منهن صار هواي ماشايفتهن...

بدينه نساعدهن وعلى هوسه اللمه وسوالف وضحك ..

احساسي ابد مايخيب ليش من افوت لبيت علاهن ينقبض كلبي واحس اكو شي مضموم....

صار العصر وعلاهن عازمه نسوان القريه معارفهه بدت النسوان تتوافد وكلهن اشكالهن مابيهه رحمه ونور...

اكو وحده منهن يكلولهه ام مناهي...

بس سلمت عليهه ضلت ادحك بوجهي ووضعهه مريب مثل الي متفاجئه ...

ركزت على ملامحي بالتفصيل حته اني ارتبكت وطلعت من يمهه....

التهيت وراهه بالشغل ما ادري شلون اجاني احساس افتر ورا غرفه علاهن ...

مع العلم جنت اشتغل بس فجأه كلت خلي افتر ورا البيت اشوف شكو ماكو...

افتريت ورا البيت وتقربت على الشباك وما ادري ليش سويت هيج وشنو الي خلاني متأكده اكو شي...

سمعت علاهن هي ويه وحده تسولف من صوتهه عرفتهه ام مناهي ...

ام مناهي: علاهن اخذي الحذر من هاي البنيه الي اسمهه شمه وعدهه شامه يم عينهه زغيره

علاهن: ليش اشفتي كدامج هاي بنت ابني ...

ام مناهي: بس سلمت عليه شفت شغلات غريبه داير مدايرهه واكو ارواح تفتر عليهه...

جنهه هاي البنيه عدهه روح غريبه اطاردهه واعتقد تشوف شغلات وتحس بالحدث قبل لايصير...

علاهن: ام مناهي احجي عدل وفهميني شنو السالفه..

ام مناهي : هاي البت راح تصير فضيحه جبيره على ايدهه اشوف القريه تحترك بسببهه وهاي نار تهلك وماترحم..

اكو ارواح محاوطتهه عدهه علاقه بيهه بس هاي تقره قران هواي وماكدروا يسيطرون عليهه..

هاي البت اشوفهه بمكان جبير وعدهه سيطره قويه ...

استغلي الوضع علاهن ولاتخليهه تشك بشي وتهلكنه وتفضحنه...

علاهن: راح اراقبهه واشوف كلامج صحيح لاتخافين هاي ضربه وحده اطمهه بمكانهه....

شمه: من سمعت الحجي ماعاد عندي حيل والخوف اخذني حته رجليه ماتمشي اريد ابتعد عن المكان ما اكدر وكأنما صدك ارواح محاوطتني...

رددت بسم الله الرحمن الرحيم وكوه اتحرك وعيوني غركانه من الدموع رجعت لبيت عمي ...

ما اكدر اطب بيت علاهن بعد ربي شنو علاهن قاتله لو سحاره...

احس نفسي اتخربطت بس اريد اوصل للبيت ...

فتحت الباب وطبيت اول مانزعت شالي شمرته ..

بللت ايدي بمي بارد وغسلت وجهي وركبتي....    

كعدت على الكرسي واني اخذ النفس كوه واردد ايات بكلبي ...

فززني صوت قيصر خلاني اكمز من الكرسي وخليت ايدي على كلبي...

قيصر: اسم الله شبيج فزيتي ..وليش هيج حالتج صاير شي؟؟

شمه: غاصه بالبجيه مالتي بس هزيتله راسي بمعنى لااا..

قيصر: تعالي اكعدي ارتاحي شبيج راح توكعين؟؟

شمه: قيصر مختنكه ما اكدر اتنفس ..

حجيت هيج ووكعدت بالكاع احس ضاق النفس عندي وحته ماعدت اشوف شي...

بهاي الاثناء اجت اسماء تركض تصيح شمه شافتني كاعده بالكاع وهيج حالتي ....

كومتني من الكاع وهي تسأل شكو؟؟

كعدت على الكرسي شربت مي وفتحت الشبابيك ...

وقيصر قاس النبض مالتي واني احس نفسي بعالم ثاني ...

الخدر بده يسري بجسمي خفت حيل كمت ابجي واصيح راح اموت...

قيصر: اهدئي شمه لاتخافين مابيج شي كومي اسماء جيبي حبابه مهدئه...

شمه: الله عليك قيصر ما اريد اموت اريد اتنفس الهوه قليل..

انطتني الحبايه اسماء ورا شويه هدءت واحس نفسي رجعت طبيعي بس نعست...

اخذتني اسماء للغرفه نمت بفراشي وضلت كاعده يم راسي بسرعه غفيت وغطيت بنوم عميق....

ماحسيت غير الساعه ب9 بليل واسماء كاعده تقره يمي...

بس شافتني اجت كعدت يمي وهي تطمئن على حالتي...

احس نفسي صرت احسن كمت غسلت وصليت فتحت قراني بديت اقره...

حسيت براحه موطبيعيه ودموعي تنزل واني اتذكر كلام علاهن والصار بيه عبالك كابوس...

من هذا اليوم صرت ما اوصل الباب ودائما لازكه باسماء وعلاهن بعد ماوصلت بستانهه ولابيتهه...

دائما اقره قران واصلي واستغفر وادعي الله يبعد عني كل شيطان مارد..

امتحنت اخر السنه وطلعت ناجحه من الدور الاول شكد فرحت...

عمه فضه اشترتلي محبس ذهب واحد الي وواحد لاسماء...

بيوم الي نجحت اجه قيصر بليل واتلكينا اني واسماء مثل الجهال لازمين نتائجنه ...

باركلنه اثنينه وبوس اسماء من راسهه....
انطه علاكه لاسماء وعلاكه الي...

فتحته جان جهاز موبايل كلكسي حديث من الفرحه واني لازمه الموبايل ردت احضنه...

واسماء عدهه تليفون بس جابلهه واحد احدث نفس تليفوني اني ماروني وهي ابيض...

هاي لحظات السعاده ماتنوصف عمت الفرحه بالبيت وبيومهه شبعنه هدايا...

ضرغام من يوم الصار ما يختلط بينه قررت اصعد احجي ويااا...

دكيت الباب اجاني صوته تفضل...

شمه: شلونك ضرغام

ضرغام: هلا شمه تعالي

شمه: اني نجحت

ضرغام: الف مبروك تستاهلين

شمه: ضرغام موكافي حزن والله مايلوكلك

ضرغام: ماحزنان بس تعودت على الكعده وحدي ...
شمه: شوف حالك حته ماتاكل ويانه...

ضرغام: لا يولي اكل بالدوام ومن ارجع مااشتهي وانتي لان تقرين ما تشوفيني هوايه...

شمه: دكوم حباب انزل جوه وسام جاب كيكه لنجاحنه اكعد ويانه

ضرغام: ما الي نفس والله عوفيني عندي شغل لازم اكمله...

شمه: ازعل عليك حباب انت اخويه ووافرح وياي..

ضرغام: يله انزلي وهسه اجي وراج...

شمه: نزلت واني فرحانه هم نجاحي وهم حالة ضرغام بدت تتحسن...

التمينه والكيكه على الميز والعصير والكرزات محضرات...

قيصر وعمه فضه كاعدين واحد بصف الثاني بوسط التخم ...

ضرغام بصف عمه وهي حاضنته مامصدكه كاعد يمنه..

عمه فضه صاحت اسماء...
فضه: سمسمه كلبي تعالي يمي يابعد امج ورفعه راسهه...

شمه: كولش استهظمت واتجمعت الدموع بعيني واني اشوف فرحه عمه ببنتهه ..

واني بوسط حسره الاهل وحنان الام نزلت راسي خاف توكع دمعتي...

حسيت على صوت ضرغام الظاهر انتبه عليه ...

ضرغام: تعالي شمامه الفرحه الج مو لاسماء هاي صارت قديمه...

فضه: شمه بنيتي تعالي يمه ليش واكفه فرحتجن جبيره ..

جان ماكو مكان سوالي مجال قيصر وكعدت بصفه...

وسام الشرقيه كام اخذلنه صوره واني كاعده يم قيصر...

مرتبكه حيل افرك بأيدي وكلبي احس دكاته توصل لشارع...

عطره كفخني وخربط احوالي انعل حظ كلبي الي وين ماكو موقف يوكع بي ويه قيصر...

كصينه الكيكه وكعدنه ناكل بس اني مدري شجاني...

حته ما اعرف اكل بس اريد اكوم بس ماكو مجال من الطبله والهوسه...

واني بوسط هيجان مشاعري وتضارب افكاري همسات قيصر اجت بوسط مسامعي..

قيصر: ليش ايدج ترجف ومرتبكه؟؟

شمه: حجاهه بهمس وهو مقرب راسه عليه وبكل هدوء حجه...

ما مااا بيه شي حجيتهه بصوره متقطعه...

قيصر: لا مبين مابيج شي راح اكوم من يمج لا تتخربطين بعد اكثر...

شمه: كام قيصر واني مدنكه راسي احس فصلت عن العالم الخارجي ...

حسيت ضربه برجله من اسماء رفعت راسي اجت عيني بعين ضرغام وهو واكف يشرب مي ...

رفعلي حاجبه بتعجب اندارت عيني على اسماء هم رافعتلي تك حاجب  وشلون الي دكول ها شكلنه....

ماكدرت اقاوم اكثر بسرعه كمت للمطبخ بحجه اغسل وعمه فضه تصيح شبيج يمه شو ما اكلتي....

غسلت وواكفه يم السنك وكلبي ينتفض وعقلي ما اله دور وكأنوا علن الاستسلام...

بعدني واكفه جان يفوت قيصر للمطبخ واجه باتجاهي...

دخيلك ربي ما ناوي يخلص هذا اليوم...

ابتعدت عن طريقه اريد ابتعد من ما اروح يقطع طريقي...

فوك ارتباكي وتوتري زادت حالتي مروتك قيصر ما اتحمل قربك ( حجيتهه بكلبي )

كام يتقرب عليه وعينه تتفحصني وعبالك اليوم شايفني واني ارجع ليورا ...

لحدما لزكت بالكاونتر وهو قريب عليه صار وجهي مقابيل صدره...

دنكت راسي بس اريد اتحرك رجليه خانني طلع موبس كلبي..

رفع ايده على الملحق اخذ كوب فارغ ....
وحجه بنفس نبره الهمس وصوته الحاد..

شبيج مو على بعضج حاسه بشي؟؟

شمه: سويلي مجال اريد اطلع...

قيصر: خاف رجليج مايساعدنج تمشين؟؟

شمه: حسيته يستهزء رفعت راسي علي بعصبيه واريد اجاوبه....

قيصر: شو كبرانه ومحلوه مدري انتي حلوه من زمان واني ماشفتج ...

شمه: قيصر بيك شي اليوم شو ابتعد كاطع عن الطريق الي يشوفك شيكول

قيصر: يكول قيصر يتغزل بشمه لان صايره حلوه وكبرانه ومن تشوفني ترتبك

شمه: الله عليك ابتعد

سوالي مجال وطلعت من جوه ايده وركضت بسرعه بوجهي للغرفه....

سديت الباب واني اشوف خدودي حمر وجمر فضحت نفسي  ....

خليت ايدي على كلبي اهدء ياكلبي لاتفشلني على بختك....

مر اسبوع ضبط واني افكر بقيصر ورجعت من جده وجديد...

قيصر ورا هاي الليله راح للدوام وجان على اساس ينزل بيوم الخميس...

تأخر صار المغرب وهو ماكو عمه فضه قلقت علي دكت علي يطلع مغلق....

شويه واجه وسام يركض يصيح يمه ولج يمه الحكي قيصر مسوي حادث

#يتبببع
متابعه ممتعه