رواية وحوش بشريه الفصل الخامس والعشرون 25 - بقلم Rozaya1122

#البارت السادس والعشرون
#وجحوش بشريه
#روزايه

وضلت
 شگد بينه
 منكم ذكريات
ابدونكم ماتسوه فلسين الحياة

من كال وسام قيصر مسوي حادث احس سجين ونبت بكلبي...

بلحظه نزلت دمعتي قبل امه واخته التزمت الصمت واني ادعي بكلبي مايصير بي شي.  

قيصر لاتفجعني ترى اجذب على كلبي من اكول ما احبك ونسيتك

لحد هسه كلبي ينبض باسمك ومحد كدر يسكن كلبي غيرك...

طول الاسبوع اني فرحانه واتذكر كلامك وغزلك وبديت ارجع من جديد...

انخبصنه كلنه وعمه فضه كعدت تبجي هي واسماء ساعه ندعي وساعه نبجي.....

خابرنه على ضرغام طلع عنده خبر وكال اني رايح للمستشفى اشوفه بس لايضل بالكم مابي شحن لان حجه وياي...

وسام رايح مخبر عمامي كلهم ورايحين وراهم للمشفى الخوف والقلق اخذنه...

شويه وخابر ضرغام كال مابي شي جروح بسيطه شويه ونجي ...

شويه هدءت عمه فضه ورجع الدم بوجهه واني ركضت صليت وحمدت ربي وشكرته على رجعته بالسلامه.....

صارت الساعه ب8 سمعنه هورن السياره مال ضرغام راح وسام فتح الباب واحنه اتجمعنه بالمطبخ ..

نزل قيصر من السياره وايده شايلهه بحامل ومجبره  بس يمشي على طوله ...

حضنته امه وتبوس بي وهو باسهه من راسهه ويطمن بيهه ...

بالسره صارو يتحمدوله على السلامه وعمه فضه واسماء بس يبجن ..

اني من كدما بجيت عيوني مورمه بس من شفته يمشي على طوله نسيت الحزن وانرسمت ضحكه على وجهي رغم عيوني المملؤءه دموع...

وصل السره الي بالسلام ومجرد ماتقرب عليه تخربط كياني اريد اطلع الحجايه ماتطلع ...

كوه حجيت وكتله الحمدلله على سلامتك؟؟

قيصر: الله يسلم كلبج...

ما ضليت واكفه ما اريد يبين عليه شي لان الخبر هد حيلي هد  وكوه حابسه دمعتي ....

حته عشه ماتعشيت صعدت للغرفه وضليت فوك مانزلت ابد...

ما ادري ليش جنت مخنوكه وبس ابجي صليت ودعيت ومافاد كعدت واني افكر بحياتي...

ليش كل بيت اطبله اكلب حياتهم واخليهم يوميه عركه ومصيبه ...

معقوله صدك اكو ارواح اطاردني واني مصدر شؤؤم لكل واحد قريب عليه ...

بيت عمي حسين مايوم طلع صوتهم ولا وكعولهم بمشكله بس من اجيتهم ماضل شي ماصار بيهم...

الهي اجعلني عبده صالحه عندك ابعد عني كل وسواس وشيطان مارد ونور طريقي يارب...

اندك الباب مسحت دموعي خاف اسماء تشوفني وعدلت كعدتي...

انفتح الباب واشوف ضرغام كدامي ...

شمه: ضرغام اليوم شعجب تذكرتني واخيرا شفناك

ضرغام اريد اشوفج شخبارج الظاهر بعدج على نفس حالتج

وماتبشرين بخير وترجعين من جده وجديد..

شمه: ضرغام بس انت تفهمني اني تعبت والله موبيدي صعبه عليه

كاعده ويا نفس البيت واشتم عطره وادحك بطوله  حته اذا اريد انسى اتذكره اجباري

ضرغام: اشو متستحين ولج شنو عطره شنو طوله بنات اخر زمن كدامي وتتغزل باخوي وفوكاهه بنت عمي...

شمه: ههههه انت مودكول صديقج واحجيلك كولشي لاتخجلني ماقصدت بس حجيتلك همي..

ضرغام : انطيج من همي حته ما اكدر اواسيج وابعث بيج الامل مثل قبل...

نفسه الامل الي جنت احجي بي هسه مات وجذب لاتصدكين اكو امل وبطيخ ...

كل انسان لازم يشوف المقدر على كصته ومانعرف شمضموم النه بين يوم وليله يتغير الحال...

واحتمال انام على تفائل وامل ونكعد على مصيبه تهد الحيل وماتخليك تعرف معنى للحياه...

شمه: لا ضرغام العمر كدامك وبعدك شاب ماوكفت الدنيا ولا انتهى العمر بعدك بأوله

بعد شهد راحت انساهه بس بعدهه الحياه مستمره ولازم نعيشهه مثل ما انريد مو مثل مايريدون الناس...

يجوز باجر تتندم على كل لحظه الم عشتهه ودكول ليش خسرت ايام من عمري بالحزن وما استفاديت شي...

ضرغام: لا ما راحت هنا شهد ( ودك على كلبه) هنا نارهه ماتبرد مدامني عدل

لا نقذتهه قبل ولابعد بنظرهه هسه تخليت عنهه
شمه نار وتسعر بكلبي شهد وما اعتقد يوم وتنطفي..

يوميه احلم بيهه وهي تصيح باسمي ويوميه انام واني راسي يوصل لحد الانفجار من اتذكر هذاك اليوم المشؤؤم وشفت زهره حياتي غركانه بدمهه...

اعرف دروبنه ماراح تلتقي  بعد وراحت بسبيل حالهه الله يسعدهه ومايشوفهه مكروه بس راح اضل احبهه ليوم الدين ...

ادعي الله ماقسمهه الي بالدنيا كون يقسمهه الي بلاخره ...

شمه: وانت ما ادور السعاده لنفسك وتتمناهه

ضرغام: خليني هيج حته اذا فكرت ارتبط اظلم بنت الناس وياي  واني كلبي موالي..

شمه: الله يبرد كلبك..

طلع ضرغام واني من اشوف حالته لا ارادي تنزل دموعي واني اتذكر شهد ...

مشتاقتلهه حيل واتمنى اشوفهه واسولف وياهه واسألهه مرتاحه لولا ...

شلون كدرت تزوج رجال جبير وتقوم بواجبه وهي بعدهه مكسوره من الداخل...

لحدما نمت واني دماغي ما ضلت شغله مافكر بيهه حته دخت وصار عندي صداع

غفيت وماحسيت على نفسي من التعب والتفكير وخاصه حادث قيصر وخوفي علي...

ثاني يوم من الصبح كعدتنه عمه فضه كالت راح يجي اخوي وعائلته كومن نظفن البيت وساعدني ...

بسرعه كعدنه  اني واسماء نظفنه البيت وبدينه نسوي غده الولد بعدهم نايمين لان عطله....

صارت ب11 كالوا اجوي اني بسرعه صعدت غيرت ملابسي اكيد بغداديات ومرتبات...

بدلت على السريع ورشيت عطر ونزلت سلمت عليهم اول مره اشوفهم...

اخو عمه فضه سعد ومرته ضمياء وبناته 2 يخبلن اكبر من عدنه وحده اسمهه بان ووحده عبير...

عرفتهم عمه فضه عليه ماضليت كاعده يمهم حسيتهم اهل واني غريبه بوسطهم...

سمعت صوت الولد كعدوا ضرغام وقيصر...
اسمع صوت ضرغام عالي ويضحك واني متفاجئه سبحان مغير الاحوال....

بدينه انصب بالغده اني واسماء وعبير وبان واكفات يمنه انيقات وحلوات شكد بسيطات حته ساعدنه ...

اتذكرت بلسم مدري شامبوا شلون تفيكت من اجت وسوت نفسهه نازكه ...

فات ضرغام من يمنه وهو يخابر اني واكفه اطلع فواكه حسيت على ضربه بخاصرتي...

شفت اسماؤ تأشرلي بعيونهه على عبير ضليت مركزه عليهه...

وهي عينهه على الطرمه واكف ضرغام يخابر وهي ابد مانزلت عينهه ولمعه الحب واضحه عليهه...

اسألوني عليهه هاي النظره شكد فضحتني وخلت حته المايدري درى بيه .....

ضرغام رجع فات ليجوه وهو اصلا ما دحك عليهه خطيه انقهرت عليهه حسيت بمعاناتهه والحب من طرف واحد عذاب....

شالوا الاكل واني ماكعدت يمهم استحي من خالهم وهم كعدوا سوه..

ضليت كاعده على الكرسي حته عمه فضه ما فقدتني التهت ويه اخوهه..

شويه واسمع قيصر يصيح شمه وينج؟؟
رحت اشوفه شيريد لكيتهم امبلشين بلاكل....

قيصر: تعالي تغدي شكو كاعده بالمطبخ

شمه: لا ما اشتهي تريكت متأخره بالعافيه
فضه: تعالي يا امي تعبتي انتي وعلى لحم بطنج من الصبح...

شمه: بالعافيه عمه والله ما اشتهي ....

صعدت ليفوك ما ردت اكعد وياهم استحيت واني اصلا صايره شكد انام وبسرعه انعس...

مددت بفراشي وما اعرف شلون غفيت واني مو من طبعي انام هيج اوقات....

فزيت على صوت اسماء وبنات خالهه كعدت لكيتهن كاعدات ومبدلات يكرزن حب ويسولفن...

اندمجت وياهن سوالف وضحك وهن حيل مرحات وحبابات من ضمن الحديث انذكر قيصر...

عبير: تعرفين اسماء قبل فتره رحنه للمشفى الي يداوم بيهه قيصر...

سوه فحوصات لماما وبعدنه كاعدين يمه ننتظر النتيجه واجت بلسم خطيبته السابقه...

بس كالتله من رخصتك راح وشويه واجه سألته ماما عليهه ....

كالهه والله يا خاله تعبتني يوميه الكاهه بطريقي ودازه احد عليه ..

ماما: ليش مترجعهه لعد يجوز غلطت وصارلهه درس...
قيصر: لا مو مسأله غلط بس هذا طبعهه واني ما احب المره الي تمثل وهي كدامي شكل ووراي شكل ثاني ...

هواي دا اسببلي احراجات ويه الدكاتره والكل عبالهم اني بعدني اتودد الهه وهي يوميه ناطه كدامي...

بس الظاهر اني منطيهه مجال ولازم اخليلهه حد حته تبطل هاي السوالف...

اسماء: ماما هم كالتله اذا تريد رجعهه بس ماقبل كالهه مستحيل هذا الشي

شمه: اسمع وكلبي يغلي على شامبوا ايبك لو يمي انتف شعرهه وحده وحده...

صار العصر وطلبنه نطلع نتمشى بالحديقه بس ما اروح لبستان علاهن...

طلعنه احنه 4 نمشي وبان صوتهه حلو ادندن باغاني شيرين...

رحنه كعدنه على النهر ونزلنه رجلينه بالمي واخذنه صور هن اول مره يطلعن بهيج اماكن وفرحانات...

كملنه وردنه نرجع شفت دراجه وسام كلتلهن شنو رأيجن اني اسوق وانتن اصعدن وراي...

حبن الفكره وردنه نغير جو صعدت وشغلت الدراجه وهن وراي وسام الظاهر قريب بحيث السويج عايفه بيهه...

اني ما اعرف اسوق بس ردت اجرب عبالي مثل البايسكل ....

جنت لابسه دشداشه رفعتهه شويه وشغلت الدراجه سقتهه مسافه شويه تقريبا راح نوصل البيت وهذني وراي يصفكن ....

ماادري شنو كدامي وطخيت بي وبدت الدراجه تفتر وتضرب بطناش والتاير الخلفي يفر بالهوا ....

مالت الدراجه ليورا واسماء والبنات وكعن وحده فوك وحده واني بعدني لازمه راس الدراجه وما اعرف شلون اوكفهه...

صحت اسماء ولج راح اوكع على راسي ساعديني  بس اسماء حايره بنفسهه ودكوم ببنات خالهه من الوسخ والطين...

مدري شدزت عبالي بريك وجان تنكلب الدراجه وشمرتنه على الجهه الثانيه حسيت اعظامي تكسرت ...

ويه شمرتي صحت اااخ يابه تكسرت اجاني صوت....  

قيصر: وجعا وانشاء لله مايضل عظم صاحي عندج انتي بنيه لو غضب...

اسماء اخذي البنات ورجعي للبيت وهاي الا اهد عليهه جلب علاهن

شمه: لاقيصر عليك الله اني شعليه هي الدراجه ماتسوق زين

قيصر: كومي لا ابتلي بيج مطلعه سيقانهه وتفتر اكسرلج هاي الرجل الي مطلعتهه..

شمه: دحكت على نفسي عزااا دشداشتي مرفوعه لحد الركبه ورجليه طالعه بسرعه نزلتهه ليجوه وكمت انفض بملابسي ...

بعدني مدنكه انفض ملابسي ماحسيت غير على قيصر سحبني من ايدي وقربني علي صرت ملاصقه بي ...

ايده مجبره والثانيه عبالك حديد رمشت بعيوني ما اريد اضعف بهاي اللحظه ماكدرت افكر بس بالفشله...

قيصر: شمه وحق الله وروح ابوي اذا لكفتج تفترين بطولج بلبستان مره ثانيه صدكي اضربج

انتي بنيه مو ولد بطلي هاي الحركات مال الشقاوه وشويه صيري رزنه موخفيفه سمعتي لو اعيد

شمه: هو يحجي وانفاسه تلفح بوجهي وريحه الجكاير سطرتني عبالك مخدر ...

عيوني مثل الي نعست واني مركزه علي وعلى ملامحه شلون يحجي...

قيصر: انعل حظج شمه ولج اصحي شبيج انسطرتي رزلتج لز غازلتج...

شمه: رزلتني طبعا وهاهي افتهمت كلامك راح اروح اني

مشيت كدامه واتخبط بمشيتي وضعي مريب وكلبي يدك الف ...

سمعت صوته وراي يصيح امشي عدل يولي احتركت علاهن ...

ضحكت على كلامه بسرعه شلتهه ركضه للبيت ...

بس وصلت لكيت اسماء تسولف على سوايتي المصخمه وخربانات ضحك...

من اتذكرت الموقف بديت اضحك بدون شعور لحدما اجتني الشرقيه ام المصايب..

وسام: يمه يمه وينج

فضه: غمه تغمك ولك هم جبتلي مصيبه ابو العلوم شلون بيك لاشغله ولاعمله بس تنقل اخبار القريه

وسام: اسمعوا واعوا براء بنت الشيخ سلمان قد بترت ساقها ولله الحمد

#يتببببع

اعذروني على التأخير واعرف البارت قصير بس خليته هادئ ومابي مشكله ومصيبه مالحكت اكتب لان يمنه خطار احبكم...