رواية وحوش بشريه الفصل الرابع وثلاثون 34 - بقلم Rozaya1122

#البارت الخامس والثلاثون
#وحوش بشريه
#روزايه

عذبو گـــــــلبي ومشو ..
وعافوني وحدي بدنيتي ..
وبحالي أبد ما فكرو..
وشـــــلون أطيب علتي ..
لا سألو شحاله صبح ...
مـن يسهر لحد الصبح ..
لا مرله نوم ولا فرح...
محد عرف بمصيبتي...
..

شهد: سد التليفون  من حسام واني واكفه كدامه على حيلي وكلبي يوجعني شصاير ضرغام...

ضرغام: هااا لاماكو شي تعالي حبيبتي خلي انام تعبتي اليوم...

شهد: لزمت ايده وحجيت بتوسل  ضرغام لادكول ماكو شي شصاير عمه فضه شمه بيهن شي؟؟

ضرغام : لاحبيبي مابيهن شي ما اريد اضوجج بتالي الليل...

شهد: الله عليك كول لاتخليني اتعذب للصبح..

ضرغام: شهد بيت اهلج محترك بتماس كهربائي وناقليهم للمستشفى...

شهد: شنوووووو؟؟

ضرغام: تعالي اكعدي ان شاء الله ماكو شي تعالي حبيبتي

شهد: ضلت عيوني مفتوحه على وسعهن واني اردد الي كاله ضرغام براسي انتبهت على نفسي وسألته...

ضرغام ابوي شلونه ؟؟

ضرغام: مابي شي جان طالع هو ونوفل بس الي بالبيت متأذين وبالمستشفى....

شهد: ما اتحملت حسيت جسمي قشعر شمرت نفسي بحضن ضرغام وبجيت بقوه ...

يمسح على شعري ويهدي بيه مايدري اني ابجي على حكمه رب العالمين الي اخذ حقي بساعات قليله...

فدواتك ربي ماتضيع عندك دمعه المظلوم وخاصه اليتيم ماضيعت حوبتي ..

بيوم الي هداني للشيخ وطلعت والدمعه بعيني فوضت امري لرب العالمين ورا ايام براء بتروا رجلهه..

وهاي هسه طلعت من يمهم ودعيت بحرقه كلب على لوعتي الي شفتهه والحرك يسعر بكلبي دعيت من كل كلبي تحس بهذا الالم سعاد ...

ضرغام: كافي حبيبي ابوج ومابي شي عليمن تبجين على سعاد وبتهه...

شهد: لاضرغام ماابجي عليهن ما اريد اكول مشمته لان حرام عليه بس شفت انواع العذاب من عدهن ...

ضرغام: شو تعالي بحضني وانعل روح سعاد وبراء يولي ترى طك كلبي كافي عادي ...

شهد: موترجع بكلمتك كلت ما اسوي شي ...

ضرغام: اي ما اسوي بس خليني احضنج معوز حنان...

شهد: ضرغام اني احبك لاتعوفني بعد والله تعذبت كل هاي السنين ..

ضرغام: اويلي ياب واني اموت عليج واعشقج
شلون اعوفج وانتي حلمي وامنيتي وهسه حصلتهه ...

شهد: بكد ماجنت مستهظمه ومقهوره على حالتي بس الخبر فرحني كون تضوكين لوعه الحرك ياسعاد طول عمرج ماتشفين منهه ...

ثاني يوم ماقبل ضرغام نرجع كال هو اصلا حسام خابرني كال لاتجيبهه هاي سوالف امي تخاف عليج ...

ضلينه يومين ابغداد وماكو مكان ماطلعنه اله اول مره اشوف بغداد ومن اطلع اشوف البنات شلون يدحكن على ضرغام وارجع ضايجه...

يوم الاحد رجعنه من الصبح علمود الطريق ماينسد لان شويه الاوضاع تخوف...

من وصلنه للبيت مالكينه احد بس عمه ووقار البقيه كلهم بالدوام...

من طبيت هلهلت وقار وباركولي عيوني تتفحص بالبيت شكد تمنيت اطبلهم واحسد شمه من تروحلهم...

مامصدكه هسه اني جنتهم ومرت ضرغام كلساع احمد ربي على هاي النعمه

صعدت للغرفتنه جانت هادئه تركيه وحلوه عجبتني حيل ...

البنات مرتبات ملابسي ومشتريات هوايه اشياء ..

لبست كلابيه خليجيه ونزلت جوا ضرغام ما ادري وينه طلع بسرعه...

كعدت يم خاله وضلت تسولف ويايه شلوني ومارتاحه وبهاي السوالف..

شهد: خاله صدك اهلي احتركوا؟؟

فضه: عود كلتلهم لاتهبطون البنيه ماتنظم السالفه بحلوكهم

شهد: لاسمعت ضرغام من يخابر بحسام وسألته....

فضه: اي يمه تماس كهربائي من الصوبه الكهربائيه وابوج ونوفل طالعين وسعاد وبراء نايمات ولاهبتهن النار ...

ربج ستر وتلاحكت الناس وفزعتلهم بيتهم رماد صاير

شهد: وهن شلونهن؟؟

فضه: سعاد محتركات رجليهه ويكولون منتبهه وزينه بس براء لان ماكادره تتحرك ماكلتهه النار وحالتهه موزينه الله يشافيهه...

شهد: الله يشافيهه...

تغدينه وصارت الساعه ب1 وضرغام ماشفته مدري وين راح صعدت لغرفتي انتظره ...

لحد ماصارت ب2 ونص يله اجه تلكيته من الباب واني اسأل بي وين جنت ...

باسني من راسي وماقبل يكول بس عندي شغل ما اعرف اطباع ضرغام بعدني جديده علي...

جنه نعسانين نمنه والنومه نومه لحد المغرب يله كعدنه ...

نزلنه سوه لان استحي بعدني واكيد هسه كلهم موجودين...

اول مانزلت تلكتني شمه واسماء لان ماشفتهم سلمت عليهم وكعدت ...

لمتهم حلوه ومتصافين وعدهم وسام سينما بحيث بين كلمه وكلمه لازم يضحكون...

عيني على ضرغام ما اعرف ليش ما اشوف هذيج الفرحه الكامله بعيونه المفروض هسه اسعد واحد بس اشوفه مهموم ويحاول يبين هو سعيد..

حته امه احسهه مامرتاحه وعينهه على ابنهه يمكن حاسه بي ما فرحان

خايفه اليوم بليل خايف يطلب مني يتقرب واني مامستعده والحرك بعده ما طيبان...

كعدت ويه شمه اسولف شكد متغيره وحته هادئه صايره وحليانه حيل شفت صورهه مال الكليه شكد انيقه...

عجبتني شمه كافحت وحدهه وتحملت الاهانه والضرب ماتسكت عن حقهه شكد جانوا يكولون عنهه السانهه طويل بس الوحيد السانهه ادافع بي...

من درست ونجحت وكفت الناس عند حدهه من يجيبون طاريهه عماتي مايكولون شمه يكولون المهندسه تستاهل شمه تعبت وكله هذا سوته وحده محد ساعدهه...

صارت ب11 صاحني ضرغام وصعدنه لغرفتنه مالبست ولا حضرت بس لبست دشداشه قصيره ومددت بصفه..

اخذني بحضنه ومبين متلهف بحيث كام يبوس بكل مكان حاولت ادفعه بس ماكدرت ...

كتله مو هسه ضرغام بس ما اهتم لكلامي بس باسني من المنطقه الي ورا اذني وكال اسكتي شهد ....

اني هم ضعفت بين ايديه ماردته يوصل ابد ويشوف الحرك حاولت بكل الطرق امنعه بس جان مصر حته نسه حالتي ماتتحمل عنف ..

اني هم نسيت الحادث بس بالي يم الحرك اذا شافه اكيد تلعب نفسه...

ايده تجول على طول جسمي وهو يبوس بركبتي ما ادري من كدما متلهف هيج رومانسيته عنيفه لو هذا طبعه بحيث كلساع اهمسله على كيف اريده يتذكر حالتي.... ...

لحدما دكت ساعه الصفر وماردت هاي اللحظه ولا هذا الموقف اوكع بي حته اتشتت بالي رغم ما انتهيت بين احضانه...

مندمجه ويا على اخر واني احس برومانسيته واشتياقه ولهفته الي ما الهه مثيل...

رفع نفسه من عندي وكام وكف على حيله لميت نفسي بسرعه وجريت الغطه تغطيت ...

دحكت علي قميصه مفتوح وشعره مهوس وعيونه منتفضه اكثر من حالته...

ما اتحملت نظرته ونظره الاستغراب بسرعه بجيت...

ضرغام: لاتبجين بس كولي منو سوه هيج بيج؟؟

شهد: ماحجيت بس ابجي واني لازمه الغطا وساتره نفسي...

ضرغام: احجي شهد ترى اعصابي وصلت حدهه

شهد: سعاد وبناتهه

ضرغام: وابوج العار وين عنهه؟؟

شهد: هو يكول  حيل بيج...من كلت هيج بسرعه لبس قميصه ورجع شعره بيده ونزل يركض ...

جريت دشداشه من الكنتور ونزلت اركض ورا لكيت امه مانعته من الطلعه بس هو عنده راي اخر وخر ايد امه وطلع يركض...

فضه: حسسسام  ولك يحسام الحك ضرغام هد على سلمان يبوو عليج يفضه ثارك مايخلص يضرغام...

حسام: شكو يمه عليمن يهد هو شباقي بسلمان...

فضه: روح يمه الحك اخوك لايسويله مصيبه تالي الليل ولاتنطي اسلاح طلع والشر بعيونه ما اعرف عليمن..

شهد: كعدت على الدرج ابجي اجت خاله اخذتني بحضنهه وتهدي بيهه باستني ومسحت دمعتي ...

هاي اول مره وحده تاخذني بحضنهه وتمسح دمعتي حسيت بالحنان الي فاقدته من عمري يوم....

فضه: اسكتي يمه مكتوبلكم شلعان الكلب من دون امه محمد استغفر الله لا اعتراض على حكمك يارب...

اسكتي يبنيتي ابيش اتنست امج بيج بس القهر حصلتي من ابوج ...

شهد: خاله اخاف على ضرغام ابوي مجرم...

فضه: لاتخافين مايهدأ باله اذا ماياخذ ثاره كل هذا السوا وبعده ماشفى كلبه ..

شهد: ضليت كاعده وابجي على حضي ومقهوره شلون اهل عندي والفشله شكبرهه كدام ضرغام...

شويه ورجعوا مامتوقعه ضرغام هلكد عصبي الي يشوفه يكول هادئ بس طلع العكس نار مايتفاهم .. ...

ماقبل احجي بالموضوع ابد بس سمعت من حسام من رايح هاد على ابوي وما موجود  بالبيت وكوه مرجعه حسام...

سحبني بحضنه ضل يلعب بشعري واني مغمضه ما حسيت على نفسي من نمت..
...

شمه: هذا البيت مامكتوبله الراحه ابد يوميه مشكله ماجانوا هيج بس اني وجهي فكر عليهم ولو صدك بيه لعنه شؤؤم ..

بهاي الفتره طلعت وقار حامل وحملهه ضعيف كالت عمه فضه خلي تروح يم اهلهه بس هي وامهه احسن ترتاح وحسام عنده شغل هم ببغداد بعد شكو ضاله وحدهه وتضوج...

ضرغام سجل للعمره يريد ياخذ شهد لان نفسيتهه متحطمه وبس تبجي ومثل المعقده لاتطلع ولا تكعد ويانه شكد حاولنه وياهه ومافاد ....

بيوم منهن اجه وسام يركض وهو يصيح يمه يمه....

فضه: ها ولك شكو خيرك؟؟

وسام: يمه براء بنت سلمان انطتج عمرهه

فضه: لا اله الا الله الى رحمه الله بعدهه شابه

شمه: جنه واكفين اني وشهد انصدمنه من الخبر استغفرت ربي ما يدوم الا وجه الكريم...

سوه سلمان فاتحه شكبرهه وكلهه راحت عزته احنه ماطلعنه بس الولد راحوا كالو حيل متأثر...

....

جان شهر الثاني سنه 2014 الوضع للاسوء المظاهرات والمعتصمين سادين الشوارع وكل الي يلزموا من الجيش يكتلوا  ....

الوضع مايبشر بخير وقيصر قليل احجي ويا وقتهم عكسنه مرات يخابرني ب11 بليل يكول الساعه يمنه ب7 لذلك موحيل نتخابر وهو هم ملتهي بالدوام....

ضرغام اخذ عمه فضه وشهد وراحوا للعمره وحسام ومرته ببغداد...

ضلينه اني ووسام واسماء عدهه تطبيق بس ماتكدر تروح تخاف لان الوضع موشي ...

اجه خالهه ابو عبير اخذهم بوقتهه شكد حاولوا ياخذوني بس علاهن ماقبلت ...

استمريت بالدوام بس شنو لازمه كلبي من الخوف من اشوف المسلحين...

المتظاهرات دمرونه راحت بيهه الابرياء صارت اعتقالات وغير القتل احنه جوه بالقرى الوضع اهدء يمنه...

من راحت اسماء كعدت يم علاهن على اساس 10 ايام ويرجعون من يرجع ضرغام...

ما الي علاقه باي واحد انطوني غرفه فوك وبس اقره لو اراسل قيصر بس حته النت صار ضعيف...

مرن يومين ضبط على سفر ضرغام ما ادري بعد هاي العائله اتحطم وهم جانوا سندي....

جانت عصريه وكاعده بالغرفه اتصل على قيصر ماكو النت مكطوع والشبكه زفت حته رصيد ماعندي...

نزلت جوا ادور على جاهل ادزه على رصيد من المحل اليمنه ماكو احد البيت هدوء  مدري وينهم...

ويه فوتي من باب غرفه علاهن سمعت صوت نسوان الصوت مو غريب عليه ايي هاي ام مناهي ...

تقربت على الباب واني اتلفت خاف واحد يشوفني سمعت بس كلمه من ام مناهي كالتلهه هاهي شيخه تمت العمليه مثل ما امرتي...

بسرعه تحركت من الباب لا يطلعن ويشوفني ضليت بالمطبخ وانب صافنه شنو العمليه وين واصله علاهن شنو تشتغل ....

نسيت عليمن نازله رجعت اريد اصعد الدرج الي بصف غرفه علاهن ويه وصولي لاول درجه انفتح باب غرفتهه

طلعت علاهن وام جاسم وام مناهي من شافني تفاجأن ووحده ادحك بوجهن الثانيه عرفن اني سمعتهن...

ام مناهي شيطانه حته شكلهه مقرف ضلت مركزه بوجهي عفتهن وصعدت بس صدك خفت شلون راح تخلص هاي 10 ايام وارجع لبيت عمي...

فتحت التليفون واني انتظر قيصر يتصل وينك ياحبيبي محد يوكف علاهن عند حدهه بس انته ....

ثاني يوم رحت للدوام كالعاده واشكال الحجي بالكليه وكلمن يكول  راح تسقط الانبار والي يكول راح نطلع منا...

احنه لان بالقرى ما نحس بالوضع بالمحافظه عبالنه مثل كل مره هوسه عشائر بس ماندري الانبار  راح تصير ساحه دم....

بيومهه اجه محمود حجه وياي كال بعد لا اداومين طريقج صعب وعلى ساعه اطك واحنه راح نطلع من الانبار اذا عدكم كرايب بالمحافظات اطلعوا على ساعه ينسد الطريق..

ما انطيته مجال يحجي لان مبين واحد ثرثار كتله شكرا وعفته ومشيت...

رجعت للبيت طول الطريق واني اشوف  اشكال المسلحين مال العشائر  المنظر يخوف...

وصلت للبيت بعدني انزع بحذائي ماحسيت غير واحد يجرني من حجابي وكعني بالكاع...

ووكعلي دك دفرات ببطني حميت نفسي بايدي بس اريد اعرف ليش شمسويه

عمي محسن يضرب بيه بكل قوته ولابس حذاء احس امعائي تكطعت ...

لزمته مرته يله كدرت اكوم على حيلي دحكت بالوجوه علاهن وعمي حسن ومرته كلهم محاوطيني وعيونهم كلهه شر...

محسن: تربات سناء ال..... تتواعدين ويه الولد ومخلصتهه مواعيد اليوم اسلخ جلدج احنه بناتنه بنص الكليات كله من فضه ام بغداد...

شمه: شبيك تلكيتني منو انت حته تسوي هيج موعبالكم كعدت يمكم هالعشر ايام صرتو مسؤؤلين عني وين جنتوا كل هاي السنين. 

علاهن: لا اجي اكص السانج فوكاهه تحجين وانتي مصخمه وجوهنه ام الكليات

شمه: اسمعي شيخه جبت طول عمري محد تعب عليه اني تعبت على نفسي وهذا الشفتوا والي جابلكم خبر اني مواعده خلي يتاكد منو هذا  طالب وياي كال بعد لا اداومين الطرق موزينه...

مو انتي ولا ابنج يتهموني باخلاقي والله هسه اخابر قيصر عليكم واخلي يشوفلكم صرفه الظاهر معنوياتكم مرتفعه مو صكاركم ماكو...

علاهن: هين يبت سناء اذا ما اخليج تبجين دم على هذا السانج تهدديني بقيصر الي  راح وبعد مايجي هين يا شيماء   اخذهه محسن وخليني اسمع صياحهه...

شمه: اجه محسن الكلب مثل الوحش سحلني سحل واني اصرخ بعلو صوتي ومايفيد صعدني الدرج سحل احس اعظامي تكسرت شكد حاولت ادافع وافلت منه بس رجال وضخم ماكدرت...

شمرني بالغرفه ونزع الحزام كل ضربه يضربهه احس روحي تطلع من الالم ...

اول مره انكتل هيج احلف واتوسل اني بريئه وماعندي شي بس نسيت الي كدامي حيوان وماعنده رحمه

ماعافني لحدما شافني اخذ النفس كوه جان يضرب بيه واني افكر اخابر قيصر واذا سمع شراح يسوي بيهم...

شمر الحزام واخذ جنطتي لان جنت لابستهه صفح الموبايل بيهه يعني ما اكدر اخابر ...

كوه كمت من مكاني نزعت ملابسي واني اشوف جسمي احمر دم الله لايوفقكم على هذا الظلم...

ضليت كاعده واني حايره شسوي ووين اروح وشراح تسوي بيه علاهن ...

بسلا شافتني او حست بيه اني شفتهه ياربي ساعدني اريد اوصل خبر لقيصر بس منين تليفون ...

ضليت بمكاني واني اون من الالم وينج فضه وينكم ولد عمي تعالوا شوفوا بيومين من بعدكم توالوا عليه الماعدهم رحمه...

الالم موتني احس جسمي مجرح الله لايشوفكم الراحه اريد تليفوني اخابر بي شلون محد ينقذني غير قيصر...

خليتهم ينامون ونزلت الساعه ب11 ادور على تليفوني اخابر بي لقيصر دورت كولشي ماكو...

لكيت موبايل على الشحن يمكن موبايل عمي حسن صرصور دائما يعوفه ع شحن وينام ...

بسرعه اخذته وركضت للغرفه قفلتهه وطلعت رقم قيصر دكيته وخليته على اذني واني كلبي يدك قبل الموبايل...

بده يدك وقيصر مايجاوب رجعت دكيت مره ثانيه دكه كامله وماكو...

بالدكه الثالثه فتح خط هستوه كال الوووو

شمه: قيصر اني شمه  الحكلي علاهن راح تموتني....

#يتبببع