رواية وحوش بشريه الفصل الخامس وثلاثون 35 - بقلم Rozaya1122

#البارت السادس والثلاثون
#وحوش بشريه
#روزايه

صافنين ...
وما لكَينا لصوبكم دوسة كَناطر .
دايخين آمن النشد ...
وآكَبال عين الناس مكسورين خاطر .
صابرين ....
وما مش ولا خيط غبشه يجيبكم ...
لا جنح طاير .
وين صرتوا ؟
الدنيا وحشه بدونكم ، والشوك فاير . ...

بعدني احجي ويه قيصر جان ينكطع الخط دحكت على الموبايل طلع مخلص رصيد والشبكه صفر...

شلون حظ فكر حته انت ماعندك رصيد ياربي سمعت صوته بلكي سمعني شحجيت محد يخلصني منا بس قيصر ....

نزلت ركض رجعت الموبايل همزين كلهه نايمه ومحد حس عليه رجعت لفراشي طول الليل ماغمضت عيني ولاشفت معنى النوم ...

احساس غريب يراودني لاول مره احس نهايتي وتحطيم مستقبلي على ايد علاهن ...

وينكم يولد عمي جنت عايشه مدلله بزودكم وشحده الي يمسني بكلمه وحده ...

مره وحده مدت ايدهه علاهن وقيصر غسلهه غسل خلاهه ماتعرف تمشي وطردهه هسه صفه الهه الجو وطلعت حقارتهه ...

ثاني يوم حته ماطلعت من الغرفه ولا اريد اشوف شكلهم التفكير موتني كلساع اروح لشباك ادحك على بيت سلمان ردت اوصله خبر بس ترددت...

لحد العصر واني الوب بمكاني الباب ما مقفول فكرت بطريقه انهزم بس كلهم موجودين جوه وما اكدر اطلع منين اطلع وعلاهن تارسه البستان بالزلم..

بالليل ماحسيت غير الباب اندفع حيل عمامي وعلاهن واكفين فوك راسي انتفضت من شفتهم سحبني محسن من ايدي ونزلوني جوا كوه امشي من الم رجليه مال الضرب ...

صدك انهانيت وانذليت ادفع بأيدهم حيل بس الضربات تجي على راسي من علاهن وغير الغلط والسب ...

كعدوني بالصاله وداير مدايره كاعدين هم ونسوانهم وكلهم تحت امر علاهن ويدحكون على حلكهه شتحجي..

علاهن: اسمعي يبت ام جاسم اجت عليج تريدج لابنهه وعمج انطاهه كلمه وباجر الخطبه
عبن انتي سويتي العار وانريد انسترج...

شمه: ياعار شتحجين اني مامسويه شي طالب اجه حجه وياي شنو العار بالموضوع...

علاهن: اسمعي وسدي حلكج وفوكاهه تعترفين ام الكليات تزوجين ابن ام جاسم وكلمه زايده ما اريد...

شمه: شتحجين انتي كل عقلكم منو سمحلكم تحددون من كيفكم زواج ما اتزوج يجون ولد عمي واحجي هذا الحجي كدامهم...

علاهن: اسمعي ولج صار سنين اريد ازوجج ولو ماقيصر واكف سجينه خاصره جان هسه جهالج تمشي وراج..

لابيت عمج ولابطيخ فضه راحت لبغداد والطرق انسدت وجيه مايجون لاتضلين تتأملين وتهددين

قيصر تبعده قارات من هنا ارضي بالمقسوم بدون مشاكل وسدي حلكج...

شمه: اسمعوني زين لو يبقى اخر يوم بعمري لو ماعادتكم وتقاليدكم ماتكدرون تذلوني بيهه

خلي يكون بعلمج والله اكلب القريه على راسكم وتعرفين شنو اقصد ياشيخه ...

لا انتي ولا ولدج يوكفون بطريقي وحتلو نفذتي مخططج اضل مثل الكابوس كدامج ...

عبالج تخلصين مني حته تشتغلين براحتج وانتي وام مناهي وراج وراج لاخر يوم بعمرج...

محسن:  اشو واكفه بطولج وتهدين وتتوعدين وعبالك زلمه انجبي وسدي حلكج لا اترسه رصاص وامشي من كدامنه باجر خطبتج ورا يومين زواجج وكلمه ثانيه اكص السانج..

تربات الشوارع حقيره عبالك زلمه واكفه كدام الشيخه

شمه: انت اخر واحد يحجي ضالم ومنافق وجبان لو بيك خير انت وامك طلعوا هذا السانكم من جان قيصر موجود ...

من سافر يله طلعت سباعيتكم ياجبناء تذكر شلون هانك وانت بهذا عمرك وهو بعده طفل لازم نسيت قيصر من تشوفه دكوم ترجف ..

انفعلت حيل واحس نفسي بدوامه حته ماعرفت شحجي واني اشوف حياتي ومستقبلي اتحطم كدامي...

كام محسن هو وعلاهن هدوا عليه وكل راشدي احس اذاني تنزف من القوه يضربوني بكل وحشيه ..

ادخلت مره عمي محسن وسحبتني منهم واخذتني للغرفه ..

انهاريت كعدت ادك والطم وابجي على حالي شلون راح ادافع عن نفسي شلون اكدر لعلاهن واني وحيده وماعندي سند..

وين اروح فكرت بخالي سلمان وكلت حته اتنازل عن الكاع بسبيل يخلصني منهم

وينك قيصر تعال شوف حالتي معقوله جبت هاي السنين انتظرك يوم يوم وتالي يزوجوني غصب ...

بجيت بجيت لحدما تعبت واني الوب بمكاني بس اريد احصل طريقه اخلص منهه

قفلوا عليه الباب يوم كامل لاتليفون ولا اكل وحته مي ماينطوني ...

احس امعائي جفت من العطش شكد بجيت شنو من ظلم وكعت بي وبدون ذنب ...

لاحول ولاقوه ضليت اتلفت بين الحيطان اريد معجزه تنقذني من هنا ضاع كلشي كافحت علموده وتعبت...

صار الليل اجت مرت محسن بيداء فتحتلي الباب وكالت يريدوج جوه كاعدين بس البسي وانزلي العريس جاي...

سوده بوجهج ياشمه تنزلين تشوفين عريس العمر ولك قيصرررر الحكلي انتهيت وانتهى عمري دخيلك ربي احس النار تسعر بكلبي ....

ماقبلت انزل وكمت اصيح وصوتي يوصل ليجوه حاولت وياي وماكدرت تالي عافتني ونزلت دزتلي محسن..

اجاني يركض والسجينه بيده راسهه حاد حطهه بخاصرتي فتحت عيوني على وسعهن على كميه الاجرام الي عنده..

محسن: كلمه وحده اغرزهه اكثر انزلي كدامي وحرف واحد ماتحجين وتفشلينه

شمه: احس راس السجين بده ينغرز بجلدي خفت حيل ابتعدت وكتله راح انزل بس وخر عني...

نزلت ويا لكيت نفس اللمه وام  جاسم وابنهه اول ما اجت عيني علي عطت بكل صوتي ...

هذا عريسج ياعلاهن اسعود جايبته عريس الي ليش شكالولج بايره حته اتزوج بهاي الطريقه لوتريدين تخلصين مني حته ماافضح عمايلج...

علاهن: احترمي نفسج واحترمي الموجودين لا ادوس على راسج ماعليكم بيهه هاي تحجي وحدهه..

شمه: احترم منو احترم ام جاسم ايدج اليمين لو احترمج انتي ام العمليات

علاهن: صافن عليهه محسن كوم كسرلي راسهه الي ماتحترم...

شمه: كام العبد المؤمر ووكعلي دك راشديات احس نفسي جبل واتحمل مامعقوله هلكد ضرب وبعدني واكفه بس من حلاه روحي واني اشوف كولشي بنيته انهدم

ادحك على اسعود  اجه يركض لزم محسن وبعده مني ...

بجيت على حالي الغريب فزعلي وعمي اخو ابوي سوه بيه هيج

دحكت على اسعود لابس دشداشه بيضه وهو اخرس وعنده فقاريه مدري خبال فاتح حلكه ويدحك عليه وراسه يفتر ...

حاشا خلقه الله ما اعيب علي ولا انقص من قدره يبقه انسان واكيد ضحيه مثلي لان هذا شنو والزواج  اكيد ورطته امه...

علاهن: باجر تنخطبين وتزوجين ورا يومين واذا ماعاجبج ادفنج بليله ظلمه وكولي علاهن ماكالت...

شمه: عادي مشهودلج موجديده عليج ادفنين بنصاص الليالي ...

اسمعي هالكلمتين واكيد ما راح تنسيهن خليهن يرنن باذانج طول العمر...

دمار هاي القريه على ايدي وتعرفين كلش زين شنو اني واذا مافهمتي كلامي روحي لصاحبتج ام مناهي تعلمج شنو...

وانتو الي اسمكم زلم وكاعدين اذا ما ادفنكم بهاي ايدي ما اكون شمه ...

وحق الله وسمواته اله اشعل بيكم القريه من راسهه لساسهه بس اصبرولي ...

عفتهم وصعدت ركض واسمع الهد مالتهم والغلط عليه بس لازم ادافع بكل قوتي ولو كل قوه ماضلت عندي ولاحيل ....

كعدت بالكاع واني اتذكر قيصر وكلامه اتذكرت من كال اول اسبوع ارجع هو عرسج كلشي مر عليه مثل لمحه البصر ...

غزله وخوفه وصياحه اخر مكالمه بيناتنه وهو يوصيني ادير بالي على نفسي واكل زين ...

تحس بيه ياقيصر تدري شمه ضاعت وانتهت تدري راح تسجل على ذمه رجال ...

مجرد ما لفظت هاي الكلمه انتفضت كل جوارحي مستحيل اسمحلهم يسوون بيه هيج ...

مر الليل باتعس حالته تفكير وقلق والالم الي يكطع بداخلي ما اريد بصبح الصبح واشوف مصيري يتحدد واني لاحول ولا قوه....

ثاني يوم اسمع الهوسه ومتحضرين للخطبه واني بعدني بحاله صدمه مامصدكه الي يصير وشلون بين يوم وليله تهدمت حياتي...

صار يومين ضبط بدون اكل ماعدا المي يفوت ابطني ...

ما اتحملت لازم اواجه ولازم ادافع لحد اخر لحظه ما استسلم ابد...

طلعت من الغرفه واني عباره عن كتله مال نار امشي وارتب بالكلمات براسي شلون راح اواجوهم واحجي وادافع عن نفسي
كل اعضائي ترعش مدري من العصبيه مدري من الخوف لازم اخلي حد لهاي المهزله...

نزلت ووكفت كدام الشيخه علاهن
مجرد مااشوفهه ابلع لساني كاعده بكل اريحيه ومشكله الجنكال الذهب بشيلتهه الف دكه بوجهه وعلامات الكبر والتجاعيد ماخذه حقهه شناشيل الشيله نازله على وجهه وكاعدين عمامي التحف العارات داير مدايرهه ...

حجيت بكل قوتي كتلهه بيبي حرام الي جاي تسوونه اني ما اذنبت وما مستعده ارتبط بهيج انسان لو يبقى اخر يوم بعمري ...

واني ماسويت شي ادورين حجه حتى تخلصين مني الله مايرضى بالظلم شلون تزوجوني لانسان عقله موتمام وفوكاهخ اخرس على شنو معاقبتني...

بعدني احجي اجاني صوت عمي محسن ولج بنت الكلب واكفه بطولج وجاي تحجين وتعلين صوتج كدام شيوخ لا اجي اكسر راسج ساقطه ام الكليه

حجت عجوز البين عوفهه محيسن هاي يرادلهه كتله زينه اشوفهه حليب امهه ...

ولج بطول القندره واكفه كدامي تعلين صوتج والله اذا ما اكسر راسج وادوس عليج انتي وامج ما اكون الشيخه علاهن
فوك كسره وجهج وتالي ادافعين احمدي ربج ما ذبحناج وغسلنه عارج ...

شمه: انتي اكبر ظالمه وربج ماراح ينساهه الج بس اصبري ولا عبالكم اسكت والله اخلي الناس تحجي بسالفتكم وخلي هذيج الساعه بحسبولكم حساب مدامني بريئه راح ادافع بكل قوتي..

يمهه طاسه كزاز بيهه مي شمرتهه عليه اجت بالحايط ماخفت ولا ترددت بالدفاع عن نفسي..

ماتخوفيني حتلو اتسلخين جلدي اذا ما اخذ حقي منكم ما اكون اسمي شمه

علاهن: خاييه من كون غمه الغمتج ولكم كوموا لزوموهه الي الا اجويهه على حلكهه ماتكدرولهه هاي الساقطه بنت ام الرجوله عليمن اطلعين اكيد على امج الي طفشت ابني من ديرته

شفت عمي كام يريد يهد عليه واني متحظره وواكفه على الدرج شلتهه ركضه خليت بس دخانتهه وراي طبيت للغرفه وقفلت الباب وكلبي يدك الف ...

اسمع صوته يهد ويفلت عليه بس كلهم عارات يخافون من امهم امداكم وامده امكم السعلوه...

لهنا وبس ياعلاهن اذا ما احاربج حرب وما اخليج تنفذين مخططج ما اتسمه بأسمي
بس بلأول لازم اطلع منا لان اكيد عجوز البين ماتخليني اذا ما احصل كتله ودكول تجاوزت عليه ...

تقربت على الشباك فتحت البرده شفت بستان بيت سلمان كدامي واشوف الجهال تلعب
اووف ياربي ساعدني اخلص من علاهن الي حاكمتني حكم النمرود ...

فوك كل هذا تهمتني بتهمه تكسر الظهر واذا سمع سلمان اكيد يوافقهم براي ويزوجوني غصب عني ياربي ساعدني ...

حاولت بكل الطرق انهزم وماكدرت حته اكثر من مره لزموني واشبع كتل...

ماكو منفذ انهزم منه واني محبوسه بالغرفه وحته ازلامهم محاوطين البستان متوقعيني انهزم شلون بيه ياربي....

العصر اجو سحلوني سحل محسن وحسن والسلاح براسي نزلوني للصاله وخلوني احاجي الشيخ من ورا الباب ...

ضعفت حيل دموعي تنزل مطر وين جانت مضمومه الج ياشمه طلع الدلال مال فضه من خشمج ...

سألني الشيخ واني جنت ناويه اكول لا ماموافقه بس غرزه السجينه والالم الي بده يسرى بخاصرتي خلاني اتمسك بروحي ...

هاي اللحظه لحظه ضعف استسلمت بيهه وصرت على ذمه رجال وقيصر ااااخ ياقيصر

ااااخ ياوجع كلبي بيه حسره شكبرهه انهد حيل يومين عبالك سنتين من التعذيب النفسي ..

خسرت كلشي انتهيت وانتهى حلمي كلشي انذبح ودفنته علاهن

دحكت عليهه واني اشوفهه هي وام جاسم كاعدات يضحكن ونظره الشماته بعينهن وعبالك عدوتهن...

تقربت عليهن ومديت اديه كدامهن وحجيت بكل قوه وحرقه كلب..

شوفن هاي اديه اثنينهه هذني الي راح يشهدن على دمارجن بس اصبرن اثنينج...

صعدت للقبر مالتي واسمع ضحكتهن واستهزاءهن دمعتي بعين واني اعاتب بعمه فضه شلون عافتني...

شكد محتاجه لحضنهه وكلامهه الي يرد الروح محتاجه غضب ضرغام وياخذ ثاري مثل ما اخذ ثار شهد...

محتاجه حسام وكلامه الهادئ ويحل الموضوع بدون هوسه...

محتاجه وسام يحشش عليه ويخليني ارجع مثل قبل ضحكتي ماتفاركني...

محتاجه اشمر نفسي بحضن اسماء وهي تهدي بيه ودكول كلمتهه المشهوره انتي شمه القويه....

اااخ ياكلبي شكد اتحملت لوعات وينك قيصر محتاجتك حيل كولشي بيه ينتظرك حته تخلصني من هذا الظلم...

لميت رجليه وخليت راسي بيناتهم بجيت بكل قوتي على حظي الاغبر على حياتي الي انتهت..

5 ايام بس شهدت على دماري حته الشبكات والانترنيت ماكو لاخابرت قيصر ولايكدر يتصل بيه....

بعدني كاعده ابجي حسيت على حركه بالغرفه رفعت راسي ادحك ماكو شي ...

افتريت بالغرفه واني عندي احساس اكو احد يراقبني قريت ايات بكلبي تقربت على البرده فتحتهه دنيا العصر والشمس طالعه ...

لمحت بعيني اكو دخان خفيف يطلع من راس كل نخله يتراوالي لو حقيقه هذا...

ضليت مركزه واني اشوف الدخان يتصاعد بصوره كثيفه ويرسم اشكال مخيفه بالجو واشكال بشر شاب وطفله ومره عجوز...

بلحظه رمشت عيني اختفى كلشي استغفرت ربي دخيلك يا الهي شنو هاي...

ركضت على القران مخليته ويه كتبي طلعته وكمت اقره بكل خشوع من الخوف اردد الايه اكثر من مره ....

ماحسيت على نفسي شلون غفيت ما ادري حلم مدري حقيقه وشلون غفيت واني اقره قران ....

احس نفسي مو طبيعيه ابد اكو شي محاوطني ويفتر وراي...

شفت نفسي كاعده بوسط البستان ومن نفس المكان الي طلع من عنده الدخان وشفت بيبي نوريه الله يرحمهه...

ركضت احضن بيهه وابجي واشكيلهه شصار وشسوت علاهن بيه ...

مدت ايدهه على خدي مسحت دموعي وحجت كلمات متقطعه كوه تحجي مثل الطفل الي يتعلم القراءه...

شمه انتي محفوظه لاتخافين علاهن موتهه على ايدج دحكي هذا البستان انتي راح تسوي رماد راح يصير ارض منبسطه..

شوفي هاي النار الي بكلبج هاي نفسهه النار الي تشب هنا وتاكل الاخضر واليابس ...

شوفي هذولاك الناس انتي راح تنقذيهم وراح ربج يعوضج عن صبرج وعذابج...

تركت ايدي وراحت التفتت على المكان الي اشرت علي وكالت تنقذيهم..

جانو مسجونين بحاجز وتعبانين حيل شلون المعذبيهم وعيونهم عليه وتترقبني وكلهم زلم ...

فزيت من نومتي الي ما اعرف شسميهه غفوه بحدود الدقائق لو حلم لو كابوس...

كلبي نار ومشتعله بي الالم يحرك بروحي حرك وين جانت مضمومه الي ...

اتذكرت الحلم شنو معناته ومنو الي انقذهم وشنو اني حته احرك القريه وعلاهن ..

فوضت امري لله وضليت طول الليل اني اقره قران واصلي حته اسمع حركه بالغرفه بس ما اخاف مدام انيسي يمي ماخفت ابد...

شكد اتمنيت اسمع خبر من قيصر او من بيت عمي لو اسمع بيهم جايين بس كل السبل انقطعت...

صرت عباره عن جسد كل روح واحساس ماعندي ما ادري شلون خلصن اليومين واجه موعد اعدامي الي هو زواجي...

ما اتذكر اي شي بس مرت محسن تحظر بيه وتريد تخليلي مكياج وتلبسني بدله ..

هم مصدكين نفسهم هذوله البس واكشخ واني عقلي وكلبي يم قيصر ..

اريد اعبر عن ذره من مشاعري بهذا الوقت يخوني التعبير ما اعرف بشنو جنت افكر وشلون مشت رجليه لبيت ام جاسم بدون هوسه ولاعرس حته رحت بدشداشه عاديه...

كلبي ينبض ومنتفض وماقابل على استسلامي شلون حكمت علي وعفت حبي وين وعدي لقيصر واني انطيته وعد انتظره لاخر عمري...

سلمان ما كلف نفسه ويسأل مع العلم وصلهم الخبر بس اكيد تشمتوا بيه ...

مابيدي شي غير اوكل اموري لرب العالمين هو الي اخذ حق شهد ياخذ حقي...

دخلت هذيج الغرفه الي هي قبري غرفه عروس بسيطه ام جاسم محضرتهه ما اعرفهم ولامختلطه بيهم...

بس عدهه جنه وحده مرت جاسم وهي ورجلهه بكد سلمان ...

دحكت بوجوهم واحد واحد كل الي ادحكله طبيعي بس من دحكت بوجه ابو جاسم...

اجاني هذا الاحساس الفضيع الي من يجيني اخذ نظره على انو هذا الانسان ظالم وشيطان...

ضليت مركزه بوجهه هو جبير بالعمر بكد سلمان عمره بالخمسين بس ما ارتاحيتله ابد ...

صعدتني ام جاسم للغرفه واني مثل الرجل الالي المسير بعدني بحاله صدمه ومامصدكه الي جاي يصير...

كعدت على الجربايه بدشداشتي ضلت تحجي فوك راسي تريدني احضر نفسي لابنهه صحت بيهه ماتدخل وتعوفني ...

طلعت وعافتني دقايق ودخل ابنهه هو مو مخبل فد مره ويعرف الزواج بس وضعه موتمام....

بده يتقرب عليه شويه شويه واني ارجع ليورا وكفت بكل قوتي وهددته بلاشاره حته مايقترب بس الظاهر عقله فاصل.....

بعده يتقرب دفعته بقوه وكع بالكاع ويه وكعته سمعت صوت طلقات ورمي كثيف...

اسمع صوت هوسه جوا ومن ضمن الصوت صوت علاهن ...

اجاني صوت شعلوه وهو يصيح شمه وينج اطلعي.....

#يتبببع

شاركوني بتوقعاتكم الحلوه