السابع والعشرون
بشريه
( بارت طويل تعويض عن البارحه احبكم❤)
سلمولي عليهه بكد معزتهه
اول مره احس
تخنكني عازتهه
اني مقصر وياها هوااااي
من ترحون...
امانه اليعتنيها يبوس كصتهه
...
فضه: ياستار ياربي ولك منين اتجيب هاي العلوم...
وسام: والله هسه ابن نعمان كال البارحه بترو رجلهه ...
فضه: ليش هي مو صارت زينه؟؟
وسام: يكول صاير عدهه التهاب بالعظم وما مراجعه للطبيب عبالهم يروح والبارحه مسويلهه ....
شمه: وسام تستاهل هديه على هذا الخبر
فضه: اعوذ بالله بنتي لاتشمتين بيهه يرحمهه ربهه ويبتليج ..
صح الي سوته جبير بس اكو رب رحيم مواحنه بني ادم ماعدنه غير الحقد...
ااوف ياضرغام الحقد الي بكلبك شسوه بيك كتلت 3 شباب وخسرو دينتهم وهاي البنيه تعوقت وكعدت بالبيت ...
والله اليستر من نار كلبك الي لسه ماخمدت وبعدك ادور عن شي يبردهه....
يارب ياحنان يامنان برد كلب وليدي وماينزرع الحقد والغل بكلبه وهو بعده شاب اجعله من عبادك الصالحين.....
شمه: طلع وسام واني احس الفرحه شكبرهه بداخلي حته نسيت الفشله مال قيصر...
براء ربج بالمرصاد بهاي رجلج الي رحتي بيهه واتفقتي ويه الفلاحين حته يدمرون شهد ...
هسه انبترت وكعدتي يم سعوده فدواتك ربي ماتضيع حوبه اليتيم عندك.....
بعد سعاد وسلمان كون حوبت شهد قريبه واشوف سلمان بارذل حال...
ماتعدي للظالم وماتروح دمعه اليتيم هيج كل الي اذى شهد بهاي الفتره القليله الي خسر حياته والي راح يضل يعاني مدى العمر....
بدينه نسوي عشا وكل ما نتذكر الدراجه نخرب ضحك وبلاخص الفشله من قيصر ...
اجه وسام يصيح من الباب ويهدد ويتوعد...
وسام: منو الراكب دراجتي اليوم احط راسه بالتاير وافره ببستان علاهن...
فضه: هذا اللسانك الاكشر مايعرف يسولف بس المصايب دخيلك ربي شنو من ولظ...
وسام: والله اليوم انعل والدي الي ركب الدراجه وكالبهه واني هسه جبتهه من الغسل...
فضه: ولك مصخم احنه نسوان منو يركبهه شوف ربعك الهتليه الي مامخلي واحد مامصادقه..
وسام: كلهه نكرت لعد ماكو غير علاهن ركبتهه ...
فضه: امشي منا من صوتك يرتفع ضغطي ولك من دون اخوتك الله مطيح حظك حته بالدراسه مافلحت ابو البنات ابو العلوم...
وسام: نصي صوتج فضحتيني هسه يسمعج خالي شيكول عليه
فضه: يكول فضه عدهه ولد لا حظ ولادبان بس رجلي 24 ساعه تفتر وماكو خبر ماجابه..
وسام: صرت مو زين زاركونه مووو اريد اشوف منو يجيبلج اخبار بعد
فضه: ولك زاركونه بعينك شو ماتحترم امشي ولي منا...
شمه: نسمع عمه فضه ووسام وميتين ضحك عليهم من يريد شي يكولهه الماسه ومن يداهر بيهه يكولهه زاركونه ....
كلما اسمع صوت قيصر انهزم للغرفه الفشله شكبرهه واحسه يتعمد يحرجني ...
وسام طلع وما عرف اني الي سويت هيج لان مخبل شيخلصني منه....
بليل كلنه اتجمعنه واخو عمه فضه يحجيلنه عن قديم الزمان هاي العائله كلهم عسل عبالك فضه وتحجي ...
قيصر جان طالع وضرغام ماندري بي وين من العصر مرات يغط غطات مانشوفه وحته اذا يسألونه مايجاوب...
بعدنه كاعدين ونسولف شفنه ضرغام اجه وصعد بسرعه حته من سلم كوه طلع السلام منه مخنوك...
شويه وصعدت ورااا دكيت الباب ماجاوب دكيت مره ثانيه هم ماكو رد...
فتحته وطبيت لكيته كاعد ومخلي اديه فوك راسه بدون مايعرف منو بسرعه كال عوفوني وحدي...
شمه: اني شمه ضرغام
ضرغام: الله عليج عوفيني شويه وبعدين تعالي..
شمه: ماشي راح احسب نص ساعه واجي
طلعت من يمه واني افكر بحالته شصاير لو شسمع وهيج رجع واليوم سمعنه ضحكته حته فرحنه من سمعناهه...
ضليت كاعده بالغرفه انتظر تصير نص ساعه بس دكت 30 دقيقه رجعتله ...
لكيته على نفس كعدته وعيونه حمر تقربت يمه...
شفت دمعه حايره مانعهه الكبرياء من النزول بعدهه بطرف رمشه ومسحهه...
شمه: ضرغام شبيك شصاير؟
ضرغام: شهد حامل...
شمه: عزااا منو كالك؟؟؟
ضرغام: بنت خالج نعمان زغيره شفتهه تلعب وسألتهه اسئله عامه ومن وصلت لشهد كالت حامل...
شمه: ضليت ساكته ما اعرف شحجي..
ضرغام : هسه رضيتي فضولج وعرفتي شبيه هسه عوفيني وحدي وسدي الباب وراج وطفي الضوه اريد انام
شمه: الله يصبر كلبك عفته وطلعت بس سديت الباب نزلت دمعتي الله يعينك ياضرغام ..
جاي يتعذب باليوم الف مره وكلبه يحترق مثل الورقه ...
يجوز لو يسولفولي هيج قصه ما اصدك اكو هيج حب وهيج وفاء...
ماكدرت انزل جوه بسرعه يبين على ملامحي ومابيه حيل الاسئله..
ضليت كاعده بالغرفه سمعت صوت سياره قيصر معناتهه اجه بسرعه كمت عدلت شالي وطلعت انتظرته يم الدرج...
شويه يله صعد من شافني عكد حواجبي بتفاجئ...
قيصر: خير ياطير شعندج واكفه هنا ؟؟
شمه: اريد احجي وياك بشغله
قيصر: يله احجي اسمعج
شمه: لا هنا خاف يسمعنه ضرغام تعال بالغرفه
رحنه للغرفه والباب عفته مفتوح مابيه حيل سالفه....
قيصر: احجي شمه شعندج؟؟
شمه: ضل واكف يم الجربايه واني بسرعه نزلت دموعي...
قيصر فدوه حباب اريد تاخذني لشهد عليك الله والله كلبي دا يتكطع على ضرغام واليوم سامع هي حامل...
قيصر: شكو تبجين واذا حامل لعد ضرغام شيدري من تزوجت اكيد تصير حامل...
شمه: سويهه لله وخليني اروح حتلو انت تاخذني فدوه بس اسمع اخبارهه واشوفهه مرتاحه....
والله اذا طلعت مرتاحه ضرغام يرتاح هم قيصر فدوه...
قيصر: انتي تعرفين عواقب الروحه واذا طلع رجلهه موخوش ادمي وسمع سلمان نرجع للمشاكل من جديد
ابويه انتي مو كولشي نخلي عاطفتنه تتغلب علينه احيانا اندوس على كلبنه ومشاعرنه بسبيل نتجنب المشاكل والمصايب...
شمه: زدت بالبجي واحجي الله عليك سويهه لله فدوه قيصر لخاطر عمه فضه
قيصر: يله كافي خبصتي الدنيا بس لسانج رشاشه وانتي كل حظ مابيج دموعج ورا الباب..
باجر الصبح اخذج بس بطلي بجي
شمه: شكرا شكرا قيصر ربي يخليك ال.......
ردت اكول الي واخر حرف انتبهت على نفسي بسرعه سكتت ...
بس قيصر ما عداهه على خير بدت خطواته تقترب باتجاهي واني ارجع ليورا...
عينه مركزه بكل تفاصيلي مخلي ايده بجيبه لحدما طخ ظهري بالميز ...
نفس موقف الكاونتر انعاد مره ثانيه ماردت استمر وابين اكثر قويت نفسي وكتله
قيصر شدسوي ابتعد عني ...
قيصر: شردتي دكولين وسكتي ...
شمه: ماردت اكول شي بس الله يخليك النه ..
قيصر: النه لو الي؟؟؟
شمه: لا اني شعليه وخر حباب اريد انزل ..
قيصر: شمه شو دحكي بعيوني...
شمه: وليش ادحك شو ابتعد ترى ميصير هيج
قيصر: شنو الميصير ؟؟
شمه: ميصير هيج تسوي ماكلت شي اني ...
بعدني احجي جان يخلي ايده جوه حنكي ويرفع راسي ...
كلبي دكاته تضاربت حاولت ابعد نظري عنه واشتت بالي ماريد اضعف ...
قيصر: دحكي هنا يولي شبي وجهج اصفر ومن تشوفيني دكات كلبج تنسمع..
شمه: مابيه شي بس كوه حجيتهه واحس الرجفه بدت بشفايفي نتيجه لمسته اضغط على نفسي بس ما انفضح ويبين عليه....
قيصر: اسألج سؤال واحجي بصراحه..
شمه: لزمت كلبي من كال اسألج اتمنيت يجي احد ينقذني من هالموقف..
قيصر: بعدج تحبين رافد؟؟
شمه: لا لا ما احبه السوا بيه ماانسى وتهمني وماسمعني شلون احبه
شفته عقد حواجبه وتفاجئ بهاي اللحظه انتبهت على زله الساني...
رجع ليورا وابتعد مسافه حسيت صار جدي اكثر
قيصر: بشنو تهمج؟؟ موكلتي ما تفاهمنه ياتهمه هاي...
شمه: اي اي قيصر مو تهمني على سالفه اخته براء ويكول انتي ماتحبين اهلي وتريدين تأذيهم...
اول مره اكذب وارتبك بهاي الصوره ضل صافن بوجهي وملامحه تغيرت
قيصر: ماتعرفين تكذبين بس ما راح اسمع من عندج اسمع من رافد نفسه بس ياشمه اذا طلع غير الحجيتي احاسبج غير حساب...
شمه: لا قيصر اني كذبت عليك بشغله وراح احجيلك اني ماعندي علاقه سابقه برافد....
وهو جان يحبني واني ما احبه بس من كثرت المشاكل وهو الوحيد الواكف بجانبي كلت اقبل بي واحبه بمرور الايام حته اخلص من سلمان
بس من صارت سالفه براء اجه هنا وهددني يطلكني وضلينه مشاكل فتره وبعدهه انفصلنه...
قيصر: هاهي افتهمت باجر حضري نفسج اخذج الصبح وروحي غسلي وجهج لاتنزلين هيج...
شمه: طلع واني ركضت ادحك على وجهي بالمرايه شبي ويكول غسلي ...
انتبهت على خدودي حمر وشفايفي ترجف شسويتي بروحج ياغمه دومج معثره والسانج متبري منج..
بسلا صدك يخابر رافد وذاك الثاني يكوله جانت تحبك يايمه عزااا الله لايكولهه...
ضليت الليل كله افكر بالصار دماغي متضارب ساعه افكر بقرب قيصر وتصرفاته وساعه بسالفه رافد...
عفيه دماغ مايتعب بيوم لايمل ليل نهار افكر وافكر وبدون جدوى وتالي اوكع نفسي بمصيبه....
ثاني يوم كعدت من الصبح حجيت لعمه فضه كلتلهه قيصر ياخذني لشهد خطيه فد فرحت وكالت وصلي سلامي الهه...
بدلت وكعدت انتظره ينزل اخاف اصعد من سالفه البارحه الكل نايم حته محد شافني
نزل مبدل وعطره ورا وسويج السياره بيده لابس بنطرون اسود وتشيرت قريب على الجويتي او نيلي غامق هيج مدرج لونه
طالع حلو حيل شرب جاي على السريع وطلعنه صعدت يمه واني اكرص نفسي حته ما ابين على نفسي من الارتباك...
مشينه مسافه مد ايده على المسجل فتح اغنيه فاضل عواد واغنيه قديمه...
يلي جمالك سومري ونظرات عينك بابليه....
ويلي شوفك عيد الي واشعل شموعك بديه....
جانت كلامتهه تلامس الكلب طول الطريق هدوء وساكت ولا عبالك هذا قيصر البارحه...
وصلنه للباب ردت انزل كال لاتتاخرين وخاف مايقبلون شي خابريني بسرعه ...
نزلت واني متلهفه اشوف شهوده صار 6 اشهر ماشايفتهه ...
دكيت الباب وهو مامسدود مفتوح شويه اجه طفل فتحلي الباب وراح يصيح امه
اجت وحده بكد عمه فضه اخذتني بالسلام واللسان الحلو كلتلهه اني بنت عمه شهد
خطيه شلون ملكه تلكتني عيني على بيتهم جبير حيل ومبين هادئ ...
كعدت بالصاله واجت وحده اكبر من هاي الفتحت الباب وهم سلامهه يخبل...
صاحت شهد شهوده يمه تعالي شوفي المفاجأه
شفت شهد نزلت من فوك لابسه كلابيه راقيه حيل وطويله واردان ولافه شالهه باحكام وجهه قطره مكياج مابي....
نفس ملامحهه الحزينه وعيونهه الذبلانه بس شافتني نزلت ركض على الدرج ....
كمت تلكيتهه تحاضنه ونبجي بدون سلام ولاكلام بس جانت دموعنه هي الي تحجي احس بغصه شهد من تبجي وعبالك جبل محمل هموم...
طبطبت على ظهرهه الحجيه الجبيره وجرتهه كعدتهه وشالت الشيله مالتهه الي لابستهه وتمسح بدموع شهد ...
قشعر جسمي من شفت هذا المنظر عبالك طفله باحضان امهه...
كوه طلع صوتي وسألتهه شلونج شهد مشتاقتلج؟؟؟
جاوبتني بصوت متقطع وشهكه اني زينه الحمدلله...
كالت الحجيه كومي شهوده اخذي خطارج وروحي لغرفتج وسولفن على راحتجن...
صعدت وياهه للغرفه جانت غرفتهه بسيطه مابيهه شي غرفه نوم خشب مو راقيه بس بسيطه ومرتبه....
كعدنه بالكاع دموعهه تنزل شلال على خدهه اول سؤال الهه
شهد: ضرغام شلونه؟؟؟
شمه: اذا انتي زين هو زين
شهد: شمه اني زينه ومرتاحه من ضيم ابوي بس بعدني مكسوره ومااكدر انسى الصار عيوني تعبت من البجي وذبلت من السهر...
شمه: احمدي ربج مرتاحه وخلصتي من سلمان وسعاد....
شهد: تعالي احجيلج واريد منج تنقلين الحجي لضرغام احلم بي زعلان عليه ومايحاجيني وكلما اريد احجي ويا يصدني ويكول انتي متزوجه ....
شمه: بدت تحجيلي من يوم ماضرغام كتل الفلاحين لحد هاي اللحظه ...
من سمعت هيج وما متقربلهه وموقف الشيخ ومرتاحه حضنتهه وبجيت بحرقه واتخيل ضرغام اذا سمع الخبر شتكون ردة فعله...
تذكرت سالفه الحمل مالتهه وسألتهه لعد شلون حامل انتي؟؟؟
شهد: عزااا العزاني منو مطلع هذا الخبر يولي من اول يوم كعد الشيخ هنا وكال انتي بنتي ولهذا اليوم ما صعد هنا ولا حجه وياي غير بس شمحتاجه
هاي سعاد اطلع اشاعات لايصدك اي حجايه ضرغام وهاج هاي انطيهه اله....
وكوليله شهد تحبك للموت ومدام بيه النفس ماانسى لحدما الله ياخذ امانته وخلي يديرباله على نفسه
شمه: كامت من مكانهه وجابت علاكه سوده فتحتهه شهكت وضربت على صدري...
عزا العزاج شهد ليش هيج مسويه بشعرج يولي ضرغام يحبه وهو حلو حرامان
جانت كاصه ضفيرتهه صغيره حيل وحته قراصتهه مشكله بيهه...
شهد: هو لان يحبه ما اريد اطوله المن اربي بي اشو من جان شطوله اخذوا مني وهسه كلما يطول اكصه
جرت شالهه ونزعته والصدمه الاكبر من شفتهه مثل شعر الولد وعبالك شعر وسام
صدك انقهرت وبجيت على لوعه كلبهه شلون هيج مسويه بشعرهه وشكد تحبين ضرغام لعد وعدهه امل تنجمع بي...
ضلينه نسولف شويه وحجيتلهه عن الاحداث الاخيره وسولفتلهه عن براء...
ما انطت رد فعل بس كالت حسبي الله ونعم الوكيل ...
اطمئنيت عليهه وسلمت عليهه وطلعت لكيت قيصر ينتظرني ...
قيصر: حلتلج الكعده طولتي هوايه
شمه: دخل اصعد واسولفلك...
تحركت السياره بديت احجي لقيصر بالتفصيل وعلى كلام الشيخ اني احجي وهو يسوق وكلساع يلتفت عليه وان مندمجه...
قيصر: خوما ناويه تحجين لضرغام بس طمني عليهه ولاتفتحين موضوع زواجهه
شمه: لاقيصر حرام والله احسه جاي يموت على البطيء خطيه على الاقل ينام مرتاح..
قيصر: شمه ضرغام راح يضل بأملهه ويرجع يتأمل من جديد واحنه وسلمان مانتراهم خلي يجي يوم ويتعود على فراكهه ..
شمه: خلي نفسك بمكانه تكدر تتعود وانت حبيبتك ويه غيرك
قيصر: سدي حلكج ولج شو صاير السانج طويل ولو هو يايوم جان كصير ...
شمه: شبيك ماخذ عليه نظره الساني متبري مني ترى لازم احجي وادافع عن نفسي لعد اظل ساكته...
قيصر: المهم حاولي لاتحجين التفاصيل لضرغام ..
شمه: ماشي... وصلنه للبيت قيصر وخاله طلعوا للشط
سولفت لعمه فضه وخطيه فرحت وكالت اركضي بشري ضرغام ...
صعدت هستوني اريد ادك الباب فتحه يريد يطلع
ضرغام: شمه خير خوماكو شي شبيج جايه ركض؟؟
شمه :اي اكو شي تعال احجيلك
ضرغام :تعالي سولفي اسمعج
شمه: تدري وين جنت ؟؟
ضرغام :وين؟؟
شمه: يم شهودتك...
ضرغام :تحجين صدك يولي منو اخذج وشلونهه وصحتهه شلونهه
شمه: بلحظه تحولت معانيه للفرح واللمعه بينت علي لاتخاف عليهه زينه وتسلم عليك
ضرغام: حالتهه شلونهه ورجلهه خوما مثل سلمان
شمه: كعدت احجيله الصار ساعه عيونه تضحك وساعه تجمع الدموع بيهه ....
ماكدرت اطول بالحجي وينهار كدامي انطيته العلاكه وطلعت...
ردته يختلي بنفسه لان خاف ينهار ومايقبلهه كدامي لذلك عفته وحده
ضلت عيني على الدرج كلساع اكول هسه ينزل وماكو...
اشتغلت ويه اسماء وعبير وبان هم ويانه بين سالفه وضحكه خلص الوقت ...
واكفه واحس اعظامي عبالك بيهه شلل مدري مصخنه ...
رحت غسلت بمي بارد ولا فاد لحد العصر انتهيت كلت لاسماء بعد ما اكدر اوكف احس الحراره تطلع من اذاني وعيوني....
انطتني حبايه ومددت اريد اغفه شويه بس الظاهر صخونتي قويه...
صار العشا وتعشوا واني مانزلت وراهه تخربط اكثر كمت ارجف ومتغطيه بكومه واني عبالك حاطيني بالمجمده ...
والشهر جان السابع يعني بعز الحر عيوني غوشن من الحراره واحس كلبي بده يضعف...
كعدت يمي اسماء وعمه فضه هم صعدت يمي بس اني من اتمرض انهد للكاع...
ملفلفه نفسي بالبطانيه وارجف انفتح الباب اسماء وقيصر...
ماادري بروحي شحجي كمت اهلوس ..
ولج اسماء الحكيلي راح اموت واني بعدني مامتزوجه...
اسماء: لاماتموتين هسه تصيرين حصان وتزوجين وتخلفين..
شمه: امشي ولج ما اكدر افتح عيوني...
قيصر: اسماء روحي جيبي العلاج من جوه ...
شمه: قيصر ما اريد تضربني ابره...
قيصر: ليش تخافين ام اللسان
شمه: اي اخاف توجع
قيصر: امشي اسماء شبيج صافنه جيبيهم وتعالي خلي نسكتهه ترى ماتدري شتحجي
شمه: بس طلعت اسماء تقرب عليه جر ايدي ويقيس بالنبض واني افتح عيني ادحك علي من يرفع راسه اغمض..
اااافيش ياعطرك احسه دخل لرئاتي ووصل للبنكرياس ...
قيصر كاعد يمي ولازم ايدي لااا هوايه عليه اليوم
عساني ما اطيب واضل مريضه ويضل لازم ايدي وادحك بوجهه ...
قيصر: شمه كومي اكعدي شويه وافتحي حلكج خلي اشوف بلاعيمج
شمه: كعدت وفتحت حلكي طك الضوه بيهن وفحصهن ...
جر سماعه اسماء من المجر وخلاهه على كلبي ..
شحجي على كلبي كام يعزف اشكال الالحان ويتراقص باجمل النغمات ...
ما اندل منين اطفي فضحني رفعت راسي شفت نظرات قيصر عليه وايده بعدهه تفحص...
قيصر: شبي كلبج هيج يدك سريع
شمه: مريضه؟
قيصر: مريضه؟؟؟ شمه هدي حالج وسيطري على نبضاتج..
شمه: انعل حظج شمه انفضحت ياربي كوه افتح عيني وكلبي دكاته بي وماتزداد...
حسيت على انفاس قيصر قريبه وتلهب بوجهي فتحت عيني اجت عيني بعينه ...
نزل ايده من السماعه وضل مركز بوجهي...
قاطعت هاي الصفنه جيه اسماء انطت لعلاج قيصر وشفته يخبط بلابره واني كل عقلي كعدت ابجي اخاف منهه
قيصر انطيني علاكه حبوب ابلعهه بس ابره لا ما اريد فدوه
قيصر: سدي حلكج ترى اليوم كلج على بعضج مو طبيعيه كومي اسماء ضربيهه وغطيهه خلي تنام
شمه: ماريد ماريد خلوني اموت وما اضربهه
قيصر: اختاري اسماء تضربج لو اني راح احسبلج للعشره بديت واحد اثنين......
شمه: روح روح اسماء تضربهه
قيصر: عفيه ببنيتي صيري سباعيه واسمعي الكلام...
شمه: ضربتني اسماء الابره وبسرعه غفيت لان دايخه ونعسانه والصخونه شاله جسمي ...
ماكعدت غير لثاني يوم جسمي نحلان شلت راسي من المخده شفت الكل بعده نايم ..
الساعه ب7 ونص تحركت من مكاني ونزلت ليجوه صبحت على عمه فضه كاعده وحدهه تسوي ريوك...
رحت غسلت ولميت شعري سمعت خطوات على الدرج خليت الشال على راسي شفته قيصر نزل مبدل وبيده جنطته نسيت اليوم احد ولازم يداوم..
قيصر: صباح الخير
شمه: صباح النور راح تروح
قيصر: اي محتاجه شي
شمه: لاسلامتك
قيصر: يله مع السلامه وصيري حبابه وعاقله موتسويلج مصيبه...
شمه: الله وياك لا ما اسوي مصيبه...
طلع قيصر وانقبض كلبي ضجت حيل يمكن قربه هاي الايام خلاني ما اعرف شأريد كلي على بعضي مخربطه
ساعه اكول احبه وساعه لا ما اريد اتلوع بنار الحب ...
ثاني يوم راحوا بيت خالهم رجع البيت هدوء حيل حته ضوجه وملل صار عدنه...
....
بيوم منهن عصريه كاعدين واجت علاهن بس سمعت صوتهه دب الخوف بكلبي حته نظراتهه غريبه مو مثل قبل...
فضه: هلا عمه تفضلي زارتنه البركه
علاهن: هلا يفضه تعالي عندي وياج حجايه
فضه: تفضلي عمه خير ان شاء الله
علاهن البارحه جنت بعزيمه بالمدينه وشفت ابنيه سبحان الله الخالقهه تخبل وفكرت نخطبهه لضرغام...
فضه: ياريت عمه بس ضرغام موصغير واحنه نختار بدون علمه وهو حته ما فاتحنه بموضوع الزواج ...
علاهن: اسكتي انتي البنيه دارسه وحلوه امشي اسماء صيحي اخوج خلي احجي ويا
اسماء: نايم بيبي قبل شويه اجه من الدوام
علاهن: لاتكسرين الكلمه وتردين عليه اكلج امشي يعني امشي
اسماء : حاضر بيبي
شمه: راحت اسماء وهاي علاهن نظراتهه تكصني كص حته ما ارتاحيتلهه سويت نفسي مامهتمه وطبيعيه
نزل ضرغام شعره مكفش خطيه هستوه نام
ضرغام: ها حجيه شلونج خير شكو مكعدتني
علاهن: يكعد يوليدي هذا عنتر ابن شداد ما اكدرله انت السبع تفهم الكلمه
وانت كبرت وامكم كبرت تريد تفرح بيكم واحنه ماعدنه ولد غيركم عبن خلفه عمومتك كلهن بنات بس سلام عدنه وناويله على زواج
ضرغام: والمطلوب مني شنو اروح اخطبله
علاهن: لا يبعد بيتي لكيتلك مره معدله حلوه ودارسه ومثقفه
ضرغام: حجيه رحمه لجدي شتحجين انتي منو شاكيلج حالي وكايل اريد اتزوج
علاهن: يبيي كبرت عمرك راح يطخ الثلاثين خلي هذاك الشايب معاند انت شجاك
ضرغام: سدي الموضوع هذت ولاتفتحي بعد ولا بعدين ...
وهاي الفكره شيليهه من راسج واذا اريد اتزوج اني اكلكم روحوا خطبوا فلانه مو انتي تختاريلي...
يله من رخصتكم اريد انام وانصحج تزوجين قيصر وفاتحي بالموضوع
علاهن: روح الصوج موبيك كلكم طلعتوا على ابوكم تخطبون بغداديات ...
وانتي غمه بنت سنيوه مو طابه طالعه بطولج هم مفكره ازوجج...
شمه: بيبي ليش ماتتعوذين من الشيطان لايسمعج قيصر وتصير مصيبه وانتي كبرتي وانخاف عليج يرتفع ضغطج وتروحين بيهه
علاهن: لا اكوم اكسر العصا على راسج بيش طالبتني اموت بنت ام الرجوله
شمه: وبنت ابو النسوان هم لاتنسين لو ابنج مقدس تدرين بيت سلمان شيسموني؟؟
يسموني علاهن لان نسخه من عندج اني لذلك لاتعبين نفسج ترى اهد قريه كامله ....
علاهن: عمت عينج تهد قريه ام اشعفه ( ام كفشه) والله لو ما هذا قيصر بطريقي جان اعرف شلون اتوليتكم واحد واحد...
بس حبيب مات وخلصت منه وعافلي حبيب ثاني واكف بزردومي..
شمه: انطيج مي ادفعينه من زردومج
علاهن: كومي منا لا بارك الله بيج تتمسهدين بنت سنيوه وشمرتني بالعصا...
كمت من يمهه بعد ما داهرتهه وخليتهه عصبيه حيل تستاهل علاهن لاضغط لاسكر عبالك حصان
....
يمر اليوم هادئ حيل وماكو شي بيوم منهن نزلت اريد اغسل ملابس لكيت عمه فضه كاعده واسماء يمهه واثنينهن يبجن...
شمه: شكو عمه ليش تبجين خوما صاير شي؟؟
اسماء: شمه قيصر راح يسافر
شمه: وين يسافر وغير مثل كل مره يروم ويرجع
اسماء: لا شمه طلعتله بعثه دراسه بالسويد وراح يسافر ياخذ بورد من هناك
شمه: ماكدرت انطق حرف واحد واني اشوف احلامي كلما ابنيهه ترجع تنهدم من جده وجديد
كعدت وياهن وابجي فضه عبالهه اواسيهه بس ماتدري بجمره كلبي يجوز اكثر منهه....
حسيت بالتعب مددت على التخم واسماء تلعب بشعري تعرف لوعه كلبي شكبرهه
عمه فضه راحت تقره قران كالت بلكي يهدء كلبي...
عيوني بالفراغ واني اشوف احلامي تتلاشي واحد ورا واحد كلما اتقدم خطوه وافرح ارجع لنفس القاع...
بعدني مدده وصافنه واسماء تلعب بشعري فززنه صوت قيصر...
قيصر: شيسوون حماماتي؟؟
شمه: كمزنه اثنينه اسماء ركضت حضنته واني ادور على شالي خليته على راسي
اسماء: قيصر لاتسافر والله تاكلنه الناس وراك واولهم علاهن ضيع بلياك...
قيصر: دكولوا يالله حته بعدهه الموافقه ما اجتي ولاردت اخبركم بس اكيد هذا وسام الي ماتنظم الحجايه بحلكه...
شمه: يحجي ويه اسماء واني واكفه بعيد عنهم التفت عليه...
قيصر: اويلي ياب حته شمامه تبجي عليه تعالي هنا خلي اشوف عليمن تبجين
شمه: تقربت باتجاهه صرت قريبه عليهم وكتله اني لا ماابجي عليك ابجي على بيبي نوريه مشتاقتلهه
قيصر: يله على نوريه على نوريه ولايهمج هم مصدكج...
راح اشوف امي واصعد ابدل واخذ حمام وانتن تحضرن حتى نطلع نتعشه برا...
اسماء: يعيش قيصر يعيش ولج شمه ركضي يرادلنه ساعه نبدل...
شمه: من كال اطلعجن نسيته دموعنه وركضنه فوك طلعنه الملابس كلهه ونلبس وننزع وحايرين شنلبس
اسماء لبست بنطرون وفوكا قميص للركبه واني ردت البس فستان بس مليت من هذا الاستايل قررت اغير ولبست بنطرون كابوي وقميص طويل لونه زيتوني وشال مشجر...
صدك طلعت حلوه وناعمه وجنت مندثره بالفستان الطويل ...
نزلته جوا لكينه عمه فضه متحضره وتنتظرنه صاحت قيصر يله يمه كملنه واقفل البيت اخوتك معزومين يم عمتهم...
طلعنه صعدنه بالسياره من صعدنه اتذكرت موبايلي على الشحن نزلت اركض اريد اجيبه...
تلكاني قيصر بالمطبخ يريد يطلع اول ماشافني وكف متفاجئ وعيونه تصعد وتنزل على طولي...
ارتبكت من نظراته حيل حسيت نفسي عبالك مالابسه شي من ورا عيونه...
بده يتقرب باتجاهي واني واكفه اتصنمت صار قريب عليه ...
قيصر: شنو هالجمال شمه وين ضامته جنتي...
شمه: سكتت ماحجيت الخجل اخذني والساني المدفع بهيج مواقف ينعكد
قيصر: شو ساكته وين السانج ؟؟
شمه: قيصر نسيت موبايلي خلي اجيبه وعمه تنتظرنه خطيه...
قيصر: يله بسرعه روحي وتعالي..
شمه: بسرعه جبته واجيت لكيته بعده بالمطبخ الظاهر ماناوي يعديهه على خير...
ردت اطلع واسوي نفسي مامهتمه ومو ابالي شي بس قطع طريقي بحيث طخ ظهري بالباب ...
رفعت راسي ودحكت بعيونه وهاي اول مره اسويهه واتمعن بعينه ردت اشبع منهن شوف خاف يسافر...
عينه بيهه لمعه الحب اعرفهه ماجانت قبل هيج رموشه طوال وحته مارمش وهو مدحك بوجهي....
هاي اللحظه جانت بس القلوب تحجي واترجم نظراته لا اني ولاهو رمشنه وعبالك واحد يريد يشبع شوف من الثاني...
قرب نفسه عليه اكثر وايده اليمنى بجيبه واليسرى على الباب واني صرت بنص حضنه ...
ردت اطلع وافلت الموضوع زاد عن حده بس ماكدرت جان محاوطني وبس اتحرك اطخ بي...
شمه: قيصر وخر خلي اروح شجاي تسوي انت ؟؟
قيصر: والله ما اعرف شجاي اسوي وشيصير بيه من اشوفج اني بنفسي ما اعرف
شمه: قيصر فدوه ابتعد هسه تجي عمه
قيصر: شمه اني...........
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!