رواية وقد كانت صدفة الفصل الثاني وستون 62 - بقلم غـدير عبداللّٰه

"وقد كانت صدفة"

تعبت من الشمس واني ادري راح ارتاح
من تفتحلي شعرك و اگعد بفيه
و أخاف من الحچي وبسكوت اتمناك
مثل طفله فقيره تريد ترچيه
اذا حبيت غيرك يعني ما حبيت
واذا حبيت غيري اتمهل شويه
__________________________

شهد:يي والله خفت بس مو عليك لا على الامانه خاف تموت وما ادري بيه شنو هيه وهم خاصره رصيد عيني ضلم وحرمات...

اشتر:الله يطيح حظج

شهد:لا لا لا ما اسمحلك تغلط عليه تره اتصرف غير تصرف وياك...

اشتر: يي وشن... ونغلق الخط

شهد:يا خاف خلص الرصيد ههه همزين...

غنى: يي وبعده شنو الي صار؟

شهد: بعده هاي المكالمه صار كل يوم يتصل عليه ونگعد نسولف لحد ما اخفه وهو مستمر بالاخير من ما ارد عليه يغلقه ويأيس مني، ومرات من يتصل عليه لو يسولف واني مستلمته دگ تصنيف بعده ستمرت الايام لحد ما اجه يوم الي فاض صبره مثل من گول وگال...

اشتر: شوفي شهد هسه انتِ عرفتيني وعرفتي كُلشِ عني اني هاي طبيعة شغلي وهاي حياتي تقبلين تكملين باقي حياتج ويايه ونتزوج ونكون عائله؟

شهد: هههههههه...

اشتر: ليش تضحكين، تره دا احجي جد والله!

شهد: اسفه والله بس اجت بالي اغنيه، بدنه نتزوج بالعيد ونعمل عيله وبيت جديد، وضحكت...

اشتر: خرب يومج على كُلشِ تصنف، هسه شنو گلتي؟

.. تمام موافقه...

..صُدك والله معقوله!! اني بحلم لو علم دقيقه،ولك اگرصني اخخخ خرب غيرتك...

.. هههههههههههه شبيك والله دا احجي صُدك...

..بكامل قواج العقليه؟

..العقليه والنفسيه هم...

..ولج احبج موت

..واني لا

..لعد عليمن موافقه؟

..هيج عجبني..

..عاااا لعد شوكت خاف من يبيض الديچ؟

..لا من تطلع نخله برأسك...وغلقته بوجه

ميسم: بس اريد اعرف شنو العجبه بيج اشو تفاهتج واصله مرحله وذالته ذل للولد.

غنى: حبيبي شغل ام عباس السحاغه وين يغوح...

شهد: ههههه غسمه بعد، تدرون والله حتى اني مصدومه من نفسي شنو العجبه بيه ما ادري اذا اني حتى روحي كارهته هو شنو الحبه بيه ما ادري، وسألته هم مره بعد ما اجه وخطبنب جان يگول...

اشتر: اول شي عجبني بيج وكاحتج ولسانچ الطويل الي حتى اطول منج...

شهد: اله طولي اذا حجيت عليه ابطل ما اوافق واتزوجك...

اشتر: ههههه واخيرا لگينه نقطه ضعفج شنو هي، يي وبعده يجي تفاهتج وتصنيفج الي يضحكني...

شهد: شنو داده شايفني قرقوز گدامك وتضحك؟

اشتر: ههه لا والله مو قصدي بس تجبرين الواحد لو باسوء حالاته يضحك، احس گلبج نظيف ميشيل حقد وغيره رغم رعونتج بس گلبج ابيض مو مثل الباقين تشوفي ساكت وميحجي وهو من جوه لي جوه، وهذا الي خلاني احبج واموت بيج، وها شغله ثانيه شجاعتج وعدم خوفج من احد حتى لو كنتي انتِ الغلطانه متنطين بنفسج ابد وهاي اكثر شغله احبه بالمره...

شهد: ها ابو النسوان صارت بيه مره، مو تدري بيه رعنه واسويه وارفض...

اشتر: شحدج حتى اجي لبيتكم اخذج واشرد...

شهد: وين؟

اشتر: شلج دخل بمكان...

شهد: يي وخطفتني وشنو تسوي بعد بالله؟

اشتر: ها تردين اشرحلج شنو نسوي..

شهد: نجب لك، قصدي شنو تسوي بعد ما تاخذني يعني وين نگعد،ليروح بالك بعيد...

اشتر:حجه بعصبيه، هاي عليمن نجب؟

شهد: برود، عليك

اشتر: احترمي نفسج لج، واخيس طبع بيج هذا...

شهد: براحتك محد گلك تعال واخطب غصبن عليك تتحمل شوف اني گلت الك من البدايه اني وحده محد يتحملني مزاجي برتقالي كل ساعه اريد شغله اسوي الي يعجبني ومحد يمنعني ف يعجبك يعجبك متريد الباب يوسع جمل حبيبي!

اشتر: من يروحلج فدوه فقار وجماعته يبعد الحبيبي الطلعت من شفايفج مثل العسل...

ايلاف: خيه هذا نايم على وجه نيوم...

غنى: عمي هاي النسوان الحوك، صُدك من گالوا هم گطمه وبيه بله، بالله هذا النايم على وجه وينه ماعندج صوره اله؟

شهد: صور مو صوره عندي، وطلعت الهن الصور...

ميسم: باوعت عليه وباوعت للصوره، اگلج شگد طولج؟

شهد: 149سم

ايلاف: وهو؟

شهد: 190سم

غنى: عزه ها شنو ولج وين لگتي يعني لحد لوين توصليله من توگفين يمه؟

شهد: اني هذا القاهرني وكملت بقهر، اوصل شويه فوگ من الحجاب الحاجز...

ايلاف: دا اتخيل شكلكم بويه فرق السما عن الگاع.

شهد: اخخخ اسكتو اني شايله هم العرس شلون اوگف بصفه...

غنى: عادي ما بيه شي لو يشيلج لو نخلي طبله جوه البدله وناخذلكم صوغ...

شهد: غنى سكُتي حبابه لتحجين على طولي والله اموت قهر حتى حبطل ما اتزوج...

ميسم: هههههه لا بس دا اتخيل شلون اذا حبلت قنينة غاز عينه وعيانه... وذني ماتن ضحك وهيه خطيه نقهرت باقي شويه وتبجي.

ايلاف: لا سكتوا لحد يضوجه هاي شهود الورد ضد الحراره والبرد...

غنى: داده خو مو تزعلين بس دنتشاقه مو بس انتِ تصنفين على ابو شهاب...

شهد: لج لتقلدين عليه قلدي عليه عادي هو لا...

غنى: اها بدة سوالف المختوبات اني اقاغ على ختيبي، اهووو بعد شي فضج بطلابه...

شهد: بعده اجه وخطبني مره ثانيه وسوينه المشيه...

ابلاف: ضلينه نضحك ونسولف بيومه صُدك تونسنه بس خطيه ميسم تعذبت بجهاله خاصه البنات ما ادري شبيهم يتنحسن وهيه تدوهنت ف خابرت سيف اجه اخذه واحنه هم اجه علينه ايسر ورجعنه للبيت...

مرن سبوعين وصار العقد مال شهد ورحنه هم بس اني وغنى وميسم وخواته جايات بس احنه معازمه احد اما العريس امه وخواته ثنين وخلاته هم ثنين...

بدة مراسيم العقد واجة غنى وگفت فوگ راسه لان بعده بنيه اما خواته كلهن متزوجات بس هيه الصغيره عقدوا واخذوا الموافقه، لهناك واذا خطيه دمعت وگامت تبجي حتى بجتنه وياه اجت امه حضنته بعدين اجت وحده من خواته اخذته تبدل...

اجت غنى يمنه وميسم جانت جايبه وياه بس بناته الولد ضل يم بيبيته ضلينه نسولف لهنك واشيل راسي واشوف وحده من گرايب الولد تباوعلي وتبتسم اني هم جاملته وبتسمت ورجعت اكمل ويه البنات لهناك وجان تعله الهلاهل وتنزل شهد طالعه تجنن، نزلت هيه واخته جانت لابسه فستان لونه جويتي طويل وطالع فد شي عليه، جان غنى تگول..

غنى: اها مو گلت الكم هاي سوالف المختوبات من فوستانه الازغق...

ميسم: ههه ولج لتسمعج وهسه تفتح حلگه علينه وبعد شيسكته...

ايلاف: اشش اسكتوا دخل الولد.

غنى: اللهم صلي على محمد يمه شنو هذا التيل، اخخخ...

ميسم: ضربته بعكس ايدي، اشش ولج فضحتينه نصي صوتج، اجه الولد وگعد يمه وامه وخواته يهلهلن، بس لايگين البعض والله...

ايلاف: يي الله يحرسهم من العين...

غنى:امين...

شهد: اجه گعد يمي عود سويت نفسي خجوله اجه باس راسي رديت، شلونك ابن عمي؟

اشتر:هههه خرب غير تستقر لطفيه...

شهد: مو صوجك صوجي اني السألت عليك مو وجه سلام انت...

اشتر: لا عمي نعتذر، بس شلون طالعه اليوم؟

شهد: بتسمت، يي شلوني؟

اشتره: احححح بويه صاروخ شل حالي شل...

شهد: حجيت بخجل، شكراً حبيبي

اشتر: اخخ من رحت فدوه لبراطمج الي ينگطن عسل لا نوب مخليه احمر الله يساعد المگرود گلبي..

شهد: هسه هذا مدح ذم؟

اشتر: مدح من نوع خاص حبيبي...

شهد: شويه اجت ماما گالت يله لبسوا الحلقات وگفنه ثنيناتنه وهم نفس القهر، رافعه راسي واباوعله لا والمشكله لابسه كعب عالي، وهو مدنك عليه ويضحك ضربته بطنه بدون ما احد ينتبه وهو خطيه غمض عيونه حيل متالم...

.. حتى مره ثانيه لتضحك على طولي...

اشتر: اكلج بس اني هذا الوضع ابد ميصرفلي لازم نشوفلج حل... واخذ الحلقه وسحب ايدي لبسنياه وباسه اخخخ فد خجلت واخواته يصفگن ويهلهلن وهو ابد ما رفع راسه وباوع لان يستحي، اخذت اني الحلقه وومد ايده خليت ايدي بصف ايده عززه عبالك بته رفعت راسي وباوعتله وهو كاتم ضحكته لبست الحلقه حيل، بعده گصينه الكيكه وشويه وراح مدري شنو عنده حيل ضجت غير كون نگعد لوحدنه نسولف هاي حتى البنات شغلوا اغاني اني ما الي واهس اجت غنى...

غنى: شبيج حبيبتي ليش ضايجه؟

شهد: لا ماكو شي عادي...

غنى: عليه سوالفج؟

شهد: لا والله ماكو شي بس البدله شويه ضوجتني...

غنى: ولا يهمج حبيبتي اجيب الج دشداشه لبسيه وضلي بالمكياج والتسريحه عادي...

شهد: ههههههه والله جان سويته عادي منو الغريب بس عيب من خالاته فشله وله اني منين استحي منجن...

ايلاف: راح الولد وشغلن البنات اغاني ورگصوا شويه وجانت تجي هاي المره تگعد بمكان غنى لان راحت يم شهد...

.. اگلج خاله انتِ شنو تصيرين من العروس؟

ايلاف: صديقته، بس ليش خاله تسألين؟

.. اذا اخطبج لابني اهلج ينطوج؟

ايلاف: ضحكت ورفعت ايدي البيه حلقه، خاله تره متزوجه اني.

.. يا خاله عذريني والله عبالي بعدج ما مزوجه شفتج حليوه وصغيره ما شفت الحلقه بيدج عذريني بنيتي...

ايلاف: لا خاله معذوره مصار شي... وبعده راحت صار وقت لازم نرجع گلت لاغنى حخابر امير يجي علينه لان صار الليل، تصلت عليه گال شويه واجي عليكم وصُدك ما طول بسرعة وصل سلمنه على شهد وامه وطلعنه...

صعدنه وسلمنه رد بس عليه وغنى يحجي وياه من وره خشمه سالتي...

غنى: ايلاف، لعد وميسم؟

ايلاف: تصلت على سيف على اساس يجيه شو تاخر...

امير: لعد ما صحتيه تجي ويانه واني اخابر سيف اكله لتجي...

ايلاف: يي والله خطيه حتى متگدر بناته وياه لعد دقيقه اصيحه واجي، نزلت ورحت اصيحه لگيت وحده من بناته نايمه والثانيه عده گلت اله هيه ما گالت لا...

ميسم: يا ريت لعد هاج اخذي غزوله واني اجيب ازل واجي بس على كيفج خاف تگعد...

ايلاف: اخذت البنيه على كيف شلته لان نايمه وهيه لبست عبايته وشالت بته وطلعنه وصعدنه وبعده مشينه...

وصلنه لبيته نزلت وراحت ودت ازل واجت اخذت غزوله مني وتشكرت من عدنه وراحت خابر رجله گال اله احنه جبناه وبعده رجعنه للبيت...

غنى: دخلنه سنه جديد وامير بعده مصر ميحجي وياي بس اذا مثلا مرته ماموجوده يحاجيني من وره خشمه، وهيه حتارت بيناتنه مره تواسيني ومره وياه، تعودت عليه وعلى طبعه ويايه حتى بابا شكم مره حجه وياه گله ماكو شي بينه...

جانت هاي السنه الاخيره الي وسنه تخرجي تركت كُلشِ تركت المشاكل تركت حتى اهلي اريد اتفرغ الدراستي اريد اطلع الاوائل على دفعتي اريد اثبت الامير انو من صُدك اريد اكمله واريد احقق طموحي اعتمد على نفسي اريد اصير اني...

اريد اثبت الماما مو شرط اله زوج يسندني مو شرط احد يصرف عليه لا كل هذا جنت مخليتهم گبالي حتى اصير سند النفسي...

واثبت الايلاف اني گده لان جانت الوحيده الي تواسيني الي تصبرني وتشجعني جانت تگولي ادرسي كملي حققي الشي التردي محد يفيدج بهذا الوقت بس الشهاده هي التشفعلج اما الزواج خلي ظرف بأي وقت يوصلج...

اما عن علاقتي بحسين نقطعت نهائين لا تصلت عليه ولا هو تصل حتى بالجامعه مرات اشوفه من بعيد وامشي ميهمني لان ايست من عنده طلع كل هذا حجي كل هذا كذب، صح مرات انقهر وبسببه خربت علاقتي باخويه بس ان شاء الله ترجع وارجع ثقته بيه وبعد ميهمني اذا اجه او لا لان اول وتالي بالحالتين امير يرفض حتى وان رجعت علاقتي بيه ف الافضل انسه واكمل حياتي محد مات وراه احد والحياة بعده تمشي والعوض بالله...

اجه يوم العقد مالت شهد وتصلت عليه واصرت انو نحضر اني وايلاف وصُدك رحنه وتونسنه وشويه غيرة جوه وضحكنه وفرحناله حيل وبعده اجه علينه امير ياخذنه بعد ما نزلت ايلاف تشوف ميسم جان يباوع الي بالمرايه اني درت وجهي انتضره جان يگول...

امير: شلونج بنيتي؟

غنى: جانت هاي الكلمه كفيله تخليني ادور وجهي وانصتله هاي الكلمه هيجت شكو مشاعر وحنين هاي الكلمه نستني شنو جان هدف حتى اثبتله هاي الكلمه الي صار الي زماااان مسامعته منه رديت وگوه لازمه نفسي، زينه الحمدلله...

بعده راد يحجي اجت ايلاف هيه وميسم ومشه اول شي راحنه لبيت خاله وصل ميسم وبعده رجعنه للبيت دخلت اني اول وحده جان ماكو احد بالبيت صعدت لغرفتي بدلت واخذت ملابسي ودخلت الحمام من طلعت جان تلفوني يرن برساله رحت شفت منو كل الي عبالي لو مريم لو شهد فتحته جانت من عنده ستغربت الصراحه شعنده يراسل حتى رقمه حاذفته فتحت الرساله كاتب...

💬شلونج غنوه...

بهل الاثناء تندگ الباب ماخفت ولا نهزت شعره مني گلت ادخل واذا امير... يا ربي ليش كل هل صدف كل ما هو يراسل لو يتصل يدخل امير ماادري شنو هل الامر...

بوقته ما ادري حسيت نفسي بين كفين يا اراسل حسين وارجع اخذل ثقت امير، يا احذف الرقم وارجع اكسب ثقته غلقت التلفون عادي ودرت وجهي اله جان يبتسم ويفتح ايدي اني هم رحت ورميت نفسي بحضنه...

امير: رغم كل الي صار لكن ما اتحمل بعدج عني بنيتي انتِ ادري بيج تأذيتي بسببي بس كل هذا جان درس حتى شخصيتج تقوه اريدج تثبتين نفسج للكل ما اريد غنى الي تتقشنر بكلمه حلوه ادري بيج انتِ گلبج ابيض وطيبه،بس مرات الطيبه هاي متنراد ويستغلوج بيه ...

غنى: بس انت هواي قسيت ويايه متدغي شنو الصاغ بيه لو من تمرضت والله يوميه اگول غاح اموت واميغ ممسامحني يوميه بالليل اتخيلك تجيني اضل اتخيلك وما افز حتى لتغوح لو من متحجي وياي والله اموت قهر واغوح اشتكي الايلاف بالكي تحاجيك...

امير: يي بس اني جنت اجيج صُدك باليل!

غنى: وخرت عن حضنه، والله؟

امير: يي والله حتى ايلاف تدري بس اني گلت اله لتحجي اريده تراجع نفسه، وحتى من جنت ما احجي وياج جانت تجيني وتگلي واني اگله لا، لحد ما صرت اشوفج بعد لا تدخلين باحد واشوفج شلون مهتمه بدراستج طبعا اخبارج كله جانت تجيني لاعبالج بيوم ناسيج جبرت نفسي ما احجي وياج لكن ما تحملت اعوف اختي وبنتي هم...

غنى: يا حبيبي بس اغيد اعرف انت شنو مسوي والله غازقك بهيج بنيه تنحط على الجغح يطيب...

امير: هههه ايلاف بعد...

ايلاف: يي وشبيه ايلاف بيش طالبيه، ورحت يمه...

غنى: درنه وجوهن ثنينه...

امير: اها گبنه سيرة الاط ام ينط، ما بيه غير العافيه يالعافيه كله...

غنى:احم نحنو هنا

امير: واذا هنا قابل شنو مسوين...

ايلاف: يي بما انو تصافت الگلوب شنو رايكم اسويلكم اطيب بيتزا؟

امير: ما ادري انتو براحتكم اني اروح عندي شغل، واجه باس راسي وراس غنى وطلع...

ايلاف: يي اخيرا وهسه يله عيني خرخش جيبك وعزمنه تتذكرين شنو گلتي اذا سامحج امير...

غنى: لك شنو انت اروحلك فدي من البجامه للبدي ابو عيون وسيعه...

ايلاف: يي صبغي زين، يله لعد تعالي ويايه شتغلي وطلعي من الوكر شويه...

غنى: ماشي جايه بس الم شعري، قررت اختار ما اراسل واحذف الرساله واخذ ثقت اخويه افضل...

تمشي الايام ورجعت علاقتي ويه امير احسن وهذا الفضل كله يعود لايلاف لو ما هيه واقناعاته وتوسلاته جان مصار كل هذا اما عن دراستي حيل كثيفه وذبيت كل جهدي بيه اريد احقق هذا الهدف الي حتى بالحلم صرت اشوفه...

بيوم جنت نازله ضجت شويه من القرايه نزلت لگيت وماما گاعده هذا الحجي جانت العصريه امير وايلاف جانو ما همه راحوا يزورون وشگد توسلو بيه تروح وياهم ما قبلت اني ادري بيه متريد تطلع ويه ايلاف ماادري شنو الكره هذا للبنيه وهيه حتى لا محاجيته لا مسويتله شي كافه خيره شره، وبابا طالع وايسر هم بس اني وماما موجودين ندگت الباب راحت تفتحه مدري منو اجت فتحت بابا الاستقبال ودخلت ستغربت منو الي جاي طلعت ورحت سالته...

غنى: ماما منو اجه؟

..!؟!؟؟

ايلاف:بالليل بعد ما خلصت التنظيف وشغل البيت كله اريد اصعد لغرفتي جان اسمع صوت خالتي جاي من الصاله لان جان اكو حايط يفصل بين الصاله والدرج رجعت اتسنط ويامن دتحجي ماكو صوت طلعت نص وجهي واذا امير شكو وشنو هذا..

اول تالي خالتي تحجي بصوت هادي حاولت اتسمع على الحديث البينهم جان اسمعه تگله...

.. يمه اسمعني ولتعصب اني شعندي وياك غير اريد الك الزين الى متى تضل هيج وضعك... قاطعه

امير: حجه بصوت عالي، وشبي وضعي؟

.. امي لتعصب اهدء شبيك حتى اعرف احجي وياك اسمعني ماما انت لشوكت تضل ما عندك اطفال بس فهمني شوف الشيب بده يملي راسك والي بعمرك هسه تلاث اطفال عدهم امي اسمعني ولتعصب.

مرتك متجيب اطفال اني اگلك واكيد عده سبب ومراضيه لا تحجي ولا تروح الطبيب والي اريده منك هو تتزوج وحده ثانيه وتجيب الك الطفل وان كان تحبه لإيلاف خليه وتزوج عليه والشرع حلل الك؟

ايلاف: اني سمعته لو جسمي كله گام يرجف اريد اسيطر على نفسي ما اگدر وكل هذا وهو ساكت وكانو مقتنع بالسالفه ودي فكر بي..
حاولت اسيطر على وضعي وصعدت وصلت الغرفه واني ارجف اريد اسيطر الزم كيلون الباب ما اگدر، اخيرا نفتح ودخلت گعدت على الجربايه صافنه افكر، خاف الي سمعته غلط مو صحيح امير ميسويه اكيد يي!!
اني متأكد ميسويه.

بس هو ليش ساكت؟ ليش ما رد على امه هو اذا يحبني ليش ما سكته ليش ما منعه؟ زين اني بيه شي لا هو الي ميخليني اروح دكتوره اي هو منه الصوج.

حاولت اقنع نفسي بهل الاعذار اسأل وارد اجاوب على سؤالي واحير، حتى راسي گام يوجعني بهل الاثناء دخل رفعت راسي وباوعت عليه واني استرجع كلام خالتي كله تقدم ناحيتي وگفت اني حتى اواجه واريد شوف شنو تبريره، وصل يمي لو اني مدري شنو صار بيه بسرعه دفعته ورحت للحمام قفلت الباب وصرت استفرغ منا لحدما حسيت روحي طلعت، وهو ضل يدگ بالباب يريد يعرف شصار؟

امير: ايلاف حبيبتي شبيج شنو صار ليش هيج تستفرغين؟

ايلاف: واني ما الي حيل ارد احس طاقتي كله خلصت فتحت الماي غسلت وجهي وباوعت بالمرايه عيوني حمر وجهي صار احمر وينگط ماي ملابسي كله تنگعت ماي گعدت بالگاع مهدود حيلي صرت ابجي ليش كل هل سگم والعذاب بس اريد اعرف شنو تريد بعد ليش تكرهني شنو سويت اله نوب وضعي هيج.

بعدين صفنت وخربط تفكير كله وتذكرت هذا الشهر فاتتني معقوله يطلع الي بالي صح لو مثل كل مره، بس لازم اتاكد باجر واسوي تحليل خاف اتامل ويطلع كل هذا وهم.

سندت نفسي على الحايط وگفت على حيلي وفتحت قفل الباب وطلعت هو تلگاني صحت، وخر عني ريحتك مطيبه وخر وصرت اهوع احس بطني تقلصت ..

امير: هاي شبيج بويه كُلشِ ما بيه، وشم ملابسه والله ما بيهم شي؟

ايلاف: خليت ملابسي على خشمي وصحت، عليك الله اطلع عطرك لعب نفسي ورجعت مره ثانيه استفرغ... وهو اجه ورايه دخل الحمام اني لازمه المغسله اتقيئ وهو يلم شعري ويوخره عن وجهي حجيت بالگوه، اطلع بره وجيب ملابس وياك..
طلع بسرعه راح شويه ورجع اخذتهم منه ودخلت الحمام سبحت وطلعت بالگوه امشي اريد بس انام لگيته مبدل ملابسه غير الي جان لابسهم اجه يمي وگال...

امير: ها بعد تشمين عطر؟

ايلاف: هزيت راسي بلا، اجه عليه ولزم ايدي نمت واجه هو غطاني وراح طفه الضوه اجه حضني ونام، مثل الي حاضن طفله هيج، بعده ما فكرت ولا بعدته عني كل همي اريد انام احس نفسي تعبانه ما بيه كلمه احجي...

ميسم: مگابلتهم وگاعده وتلاثتهم يصرخون ما اعرف المن اسكت وسيف ما هو طالع وعمي وعمتي ينامون من وقت وهاي سليمه متشيلهم خاف يوگعون واني هم ما انطيهم اله اخاف منه...

سويت الهم كل واحد ممه ولا واحد يقبل ياخذه وصدري هم خلص الحليب،وهمه واحد يغار من الثاني وكله تبجي ما تحملت صرت ابجي وياهم...

ميسم: ولكم يمه اسكتوا شأسوي الكم والله ما ادري حتى تسكتون ويمهههه، وصرت اسب بسيف ماخليت رجله ترتاح، كله من وراك سيف اني ثوله غبره شعجبني بيك واخذتك ادري توازيت واخذتك الهي حكمتك بيه...

فجاه ودخل سيف مفزوع كله تصرخ واني ابجي وياهم

سيف: هاي شكو شبيكم انتِ شبيج؟

ميسم: سيف ولك تعال شوفهم كلهم يبجون ما اعرف المن اسكت حتى صرت جني بقره حتى حليبي خلص ولا واحد يرضه يسكت اههههه، ابجي واحجي سوه....

سيف: خبال حتى خبال عبالي شو شنو حتى خوفتي الجهال...واجه يمهم

.. يا عمري يا بابا انتو هاي امكم خبلتكم ليش كل هل الدموع هاي امكم المسودنه بجتكم تعالي يگلبي تعالو حبايبي انتو اروحلكم فدوه وارجع مشي، افيشش يريحتكم هاي امكم متخليكم تصيح عليكم خوفتكم عمي حقكم تبجون اني دخلت وخترعت انتو شلون...

ميسم: اباوع علي شلون يحجي وياه وهم الزمايل سكتوا ويناغون ابوهم وهذا مستلمني، بسيطه اذا ما ازقكم حليب ممات ووما انطيكم حليب طبيعي وگول البقره ما گالت... ءءقصدي ميسم امكم ماگالت بسيطه.

يتبع...

لاتنسون التصويت وتعليق ومتابعه للحساب بدربكم والانستا هم@ghe.92

دمتم برعاية الله وحفظه

غدير عبدالله