رواية وقد كانت صدفة الفصل السابع وخمسون 57 - بقلم غـدير عبداللّٰه

"وقد كانت صدفة"

و لا بُد يجيبَك نَدم مِن تِفتَقدني
لا تِجي و لا تِعتقد أمرَك يهِمني!
انا مِن يمَك چِنت ما قَدرِتني
و لا حَسَبِت حِساب أليَّ و لا شِلت مِن عندي حِزني ..
تچَمِل البيّه وتِغِثني و مادِريت لصَبري حَد
ولو تحط الدنيا بيدي .. ما تِردني
و يالشِفت نَفسك عَليّه لا تِفَشل روحَك و لا تِعتذر لي.
__________________________________________

ايلاف:تمر الايام مثل بعضه وصار على زواجنه 5اشهر مگضيته ما بين شغل البيت والدوام كلمن ملتهي بروحه لكن الي فاجأنه وفرحنه هو من عرفنه ميسم حامل صُدك فرحت اله من كل گلبي وتستاهل هيه وسيف كل الاخير وخاصه هيه بعد الي شافته الله عوضه،لكن الي فتح الي باب ثاني وهي خالتي يوميه تسمعني حجايه يوميه منكده عليه بشغل احس دور مشاكل من جوه الگاع مرات اسكت ومرات ارده لان دوس بالبطن حتى امير هم مرات تسمعه على انو مرتك متجيب جهال...

خلال هاي الفتره امير تغيرت تصرفاته مو مثل قبل دائماً بالمكتب مالته يشتغل من يجي من الدوام لحد لليل،تعامله ويايه تغيرت مو مثل قبل جان اول ما يجي يحضني لو نگعد نسولف حسيت لهفته راحت مو مثل قبل راحت،لكن هسه كله تغير صار يضل تالي الليل هو وحده بالمكتب...

حاولت شكم مره وياه اشوف شنو سبب هل الإهمال والشغل الي تاركني على موده لكن واجهت الرفض منه وعدم التدخل بشغله،ومن كثر التفكير صرت اكون فكر براسي بس لايخوني بس لا متزوج بس لا هيج صرت اكون مسلسل براسي اگول خاف خالتي هي الي زانه برأسه هاي اكيد مو غريبه عليه السالفه...

تسويه ليش لا تخبلت واني افكر بهل الاشياء احس التفكير حيخبلني ماعندي احد الي اشكيله وينصحني اذا اروح لماما هسه تگلي...رجلج عنده شغل لتدخلين بشغله كل هذا يتهيئلج... الى أن بعد ما تحملت وطگت روحي...

وبيوم بالليل رحت اله للمكتب مالته واني هواي محمله بداخلي عليه احس نفسي ناقصه بدونه احس روحي تريده متلهفه اله وين امير الي مينام اذا ما اكون بحضنه وين امير الي يباوع لعيوني ينسه نفسه ويگلي...

امير:اتيه واني اباوع لسواد عيونج...

وله من يصبح عليه يگول...

امير:صباح الخير يا وجه الخير ومن دون وجهج صعب يتسمه صبح...

وين امير اذا ميجي من الدوام وينتظرني اصعد حتى يحضني ويشمني من نحري وله من يسمعني كلامه وغزله الي ما امل منه كل هذا راح...

دخلت عليه للمكتب مالته وهو نفس مكانه ولابس النظارات ملاته والحاجب مطبوگ رحت يمه وهو ما عار اي انتباه الي وعلى گعدته گلت...

ايلاف:ممكن احجي وياك وتجاوبني عليه بصراحه؟

امير:باوعلي بنظره عابره،يي گولي؟

ايلاف: بس گلي فد يوم قصرت بواجبي اتجاهك بيوم گلت الي حجايه وما سويته حتى لو جنت مراضيه عليه واسويه عناد بنفس في سبيل ما اكسر كلمتك، بس اريد اعرف شنو الشغل الي علموده تاركني واني انتظرك تجي حتى تشوفني مشتاقه الك تشوفني تسأل عليه انت حتى متبا ت بوجهي تشوف شنو الي قاهرني شنو الي غاثني متگول عندي مره اشوفه شبيه مابيه،وانت ماكو مطلك الدنيا كله متدري بيه متت عشت مرضت!

..عندك شغلك وبس واذا احد حاجاك حجايه زايده عطت بيه لهناك،امير اني محتاجتك محتاجه حضنك محتاجه مواساتك الي ...
امير انت متعرف شنو الي جاي أمر بي متدري الي جاي اسمعه أو الي أعاني منه، كله هذا جنت اكتمه بداخلي واجي يمك جنت واحجي الك وانت الي تواسيني وتسمعني حجايه حلوه تخلي كل الي جنت مقهوره منه عنده كله يطير بكلمه منك وارجع عبالك كل هذا ما صار ..

سحبت نفس وازفرته رفعت راسي وباوعت علي بحزن..امير ليش تغيرت تره حرفياً تعبت من التفكير تعبت من جفاك هذا ...

امير:خلصتي اذا خلصتي ممكن طلعين بره وتسدين الباب وراج لان عندي شغل وباجر ورايه جلسه...

ايلاف: اني هنا صُدك ما تحملت نزلت دموعي واني اباوعله وهو ولا هزة كلمه ماكو عبالك جبل متهزه ريح متت قهر وحجيت،هو هذا الي كدرك الله عليه بس...بهل الأثناء جان يدگ تلفونه وسوالي حركه بايده معناه اششش ورفعه ...

امير:الووو...يي اهلا بيج !

ايلاف:اني بس سمعت يگله هلا بيج لو نجنيت شنو هلا بيج والوقت ابد مو مناسب اكو وحده تخابر ساعه12:30 باليل علمود شغل ردت احجي هو شافني وسوه بايده حركه يعني صبر...

امير:يي گاعد...للا ماكو أي إزعاج عادي...لا ما موجوده ...لا عادي مساعده هذا الشي ..اي شاء الله بأجر بالمحكمة نلتقي ويتم الطلاق...يي وهيه الجلسه من صالحج...اكيد طبعاً...ما دام بدينه الادله حتكون الجلسه من نصيبنه...تمام معسلامه...

ايلاف:هو بس غلق التلفون واني رحت عليه شابه نار بداخلي وصلت يمه هو گام وضربته عل صدره ودموعي تهل عشرة عشره وحدهم،تخوني ياامير تخوني ويه الص...واني مستمره اضرب على صدره،لعد واني ما ماليه عينك ما مكفيتك تخوني ويه وحده مزوجه وطلگهوانت بعدين تاخذه..

كل هل مده واني عبالي عندك شغل وتضل سهران الليل كله تشتغل تالي طلعت تتخابر وياه لهل الادبسسزز لك ما ستحيت على نفسك ما ستحيت على روحك وانت رجال متزوج مصار الك بس خمس اشهر وتريد بعد؟

..ولك جرعت المر واني بعدني عروس وانت تدور من ورايه لك انت شنو من بشر بس گلي اريد اعرف،لعد سويت براسي شريف رومه وقتلت نفسك حتى تأخذني تالي طلع كل هذا كذب...وضليت اطلع حرگتي كله بيه وصبري كل هاي الايام والقهر الي بداخلي كله...

وهو يحاول يهديني واني كل الحيل صار بيه..

امير:ولج بس افهمج سُكتي نصي صوتج!..واني صوتي طالع لحد ما حاول يسيطر عليه وجتفني حيل...

دخلو علينه ايسر وغنى لان همه غرفهم فوگ والجوه ميسمعون لا بعيد عنهم، تفاجئوا من الوضع الي احنه بيه من كثر ما ضربته تعبت وگعدت بحضنه ابجي وهو لازم ايدي ويريدني اسكت...

ايسر:شكو خويه خو ماصار شي ليش أصواتكم طالعه؟

غنى:اني شفته بهل وضع بسرعه سحبته من عنده وهو طلع وأيسر راح وراه،واني گعدته على صفحه واباوع لشفته ترجف ودموعه تنزل وحده وره الثانيه وتردد تخوني يا حقير تخوني على مود وحده ص...

..كافي حبيبتي كافي سُكتي هاج شغبي ماي شويه،وجان اكو دولكه ماي صبيت اله شربت شويه ونتظرته تهدء بعد ما هدئة گعدت تسولفلي...

ايلاف: بدموع،ولج تخيلي يخوني ويگُله ما موجوده يمي ويضحك وياه ويگله اكيد من صالحنه الدعوه ولج تردين اهدء واني اسمع يخابر وحده ثاني وبنص الليل وگدامي گليلي شنو اسوي اكتل نفسي خلاص!!!

ميسم:بعد ما عرفت بنفسي حامل ثاني يوم اخذنه سيف اني وعمتي،سويت سونار والحمدلله وضع الجنين تمام وحسبت الي صار الي اسبوعين ونص،وبعده كتبت الي على فيتامينات وابر وهاي السوالف وبعده طلعنه تلگانه سيف والفرحه ماليه عينه راح الصيدليه حتى يجيب العلاج والمقويات ورجع بيومه عزم أهل كلهم والعشه عليه...

وكل ساعه جاي يگلي شنو مشتهي واني خوش أخذته فرصه كل ساعه گتله على شغله لحد ما حسيت بطني نتخمت وثاني يوم من داومت بشرت البنات كُلش فرحوا الي ومن كل گلبي الله يرزق ايلاف بالذريه ويتمم عليه بالخير...

وخلال فترة الحمل جانت كُلش متعبه هلكتني بطني كبرت حيل والملابس كله صغرت عليه وين قبل وين هسه واني وسيف گاضيه من الروس هو غيرة الي مسيطره عليه واني اعند منه لكن بالاخير هو الي يخسر ويستسلم ميگدر يحجي وياي خاف على نفسيت ابنه دخلت بالشهر الثالث وبطني كُلش دتكبر گلت العمتي گالت...

..عمه لتخافين هذا ماي ولأن بكر هيج يصير لتخافين ماكو شي ...

ميسم:واني من اسمعه اسكت وهم ما الي خلگ اروح للدكتور وخاصه بهاي الفترة احس روحي صايره بخشمي وصايره كُلش مهمله لو مرات انسه الحاجه وين خليته واسمه سيف ورايه مثل الطفل يلم الغراض بعدي...

ومره من المرات جنت اخابر ماما تسأل عليه خلصت ورحت للثلاجه فتحته واخذت الي تفاحه وسديته لليل وجان يدخل سيف غادي اعصاب وجان يعيط بيه ذيج العيطه...

سيف:لج مد تگليلي وين صرتي ادگ عليج ليش متردين واني گلبي نار گلت اكيد صار شي اله حتى شكم مره ردت انضرب بسببج تالي الگاج تاكلين،وين تلفونج؟

ميسم:بغصه،مادري؟

سيف:صبرك يا ربي،فرك وجه وسحب تلفونه ودگ عليه يسمعه يدگ بس الصوت قريب ضل يدور والعبره خانگتني وما اگدر احجي خاف يعيط بيه تالي يروح للمطبخ ويسمع ويلگاه بالثلاجة موجوده واجه وجابه الي،هاج عيني هاج هلمره لگيته بالثلاجة عود أن شاء الله المره الجايه ابني يرد عليه هو وبطنج...

ميسم:يي وشنو قصدك؟

سيف:سلامتج اروح انام احسن...

اما النوم موضوع ثاني مرات اني وگاعده انام،اما النساوه مالتي بس اريد اعرف سيف شلون تحملني بهذيج الفتره ما اعرف يعني وصلت مرحله اذا اشوف طفل ياكل مصاصه اشتهيه وخطيه هو الي واگع بيه متحمل كل تصرفاتي ويروح شنو يسوي،يعني حرفياً حيل تعبت بفترة حملي...

ومره بعد ما دخلت بدايت الرابع گعدت نص الليل مشتهيه باچه رغم اموت منه وعمري وحياتي مماكلته لكن بهذا اليوم متت عليه،طبعا اني مجانت تلعب نفسي من الاكل لو شي بس الدجاج ابد ولااحبه جان شنو يخلون گبالي اكل عبالك مفجوعه المهم خطيه گعد والنومه بعده بعينه...

سيف:بربج اكو واحد ياكل باچه نص الليل؟

ميسم:ولك سيف اسكُت متت عليه حباب الله يخليك وبجيت،ومن حبلت لهذا اليوم اني من اقل كلمه ماتعجبني ابجي صرت حساسه إلى درجه حتى كرهت نفسي بيه ابجي من دون سبب،لعد شنو اسوي غير ابنك يريد حباب...

سيف:ولج وين اكو واحد هسه مفتح ماكو عاد بس خلي تصير ال5 اروح!

ميسم:ما حباب،وزدت بالبجي...

سيف:يا طلابت الباچه المتخلص،ماشي امري الله شأسوي شوكت تجيبن واخلص والله كرهتيني بالدنيا كله...

ميسم:هاي اني روح وخر عني،وبجيت انت متحبني لو تحبني جان راعيت وضعي ولك گوم جيب الي باچه...

سيف:گايم گايم يالإسلام...

ميسم:خطيه راح بدل وطلع واني ضليت انتظر وبين ما راح يجيبه طلعت علبه ككو وگعدت اكله ويه الطرشي هاي اكلتي المفضله الي ما استغني عنه وهيه اول ما توحمت عليه وكل ما اكله وسيف يباوعلي بقرف وتلعب نفسه ويگوم...

وبعد ساعه أجه واني جنت گاعده بالصاله انتضره اجه وخلاه على ميز الطعام وجاب خبز وطاسه وگعد يثرد إليه كمله واني اباوعه اله وريحه مالته وصلت لمخي،اخخخخخ عاشت ايد بعد گلبي الي ميرفض الي طلب،باوعلي بنظر بقلت حيله واني عفته يباوع الي بنظراته ودست بيه واتلذذ بالاكل بيه وكل ساعه وسويت اله اممم...

سيف:بالعافيه حبيبي...

ميسم:الي لو لابنك؟

سيف:اكيد لابني!

ميسم:قطعت الاكل وبرطمت،واني؟

سيف:والج يبعد روحي الف عافيه...

ميسم:ضحكت واكلت منا لحد ما شبعت ورحت غسلت ايدي ورجعت نمت وهو خطيه أخذ الاكل ورجع نام...

گعدت للدوام واني من الليل احضر الي جنطه خاصه بس اكل بعد ما بدلت وطلعت أخذني هو لان بعد ما اگدر اسوق خاف ما ادري واشطح بالسياره نزلت وهو راح دخلت للمستشفى وصلت الغرفه مالتنه...

ايلاف:هلا بطه شلونج؟

ميسم:ولج كافي لتكليلي بطه والله اموت من هل كلمه تره ابجي وين جسمي جان وين هسه ياربي كله من وره سيف هو الي سوه بيه هيج...وجان تدخلت شهد...

شهد:هاي شنو بطه اليوم من وقت جايه،شو هاي طگته بجي...

ايلاف:يا ولج ميسم شنو السالفه والله بعد منحجي كافي حبيبتي والله دنتشاقه وياج اصلا مو شهد؟وخرته...

شهد:يي يي والله دا اتشاقه وياج اصلا جسمج يخبل صاير يمه وهذولي لخدود ينگرطن گرط فدوه...

ميسم:صُدك؟

ايلاف:يي والله تخبلين!

شهد:يي فدوه تجننين،ولج ماسه شوكت ترحين للدكتوره وتشوفين جنس الطفل؟

ميسم:مسحت دموعي،ما ادري والله بس اخر مره گالت الي عادي ما بيه شي الطفل بس الماي هواي حاولي تقللين شويه سوائل بس مو تگطعين كُلش قللي...

ايلاف:زين وهذا الشهر هم ترحين اله؟

ميسم:ما ادري اشوف عمتي إذا قبلت اروح...

شهد:الله يسهل عليج ولادتج...

ميسم: آمين والله نشلع گلبي وخاصه سيف أحسه وره ما أولد يطلعني بالدفرات لبيت اهلي من گد ما مجزعته تخيلوا البارحه نص الليل گعدته يجيب الي باچه!

ايلاف:گولي والله؟

ميسم:يي والله ولج داده متت عليه وسود عليه راح نص الليل يدور الي على باچه تالي جابه واجه وگعدت دست بيه بالخمسه وهو يباوعلي وجن يگلي اشوي على اذاناتج البصل بس تجيبين...

شهد: هههههههههههه خطيه والله عمي الله يساعده لو اني منه اطيج جلاق اوديج لاهلج وضلي تنسي يمهم...

ميسم:لا حبيبتي لعد المن اسمه زوجي من هاي المواقف ينعرف يحبج لو لا...

شهد:غير شحده إذا ما سمع حجايتي انيمه بلا اكل ومثل ما تحرمني اني أحرمك وبكيفك بعد ابو الشباب...

ايلاف: غصبن عليه...

ميسم:يي حبيبي منهاي المواقف يبينون الصج والمو صج وعلى طاري الصج اني جعت واريد صاج لحم منو تروح تجيب الي ولج بيه اجر وثواب..

شهد:اني اعتذر خيه عندي شغل...وطلعت

ايلاف:جيبي اني اروح ومناك أخذ جاي الي...

ميسم:يي صُدك حتى من تجين احجيلي شنو اخر التطورات الي صارت وياكم...

ايلاف:اوففف اروح ومن ارجع اسولفلج...وطلعت ورحت للكافتريه اخذت لفه لميسم وجاي الي درت وجهي وجان يصير بوجهي...

..شلونج ايلاف؟

..واگف بالحديقة الخلفيه انتظره تجي واني افكر خلال هاي المده شاغل بالي موضوعه الي مدري منين طلع الي واني بيا حال ما ادري شلون كل هذا صار وليش ما منتبه اله...

وخلال هاي المده فكرت وفكرت هواي صار الموضوع ياكل ويشرب وياي يمكن يطلعني من الي اني بيه واگدر انسه بس شلون قاطع سلسلت أفكاري صوت الباب درت وجهي وجان تجي...

..يي تفضل شنو هو الموضوع الي متگدر تحجي گدام الكل أو على التلفون اله وجهاً لوجه؟

.. اصبريلي شبيج هيج مندفعه اجيتي،بالبدايه شلونج؟

.. ام تمام الحمدلله...

..شوفي اني اجيت احجي وياج بموضوع واني هاي جيتي كانت لهذا السبب الي هو اريد اگلج....سحبت نفس وبللت شفايفي،ءءتقبلين تتزوجيني؟باوعت عليه بصدمه بعدين رجعت ملامحه عادي وردت...

..لا

.. نصدمت من رده وجاوبت حتى من دون متفكر،بس ليش أنتِ مو تحبي...قاطعتني...

..قبل مو هسه، حالياً هسه كُلشِ تغير صح واني اعترفلك جنت احبك بس جنت غافله مراهقه شنو تريد تگول گول لكن....

يتبع...

بالبدايه اريد اگول عظم الله لكم الاجر بحلول شهر محرم الحرام،واسفه على التاخير لان والله مريضه وهم صادف عندي طلعه ف تأخرت عليكم...

لاتنسون التصويت وتعليق ومتابعة للحساب بدربكم والانستا هم @ghe.92
دمتم برعاية الله وحفظه

غدير عبدالله