رواية وقد كانت صدفة الفصل السادس وأربعون 46 - بقلم غـدير عبداللّٰه

"وقد كانت صدفة"

لگينه الدنيا ما تنحب
‏حزن ودروب ما تنطب
‏درب مكتوب بي نبچي
‏ودرب مكتوب بي نتعب

_________________________

ايلاف:بعدني مصدومه من الي صار وإذا اسمع عياطه خلاني اگمز من العيطه مالته واسمع ضحكته رحت اله ...

.. آدم بربك اكو واحد هيج يسوي مخبل انت مو صاحي والله...

بعدين مو اهلي هنا شعجب ما سمعك بابا؟

آدم: هههههههههههه يا بويه متت،بس ليش هيج مصدومه من سديتي الباب شكو؟

ايلاف:هاءء لا ماكو شي بس اريد اتذكر ميسم دگت عليه مدري شنو وصتني هسه ما حجيت وين بابا ماما شو ماكو احد بالبيت؟

آدم:راحو لبيت جدو رفل ما ادري شبيه يمكن دتجيب ومرت عمو خابرت على ماما تجي وياه...

ايلاف:صُدك والله وشلون هيه بعده مداخله بشهره؟

آدم:وشعرفني اني...

ايلاف:زين هسه هم وين بيا مستشفى؟

آدم:ما اعرف بيا مستشفى هسه ادري تحقيق روحي تصلي وشوفي؟

ايلاف:لا شنو اتصل هسه دقيقه ابدل ونزل نروح اني وياك ،وصعدت على السريع بدلت غيرت ملابسي ونزلت لگيته على نفس گعدته، ولك يالله حتى نروح؟

آدم:ولج وين نروح وشعندج رايحه شويه ويجون...

ايلاف: آدم حباب خل نروح ولك ما اگدر إذا ما اروح اشوفه،وضليت أتوسل بيه وهو قافل ميروح بالاخير خابرت ماما...

ايلاف:الووو ها ماما شلون صار وضع رفل؟

..ها ماما والله بعده خطيه دتطلگ خطيه فرفحت روحه من البجي...

ايلاف: ليش تره بعده مداخله بشهره ليش شنو الي صاير؟

..يي هسه أمه تسولف تگول على أساس گايله ليث اله يشيل الجنطه،والجنطه ثگيله يصعده ،وهو ما سامعه ف هي الي شايلته من شايلته ومصعدته مثل الي ظهره مشنوط وصار ياذيه بعده شويه وتگول نازل عليه دم من شايفته متخبله وزاد عليه الالم يگول ليث خطيه بعد ما اعرف شنو اسوي لفيتهه بعبايه وجبته للمستشفى ولهسه بعده تطلگ ضربوه ابره ومنتضريه..

ايلاف:يا سوده عليه خطيه زين شويه واجي اني؟

..لا وين تجين شكو اني شويه وارجع حتى مرت عمه حترجع لان ليث ما قبل،بعد عليمن جايه وهنا ليث وأمه يضلون يمه ...

ايلاف:يله تمام اذا صار شي گليلي الله وياج....وغلقته

ضليت الوب تكول اني الي اطلگ مو هيه خطيه رفل كُلش فقيره خايفه عليه حيل وهيه بشهر الثامن وبعده مداخله بشهره وبهاي الفتره تصير خطره على الطفل لو بشهر السابع احسن بس هاي الفتره خطره لان بعده بمرحله من النمو مكامله... ضليت اروح واجي إلى أن دخلوا اهلي رحت يمهم ...

ايلاف:ها بشروا شلون وضعه جابت؟

..خطيه بعده لي هسه كُلشِ ماكو خطيه فرفحت من البجي هسه قبل منروح ضلوا يمشون بيه بلكي الله وتجيب...

ايلاف:الله يسهل عليه ...

بعده كلمن دخل لغرفته اني صعدت بدلت ملابسي ونمت ما حسيت بشي من وره التعب اليوم...

گعدت الصبح بدلت وكملت لگيت ماما تريد تطلع وبابا منتظره رحت بسرعه...

..ها بشري شنو الي صار؟

..خطيه اليوم الصبح بال٦ مدخليه عمليه والده ..

ايلاف:زين والطفل شلون وضعه هيه شنو وضعه؟

..لا أحسن بس طفل خالي بالخدج علما يتأكدون من صحته وهاي هسه احنه رايحين يله اني اروح معسلامه...

راحت ماما واني شويه ورمشت عليه ميسم طلعت اله صعدت وسولفت اله كُلشِ على رفل وضعه شلونه...

ميسم:يا عمري الله ينطيه العافيه ويگومه بالسلامه...

كملنه الطريق وصلنه ومشه الروتين نفسه،رجعنه للبيت لگيت ماكو احد يعني بعدهم مجاين حميت الاكل اجه آدم من الدوام تغده وراح دگت على ماما ...

ايلاف:الووو ها ماما شلون صارت؟

..لا احسن الحمد لله وضعه زين...

ايلاف:زين شوكت يخرجوه؟

..بأجر يمكن الصبح حسب مگالت أمه والطفل رح يضل لان بعده صغير،تغديتو لو بعدكم؟

ايلاف:يي أكلت لگيت آدم جايب غده...

..يي مو اني خابرته گلت اله خلي يجيب غده لان تجين أنتِ من الدوام متلحگين طبخين وهم المجمده صفيت هذاك اليوم...

ايلاف:يي زين شوكت تجون؟

..هسه شويه ويرجع ابوج واني رح ابات يمه اليوم لان أمه خطيه تعبت ومرت عمه متگدر تعوف البيت وحده...

ايلاف: تمام يله معسلامه...

ثاني يوم الصبح مطلعيه من المستشفى ومرجعيه للبيت اني رحت اله العصر ويه بابا لان عده ابر لازم اضربه وهم تحمدت اله بالسلامه.

صار عشرة أيام على ولادته والطفل وره اسبوع مطلعي وحالته الصحية زين وسموا امين شكله يخبل وبعده صغيرون گزگزت عليه كل ساعه اروح اشمه لان اول مره يصير عدنه طفل وكلهم حواليه وهو إذا شويه بجه كله گامت اله وخاصة ليث يخاف عليه من الهوه...

بس خوف أكثر على رفل شلون يداريه ويمه ابد معافه وكلما تريد تگوم هو يساعده حتى هيه جزعت وهو يگول اله،مالج دخل اني راضي بشلعان الگلب وخاصه اذا جان منج...جنت اشوف الحب الي بينهم بعده مثل قبل لمن لگفناهم اني وآدم وره البيت وغيرته عليه زادت من يشوف كل اهتمامه لابنه صار...

جانت تسولف الي من اضربه ابره لو اعقم الجرح العمليه واني خربانه ضحك عليه تگلي...

رفل: تخيلي صرت حتى ما ارضعه اموني گدامه يعصب...

ايلاف: هههههههههههه خرب يومك ليث وين جانت الك هاي السالفه...

بعده مشت الايام عادي وامير دائما نتواصل اني وياه ابد ميفوت يوم اذا ميتصل عليه احس من احجي ويا ادخل بعالمي الخاص بس اني وياه نكون موجودين يحجيلي على تفاصيل يومه واني هم وأيضاً حديثه الي لا يخلوا من الغزل الي احس گلبي يدگ وفراشات بطني طير وكلامه الي يخليني اروح لغير عالم وخاصه كلمت مرتي الي بين كلمه وكلمه گاله مرات اسأله ليش متصيح باسمي يگلي..

امير:لان احس كلمت مرتي مخصوص إليه بس من اگوله يعني أنتِ مالتي الي شي خاص بس الي محد يگدر ياخذج مني حتى اهلج أما عن اسمج ف هواي بنات نفس الاسم لكن أنتِ تتميزين عنهم...

ومن خلال كلامه يخليني اخجل ارد عليه ويعجز لساني عن الكلام لان ما اعرف شنو احجي وشنو اگول...

بيوم عقد المحكمه اجه عليه الصبح طلبت اجازه بيومه ف اجه أخذني الصبح هاي بعد ما سوينه تحليل الزواج المهم وصلنه دخلنه اني وياه لان القاضي يعرفه ف بسرعه دخلونه هو أول مشافه عرفه وسلم عليه سئلني القاضي على اسمي من التوتر گلت...

ايلاف:ءءاسمي مرته

..بويه ادري مرته اسمج شنو وضحك،خرب متتت من المستحه رديت عليه وگتله اسمي هو هم گلي...موافقه؟

ايلاف:باوعت لامير ومن دون ما ادور وجهي للقاضي وگلته اله..نعم موافقه...

..خلصنه وبارك اله اوضل يسولف وياه وگله دير بالك عليه مبينه تحبك وخليه وسط عينك قبل گلبك...

امير:أن شاء الله...

ايلاف:جنت منزله راسي واستحي ارفعه ومن سمعت كلامه قشعر بدني لزم ايدي وگلي يله أمشي وطلعنه...

وخلال هاي الفتره گدرت اعرف أو ادرس شخصيه امير ومنه عرفته گلبه طيب أسلوبه ورزانته بالكلام تغريني بي وبطبعه الهادئ عنده عائلته اغله شي على گلبه حبه الكبير لأخته الي مرات من يحجي عنه أحسه دا يحجي ابوه مو اخوه ومن حرصه عليه يذكرني برافد وتعامله وياي...

بيوم گاعده وصافنه والقلق كاتلني من البارحه الصبح اتصل عليه ميرد بالليل هم اتصل ماكو ميشله كتلني الخوف وماعندي رقم اخته جان اتصلت عليه بالي سارح اضرب أخماس بسداس وكل ساعه تخطر بالي سالفه شكل ساعه صار اله شي والأفكار السوده مقتحمه عقلي،والبنات يسولفن واني ولا يمهم اصلان بغير عالم شويه وندگت الباب جان يدخل الممرض...

.. دكتورات بسرعه لحگوني صار انفجار وعدد من الضحايه هواي ومجاي نلحگ والمستشفى نترست بسرعه من بين جريح وموته...

ميسم:اباوع لايلاف اني وشهد نسولف وهيه ولا يمنه اريد احجي اگله شوكت نطلع نجهز اريد احجي وجان يدخل الممرض خلانه نطافر بسرعه طلعنه رحنه لصاله الطوارئ ماكو متروسه عالم منهم المجروح ومنهم الي جاي نازع بروح ومنهم الي مختنگ من الدخان منظر ميشيله العقل صوت الاسعاف الي تروح وحده وتجي الثاني وراه طشرنه كله وحده بجه...

رحت اني ما اعرف المن اداوي بيمن ابدي جان اكو رجال كبير رحت عليه وبديت اعالج جروحه وجان مختنگ هم خليت الأوكسجين وانضف الجروح مالته خلصت رحت لغير واحد وانتقل من شخص الشخص وصوت البجي والصياح منعرف منين يجي اطفال نسوان والمنظر يكسر الگلب...

ولي عرفته سياره مفخخه داخله جانت قريبه على السوگ ومنفجره المره تسولف الي على الي صار واني گلبي عصرني وهيه توصف الموقف تگول اللحم طشر منعرف المن نروح ادور على بنتي ماكو اثار اله تالي لگيته مشموره على صفحه يم العرابه مال المخضر وجه مينعرف من الدم، تبجي مفرفحه على بنته...

ما تحملت نزلت دموعي الله يساعده والله لا ينطي الي جان السبب...

رحت لگيت ايلاف حاله مو احسن من حالي ما ادري شبيه تحاول تهدي بالمره والمره ما مخليه حتى ملابسه مشگگته تبجي وتصيح يمه بنيتي راحت هيه وطفله الي بطنه من سمعته احس روحي راحت ما ادري شلون عده هذا اليوم وخلص أحسه عايشه بفلم من الي دا اشوفه اباوع لملابسي عباره عن دم الكفوف هم نفس الحاله وكل ما اگول يي خلصنه تجي الإسعاف محمله ونرجع نفس الحاله نتگطع من البجي...

اخر اسعاف ما لحگنه على مريض مات هو نازل منه متت من القهر والحرگه جان اخو وياه گام يبجي مثل النسوان ويدگ على وجه ويصيح خويه بعدك عريس ولك شگول لمرتك ولج يمممههههه ويصيح بكل علات صوته....

شهد:دخلت واشوف المنظر عباره عن دم ماكو العالم تصرخ اطفال نسوان تبجي هاي الي ابنه ستشهد هاي الي متدري بزوجه وينه ختفه، صرت أمشي واعالج بالناس اعالج بالطفله واحجي وياه وأقنعه حتى بس اخيط حاجبه لان ينزف إلى أن اجه ابوه لزمه يالله سيطرت كل ما اكول خلصت تجي غيره اخر شي من اجت الاسعاف والولد مات متت من القهر ...

لهناك وجان اشوف الشرطه تفتر وجان يدخل من بينهم ومبين عصبي ويصيح على هذاك ويروح يم هذا دار وجه شافني اني بسرعه خليت وفلتت خاف يجي شفت ايلاف هم نفس الوضع خلصنه شغل وطلعنه من قسم الطوارئ وراحن هنه قبلي اني رحت إذب الكفوف مالتي واغسل ايدي بالمغاسل طلعت وجان يصير بوجهي لزم ايدي حيل واخذني ....

ايلاف:خلصنه شغل اخيراً احس گلبي تگطع على هاي الوادم شنو ذنبه راحت برمشة عين شنو ذنبه من عايشه بدوله حاميه حراميه بدوله ما اله كلمه يجي واحد بكيفه يفجر ويروح ماكو قانون وضحية هاي الناس الفقره...

ومناه امير مدري وين وگلت بس لا هم رايح بعدين حاولت اسيطر على نفسي كافي الي شفته اليوم گلبي خزن من القهر حتى بسرعه طلعت ما ردت اسمع بعد اشوف ملابسي عباره عن دم دخلت للغرف شفت الساعه حيل ب3 دخلت ميسم عيون حمر عرفته باجيه بدلنه بسرعه وطلعنه ...

وصلتني للبيت دخلت حتى ما الي نفس احجي اجت ماما گلت اله بسرعه بشكل مختصر ضلت تدعي وتبجي...

وصعدت بدلت ودگيت عليه ماكو ميرد ضليت افكر ياربي بس لا صاير شي هسه المن اروح المن اگول نمت واني القهر ياكل بيه اكل وأفكار اشكال اجت براسي بس لا رايح بالانفجار بس لا احد شو شنو مسوين اله مثل ذيج المره من تهجم على بيتهم ما ادري ولا حسيت على نفسي من نمت...

گعدت وإذا اشوف الدنياه لليل عزه هاي شگد صار الي نايمه گمت غسلت وجهي صليت ونزلت لگيت ماما ...

ايلاف:ليش ما گعدتوني صار الي شگد نايمه...

..يمه اگعد بيج ماكو نايمه وفاتحه حلگج من التعب عفتج ونزلت...

ايلاف:ميخالف حتى لو هسه شينيمني بعد؟

..يله تعالي تعشي...

ايلاف:ليش لعد وانتو؟

..ماما شبيج شوفي الساعه بيش...

ايلاف:اهووو،گعدت اكل بالمطبخ ماما راحت لغرفتها وآدم هم بغرفته ضليت اكل وكل ما اصفن تصير احادث اليوم كله گبالي واريد ابجي بعدين تذكرت امير بسرعه صعدت فوگ اشوفه بالكي متصل صعدت دورت على تلفون ماكو بعدين سمعت يدگ ادور ماكو بعدين تذكرت بالجنطه طلعت وإذا هو يمه گلبي رف عليه بسرعه شلته...

ايلاف:الوووو،جان يعيط ذيج العيطه عليه

امير:الوووووو وين متگليلي داگه عليه كومه عبالي شو شنو صاير الج وهسه ادگ عليج ليش متردينننن وماكو

ايلاف:كُلش نهضمت من حجيه وگلت بقهر، يعني اله تصير مصيبه يالله ترد واني من أمس گلبي مفرفح عليك اتصل مترد متت الف فكره وفكره اجت براسي اتصل عليك مترد بالاخير يطلع الي خارج التغطيه حتى رقم اختك ماعندي وتالي هسه تجي تصيح عليه لان تأخرت بالرد حقك هو انت وين تدري شنو صاير...

امير:ليش شنو صاير وشبيج هيج تحجين شبي صوتج؟

ايلاف:أحس طاقتي خلصت من خوفي عليه من البارحه وانفجار اليوم ومنظر الناس اليوم كله تكومت ما تحملت بجيت احس عقلي بعد ميشيل...

امير:شبيج أبويه أنتِ ليش هل بجي؟

ايلاف:امير متدري شنو الي ديصير بيه من البارحه اتصل بيك ماكو واليوم صار انفجار والله من خوفي گلت يمكن راح بيه وضليت اسولف اله على الي صار كله واني ابد ولا بطلت بجي..

امير:كافي يعمري كافي أبويه أنتِ والله ما ادري بيج هلگد رح تخافين عليه جان ما سويت التلفون صامت واني هم مو گلت الج احتمال اقلل اتصال لان عندي شغل، كافي مرتي رحمي حالي عاد مو گلبي تگطع عليج كافي بعد روحي...

ايلاف:ميخالف عاد بس طمني بعثلي مسج گول يأبه اني بخير ما بيه شي عندي شغل مو هيج ...ضل يهدي بيه بعده غلقته...

مسحت دموعي بعده فتحت التلفون اگلب كله عاجل على انفجار اليوم لتهيت أقره بالأخبار جان يتصل امير...

ايلاف:الووو ها امير؟

امير:الووو مرتي تعالي نزلي اني جوه بالباب....

ايلاف:شهگت،عززز شجابك...

امير:ما تحملت اضل گاعد بالي ضل يمج يله تعالي نزلي بسرعه...

ايلاف:شلون انزل مو اهلي هنا؟

امير:ادري قابل رح اخطفج غير مرتي وجاي اشوفه بسرعه ولج يله...

يتبع....
لاتنسون التصويت وتعليق ومتابعة للحساب بدربكم والانستا هم@ghe.92
دمتم برعاية الله وحفظه

غدير عبدالله