رواية #وكر الأشتر الفصل العشرون 20 - بقلم الكاتبه سمو العراق

البارت التاسع عشر
رواية.. وكر الاشتر
بقلمي.. نور سمو العراق

💔💔💔💔💔💔💔💔💔💔💔💔
للاشتر

الخوة خيمة عرب للصاحب البردان

الخوة زاد وملح مو بس كلام اللسان

الخوة راية بخت مرفوعة بالميدان

الخوة شجرة ثمر وبمحبتك أغصان

الخوة بلبل فرح ويغرد الألحان

.......................

صفاء

اخطر فايروس على وجهه الارض هو الحسد والحقد والغيره واحنه ابتلينه بناس الحقد مالي گلوبهم

اني مرات افكر معقوله الي ديصير ؟ معقوله اكو هيج ناس توصل تاذي وتقتل على حساب مصلحتها

اني شاب طلعت وشفت وكل شي صار كدامي شفت العجائب بالعراق جانت تصير انفجارات اني اشيل اشلاء الجرحه اني اشيل الشهداء گلبي مات صرت ما اخاف تجرعت المر وصبرت

بس انصدمت من اخذوني وشفت روحي بين اديين ساهر الكلب وتحسين وابنه الحيوان جياد

اني متخفي ممبين الهم اني ضدهم ولا يعرفون علاقتي قويه بالاشتر بس حسيت صار عليه كمين اول ما شفتهم ايقنت وتأكدت ورا كل شي صار اليوم هو مصطفى

ابتسمت بقهر ... يا وسفه ويا حيف مصطفى تبيعني لخاطر هذول الكلاب شسوولك حتى هيج تنكر كل شي بينه

تقدم تحسين وهو يحجي باستهزاء ومسخره... تلعب من ورانه صفاء

جاوبته بهدوء.. ما عندي شي وياكم حتى العب من وراكم

تقرب مني ولزمني حييل من قميصي حسيت القميص تكطع عليه لزمت ايده اخفف من قبضته كال بغرور وحقاره... تعرف اني اشتغل لصالح منو

جاوبته بحده .. ميهمني

ضحك بغرور ورد عليه... اني ب( .... ) وتعرف شنو هذا الحزب وشكد مسنود لذلك لا تلعب بالنار ولو انت اصلا بعد ما تلعب بالنار لان راح تسافر للسما ههههه

ارتعدت من كلامه وخفت بصراحه هذا مجرم وحقير قاتل مستبد كل شي يكدر يسوي بلعت ريكي وشردت بتفكيري

فززني من شرودي وهو يعيط بصوت عالي.... تسمعنييييييي

بللت شفايفي بارتباك وبلعت ريكي ... اني ممسوي شي ضدك ولا عندي شي وياك

غمزلي ... والاشتر منو يوصله كلام عنه ومنو اخذ السند ومنو وره كل هالمشاكل ولك اكو احد غيرك فهمنااااا

تمتمت بالكلام جاوبته .. ما اعرف

ساهر رد بغرور .. خالي ابو زياد هذا لا تحجي وياه هذا الخوينس هو راس الحيه طگة طلقه وموته

رد بتفكير .. لا اساوم عليه الاشتر وبعدها اكتله بس خلي اادب الاشتر شي اكيد اكتله لان هذا اذا ظل عايش راح يسبب مشاكل واكيد يكوله خطفني ساهر وتحسين والمشاكل تعر

جاوبه ... خوش حجي

مشه خطوات وهو يعرج برجله كال الواحد من الموجودين.. من اخابرك اتصرف واشمره بالخرابه

تقربوا مني ثنين وهم يربطون اديه باحكام صحت بصوت عالي.. تحسيين سااااهر والله ما تلومون غير نفسكم بس تاذوني والله الاشتر ما يخليكم عايشين لا تنسون رحيق لهسه تدك بصدره

باوعلي ساهر بخبث وضحك وراح

رد تحسين.. ماتت للجير وللجهنم شنسويلها طبها مرض هي اختارت هذا الطريق وموتها حلال

احس نار شعلت بصدري من كلامه وصل بي يسب انسانه ماتت ونزلت عند رحمة ربها صرخت بصوت عالي واني اتذكرها نقاوتها ولطافتها وضحكتها الحلوه صرخت بوجههه... حقييير كلب تروح ستين فدووه لتراب قبرها يا زمال تروح فدوه لنعشها وجفنها يا عااار

احترگ گلبي ربطوني مثل البهيمة السايقينها للجزار عصابات حقراء بلد تايهه بيد الحراميه لعبان نفس صار الواحد يخاف على نفسه يطلع من وره العصابات المتخفيه باسم الدولة

كال تحسين بجبروت وحقاره.. ما يقبل الاشتر مصطفى يناسبني موو ههه شو بله راح اصير جد اولاده واريد اشوف شيسوي الاشتر

كتمت غضبي وهم خلوا وطلعوا ظليت ليله بيوم لا اكل لا شرب والجو اظلم وبارد ونايم على الكاع احس ضلوعي تكسرت وجمدت من البرد كرهت مصطفى هو السبب عرفته هو السبب بس بسيطة اذا مخليت الاشتر يادبه فلا اطلع صفاء

غمضت عيوني واني بظلمة الغرفه وانعاد عليه موقف لتحسين بسنه٢٠٠٨ جنت بيها مراهق شفته

جنه واكفين يم الساحة والعالم ملتمه كلها شفت رجال بس رجليه طالعه جان لابس سروال رصاصي ومخليين عليه عربانه مال بناء هاي امر تاير واحد فوك جثته

جنت واكف بنص الجموع ومستغرب الوضع خايف والرهبه واضحه على ملامحي بلعت ريكي واني اسال.. هذا منو قتله

ردوا الناس مفتخره بقتله وكآن ماكو ضمير كالو.. كتله حجي تحسين هذا ارهابي وراد يفجر السوك وكتله والله حجي تحسين سبع والله ما ينلام خلو بالحزب

بلعت ريكي واباوع الخزان الدم يسيل منه ودمه مهدور على الارض يشكي من ظلم البشر .. معقوووله يفجر !!!ولزمة تحسين وكتله اعرف تحسين مسنود من حزب بس ما توصل يقتل كدام العالم وبالعلن هو حتى لو ارهابي مو لازم يتسلم للدولة مو الدولة لازم هي تقتص منه ليش هيج مشمرور بالزباله عربانة البناء عليه صدك جذب هاي جثة ميت والميت اله حرمته واحترامة واشك هو ارهابي والله اشك

واحد من الجيران ضحك باستهزاء وهو يحجي بصوت خافت... هه ارهابي والله رجال فقير ومن اهل الله بس لان من غير طائفة كتله تحسين

فتحت عيوني مصدوم مرعوب لزمت طرف قميصي وعصرته بخووف ورحت اركض اركض و ما اعرف لوين ما اعرف وين انطي وجهي ركضت يم حجي اديب كعدت يمه واني ابجي ما اعرف ليش منظر الرجال لحد الان ببالي لحد الان يدگ بصدري وگلبي يوجعني عليه

لزمني وهو يحجي بخوف .. شبييك شكو شصاير اخوك بي شي

هزيت راسي بنفي والدموع مثل المطر..لا لا بس شفت تحسين كتل واحد اخاف يكتل الاشتر بيوم من الايام وهو حاقد عليه والله اخاف واحساس يكولي نهاية اخوي على ايده

رد عليه وهو يتنهد.. هي وحده من الاثنين لو نهاية تحسين على ايد الاشتر لو الاشتر نهايته على ايد تحسين

جاوبته واني ارجف واشهك بعد ما كعدني على الكرسي وشربني مي كتله .. شفته شفته مشمور بزبل ورجليه كلها دم والعربانه فوك جثته حتى حذائة مكطعه جنه تعبان وراجع من شغله ليش يكتله ليش

لزمني وهو يهديني .. كافي بويه كافي وليدي هذا حيوان بشري هذا طغى الله يحاسبه وياخذ حق كل مظلوم

رجعت من واقعي على فتحتة الباب غمضت عيوني من نور الشمس الي دخلت ارجاء الغرفه تشاهدت على روحي خفت اموت مثل ذاك الرجال ويروح دمي هدر

باوعتله وهو يترنح بمشيته ومسدسه بيده بلعت ريكي وزحفت على الارض بقلق

.........................

سوليين

وجهه شيطاني حواجبها مرفوعه وطايره من عيونها وشعرها مفتووح و وجهها مزلغ وكله دم وثوبها مشكوك من الطول طالعة ملابسها الداخليه

دخلت بصرااااخ قووووي وهجوم مباغت وتركض وصوتها يجيب التايهه اني ما شفت بس ملامحها وهيئتها وحواجبها الشيطانيه الاكثر شي اثرن بيه

من شفتها تصرررخ اني جمدت بمكاني ويبست عروگي صرخت بصوت عالي واني اتراجف للخلف واركض.... لااااا يممممه لالااا

عبالي جنيه عبالي متوحشه بنص الظلام وتركض والباب مفتوح على حيله تقربت مني وهي تصرررخ.... يممممه ولج يمممه سوااااا دي سووو ووادي يريد يكتلنيييي الحكولي

ما اشوف الا دخل بشكل مرعب عيونه ناااطه وحمر من تأثير الخمر لازم سجين بيده ويترنح بمشيته والدم مالي وجهه

من شفته صرخت بصوت عالي شكله مرعب ومقرف خفت على روحي خفت على شرفي هذا سكران وهاد بسجينه

صرخت بصوت عالي..... لالااااالاا يمممه اطلع بررررا اطلع الاشتررر وينك تعال

هي ركضت عليه بشكلها المرعب وشعرها المفتوح جنها وحش وحضنتني تحتمي بيه وهي تتوسل بيه... فدوووه سوادي لا تكتلني فدوووه

دفعتها حييل وكعتها على الصبابه ولزكت روحي بالحليط واني اصرخ بانهيار احس راسي تشلع واضرب على خدودي ... ولج يمممه تعالي الحكيلي والله اني ما الي شغل طلعووووا الاشترر ووووينك

هو تقرب منها ومشيته مو ثابته كلها .. كح .. صايره شريفه براسي ام ... ساقطه شو اليوم انام وياج واحبلج بتوم

فتحت عيوني مصدومة ومنهاره ركضت وختلت وره التيل واشوفه يتقرب منها وهي تصرخ لزمت ايده تتلاوه وياه حتى ما يذبحها ... يا ناس يا عالم الحكولي

غمضت عيوني واني اتشاهد وارجف ما اريد اشوف هاي الجريمة بعيوني وبيته كتله لا تخليني توسلت بيه ما قبل والله ما اسامحه ولا ارضا عليه حقير حيوان مجرم

ما اشوف اله دخل واحد وهو يصيح والناس التمت بنص الحوش وصارت بوكسيات ما اسمع بس الطراگات ما رفعت راسي ولا شفت شي ما اريد اشوف كرهت روحي ارتعبت والرجفه لحد الان معتليه جسمي

احس گلبي حيوكف من القهر والرعب الي عشته بهذا اليوم حسيت باديه تسللت على كتفي وهو يكول .. گومي گومي لا تخافين

رفعت عيونه اله بعيون حزينه ودامعه ودفعت ايده بغضب عارم وبصرخه قويه صادرة من روحي ... وخرررررررر وخررررر لا تلزمني حقيير

جاوبني بتردد.. اعتذر خويه اجاني اتصال و وخرت من البيت والله ما اعرف هي دقايق واني مرابط ساعات وبس وخرت هيج يصير بيج شكول للاشتر هسه خويه فدوه اهدي

وكفت مرعوبه واني ابتعد عنهم كلهم .. اطلعوا برااا حقراء دايحيين خابر الاشتر بسرعه خابره الله لا ينطيكم حركتوا گلبي يمه راسي راح ينفجر الله ينتقم منكم ومنه

باوعت لسوادي واكع مكتول كتله مو هاي التمام وهاي الادبسز مياده كاعده على القنفه والعالم ملتمه عليها وتسال بيها وهي تصرخ وتبجي دكول.. يريد يغتصبني

واحد من الجيران كله ... بس احجيلي هو شلون دخل عليج

ردت عليه وشعرها مفتوح وثوبها مشكوك لازمته بيدها وترجف رجف مو طبيعي ومرعوبه كلتله.. ما ادري جنت نايمه وامي طالعه عندها مره تريد تجيب مو تدرون بامي قابله وراحت تجيبها وتاخرت واني نمت

ما اشوف الا واحد يوخر بكارتون الشباك عبالي بزونه ما اهتميت وطافيه الكهرباء رجعت نمت

انوب ما اسمع اله دبجة على السطح خفت و وكفت دا اسد الباب ما اشوفه اله لزم ايدي ودخل اريد اخلص منه ما اكدر ملخ شعري تملخ شكك ملابسي واصرخ وماكو گلبي اجه يوكف

جانت تحجي وتبجي ومبين الرعب عليها كملت كلامها وهي تصرخ .. يگلي اريد انام وياج اليوم هيج اسوي بيج ظل يفشر عليه سوه بيه دهر الله ينتقم منه ان شاء الله

ردت عليها ازهار بعصبية... اي كله من وراج كتلج هذا كوا... بس انتي ما اخذتي الحجي دكليها طبج مرض

شهكت وهي تبجي .. شسوي والله هو نهار كله بس يشمر حجي ويباوع ما انطيته مجال سطه عليه الكوا..

جنت استمع الحجيهن وكلبي يفور صرخت بيها بغضب... ادبسز حيوانه انتي لو ما منطيته مجال مجان سوه هيج من طاح حظج وحظ سوادي شكو هجمتي عليه الله لا يوفقج

كالت وهي تلطم على وجهها .. خرب حظي اليسوه والمايسوه ظل يعيرني هسه كلها راح تصير براسي شرفاء

تعصبت من كلامها وحقارته وعيوني غركانه بالدموع اشرت للباب... امشي اطلعي براااا نصير براسج شرفاء مو عساس انتي شريفه

طلعت وهي تفشر واجت امها ظلت تفشر عليه خبلني بالزايد انوب دكولي..بسيطة يجي رجلج لو ما يجي الا نخلي يربيج

جاوبتها بغضب.. خاااب انجبي هو خلي يجي واني اعرف شلون اتصرف

سمعت صوت الاذان يكولون شهود الفجر يزيل المعاصي وتنجلي الروح ويحل النور بس وين احنه كاعدين بنص الطهاره

كبر اذان الفجر قشعر بدني وعيوني اندفنت تحت الجفون كرهت كل العالم كرهته هو بالذات احس باهانة احس بحقد عليه هو السبب بكل شي تاركني ببيت بنص الدعاره وعايفني على ساعه واحد يجرم بيه شنو غايته والله احس گلبي تكسر من القهر

حسيت بدوخه فضيعه حاولت اتماسك بس ما كدرت لزمت گلبي بيدي احسه تقلص من الوجع وما كدرت اتنفس اختنكت اربد اسحب هوا ماكو وكعت مغمي عليه

ما اشوف بس خيال العالم وهم ملتميين عليه وعايد سحبني وهو يرفعني لصدره حاولت ارفسه بس طاقه ما عندي وبعدها حل الظلام بعيوني

.......................

جيهان

كعدت الصبح نظفت البيت كله شكد ما ننظف احسه وصخ كد ما عتيك وكله صراصير

لحد الان وجهي مورم من ضربة ابويه والنسوان مو نحف اني وافيان يسالن ليش وجهج هيج شبيج ليش هيج واني اجاوبهن ماكو شي وكعت على وجهي و ورمت عيني

بس هن ما يصدگن ويظلن يتبسبسن

دخلت مره سمينه حيل لابسه عباسه جربه وسنها الكدام مكسور وياها مره ثانيه اصغر منها صاحبة اسنان طوال وضخمة حيل صاحبة زنود وثالثه هم سمينه بس كصيره

گالن نريد نحف ونصبغ استغربت هن كبار مو مال صبغ وحفافه بس گلنه ميخالف شدخلنه المهم نحصل فلوس

بدينه نحف بيهن اني حفيتهن وفافي صبغت شعرهن انوب سوتلهن شيره لجسمهن وهي لعبانه نفسها منهن

غسلت شعرهن وشسورته انطنه مبلغ فلوس كالت المره الجبيره .. انتي مو المحترگة

باوعتلها بصدمة وتنهدت جاوبتها بقلة حيلة .. اي اني

ضحكت وشاورت الي بصفها وظلن يتمضحكن ما حاجيتهن ورحت اصبغ للبنيه العروس

جان فافي ما سكتت جانت تحف بمره كلتلهن .. اي شكو تتمضحكن برابيج هههه ضحكنه وياجن ضايجين ( تحجي عود بالشقه انوب هن نسوان كبار )

ردت عليها المره ام سنون بضحكة .. ههههه لا اكلها اريد اخطبها لابني ميثم تنطوها

افيان عقدت حواجبها .. منو ميثم بس لا هذا المتزوج تلاثه ومطلكهن صايرلي حجي متولي بالتحديث الجديد

ضحكت ... اي هو شيسوي سودة عليه ما عنده حظ بالنسوان منو يتزوجها تطلع مو زينه لو تبوگة لو شوف شسوي من شغله لو تخونه وهو مسكين يطلكهن

افيان بدون نفس ردت عليها والخيط مال لحفافه بحلكها ... يمعوده صدك جذب والله انتن الامهات مال حرك ما تنطن بولدجن حتى لو هتليه هسه معقوله تلاثتهن مو زينات بس ابنج خير

جرت نفس المره وزفرته كالت.. اي والله هو فقير بس شسوي ما عنده حظ بلكي الله يكعد ويه اختج

ردت عليها..حجيه اسكتي رحمة لاهلج اختي لو سفير لو ميصير ما تتزوج اذا مو رتبه بصراحه يعني

اردفت بكرة .. وبعدين لا تنسين انتي عندج سبع بنات اصغرهن بكد بابا وكلهن ممزوجات ومينجرعن انوب انذكر من كتلن مرته خرب شلون سحلنها سحل جنهن فياله على العموم طلبكم مرفوض وما عدنه بنات للزواج

المره تخبلت وخلت وراحت ضحكت عليها .. ولج مو هيج عيب

ردت بعصبيه... خلي تولي العوبه شافت اختي فقيره تريد تاخذها تدمغ عليها هي وبناتها السعالو عابت ادبسزيات

كملنه حفافه دزينه امين جابلنه لفات تغدينه شويه دخل ابويه راد فلوس من افيان هي انطته قسم كلتله .. ماكو نسوان اليوم بس ثنين اجن

رد عليها بغضب..انجبي ادبسز حيوانه ام ميثم وبناتها مو اجن حفن

عقدت حواجبها.. شنو شمدريك بيهن

رد وهو يكرط بخيارة مدري منين جايبها... اجتني امه يم ابو سعدون وصاحتني كالت تريد تخطب هاااي ( اشر عليه ) ولا اتذكر فد يوم كال اسمي يا يكول هاي لو لمشوهه

خفت وباوعت لفيان بقلق عزا ما اريد اتزوج مستحيل والله ما اريد انوب ذول عائله كلها شر وحقد وغل مستحيل اطلع من مستنقع قذر ادخل بنفس المستنقع والله ظلم

انتفضت ضده وجاوبته ... بس اني ما اقبل ما اريده

كال بسخرية.. هو انتي منو ماخذ رايج بت النعال فوك ما لكيتلج رجل ينفگج اصلا ما صدكت كالت خطبتج ما جنت متوقع احد يكلبج مدري شلون يباوع الجسمج وهو محروك اييع ( تفل )

احس العبره خنكتني كل ما اريد اقوي نفسي ما اكدر كل ما اريد اساعد نفسي وصل لفد نقطه يرجعني لنقطة الصفر شكد قاسي وحقير حتى بالكلام يجرح شلون يتنمر عليه واني بنته من دمة ولحمة

احس كلامة مثل سوط من نار ينزل عليه بقسوه ويجرح كل شبر بجسمي عدم كل شي بداخلي

شهكت والدموع تتطافر من عيوني وعفته ورحت وهو رجع ياكل بخيارته ويطلع اصوات مقرفه من دون ذمة ولا ضمير

كلمته لحد الان تدور بعقلي مشوهه مو زين قبل بيج مدري شلون يشوف جسمج ايييي صح هاي حقيقتي الي ملازمتني سنين وخلتني اخجل من نفسي وحره روحي وما اكدر اواجهه اي واحد

ياربي والله تعبت ياربي الحگني بامي اريد ارتاح تعبت روحي طلعت سمعت الكلام نزل عليه مثل الصاعقه هاي ابوي هيج يحجي الناس شلون تحجي الله ينتقم من كل ظالم نمت على فراشي واني ابجي بگلب مجروح وروح فاضيه من القهر والهم

......................

صفاء

اول ما دخل شفته وغمضت عيوني بسبب قوة اضاءة الشمس شفته تحسين وساهر واحدهم وجهه ما يكصه السيف وكل واحد عاقد الحاجب وشاد على شفايفه بكل غضب

زحفت على الارض بقلق وتحسين كعد على الكرسي وهو يتصل وكل شويه وكال... لك رد حيوان حقير رد بسيطه اذا ما ندمتك ما اطلع حجي تحسين

وساهر واكف على راسه وهو يحجي بقلق ... هااا بشر ما فتح خط خرب بيك لك بسيطه لك هذا اذا ما نقتله مراح نرتاح

نفخ تحسين بضجر وهو يرد عليه... لا ما رد لك بس لا قتله

ساهر بحيرة ... ما اعرف هذا كل شي اتوقع منه

ظلوا تقريبا خمس دقايق اتصل الموبايل هو فتح خط وفتح المايك كال ... الووو هلا حجي تحسين الورد

عرفته هذا صوت الاشتر فتحت حلكي بفهاوة الحمدلله معناها عرف اني عندهم

رد عليه تحسين بغضب... الاشتررر لك شوف اذا ابني زياد صار بيه شي ما تلوم غير نفسك

جاوبه الاشتر ببرود .. حبيبي حجي تحسين ابنك بالحفظ والصون بس شنو لازم ترجع صفاء وابنك ان شاء الله بحظنك

رد عليه بقسوة ... كم مره كتلك اخووووك مو عندي

ضحك باستفزاز... حجي هاي عود انت الجبير الرايح للرضا مشي تجذب والله عجيب على العموم صفاء عندك وهسه اثبتلك شلون

تحسين عقد حواجبه وهو يجاوبه .. شلووون

رد عليه ... خابروني سيارة صفاء بالحجز واخر موقع جانت بيه هي يم النهر وانت تعرف الجسر الفوك النهر بيه كاميرات ومصوره ربعك يعني عندك من الاخر ما بيه حيل احجي تسلم صفاء سالم غانم اسلم الك ابنك تسلم صفاء بيه خدش ابنك ارجعه جثه وانت براحتك

بلع ريكة تحسين بضياع وجاوبه... اني من اخذت صفاء بس حتى اادبه لان هو منافق وخبرك عن مصطفى يريد يناسبني وانت منوافق وتهدد

جاوبه الاشتر ببرود.. اي والله نسبكم ما يشرف للآسف

تنفس تحسين بغضب وهو يكتم غضبه والاشتر اردف ببرود قاتل ... ومصطفى خليك بعيد عنه وكافي تنگ براسه مثل المطي وتزق بيه بالفلوس سودنت حتى الولد وارجع واكول نسبك ما يشرف ومستحيل اخليه يناسبك واني فهمته شسوي

وهسه كافي دخت خو ما اظل بس احجي وياك عندي مشاغل غيرك هواي من ترجع صفاء خابرني ادزلك ابنك تمام وليدي

قفل الخط بوجهه وتحسين تخبل باوع الساهر بحقد.. شغت شفت شلون يستفزني لك هذاا اريد اكله بسنوني اريد اكطعه وما يشفه غليلي محد هيج يحجي وياي ولا احد يستفزني مثل هذا الكلب لو اعرف ادفع نص عمري بس اخلص مني مستعد

ساهر بقهر ... اني هم حارك دمي والله اذا ما نزلته للگبر فلا اطلع ساهر بس انطيني صبر شويه

بعدها صاح على واحد من ربعه وهو يحجي وياه گله .. رجعه منين ما جبته

صدك اخذوني واني مربوط وبعدها وصلنه على النهر نزلوني بعد ما فتحوا اديه حالتي حاله ومن دون نعال ظليت واكف محتار احس عبالك جنت سجين وتحررت

ابتسمت بفرح .. والله عندي اخو كفو ما خلاهم يبات عليه ليلتين اول ليلة وطلعت الاشتر صدك فخر من طاح حظك مصطفى

سمعت هورن السياره وهو يصدر صوت قوي كمزت من مكاني وباوعت شفته هو رسم ابتسامة حلوه على شفايفه ونزل الجام كال .. اصعد لك زمال

ضحكت ورحت صعدت يمه حظنته وبسته وهو بادلني الحظن كال .. تدري من البارحه لليوم ما شايف البيت تخبلت من شفت سيارتك بالمركز كلت ماكو غير هالحقراء لان لو هيج عصابه جان اخذوا سيارتك ما اخذوك

نفخت بضجر.. اي حقراء جانوا ناويين على قتلي بس الحمدلله ربي ما قصر وبعثك اليه

رد عليه... اي طيحت حظهم خليته يرجعك وهو الممنون

بعدها رفع موبايله كال... اوووه شصاير عايد متصل ١٨ مره هذا الموبايل مجنت ماخذه عايفه صامت بالسياره بس الثاني

عقدت حواجبي... خاف سوليين بيها شي

باوعلي وقلص عيونه وبسرررعه فر السياره ورجع للبيت بلل شفايفه بحيره ... معقوله بيها شي

اتصل على عايد ماكو رجع اتصل ماكو وصلنه للبيت ونشوف الجموع الحاشده كلها واكفه بباب البيت هو بسرعه نزل يركض واني ما اعرف شصار بيه احس رجليه ماتت من الخوف والقلق رغم كل شي سولين حيل احبها واحترمها

الاشتر لزم عايد بغضب من ياخة قميصه بعصبيه وغضب اكتسى ملامحها... احجي شكوووو شنو لا دكول بيها شي

رد عليه عايد باسف .. لاا هو بس هي حاليا بالمستشفى فقدت الوعي

دفعه بغضب انضرب بالحايط ورجع لزمة ... احجي لك شصاير شبيها شنوو هاي العالم منو ترجئ وسوالها شي

رد عليه عايد بقلق... لا محد بس هي ناسيه تسد الباب وسوادي سطه على ميادة وميادة شردت وما لكت غير باب بيتكم ودخلت وانخلست سولين من شافتها وتخربطت

هز راسه بوعيد وجهه محتقن كله .. سوااااادي اروح للمستشفى واجه الكاه كدامي وانطيني عنوان المستشفى

انطانه العنوان ورحنه انطلق بسرعه جنونيه من دون ما ينطق اي حرف و وجهه محتقن وشاد على الستيرن حتى ما كدرت اهدي ولا احجي كلمة تخبل من سمع بيها

وصلنه للمستشفى واخذ عنوانها دخلنه لغرفتها جانت نايمه بهدوء والهالات السوده غازيه عيونها البريئة وجفونها مورمات بشكل ملحوظ وشالها ملفوف على وجهها باهمال

وجهها شاحب شحوب الموتى اصفر ما يمت للحياة بإي صفه وخشمها احمر من كثرة البجي وشفايفها متشگگة واثر دنيه واضحة باسفل شفتها شكلها يكسر الخاطر

رغم اني شكد اتردد منها واخاف منها ومن عصبيتها بس من شفتها اليوم عرفتها هي بس لسان وقوه خارجيه تتمتع بيها وتدافع بيها عن نفسها جانت جامعه ترفض الانصياع وهذا الي ميزها من بنات جيلها بالنسبه لاخويه

شفت بعيون الاشتر لمحة عشق حب احسها حبيبتة عشيقته المتمردة ضده الرافضه للانصياع اله تحسها تتدفق منها الانوثه رغم صحاريها الجافه  الي ما عرفت شلون تحتوي ضعفه ورغم مزاجها الخريفي وافكارها المتلبده

كل شي بيها غير هشاشتها ضعفها صراخها جنونها لطافتها وطفولتها تستحق الاحتواء حتى تزهر حياتها ويعم الربيع عليها

تقرب منها وهو يقبل جبينها بحنيه ولزم ايدها المربوطه بالمغذي وراجع القليل من الدم بالصونده باس ايدها وهو يهمس .. اعذريني يبويه ابن امي تنافسينه بالمعزة بس ما اعرف شلون غفلت عنج

اردف وهو يبوس ايدها بهيام ... حنينة طبع
انسانه لكن لبوه

بعدها تكلم  بضياع  من دون ما يباوعلي وهمس ... صفاء اطلع برا

طلعت بسرعه تاركه ويه الغزال الجامحه يداري جروحها النازفه ويطيب خاطرها

......................

سولين

فتحت عيوني بتعب وغز تبزز بعيوني من كثر ما بجيت وصداع قوي براسي حسيت بشخص لازم ايدي

رمشت بعيوني واني اريد اعرف اني وين باوعت شفته هو مخلي راسه على ايدي ولازمها

بلعت الغصه واني احاول اكتم عبرتي ودموعي شهكت بصوت مسموع وخليت ايدي على شفايفي واني امنع جيش الشهكات الي انتفض ضدي

بسرعه باوعلي وفز من مكانه باوعلي بعيون ذبلانه وواضح التعب عليه شديت على شفايفي بقسوووه وحقد هو السبب بكل شي صار هو السبب

درت وجهي واني اشهك احس الشهكات سجاجين اكطع كلبي تقرب مني واحتظني وهو يكول... بنيتي سولي لاا لا لتبجين والله مو قصدي ابتعد عنج واعوفج بس انتي ما تعرفين شصار البارحه

درت وجهي منه وما باوعت بوجهه بس دموعي تنزل مثل خزان مثقوب حد اصابعه حدر حنجي ودار وجهي عليه

نزلت راسي واني اظم انظاري عنه ما اريد اشوفه ولا اريد اخلي عيوني بعيونة حسره بداخلي تهدم جبال

حاسه بقهر بذل بإهانة بكل شي احس ما الي اهميه بالوجود ولا حتى بحياته بعيدا عن اسلوبه بس عديم اهتمام دافني بالحياة وكأني كبش فداء عنده ما موفر الي راحه ابد مسكني مكان مو راحة اخاف على شرفي من الرايح والجاي

نمت وظميت راسي عن انظاره لساني ما يطخ لسانه وعيني ما تصد لعينه غدرني وجرحني وجذب عليه كال اجيب اخواتج وما جابهن

حاول يحجي ويايه رفضت رفض قاطع ما اريد احجي وياه اعرفه جذاب ومراوغ يجذب عليه بكلمة وكلمتين ويخليني ارضا

اني انظلمت حيل انظلمت جانت الحياة زاهية بعيوني صارت سوده اني جان هسه اداوم ويه صديقة عمري كوثر مجان صار الي صار ااااه حتى كرثر مشتاقه الها ومشتاقه لصداقتنا وسوالفنا وكعداتنا وضحكنه

بعدها حاول ويايه رفع وجهي واحتضنه بكفوف اديه مسحه من الدموع وهو يرد عليه .. احجي شتردين اني حاظر والله شنو ببالج اسوي بس لا تسوين هيج لا تظلين بارده ومغيمة اريد سولين الحيه ام لسان طويل اريد اوبخج نجحي مثل قبل نتناقش نتعارك ونتصالح

هزيت راسي بنفي واني ابجي ... لاااا مستحيل الي صار ويايه جرحني اذاني اليوم الصار رعب بحد ذاته اني راح اوصل للجنون والسبب انت

جر نفس ورد عليه... ادري ظلمتج واذيتج بس والله مو قصدي وانتي تعرفين شكد احاول ارضيج حتى عامر حطيت مسدسي براسه بحيث ما ردته ياذيج

جاوبته بعبره... بس انت اذيتني كلامك جوحني ضربتني وانوب دكول لجالي عوفيها متفهم ممتخرجة ترا التخرج مو فد شي ولو مخلصه دراسه اتخرج

ضحك بهدوء وهز راسه باسى.. ممتخرجة اقصد يعني ممتطلعه عن العالم الخارجي مو ممكملة دراسه يعني مخارجة للشارع وتعرفين الردوود والدروب هذا القصد لان هي من كلتلج تشرفت بمعرفتج كلتيلها اني الاشرف بعدين شجاب التخرج على ردوود شبيج انتي

بللت شفايفي بقهر.. ما اعرف اني ضايجة وطالعه روحي اريد اكون الوحدي

باس ايدي سحبته بسرعه وخزرته ورد عليه.. حقج والله

حطيت راسي على المخده والدموع تنزل بصمت وهو يباوعلي محتار شلون يرضيني وكف افتر بالغرفه شويه وبعدها اتصل وحجه بعصبية... عايد سوادي اريدك تندمة على ساعة السودة لدخل بيها بيتي واني جاييك

مسحت دمعتي بطرف اصبعي وتصنعت النوم ما اريد اشوفه ولا احجي وياه تعبت من كل شي اريد ارتاح اريد اكعد بمكان نظيف خلي يحس بتأنيب الضمير خلي يعدل من نفسه ويكعدني بمكان بيه حظ

.........................
جيهان

مر يومين دخل ابويه بعصبيه وجهه يلطم ولابس ملابسه كالعاده شي ما يشبه شي بلوز صوف برتقالي وبجامة زركة كال بعصبيه... وينجن نعالات

سكتنه مجاوبنا كال... هااا بنات الكلب كاعدات هنا ما تردن كون سرطان بكلبجن كح .. عارات على ذيج الساقطه من ماتت كل الخير اجاني

همست افيان ... سرطان بگلبك كون

كملت بعصبية... خييير شراييد

كال بدون نفس ... اليوم يجي ميثم هو وامة يشوف المشوهه عود نظفن البيت راح اروح اجيب كعك

اشر عليه وانتي هي عدلي وجهج من صخام بوجهج من لفيتن عليه كل خير ما شفت

خله وراح واني جليه وحده ظلت تضرب بالثانيه لزمت افيان بتوسل ودموعي بركان من نار... افيان شسوي افيان ما اريد اتزوج والله مابي خير انوب مطلگ تلاثه بيه خير ما اجاني

كالت بعصبيه .. دنطيني صايتي خلي اروح اتعارك وياهم ورزلهم واجي

لزمتها بخوف... اكعدي واستري علينه يمعوده لا انوب يجي ويذبحج والله هذا مجرم سفك دم امي ما يسفك دمج

دفعتني ولبست صايتها وراحت هي وامين

لزمتها ردت ما قبلت ظليت ارجف من الخووف والقلق ياربي غير كون تجي لا يجي انوب يموتها تموت والله يذبحها خرب

أستغفر الله ياربي الطف بحالنا عمي والله اتزوج واروح بس كون تجي شلون ورطه وين راحت تاخرت گلبي صار نار

فتحت الباب شفتها من بعيد اجت تهف هي وامين حسيت ارتاحيت نسبيًا بس كون توصل للبيت وتدخل وارتاح

دخلت ونزعت صايتها كالت .. غسلتهم غسل لعنت اسلاف اجدادهم كلتلهم بس تجون تخطبون اختي اطردكم من الباب

صدري ارتفع وهبط من الخوف... لج خاف تروح دكول لابويه ويكتلج

كالت بعدم اهتمام.. عادي طبها مرض واذا كلتله قابل دا ارجف منها بس المهم ما تجي وتخطب خليني انكتل

شويه وهو دخل جايب بيهن خمس كعكات كال .. مو تاكلنهن للخطار ذن زين والله اذا الكاهن ما كولات بالشارع اطردجن

استغفر الله هسه هذا واحد شيجاوبه دعيت الله كون ما يجون ويتفشل ابويه والله ينجلط وهو جايب كعكات

والله انتظرنا ساعتين واجوا من اجو احس دخل الموت برجليه ارتعبت وضاق صدري سيطرت عليه كابه غريبه وفقدت الامل

ما طلبوني ولا شافوني بس من طلعوا سمعت ابوي يلكهم هذا هو ان شاء الله السبت الجاي الخطوبه اي احسن ما نطول اهم شي الستر وحق الله

..........................

رنا

اجتنه كوثر استغربت مو عوايدها هاي تجينه بالصدف ما اعرف اليوم شنو غايتها واجت

ظلينه كاعدين نسولف ونضحك وتغدت يمه وكل شويه وتسأل شلونه حارث شنو شوكت يجي ما اعرف شصار بيه دب الشك بداخلي

جاوبتها ... ان شاء الله هسه يجي ليش اكو شي صاير شي

ضحكت وهي تفرك اديها بتوتر كالت ... هااا لا ماكو شي بس هيج اسال عنه شنو ميصير

ابتسمت ... لا عادي يصير شكو بيها

بعدها سالتها ... اي شلوها جنتكم الجديده

ردت بحب ... اوووي يعمري عليها تجنن كيوت ولطيفه حييل ومثقفه ودارسه شفتي اختياري لاخويه شلون حلو ههه

اردفت بخبث ... عود عمه ام حسن تريد تجيب جيهان ام حاله نفسيه اوووع حتى تخبل اخويه

فتحت عيوني مصدومة من كلامها ورديت عليها .. عيب عليج هيج تحجين على جيهان هي لا بزادج ولا بشربج واخوج خطب بعد سدي الموضوع

ضحكت باستهزاء... ادري بيها تحبه وحتى كلت لايو و ايـــــــــو كالت بسيطه اني اعرف شلون تخلي عينها على خطيبي

هزيت رأسي باسف.. صدك انتي ما تستحين واصلا جيهان لا مفكره بيج ولا باخوج هن وينهن وين الظيم والله يكتب الها الاحسن من اخوج

ردت بخبث.. خلي يكتب الها المهم متاخذ اخويه هههه

شويه واجه حارث صارت ناعمه حييل وتقلد ايـــــــــو بالحركات والتصرفات حتى من سلم عليها ترد بتصنع ودلع

طلع برا وهي لحكته حسيت اكو شي خليت وطلعت وراها وكفت وره الباب وسمعتها دكوله بتوتر واضح على صوتها ... حارث اني احبببك احبك من جنت تحب سولين جنت اشوفك واتحسر اتحسر شلون تحبها وتعشكها واني ناسيني ومستعده اضحي بكل شي في سبيل احصل عليك

انصدمت من وقاحتها وجرئتها ومن صدمتي حتى ما سمعت رد اخويه شنوو ولا ردة فعله ولا جنت حاسه  بيها تحب اخويه صدمتني صدمة حياتي

...........................

سوليين

بعد ما طلعت من المستشفى حسيت بيه يتودد الي تخابره سالي يقفل الخط بوجهها ويحاول يرضيني

حتى الاكل كله يجيبه من المطعم وجابلي ملابس وجاب هوايه شغلات للبيت وعدله جاب طباخ جديد وجان تخم للحوش وجابلي اغراض وملابس واحتياجات

جنت كل شي يجيب ممقتنعه بيه ولا ابرر اله الغلط الي صار لا هو ولا صفاء جانوا موجودين ولو يسوي البيت قصر مراح ارضى لازم انتقل من هذا المكان

فتت من يمه لزم ايدي وكفت بهدوء من دون اي مقاومة كال .. سوليين راح تظلين هيج

سكتت مجاوبته

لزمني من اكتافي ورد عليه .. سكوتج هذا معذبني لا تسكتين سبي اغلطي صيحي سوي اي شي بس لا تظلين ساكته هذا مو طبعج لا تتغيرين

ابتسمت بحزن ... فقدت الشغف بالحياة خليني هيج احسن حتى طاقه للحجي ما عندي

تقرب مني باسني ما بدرت مني اي ردة فعل جنت ثابته وجامده تخبل هو فتح عيونه بغضب ضرب القنفه لبصفه وعاط بيه ... سولييين شبيييج

مجاوبته فضلت السكوت

نفخ بضجر واتصل على صفاء كال... الو صفاء تعال يم سولين عندي مشاعر اخلصه واجي

بدل وكمل وكعد يدخن واعصابه نار وعاقد حواجبه انوب اتصل بيه واحد هو اول ما فتح خط واستلم ذاك دك رزايل وغلط مدري شبيه تخبل

شويه ودخل صفاء سلم عليه وخطيه راح الغرفته حيل يخاف مني احسه او يستحي مني ما اعرف

كعدت على القنفه واني صافنه بالفراغ صافنه بحياتي ويه الاشتر الي صايره مد وجزر كرهت روحي يعني مو معقوله اخلص حياتي هيج

نعست نمت واني كاعده على القنفه ما اعرف شكد نمت فديت على ايده وهي تفززني بهدوء وهو يكول .. سوليين سولي اكعدي شوفي منو اجه

فتحت عيوني ببطئ وعدم اهتمام وبعدها كمزت من مكاني واني اشوفهن كدامي يبجن مثل الطيور المفرفحة

صرخت بصوت عالي واركض عليهن ... اخووواتي افيان جيهاااان

نهاية البارت ... يتبع

كونوا انتم كونوا بخير .. احبكم 💔

لا تنسوا التصويت والمشاركة بكم نكتمل 🥺

البارت تعويض عن الفات

منشور يبين ابعاد الروايه ذهنيا ويبين مدى ثقافة المتلقي بعيدا عن كمية الاحداث كل شي اذكره بالبارت هو مهم بعدين تكعدون تدورون عن فك الشفرات الي انتم اصلا ممركزين عليها بالبارتات السابقه

وبارت البارحة الي كلتوا يفتقد للاحداث بالعكس هو بيه محور الرواية وغموض الرواية بس محد حاول يقره بتأني وتركيز ويقوي ملاحظاته 🌚

وكل شخص مذكور بالروايه مهم ويعتبر مضخة للرواية وشكرا😏

.........................