رواية #وكر الأشتر الفصل السابع وثلاثون 37 - بقلم الكاتبه سمو العراق

بارت ٣٦
رواية .. وكر الاشتر
بقلمي .. نور سمو العراق

💔💔💔💔💔💔💔💔💔💔💔💔💔

للاستفادة 😍

مرت ڪام ساعة دون أن تزرع لك شجرة في الجنة ساقُها من ذهب ومسيرة مائةَ عام؟

قُل: سبحان الله، والحمد لله، ولا إله إلا الله، والله أڪبر 🤎🤎🤎🤎🤎🤎🤎🌴:""".

............................

سولين

اكو مثل يكول  عيارة النسوان بكبك كمطنه وكام يضحك

طبعا  هذا المثل يخص فئة من النسوان يعني خاص مو عام مع احترامي لباقي النسوان بس هسه اني ما اعرف منو بينه العياره مدري اني عياره مدري سالي العياره

لا لا سالي هي العياره مسويه روحها كيوت ولطيفه وذكية وهي تركض وره رجال متزوج بيج خير جان تزوجج قبل لا يتزوجني

اني طبعي هجومية وعصبية بس هالمره صرت ذكيه وحبيت اشوف رده وشنو جوابه الها وظليت مترقبه الوضع بكل هدوء

سمعته ضحك وهو يكولها .. لا  عاد مو وكتج خلينه مركزين بشغلنه افضل

جاوبته بجديه .. ترا اني مدا اتشاقه دا احجي صدك يعني ما اعرف شلون اكولك بس من زمان واني ضامة بگلبي هوايه وجنت اضن ان انت كذلك معجب بيه بس انصدمت من اتزوجت هسه دا اشوف انت بداخل صراع بهذا زواجك اذا حاب تنهيه اني احبك ومستعده اضحي بنفسي لخاطرك

رد عليها بثقه .. زواجي هذا ما ينتهي وبعدين اني مو زعطوط حتى كل يوم اتزوج وانهي زوجتي عاجبتني واحبها وممستعد اخرب علاقتي بيها بسبب هذا الموضوع الي دتطرحي حاليا

واذا تشوفين نفسج ان انتي متكدرين تسيطرين على نفسج فالافضل نبتعد حتى بالشغل عادي الكة بديل غيرج

رفعت حاجب مصدومة .. يعني شنو قصدك تتخلى عني بكل سهوله واحنه يا ما اشتغلنه سوه وياما خلصتلك قضايا

جاوبها ببرود ورجع يدقق بالأوراق الي كدامة وهو يكولها .. اي هذا شغلج وتقبضين حقه يعني ماكو فضل صح اعتز بيج وانتي شاطره بس مو من حقج تساوميني بشغلج

هزت راسها بنفي... لا لا مدا اساومك بس اني جنت احبك من زمان وجنت ناويه اعترفلك بس انصدمت انت بين يوم وليله خطبت وتزوجت ولا كأن اني زميلتك واسرارنه سوه

فرت منها انوب لابسه فستان صيفي لحد الركبه وكاعده رجل على رجل شويه وتطلع القارات تريد تخبل الرجال

عاد اني كلت خلي انهي هاي المهزله واتصرف من كيفي دخلت ببطن المطبخ ورجعت فورت الگهوه وبديتها بالكاع وبردت شويه منها خليتها على ايدي رجعت شمرت الدلة واني اصرررخ ... اوووووي يممممممة احتررركت احتررركت يمة رااااااحت ايدي

شفته اجه ملهووف وهو باب المطبخ وهي وراه واكفه تباوع ومنقرفه من الوضع

تقرب مني وهو يلزمني كال بقلق .. شبييج سوليين احتركتي ايدج احتركت ؟

جاوبته بوجع كاذب ومسويه متاذيه.. اااخ ايدي ايدي احتركت

باوعلي بنظره غريبه وعبالك اكتشف كذبي كمل تمثيليتي وهو يلزمني من خصري ويمشيني على كيف كال .. اني كم مره كتلج ديري بالج ديري بالج انتي شبييج ليش ما تهتمين بروحج وكم مره كتلج لا تخلين اي شي على هاي العين اخاف عليج بس انتي تتعمدين تحركين گلبي

بلعت ريكي مصدومه شكد جذاب شوكت گلي هو اني اصلا شوكت طبخت بهذا البيت اشو ايدي جانت مكسوره وجنت فايخة ينگل عليه من المطعم واصلا هو يكيف ما اطبخ يخاف يتسمم لان ابتكر اكلات عالميه مموجوده بالعراق لذلك هو دائما يفضل اكل المطاعم

فتح بوري السنك وهو يغسل ايدي ويباوع عليه قلص عيونه وكآن يگولي .. ترا اعرفج جذابه ودتمثلين عليه واحتمال عرف جنت اتجسس عليه لان هاي شغلتي

كالت سالي وهي تدور بدروج الكاونتر وترفع بنفسها مع العلم هي طويله وجسمها عذاب بس تتعمد ترفع بروحها حتى يبين قوامها الجميل ورافع ايدها ليفوك وتدور كالت .. اي هذا معجون اسنان خلي منه حترتاحين

جاوبتها بانزعاج .. ترا ايدي احتركت مو اسناني

ردت بانزعاج .. اي هو يبرد الحرگ

باوعتلها بقرق .. شكرا خلي وصفاتج الج هسه زوجي هو يجيبلي علاج

باوعلي وهو رافع حاجب وعلى وجهه ابتسامة مستهزئة وكأن يكول علاج لمنو يا جذابه تعلميني بسوالفج ابتسمت بفشله بوجهه وشتت نظري

سحبني ويمشي بحذر ويدلعني كدام سالي كعدني على القنفه وهي وكفت وكتفت اديها وتباوعلي معاجبها الوضع

نزل ايدي واحتضن وجهي بثنين اديه وهو يكول .. حبيبي لحظه هسه اجي عندي عصاره مال حروق

هو راح وسالي الجالي تتبعه بنظراتها هو مو خارق الجمال واكو احلى منه بهواي بس عود ليش هو بالذات معقوله تريد تحرگ گلبي؟

كعدت بحماس ولأ كأني قبل شويه اون ون كلتلها بعصبيه .. شكد اني حيه وشكد عندي سوالف مال جلاب بس بحياتي ما ركضت وره واحد متزوج

ضحكت باستهزاء وهي تعوج حلكها كالت .. وشنو يعني ترا الشرع محلل اربعه

ضحكت على كلامها ... هههههه اي هاي انتي يطبقون الشرع عليج مو اني اما اني اعادل اربعتهن وماكو مجال للخامسه

اشرت الها بطرف اصبعي .. بس انتي دامج قابله بالتعدد ان شاء الله من تزوجين خلي يطبق براسج اني شدخلني

بعدها باوعتلها من فوك ليجوه ... ادري وبعدين شلابسه مقرره تسوين اغراءات لو شنو اجه الصيف كيفتي صرتي تلبسين ثوابة مال نوم وتطلعين استري روحج شويه

جاوبت ببرود .. لبسي عاجبني بس الضاهر. انتي كاتلتج الغيره مني لهذا السبب دتنتقدين ترا اني ملازمتج اذا حابه البسي مثلي

رديت باستهزاء .. ههه صدك لو كالو كل ما گصر الملبوس كثرت الفلوس

وبعدين هذا لبسج البسه بس الزوجي بغرفة نومنه ما افتر بيه كدام خلك الله

كالت ببرود قاتل ..كلامج مو مهم المهم اني مقتنعه وبعدين مو قبل شويه سويتي روحج تردين تموتين اشو هسه لسانج شطولة

جاوبتها بعدم اهتمام .. دروحي كلج خلك ضابط مفصول

هي فتحت عيونها مصدومة من كلامي وعبالك كفرت رغم صار ساعه ارزل بيها بس ما اثر بيها الكلام كد ما اثرت بيها الجملة الاخيره

دخل الاشتر وهو لازم عصاره هي باوعتله وتفح من عصبيتها وغضبها عبالك تريد تخنكة يمكن هو ما كايل الها ان اني اعرف ان هي ضابط مفصول

كعد يمي ببرود ولزم ايدي ومسح المرهم عليها و وزعها بهدوء ولطف

هي تقربت واخذت جنطتها كلتله بحدده ... اشتررر بعد ما تكمل عندي كلام وياك وياريت تجيني بسرررعه لان الضاهر اني سري مفضوح

جاوبها بهدوء .. تمام

خلت وطلعت بعد ما صفكت الباب بكل قوتها هو باوعلي بعتب وهو يكول .. ما شاء الله سرج بكهوووه ابد ما تطلعييي

شتت نظري وكلبي يدك سريع .. اييي ممجذبه هي ضابط مفصول واردت اتشمت ما لكيت غير ابين الها حقيقتها

باوعلي بطرررف عييينه وهو يعض شفته السفليه بقهررر تنهد و وكف خله وراح لغرفته وهو يكتم غضبه

ظليت كاعده بمكاني وشفته سد باب الغرفه حسيت ضجت او ما اعرف شنو الصار بيه حسيت ما رضا عن كلامي ولا حب تصرفاتي

خليت ورحت فتحت الباب شفته واكف وهو يباوع للملف ويظم بيه اوراق

تنهدت وفركت اديه بتوتر حجيت بصوت هامس .. اني اسفه لان نافقت

باوعلي ومحجه ورجع همل وجودي وهو يشتغل على الاوراق تقربت منه وحجيت مره ثانيه بفشلة وتلكئ .. يعني اني مو كولش منافقه والله بس يعني هي استفزتني هيج حيل مستفزه

رجع باوعلي وهو يكول .. اعرف كل هاي التمثيلية لان سالي تجرأت وحجت الي بداخلها وبعدين انتي على شنو تنفعلين وتتصرفين هيج تصرفات واني جاوبتها ورديتها بهدوء وادب بعد تصرفاتج شنو معناها

بلعت ريكي وافرك باديه بقلق وخوف .. شسمة هو ردت ابين الها ان انت تحبني واخليها تكطع الامل

شمر الملف على الجربايه واحتضن وجهي باديه كال .. وشنو اني ما احبج شنو هالكلام

مسحت خدي بتوتر .. بس هي حقييره كل تصرفاتها ضدي وتستاهل شنو اسوي وياها واصلا ياريتها تزعل منك وما ترضا حييل ما احب شغلك وياها ترا مصايره هاي لازكة بيك وتتدلع وانوب تعرف والله شنو بحجة ان شغل وياها انعل ابوو هيج شغل تريد شغل عالم غيرها مو اله هييي جنها أبو بريص شارب نفط

ضحك وهو يرد عليه .. بطلت احجيلج بعد

تعصبت .. لا تحجي اصلا هو انت شحاجي وبعدين اني ردت ابين الها ان انت زوجي وما تظم عني شي واعرف هي ضابط مقصول

جاوبني بنفاذ صبر .. ولج ما مفصوله ما فصوله شلطشتي ابتليت تمازحت وياج شويه

فتحت حلكي بدهشه .. يااااا تجذب عليه انوب طلعت جذاب لعد دامك هيج جذاب هم تعرف خالي والموضوع انت نكرته و وراك لغز

ضحك .. هههههه لا حلفت بابوي واني ما اجذب بس على سالي ما حلفت مو صح

باوعتله بشك وتنهدت .. تمام هسه اني مغلطانه هي غلطت

باسني بخدي .. اي صح هي غلطانه تروحلج فدوه لا تشغلين بالج بيها

ابتسمت بسرعه وخليت وطلعت خليته الوحده ياخذ راحته بشغله واني مستغربه من حبه اليه واحترامة الزايد عكس بالبدايه جانت بينه حروب طاحنه والله فعلا حياتي صارت غريبه

...............

افيان

بعد ما طلعت الايو هي من شافتني انصدمت وارتبكت حتى وكع الموبايل من ايدها وكوه تمسكت بيه قفلته بسرعه وهي تضحك بارتباك

باوعتلها من فوك ليجوه وبنظره حقيره سألتها.. ويه منو جنتي تحجين وليش خايفه يوصل الموضوع الزوجج وعيال شنو الناويه تدخلينه علينه مدام

جاوبت بعصبيه كالت.. انتي شدتحجيين شبيج تخبلتي وخري مني لا اعرف شلون اربيج تافهه

ضحكت عليها ببرود .. تمام گلبي براحتج وبعدين اني شدخلني بيج عسا ما تدخليلج زلمة شنو قابل مرتي انتي شدخلني اوووي اني ما احب انافق

ظلت تفح بعصبيه وتنفخ حست روحها بخطر ما اشوف الها وكعت من طولها صرخت بصوت عالي واني احاول اشيلها صحت بصوت عالي ... عمووو عمووو تعال ايو تخربطت

خليت ودخلت جوه اركض شفت البنات كاعدات وهو جان مموجود برا جان يسوي ببيته الجديد

صحت عليهن وهن اجن يركضن ويحاولن يصحنها ماكو

ركضت بيبي راحت على بيت كريم وصاحته وهو اجه يركض شافها واكعه شالها ودخلها جوه صاح على عمته وهو يكولها .. عمه مييي جيبي مي بسرعه

ركضت جابت مي بسرعه وهو شمره عليها شنكت بسرعه وكمزت مثل واحد مصدوم يمكن مجانت تعرف ان هي راح المي ينشمر عليها بهالطريقة الهمجيه

حضنته وهي ترجف وتبجي وتلبد بحضنه خطيه فشل وانوب ثوبها مرفوع طالعه رجلها كلها جرت ثوبها ام حسن وهي تغطيها

كالت وهي تنوح وتبجي وحاضنته عبالك دينهزم .. راسي راسي حموت اووويلي ما اعرف شبيه يمكن حاااامل

تنهد وهو يباوع للمكان ونفخ بضجر وكفها وكعدها عدل وهو يحجي وياها .. اخذج للمستشفى

سحبته ومن ايده وتتمسح بيه كلتله بدلع ... لاااا ما اريد بس خليك يمي ما اريد شي بس تكون يمي

جاوبتها ام حسن بضحكة .. هههه يمه جااا هو وين رايح مو هذا يمج

ردت وصوتها مال وحده منعسه جنها صوت مصطفى من يسكر كالت .. ارييييده لا يرووح

هو وكف وسحبها كلها .. امشي اخذج لاهلج ارتاحي عندهم وان شاء الله كم يوم واجي اخذج

وكفت ولزكت روحها بيه سوت روحها دتوكع وهو ما لزمها وكعت

صرخت ام حسن وهو دنك عليها سحبها وكفها وام حسن تمسح على وجهها وهي خايفه .. يمه خاف بيها شي اخذها للمستشفى فدوه لا يصير بيها شي انوب امها تتخبل

جاوبها بتنهيده ... لا ما بيها شي هسه تاكل وتصير زينه

مددها على القنفه ورفع رجليها وطلب من كوثر تسويلها شي تاكله وخله وراح

اني ما عرف افسر تصرفاتها هاي شبيها اشو بس سمعت بيه عرفت بمشكلتها تخربطت وانهارت وبعدها تصرفاتها مو منطقيه ويه كريم تلزك بيه هو صح زوجها ومن حقها بس مو هيج مو كدامنه شابكته وشايفها بركبته والله واحنه طاكنه الجفاف وهالمشهد صعد الجفاف اكثر غير كون شويه تحترمنه تحترم رجلها وانوب كل شويه وتسوي شغلات سخيفه تشتم بيه وتريد تبوسه وتتلزك بيه لعد هي غير مريضه وينج وين هالسوالف

من شفت عمو كريم طلع ردت احاجي بس اجلتها لباجر حتى ايـــــــــو العربيده ما تحس على شي والعبها صح  خلي يراقبها وضعها ما يطمن

عفتها ورحت كعدت يم حنان وحنان تشيل روحها وتركعها بالكاع تكول عياره وجذابه ما بيها شي بس شنو عود تريد العالم تهتم بيها انوب شفتي تصرفاتها تكول عبالك كريم يريد يشرد لج استحيت من يمي

صفنت واني افكر بحالتها يعني هاي البنيه مو طبيعيه انوب شوكت ما تجي لابسه عدسات اريد فد يوم نازعتهن ماكو تريد تبين حلوه بكل الاوقات وتتعمد تثير الجدل حتى بلبسها واناقتها ومشيتها كلامها غريبه هاي لبنيه شعجب عمو كريم ما انتبه عليها معقوله كاشفها وضايج منها لان بصراحه هو مجان طايق تصرفاتها

ومن جانت بيبي تغطيها هي جانت تتعمد ترفع رجليها وتحركهن حتى يصعد ثوبها اكثر ويطلع جسمها يعني شنو تسويله اغراء كدامنه لعد بالغرفه شنو شغلها ؟ خاب دولي ايييع

رجعت دخلت لكيتها بس هي كاعده وتخابر بامها دكولها .. ميهتم بيه والله والله اذا ما سويته محبس بيدي بس خلي اطلع من هذا البيت واخلص من اهله العكارب فلا اطلع ايو

دخلت هي ظلت تخابر بامها والامور طبيعيه

رجع جدي كهلان وجاسم عساس الجمعه التجي الخطوبه واتفقوا شكد فرحت ولا تصورت رنا توافق على جاسم بهالسرعه بس والله لايكتله وهو حيل حلو وحباب بس هي مطيه همزين صحت على روحها وحصلت الها رجل

فات يوم كامل وطلعت جاي اروح لبيتنا واشوف عمو كريم ديشتغل بالبيت وهو يدخن يعني يشرف على العمال الموجودين بالبيت هو ديرمم بيه يعني بس الواجهيه لان هم نقلوا اغراضهم

كتله .. عمو ممكن توصلني لبيتنا عندي شغل هناك

جاوبني .. تمام صعدي بالسيارة هسه اجيج

رحت بعد ما فتح السياره اليه صعدت وهو كذلك ظليت اسولف وياه وبعدها حجيت .. عمو تعرف اني اريد اسولفلك سالفه بس فدوه لا تعتبرني منافقه اني ابد ما احب انافق

باوعلي مستغرب وهو ينفث الدخان من بين شفايفه كال ... اي شنو احجي بالعكس اذا موضوع يفيدني ما يعتبر نفاق

رديت عليه .. هااا هو البارحة ايو من تخربطت اني شفتها تخابر بس ما اعتقد صاحبها لا جانت تكول ما اكدر اخذه مو هسه مدري شجابت بس جانت كولش خايفه ومتوتره ومرعوبه

باوعلي مصدوم متفاجئ كال .. صدك شلووون غير تفتهمين اكثر ليش ما سجلتيها

جاوبته .. ما لحكت لان هي تخربطت مدري شبيها وخبلتني بس اني اكلك خليك حذر ودير بالك اخاف تريد تسوي شي

جاوبتي بهدوء ... اعرف اني هم شاك بيها ومنطيها الامان بس ان شاء الله ما ظل شي وتنكشف على حقيقتها

رديت عليه.. اني عندي فضول اريد اعرف شبيها

بلل شفايفه وتنهد ورد عليه .. الله كريم نشوف

وصلني للبيت وخله وراح وحسيت بيه يعرف عنه هوايه اشياء بس هو ساكت عنها بمزاجة وعنده غايه تجاهها

...........................

صفاء

جنت كاعد بالبيت القديم الي تكول عليه سولين مسكون وبيه جني بصراحة اني مشفت بيه شي وجنت كاعد كل هالمده وما بيه اي شي بس هي يراودها هيج شي

اندك الباب رحت فتحته جان حجي اديب والاشتر سلمت عليهم وكعدوا سويت الهم جاي ظلوا يسولفون

حجي اديب حجة بزعل .. لا هالمره ما رضيت عليك ابد شلون تخلي لبنيه تشك بروحها انوب هسه عبالها مريضه هيج راح تخبلها بالزايد

جاوبه بتنهيده .. والله ما اعرف شحجي بصراحة ما عرفت شلون ادبرها لذلك نكرت الموضوع كله

حجي اديب .. بس هذا الشي غلط والبنيه مريضه راح تمرضها بالزايد لا تستغل ضعفها اني مو هيج ربيتك ما ارضا عليك هيج

عض شفته وهو يصبر نفسه جاوبه .. والله يا حجي انحصرت بزاوية ما ردت ينكشف الموضوع والموضوع خالها ما يريد اي شخص يعرف بيه يريده سري واني اصلا جاي اشتغل عليه

وهي من النوع الي ما تعرف تضم سالفه وتحجي بسرعه تحجي كل شي ما تظم ابد وتجفص واني اخاف منها ما عندها سرية ابد

حجي اديب... ان شاء الله خير وان شاء الله تفهم ان انت كل شي سويته المصلحتها وانت تحبها وتحترمها وانت انسان محترم مو مثل ما هي متصوره

جاوب بضحكة.. لا هسه هي عرفت بيه محترم وصايره ادميه مو مثل قبل عصبيه وتهجم وتستفز حتى ممعاقبها واني شكد احب اعاقبها

وكف حجي اديب بعصبيه... لا ما رضا عليك ليش تعاقبها مو من حقك بنيه ضعيفه هاي لا تسويلها شي خطيه

ضحك ... ههههههه والله ممعاقبها ولا حاجي وياها اي شي ابد

شويه واندك الباب خليت ورحت فتحته دخل عايد سلم علينه وهو يحجي بسرعه مستعجل كال .. هذا السيدي صورته كامل هذا من رحنه للقبر مال سوادي شوفه وانطيتي رايك واني مستعجل لان عندي بضاعه لازم استلمها

اخذها من ايده ورد عليه .. عاشت ايدك اهم شي وثقت كل الاحداث

جاوبه .. كل شي وثقت راح تشوف العجايب

ابتسم وهو يلزمة بانتصار وباوعلها بعدها رجعه بمكانه واخذه وطلعوا سوه كلهم وعبالك لزم شي ثمين

....................

افيان

من بعد ما رحت للبيت شفت ابوي بعده يلطم ويشتغل ويدك بالطابوك العايك ما يقبل يشمره يريد يرجع يبنيه من جديد

خابرني مصطفى بالطريق كال .. شلونج اريد خلطات

رديت عليه .. ممسويه ان شاء الله من اسوي اجيبلك تدلل

جاوبني .. ما يدلل عليج ظالم بس ليش كلبج يدك سريع شبييج

رديت بضحكة.. هههه اصلا لا تجذب كلبي عطلان ما يشتغل شوكت حسيته يدك سريع عطلان ومشمور بنص اعضائي محد بحاله

جاوبني بخدر .. اني بحاله ومستعد اصلحة واشغله من جديد

رفعت حاجب بسخريه .. دصلح نفسك بالاول انوب تصلح كلبي بيك خير مو ذاك اليوم خابرتك سكران

ضحك ... ههههههه شكو تخابرين الخميس اني الخميس طافي من بيجي ودوم صاعد الراسي

هزيت ايدي.. ههه الناس تصلي تعبد الخميس وانت تسكر شنو من مله انت امك وينها عنك

رد عليه .. تدورلي على بنيه تخليني اتوب

ضحكت ... هههههههه هو انت لأجل رب العالمين ما تبت تتوب لخاطر بنيه هاي شلك بيها وين اكو بطه تلعب شناوي

جاوبني .. ههههه شكو بيها اذا بنيه بنت اوادم تصلح شكو واحد طالع من الطريق

سالته.. تحب امك

جاوبني بسرعه ... لا ما احبها

انصدمت ... يااا عزا ليش بس صدك انت اخو نسيبي من امة وابو لو بس من ابو

رد .. لا من امه وابو بس ليش هالسؤال

جاوبته ... وين انت و وين نسيبي انت مو راحة ونسيبي الشرف كله ماكو مثله

ضحك .. اختلاف تربيه لا اكثر ولا اقل بس ترا اني هم مودب بس شويه اشرب وادخل ملاهي بس اخلاقي لا والله يحلفون بيها والجيران كلها تحمد بيه بالقران

هزيت راسي بقبول .. صدكت صدكت لا تحلف مبين اخلاقك تركض وراك على العموم اذا تريد خلطات اتصل بيه غير وقت هسه مشغوله ويمكن ادزلك بيد المندوب مالتي

رد عليه .. شنو متطوره حيل صاير عندج مندوب ليش ما تشغليني مكانه شنو رايج

جاوبته .. لا ما عندي ثقه بيك اخاف تسرق مشروعي لو تنطي الوصفه لغير شخص يستفاد من سر الخلطه

انكطع الخط همزين خلصت منه خليت ورحت انتظرت نسيبي يجي كال اليوم اجيج اشوفج بس ما اجة شبي نسيبي صاير يزغلط اتصلت بيه مفتح خط

ضجت حييل وما اشوف اله سيارته اجت ابتسمت من شفته من بعيد ضحكت وهو فتح الجام وصاح عليه اصعد ركضت بسرعه وصعدت وياه سلمت عليه وهو ضحك كال .. راح اخذج وياي لسولين شوفيها واكعدي وياها خطيه مشتاقتلجن

خليت ورحت وياه واني فرحانه حجيت اله عن مكالمتي ويه مصطفى وهو هواااااي حذرني منه وحتى كال كنسلي الموضوع وحظري

بس اني ما اخذت الكلام و ما حضرت مصطفى

......................

سوليين

جنت كاعده بالمطبخ اقطع فاكهه فاكهه تقطع فاكهه ماكو هيج ثقه ههههه

حسيت بادين تسللت على جسمي وحضني درت وجهي عليه بخوف شفته الاشتر

حجيت بخوف .. يعني مو وكت رومانسيتك بصراحة تدري اجيت انهبط وحتى خلفه بعد ما تصير عندي

جاوب بضحكة ... لا عاد كل شي ولا الخلفه اني احب الزعاطيط كون هيج يترسون البيت لذلك ما حاب تنكطع عندج الخلفه

رفعت حاجب... يعني عندي تنكطع مو عندك انت تكدر تتزوج وتخلف

هز راسه بنفي وهو يكول... لا لا ما اريد من غيرج اريد منج مالهم طعم من غيرج

ضحكت وابعدت اديه مني .. تمام من نتزوج افكر اخلفلك

سحب ايدي وهو يكول .. تعالي شوفي المفاجئة

هي دخلت علينه من دون خجل وعود مسويه مفاجئة ... بخخخخخ هههههه هلاو سويلينة الحيه شلونج

ضحكت و ركضت عليها حضنتها وبستها وهي كذلك سألتها عن اموني وعن جيهان وكالت بخيير كعدت تسولف الي عن كل شي وعن البيت شلون بنو واني متت ضحك عليها صدك هي ونسيبها ولا يكعدون راحة الا يجلطون ابوي يله يرتاحون

بعدها حجت وهي تباوع للاشتر كالت .. عندي سؤال اريد احجيلك بس متررده لان هاي خصوصيه بس معرف حبيت اخذ رأيكم واشوف كلامي بي غلط لو لا وتصرفي غلط لو لا

عقدت حواجبي وإني اسألها... اي شنوو هو احجي

ظلت تسولف عن تصرفات مرة كريم وعن شلون تريد تثير الجدل وشلون تخربطت وعن اتصالاتها وهماتين سولفت عن لبسها وعدساتها ومكياجها سولفت عن كل شي

واني مجنت راضيه عنها اعض الها الشفه اكرص بيها بس هي ابد ما تسكت بالعه مسجل ولا تستحي شلوت بيها هاي عود مثل جيهان بحياتها ما فتحت حلكها وحجت كلمة وحده وهاي ترطن

كالت اني من سمعتها حجيت العمو كريم عن موقفها وعن اتصالها وهو جنه يعرف بيها وراح يكثف مراقبه هسه شنو اني غلطانه لو صح

رد عليها الاشتر بهدوء وهو يكول .. هاي مريضه مو صاحيه اعتقد عندها اضطراب الشخصية الهستيرية لان هاي أعراضها

عقدت حواجبي وسألته.. شنو هذا انوب

رد ببرود وثقه وهو يكول .. يعني تحب تتميز اكثر من غيرها تسوي اشياء تلفت الانتباه بيها وتبالغ بتصرفاتها وتحب تثير عاطفة المقابل حتى تحصل على اهتمام حتى يكون سلوكها ممستقر وتحب تتلاعب بالناس واله اسم ثاني يكون اضطراب الشخصية التمثيلي يعني تحب تمثل

جاوبته افيان بسرعه .. اي بالقران تحب تمثل هم ذاك اليوم هي وامها سولهن تمثيليه تكون عبالك هنود شلون عندهن قابليه بالقران تنصدم انوب متحسها تنكشف لا مستمره تمثل وتبجي ومنهاره دموع دموع

رد الاشتر ..اي تقريبا عندها هيج مرض والعايش وياها ومعاشرها راح يعرف عنها اشياء اكثر من خلال سلوكها ولبسها وتصرفاتها

اني صفنت وسألته.. اكلك انت منين تعرف بهاي الأمراض النفسيه انت شنو شو كل شي تعرف

ضحك وهو يكول ..مو اني احب قسم الادلة الجنائية وحيل متعمق بيه واطور من نفسي واخوض وأبحر بابحاره لذلك من ظمن قسم الادلة هو علم النفس مو كتلج يتضمن هوايه اقسام

باوعتله بنظره غموض والله العظيم احلف عليه دارس ادلة جنائية لان ما شاء الله كل شي يعرف وهذا القسم حلو هوايه تتفرع منه فروع و هواية بيه اسرار وخبايا هذا القسم بحررر ما ينفذ ولا تخلص معلوماته فعلا ما بي ملل وكله تطور

رجعت باوعتله واني اريد اكتشف عنه اكثر زين سؤال ليش من واحد ينزعج يكوله ابجي شنو فائدة البكاء بهيج حاله

جاوبني بثقه .. اولا يخفف من التوتر لان يخفض هرمون التوتر الي هو هرمون الكورتيزول الي هو هرمون التوتر

وهماتين البجي يحسن المزاج
لان هورمون الاوكسيتوسين والاندروفين  يخفف يحسنن المزاج ومن واحد يبجي يحس ان راضي عن نفسه وهماتين نفس ذن الهرمونين يخففن الالم الجسدي وكذلك البجي يحلي الجسم يسترخي وخاصه الجهاز العصبي وابجي يخلص العيون من كل بكتيريا موجوده بيها

فانصحجن ابجن وارجعن ليوره راح توكنن بقمة السعاده بس مو تملخن شعرجن وتلطمن لا ابجن بهدوء وحسنن المزاج هه

ظلينه نضحك واني احس اكتشفت شنو شغله هو دارس أدله جنائية بس بشنو متخصص هذا الي مدا اكتشفه

اخذنه اختي اني وياه وصلناها لبيت جدو وكالت رنا حتنخطب الجاسم واني حييل فرحت احبهم سوه اريد اشوف عرسهم وافرح واروح بالخطوبه اكييد

..........................

جيهان

جنت كاعده وفافي نايمة وكريم شال بغير بيت بس مو بعيد بصفهم اندك الباب وراحت حنان فتحته دخلن ثنين نسوان سلمن وظيفناهن ظلن يسولفن ويه ام حسن ويباوعن عليه ويرجعن يحجن بيهن اني ضحت من الوضع فخليت وطلعت

بعدها بيبي صاحتلي دخلت يمهن هن ظلن يباوعلي كالن لام حسن .. احنه اجينه على هاي لبنيه نشوفها تدخل عليكم ومن سالنه كالو من كرايبكم سالنه عليها وراقبنها خوش بنيه عدنه ولد هو ابن اختي يصير بيتهم بالكوت ويريد مره فگلنه نجي نشوف اذا تنطوها او لا

ضحكت ام حسن فرحانه وهي تكول .. اهلا وسهلا بيكم والله اكيد نتشرف بس الشور العمامها وابوها وجدها ان شاء الله انطيهم خبر واردلكم جواب

ردت المره وهي تباوعلي بأعجاب كالت .. والله ندللها دلال واختي ماعندها هم صدك بالعرب بس يدللون المره دلال يباوعون الحلكها وهو كاتل روحة يريدله حلوه واني لكيتله الحلوه

ضحكت ام حسن بتوتر وهي تكول .. كومي يمه كومي جهونه روحي بدلي هذا المي احتر جيبي بارد

وكفت بس ضااايجة حيل وهي تكلهن شوفن كومتها الجن شوفن طولها شلون حلو جنها نبع ريحان

وهن يضحكن ويردن عليها .. لا ما شاء الله حليوه خوش بنيه

من طلعت واسمع ام حسن تكولهن بصوت خافت .. بس الحجي بينه مو تحولن غشتنا لو جذبت علينه ترا لبنيه شويه من جسمها محترك

فتحت عيوني مصدومة ومقهوره من كلامها حسيت بغصه وحده منهن ردت عليها كالت .. ياااا صدك ومبين يعني حرك واضح

ام حسن .. والله يا خيه ليش اجذب عليج ما شايفتها بس من هي صغيره احتركت بس والله تاخذوها تكسبون بيها اجر وثواب يتيمة ومحد الها وفقيره وام بيت تحف وتميش والله يعيش براسها معدله كل شي تعرف تسوي هي بس عيبها محروكة

حطيت ايدي مصدومة واني اكتم دموعي من كلامها حييل انقهرت كل ما انسى حقيقتي يرجعن يذكرني بماساتي

رحت جددت المي وجبته انطيته الهن وشفت نظرة الاستعطاف بعيونهن خليت وطلعت سمعت وحده منهن دكلها .. بعد اذا محتركة احنه ما نكدر نتدخل نلقي الحجه عليهم رضوا رضوا ما رضوا بعد ما نكدر نجبرهم وهسه هي الشباب تريدها كامله والكمال لله

ام حسن .. اي والله حقكم بس والله مل تخسرون خوش بنيه ومعدله ام بيت وفقييره بس ياخذها ياخذ اجر بيها والله

بجيت بصمت ما انقهرت من كلامهن انقهرت من كلام ام حسن حييل قاسي ويوجع شلون هيج تحجي وعبالك بايعتني اني لو بنتها تسوي بيه هيج بس لان يتيمة ومحد الي ترخص بيه وتتمنى تزوجني لإي شخص بس كون ما اظل علة على كلبها

بجيت بصمت مطبق واني اناجي ربي وبحاجة امي كلبي يوجعني والله يوجعني شلون هيج تحجي والله كلامها قاسي

........................

جاسم

من بعد ما رنا اعلنت موافقتها واني الدنيا ما ساعيتني رادت تاجر مني بس ما قبلت قررت اول ما تجي البضاعه من تركيا اختار الها احلى فستان تلبسها احبها مو بيدي رغم متستاهل بس ميخالف المهم احبها

شفت كريم اجه من الركن ورحت عليه واني احجي وياه ... هلا هلا باخو العريس

صفك ايدي بيده وهو يكول ... هلاااا بييك ونعم من العريس

ظلينه واكفين وهو ما قبل يروح من مكانه استغربت منه ليش هيج ما اعرف شويه واشوفه باوع من بعييد واني باوعت من مكان ما يباوع شفتها اجت تمشي وهي تتلفت من مكان لمكان

هو قلص عيونة ويباوعلها مشه سريع باتجاها وهي من شافته رجعت بسرعه وهي تركض

راح بتجاها وهو سريييع بمشيته وهي انهزمت دخلت للبيت وهو دخل وراها واني وراهم لزمته كتله .. على كيفك كريم شكو شبييك

دفعني بغضب ودخل وهو متعصب لزمها بقوووه وجرها كلها .. وييين طالعه ولج من دون علمي

ردت عليه بخوف وهي تبجي .. اختنكت طلعت ادور عليك انت مخليني الوحدي بالبيت وانت ما تجي

راد يضربها وهو متعصب وشاد على شفايفه واني مخليته صاح بيها بغضب .. بسيييطة كعدتج ببيت وبعدج ما تكعدين راحة شسويلج بعدد وكولي شسوووووي

اتصل موبايلها اثناء ما يحجي هو سحبها منها بقوه وهي ظلت تصرخ وتلطم ... جيييب الموبايل والله انتحر والله احرررك روحي جيب موبايلي اريد الموبايل جييبه

ظلت تلطم وتدك وهو ما اهتم الها اخذ الموبايل اتصل مرتين وهو فتح حط رد عليه الشخص المتصل وهو يكول .. اختي وصل طلبج هسه اني بالمكان الي كلتي عليه

جاوبه هو بهدوء .. السلام عليكم اني ابوها مكدرت تطلع انت تعرف هي عند عيالها فراح اجي اني مكانها

جاوبه ..تمام اني على الشارع سيارتي النترا

حجيت وياه بغضب بعد ما قفل الموبايل ...صدك جذب  هسه هجمت على البنيه وهي كله جايبه طلبيه ترا ما تسوه تتعصب على هيج شي

باوعلي بغضب وهو يكول .. توخررر مني لا اجيبك ببوكس ادمر وجهك طلبيه خلي نشوف الطلبيه شنو

انصدمت من ردة فعله وهو حيل يحترمني وميتجاوز خلينه ورحنه شفنه الولد هو استغرب من شافنه كله .. انطيني الطلبيه

كله .. الشغل صار ب ٥٠٠ الف ويه التوصيل

رد عليه بعصبيه .. انطيني الطلب خلي اشوفه

انطاه الطلب وفتحه جان عباره عن لعابه قطنية جنها فزاعة  مجكجكة بابر بكلبها وبكل انحاء المفاصل وبراسها مكتوب عليها .. هاي تدفنيها بقبر بعده ما مبني يعني ما طالع الاربعين

وقميص كريم مقفل متروس قفاله مكتوب عليه هذا يندفن وره السده او تشمري بنهر جاري

وشي مثل التربه مكتوب عليه هذا تخلين نصه بتانكي الشرب والباقي تخلينه ويه طرشي المهم ويه طرشي لان بيه خل راح يتفاعل

وكانبه بالورقه اي شي تحتاجين اني موجوده راسليني على البيج واني ارسلج واهلا وسهلا بيج

هو تخبل انجن من شاف اني هم انصدمت لا آله الا الله يعني معقوله انوووب السحوره صارت خدمة توصيل انوب اون لاين دهر فرجن يالنسوان دهيره تدهوجن معقولة سحورة خدمة توصيل سامع بكل شي خدمة توصيل بس سحر خدمة توصيل لا والله هاي اول مره

هو تخبل لزم الولد سحله من سيارته وطاحله وبوكسيات ودفرات وهو يغلط عليه .. ولكم حقراء. كلاااب تضحكون على النسوان انوب سحر خدمة توصيل والله اليوم اله اعفنك بالسجن واخليك تعترف منو مشغلك عنده مندوب يا عار يا ابن العار انوب بنص مليون حتى العقل والمنطق ما يقبلها

العالم التمت وصارت تفارغهم وهو خابر على الدوريه وسوه القاء القبض عليه وذاك يبجي المندوب ابو السحوره ويكول والله اني ما الي شغل هي ام بنين هي تشتغل وشغلتني عندها

ضربه الشرطي جلاق وهو يكوله .. عود هناك اعترف على ام بنين هسه امشي كدامي

هو هجم على بيته واني اركض وراه دفر هو قفل الباب عليها فتحه ودفره دخل لكاها جامعه ملابسها كلها وذهبها وهي تبجي

سحلها من شعرها وهو يصرخ عليها .. ولج كلبها حيوانه مسويتلي سحررر هلي تاليها ولج احترمتج قدرتج اتحملت سوالفج التافهه تاليها هيج تسووين

ظلت تصررخ .. عووررفني ياااا عار يا كلب روح روح ربي اختك الساقطه ام الولد الكليه شبعت بيها

هو ضربها راشدي  واني افرغ بيهم ابتعد عنها وهو يفح من غضبه وعصبيه حسيته راح ينجلط كد ما منهار ومتعصب كلها ... هااا اني اختي ساقطه ولج ادبسز مو هاي صديقتج التدافعلج ومستقتله لخاطرج

هي شكت ثوبها وتصرررررررخ وتلطم  وطلعت ملابسها الداخليه درت وجهي خجلااااان وهو لفها بسرعه وغطاها

عاط بيها بغضب وكلها .... بنت الكلبيبببببببب  انتي طاااااااااااالق

نهاية البارت ... يتبع

كونوا انتم كونوا بخير ... احبكم 💔

لا تصوتن حتى ما انشر بارت 🤣🤣💔