رواية #وكر الأشتر الفصل السادس وثلاثون 36 - بقلم الكاتبه سمو العراق

بارت الثالث والثلاثين
رواية .. وكر الاشتر
بقلمي .. نور سمو العراق

💔💔💔💔💔💔💔💔💔💔💔💔💔💔

- كيف يحتمل بعض #الاشخاص فكرة وضع الحزن والألم في صدر احدهم ليرافقه #طوال حياته ويمضي دون ان يكترث لشيء كيف يعيش وهو يعلم بأنه غير شخصاً ما للأبد #بطريقة تجعله يُعاني في رحلة حياته كلها.
•  موجوع قلبي | ⌯

غلسوا على السحك بارت من دون مراجعة 🥺💔

..........................

افيان

شفت ابويه من بعيد واني بلعت العافيه فسفوري يجيب التايهه من الوانه البراقه احمر وبرتقالي  ظليت واكفه بمكاني انتظر موتي

شنوو انتظر موتي ؟ شهالكلمات البيئة على شنو خايفه منه فوك ما هو خريج سجون انوب بايك فلوس امي وكاتلها وظالم انوب اخاف منه

لفيت العلاكة مال الفلوس بسرعة وحطيتها تحت باطي ونزلت الشال على صدري وجتفي بحيث ما يشوف

كلت خلي استقبله استقبال حار واني اتذكر اخر كتله كتلني ياها وبعدها نسجن بالقران فد عندي حوبه واشور بس يحاجيني لو ينسجن لو ينكتل لو ينسحل الحمدلله يارب محاوطني برحمتك فقيره وما عندي لسان ولا دغش

باوعلي وهو متعصب واني تشجعت ومشيت بتجاها سحبني وهو يكفخني على راسي كال .. بت الجلب الدايحة وين جنتي تطرگين بيا بيت دايحة

ابتعدت عنه واني اعدل بحجابي بعد ما خربطة جاوبته .. وين جنت يعني مره بتها تريد تعرس ورحت هلستها وحفيتها وصبغت شعرها

مد ايده اليه بطمع .. انطيني الفلوس

حطيت ايد على ايد واني اتنهد .. منين يحسره كالت بالدين عود من اجيبهن باجر انطيهن الك اي شلونك ما لونك شعجب شو طلعت بسرعه

رجع دمغني حييل على راسي مرتين كال .. شكد كح هاي واني ابوج عزوتج ورفعة راسج بدل ما تكولين الحمدلله على سلامتك تكولين طلعت بسرعه عاااار على امج شتطلعين قديسه قابل

جاوبته بعدم اهتمام .. عادي كلامك ما يأثر شنو بشر رحت للبيت

رد عليه .. بعدني هسه اروح للمهجوم وهجمة على راسجن

ضحكت ... هههههههه هو انهجم

باوعلي بنظرة شك وبعدها كال .. اختج المشوهه هم دايحة مثلج لو راكده جانت فقيره فرعنتها انتي وذيج مرة ذاك المجرم

جاوبته واني امشي وياه .. احجي عليه واحجي على خواتي بس نسيبي الكفو لا تحجي عليه بالقران يعادل عشر زلم وعشرة مثل مصطفى

باوعلي بعصبية.. ولج هذا منو مصطفى انوب

رديت عليه بسرعه .. هذا الفشخته بطابوكة السولفلك عليه ذول ساهر وتحسين هو كرايبهم

هو جاي يرد عليه وشاف البيت من بعيد وهو شويه ويتخربط وكعت الجنطه ام الوسخ من ايده وحط ادية ثنينهن على راسه كال ... شنيييي هاااااي ليييييش هيييج البيت منو هاجمة

بعدني ممجاوبته وهو ركض ويلطم على صدره ويدك حييل عبالك ميت ابويه عبالك تجاوز وكاربته الحكومة دك ولطم على صدره ويضغب

طلعت الناس عليه وطلعوا العمال وحلوم يشد بالقالب الخشب ورد عليه .. هااا ابو آمين الحمدلله على سلامتك طلعت من السجن

هو دك على راسه ويصررخ ... يااااااا سلامة لو ظال بالسجن ولا هالمصيييبه هااااي هذا ياهو فلش بيتي منو كارب بيتي

ظليت اضرب على خدي على كيف .. يبووو عزا راح اندفن

نزل حلوم من السكلة وهو ينزع الجفوف رد عليه ببرود .. على كيفك ابو امين كول يا الله صدك جذب متشوف دنشد بالقالب راح اسويلك بيت يجنن

فتح عيونه ابوي بصدمة وشاك الفانيلة وحالته حاله كله ... ليش تبني لبيت شكو منو طلب منك شنووو راااح تبني ببلااااش ؟

رد عليه حلوم بضحكة ... هههههه شنو مفتح سبييل وابني ببلاش غير فلوسك عندي وبنيت بينهن

لطم ابوي على راسه حييييل وهو يصييح ... فلووووسي اريددد فلوسييي منو سمحلك تااخذ فلوووووسي وتبني بيهن والله اليووووم احرك الدنيا هسه اشتكي عليك واسجنك أني مامنك على فلوسي شلووون هيج تتصرف بيهن بيتي جديد مو بحاجة بناء منووو طلب منك

اني كلت خلي استغل الموقف لا حلوم يفضحنا جاوبته بتمسكن وعود مقهوره اريد ابجي ... كله من وره نسيبي الكفووو هو طلب من حلوم يبني البيت كناله توسلنه ابوي ما يقبل وهو اصر الا ينبني البيت

باوعلي حلوم مستغرب من جذبي عضيتله الشفه وغمزتله حسيته شويه فهم عليه بس ما حجه اي شي

ابوي باوعلي كلي ... الاشترررر هو السبب ؟

رديت بتمسكن وحزن .. اي هو توسلنه ردنه كناله ابوي ما يقبل طاح بينه وطردنه على ام حارث عمتي ومتنه من البجي وفلش البيت

ابوي كعد على التراب وهو يلطم وصدره يهتز شاك الفانيلة وكل شويه وكال ... ابتلييت ناسبته اذا ما يجلطنييي ما يرتاح راح شگة عمرك يعامر راحت فلوسك راح تعبك مال سنين محرمص على روحك كعكايه ما تاكل وتالي يجي هذا السكط يبني البيت بفلوسك

العالم التمت عليه يصبرون عليه ويشربون بيه مي وهو يضغب مثل واحد مفجوع بعزيز گلبة

مشيت بحذر بتجاه حلوم وشفته ملتهي ويه الوادم كلت هاي فرصتي همسهت بصوت ما يسمعه غيره كتله .. ابو ساره فدوه الكلبك اذا سالك كله الاشتر كلي ابني بيهن لان هذا ابوي يطكك بدعوه تروح اربعه ارهاب وياخذ الفلوس من عيونك ومحد يكدرله غير نسيبي الكفو فانت كمل بناء وطلعني من السالفه وذبها براس نسيبي وترا ها انت المستفاد

رد عليه بهمس .. خوش بس خلي يجي نسيبج يحاجي مو ابوج كل شويه هاد عليه وينعثل فوك راسي ترا مالي خلك

جاوبته .. لا مالك شغل كمل بناء

والعالم يكولون .. خطيه يكسر الخاطر ليش هيج يسوي بيه نسيبه ليش هيج كادر عليه

وناس تكول حل طبه مرض خطيه مكعد البنات بالمزبله وظالمهن عاد خلي يكعد ببيت بي خير بدل ما هن مكسور ظهرهن ويحفن وهو ياخذ فلوسهن على الحاظر

انوب هو راح يركض وهو ينگل بالطابووك ويصيح .. لا تطلع عمال اني عامل العامل ياخذ خمسه وعشرين الف عاد اني اخذهن واجمعهن

صاح عليه .. ولج بت النعال روحي جيبي امين خلي ينكل طابووك وهاي ضمنت خمسين الف

بعدها صاح عليه .. بنات الجلب هسه كونجن ولد جا احنه بنينه البيت بس وين انتن كل فايده ما بيجن تف عليجن وعلى الخلفجن

عفته ورحت واني امشي على السريع خرب لازم احصل رقم نسيبي حتى يروح لحلوم يتفق وياه لا يروح يجفص و وابوي يجفص بمصاريني انوب شكد جذبت لو يدري بيه نسيبي هيج احجي عليه حتى اختي يطلكها

.........................

سوليين

هاليام مسيطره عليه كأبه غريبه بحيث وصل بيه الحال اتخييل شغلات فضيعه حسيت تعبت نفسي بنفسي

يعني مشيت وراه شغلات حتى ارضي فضولي بس ما زادتني غير هم وغم وصراع نفسي

ولو هذا الييت اني كارهته حسيته ما اعرف مسكون بيه شي ما اعرف اني يتخيلي استغفر الله ياربي بس والله ذاك البيت ابو تيل احسن

وهاي الغرفه قلقتني ومن خله بيها صور سوادي زاد قلقي اكثر عبالك دفن بيها سوادي

والله لعبت نفسي والدمعه بعيني هسه حتى الانسان الطبيعي يحتاج انسان يفضفض اله يحجي ينصحة يدله على الطريق الصحيح هسه اني ويه منو احجي ويه الحياطين مو وصل بيه الحال احجي ويه عيون الطباخ

غمضت عيوني واني ابجي ما عندي سلاح غير الدموع احس نفسي غريبه عن نفسي مرتبكة و وحيده

يعني احنه فجأة فتحنه عيونه على اب قاسي ظالم ما يشبهه الاباء وبكل مره نسأل ليش هيج ابويه ليش ما يحبنه ليش يغلط علينه ليش يتهمنه باشياء مو حلوه ويفشر علينه وما نلكة جواب التساولاتنا

وزوجني للاشتر غريب عجيب ما اعرف عنه شي لا عنده اهل اسولف وياهم ولا  اعرف عنه شي غامض ومخليني بدوامة وداخل قوقعة ما اكدر اطلع منها

صرت احاول اكسبه احاول احجي وياه اغير من تصرفاتي ومن شخصيتي بس بعدها اكتشفت هو ما ينطيني سره

فكرت كلت يمكن هو دارس ادلة جنائية ودراسته محتمة عليه هذا الغموض بس اني ما عندي معرفه عن هذا القسم وافتهمت منه بس اشياء بسيطه ومن اساله ينكر اني راح انجن راح اتخبل

تحسين وساهر وعايد ولد تحسين وكل شخص يدخل يدخلني وياه بدوامة اريد اعرف عنه شي اريد يحرك كلبي ويحجيلي من اساله ما يحجي ما يكول مغربني عنه

والله محد تقبل تتزوجة وهو بهذا غموضه وابتعاده عن اهله هو لكاني فريسه سهلة واصطادني من اهلي وابوي كسر ظهري

اني هسه لازم ادرس افكر باجر شلبس افكر بامتحاني مو ظاله افكر بالمجرمين والقتله والتشريح وروح سوادي

مسحت وجهي من الدموع وخليت ورحت اغسل بالمواعين وكلبي يوجعني حسيت بسخص ورايه درت وجهي بسرعه وخوف شفت ماكو شي

طلعت من المطبخ بسرعه وكعدت يم الباب الرئيسي شنو هاي صارت تتخيلي اشياء تخوف احس اكو صوت غريب

اتعوذت بالله من الشيطان الرجيم مسحت دموعي بسرعه وانتفضت من مكاني اني بعد ما اريد اظل هنا ما اريد كرهت كل شي احس شي سيطر عليه كرهني بالدنيا كلها هذا البيت ما حبيته احسه شؤوم عليه

صرت حتى اخاف انام شلون بيه وين اروح تعبت نفسيتي تعبت هو ما يخلف عايش ويه الجثث ويه المجرمين ويه القتله بس اني روحي بريئة ما شايفه هيج شي شفت صورة سوادي مشرح عيني ما غمضتها

بس ليش هيج ليش ما يراعي شعوري ليش عباله اني مثل گلبه قاااسي ليش يقارن نفسه بيه ويحبسني بالبيت اخاف ترا والله اخااااف

رحت للاستقبال نمت على القنفه حسيت بيه دخل للبيت عدلت كعدتي وظليت تقريبا عشر دقايق ما طلعت

سمعت صفاء يكوله رايح للسطح ازفته اخاف يجي الشتا ونغرك

باوعتله من الشباك شفت صفاء صعد فوك وهو شفته كاعد على الدرج بطوله الفارع ولابس اسود ولازم جكارته يدخن بيه ومبين على وجهه الانزعاج رفع ايده وهو يباوع للاسم الي بيده وهو يحجي بصوت قريب للهمس .. مشتاقلج اعذريني هاي الفتره ما اجيتج وسولفتلج شسويت بس والله مشغول ان شاء الله ما ظل شي واخذ حقج

كمل كلامه تدرين شكتبت عنج كتبت ...ياترى شكد عانت من الخوف والعذاب والجوع والعطش حتى فاضت روحه وعند الله تجتمع الخصوم

عقدت حواجبي وروحي ترجف من كلامه وبالحظة شفت وحدة نزلت من الدرج جانت لابسه ثوووب طوويل ابيض وشال ابييض وعبالك حوريه من الجنه نزلت خطوات الدرج واني اباوعلها مصدومة ويابسه بمكاني

جانت صغيره بعمر مراهقه كعدت وراه واحتضنته من اكتافه وملامحها جامده ما تعبر عن اي شي

هو رفع ايده ولزم ايدها من شفتها هيج ارتعبت خفت كلبي احس صار بيه خفقان ظل يرجف من الخوف والقلق رجعت باوعت مره ثانيه ما لكيت شي وهو على كعدته والامور طبيعية

صرخت بصوت عالي وخوف ورعببب ... لااااا يممممه راح انخبل

ما حسيت بيه الا صار ويايه بالاستقبال من شفته انرعبت اكثر صرخت لاااا وخررر

لزم اديه بخووف وهو يهدي .. شبييج سوليين احجي شكو

رجفت واني ازحف على الارض .. لااا ماكو شي اني ما شفت شي والله ما شفت شي لا لا يتخيلي جذب ماكو

لزم اديه وهو يسالني بهدوء .. بس احجي ششفتي شكو شبيج لا تخبلينيييي

دخل صفاء يركض وهو ملهوف .. هااا شكوو شكوو

رد عليه .. والله ما اعرف ما ادري شبيها بسرعه ظلت تصرخ وتبجي

صفاء باوعلي بحنية .. خويه سولين احجي منو وياج منو ماذيج لا تخافين

بلعت ريكي بخوف واني ارد عليه .. شفت وحده نزلت من فوك لابسه ابيض وكعدت يم الاشتر وهو جان يحجي ويه الاسم الي بيده

هو باوع لصفاء بصدمة وصفاء باوعله بقلق ولهفه كال .. شكد يجي عمرها شلونها

هزيت راسي بنفي.. ما اعرف بس صغيره شابه مراهقه هيج شي وتشبهه

صفاء باوعله وهو يحجي وياه .. معقولة انزفع عنها الغطاء

هو مجاوبه واحتضني حييل وهو يسمي عليه ويقره ايات كال .. هاي بسبب فضولج كم مره كتلج لا تبحوشين باغراضي

جاوبته بعصبيه ودموعي تنزل .. واني شمدريني اغراضك مال موتى تطلكني ما اكدر اعيش وياك انت شبح ما ادري شنو

ضحك .. ههه ولج يا شبح هاي انوب صرتي تخافين مني بدل ما اني اخاف من تخيالاتج

جاوبته بنحيب .. بس اني شفتها ما تخيلت

رد عليه صفاء .. لا تخيلتي اني جنت فوك ماكو شي استعيذي بالله من الشيطان الرجيم وبطلي تجسس ترا الاشتر مو مثل ما انتي متخيله

رديت بغضب.. واني شمتخيله وهو منو ليش ما يحجيلي عن نفسه ليش مخليني مرافكة عقلي ويصورلي اشياء ما صارت خليك صريح وياي لان عقلي ما يفسر غير المشاكل

جاوبني بحب .. ولج والله ماكووو شي شبيج انتي ليش تتعبين نفسج وتعبيني

سالته ببكاء وترقب خفت يثور عليه .. رحيق منو ؟

بلل شفايفه بحيره وقهر رد عليه .. اختي

تنفست بضيق وسألته ودموعي شلال .. وينها ؟

شد على شفايفه وقبض على ايده رد عليه بحزن واضح على صوتها .. وافاها الاجل

شهكت بصدمة .. ميته !!!

هز راسه باي وصفاء دموعه غركت وجهه وكتم عبرته وطلع

والاشتر وكف بحيره مسح وجهه بتوتر وحط ايده على خصره وبعدها تنهد وطلع

ظليت كاعده بمكاني هاي شنووو خطيه طلعت اخته وميته الله يرحمة بس والله شفتها شفت شلون كعدت يمه تواسي تعرف محروك كلبه عليها بس شلون ماتت الله يرحمها ويحسن اليها

معقولة هيج تحبه بحيث روحها تحوم عليه يربي والله راح انجن راح اتخبل حتى لو يعترفولي يعترفون بشي بسيط وما يغوصون بالتفاصيل

..........................

جيهان

اجتني فافي تلطم عرفتها من وجهها مسويه مصيبه اول ما دخلت على بيت عمتي لزمتها بخوف ... هااا ولج شكو شصاير

ردت عليه وهي تخرط بخدودها .. لج ابوج اجه عزا طلع من السجن طلع مناخذ اعدام لج وهو شاف البيت مفلش من مات ابو ما سوه هيج ظل يدك ويلطم ويشك الفانيلة وبرغث روحة بالتراب ويصرخ  گهرني سودة بويهيي

ضربتها على كتفها حيل بعصبية .. دحجي عدل ولج وهسه شلون بس لا كتلج

ردت عليه .. لا ما كتلني ولج ربج ستر جنت ابيع خبطات ومحصلة لهده مال فلوس همزين ما خمطهن مني هسه احنه لازم نتحرك لازم احصل رقم نسيبي

عقدت حواجبي .. شسوين بيه ولج

ردت عليه .. جا غير جذبت على ابوي وكتله نسيبي هو الفلش البيت وهددنه

لطمت على. وجهي من كلامها .. عزا بعينج كون عزا العزاج على سوالفج المعفنه وهسه شلوون صخام الصخمني كون على هالدكة

جاوبتني بعدم اهتمام .. ثول حتى ثول تلطم مثل ابوها هاي بدل ما تدبرلي رقم النسيب كعدت تنوح شكد فكر

سحلتها من صايتها وجيس الفلوس لازمته كلتلها .. اليوم اذا ما ربيتج فلا اطلع جيجي

شو هاي ماتت من الضحك... ههههههههههه يمه متت من الضحك شنو ولج شو صايره بس انتي وبس وانتي اذا ادغدغج تبجين هاي من شوكت صرتي مجرمة وشجاعه وتهددين

تنهدت بقهر من كلامها .. من وراج غير تطلعين الواحد من طوره

ابتعدت عني وهي تدكدك بالموبايل كالت ... اوووف هذا رقم نسيبي ما يشتغل مدري شبيه لو ماخذه رقمه من مصطفى فشخة جان هسه مخابرته

رجعت تفكر وهي دكول .. منين اجيبه منين اييي انذكرت من عمو كريم  اووي فديت عقلي شكد احبني كله تفكير واكشن وخلطات وحماس

راحت خابرت كريم وانطاها رقمه الجديد وهي اتصلت عليه بسرعه  غيرت بنرة صوتها وقربتها للبكاء وهي دكول ... نسييبي ما عندي غيرك اشكيله همي ما عندي غيرك يسندني الحكلي ابوووي راح يذبحني وين انطي وجهي

هو حجه وياها وهي تباوعلي والضحكة شاكة حلكها وتحرك بحواجبها منتصره بعدها عبست ملامحها وكالت ...باك فلوس امي وبنينه بيهن وهو متحلف بينه واني من خوفي كتله انت البنيت البيت وفلشته وانت امرت حلوم فدوه الحك علينه الحك لاخوات مرتك اذا نموت سولين تموت تصير بيها حاله نفسيه تصير تخوف ما يتباوع بوجهها

كملت كلامها بحماس من نبرة هادئة لنبره سريعه كالت ... اي صدك شلونها سولين دهر فر عامر ما انطاني مجال اسال على اخيتي جبيدي بوسها الي العباس عليك ولا تنسى الموضوع لجيتك بيه اريدها من شاربك من اروح فدوه اني واختي لشواربك محد يحلها غير رجالها

قفلت الخط بعد ما سلمت عليه وكالت وهي تباوعلي ... وهاي انحلت ودام حصلت رقمة راح العب لعب

راحت باوعت بالمرايه وهي تتغزل بروحها كالت .. اجنن عوزي انفخ حلكي مثل هاي الطركاعه ايو بس عليمن انفخ حلكي هو منو يبوس على الاقل ايو يبوسها كريم

جاوبتها بانزعاج .. دنجبي و وخري مني

كعدت وشغلتلي ... يمكن نايمه بصفه وعطرها تارس الغرفه يمكن باسته بخده نست عشرتنا والكعده

عفتها ودخلت جوه فد حقيره عود تحرك كلبي هههه  شويه واجت عمتي ورنا جانت بالسوك وحارث مموجود

وما نشوف اله ابوي هد علينه ما يقبل نظل ببيت عمتي ام حارث لان يكرهها كال باجر اذا اجيت ولكيتجن هنا اذبحجن ولن لبيت كهلان

فقررنا نروح لبيت جدو خرب غيرته بهذلنا يمشينا على مزاجه وخباله متنه منه

.....................

سولين

ظليت اصلي واقره قران كل يوم جزء واطهر البيت بمي وملح حتى اطرد الفال النحس والارواح من هذا البيت وابعد الشكوك وقلق عني

صارت عندي ردة فعل من الاشتر وصرت اتجنبه وهماتين جاب دبة مي ارو جديده صرت اترسها واقفل الباب واخليها

ضايجة حييل اريد شي يونس ماكو بس ضوجة طلعت اغسل بالبيت بملح شفته بالاستقبال كاعد ومشغل الحاسبه هاي شنو ما شاء الله عدنا حاسبه اشو اول مره اشوفها عدنا

هو شافني من بعيد صاح عليه .. سولي بابا تعالي شوفي

عقدت حواجبي هاي اول مره يصيح عليه خليت ورحت يمه كال .. خلي اشوفج فاتحة سوادي تعالي شوفي ذول اصدقائة جانوا وياه من غرك واني شاك بيهم هم الي قنلوا

كعدت بصفه واني مفهيه باوعت على المقطع اول ما فتحه جان جادر منصوب وبعدها دخلو شباب شايلين نعش رمزي وصينيه مثل صينية القاسم بيها انواع الحلويات والشموع والعالم تبجي واهل سوادي يبجون

واكو تلاثه مكطعييين رواحهم من البجي والصريييخ بحيث حتى حركاتهم غريبه

اشرت على واحد منهم بصدمة جان لابس دشداشه سوده شاكها وشاد جراويه على راسه وهو يصرخ بصووت ويلطم على وجهه وينوح ويفتح الجراويه ويرجع يشدها اشرت بفزع .. هذا اعرفه هذا واحد من الهجمو عليه بالشقه ويه ساهر وتحسين ومصطفى

رد عليه .. اي هذا ابن تحسين هذا شاك بيه هو الغرك سوادي انتي شتحسن

صفنت عليه وشفته مكطع روحة تكطع تكطع ويصرخ حتى اهل سوادي مو مثله رديت عليه .. ما اعرف بس شو مبين صاحبه شوف شلون يريد يموت عليه  بس ما استبعد كوثر جانت تموت عليه وبعدها تغيرت وكرهتني وكرهتها وصرت ما اثق بس بروحي

باوعلي ... لا تثقين مو كل شخص محل ثقه وهاي كوثر شفتها مره وحده حسيتها بداخلها حقد وما عندها ثقه بنفسها واحو مثل يكول الثقه بالنفس معركة ضد مضاعفات الهزيمة

سالته بترقب .. واني عندي ثقه بنفسي

رد بحب .. اكيد بس انتي شويه متسرعه

ابتسمت ورجعت اباوع للحاسبه وهو رجع شغلها على المقطع كال .. شوف تحسين شلون لازم الفاتحه حقراء يقتلون القنيل ويمشون بجنازته

رديت عليه .. اي بس شوف هو هذا الولد تحسه فقير وما بيه حظ

بتنهيده كال .. ايي هو الما بيه خير دخانه يعمي هذا الزيبگ خايف على مصطفى منه اخاف يغدر بيه

اردف بتهديد وحده .. بس وحق الله مصطفى اذا صار بيه  حتى لو تجي من الله اريده من تحسين و ولده

سالته .. هو مصطفى ليش ما يجي عندك مثل صفاء

رد عليه .. مو هذا عار مدلل كوة صابر عليه

ظلينع نباوع على الفاتحه وهو يفهمني ويحجي عن جميع العصابه الجانت موجوده

باوعتله .. اكولك هو تحسين من كرابتك مو

جاوبني بحقد ... اي من كرابتي من خر... على هيج گرابه  مال عبوه ناسفه واطيرهم من مكانهم

عقدت حواجبي .. ليش هيج تكرهم  يكرهوك ؟ وعداوات بينكم

تنهد ورد عليه.. مشاكل قديمة

بعدها كال .. تدرين اني وصفاء مسجلين باسم جدي ومصطفى يختلف عنه هسه هو بالجنسيه مو اخونه

استغربت .. عزا ليش مو بسم ابوكم

جاوبني .. ناس همج امي جانت فقيره وجدي طاغي يسجل الولد باسمة سجلنه بس مصطفى لا هذا سالفته سالفه

سالته .. ليش شنو سالفته ؟؟

رد عليه .. بعدين اسولفلج بس تدرين جنت اضوج لان مسجلين باسم جدي بس من كبرت انكلبت لايه وعرفت هذا الشي صار الصالحي بغفله عن الكل

رمشت بعيوني مستغربه .. ليش شلووون

ابتسم بلعانه ورد عليه .. اكدر هسه اطرد كل الموجودين بالبيت او احصرهم بزاويه واخذ حقوقي كلها بس منتظر الوقت المناسب واريد اخلص مهمتي

سالته .. منو هم التحصرهم

رد عليه.. ساهر وامه وتحسين اطكهم بقسام شرعي يقسم اسهم الورث بما ان اني بسم جدي وكذلك صفاء فحصتنه اكثر منهم وهم ما عندهم بس حصه وحده

بعدها باوعلي وهو يبتسم بحب كال .. ان شاء الله اكعدج بذاك البيت واخليج تاج على روسهن اخليج انتي الملكة وهن خدم تحت رجل وتتدللين

راح العب بيهن لعب بس اصبريلي اذوگهم من نفس الكاس

تساولات بداخلي هواي سالته مجاوب بعدها اندك الباب هو سد الحاسبه وراح فتح الباب وهو يكلها.. اهلا تفضلي تفضلي

باوعت شفتها سالي خرب هاي شجابها دخلت سلمت عليها ببرود وهي ردت ببرود ... هلاووو

كعدت اني صرت عاقله ابد ما حجيت وياها وهي حجت بصوت دلوع .. لك عيني غير رسبت عين وصابتني خرب بالحظ حرامات اعيد سنه لخاطر درس والله ظلم جبت كومة واسطات والاستاذ قافل ميقبل ينجحني يكول لو اني لو هي ..هو شايب كركمة مخبببببل مو صاحي

جاوبها .. يله عادي بالاعادة افاده

ابتسمت يااا فدوه ممساعدها خرب شكد حية اني

كالت بقهر .. هو هذا خبل يكول اني عدي ابن صدام حسين ما نجحته انجحج انتي

رد عليها .. هو صوج ابو عداي ما سوه تبليط وخلصكم منه

ضحكت ... هههههه اكولك صديقتي اليوم خطية قهرتني زوجها ما اعرف شنو مسوي دازلها هاي الورقه

هو اخذها منها وقراها كلها هاي طلاق غيابي من دون علمها خلي تروح ترفع عليه قضية وتكلهم احبه واموت عليه من هاي الكلاوات ومطلكها طلاك تعسفي من دون علمها وتشوفلها محامي شاطر يسحلوا سحل تاخذ كل حقوقها اصلا هاي الورقه لصالحها خليها تعرف تستغلها

ردت عليه .. اوك عيني تمام هي رادت اعرفها عليك بس كلتلها مو هسه لان مشغول ان شاء الله اعرفك عليها

هو سكت وباوعلي صلاوات صاير يخاف مني ويترقب حركاتي بس اني جنت هادئة وحبابه وفكرت اني احسن منها شنو اقهر نفسي على هيج حثالة

خليت وطلعت حتى احسسها ان اني عندي ثقه بزوجي وما تكد تستفزني باشياء مدري شلونها

ماكو ثواني وطلعت وهو رجع الشغله واني ظليت افكر هاي سالي شلون تدرس وهي ضاط بس عادي احو هوايه ضباط يدرسون جامعات اهليه ما بيه مشكلة اكو موضفين وضباط ورتب عادي يطورون من نفسهم ويدرسون بس شكد كسوله رسبت يله عادي د انه متشمته ههه

........................

صفاء

هاليام مصطفى ماكو ما يجي ولا يخابر فكلت خليني اروح اله اشوفه وين صار ما صار والله خليت ورحت الهم دكيت جرس البيت طلعت اله الموه التشتغل عندهم

دخلتني جوه شفت المدعوه ام ماهر كاعده رجل على رجل وهي لابسه الذهب كله وارقى الملابس وتراسل بموبايلها الفاخر من شافتني سدته وباوعتلي كالت .. خيير تفضل محتاج شي

جاوبتها بهدوء ... اي اجيت اشوف مصطفى اذا موجود

ردت بنفي ... لا مموجود وياريت بعد ما تجي عليه لان ابني ما يحب امثالكم

تنهدت وجاوبتها .. بس هذا اخوووي وياريت ما تنسين هذا الشي زكيييه

ضحكت بسخريه وردت عليه .. تمام  تفضل اطلع برا

باوعتلها بنظره حاقده صاحت العاملة الي عندهم .. مدام مصطفى يحول خلي صفاء يصعد الغرفتي

وكفت بعصبيه وهي تتهجم عليها .. منو گله هذا موجود هناااا انتييي حتى اطردج هسه

جاوبته المره بخوف وقلق ... لا والله بس هو شافه بالكاميرا الرئيسية

باوعتلها ضحكت بانتصار وصعدت فوك لكيته كاعد يبدل كال .. هلا صفاوي شلونك 

جاوبته .. الحمدلله تمام اجيت وتلكتني هاي عساس امك لعبت بيه لعب طردتني ترضاها

ضحك ... هههههه خلي تروح لا تهتم الها

رديت بحسره ... قهرتني

تنهد وهو يحضني ... ما عاش الي يقهرك صفاوي

كعدت على الجربايه واني اشوف كومة مال علب بيض والقبق احمر فتحت وحده منهن اشتميتها عباره عن كريمات كتله .. هاي شنو

ضحك بصوت عالي... ههههههههههههههاي خلطات الوجهي

جاوبته .. وشكو مشتري كل هذا العدد تخبلت

رد عليه وهو يشسور بشعره .. مو اخاف ينكطع استيرادهن هههه

ضحكت .. لا والله شنو ذن

شالهن وشمرهن بسلة الزبل كال .. يمعود بضاعة اكسباير تقشمرت بيهن ومصيرهن بالزبل

جاوبته .. ما رجعتهن الصاحب البضاعه

باوعلي بنص عين كال .. ليش هو عبود  سماره يتفاهم ايده والفشخة خليني ساتر على روحي

فتحت عيوني مصدوم ... افااا هاي اشتريتهن من اخت سولين افيان

باوعلي وتنهد ... اييي مو بنيه الله ماخذ من طولها ومعوض بلسانها الله يساعد لياخذها عندها قابليه مو طبيعيه

عقدت حواجبي .. وانت شعندك وياها

تنهد وهو يرد عليه .. شعندي مفشوخ ومتقشمر ويعد الله اعلم شتسوي بيه بعد باعتلي خلطه اكسباير تريد تسوي وجهي فار تجارب لمنتجاتها المعفنه

باوعتله بغموض .. هذا شنو نيته شعنده ويه هالبنيه

اتذكرها قبل كم يوم خابرت على الاشتر على مود بيتهم والاشتر راح ورزل ابوها وتحمل كافة المسؤولية بس صدك هي هاي اخت سولين حيل وكحه وجريئة عود مصطفى نيته يضحك عليها ما يدري تاخذه للشط وتجيبه عطشان ههههه

.........................

جيهان

بعد ما ابويه ما قبل نظل يم عمتي لان قبل سجنه حارث وعمتي اشتكت عليه هو متشدد من ناحيتها فكال ما يظلن هنا فخلينه رحنا لبيت جدو كهلان

الحمدلله كريم مموجود بشغله وهو اصلا من يروح يتأخر هناك بالشغل حتى نكدر ناخذ راحتنا

من رحنا لكينه بيبي ام حسن وحنان واكفه وتدك بالباب ومحد يفتح الباب الها وهي تدك حييل ومحد يطلع

اجينه سلمنه عليها كنالها .. شنو شكو ليش محد يفتح الباب

ردت حنان بعصبيه .. صار نص ساعه ندك بالباب والخاتون ما تفتح الباب وكوثر مو هنا بالجامعه طلعوا الجيران وهي ما تطلع وعلي من تفتح الباب الا الزمها واسكطها تسكط

ظلينه احنه ندك بالباب وياها وظلينه نشمر طابوك واندك بالجرس وماكو محد يفتح الباب خفنه حييل

كلتلها .. بيبي اخاف البنيه صاير عليها شي شلون تخلوها الوحدها بالبيت

ردت افيان بخبث .. دخلي تولي جا اختي سولين شو كله الوحدها بس هاي اكيد هسه تشخر ام عدسات اذا الزمها الا افكس عيونها

حنان بعصبيه .. اي بالقران كون الزمها الا اطلع التنغوص من عيونها هي خبثت شلون كلتلها اغسلي مواعين الريوك ما غسلت الطاوه دكول تلعب نفسي من البيض وقوري الجاي ما غسلته تكول بيه جاي وماعون الجبن ضمته دقتني دق هاي شغلها كل يوم بس هذا

رجعنه ندك ندك ماكو ساعتين واكفين وهي ماكووو اني كلت لا سامح الله الا بيها شي

شويه واشوف امها اجت لابسه بنطرون وشايله جنطتها كالت بخوف .. شكووو شكووو ليش واكفين بالباب بنتي بيها شي

ردت ام حسن بقلق .. والله ما اعرف ندك بالباب صار ساعتين وهي ماكو الجيران طلعت على الصوت وهي ماكو

امها ظلت تلطم وتصييح ... والله بنتييي اذا صار بيها شي بنتي اذا صار عليها شي ما تلوموون غيير نفسكم اريدد بنتي عزا وين وديتوا بنتي بنتي خطفتوها قتلتوها

الله لا يوفقجن الله ينتقم منجن الله يحرمجن من الجنه شادات ويه هالمسكينه الفقيره اليوم احرك العراق بيكم متستاهلون هالجوهرة البريئة عذبتوها الله يعذبكم وينتقم منكم

ظلت تصيح وتعد وتسفط واحنه نريد نكسر الباب قوووي ما ينكسر ام حسن خافت من ام ايات وراحت تركض تجيب حداد يفتح الباب الها

...............................

صفاء

الاشتر جان عنده شغل ولازم يبات برا البيت وشغل ظروري فكال جيب عشا من برا السولين لا تخليها خطيه هاليام ما تاكل

بعد ما راح هي جانت تفتر بالبيت وتغسل بيه بمي وملح وتقره عليه ضحكت عليها وسالته .. شنو صايره جنج ابو الهول ترشين وتبخرين

ردت عليه بعتب .. شسوي اطرد الجن من بيت اخوك والارواح الشريره

باوعتلها بعدها لحد الان من تشوفني تسوي حركتها المعتاده بحجابها تصحكني هاي الحركة كلتلها .. بس ماكو شي صار شكد عايشين بهذا البيت ما شفنه شي

ردت عليه .. اي انتم عايشين ويه الجن صديقكم ما ياذيكم اني لا ممتعود عليه على العموم هو مي وملح يطرد الجن ويطهر البيت من كل شي حتى من النفس والعين ولو هو منو يطكنا عين على هالبيت ههههه

ضحكت عليها وهي كملت وخلت وراحت دخلت الغرفتها بعد ما طلعت منها واني خليت وطلعت برا خفت اروح واخليها لوحدها فخابرت على عايد و وصيته يجيب عشا

تقريبا ساعه واجه كال تعال تلكاني على الشارع ما اكذر اطلع لان بوري طاك وفايض الشارع

فخليت وركبت سيارتي ورحت جبت العشا تقريبا عشر دقايق واجيت

دكيت عليها الباب اكثر من مره حاجيتها ما جاوبتني رجعت دكيت اكثر من مره ماكو خفت صحت عليها صحت ماكوو

دفعت الباب بجتفي بسرعه اندفع ولزمته دبة المي ارو دفعته اكثر ودخلت انصدمت من شفتها واكعه بصف يم ميز المراية الدم مغطي وجهها وشعرها

نهاية البارت.. يتبع

كونوا انتم كونوا بخير .. احبكم 💔

مو تنسن التفاعل يعتمد النشر عليه ترا صوتوا   🤭🤭🤐

نتائج خلطة فافي لمصطفى 🌚