رواية #وكر الأشتر الفصل الثامن وثلاثون 38 - بقلم الكاتبه سمو العراق

بارت ٣٧
رواية .. وكر الاشتر
بقلمي.. نور سمو العراق

💔💔💔💔💔💔💔💔💔💔💔💔

‏ما بين سوء الفهم ، و سوء التصرف ، و سوء الظن ...تلاشت أعمق العلاقات...!🥀

للاستفاده

الصلاة على النبي يمحو الله بها الخطايا، ويغفر بها الذنوب.

........................

جاسم

صدك اكو نسوان ما تستحي بحيث مستعده تظل عن الطريق في سبيل ترضي غرورها وتسوي الي ببالها

يعني هسه هي شنو الي يخليها هيج تسوي بحيث تراسل وتتواصل ويه شخص يوصل الها خدمة ومو اي خدمة خدمة توصيل سحوره !!

عجيب والله وصل بينه الحال نستفاد من الانترنت بهاي السوالف الناس تستفاد اشياء بيها حظ احنه نستخدمة بالسحوره

جانت تصرخ وتلطم وتدك طارت انوثتها راح تنعوص مالتها من بعد ما طلگها

اجت ام حسن وحنان يركضن عبالهن احتركت آيات مدري شصار بيها وهي حالتها حاله

كالت ام حسن وهي تصييح .. شكوو شكوو شبيكم شصار شبيكم شبيها ايـــــــــو

هو باوعلها بغضب و مجاوبها بس مسح وجهه بتوتر وهو يتصل واجاه الرد وخله وطلع برا يكمل اتصاله

لزمتها ام حسن وهي تحجي بغضب .. ولج احجييي شبييج شكوو شصاير

شهكت وهي تلطم ... ابنكم طلگني طلگني مدري منو لاعببببه بعقله مدري منو حرضه عليه الله ينتقم منكم الله يجازيكم بافعالكم الله يعاقبكم ويعذبكم ويفضحكم يا حقرااااء

ابتسمت حنان بخبث وظلت تكلب بعيونها فرحانه من الموضوع الصار وهي اصلا حنان عبالها رجع الها هم مصدكة روحها سميره العشق الممنوع لا خجل ولا مستحى

رجع دخل مره ثانيه بسرعه وهو يفح من العصبيه كال بصوت عالي وغاضب .. جاااااسم اخذها واديها لاهلها

هي صرخت من مكانها وتصييح .. ما ارووووح ما اطلع والله لو تكطعني وصل ما اطلع ما اطلللللع لو تنطبك السماء على الأرض

عاد هو هجم عليها واني لزمته وهو يكلها بغضب عارم .. شووو تطلعيين وغصبا على الخلفج بت الكلب انتي لزكة ما اريدج وانتي طالق طالق لو تموتين ما ارجعج وهااااي كلها شاهده عليه

ردت عليه وهي تصرررخ . لييييييش تطلكني لييييش شفتي ويه واحد كاسره عينك خاينتك وهيييج تسوي الله ينتقم منك يا كو... الله ينتقم منك وحوبتي ما تتعداك

هو تخبل شيل التحفيه واشمرها عليه ربكم هي شردت جان تفلش راسها تفلش وابتلينه بيها

اجت جيهان وافيان يركضن وهن يصيحن .. شكووو شكووو شصاير شبيها ايو

ردت عليهن بغضب ... اطلعننن برااااااااااا اطلعن من بيتي ما تبقن دقيقه هنا كله من وراجن ادبسزيات هااااا ارتاحيتن من طلكتني ان شاء الله سوطان ماله علاج بكلبجن كح

ردت عليها افيان بغضب .. خااااب اكلي نعل بيتها هي ام الگمل دروحي غير بيت عميييي

جيهان جانت بس صافنه ومصدومة بالوضع وكل شويه كالت .. شكوو شصاير شبي عمو ومرته

ردت عليها حنان بشماته ... طلكها كريم

جيهان لطمت خدها ... يااااااااا عزاااااا ليش

طلع هو برا عايف الوضع متكهرب خليت وطلعت وراه شفته واكف وهو يتصل بعدها كال ... ابن الكلب يفتح خط ويسده

عقدت حواجبي .. منوووو شبيك انت على كيفك اهدى

بلل شفايفه بحيره ورد عليه ... ابو هاي المصيبه الطاحت على راسي اريد اخابره يجي ياخذها ما اتحمل وجودها هنا ولا اريد ابوي يجي ويلزك الي بيها هالادب سز هاي عديمة التربيه

رجع اتصل مره ثانية واجاه الرد كله .. السلام عليكم ابو آيات ياريت تجي للبيت تاخذ بنتك لان بعد مالها كعده وياي

قفل الخط بوجهه واني لمته .. عيب كريم صدك جذب شنو هيج تكوله جان خليتني اني اخذها انت تاخذها

جاوبني بجمود وهو يكول ... خلي هو يتحمل مسؤليتها اني ما الي شغل بيها

تنهد ونفخت بضجر شيخلص هاي السالفه انوب هاي السحوره وين نوديها والله حييره خابرت على ابوي ماكو عنده فصل وما يفتح خط وكوثرماكو ما اجت نايمة وما تدري بالدنيا طشت رشت

رجع كريم دخل للبيت وهو يحجي بغضب .. اروح وارجع وروح امي اذا اجيت ولكيتها هنا احركها هييي والبيت

ردت عليه بغضب ... بالقرااان تحركني وتحرك البيت وما اطلع منه واني ايات واريد اشوف انت لو اني

تفل عليها بغضب وقرف وهو يكولها ... ممتندم بحياتي على شي بكد ما متندم خلصت كم شهر وياج بس مو صوجج صوجي اني العار القبلت بوحده مثلج

ردت عليه وهي تضحك بحقد .. اي اعرفك عينك زايغه على بنات ابن عمك وهن يصيحن الك عمو شكد حقييير ساقط

هي من حجت هيج انهارت كل حصونه هو هجم عليها هجمة بحيث كلنه صرنه كدامها وما خلصناها منه لزمها كطعها تكطع سحلها سحل وهي ما ينسمع بس صوت صراخها وعياطها

حاولت افرغها منه وكلنه وام حسن وحتى حنان وجيهان وافيان وماكووو عبالك مسلم وكع بيد كاااااافر سكطها تسكط

ام حسن نزلت على ايده وهي تبوس بيها وتبجي .. فدوووه يمه فدوووه كريم لا تسوي هيج عوفها محترك كلبها يمه لا والله راح اتخربط والله صعد سكري

عافها وصدره يهبط ويصعد من غضبه شعرها بيده اشر على نفسه بقهررر .. اني سااااقط اني ولج ام السحوره التافهه كلج خلگ وحده رعنه مستهتره كل اخلاق ما عندج

وكل هذا الكتل وما ترد هو عرفها ما راح تهجم على جيهان بسرعه باوع الهن وهو يكولهن ... اطلللللعن بررررا محد يظل هنااااااا يالله

خطيه جيهان انرعبت من حجه هيج بسرعه طلعت تركض وافيان ما عجبها الوضع باوعت للكل بقرف وخلت وطلعت تركض وره اختها

وجان مثل ما توقعت يا سبحان الله والله حسيت كلتلها .. روح اركض روح وراها عاجبتك المشوهه روح نام وياها اشبع بيها لان انت ما تحب المرتبات والحلوات مثلي تركض وره الزبايل

باوعلها بحقد بس ما رجع كتلها كلها .. على الاقل اشرف منج وماشيه بما يرضي الله مو مثل ماشي مثل ما يرضي الشيطان يا شيطانه وترا ماكو غيرج زباله

عافها وطلع برا صعد سيارته وراح وشويه واجت ام ايات وابوها وهم يصيحون ويحجون وهي انوب تخبلت من شافت اهلها ما تقبل تطلع راسها والف سيف ما اطلع امها توسلت بيها

وام حسن جذبت عليها وهي تكولها .. روحي يمه والله بس يجي شيخ كهلان والله اخلي يرجعج صدكيني مستحيل اخلي يطلكج

ردت على ام حسن بغضب .. ما اطلع ما اطلعلو تذبحوني لو تجنزوني ما اطلع

توسلنه ردنه بسنه الكاع ما رضت تطلع اخر شي ابوها جان واكف بالباب شرب باكيتين جكاير كال بغضب .. بالقران اذا ما تطلع من البيت هسه ادخل للبيت وافرغ المسدس براسها

امها رجعت الها وهي تركض وحجت وياها وسمعت تهديد ابوها خلت وجمعت ملابسها وأغراضها كلها وطلعت واخذها ابوها وراح

حسيت براحة من بعد ما طلعت صدك ازعاج ولعبان نفس همزين خلص منها كريم هاي ما تنكدر

اول ما طلعت واجت كوثر تركض كالت وملهوفه وتريد تبجي... صدك كلام فافي صدك كريم طلگ ايـــــــــو

باوعتلها قرفان منها ومن صديقتها رديت عليها.. اي صدك ومن طاح حظج وحظ صديقتج كوون شكد وحده ادبسز ومنحطه شلون صاحبتيها

كوثر بصدمة ... ليش شبيها شسوت ايو مؤدبه واخلاق متسوي شي غلط

باوعتلها بنص عين .. اي بس تسوي سحوره

عفتها ورحت تحت صدمتها وذهولها

.......................

سوليين

جنت كاعده دا اسوي شيره اني هيج طبعي دائما احب اسوي شيره اصلا احنه متعلمين لان جنه نشتغل بيها ومتعلمة كل شهر اسوي اتونس بيها

سمعت الباب انفتح فعفتها بسرعه وضميتها باوعت من الباب شفته دخل بس بسرعه راح الغرفته فاني بسرعه اخذت ملابس وسبحت وطلعت

حسيت بيه تأخر وما طلع خليت ورحت دكيت الباب هو رد عليه .. دخلي عمري

ابتسمت على كلامه وخليت ودخلت شفته كاعد على القنفه الموجودة بالغرفه وديسوي بالحاسبه دخل القرص بيها كتله .. اطلع اخاف عندك شغل

ضحك كال .. ليش عندج شي ؟

جاوبته .. لا ماكو شي بس اني ضجت وحدي كاعده كلت اجي يمك

رد عليه.. لا تعالي عادي مجرد قرص عادي يخص اصدقاء سوادي من جانوا وياه وقت الحادث

عضيت شفتي بحماس .. الله احب سوالف سوادي واصدقاءه يله دشوف شبيهم ذول

خليت واجيت كعدت يمه هو شال الحاسبه من حضنه وخلاها بحضني وتقرب مني حييل ولف ايده على كتفي عبالك كاعدين بالسينما حاضرين فلم رومانسي

اول ما اشغل الفيديو جانوا هادئين وكاعدين بس يا سبحان الله وجههم ممسوحه منه الرحمة يخوفون او مو يخفون وانما وجههم مو رحماني

جان عايد عساس هو صديقهم ويضحك وياهم ويشاقه وهم ضحكهم واصل السابع جار وهارجين السياره هرج وانوب ضلوا يتشاقوون بكلاصات المي السفري واحد يشمر على الثاني و واحد يدفع الثاني و واحد يضرب الثاني ويخنكه بالشقه

صفنت عليهم عساس هم رايحيين لسوادي الي بعده تراب گبره اخضر وهسه اندفن شلون هيج يتشاقون ويضحكون لعد وين بجيهم ولطمهم بالفاتحة شنو هالتناقض

باوعتله وهو جان مركز عليهم وعاقد حواجبه وكآن يباوع لشي مميز ومنتبه لادق التفاصيل

وبعد ما وصلوا عند القبر صار البجي واللطم وعايد مستمر يصور بيهم وهذا ابن تحسين يكول العايد .. صورني واني ابجي حتى ام سوادي تشوفني حتى ما تشك بشي هههه

جاوبه عايد وهو يضحك .. ههههه ليش انت شمسوي حتى ما تشك ولك ملعون

رد عليه .. هههه خليت سوادي يطوف ويه البط

طلع من المقطع وطلع على غير ملف جان بس صوت ما بيه اي صوره جان واحد منهم يكول ... اي ترا هو سوادي جان يشرب كريستال هو من نهرب للبصره جان يشرب

ومقطع ثاني .. تعرف اذا عرفوا بينه نهرب سلاح نروح بيها اربعه ارهاب

مقطع ثالث .. لا منروح ترا احنه ورانا تحسين ننسجن اسبوع ونطلع

طلع من الملف وبعدها طلع القرص من الحاسبه ورجعه لمكانه وكعد وهو يفكر كال .. ممكن تسويلي جاي لو اخابر عايد

ضحكت ... ههههه وشنو عايد مخلفك وناسيك لا هسه اني اسوي

رحت سويت اله ورجعت كعدت يمه كال .. شفتي اني ما اضم عنج اي شي وهسه كل شي شوفتج

رديت عليه بترقب .. دتحقق لو تريد توصل لفد شي

تنهد وهو يرد بغموض .. هو هيج اريد اعرف كل الادله تدل هم القتله وعندهم جرايم اكثر اريد اورطهم اريد اطمرهم بالسجن ما اريد يطلعون ولا اكبر واسطه تطلعهم اريد اجمع اكبرر عدد ممكن اريد الزمهم بجرم مشهووذ

رديت عليه .. تدري ذول مبينين خونه مبينين قاتلي من كلام واحد منهم من جانوا على القبر من كال يسبح ويه البط هذا دليل على افتخاره بقتله بشي غامض هو انطه دليل بس غامض الغلط من اهل سوادي هم الي طلعوهم

باوعلي كال .. انتي تدرين مليون ونص انطه تحسين هاي اخر شي افتهمته من الاطباء المشرحين مليون ونص انطه وحتى الضابط الي سلمه من الحبانيه لبغداد بس حتى ما يشرحوا ومستعد يدفع مليونين وتمت المهمه والجثه رادوا يسلموها الهم بس اكو شخص هو الي انطه امر بتشريح الجثه حتى يكمل التحقيق وتحسين بهاي الحاله ما ربح وتشرحت الجثه

رديت عليه بثقه .. الشخص الي طلب تشريح للجثه هو انت واني متأكده مليون بالميه

ضحك وهو يكول .. انتي منيلج هاي السوالف اني شدخلني

كعدت بحماس وحجيت وياه .. تتذكر من مات سوادي واجاك عايد نص من الليل من جنه بذاك البيت المسكون وكلك سوادي بالطب العدلي وبعد معرف شحجيتوا انت بنفس اللحظه رحت ومن رجعت الصبح رجعت وبيدك ملف اصفر وهذا الملف جان كل شي يخص سوادي وكذلك صور للتشريح فأنت وره تشريحة ولا تنكر

ابتسم على كلامي وباس طرف شفتي كال .. وشنو واذا طلبت تشريح لسوادي يعني هاي فوك ما اطلع حقه

رفعت حاجب ... اي بس كول انت شنووو وشلون كدرت تصدر امر بتشريح الجثه

رد باستنكار .. اني شدخلني هو كل واحد يموت قتل او اسباب الموت تكون غامضه يتشرح فمو شي عجيب بس لان سوادي ما رادوا يشرحوا اني توسطت اله وخليتهم يشوحوا رغم انهيار اهله عليه وما قبلوا بالتشريح بس آني أأكد هالشيء الصالحة وعسا ان تكرهوا شيئًا وهو خيرا لكم

بعدها باوعلي من فوك ليجوه وهو يكول .. ما شاء الله صايره تحققين ومشتغله المحقق كونان بحيث كاعده وتربطين الاحداث حدث بحدث

ضحكت .. ههههههه عجزت يالله وصلت النتيجة ولو ما مسولف الي عن الأدلة الجنائية مجان استفدت شي من تفكيري

رد عليه.. ترا قسم احبه مو شرط دارسه

جاوبته .. صح اني فتانه ومنافقه بس والله بعد توبه ما احجي شي يخصك لا تخاف وهاي حلفت وبعدين لا تخاف كول انت دارسه

ضحك على كلامي وهو يحضني كال .. لج والله انت نعمه ومن دخلتي الحياتي مليتيها عليه جانت فارغه من دونج

خجلت من كلامه ومن وصفه اليه ابتسمت عليه وجنت بحالة سكون

............................

جيهان

ضجت حييل من بعد ما طردنه عمو كريم بس بعدها استوعبت ان كل الي سواه هو بسبب زوجته لان مسويه سحر وهذا السحر قوي وجايبته خدمة توصيل

من العصر لليل عمو ماكو ما اجه وهي اخذوها اهلها وراحوا وبعدين اجه جدو كهلان وظل يحجي على كريم ليش مسوي هيج ومطلك مرته وجاسم فهمه

جدو كال.. يمكن البنيه غشيمة يمكن تقشمرت حرام نكسر بختها خطيه يجوز اكو دافع خلاها تسوي هيج ولو اني ما ارضا بهيج شي

جاوبته كوثر بحزن .. هي لان تحبه سوت هيج ولو ما تحبه ماسوي هيج

حنان انتفضت من مكانها وهي دكول ... لا والله لو تحبه ما تسوي هيج بله الولد تمرض صار بيه شي احنه بمنو ربحنا بايو وامها صدك جذب والله الطلاك دوه وياها

كهلان رد على مرته وهو يكولها .. خليج محضر خيير بويه حنان لا تاججين الموقف

خابر على عمو كريم وهو ما يفتح خط حييل خاف على ابنه حييل كال بخوف ... وين راح وين صار اخاف يسوي بروحه شي انوب اخاف متعصب ويسوي حادث هسه غير يرجع خليها تروح ممتوازين عليها

شويه ودخل عمو كريم مهموم و مبين التعب على وجهه كعد على القنفه بهدوء ومن دون اي كلام وسلام والكل جان هادئ وياه

كال ابو ... هااا بويه كريم ها بويه شبيك احجيلي فضفض الي شصار وياك خلينه نحلها

باوع لابو بحده وهو يكوله .. ما تنحل ابببد ما تنحل اني المره التلعب من وراي وتسوي هيج سوالف لو تصير نبي ما اريدها

شنوو اني طرطور مخليتني وراها تراسل وتطلع وتمشي وانوب تسوي سحوره تدري منين جايبه الها جايبه من الكوت على شنووو شبيها منو وياها يعني مو حتى بيت طلعت بيها وهي حتى متستاهل ٥٠٠ الف مسويه بيهن سحر يا ظالمة النفس يا تافهه يابه اذا كلت رجعها بالقران دقيقه ما اكعد بهذا البيت وبعد وجهي ما تشوفه

تنهد جدو وهو يرد عليه .. حقك بويه حقك بس شنسوي امها خابرت وتبجي وتكول البنيه تخربطت وانت كاتلها وبالمستشفى ويمكن حامل

جاوبه بعدم اهتمام ... حامل مو حامل هسه لو تخلف عشره ما ارجعها لو تنبت نخله براسها لو يطلعلها كرون وبعدين مو لهلدرجة اثول حتى اصدك بيها حامل وتريد تطرح طبها مرض الطرحت والظلت شسويلها وهااا هاي كلاواتهن ما تمشي عليه وياريت يابه تسد الموضوع لان بصراحة روحي طالعه وما الي خلك لإي شي

حنان ردت عليه.. اي والله حقك الصار اليوم مو هيين

قبض كهلان على سبحته وهو يكول .. خوش بويه دامك هيج ناوي على الطلاك استعجل وطلك بالمحكمة وادفع الحاظر والغايب وخليني ااجل خطوبة اخوك ورنا بين ما يهدئ الوضع

جاوبه بنفي ... لا يابه خلي الخطوبة بموعدها والله عيب علينه أصلا نأجل الخطوبه الخاطر هاي التافهه هي واهلها خلينه نسوي الخطوبه بموعدها

هز راسه جدي بقبول وهو محتار بعدين كال .. انت مماكل شي اليوم كله خلينه نسويلك شي تاكله

وكفت حنان كالت ... اي يدلل هسه اسويله احسن عشا

هو رد عليها بنفي وهو يكول ... لا لا ما اريد خلي جيهان تطكلي بيضه مره اكلت يمهم بيض الصبح وهسه اشتهيته

ابتسمت على كلامه وجاوبته .. تدلل عمو هسه اسويلك

خليت ورحت للمطبخ وهو فرك وجهه بانزعاج وتنهد

طلعت الطاوه والبيض وبصل وسويت جاي واجت افيان تركض وراي وهي تكول .. اكلج فدوه عمج طلك هسه شلون اغورج بعد ما اكدر اشغلج يمكن كاعده بصفه وعطرها تارس الغرفه خرب هسه اله يطلك هسه

ضحكت على كلامها .. ههه دنجبي خطيه والله انقهرت عليه شفتي شلون متغير ومزعوج خطيه والله ميستاهل

تنهدت .. اي غير كله من وره ايو ام السحوره ولج اني عايشه عيشتج هم افكر سحوره هو ابوي جنه وحش وما فكرنه نسويله فد يوم من الايام سحر بس نسوان مجلوبه يتنفسن سحوره

جريت نفس وزفرته .. بعد اندري صوج الموبايلات خلي نلزم موبايلنه ونكسره ترا الموبايل ساس البله هو يعلم على هيج سوالف

ردت عليه بغضب .. وتوخرين مني لا اكسرج انجبي كل شي وذبوا براس هذا المسكين الموبايل شدخلة هن بيهن الحكلك البيهن ما يخلينهن دنغوزات

خلت وراحت واني كملت البيض والجاي وكصصت وياه طماطمة وزيتون واخذته اله هو كعد ياكل بهدوء فعلا هو انيق حتى باكله واني اترقبه يارب ياكلها كلها حتى ما اتفشل وجدو كعد كابله وياكل وياه مع العلم اني طكيت تلاثه

ضحك جدو وهو يكول .. هههه صدك بويه هذا البيض طيب جااا شو ام حسن وحنان يشعوطنها ما يسونها هيج مثل الخبزه بويه جيهان سويلنه بعد

رد عليه كريم .. اي اني احبه هيج ما احبه مفلش يله سوي بعد

وكفت واني ابتسم ..تتدللون

خليت ورحت دا اسوي اجت ورايه كوثر وهي تنكط سم كالت بحقاره وعصبيه ... شكد شفت حقيرات ومنحطات ومثلج ما شفت ما صدكتي البنيه زعلت ركضتي تتلوگين الرجلها عبالج ياخذج كلج خلك مشوهه عايبه محد يباوع بوجهج

ضحكت باستهزاء.. هه وانتي شدخلج ماخذه رجلج دمشي ولي من وجهج لا اكوله عليج واخلي يعرف شلون يتصرف وياج

ردت بحقد .. طالعلج لسان والله

باوعتلها بغرور .. دا اسوي بيض العمو لا تزعجيني لا تحترك وروحي اقري بدل ما كاعده تبثين سمج على عباد الله

كالت وهي تفح بغضب .. لو تموتين لو يظل يوم بعمري ما اخليج تاخذي تحلمين تتزوجين كريم تحلميييييين ؟

رديت ببرود .. تمام اخذي راحتج

خلت وراحت غضمت عيوني باسى من كلامها شكد قليلة ذوق وما تستحي عبالك ماخذه رجلها وهي شدخلها اصلا من عابت حتى عابت

اخذت البيض اله وخليت ورحت الغرفتي واني لعبانه نفسي ييع شلون ياكل بيض بنص الليل هو الصبح كوه ينوكل صدك جذب

........................

فافي

من بعد ما تطلكت ايـــــــــو جيهان خطيه حزنانه وضايجة عليها من طاح حظها ما اعرف شتريد تحبه ومقهوره على ايو لان تطلكت مال صونده واخبزها خبز العباس

خليت ورحت البيتنا هو عمو كريم اخذني طبعا الحلو بعمو كريم ابد ما يرد عليه طلب فديته نسيبي الثاني متأملة راح يصير نسيبي الكفو الثاني وارجع ازامط بيه مثل ما ازامط بالاشتر

والله اني صدك حيه الناس تزامط بالتفك اني ازامط بنسابتي الكفو

راسلني مصطفى يريد خلطات كلت خلي يولي خلي ابيع ثكل عليه وابين اله بان خلطاتي متظل وتخلص بسرعه

رجع اتصل مره ثانية ماكو مجاوبته خلي يولي اني الثكل كله خليت ورحت لبيتنا لكيت ابوي يلطم ولحد الان ما ساكفين وبس طابوك انوب راح يجي الشتا واحنه بعدنا كل شي ماكو

ظليت كاعده يم ابوي وهو مستمر يغلط عليه واني عادي عندي لا مشاعر ولا محاسيس مدري احاسيس المهم سمعته يخابر بساهر وهو يكوله .. اي تدلل اناسبك ان شاء الله منو تريد منهن اخذهن تدلل اصلا انت كفو واحد يناسبك مو مثل ابن اخوك العار

افااا يحجي على نسيبي واني صار ساعه كاعده ومستمتعه ومتحمله باشكال الاهاين والرزايل بس في سبيل الكة فد خبر يفيد نسيبي وهذا اكيد خبر يفيده

خليت ورجعت من رجعت خابرت على نسيبي وانطيته كل الاخبار انوب حجيت ويه اختي سولين الحيه وعزمتها على خطوبة رنا كلتلها رنا كالت وهي صدك رنا كالت اعزميها

...........................

سوليين

من بعد ما خابرتني فافي كالت معزومة على خطوبة رنا وهي كلتلي بصراحة حيل فرحت بس بنفس الوقت خفت

خفت اشتر ما يقبل اروح لبيت عمتي لان هو يعرف باشتر يحبني وكذلك مره شافني اني واشتر بالسياره فخفت يرفض بس اني حييل احب رنا وجنت اتمنى تتزوج جاسم واحظر كل افراحهم

هو جان كاعد يشتغل على الحاسبه واني كل شويه اروح واجي واشوفه كاعد واتردد احجي وياه بعدها رفع عيونه اليه من دون ما يرفع راسه كال ... هاااا سولين شعندج احجي

كعدت يمه بتردد وبلعت ريكي وافرك باديه بتوتر كتله بترقب .. من خابرت فافي كالت رنا بنت عمتي ام حارث عازمتني على خطوبتها من ابن جدو كهلان جاسم

عقد حواجبه وهو يكول ... اي وشنو المشكلة ؟

باوعتله بترقب ... يعنييي عادي اروح اذا متصير زحمة

جاوب بهدوء.. اي عادي شكو بيها روحي اني اخذج هي غير بنت عمتج وصديقتج بس بشرط

رديت بفرحة .. صدك يعني عادي اروح ما عندك مشكلة جنت اظن ما توافق ولا راح ترضا

عقد حواجبه باستغراب .. ليش ما اقبل شكو ؟اذا قصدج على حارث ترا اني ما عندي وياه مشكلة ولا اني ارعن حتى احرمج من اهلج وعمامج بسبب حب وهمي لا بابا روحي وتونسي وعيشي حياتج ماكو شي

ضحكت بفرح ... والله مال ابوسك لا بصراحة دتفاجئني انت حيل متفهم وحباب الله يكثر من امثالك انت صح نسيب فافي الكفو

ضحك وهو يكول .. دبوسيني شكر على السويته وترا هذا الشرط الي طلبته من ضمن عروض هذا الشهر

ضحكت ... ههههه والله حلوه عروضك بس ما ابوس اعتذر منتظره عروض الشهر الجاي

سحبني حييل وهو يبوسني بشغف ويروني نفسه مني مددني على القنفه وهوحاضني ويرص بيده على خصري ورجع باسني مره ثانيه واني جنت متجمده بمكاني ومصطكه من الخجل والخوف

مسح على خدي وهو يكول .. ليش جنتي خايفه وانتي تردين تطلبين هيج طلب ؟

رديت عليه برجفه .. مو جنت خايفه متقبل بسبب حارث

جاوبتي بثقه ... حتى لو جان حارث موجود بحياتنا بس اني اثق بيج لهذا السبب عادي روحي

ضحكت ونزلت عيوني خجلانه كال .. عندج ملابس لو نشتري

جاوبته بنفي .. لا لا عندي مو ذاك اليوم اشترينه من رحت للمختبر جديدات ومحد شايفهم وحلوات واصلا ملابستهن غير مره وحده

رد عليه .. تمام عيني بكيفج المهم ترضين وتقتنعين

ضحكت واني مستمتعه بكلامها ودا اتعلق بيه شويه شويه ودا اغير نظرتي عليه

...........................

جيهان

من بعد ما صارت الخطوبه مال رنا وجاسم يعني اقصد اليوم جنه حيل مخبوصين عزمنا ناس ونحضر بنفسنا كل شي سوينه

اني احتاريت شنو ألبس والحمد لله حنان وافيان راحن الصبح للسوك وافيان جايبتلي ملابس حلوه للخطوبه هو فستان طويل وردان لونه تركوازي وشسورت شعري وخليت شويه مكياج

اول ما طلعت جان الشال على راسي طلع عمو كريم من غرفته وهو يلبس بساعته جان انيييق حييل لابس قاط اسود من دون ستره بس يلك ورباط وقميص ابيض حيل حلو يلمع لمع حسيت بيه فرحان اصلا طالع احلى من عرسه

باوعلي وهو يضحك كال .. عمي هاي شطالعات اليوم وحده احلى من الثانيه

ضحك ورديت عليه.. شكرا عمو عيونك الحلوه

باوعلي بعدم رضا وهو يكول .. انتي شوكت تبطلين كلمة عمو مو شلعتي كلبي شلع يعني لهلدرجة مبين عليه شايب حتى طايحتلي عمو ما عمو

ابتسمت بخجل .. ههه لا بس اني متعوده من صغيره بس لا بعدك شباب

صفن بوجهي ونظراته تتنقل بين ملامحي خلاني خجلت حييل كال .. اصعدي وياي من نروح زفه لا تروحين ويه العجايز

ضحكت بخجل وخوف .. هههههه وين ما تصعد فافي اصعد

رد عليه بحقد .. احتركت فافي سوالفها كلها معفنه

عافني وراح واني اضحك عليه دنطلع هو وكف بباب البيت وهو يطلع بالنسوان واني ميخليني اطلع وكل شويه اوكفي لا تطلعين هنا ولد اوكفي

كلها طلعت واني ظليت اجيت ابجي واستحي احجي وياه اختي طلعت واخته وحنان وام حسن بعدها كال .. يله روحي اطلعي

من طلعت انصدمت شفت الكيه الي جايبيها للنسوان متروسه ترس نسوان وماكو مكان اليه ضجت حييل كله من وراه هو مخلاني اطلع وقبطت السياره

هو اجه وكف يمي ومسوي عصبي .. ليش ما تصعدين يله اصعدي

رديت عليه واني منگبه طالعه بس عيوني مستحيه من المكياج والعالم كلها موجوده رديت عليه .. قبطت السياره ماكو مكان

رد عليه وهو يتلفت يمنى ويسرى وهمس من بين اسنانه .. حركة عيونج هاي تبهذل تعالي اصعدي ويايه

مشه خطوات واني امشي وراه مستحيه صاحت كوثر من جام السياره .. كريم خليها تصعد بمكاني واني اجي وياك

باوعلها بعصبيه .. خليج بمكانج شيطلعج وانتي كاعده باخر الكيه

رجع كمل عصبي كدامهن وعض اصبعه بتهديد.. اطلع كوا اذا بعد جبتجن بزفه فضحتنه فضيحة

هي صدك هووووسه وناس فوك ناس والصياح والعياط وفافي خابصه الامة هي وحنان بعدها ما محركة السياره وهن يدكن ويركصن

صعدت وياهم جان جاسم كاعد بالصدر وكريم يسوق واني كعدت ليوره وام حسن بصفي وجاسم مشغل معزوفه وطالع من الجام وذاب لحم بالركص ممصدك خاطب رنا وجماعته اهل السنتر الي يشتغلون وياه ذبوا لحم بالركص والهوسات

جنت اني كاعده بس اصفك وفرحانه على صوت المعزوفه وخجلانه شنو كاعده لوحدي بنص الزلم همزين ام حسن جانت موجوده وياي جان متت بدمي

هو جان بين لحظه ولحظه يسرق نظرات اليه ويبتسم جنت اباوعله فد شي حلو انيق جذاب حتى ايده حلوه مدري لان احبه اشوفه هيج حلو

درت وجهي خجلانه منه ما اكدر اخلي عيني بعينه ولا اكدر اباوعله مستحيه حييل منه ومن كثر ما احبه ما اكدر اتجرئ واباوع عليه وشكد احلول ابد ما اكدر اظل ارجف وارتبك وحتى بطني تظل توجعني ما اعرف شيصير بيه من الخجل

دار وجهه عليه جاسم وهو يهلهل وبعدها كال ... خاب هلهلي شبيج كون هنا افيان الا ساجده عبيد ما يلحكها

ضحكت .. هههههههههه والله ما اعرف اعرف بس اصفك

رجع ضهره على الكرسي وهو يكول .. مو صوجج صوج كريم ما جابله وحده نجره اجت تسويلنه جو بالسياره وين الفاهيه ام حسن وجيجي ام حسن يمكن شاربه منوم

رد عليه ام حسن وهي تكول .. ولك يمه تعبانه ما بيه حييل انوب وراي ركص يم اهل العروس

غمزلي كريم وهو يكول .. جيهان ضامه حيلها العرسي مو هيج

جاوبته بصدمة وتوتر .. ها اي ان شاء الله يارب تتزوج او ترجع مرتك

رد بعصبيه .. بالقران لو مو عيب الا هسه اشمرج من السياره مو فرحانين شكو تذكرين ذيج الازعاج

ابتسمت على كلامة وسكتت مرديت بس جان احسه فرحان مو مثل قبل مهموم ومصايب الدنيا احسها كلها على راسه لا هسه صاير يضحك ويسولف ومتحمس

وصلنه ونزلت اني وهو ورايه كال ... من اتصل عليج بسرعه اطلعن وخلي الموبايل عندج اخذي من افيان تمام عمو

هزيت راسي بقبول ... ان شاء الله

دخلنه جوه ونشوف رناوي يعمري عليها طالعه تجنن تجنن كولش حلوه تخبل ومبينه متوتره حيل وكل شويه وتعاركت هي وامها مدري شبيها خبله

ركضت على سولين وحضنتها ما شاء الله طالعه تخبل تجنن لابسه ملابس حلوه بنطرون وقميص هيج مشمشي او برتقالي ومخليه مكياج مشمشي طالعه حيل حلوه مصدكت جايه

ظلينه شويه كاعدين وبعدين اجه حارث كال تمت الخطوبه ظلينه نركص ونهوس وفرحنا حيل شغلنا الديجي وانوب دخلت هي وجاسم عقدوا الهم

وظل جاسم كاعد يمها وبعدها ظل يركص هو وياها وكل شويه وحاضنها وهي مستسلمة وشو هاي شويه وذبت لحم ظلينه نكرص بيها نريدها تهدي ماكو ذبت لحم بالركص عياره وتكول ما اريده تطلعت تبيع ثكل هههههه بس والله فرحنا الها

ظلينه عندهم لليل ممصدكين واصلا احنه اقارب فبقينا وتعشينا يمهم والناس الي اجت من العشيره طشت وراحت ظلت بس عوائلنا

باليل من كملنه طلعنه كالت سولين اروح وياكم ومناك اخابر اشتر من فافي يجيني

خلينه وطلعنه سوه حسيت بحارث يتقرب من اختي وبعدها صاح عليها يحجي وياها وهي جانت واكفه يمه وما اشوف الا سيارة الاشتر

هي من شافته انصقعت وبسرعه ابتعدت عن حارث و وجهه ظل ينطي الوان

وبعدها هو سلم على كريم وجدي وجاسم  بهدوء وجمود وكلها .. يله امشي

حجه وياه عمو كريم وهو يكوله .. خليها يمنه تجي تتونس ويه البنات

رد عليه .. لا والله باجر عندي شغل من الصبح وما اكدر اجي اخذها اريد اروح للبصره

خطيه اخذها وراح بس هي جانت تطكطك وهو ملامحة ما تتفسر

عزا بعينك حارث دعوف اختي متهنيه بحياتها شكد ططوه وفكر

.........................

افيان

طبعت فد ضجت من هذا حارث مدري شيريد من اختي وهو بس وكف وياها على انفراد وهو اجه نسيبي الكفو عبالك موقت عليه خرررب بس لا يطلكها اني خليها تتطلك طبها نعال بس شلون اخاف اظل بدون نسيب والما عنده نسيب يسيب

طلعت الخطوبه من خشمنا وخشم الخلفنا هسه شمالك يحارث لازك باختي ماكو نسوان شو ظالات

من رجعنه واني اتصل بنسيبي اريد اصلح الموقف اريد ابرر موقف اختي الحيه الثوله اول مره اشوف حيه ما بيها حظ وطاكها الثول

بس هو ما يرد يمه هسه يموتها تموت يسويها أفخاذ واجتاف لا والله يمكن يدفنها وهي عدله وتعالي يفافي البسي اسود هن يسون مصايب وفافي مبتليه

وصلنه للبيت وجدو راح رجال من كرابة ايو جاي عليه وراح يتفاهم وياه اخذله ساعتين ورجع اجه كال .. اهلها يردون ترجعها وابوها يكول هي ممسويه سحر لكريم هي مسويه سحر لامها هي امها ساس البله لان اني ردت اتزوج على امها وامها متواصله وياها وطالبه منها تراسل البيج وتسويلي يعني مو الكريم

واني لزمت المره وسكطتها تسكط وانوب طحت بيها وطردتها لاهلها وهسه خلي يرجع آيات

بس جدو مجاوبه .. لا والله ما نرجعها ونعتذر منكم الولد طلعت من عينه وهو مو علمود السحر هو يكول شلون الها جرئة تتواصل ويه واحد متعرفه وتتفق هيج اتفاق واصلا كل المكتوب يخص كريم يعني ما يخص ابوها وهي مسويتله سحر واني هم رجال اخاف على ابني وما اريد اخسره

ظلينه كاعدين شويه وعمو كريم طالع مو هنا واندك الباب حييل وما نسمع بس الصياح طلع جدو يركض وبيبي وحنان وجيهان كلنه طلعنه حتى كوثر ونشوف ابو ايات يتهدد ويغلط ويصيح

وهو يكول .. انتم جذاببين انتم ذبيتوا تهمه على بنتي واتهمتوها بشرفها بنتي بين الحياة والموت بسبب الكتل من ابنكم اني وياكم كوم وما انام على حق بنتي اليوم احرك الدنيا عليكم بنتي حامل والطفل مهدد بالاسقاط

جاوبه جاسم بغضب .. هو منو منهم بنتك انت بيك خيير الزمها وادبها مو مخليها على حل شعرها تسوي سحووووره عيب عليك هي هاي مال سجن ما دام هيج تسوي

هو ما كال هيج جاسم والرجال تخبل وطلع مسدسه وهو يرمي عشوائي واحنه صار الصريخ ماله والي ما نشوف اله وكعت ودم ينزف ما نعرف منين ظلينه نصرخ ونلطم وهو خله وانهزم

نهاية البارت ... يتبع

كونوا انتم كونوا بخير .. احبكم 💔

بنات اني من عندي وقت انشر ما اقصر وياكم بس اذا ما عندي وقت اعتذر منكم البارحة جنت بالدكتور وباجر كذلك عندي موعد اذا رجعت من وكت اكتب