رواية #وكر الأشتر الفصل السادس وأربعون 46 - بقلم الكاتبه سمو العراق

بارت ٤٦
رواية .. وكر الاشتر
بقلمي.. نور سمو العراق

💔💔💔💔💔💔💔💔💔💔💔💔💔💔

- الأنسان الملوث داخلياً لايستوعب وجود بشر انقياء .

اعتذر عن تاخير موعد البارت لكن الظروف حالت بيني وبينكم 💔

........................

افيان

من بعد ما صارت العركة ابويه صار فتره هو مو طبيعي وتصرفاته مو منطقيه ساعه يحك بجسمة ومرات يظل يومين ما نايم وعيونة تطك حمر بسبب السهر حالته هاي صار فتره مو طويله

بس احنه ما نعرف شنو السبب ولا نعرف اسباب السهر والارق الي عنده يعني حالته حييل غريبه يوم مخبل يوم صاحي ما اعرف شنو قضيته

وبعدها انهار على سولين بالضرب والكتل وهي هسه صارت زينه وتعرج برجلها كوه تسيطر وطبعا هي عرفته عرفت راح ياذيها ولا يقنعها بافكاره

اني بسرعه خابرت على الاشتر بس هي اصلا المشكلة صارت كلها خلال دقايق ماكو ما بيها حتى الخمس دقايق

هو اخذها وطلع بيها خلاها بالسياره وطار بيها طيران عبالك مو راكب سياره حمل عبالك راكب جارجر

ظلينه نصرخ ونلطم رغم العالم التمت بس هو نذل يصيح تخربطت خربطت بتي مريضه

واني اصيح جذاب كله من وراه هو ساس البله هو اذاها وضربها خلاها تخربطت

رجعت دخلت للبيت وجيهان واموني يبجون بسرعه رجعت خابرت على الاشتر وارجف من الغيض والعصبيه اول ما فتح خط وهو يكول .. هااا افيان  وصلت للتقاطع اجييت اليوم عااامر اذا زوعته العافيه فلا اطلع الاشتر الساقط الكوا... اليوم وين يروح مني

رديت عليه واني ارجف واصرخ .. وييين انت ويين راح اخذها ما اعرف وين ما ادري وين اخذها اتخربطت وساءت حالتها بسرررعه تعال

جاوبني بغضب وهو يكول .. وييين راااح وين بسيطه يا عامر اني تلعب من وراي بالقران سوليين اذا صار بيها شي اله اعلكة بالسكف

قفلالخط وماكو غير عشر دقايق وهو يمنة دخل بسرعه وهو بحيث الباب دفره ودخل وهو يكول ... لج افيااااااااان وين سووولين

رحت عليه واني اركض وابجي .. الحك عليها تخربطت راح يموتها راح يجرم بيها كطعها تكطع

لزم كرسي ابوي وكسره تكسر وهو يكول ... شلون اخذها ووين منو اخذها وياه هو اصلا منيله سياره

رديت عليه بانهيار .. ما اعرف هو اجه بسياره جيب حمل وبيها مخضر وسماد هيج كلي اميين حتى اخذنه منها مسواك بگناه

ركز عليه بنظراته وتقرب مني خطوات كال .. بيضه وجادرها زيتوني مووو ؟

هزيت راسي بقبول ... اي هي هيج من وره بيها صناديك مال بتيته وطماطه وكل المسواك وعاليه من كدام بحيث هو كوه صعدها

حط ايده على خصره وهو يجري اتصال سريع بعدها كال .. هلا عايد تعال ببيت نسابتي ويجيب واحد من الربع بسرررعه ما تتاخر الموضوع كلش حساس

رجع باوعلي وهو يكول .. ليش ضربها وليش اصلا تهجم عليها اني مو موصيه لو تغلط عليه ميحاجيها وبعدين  هي صار فتره هنا ما اشتكت منه ليش اليوم بالذات هو اذاها شنو الصار

رديت عليه .. والله ما اعرف شنو اكولك بس بصراحة هو اجه وظل يحجي وياها والكلام جان ضدك وكعد يبرر النفسه يحجي عن موت امي وهي انهارت عليه وغلطت وهو تخبل ولزمها سكطها تسكط

قبض على ايده بكل غضب وهو يتنفس بقوووه وعبالك كوه لازم اعصابه ابويه اذا وكع بيده يصير تشريب وين الله ويوكع بيده اله يشكة بالنص

مسح على وجهه بتوتر ويتصل على ابويه ورفس كرسيه .. رد ولك كلب لك اذا ما وصلتك للمشنقه بيدي وشرحتك اطلع عااار ابن عار لك عويمر تلعب من وراس بسيطه بسييييطه اذا ما ندمتك على الساعه الي انولدت بيها

شويه ودخلوا علينه ثنين واحد ضعيف طويل مبين انسان عادي بس بيه كل البلا والثاني لا مبين من ذول البدكارديه الي ما يتفاهمون راسه راس ثور شكبره يخووف والوشم بكل مكان برگبته ورنوده واديه و وجهه مغنتب بس جنه بكد الغرفه معضل زياده عن اللزوم الله يساعد مرته عليه

احنه دخلنه نباوع الهم من المطبخ هو كله .. عايد احجيلي عامر منيله سياره اخذ بيها مرتي وراح اريد رقمها وكل تفاصيلها حتى اكدر اخلي السيطرات والدوريات من خلال الرقم يلزمونه وشوكت اشتره سياره وهم اريد رقمها ومنين اشتراها

رد عليه عايد وهو ياشر على الشخص ابو الوشوم الجنه غرفه كله ... سلطان هو مراقب عامر وجابلي كامل التفاصيل اليوم الصبح

السياره الي تكون كيه حمل هي سياره تابعه لحجي تحسين وهو يشتغل بيها وياهم على اساس هو يبيع مخضر بيها بس على حسب قول سلطان لا هي سياره خاصه بالتهريب اعتقد تهريب اسلحة والمخضر حجة حتى يكدرون يفوتون بيها

اشرله اللاشتر بجمود وهو يكوله.. بسرعه انطيني رقم السياره حتى اكدر ابلغ

سلطان تقرب منه وهو يطلع موبايله ويبحث بيه وبعدها قدم الموبايل اله وهو يكوله .. هذا رقم السياره اني صورته البارحة وبعد ما دكيت الرقم بالحاسبه طلعت السياره تابعه لتحسين

الاشتر سلم الموبايل العايد وهو يكوله ... تبلغ كل الدوريات عن رقم هاي السياره وعن اختطاف صدر بيها وكذلك السيطرات وخاصه السيطرات القريبه من بعض

عايد .. تمام وكذلك راح اخلي كل الاشخاص الي اعرفهم يبحثون عن السياره وسوي القاء قبض على حجي تحسين حتى بهاي الحاله نكدر نضغط على عامر حتى يرجع سولين لان هو يخاف منهم

اشتر ... اوووه عاشت ايدك هسه بديت تشتغل عدل يله سوي كل شي وخليهم يضغطون عليه حتى اطيح حظهم كلهم

هم خلوا وراحو وهوعض اصبعه بغضب وهو يكول .. لك يا عامر اذا ما نمت بروحك فلا اطلع اشتتتر الا اخليك تتمنى الموت وما تلگاه

ركب سيارته وراح واحنه ظلينه وحدنه بالبيت نبجي و ننوح الله لا يوفقك يا عامر على هالسالفه دمرت البنيه الله ينتقم منك انوب ما يكول مريضه وطالعه من حلك الموت ما عنده احساس ابد صخام بكصتي على هالعمله شلون حالها هسه

............................

سولين

جنت اتنفس بصعوبه شي بداخلي مكسور مكسور اكثر مت ضلعي جنت دموعي تنزل من دون صوت مصدومة مصدومة من كل شي روحي ذايبه وحتى ما بيه حيل اطلع صوت وابجي وافرغ طاقتي

رجعت عليه حالتي ورجلي عبالك داخل بيه سيف من كد الوجع ارجف من الوجع وهو ولا هامة يخابر ويغلط مدري عليمن ظليت كوه اتنفس

وهو يصيح .. الله لا يوفقج الله ينتقم منج ورطتيني هسه اني وين انطي وجهي وين اروح بت النعال ليش تستفزيني من صخام بوجهج و وجهه الخلفج يا عار يا بت العار

جنت ما احجي ولا عندي طاقه للكلام بس ارفع رجلي وانزلها الوجع بيها لا يطاق وظاله بيني وبين نفسي اريد بس شي يسكن وجعي ظليت الهج .. ياا ربي ياربي خلصني الوجع كون يكصون رجلي ولا اطيق هذا الوجع واحس اختنكت وصل بيه الحال اكص رجلي وافقدها ولا اتحمل وجعها واذيتها

اختنكت حييل واحس كوه التقط انفاسي ظليت فاتحه عيوني وحلكي وافرك بصدري اريد بس شويه هوا اريد بس التقط انفاسي ما اكدر احس روحي دتطلع من مكانها وما اكدر اسوي شي راسي احسه صار نار مثل الجمر

ظليت اهمس ربي دخيييلك راح اموت راح اموت يمه وينج وينج

رجع هو صعد بالسياره مره ثانيه واتصل موبايله رجع فتح خط وصوت السبايكر مفتوح هو اصلا موبايله عطلان ومكسر الا يفتح السماعه

رد عليه ساهر وهو يكوله ... لك انت غبييي لو شنو انت شنو من مله ترا لعبت نفسي منك اجيبك يمين تروح يسار اخيط وتفتك شبيك انت والله اذا الزمك الا اخلي صوتك يوصل للستار

جاوبه ابويه بخوف .. شكو ساااهر اني شسويت متكلي شسويت مثل ما كتلي رحت وحجيت وياها شسوي يعني استفزتني طلعتني من طوري

ساهر بغضب عارم .. طلعتك من طورك تبلع لسانك وتنلصم احنه نريد نكسبها الصالحنه وانت تجي تخرب الاول والتالي بعد شلون تثق بيك يا حمااار هسه شلون تثق بييك لك انت شنوو اني اصلا شلون اتورط ويه واحد مثل انييي شوصيتتتك بس احجي شوصيتك احجي لا تنلصم

رد عليه ابويه بقلق .. كلت فهمها بهدوء واكسبها لصفنا حتى نخليها تتطلك من الاشتر

ساهر بسخريه .. ما شاء الله برافو وانت مثل الكديش لا فهم ولا علم رحت تركض ضربتها وصخمت الشرايع ولك انت شلون بيك بعدين ضربتها المن اخذتها ورحت بيها يالاثول وين ماخذها تريد الاشتر يشك الخلفك لو شلوون

ابوي وهو يبجي .. شسوي تورطت انتم ورطتوني هسه يذبحني هسه يموتني والله يموتني هو يوميه يوصيني ما احجي وياها كله بسببكم شلون هسه وين انطي وجهي

ساهر رد عليه .. اشمرها باي مستشفى والرقم مال السياره اشلعه وشمره من طاح حظك اكيد هسه مراقبين رقم السياره وانت تعلمت على السجون هسه يشمرونك بالسجن تعفن يا معفن

باوعتله بطرف عيني لانسان هو يهين نفسه بنفسه شلون هاين نفسه وعلى شنو ما اعرف بسبب الطمع والفلوس وصل روحه لهنا لو هاي حوبة امي الي ظلمها ودمرها ودفنها باليلة ظلمة والله ما اعرف شنو الي يخلي انسان مثله يوصل هالمرحلة من الحقارة والدناءه وعدم الإحساس والكرامة

رد عليه ابويه .. خوش يله اشوفلي مستشفى بيها حظ حتى اكدر اتخلص منها وبعدها اشلع الرقم وانهزم للعماره هناك عندي كرايبي

قفل الخط ساهر بوجهه بعد ما شبعه رزايل هو اول ما قفل الخط كال بصحكة مستهزئة ... ههه عود يريد يضحك عليه العار يريد اشمرها بالمستشفى حتى هناك يلزموني الشرطه ويسجنوني شني من ناس هاي رب مال حقاره لو اشعل العشره شمع ما يجي بعينهم عووذه مو حقه الله يگلبها بينه اذا ناس طغت

شويه ونزل وشلع الرقم مال سياره واجه شمره جوه الكشن وهو يكول .. اوووف منج انتي ما ارتاح منج الا اذا الله اخذ امانته من نعال بوجهج فد اكرهج مثل امج عار بت عار ما يجي من وراج بس المصايب من لفيتي عليه لفاني كل الفكر فكر بت فكر تف عليج مخلف جلب ولا مخلفج

ويجيك واحد ويكلك البنات رحمة وتدخل من وراهن الجنه هام استلم هاي راح تفكرني بديني من نعال على البنات صدك لو كالو هم البنات للممات هسه كون تموت واخلص بس وين عتوي بسبع ارواح فلشها الحصان وكعدت مثل المطي تزاكط

ولا جنت مهتمه الكلامه ولا حاسه بيه اني وين وهو وين الوجع جبار يوجع متت احس انفاسي طلعت هذا الحقاره العنده شنووو يدعيلي بالموت وين امي والله لو امي تشوفني هيج اتوجع تموت وياي ولا تخليني هيج هذا الانسان مو طبيعي ما يحس بوجع غيره

مد ايده بجيبه وهو يطلع جيس صغير عيونه حمر صارله يومين ما نايم حالته متبشر بخير زين اني سامعه الي يشتغلون على الحدود يشربون مخدرات حتى ما ينامون مدري شلون هيج سامعه خاصه الي يشتغلون على حدود ايران ويمشون على الجبال وتصير عندهم طاقه للسهر او هيج شي

حط بايده شويه بودره وهو يستنشق ذراتها وتعبي رئته واستوطنت جسمة رمشت بعيوني بتعب واني اباوعله هذا شلون هيج ديدمر نفسه ومن شوكت يشرب مخدرات والله حسيت من صار ما ينام ويسهر يومين حسيت بيه مو طبيعي وحالته مو طبيعيه ابد اثاري يشرب مخدرات عزااا هيج وصل بيه الحال كله بسبب تحسين وساهر

رغم حقارت ابويه بس اني حييل انقهر وانهضم من اشوفه هيج يسوي وحتى قبل ما جنت ابد ما جنت اكرهه بس كرهته من قتل امي وشفتها بعيوني شلون خله دمعتها بعينها وتبجي وتباوعلي هذا الموقف لو اموت ويدفنوني واعيش عمرين مراح انساه ولا اكدر انساه هذا المشهد ما اكدر اتخطاه بحياتي

انوب رجع اتصل مره ثانية موبايله ورجع فتح خط واجاه صوت ساهر وهو يصرررخ بيه .. لك عاااااامر هسه ترجع وتسلم نفسك اذا ما سلمت نفسك والله اسويك وذر وذر واشمرك للجلاب بسرررعه ارجع ودي للبنيه للبيت وخلي الامور طبيعيه وسلم السياره للمركز

رد عليه ابو بعصبيه.. ليش بله ممكن اعرف ليش شنو انتم تورطوني انوب تظلون تصيحون شنو زعطوط عندكم اني

ساهر بغضب .. لك بالقران تدري اذا الزمك راسك اعلكة بالتيل ترجع لو شلون ولك انت تعرفني كلش زين وتعرف تحسين خالي كلش زين فتعال ارجع احسن ما ادفنك وره السده واصكك واصك الخلفك وانت تعرف درب الصندوك

ابويه ... خوووش خووش عود راح اسلمها بس عود ليش انت مو كلت بس سولين خليها بالمستشفى واطلع بالسياره للعماره واشاع الرقم بعدين شنو الغيرك وخلاك تتراجع عن قرارك

ساهر بنفاذ الصبر .. ولك انت شلون بيك شلوون بيك السياره سيارة خالي وبلغوا عنها وعنك واخذوا خالي لان السياره ملكة افتهمت يالمطي

رد عليه ابويه... هاااا اي افتهمت يله تمام هو اني تعودت على السجون هسه راح ارجعها واطلع تحسين تدلل ابو هدى تدلل

ساهر بغضب ... العن ابووووك لابو هدى رجعها بسرررعه بسررعه

قفل الخط وهو يضحك كال .. شوف شوف شوف ماكو هيج حقاره يريد اطلع تحسين واني انسجن باع الناس شلون من دون ضمير عمي شني هيج معقوله اكو هيج بشريه استغفر الله باربي لا تؤاخذنا بما فعل السفهاء ربي لا تگلبها بينه بسبب هيج نماذج

نزل من السياره ونزلني منها يخوط بيه خوط بحيث احس كسرني تكسر وهاجت اوجاعي عليه شالني وخلاني ليوره

وخر صندوك البتيته ومددني يم الصناديق وغطاني بكواني تصير جوزيه من صوف ما اعرف شنو بس هي تكون مال مخضر

كال .. هسه تمام خليني اروح بلكي اكدر افوت من جم سيطره وانتي لا توحسين ولا تنوصين ترا محد يتاذه غيرج وهاي يمج طماطة وخيار اذا جعتي اكلي خووش شوف شكد عندي انسانيه ومن يحجن يكولن ظالمنه هو مو حقه ابو جهل يدفنجن وانت عدلات

نزل من السياره وصعد الباب قفله وساق جانت السياره تمشي بيه والجو اظلم وبارد جنت ارجف من البرد ومتغطيه بالگونيه اني شسويت بروحي شلون هيج امي ليش خلفتني ماكو هيج ظلم لعبت نفسي من روحي صدعت حتى لو اسولف سالفتي الكافر ما يصدكني هسه لو غريب بس ابويه يعني ابويه والله مدا اصدك والله حموت من القهر ومن الهم والاذيه الي دتصير ويايه

.....................................

جيهان

اني حتخبل حنجن والله ما اعرف شنو الي حيصير بيه يعني ابويه تخبل تخبل رسمي هو يخاف من الاشتر شلون جازف بروحة شلون سوه هيج

انوب اختي اختي مريضه راح يموتها والله هي عدنا ومداريها واحسها تريد تموت تغيرت حييل تغيير كل شكلها شلون بيه ياربي صبرني مدا اكدر اتحمل شلون بيه شلووون هذا تخبل وين اروح

اندك الباب حييل ركضت بسرعه فتحته شفته عمو كريم كال ... هااا جيهان شكو. ابوج شبيه صدك عود ماخذ سولين وين اخذها شبيه هذا الخبل صدك مصخها وما يستحي

بجيت بسرعه وبحسره .. شنسوي يعني والله ملينه منه ملينه تعبنه تخبل تخبل بالزايد اقبل احسن شوكت الله يخلصنه ما نعرف

تنهد وهو يكول .. كافي جيجي امسحي دموعج يعني وين يروح هسه يرجعها وغصبا عليه واني والاشتر مكاعدين والله حاصرناه بكل الاتجاهات وهسه نلكاه لا تخافين انتي بس امسحي دموعج

مسحت دموعي ورديت عليه بنحيب.. هي مريضه حييل مريضه مو مال تظل وقت طويل وياه تموت والله تموت حالتها حييل تعبانه حتى ما تكدر تمشي

رد عليه .. لا والله ما تظل لا تخافين هسه نلكاهم شبيج والله نلكاهم انتي بس امسحي دموعج واهدي

حطيت ايدي على صدري .. والله كلبي يوجعني عليها دا اريد اموت شلون هيج هجم عليها شلون اخذها انوب حتى ما تكدر تتنفس سوده عليه شلون ياربي ما اكدر اصبر والله ما اكدر اصبر

تنهد ورد عليه .. حقج والله حقج بس شنسوي لازم نصبر شويه يعني ميصير هيج انظل بس نلطم لازم نلكة فد حل حتى نلكاهم وهسه احنه سوينه كل شي والله لليل واكيد نلكاها صدكيني

بللت شفايفي وسحبت نفس وزفرته .. والله شكولك ما اعرف شكول بس اني خايفه حييل خايفه عليها هو مجرم لا انوب يروح يضربها ياذيها وانت تعوف عامر شنو

رد عليه وهو يكح كال .. اني فلاونزا اليوم والله كوه واكف اريد اوكع من طولي بس شسوي انت عزيزات عندي بنات عامر

نزلت راسي بخجل واني اجاوبه .. شكرا عمو والله ابد مقصرت اضرب ابره حتى شويه تصير زين وشرب شي دافي حليب او جاي

فرك وجهه بتوتر وهو يكول .. والله بصراحة ابوج نساني ابو الانفلونزا لا تخافين شويه واصير زين

رديت عليه... ان شاء الله يارب تصير زين

خله وراح بعد ما سلم عليه نفخت بضجر والله ابويه حتى الدنيا طلعها من عينها وخلانه حتى الشغف فقدانه من وراه عمايله وافعاله والله حتى استحي اتزوج يعني هي التتزوج غير تتباهه بابوها واهلها كدام زوجها واهلها احنه شلون وابوي هيج مفشلنه كدام عباد الله

...................

سوليين

جنت معتكفه على نفسي وارمش بعيوني احس معدتي توجعني وغثيان. وانام وارجع اكعد ولحد الان الكة نفسي نايمة بصف البتيته

فتحت عيوني واني كاره روحي صدك كرهت روحي ولعبت نفسي ابوي ليش هيج يكرهنا ليش هيج يسوي بينه شنو ذنبنا

رجعت بذاكرتي من جنت عند الاشتر واحجي وياه بصوره طبيعيه

جنت كاعده يمه واشرب الجاي حلو وهو جايه مره ما يحب الحلو درت شويه من جايي واني اكول اله .. لازم مر وحلو حتى شنو تتعادل عندك الحياة مر وحلو يوم مر يوم حلو يا حلو شنو رأيك ههههه

ضحك وهو يكرص خصري كال .. اوووف احبج من تتغزلين بيه انتي الحلوه يابه كلها تگلي حلو ما اصدكها اكول لا عادي بس انتي من تكولين حلو لا اصدك وانتعش واعيش احساس حلو

ابتسمت واني اكول ... ههههههه شهادتي من اقوى الشهادات

رد عليه وهو يعض شفته .. تدرين شنو مو المراه بالقانون والشرع شهادتها ثنين نسوان الا انتي شهادتج الوحدج تكفي يحلو انت

ضحكت بصوت عالي... ههههههههههه طبعا انت فد واحد مينكدر عليك بكل شي تفهم حتى بالغزل

رد عليه بنفي .. لا لا لحد الان اني ممتغزل بيج من نصير زوجين حقيقين راح يختلف الوضع اغازلج غصبا عنج ترضين ما ترضين

ابتسمت .. زين ممكن أسالك سؤال ؟

جاوبني وهو يخلي استكان الجاي كال .. اي ألملك اسأل تدلل انت

فركت اديه بتوتر ورديت عليه .. اريد اعرف اذا صارت عندك بنيه تحبها لو تكرهها ؟

تنهد وهو يجاوبني بلهفه .. اذا صارت عندي بنيه احطها على راسي احطها بگلبي اني اموت على الاطفال وخاصه اذا بنيه ترا البنيه الي تربيهه تربيه صالحة راح تدخل بيها الجنه

ابتسمت بفرح .. يعني ما تضوج اذا صارت عندك بنيه وتتصرف وياها مثل تصرفات ابو جهل وتدفنها بالحياة

ضحك وهو يكول .. لا بنيتي ترا اني مستحييل ااذي قطعه مني ومنج بالعكس اكبرها واربيها واسعدها وافتخر بيها وادخلها ارقى جامعه وتدلل واني الممنون اصلا

لزمت ايده بحنية كتله .. يعني انت عادي تصير عندك بنيه ما يصير عندك ولد

رد بجدية .. ولد ؟ ليش هو كل ولد زين ترا الولد مو مفخره بس اذا كبر وصار سند الاهله يعني لازم واحد يفتخر بيه وانتن بنات عامر نعم البنات معتمدات على نفسجن وتعادل الف رجال يعني الرجال مو فد شي هاي انتن بنات ومعتمدات على نفسجن وانتن لا ام ولا ابو

بللت شفايفي وجاوبته ... ابوووي ابد ما يفتخر بينه

رد عليه ببتسامة وهو يكول .. اني افتخر بيج بنيتي ولا محتاجين لفخر عامر شلنه بيه مو صح

ابتسمت ... اوووف لاااا مو صح البنيه تدور حنيه من ابوها واني فاقدتها

لزم ايدي وباسها وهو يكول .. اصيرلج ابووو

نزلت عيوني وتنهدت بحيره والم وغصه وجعت صدري

رجعت الواقعي واني اشوف الاشتر احسن بالف مره من ابوي صح هو مكعدني بنص الهتليه وبنص السرسريه وكذلك البيت مقرف وغامض عليه بس احسن من ابوي

على الاقل يحترمني ويحبني وما يغلط عليه ولا يضربني ولا يسوي اشياء اكرهها اذا يعاقبني يبوسني لان ما احب يتقرب مني

اني تايهه وضايعه ما اريد اي شي الاشتر لحد الان اشمئز منه من اتذكر وجوده بمقتل امي بمجرد وجوده هالشي يوجعني

مد راسه ابوي من السياره هو يكول .. اكلج ارجعج وتبلرين موقفي كدام الاشتر

باوعتله وهزيت راسي بقبول

تنهد وهو يكول .. شلون تخلص ما ادري انوب هاي شلون طلابه ويه الاشتر والله بتي كيفي اريد اضرب اريد اكتل شدخله هو

خله وراح ساق بسرعه مدري وين ماخذني ابو المخدرات

.................

صفاء

سمعت الاشتر زوجتة ماكو ماخذه ابوها ومهزوم هذا ابوها شنو من مله شنو من بشر ما اعرف يعني معقوله مرات افكر مو بناته بس اكو هيج حالات هواي مثل حالته ويا مكثرهن

خليت اني ورحت المصطفى مدري شبيه متخبل تعال ما تعال فرحت اله لكيته بحديقة بيتهم يشرب اركيله وعايش الجو بس مبين متعصب

سلمت عليه وكعدت يمه كتله .. شبيك خبصت الدنيا ما تكلي شتريد

رد عليه بغضب .. هاي الحقيره افيان شايفه روحها على شنو لك اريد اذلها شلون اريد اطيح حظها لك لابستني واني ممتعود وحده تلبسني بحياتي محد هيج تصرفت وياي غيرها لك شنو من مله هاي صدك ما عندها احساس

جاوبت بهدوء .. ليش شبيها شسوتلك فافي خلطه

نفخ الدخان من بين شفايفه وهو يكول... ام خلطات اكسباير شايفه روحها الططوه شحالها مسلوحة جنه زيطه

رديت عليه بضحكة .. واذا جنها زيطه انت شكو كاتل نفسك ومهتم الها

نفخ بضجر وهو يكول ..ما مهتم بس بصراحة يعني ضجت ليش هيج تتصرف هسه كون بيها حظ وبيها انوثه بيها باب وجواب جنها جبار

انوب هسه اتصل بيها ولا ترد ولا تجاوب جنها صخل اووف اذا الزمها اله انعنع ضلوعها وضلوع الخلفها ام الخلطات انوب خلطاتها تسوي حفر بالوجوه خلطه نعال

ضحكت... هههههه هسه شنو انت جايبني مناك لهنا حتى شنو تسولفلي على عبود خلطه صدك جذب عبالي عندك سالفه طاح حظك

باوعلي بغضب وهو يكول ... احترم نفسك ترا اني اكبر منك

ابتسمت .. والله صح اكبر مني بس مستحيل تسحلني وحده مثل عبود

رفع حاجب بعدم رضا وهو يكول ... اي مو انت حقك ما شايفها هاي والله اذا تعاشرها تطلعلك گرون كد ما وكحه

جاوبته ..بعد شكو كاتل نفسك اذا هيج

مسح وجهه بتوتر وهو يكول ... مو تدري شنو جانت تنصحني وخلتني ما اشرب وكالت اعلمك على الصلام وتسولف وياي ما ادري احس كلامها حلو رغم هي جذابه بس ضميرها الإسلامي مشتغل الحمدلله

يعني جانت تستمعلي وجانت تكعد ترزل وتغلط واني هم احس الحياة وياها حلوه ترا الحياة مو كلها احبك وحبني لازم اكو شغف اكو اكشن بالموضوع الحياة وياها رغم المصايب بس حلوه حبيتها

احسن من الدك والركص والفلوس اكيت بيها على الكح... يعني صرت استفاد من فلوسي

رديت عليه بترقب .. شلون تستفاد

جاوبني وهو يحك برگبته بفشلة كال ... اشتري خلطات منها واشمرهن بالزبل

ضحكت بصوت عالي وهو يخوزر بيه معاجبه الوضع عضيت شفايفي واني اكتم ضحكتي يابه هذا مصطفى بالقران يضحك

غيرت الموضوع واني اكوله .. ليش تحبني وما تحب اشتر

رد عليه .. لان هو ساس المصايب

جاوبته .. اوووه افكار ساهر لحد الان معشعشه براسك يابه هذا جذاب لا تصدكة

تنهد وهو يجر حسره كال ... مشتاق لامي تدري

رديت عليه بحسره .. روح زورها اكيد تفرح بيك وهي بقبرها

نفخ بضجر وهو يكول ... خليني بعيد عن الماضي احسن بس اكلك فافي ليش ما ترد عليه شبيها

ضحكت ..هههههههههه صدك انت مخبل لك يجوز عندها ظروف

تنهد وهو يكول .. يله راح اعذرها سبعين عذر بس مو من عوايدها يعني اذا مجاوبتني ارجع من جديد اصير اسقط خلق الله وانتم بعد بكيفكم

رديت عليه بضحكة طبعا اني من اروح يمه اشبع ضحك صدك يونس كتله ... لا يابه بس والله البنيه عندها ظروف اكيد عندها ظروف هيج سمعت من الاشتر يمكن مريضه

عدل كعدته بلهفه وهو يكول .. شنو شبيها اخذها للطبيب اخاف ابوها مياخذها شنو رايك انطيك فلوس وتنطيهن الها تروح

رديت عليه بتنهيده .. يمعود كول يا الله ترا ما صارت هاي كافي شبيك تخبلت صدك جذب كل شي ما بيها هسه ترجع تحجي وياك

جاوب بغضب .. شوكت من اموت من نعال على هالعيشه هسه اشمر روحي بالمسبح بدل ما مكابله واحرك بروحي

طبعا اني ما كتله عن سولين لان خفت الاشتر ما يقبل يوصله خبر لان هو يحجي لساهر وتحسين وامة فاني ما اريده يعرف حتى ما يجرجر كلام ويروح ينافق

شفت بنيه طلعت منهم ركزت بنظراتي عليها جانت كصيره حيل ومدبدبه بيضه معانيها حلوه بس اسنانه مخربطه تباوعلي وتبتسم وتضحك

باوعتلها صفنت شايف هذا الوجه بس وين مدا اذكر بعدها لاااا خرب هاي هديوه بت تحسين شجابها عندهم

خليت وانهزمت هاي مو راحة وخبله لان انوب تعتدي عليه خليني اشرد بروحي العزيزه احسن الي

خليت وطلعت وعفت مصطفى يدك ويلطم شلون فافي مترد عليه

افتريت من وره البيت اني راكنها بالكراج الي يم بيتهم ما اشوف الا المسدس براسي انصدمت وما تحركت كال بهدوء ... افتح باب السياره واصعد من دون اي كلام سوق وامشي بالمكان الي اكلك عليه تمام

رفعت اديه ليفوك وبعدها فتحت باب السياره ما اشوف اله انضربت بشي حاد براسي و وكعت على اثرها صرت افتح عيوني واسدها شفته دفعني وصعد هو يسوق بالسياره وبعدها اغمى عليه وفقدت الوعي

......................،

سوليين

رجع بيه وهو يمشي بطريق طوييل وكله محفر واني روحي طلعت ظليت اتقيى واني اصلا مماكله شي حسيت ضلعي دخل بكلبي صرخت بصوت ولزمت صدري حييل اخفف من الوجع الي اجتاحني

جنت احس اليوم يصير شي احس اليوم مختلف عن كل شي سيطرت عليه كابه غريبه وتجيني مثل الحاله الهستيريه ابجي واصرخ وبعدها اهدء ما اعرف شنو الي صار بيه بالضبط

بعدها حسيت بطسه شالتني وركعتني من مكاني احس ضهري انكسر صرخت بصوت عالي واني استنجد بامي ... ولج يمممه تعالي ولج يمه بعد ما اكدر اتحمل وييينج انتي تعالي يمه فدوه راااح اموت

حسيت وكفت السياره وصوت سيارات وضجة ما اعرف شنو حاولت اوكف نفسي اشوف شنو شكو زحفت بجسمي كله ومديت راسي من الحدايد الموجوده بالسياره شفت سيارات مظلله سود مطوقه المكان

مديت راسي اكثر واشوف الاشتر نزل من السياره السوده الضخمة وياه ثنين رياجيل ضخام وعمو كريم وعايد هو يمشي بخطوات كلها ثقه وحسيت السياره مالت ابويه اشتغلت مره ثانيه هو اول ما حسبيها اشتغلت

والاشتر نزل بسلاحة على السياره بحيث حسيتها كعدت والتايرات فشت بعد ابويه شلون يكدر يسوق وهي هيج صارت

مديت راسي اكثر واني ابجي ... اشتررر تعال

هو اول ما اجه فتح الباب وسحب من السياره وشمره على الارض وهو يدوس على راسه ويضرب بيه .. اليوووم اريد اذلك حقيييييير حيوووان انت شلووون هيج تسوي ولك اليوم اطلع القضى والمضى بيه

رفعه وهو يبجي يصرخ .. والله بعد ما اعيدها والله اصلا ما جنت ناوي اصلا جاي اخذها للطبيب

ضربه ببوكس ارتعبت من يمي وعمو كريم اجه لزمه وهويكوله .. اشتر عوفه خلي الحكومة هي تحاسبه

دفع عمو كريم بغضب ورد عليه .. كريم رجاءا لا تتدخل مو عود ابن عمك ابن عمك وشالتك الغيره عليه هذا فد واحد سكط عذب مرتي خبلها

وجع وهو يضرب بيه وابويه يصرخ سديت اذاني وابجي مدا اكدر استوعب الي صار شكد احس بهضم ياريت عامر مو ابوي رغم ذلاه بس احس المذله متقاسمينها سوه

عاط بيه بغضب ... وييينها احجييييي وينها

رد عليه بخوف وهو ياشر للضهر مال السياره ..وو ويه المسواك

ضربه بوكس وكعه من طوله وتفل عليه كله ...ياااا عار بنيه مريضه وبصيم حالها هيج تشمرها بالبرد بالبنيد انت شنو من مله انت شنووو ولك القتل قليل بحقك

ركض عليه وهو يفتح الباب هو يكون باب صغير مو جبير يعني للنص واصل سحبني بحذر ونزلني من السياره حضني وهو يبوس بيه ويهدي بيه واني ابجي كال ... اششش رحيق ما اخلي ياذيج هذا اني اجيت

فتحت عيوني مصدومة من كال رحيق يعني هو يشوفني رحيق

نهاية البارت ... يتبع

كونوا انتم كونوا بخير .. احبكم 💔

لا تنسون التصويت اعزائي روايتي تستحق❤️😍