رواية #وكر الأشتر الفصل السابع وأربعون 47 - بقلم الكاتبه سمو العراق

بارت 47
رواية .. وكر الاشتر
بقلمي .. نور سمو العراق

💔💔💔💔💔💔💔💔💔💔💔💔💔

-ثمة أمر لا تستطيع أن تجتازه بسهولة، ثمة شعور لا يجدي معه التغاضي، ثمة عتاب طويل في صدرك، كتمانه صعب وإفصاحه إهانة، ثمة أشياء لا تبدو بتلك البساطة

..................................

سولين

من شفته تجلت روحي بالسكينه والطمأنينة جان الامل اليه حتى اخلص بس من الوجع الوجع الي صار عندي لو غيري صار بيه جان مات بحيث اتمنى اتخلص من جزء بجسمي حتى اتخلص من هذا الوجع الي صار عندي

واول ما ذكر اسم رحيق وجان يسميني باسمها ويشوفني هي اني انغمى عليه مو غيره ولا اي شي ولا حتى صدمة وانما اني تعبت وعشت ليلة مرعبه وكلها وجع والم

ما كعدت الا واني بغرفة البيت القديم ودبة المي ارو صايره بصف الباب باوعت بارجاء الغرفه واني احلل اني وين هسه وين كاعده

اتذكرت اخر كلمة اله وجنت وياه و من حضني وضمني الصدره نطق اسم اخته المغدوره من نطق اسمها احس ضعت بهاي الدنيا مو لخاطر نفسي ضعت الخاطره يعني شلون يشوفني اني وياها نفس الظلم نفس المعاناة ونفس الآلم

رغم اني مستحييل اوصل للي وصلته رحيق مستحييل هي فقدت ابوها وامها كعدت تربي اخوانها واسرار اني غافله عنها وما اعرف شنو الصار بيها وبعد كل هذا هو الحرق الي صار بيها

حروق وصلتها للموت وانهت حياتها بحيث اني بس اتذكر ان هي ماتت محروقه احس گلبي يطلع من مكانه ودموعي تنزل لا ارادي  اتذكر اختي ومعاناتها من جانوا ينظفون حروق جسمها وشلون تنهار وتظل حتى ترجف وتبجي بصوت يوصل لعرش السما

حتى اذكر كلمتها جانت دوم تكولها من ينظفون الحرق وهي تصرخ .. ولج يمه تعالي شوفي ضيمي

جنت طفله اصغر من جيهان وجنت من اسمع صوت نحببها و وجعها جنت اختل بالغرفه وابجي واكتم صوتي نحيبي احتار شلون اطيب جرحها واطيب خاطرها وشلون ابعد الوجع عنها ابجيي وارجف عليها واتمنى اقاسمها الوجع ولا تظل هيج تبجي وتتاذه

والضاهر هو من ذكر اسم رحيق واني بحضنه هو شاف بيه رحيق وشافنه نفس الجرح ونفس الآلم

باوعت لايدي جان مشكل بيها كانوله وبطل المغذي مخلص ومنزوع من الكانوله

حسيت بيه فتح الباب رفعت عيوني وباوعتله من شفته احس الغصه كوه بلعتها بجيت بسرعه وهو بسرعه اجه عليه احتضني ويبوس بيدي ويكول .. كافي كافي اشش لا تبجين هذا اني يمج وكل شخص اذاج يتعاقب صدكيني

مسحت دموعي وشهكت .. ارييد امووت

احتضني حييل وضمني الصدره وهو يكول ... لا اسم الله عليج الموت لابوج لا تحجين هيج

مسحت خشمي ورجعت انوح .. وجع مو طبيعي برجلي كصها وذبها موتتني

مسح عليها بهدوء ورد عليه .. اسم الله لا تحجين هيج شنو نكصها حتى اتخبل قبل لا انتي تتخبلين

طلع شويه ورجع وهو جايب وياه عصاره مال اعصاب واجة اسمها Jointflex هي تخص الم المفاصل والتمزق

سحب رجلي بهدوء وخلاها بحضنها رفع ثوبي شويه وخله منها على رجلي وصار يدلكها بهدوء ويسويلها مساج احس حتى نعست من كد ما صار يدلكها بطريقه مريحة للأعصاب

رديت عليه بتعب .. فدوه والله احس ارتاحيت تعرف تدلك

باوعلي وهو يكول .. لو يعينوني هنا تلگيني اشطر خلق الله بهاي المهنه وحييل تلگيني نزيهه بشغلي

رديت عليه بغضب .. اي تموتون على النسوان

تقرب مني وحط خشمة على عنقي وهو يكول بذوبان .. لا بس انتي اموت عليج

باوعتله حجيت بسخريه .. لو تهتم بشغلك مو احسن

ضحك وهو يكول ويدلك بانسيابيه ... وشعندي غير شغلي اصلا راح ابطل من التحقيق واشتغلك بس على رجلج

ضربت ايده بغضب بعد ما تجرء وعطت بيه .. ترا لحد الركبه توجعني شكو تصعد ليفوك رد ببراءه

رد ببراءة .. زيادة الخير يا بنتي خيرين خليني اسوي مساج الجسمج كله مبين كله متعوب

غطيت نفسي ورديت عليه.. كافي يله خلصت ساعات العمل نهاية الاسبوع انطيك راتبك

جاوبني بتمسكن .. الرسول محمد صلى الله عليه واله وسلم گال .. اعطوا الاجير اجره قبل ان يجف عرقه .. صدق رسول الله فأنتي انطيني اجرتي قبل لا يجف عرق جبيني

باوعتله باستغراب وتعب .. ما عندي شي انطيك

اشر على شفايفه وهو يكول .. بوسي وهذا اجري

گلبت عيوني بملل وتنهدت .. محقق شكبرك شكدك تدور بوس

رد عليه بحب وهو يكول .. وياج اصير طفل وانسى نفسي

صفنت بوجهه جاوبته.. انت ليش تحبني

جاوبني بمراوغة .. لان تستحقين

كمل بتنهيده كال .. اني عفت العالم ينهار وراي والتجئت الضلعج انتي وجودج بالنسبة اليه طمأنينة

ظلت اباوع بعيونه وملامحي جامده بس گلبي يرجف حجيت بوجع.. من اخذتني من ابوي وحضنتني كلتلي رحيق لا تخافين اني يمج ندهت الي باسم اختك

عقد حواجبه وهو يكول .. صدك !!! اني هيج كلت

رديت عليه .. اي والله انت هيج كلت حتى اني انصدمت انت ليش تربط مصيري بمصير اختك

رفع ايدي وباسها وهو يكول .. ان شاء الله تعيشين بكد ترابها لا ما اربط مصيرج بمصيرها يَا بعد كُل هَلي و أهل الدَار
يا أول بَشر من أريد اوصفة أحتار .

ابتسمت .. شعندك اليوم تتغزل

وكف وفتح الديلاب وطلع كانوله جديده وتغاضى عن كلامي فتحها وهو يكول ...لازم اغير هاي الكانوله لان مؤته واخاف العلاج ما يمشي بيها

حطيت ايدي على صدري بخوف .. لا ما اريد اخاف ! انت مو دكتور لا تجرب بيه

ضحك وهو يكول .. لا والله اخاف مترضين جا هو منو شد هاي الكانوله ابوج العار

ضجت من غلط على ابويه مو حبا بيه بس اضوج احس نفسي مذلوله وهو حس بانزعاجي لزم ايدي بحنية وهو يكول .. لا تخافين ما اذيج ترا عندي معرفه بهاي الامور ومن ضمن دراستي

وفعلا نزعها بسهوله وما حسيت بيها

واخذ ايدي الثانيه وهو يتحسسها وبعدها ضربني ضربه قويه على ضاهر كف ايدي صرخت على اثرها جانت ضربه قويه ومباغته حتى حسيت انهضمت والدمعة لمعت بعيني لو ما شويه مريضه جان ضليت ازاكط وانطح وكسرت البيت

صرخت بوجهه بعصبية واني احجي عليه ... ليييش تضربني منو سمحلك ايدي انت شنوووو ما تحول مريضه

رد عليه وهو يدخل الكانوله بالوريد ويكول بثقه .. حتى يضهر الوريد وكذلك ما تحسين بجكة الابره

جاوبته بغضب .. اجيت تجلطني تدري لو لا

ابتسم بوجهي وهو يكول .. اسف والله بس غير لمصلحتج

ضرب بيها ابره ما عرفت هي شنو بس اكيد تخص حالتي مسكن مال التهابات مخدرات الله يعلم

كعد يمي وهو يتصل بعايد كله ... هاااا عايد يابه تعال نظف البيت وكذلك نريد غدا المره مريضه وصفاء اتصل بيه ميجاوب يمكن مخطوف

صفنت عليه يا بروده شوف شلون يحجي صدك عود انوب يكول خاف مخطوف شنو من مله هذا

سمعت عايد يكوله .. يابه ترا الله محلل الك تتزوج اربعه روح تزوج بدل ما ظال اني خدامة عندك ادري منو كلك اني ميري

باوعلي وهو يكوله .. مو هي اربعتهن من اخذ عليها يصيرن خمسه والله محلل بس اربعه وما اكدر اغضب الله

قفل الخط كتله .. صدك انت ما تعرف صفاء وين انت شلون هيج تسوي غير اخوك ليش هيج بارد من ناحيته

جاوب ببرود وهو يكول .. هو اكو غير تحسين وربعه يخطفوا وبعدين هو ما ياذوا هيج بس يهوبزون يومين ويطلعوا

رديت عليه.. وانت هيج متأكد ما ياذوا

جاوب بعدم اهتمام .. اي لان يعرفون اذا رشو بمي ارشهم بدم والعن ابو خيرهم

سكتت هو اعرف بيهم حضني وهو يهمس بحب وحنيه احس خيط جروحي

يبدو أنهُ خياط بارع
قَطَبَ جروحي بكلمة حنونة وحُضن

.......................

جيهان

اليوم فافي محتفله والله شنو ابويه انلزم وعمو كريم كال لزمناه واخذه الاشتر وين وداه الله اعلم س اكيد يادبه ويوبخة ويرجعه لا تخافون

ردت عليه افيان بصدمة .. احنه نخاف دحنه متشمتين وبنموت من الفرح

ضحك عليها وراح وهي صدك محتفله سوت كيكة بالبيت بصراحة مو كيكة عبالك عجينه تلعب النفس انوب كيكة نايمة ولا بيها نفشه ومخليه بنصها شمعه وكاعده هي وامين تدك وتركص ... هااا عليهم يعامر ها عليهم وعامر سنونه مكسره وخشمه راجع ليوره وهااا عليهم يعامر ها عليهم

ماخذه لحن مال لطميه حسينيه ومغيره الكلمات لابوها

ضربتها بالمخده .. ولج حرام عليج انتي شتخربطين خربتي ابو اللطمية

رديت عليه.. لا عيني لا حرام ولا شي الكلمات كلماتي فقط الالحان مسروقه او نكول نسخة وتقليد ماكو شي حرام

وكفت ولزمت اديه وحجت بحماس .. ولج عيني اني گلبي تدرين على شنو يرجف ؟ يرجف على الصناديگ مال المسواك الموجوده بالسياره خلي اروح اجيبهم

لزمتها وسحلتها بعضب.. عمو كريم مو كلج لا تمدين ايدج على المسواك احتمال نرجعه لاصحابه

رديت بسخريه .. يمه من عيارتج عمو كريم وهي تتخايل روحها ويه بزفه وهز اجتاف شكد بربوك انتي يمه منج

كملت كلامها وهي تكول .. وبعدين تعاي اكلج يعني احنه نعوف المسواك هيج يخيس ترا هاي نعمة الله حرام حرررررام يا ناس حسو حرام الله يگلبها بينه هاي نعمه حرام تخيس على كولة عامر هيج حق الله يكول

ضحكت كتلها .. لا عيب مدام عمو كريم كال لا يعني لا

فرفرت شفايفها وهي تكول .. تاخذ كلامه من هسه شلون زوجة مطيه قصدي مطيعه

شفت الموبايل يعلن عن وصول رساله عفتها وخليت ورحت فتحت الرساله شفتها منه كاتب .. هااا شلونج شنو مختفيه هاليام بس لا تزوجتي

رديت عليه .. هههه لا وين موجده لا تزوجت ولا شي انت ماكو

كتب.. اي والله تعذريني اهل حبيبتي عندهم مشاكل وملتهي وياهم

حطيت اديه على شفايفي وضحكت وبعدها كتبت .. يا اهل جيهان عسا ما شر ان شاء الله مبيهم شي

كتب .. لا الحمدلله ما بيهم شي قبل شويه جنت يمهم وانحلت المشكلة

رديت عليه..بوجودك اكيد

كال .. الحمدلله اي انتي شلونج وين ما وين

ابتسمت .. والله موجوده بالعراق العظيم

كتب.. هااا عبالي مسافره وخارج العراق اي سولفيلي قبل لا تدخلين علوم سياسيه وهندسة كهرباء

جاوبته بثول عوداني افتهم كل شي وفيلسوفه... هاا بصراحة اني مجنت حابه ادخل هاي الاقسام جنت اريد ادخل طب مخدرات

بسرعه هو جاوبني .. طب مخدرات !!!

ابتسمت ومكملة بكل ثقه.. اي طب مخدرات بس شنو يعني كالو خطر بستزيدين جرعة يموت المريض اثناء البنج

رد عليه وهو يضحك .. ههههههه قصدج طب تخدير بابا شنو مخدرات همزين ما دخلتي جان خليتي المرضى كلها تتطوطح

احس من الفشله العراق كله انهجم على راسي ظليت اضرب على خدودي بقهر .. عزااا عزاا يا فشلتي شسوي والله عيب شلون اركعها ما تتصلح شكلة هاي عود عساس اني دارسه وافهم كل شي واشرحله

ماكو منقذ عندي غير افيان رحت اركض عليها لكيتها منزله المسواك مالت ابويه كله انوب كله صناديگ صناديك طماطة وخيار مخضر كامل

اتغاضيت عن سوالفها وسحبتها .. ولج تعالي تعالي سويت مصيبه تعالي شوفي شخربطت

رد عليه بحماس .. هاااا كلتيله كريم اني جيهان واحبك وواااااووو  اووي واخيرا يعنري شكد فرحتلج ان شاء الله يوم عرسج

كعدت تدك وتركص .. زوجناها وخلصنه منها وبعد فافي لاصغر منها

ضربتها بغضب .. انتي يا حب يا بطيخ اكلج خبصت خربطت الدنيا عود دا اريد اكوله عاجبني ادرس طب تخدير نسيت كتله طب مخدرات

هي شو هاي وكعت بالكاع من الضحك وترافس..... ههههههههه يمه متت يمة كلبي طب مخدرات شنو ههههههه ولج انتي شنو عود مسويه روحج فد شي انوب طب مخدرات

عطت بيها بغضب .. هسه بلا ما تاكلين نعل كليلي شسوي وعيب عليج تضحكين عليه غير اني ما اعرف شسوي

وكفت وهي كاتمة ضحكتها كالت ... ههه باعي كليله اني مفعلة خاصيه التنبؤ والكيبورد يكتب غلط يعني من وحده هو يصحح الكلمة

عفتها ورحت وكتبت مثل ما كالت الي جان هو رد عليه... اييي هاي يمكن انتي كد ما تحجين بالمخدرات الكيبورد ظل يتبأ الوحده هههه

ضجت من كلامه حسيته ممصدكني عفته ورحت اريد اجرب شعور الزعل مثل افيان اريد اشوف شلون طعمة

وهم يصالحني واني اتدلع عليه ..خرررب شكد احببه

...................

جاسم

خلصت اتصال ويه رنا وانفقنه نحدد يوم للعرس بس بعد ما تخلص شغلاتها

جان ابوي كاعد وكريم وكوثر وام حسن وحنان يعني العائلة كلها متجمعه اجيت كعدت يمهم ظلينه نسولف ونضحك ما شاء الله عائلة سعيده

وحنان لحد الان راجع عندها الامل وصايره تهتم بروحها وتريد تموت على كريم من كل عقلها بس خبله ما عليها عتب خليهل تولي

ابوي حجه وياهن كلهن يله بويه كومن صبن الغدا بسرعه مو حتى صلاه صلينه وانتن بعدجن كل شي ماكو

ضحكت عمتي ام حسن وهي تكول .. لا خويه مكملين الغدا بس منتظرين انتم تحجون شوكت نصب

خلن وراحن كلهن وكوثر مشت عدل شويه ولحد الان متداوم رغم هي متخبله تريد تداوم وكل شويه ودزت ام حسن حتى تتوسط الها بس اني وكريم قفلنه عليها خليها تتأدب واحد غيرنا طيح صبغها وادبها عدل بس احنه نحول اختنا الوحيده ويتيمة وما نكدر نضغط اكثر من هيج

ابويه حجه ويه كريم بعد ما راحن كله.. شني ابن عمك عامر شبيه شسالفته شو يكولون نسيبه مدري وين اخذاه

رد عليه كريم بهدوء.. اي والله انت تعرف ابن اخوك عامر وسوالفه ضارب سولين واحتار وين يوديها لان نسيبه محذره وتالي لزمة كتله كتله مرتبه واخذه يسويلة جرة اذب ويوبخة على كولته

ابوي تنهد بحيره وهو يكول .. والله اني هذا عامر راح يخبلني مو ادمي ابد مو ادمي

كريم حجه بتنهيده .. المشكلة مو هنا المشكلة هو يشتغل يهرب اسلاح للبصره ومسويله عساس هو يبيع مخضر ومناك يهرب سلاح واذا لزموا يروح اربعه ارهاب

رد عليه ابويه وهو يكوله .. طبه مرض عساه رايح اربعه ارهاب ومفتكين منه هو من ينسجن يا الله نشوف باب الله هالحقير هذا

نفخ كريم بضجر وهو يكول ... ما اعرف يابه هو مدري شبي متخبل هو ما جان يشتغل بالممنوعات اشو هسه كلش بايع روحة صح جان مهتلف بس مو هيج هسه انجلب زياده عن اللزوم

وبعدين ذن بناته خطيه شنو ذنبهن يتحملن انسان عديم الانسانية والمسؤولية مثله وما عندهن واحد يسندهن غير رب العالمين

رد عليه ابويه وهو يكول .. الله يعينهن ان شاء الله باجر كل وحده تاخذلها رجل وتخلص يظل الضمير على هالطفل المسكين امين

بعدها صبولنه غدا وكعدنه نتغدا وشربنه جاي ومن كملنه كريم خله وراح للحلاق عنده باجر دوام لذلك راح يزين

واحنه جنه كاعدين اني وابوي وام حسن وحنان وكوثر راحن كل وحده الغرفتها

عمتي كالت لابوي ..خويه ابو كريم اني اريد احجي وياك بصراحة واريدك كون تسندني

رد عليها ابوي .. اي خويه احجي اني سندج دنيا واخره مو مال تحجين هيج كلام

تنهدت وهي تكول .. ونعم منك والله خويه ما قصرت بس اني لكيت بنيه لكريم شلون بنيه عاقله وحبابه وبنت اصول ابوها معروف بس كريم ما يقبل واني احسه يتودد الجيهان ودوم يحجي بيها

وانت يا خويه انت تعرف عامر شنو ونسبه ما يشرف مو مال نناسبه ولا ناخذ منه

وبعدين ترا جيهان ما تلوك الكريم هو وين وهي وين صح حليوه بس مشوهه وجسمها مطبوخ مو مال تضحك عليه وتخلي يتزوجها

وكوثر تكول مسويه روحها فقيره وتتدلع عليع حتى ينعجب بيها وياخذها واحنه ما نريد هيج لان الي يعيش بالحيلة يموت بالفكر

جاوبها ابوي .. خويه هذا الكلام الي حجيتي عن البنيه اعترض عليه وما اساندج بيه لان البنيه اني اعرفه صدك فقيره وما تتحيل ولا تعرف تتدلع

بس كلامج عن عامر صح ونسبه صدك ما يشرف ولا يرفع الراس وابو مشاكلاني ما اريد اي واحد من ولدي تورط وياه وحتى اخاف على كريم من يروح الهم واظل لازم كلبي بيدي لان اعرفه هذا الانسان مو ادمي ويظل ابو مشاكل ومصايب ولو تنبت نخله براسه ما اناسبه مو مال اجيب سم واسمم روحي

سكتت محجيت ورحت طلعت اني اعرف كريم يحب جيهان وابوي ما يقبل ابد يزوجة بنت عامر واذا نرجع للحقيقه هو حقه لان عامر مو ادمي وبحياته مراح يصير ادمي انوب يروح يورط كريم وهو سوالفه عاطلة وكل سوالفه حقيره انوب صار يشتغل بالممنوعات مخدرات اسلحة ومن غير قضيتة ويه مرته

بس شلون والله كريم يحبها وهي شكد يتنمرون عليها ويكولون مشوهه محتركة الله يعينها بس هو بعد عجبته واحنه ولد كهلان بينه طبيعه اذا حبينا شخص نحبه بكل سلبياته وايجابياته وعيوبه

بحيث هسه اعتقد اخوي كريم حتى ابوها عامر يحبه على محبتها هههه

....................

صفاء

فتحت عيوني ما اشوف روحي الا بكراج المن ومنو صاحبها والله ما اعرف بس عادي صارت عندي مناعه اني ابد مل اضوج من هاي السوالف لان هم يخافون من الاشتر ما يندكون بيه يجون عليه يهددونه بيه

والله ظليت كاعد بنص التايرات والسكراب مال السيارات مديت ايدي ادور على موبايلي ماكو ماخذينه عود خاف اتصل وافضحهم

رجعت بذاكرتي لايام من فتره مضت جنت اشتغل بالحفريات وقريب من منطقة جدادي القديمة

شفت جدتي وجيهه اجت من بعيد وهي لابسه عباستها وزنودها سماه حييل و وجهه عبالك وحده ارهابيه الرحمة منزوعه من وجهها جنها مرة ابو طبر تخلس

تمشي وتتبطح بمشيتها باوعتلي وجانت وياها هدى بنت تحسين

باوعتلي وهي تضحك وتحركلي بحواجبها انوب جانت بوقتها مخطوبه وترفع اصبعها وتاشرلي عود انخطبت

نزلت نفسي واني ادك بالصبه وحتى اتغاضى عنهن جانوا ولد جماعتي موجودين واكفين يمي نشتغل سوه

وهي اجت من بعيد وهي تكول ... هاااا ولك صفاء تشوف جدتك من بعيد ما تجي تسلم عليه

اني سويت روحي عود خجلان وردت اصرفها كلتلها .. هااا جده شلونج لا ما شفتج اعذريني

جان ردت عليه وهي تحجي بصوت عالي .. تعالوا شوفوا يولد هاي اني مرة جده وهو ولا جنه يعرفني العباس عليكم انتم ما شفتوني

ردوا عليها بخباثه .. لا والله شفناج وحتى هو شافج ههه

ضحكت اصرف الموقف ... ههههههه  وداعتج ما شفت عمي اعتذر منج

هدى كالت .. ها حبيبي شلونك لك عيني انخطبت رحت عليك بس مو حلو جنه صخل

ضربتها وجيهه وهي تسكتها متريدها تحجي وانوب جانت هديوه حاطه طن مكياج فوك عيونها ازرك عبالك مضروبه وبوكسيات والخدود حمرر والحلك ازبري وخالطه خلط مهرج مو مره

كالت وجيهه بخباثه .. شوفوا هذا الهسه يشوفني وما يسلم اني ربيته وكبرته وسويته زلمة وصار خلقه واخلاق ماتت امة وهو طفل واني ما خليت شي ما سويته اله

صفنت بكلامها شلون عندها هيج جرئة تجذب اتذكر من جنه صغار جانت حييل قاسيه ويانه وعازلتنه بغرفه ما بيها بنكة والصيف ميتين من الحر بحيث عبالك كاعدين بگبر وابد متقبل ناكل وياهم جانت تنطينه الفضايل

كملت كلامها وهي تكول وتاشر على رجلها .. هنا جنت انومة وجان كله گمل واكعد اطلع الگمل واكصع بيه

فتحت عيوني مصدوم من جذبها وجرئتها وحقارتها وهدى نطت من الضحك ولازمة بطنها وتضحك

و جماعتي عبالك ما كالت گمل عبالك مدري شكالت ماتوا من الضحك وظل واحد يندس بالثاني

اني اتخبلت وتجاوزت عليها .. لا ياما تستحين ولج اني ابو الگمل لو انتي جنتي تخلينه على الصوبه يفركع وترجعين تحمين خبز يا جذابه يا منافقه امشي ولي يله امشيي خبييثه حقوده من يوم يومج

راحت وهي تخوزر بيه انوب ما عاجبها الوضع

كملت ادك بالصبه وافلش بيها و واحد من جماعتنا صاح بصوت عالي .. هااا ابو الگمل

باوعتله بغضب وشمرت الهيم عليه اجه برجله وكمزت من الحفره وجيتت عليه وهو يغلط واني اغلط وصارت بالنعل وظلوا يفارغون بينه

بعدها خابرت الاشتر واني متعصب وكعدنه عند طرف ثالث حتى نعرف منو المعتدي ومنو الي لازم يعتذر للثاني ومن سولفت للاشتر عن الي صار

حط ايده على راسه بقهر .. وهسه اني جاي وكاعد بنص الشيوخ من وره الگمل صدك جذب شبيها هاي ولك ما دفعتها بحفرة الحفريات ودفنتها لو ما بيك خير اغم

رديت عليه بغضب .. شسوي اذا هي ما اعرف منين طلعتلي

تافئف بغضب وهو يكول ..بسيطة يا وجيهه العار شلون حقيره تريد تفشلك كدام ربعك بسيطه اذا ما كعدت على كلبك فلا اطلع اشتر

رجعت من ذاكرتي بعد ما انفتح باب الكراج وسمعت صوتي نسائي مو رجالي عدلت كعدتي وباوعت

شفتها عمتي ام ماهر الي اخذت مصطفى ونسبته الها

اسمعها تحجي من بعيد جانت لابسه تنورة وقميص وهي ضعيفه حييل عصاجيلها يابسه ولابسه كوستم كامل لونة تركوازي هي شكد عندها فلوس بس فكر كل ملابسها قديمة يعضهن الجلب ويعوص

وراسها متوازي السطوح مكروهها ولا تنحب

تقربت مني وهي تباوعلي بقرف وتحجي من خشمها .. هااا صفاء اشوفك بنص السكراب ليش ماما ؟

رديت عليه .. والله يا ماما الضاهر السبب منج دام شرفتينا وشفنه وجهج

رفعت حاجب وهي تضحك .. ههه صاير رجال ولسانك طولان وين جنت خانس صوت ما عندك بس حقك رافكت اخوك الاشتر  قابل شتريد تصير نبي

جاوبتها بثقه .. اخوي اشرف من عائلتكم كلها وانتم كلكم ما تسوون اضفر من اضافره وعلى العموم محتاجة شي لو شنو واصلا ليش جايبتني هنا

تقربت مني وحطت ايدها على جتفي وهي تكول .. شوف ماما مصطفى خط احمر ما اريدك تلتقي بيه ابد وخاف هالمره جبتك بنص سكراب الكراج لا المره الثانيه اجيبك بنص الگبور وادفنك وانت عدل

باوعتلها وضحكت ضحكة جانبية مستهزئة وهزيت راسي بسخريه

ابتسمت بخبث وهي تكول .. اهااا احسك ممصدك بكلامي لك اني مو هذا اخويه ساهر اني اعادله الف مره لذلك لا تلعب وياي وابتعد عن ابني مصطفى ولا تقره براسه

جاوبتها بهدوء ومن بين اسناني .. بنت وجيهه ما تصير الج جاره ولا تنسين مصطفى اخووي ومو ابنج ولا تموتين ما تكدرين تنسبينه الج لا حملتي بيه ولا جبتي ابن امي الي اخذتي غصب عنها يا جاحده

ردت باستفزاز وضحكة .. واخذته وغصبا عن الكل شفت شلوون ؟

ضحكت.. هههههه بس يجي يوم وينكرج وها ترا لا يحن عليج ولا يحبج ولا ينسى اليوم الي فرقتي بيه عن امي تمام عمتوو وها ترا اعترفلي وكال ما احبها

نفخت بعصبيه وظلت تتنفس بغضب كالت .. انت الوحيد الي ما اريدك تلتقي بيه انت ساس البله عوف ابني وبعد لا تتقرب منه انت مثل الحيه الملونه تجي بحبابه ولبابه وتقشمر عليه ومسوي روحك حنين عليه وانت من جوه الجوه تريده يعيش مثل عيشتك انت واخوك مشردييين

ابتسمت وجاوبتها .. مشردين بس مو هتليه مشردين بس مو شرابة عرك ولا سكارى مشردين بس محترمين نفسنا مشردين بس ما ندخل ملاهي مشردين بس ما همنا النسوان

شفتي الفرق بين تربية امي وتربيتج لاخوي مصطفى

فتحت عيونها متعصبه وهي تكول ..  انت حييل حقير ومنحط وما عندك احترام لا لنفسك ولا للي كدامك

رديت عليها بحده.. لا تسولفين عن الاحترام وانتي مو محترمة

باوعت للمسؤول عن الكراج وكالت اله ... طلعه من الكراج حسابي وياه بعده ممنتهي بس اريد اطيح حضه شويه وما اريد اغدر بيه

ضحكت بسخريه من كلامها

وهم طلعوني خليت ورحت جنت امشي ومستغرب من حقارتهم ولا ليش استغرب امهم وجيهه معلمتهم على كل سالفه حقيره وكل سالفه بيها اجرام ومن يردون يحجون بالدين بس هم وبس وهم احقر ما خلق ربي

حقيره تريد بكل طريقه تبعدني عن مصطفى لان حست بيه اني خطر عليها ويمكن اغيره عليها وهي دتلاحظ تغيره هالايام

وكذلك سمعت من حجيت وياه بخصوص الاشتر ولهذا السبب هي انكرصت وحست بخطر

..........................

سولين

جنت كاعده الوحدي بالغرفه وجان هو ممقصر يجيب اليه الاكل ويخليني اكل ومهتم بعلاجي بس هو يطلع ويتاخر وصفاء مموجود لذلك اني دا اضوج شويه

مشيت شويه رجلي لحد الان  تعرج وابد متحسنت فتحت الباب وطلعت برا بعد ما دفيت نفسي طلعت للباب الرئيسي وفتحته باوعت شفت صورة سوادي جانت ضوئية وكبيره حييل بحيث ماخذه نص الفرع ومسيجة بسياج من حديد وعليها ورد وشغلات حلوه

صفنت بوجهه وانرعبت والله عبالك يباوعلي عبالك ديخزر بيه بيه سديت الباب بسرعه حييل اخاف من شكلة وخاصه بعد ما شفته مشرح

ظلت عيونه تراودني وتتراولالي خفت حييل وظليت اقره ايات واسمي باسم الله

بعدته عن مخيلتي واني اتذكر شغلات صارت وياي بالماضي

اتذكرت من جنت مخبله وعصبيه وعنوديه وهسه حييل حبابه جنت حييه حييل

غسلت ملابسي وهو جان كاعد بصف التيل واني ادعي يتكهرب واخلص منه

باوعلي وهو يشتغل على الحاسبه كال .. وين رايحة

رديت من وره خشمي ... اشر هدومي يعني وين رايحة للگبور والله يا الله

جاوبني بعصبيه .. من احجي وياج بهدوء ردي بهدوء لا اكوم افلش الحاسبه على راسج

درت وجهي واني منقرفه من كلامه كمل كلامه وهو يكول .. شريهن بالحرش لا تشريهن فوك

رديت عليه بانزعاج .. تمام

خليت ومشيت صاح عليه كال .. وين رايحة

جاوبته بثقه .. اشر الملابس فووك

هو وكف وهجم عليه واني شمرت الملابس وانهزمت واني اصررخ ... يممه

ما حسيت بيه غير سحلني من كصيبتي وجراني ضرب ضهري بصدره كال وهو يهمس عند اذني .. بله عيدي شكلتي وين ترحين تشريهن

جاوبته بخوف وقلق .. بالحمام اءء لا اقصد بالهول لا لا بالحوش الحوش مالتنه صلاوات الشمس بيه عموديه بسرعه يبسن

عض جتفي وهو يكول ... يعني انتي ما تتوبين الا تتعبيني وتخليني اگوم يله ترتاحين مو جنت اشتغل ومندمج

جاوبته ببراءه .. غير اتشاقه والطف الجو حتى ارفع عندك هرمون السعاده

باس طرف اذني وهو يكول .. هرمون السعاده ما يرتفع الا اذا نمت باحضانج

ضربته على ايده بغضب .. متنام وياي متنام ما اريدك

ضحك وهو يبوس بخدي بوسات متتاليه واني ارفس برجليه وادفع بيه .. كافي هي شنو كافي ما اريد حتى ملابس بعد ما اغسل اظل كلي وسخ وخايسه

استنشق عطري وهو يكول ... ريحتج حلوه حتى لو تظلين شهر من دون سبح

جاوبته .. شلون غزل معوق

رجعت من داكرتي على صوت حس الباب وكفت بسرعه شفته دخل باوعلي وابتسم تقرب مني ولزم ايدي وهو يكول .. ها حبيبتي شو طالعه متخافين تبردين ليش تطلعين اخاف عليج تتمرضين

رديت عليه بتعب.. مليت من الوضع ومن الكعده كلت اطلع اشوف باب الله صدك بالي عند صفاء شنو ما سمعت عنه خبر

ضحك وهو يكول .. اي اكو عنه خبر ذاك اجاني للشغل كل شي ما بيه مثل الصل مو كتلج لا تخافين عليه سبع صفاء بس ذاك مصيفي شالع گلبي

تنهدت .. الحمدلله خطيه ميستاهل الي يصير بيه شلون حباب من تمرضت ما عافني ولا لحظه وكل شويه ويجيني ويسال عني صدك ماكو منه

رد عليه .. اي صفاوي حباب ان شاء الله هو الخط مالتج منا ورايح من تداومين جامعه

عقدت حواجبي بعدم قبول .. ما اداوم بهذا حالي واعرج وشكلي مبهذل

ابتسم وهو يكول .. ترا الجامعه مو استعراض المهم تدرسين وتاخذين شهاده تكون سلاح بيدج بس بصراحة اني حاليا مراعي ظروف صحتج

بللت شفافي بحيره ورديت عليه .. انت مو كلت اسولف الج عن الي صار ويه امج واني الكل حجالي وطعن بيك حتى سالي بس اني ما انطيت بيك تعرف ليش لان ردت اسمع منك بما ان سمعت كل الاطراف

رفع راسي وهو يكول .. اكيد احجيلج والله ما ظلمتها بالعكس بس ابوج هو الي ظلمها واستوثل واني لو اعرف بيه هيج ما سلمتها اله وكل شي راح تعرفين بس اخلص كم شغله عندي

ونكعد كعده على رواء نخلي فنجانين كهوه ونصفي كل الحسابات وبعدها اذا اني غلطان هم اعتذر ابوسج مناااا لما ترضين

سمعت عايد وهو يكوله ... اشترر من تشوف مرتك تنسى اكو مطي ينتظرك بالباب مو الشمس طكتني

ضحكت على كلامه ولزمت صدري وجعني

وهو صاح عليه بعصبيه ..انتظر شويه يالرقيق شصار اذا وكفت ساعتين

عايد .. يمعود مو اني بسكوته منكعه بالجاي بسرعه اموع وصرت صومالي من كد ما طكتني الشمس

ضحك وباوعلي كال .. يله الملك ادخل جوه خلي عايد يدخل لا يصكو

وصلني الباب الغرفه ويمشي بيه بحذر وعايد يصيح .. خاب شنييي اروح اجي مو طكت مرارتي رجليه لو عندهن السانات جان ظلن يصرخن من كد ما وكفت اقدم اعتذاري الرجله من كد الانتظار

عاط بيه اشتر بعصبيه وهو يكوله ... كافي شكد تلغي اجيتك

دخلني للغرفه ونومني وخله وراح

من شفته راح رجعت العادتي القديمة و وكفت واني اراقب بيه من برا شفتهم دخلوا اسلاح وعايد يكوله .. صدك تحجي انت اني وسلاحي مشتول برا صدك جذب  هيج يعني من تشوف المره تفقد

ضحك وهو يكوله .. اي طبعا تروحلها فدوه

عايد بصدمة.. شدعوووه هاي واني صديقك وتجايتك وثلثينك تبيعني لخاطر مره وسفه ويا حيف وسسسفه صداقة تالي وكت

اشتر رد عليه .. دكافي هسه شوف حصلنه هذا السلاح من عامر ويومين يومين ويعترف منين

عايد .. عامر انوب هسه تسودن مو ترك المخدرات وماكو ظل يهجم وكل شويه وفلش راسه بالحايط يريد حبوب

اشتر .. خلي يستاهل مدام بعده بالبدايه لازم يتخلص من السموم

ابتعد عن الشباك وعقدت حواجبي عنده سلاح عزاا ومخدرات هذا ابويه شديلعب شديصخم بروحة هاي حوبة امي القتلها بليلة ظلمة ما فاتت اله ان شاء الله بعد وبعد

بعدها بشويه اجو دخلو ثنين شاب وظلوا يحجون وياه ويسولفون وكل كلامهم عن تهريب السلاح والعتاد شغلتهم تخوف شو

.......................

فافي

اجت مره تشتري مني خلطه كالت .. فدوه بس كليلي تبيض تسوي الوجهه حلو وشكد المده كون يعني يومين واصير بيضه فدوه

جاوبتها بثقه .. اي لج عيني باعي انتي شكد مستعجله تصيرين بيضه هاي خلطتي مستعجله اكثر منج

اخذت ثنين منها وراحت واني كعدت اسفط بيهن واحسب بفلوسي لازم شسوي لازم اعدل الاستقبال نجيبلنه خلفة لبخ يلبخ البيت يجوز جيجي تزوج الله اعلم

والله هم خابرت نسيبي الكفو تطمنت على اختي وخليت جيجي تخابره وهم طمناها عنه الحمدلله

ظليت كاعده شويه اسمع اغاني اسمع اغنيه بالميدان يحميدان احبها هي هيوه بصراويه وتراث قديم

اجتني رساله من مصطفى صار هواي ممراسل عود يثكل الوحش هههههه والله بطران اني وين وهو وين اني ملتهيه بحميدان

والله ودا افكر ابيع المخضر مالت ابوي خاف يخيس الثلاجة ما تكفي حجيت ويه ضميري .. ابيع المسواك لو لا انصحني

رد عليه ضميري عديم الضمير وكلي .. دنجبي اكلي المسواك بس يرجع عامر ويدري بايعه المسواك يريد لهده مال فلوس

لذلك قررت اكل المسواك وما ابيعه وادلع المعده

فتحت الرساله لكيتها مكتوب ... ممكن تجيبلي فد عشرين خلطه ناوي اشتري

ابتسمت وعرفت ما عنده حجه غير ان هو يشتري خلطات رديت عليه.. اعتذر اخي خلصت احجز على الاسبوع الجاي

رد عليه بغضب ... افيان لا تضحكين عليه ولا تستهزئين عندج تبعين لو لا

كتبت بضحكة.. لا

كتب .. تمام يله مع السلامة

ضحكت ... ههههههه تعال تعال اتشاقه وياك عندي شنو انت ما تحب الشقه

رجع كتب .. عود انتي شنو زعلانه انتي مثل هذا الي يكول ضربني وبجة سبقني واشتكى انوب انتي زعلانه ومطنكره

رديت عليه .. اي لعد ليش تغلط عليه

كملت بتمسكن .. اني فافي الحفافه اخلاق وادب وبعدين يعني اني اذا اشتكيت عليك كدام ابويه مجان قصدي شي بس جان قصدي اخلص نفسي من ابويه وانت تعرف ابويه شنو

بس تفاجئت منك شلون تغلط عليه برساله صوتيه وتفشر عزاا لو تشوف من الخجل لو تشوف غطيت وجهي بشالي

ويومين مريضه لا اكل ولا اشرب عايشه على المغذيات والدموع عشره عشره متفاجئة اول مره واحد يفشر عليه ويتجاوز عليه

كلمتك جرحتي دموعي ما سكتن مهضوومة حييل انهضمت جنت ممصدكة اكول الروحي يعني صدك يعني مصطفى هيج يسوي بيه لا ممعقوله والله ممعقوله يعني ما غزرت بيه لخلطات حتى دائما اطيحله من السعر واتساهل وياه لان اخو نسيبي واني احب نسيبي تالي هيج انصدم بيك صدك نزلت من عيني

كتب .. اي بس اني انصدمت بيج انصدمت بجذبج كدام ابووج صار حلگي بعلباتي حتى حجي ما اعرف احجي ظليت مثل الواحد الي اجته طابوكة براسه وظال لا يكدر يتحرك ولا يكدر يحجي

رديت عليه والي يسمعني يبجي على حالي ... حقيييي مصطفى حقي انت لو تعرف ابويه اصلا متزعل مني ابويه عصبي نار وانت لازماي الركن شتريد يسوي يستقبلك بالاحضان يعني لازم جان هيج يصير اصلا ما لكيت غير هذا المنفذ يا عيني

جاوبني .. يله هسه نعتبر نفسنا ثنينه غلطانين وخلينا نرجع مثل قبل يعني ماكو زعل تمام عبود الاسمر

ضحكت .. هههههه تمام وباجر الخلطات يمك اذا تريد اليوم وها سولفلي بس لا رحت سكرت ورحت للملاهي بغيابي

رد عليه بسرعه .. لا لا والله ابد ما رحت من جنت احن ارجع اقره رسايلج ونصائحج ابطل

جاوبته بفخر .. اوووي فدوه الكلبي ماكو هيج انسانه مثلي كلها طاقه ايجابيه واقدم نصائح صايره ام زكي

كتبلي ... اروح فدوه لام زكي

صفنت بكلامه وانطيته اعجاب بعدها كتب .. افياااان

رديت عليه .. هاااا

كتب .. اني ما اعرف شلون اكلج بس احس بشي اتجاهج

عقجت ملامحي .. يعني شتحس تحس بيه ارهابيه لو مهربجيه اعترف

رد عليه بانزعاج .. خلي اروح اولي اتزقنب احسن الي

ضحكت وعفته براحته بس فعلا احس اكو بشي اتجاهي واعرف مصطفى مو يريد ينتقم مني لان بصراحة هو مو مال انتقام هو اصلا بس يريد يحجي وياي واني عندي خبره بالناس التغدر وتطعن ومع كل هذا ينجب ما انطي مجال

...........................

رنا

رحت لبيت جدي كهلان جانت ام حسن تريد تشتري الي ذهب فاني رحت اني وامي

جنت كاعده عندهم على القنفه ومنتظره ام حسن وكوثر يخلصن

كالت كوثر .. اني لازم اروح وياج لان اني بحكم دوامي بالجامعه اعرف بالموضه واعرف شنو الاشياء الدارجة وشنو الحلو انتن متعرفن

جاوبتها اني بغرور .. هو حتى لو انتي تعرفين بالذهب بس ما اخذ على حسب قناعتج اني اخذ حسب ذوقي وقناعتي واختلاف الاذواق لا يفسد من الود قضية

رفعت حاجب وهي تكول .. اهاا يعني هيج لعد بعد اني على شنو رايحة خو اكعد واسكت هنا شكو حاشره نفسج

جاوبتها .. لا عادي شكو بيها روحي تونسي

باوعتلي بطرف عينها وكعدت رجل على رجل زعلانه

وكفنه دنروح واتصل موبايل ام حسن هي فتحت خط وظلت تحجي بس وجهها صار اصفر وظلت تصرخ وتلطم

ركضنه عليها واحنه نهدي بيها ونريد بس نفهم السالفه ماكو لزمتها امي وهي تعيط بيها بغضب ... احجي ام حسن احجي شصاير شكوو

ردت عليها وهي تلطم كالت ..كريم كريم مفجوره عليه عبوه وما ادري بحاله

نهاية البارت .. يتبع

كونوا انتم كونوا بخير.. احبكم 💔

لا تنسوا التصويت والمشاركة بكم نكتمل ❤️

اعتذر من عدم النشر البارحة تعرفون قبل فتره توفت بنت عمتي والبارحة اربعين مالتها ورحنه للزياره الله يرحمها ويسكنها الجنه 💔