رواية #وكر الأشتر الفصل السادس وخمسون 56 - بقلم الكاتبه سمو العراق

البارت الثالث
رواية .. وكر الاشتر
بقلمي .. نور سمو العراق

💔💔💔💔💔💔💔💔💔💔💔💔

انا سندك حين ينفض الجميع يده منك، انا صوتك حين لا تقدر ان تبوح عما في قلبك ، انا معك دائما في فرحك وفي حزنك دائما انا معك لا اتخلى عنك في اخطائك حتى ان كنت غاضبه منك لا اتخلى عنك وقت حاجتك لي ، انا هنا لأجلك!

تنوية.. اعتذر عن التأخير بنات لكن صدقا اليوم احسن مسويه انجاز بظل اصعب الظروف الي حدثت الي اليوم لكن كدرت اكتب بارت🤣

مثل لعبة العراق البارحة رغم الظروف الجويه لكن فازوا❤️

........................................

صرت اله وطن وسند صرت اله ظل اجيت وياه واني اعرف العواقب وخيمة مشيت على خطاه واني كلي امل بيه وكلي فخر هو انسان يطالب حقه واني مثل المحاميه الي ادافع عنه واسنده بوكت العازه

جانت الضجة تارسه البيت والصياح مستقتلين على الفلوس ما يردونه ياخذ حقه ولا يردون يعيش بنعمة وياهم يردون يلهطون حتى ورثه واملاكة

وكفت وجيهه جانت سمينه صاحب زنود وراسها صغير ممتناسق ويه جسمها استغفر الله مو تنمر ابد بس والله هي هيج شكلها مو رحماني الله ماسخها وشايل الرحمة من وجهها

جانت تصييح وتغلط تكوله .. لو اعرف تتكاتل العشاير لو اعرف يظل واحد بالعشيره ما اخليك تاخذ فلس من فلوس الحجي وفلوس ساهر انت شنوو وتاخذ حصه انت اصلا منووو

جان كاعد بأريحية ويدخن بهدوء تفاجئت من تدخينه وبروده رغم وجود الشرطة وكذلك المبلغ بس الضاهر الاشتر معارفه هواي بحكم شغله بالجنايات وهاي السوالف

تخطى كلامها وهو يحجي ويه الضابط .. اني اريد فقط حقي من هذا البيت شنو يطلعلي اريد تطلعلي منه سهم حتى اسكن بيه اني ومدامتي

رد عليه الضابط كله .. التقسيم يكول الك اكثر من نص البيت و الهم ربع البيت

ابتسم بخبث وهو يباوع النظراتهم وردات الفعل كال .. اهااا ما شاء الله اقروا المعوذات رجاءًا لحد يحسدنا

ساهر صاح بصوت غاضب ... انت شنووو وتكعد ويانه مستحييل ما تكعد والله اريد واحد يكعد الزم رشاشتي واخرطكم خرط

اشتر باوع للضابط وهو يكول بخبث وعساس هو بريئ.. هاي شنو شو يهدد بيكم يعني معقوله اكو هيج ناس ما عندها احترام للدوله

ابتسمت على كلامه والضابط انفعل لزم مسدسه و وجهه على ساهر كله بغضب .. شنو انت اشو تهدد ما تستحي هذا حقه واذا عندك شي روح اشتكي ما عندك شي انلصم واسكت لا اخيسك بالسجون فاااهم

سكت ساهر وهو يباوع الاشتر بحقد وغضب غمزله اشتر وهو يتوعد بيه

كالت وجيهه بتمسكن للضابط .. خاله فدوه احنه بس خلينه نفهمك هو ابو مات قبل لا يموت جده يعني ما اله اي ورث هيج الشرع يكول ما اله ورث اذا الابن مات قبل ابو شلون يريد يستارثنه

جاوبها ... مسجل باسم جدي حتى استارثج حارمج هو من الورث مخلي بس اني واخواني وابنج ساهر وعماتي الي الحصه الاكبر لان اني واخوي حصتنه اكبر من حصة ابنج لان احنه ثنين وهو واحد

وبعدين بناتج ثنين واخواتي تلاثه وهم الحصه الاكبر هنا النا فسدي حلكج واسكتي وخليني محترمكم

ردت عليه بغضب وصياح .. بس هذا جدك مو ابوك ابووووك ما عنده ورث هذا ورث جدك حراام عليك انت ما تعرف بالشرع

جاوبها ببرود ... خليت الشرع الج شرعي لنفسج على راحتج

عاطت من مكانها وهي تكول .. اخلي محامي واخلي يرجع حق تحسين وبعدين لا عبالك اخليك تتهنى بورث جدك لا والف لا من باجر مخليه محامي

بنفس البرود رد عليها .. روحي خلي خمسين محامي القانون لا يحمي المغفلين بابا لذلك مراح تسفادين شي بس الخساير لان شرعا وقانونا الي حصه
الضابط كال .. اي كلام ثاني واي تعرض للمدعي الاشتر راح تنسجنون ولازم تكتبون تعهد بعدم التعرض

باوع للضابط وهو يكوله .. وكذلك قضيتي بدفع اجار كافة السنين الي طلعت منها من البيت

سااااهر وتحسين .... شنوووووووو

اشتر بسخريه .. شنو ؟ شنووو نسيتها لو شنو بابا مو اجاكم تبليغ و وقعتوا عليه اني طلعت من البيت قبل ١٧ سنه ومكاعد بالبيت اني واخوتي لذلك اريد اجار السنين الي قضيتوها وانتم ساكنين ببيتي

تحسين ... وين اكو هيج حجييي

اشتر .. اكو هيج حجي لا تغشم نفسك انت تابعت القضية وافتهمت شنو فاريد اجار السنين كلها

وجيهه بترجي ... مو راح تكعد ويانه بالبيت وتشاركنه بكل الاملاك تنازل عن حقك بالإيجار

جاوبها بنفي ..فلس واحد ما اتنازل عنه كل شي ترجعولي وانتوا الممنونين

سكتوا بعد ما كدروا يحجون شافوا الحكومة كلها ويه الاشتر والقضية منتهية الصالح زوجي من زمان لذلك ما الهم اي حق يحجون او يسون اي شغله

اخذنا تقريبا اكثر من نص البيت وهم كلهم انحصروا بزويه مثل الكلاب يستاهلون طبهم نعال

كلهم .. اليوم اريد كل اغراضكم تنشال لان بصراحة اثاثكم ما يعجبني ذوقكم زباله أريد أثث البيت على ذوقي وذوق زوجتي

وجيهه .. خليها الباجر نفرغ الك المكان الي تريده ويصير خير ان شاء الله

جاوبها.. لا بابا اليوم يعني اليوم خير الأمور عاجلها استعجلوا ومثل ما طلعتونه بليلة ظلمة ناوي هم اطلعكم بليله ظلمة

لزم ايدي وكال .. يله بويه خلينا نروح نشوفلنه مطعم نتريك بيه متنه من الجوع بسببب بيت جدو هههههههه

طلعوا الشرطة والضابط والمبلغ وخلينه ورحنه اني وياه جان لازم ايدي والجوو بارد يموت من البرد صعدنا بالسياره وشغل التدفئة لزم ايدي باسها كال ... شكرا الج لان اليوم بوجودج جانت مقابلتي لبيت جدي الطف

ابتسمت .. الطف بشنوو اصلا محجيت ولا حرف ههه

رد عليه بحب .. وجودج بصفي الطف من كل الكلام واشجع من كل شي عازمج اليوم على فطور تركي بعد طكيت فلوس فلووووس هههه

ضحكت ... صرت ملياردير اووف ابوس روحي شكد وجهي خيير عليك

جاوبني .. اي والله اول ما شفتج اخذوني بقضية كل محقق يكون بيها ينقتل لان المجرم معروف وعنده ظهر قوووي

اخر شي اخذوني محقق سري عيشوني باصعب الاماكن واصعب الظروف حتى ما انكشف حبيت هاي المهمه عشقتها وجنت فرحان بيها وفخور بنفسي واشتغلتها بكل طاقتي

ومن بعد ما صار حادث امج تقربت اكثر ومن خطبج ابو سعدون انهرت وخطبتج وهاي جانت الخطوه الثانيه بحياتي الزينه اخذتج وحققت غايتي فرحت بيج لان اني جنت عاجبتني بعدين اسولفلج موقف شفتج بيه يضحك ههه

رديت عليه بفضول .. شنو الموقف

جاوبني .. بعدين بعدين خليني اكمل من خطبتج حليت القضيه وعرفت الدليل الجنائي وترقيت على اثرها يعني هاي بس خطبتج وجهج خيير والله

وبعدها ظليت استلم قضايه سريه وطورت شغلي وتعمقت بالجنايات اكثر وصار عندي مكتب خاص بيه

غمزلي وهو يكول ....وهسه من راح يجينه نونو حلوو فتح علينه ابواب رزق وطلعت حقي من الناس الظلموني

رفعت حاجب بغضب ... شنو قصدك يعني انييي فكر وابنك هو الخييير صدك انت ما يجي بعينك اي شي

جاوبني وهو متفهمني ... عادي عادي مراح اناقش الهرمونات مشتغله عندج طول الحمل تمام يروحلج فدوه ابني

حطيت ايدي على بطني ... اسم الله اني اروحله فدوه

باوعلي بعدم رضا ...ياكل تبن اني وياه نروح فدوه ونذر للحب مالنه

ابتسمت على كلامة وصلنه للمطعم طلب فطور صباحي النه جان فد شي احب اروح وياه للمطاعم ابد ما ياخذنه مطاعم خايسه هههه

جان بوفيه مفتوح جابوا اشكال من كل شي حلو ومرتب الحمدلله اكلنه ورجعنه للشقه كال باجر نستقر هناك وعد مني ما اخليج لوحدج

...........................

جيهان

بعد ما خلصت من حفلة الخطوبه جان اسعد يوم بحياتي بس كلش يفتقر الوجود امي جنت اتمنى اشوفها بنص النسوان اتمنى تشوفني واني ببدلتي فرحانه وايدي بيد كريم

جنت الحسره متكسره بصدري اريد ابجي عليها حييل وبالي كله عندها

نمت واني ابجي عليها جانت تتمنى كل شي حلو اليه وتتمنى افرح واطلع من حالة الحزن الي اني بيها

نمت رغم فرحتي بس بداخلي حزن

شفتها بحلمي وهي تبوس بيه وتحضني كالت .. مبروك يمه اني جنت وياج جنت اباوعلج شلون تضحكين وايدج بيد كريم فرحانه جنت اني فرحانه لفرحجتج

اختج سولين اني كل يوم اسال عنها كل يوم اتطمن اروح الها كل يوم ابوس صورتها واضمها لصدري

وافيان اووف يا افيان بنيتي الوكحه توصلني اخابرها واسال عنها شلون مشتاقتلها الكعده هاي مشتاقه ابوسها واحضنها

وامين سوده عليه وليدي الصغير وحيدي ديرن بالجن عليه اخيجن مو بخير ديرن بالجن عليه من عامر

فزيت من نومي مرعوووبه رغم فرحتي بشوفة امي بس انرعبت من حجت هيج عن امين هي دا تحجي عن شي او تلمح عن وجود شي ممكن يضر امين

وكفت بسرعه شفته نايم ببراءة والطفولة تنبع من وجه بسته وغطيته شفته لازم ربع دينار بيده ابتسمت بست ايده ومسحت على راسه والدمعه بعيني

وافيان نايمة وتشخر كالعادة  ورجل بصفحة ورجل ثانيه بصفحة وضاربه الدنيا بطكاك بس هي فاهمة الحياة صح

اتصل عليه كريم فتحت عليه خط كال .. هااا حب شلونج لج تعالي شطالعه بالخطبه شنو هالجمال تشكين شك

ابتسمت على كلامة .. شكرا  عيونك الحلوه بس يعني صدك طالعه حلووه

جر نفس وزفره كال .. تدرين احلى شي عندي طلعتي هي بعرسي من اجيتي لابسه البنفسجي وشعرج المفتوح ونازل مثل خيوط الشمس جنتي مو يس حلوه جنتي احلى من الحلوه

لعنت نفسي الف مره واني اكول ليش ما خطبتها واخذتها غصبًا عنها باجر تحبك بس تتعود عليك حتى لو هي ما تحبك

بعدين طلعت الفصعونه عاشكتني وتستحي تكول وهنا جان لازم الزمج واطيحلج دك بوووس لان خليتني ادخل بطريق مو طريقي وأني ردت كل الطرق تاخذني الج

ضحكت .. هههه اليوم كلامك حلوو اني جنت احبك اجيت للعرس وشفتك تباوعلي وبيومها ذميتك ابريني الذمة كلت هذا شبي رجال ما يملي عينهم بس التراب مرته بصفه وعينه عليه

رد عليه .. ممبرية الذمة على اليوم الي عيشتيني بيه جنت الطم بصمت من وراج جنت حزين الى درجة حتى الرباط احسه خنكني

همست بحب ... احبببك

جاوبني .. عمررري .. اكلج صدك من تزوجت يعني بيوم الي اجيتي للحنه هم بجيتي

رديت عليه بصدق .. لا والله ما تذكر بجيت بالعكس جنت قويه وفرحانه بفستاني اشتراه الس نسيبي الكفو كولة فافي ههههه

ضحك .. ههههه والله ذواق نسيبج جايبلج اللون الاحبه

ظل يسولف وياي كال ... ام حسن كالت طالعه حلوه بس حنان كالت اوفر عساس هي ذواقة شفتها صفره

ضحكت .... ههههههههه خرب ضحكتني عوفها عوفها مرة ابوك خبلتها فافي

دخل ابويه للغرفه متعصب بسرعه قفلت الموبايل بوجهه كريم ابويه مرات ميستحي يغلط واني استحي من كريم اخاف يسمعه

صاح عليه كال ... جيهان تعاااي ولج سويلي جاي شلون جايب كعكات يخبلن تعاي اكلي وياي

تفاجئت من كلامة اني اكل وياه كعك هو اني شوكت كابلته واكلت كلت خليت ورحت سويت جاي ورحت يمه

جان كاعد بالكاع وفاتح علاكته يحسب بالكعكات ظمهن وخله تلاثه بالماعون

جبت الجاي خليته يمه وكعدت كال بضحكة مجاملة جذابيه ... هاج هاي كعكه شلون كعكايه تخبل كلها سمسم تلوك لهلحلك

اخذتها منه بشك وابتسمت بوجهه خليتها بالصحن وهو يكرط وومرات ينكعها بالجاي ويطلع اصوات مقززه ويسفت باستكان الجاي

كال .. اكلج باعي خلينه نتفق اني وياج من هسه خووش ؟

عقدت حواجبي .. على شنو

رد عليه.. كولي الكريم اريد اسوي العملية وذبيلج جم  دمعه وتمسكني لحد ما تتمكني وبعدين من ينطيج شلون شفتلج دكتور بمستشفى حكومي مال عمليات يسويها ببلاش وناخذ الفلوس ساعديني بيها اني كلش متضرر تدرين بيه

كال بتمسكن وهو يريد يبجي ...ابوج محتاج جم فلس مطلوب والديانة لازمين عليه الباب احسن اموت وتتيتمن عاد ساعدني بجم فلس بر الوالدين مطلوب هيج حق الله يكول

جاوبته بتردد.. تمام ان شاء الله اكوله واذا انطاني انطيك الفلوس

كعد بحماس .. لحي عليه كورعي راسي دكي ولطمي ابجي ونوحي شكي ثوبج المهم ينطيج فلوس بعد ابووج

هزيت راسي بقبول ... اي اي ان شاء الله تدلل بس خلي اشوفه احجي وياه

كمل كلامة بترغيب .. ما شايفه هذا الدكتور مو دكتور برفسور شكد مسوي عمليات مو طبيعي كلها تسولف بيه هسه اكيد يطلعج احلى من قبل يسويج مرمر مو جسم

جنت مسايرته كتله .. اي ان شاء الله شكرا الك هوايه

فتح علاكته وطلع كعكايه كال .. هاج اكلي بعد جبدي هاي ثانيه كعكايه الج شفتي شلون احبببج عزيزه انتي اعز من روحي

لويت شفايفي ممصدكته بعدها ابتسمت بوجهه مجامله وبعدها رحت نمت شكد جذاب ياربي ومنافق شلون بيه هذا متصير اله جاره ابد شلون بيه

........................

سولين

جنت كاعده اكل فراوله والاشتر مو هنا صفاء جان بغرفته طلع من الغرفه كال .. ها سولين شلونج ان شاء الله بخير

رديت عليه ببتسامة .. الحمد لله بخير تعال اكل فراوله راح تخييس حرامات

اجه كعد يمي وهو يضحك كال .. هاي شنو شو خربانه الفراوله حرامات بسرعه تفسد لازم واحد اول ميجيبها ياكلها

رديت عليه بعدم اهتمام واكل بيها ..طيبه طيبه اصلا تخبل هيج

جاوبني بقلق .. مو زين عليج

اشرت اله ممهتمة .. يمعود المعده بيها فلتر هو يصفي

دخل الاشتر كعد يمي كله صفاء .. تعال شوف مرتك تاكل فراوله خربانه اكلها مو زين تكول المعده تصفي

كعد يمي وسحب صحن الفراوله كال .. هاي شنو ولج شلون تاكليها مو زين عليج

اخذ الصحن و وكف ديريد يشمره بزبل اني ركضت وراه بسرعه لزمته من قميصه من وره ..مااا مااا جيبه اصلا اطيب من التازه

رد عليه .. ولج مو دين عليج كتلج اجيبلج احسن منه

اخذه وشمره بالزبل كعدت متعصبه وزعلانه هو شدخله معدته لو معدتي

شفته اجه شافني مطنكره كال .. هاي شني انوب هرموناتج تدور اكل تالف ترا ما صايره هاي ههه

رديت عليه .. مالك شغل لا تحجي وياي ولا احجي وياك

ضحك كال .. ميخالف هسه امشي هناك للبيت كل شي اثثته وصار تمام وصار لازم الملكة تكعد

هزيت راسي برفض ...ما اكعد بيه

باوعلي بنص عين .. جاا منو يصيح اني سندك واني بضهرك واني واني اصلري انتي بس اول يوم انوب بعتيني دمشي لج يله بسرعه

وكفت متعصبه ... راااااايحة بس زعلانة لا عبالك تمام وبعد ما اريد اي شي منك يله بااااي

رحت بدلت ورحنه اني وياه وصفاء كال بالطريق .. خطيه عايد ما قصر نظف البيت واثثه كتله المدام حامل وهو والشباب ابد ما قصروا

ضحك صفاء وهو يكول ... هههههه والله عمي ما اعرف شلون ومتحملك عايد واحد منه شرد منك من زمان على تعاملك السئ وياه

ضحك .. ههه هو يكولي ادري مرتك حامل واني انظف احس نفسي زوجة عايشه بحالة تعسف بعد عمايلك وفعايلك الشينه بيه

ابتسمت .. ههههه اي منا لمن اجيب عايد ينظف اوووف شكد مسكين جان اشتر يتعصب يفلش البيت جان اني ما انظف احلف وهو يخابر عايد ينظف الع البيت خطيه صدك عايش بحالة تعسف هههه

وصلنه للبيت دخلنه جنه ماخذين البيت كله خرررب شكد حيايه اني والاشتر حاصرينهم حصرة الجلب هههه

باوعت للبيت يجنن يلوك الوحده مثلي القنفات شنو البردات الفراش فعلا هذا البيت جا مو بيت ابو تيل كهربني الله يفلشه كون انوب صاير ركن على صورة سوادي عبالك سرداب بالنجف مو بيت وعايشه بيه اني

سدينه بابنه وكعدنه صفاء اخذله غرفه راح بيها والاشتر كال .. تعالي شوفي غرفتنا شلون حلوه

رديت عليه .. شنو راح نعيش بغرفه وحده ؟

رد بثقه ... طبعا وكذلك راح انومج بحضني كل يوم اخاف على عائلتي الصغيره اني ما اثق بهرموناتج ولا اثق باهلي

جاوبته ... عادي تمام نخلي بالنص دبة المي أرو حفاظًا على سلامتي وكذلك حفاظًا على سرقة الحقوق

غمزلي وهو يكول ..اشوفها غدرت بيج وما فادتج لازم تشوفيلج سلاح ثاني يفيدج اكثر وينقذج مني

رديت عليه بعدم اهتمام .. يمعود بعد حبلتني على شنو خايفه وادورلي سلاح فوت بزودك

ضحك بصوت عالي وهو يكول ... هههههههههههه اموت عليج من تجفصين ان شاء الله منا وهيج افوت بزودي

جاوبته بلعثمة ... مم لااا مو قصدي مرات هرمونات الحمل تخليني ما اعرف احجي بس هو فعلا يعني اني حبلت بعد من شنواخاف يله عادي تعال نايم يمي

عض شفته بحماااس وهو يكول ... اليوم مو بس انام يمج اليوم ما ادري شسوي هم ماخذ حقي وهم مرتي هرموناتها كالبه عليه وتريدني عمي والله ماكو هيج شي طلعت محظوظ

ضحكت .. بختك بهرمون الحمل

رد عليه وهو يبوس شفايفي .. خلينا نطلع برا نخبث على ساهر وامة وعايلته نسوه سهره

جاوبته بحماس .. يله عيني خلينه نشغل اغنية بيت الطرب ما خرب وخلينا ندك ونركص

جاوبني بضحكة ... لا ولج شنو كاوليه امشي اطلعي وخلي نشوف

طلعنه بالصاله صايره بنص البيت بس هي النه يعني ما يوصلون الها كعدنه شغلنه البلازما على صوت عالي وعلى فلم اكشن الاشتر متمدد ويدخن اركيله

واني مكنكة بموبايلي واتعيقل عود شنو اني مرة ابو البيت وهم كاعدين عدنا واني امره الناهيه هنا اني الشيخة وهم قنادر

صدك اكتشفت اني حيه مرقطه مو اي حيه

طلع ساهو من غرفته وهو يصيح .. هييي شنووو اليوم ما نام نصو صوت التلفيزيون

شاورت اشتر بسرعه ... عليي عليي

اخذ الريمونت وهو يضحك وعلاه اكثر

ساهر بانزعاج ... انت شنو هالخباثه عيب حتى الرسول وصه بسابع جار ما يصير هيج تاذينه كول ناس نايمة كول جيران

جاوبه الاشتر ببرود .. يابه شنسويلك ما عاجبك شيل احنه ما نسمع شنسوي نلصم الصوت لخاطر حضرة جنابك الكسيف لان ما تسمع

ساااهر ... يعنيييي شلووون ؟

رد عليه .. والله هذا الموجود

دخل الغرفته وركع الباب حييل طبه مرض هي اصلا باب غرفته هذا لو بابنه وهيج يضربه جان تعاركنه

طلعت وجيهه وهي تتبطح مثل البطه كالت ... شلووون ما ننام هاي بعدكم ما لفيتو علينه نصو صوت النعال لا اجي اكسر التلفيزيون

كعد بغضب وهو يكول .. امشي روحي واتقي شري لا افلشج وره التلفزيون

لزمته بخوف وقلق .. اشتر اسكت لا تسوي مشاكل ولا تغلط لا تسويلها سالفه

رد عليه بغضب .. دخلي تولي زيالتيش

جاوبته .. تغلط عليه  واني مربيتك وسويت رجال شكبرك وصرت بس انت وبس

رفع حاجب بعدم رضا ... اني تربيتج ؟؟؟ لو انتي تربيني اتبره من نفسي على هالتربيه الخ...

تعصبت وشدت على شفايفها كالت ... يصير خيير خوووش

ضحك بسخريه .. تهديد !! يعني مو تكولين يصير خير معناها ماكو خيير موو؟  تمام لعد روحي التسوي سوي بس وحق الهاا اذا صار شي لو يجي من الله انتم السبب بكل شي وأحملكم مسؤولية ولا عبالكم اشتر ابو عمر ١٥ سنه الي ما كدر يسوي شي لا بابا والله اندمكم وابجيكم دوم وان شاء الله يصير خير

ظلت صافنه عليه وعلى تهديده المعلن  وخلت ودخلت الغرفته وكذلك ركعت الباب حييل فلشوا بيباب غرفهم

لزمته من ايده كتله .. اشتر لا لتغلط فدوه اخاف تتعاركون هم ساهر ما يقبل واحد يغلط على امة

رد عليه بانزعاج ... دخلي يولي زبالتيش هو واهله وامة لتخافين ما يصير شي يالحلو انت

ابتسمت على كلامة ونعست رحت قبله للغرفه نمت عليها .. يله شنو هاي صدك الحياة حلوه من تكون بيها جربايه حلوه مثل هاي

شويه وهو اجه دخل نزع قميصه واجه نام بصفي وسحبني فتحت عيوني مصدومة ومتجمده هدئت نا بدرت مني اي ردة فعل باس عنقي وهو يكول .. احببج سولين انتي مثل النسمة الحلوه صافيه وتخبلين وتشجعين كذلك

ضحكت عليج من تكولين عليه عليه شلون تشجيع حلوو منج هههههه بهيج حاله راح اتفرعن والعن ابو ساهر واهل وجيهه وتحسين

درت وجهي عليه ضحكت ... ههههه اعجبك انت بس انطيني مجال حلعب بيهم لعب

كرص خدي وهو يكول .. احب طولة لسانج

كمل كلامة وهو يكول .. تدرين مره من المرات جنت معجب بيج وانتي رجعتي من المدرسه انتي وافيان  وصلتن الحد باب بيتكم

وافيان دفعتج وركضت وانتي سحبتيها من جنطتها وره ضهرها ودمغتيها على راسها وكتيلها .. ادبسز اليوم الا اموتج

وصارت الجن عركة جنت جاي العامر دخلتن وما اسمع بس الصياح والعرك وامج جانت تهدي بيجن ضحكت بيومها كلت ذن والله وكحات اني احب الوكحة تعيش احسن من الفاهيه

بس شو من اجيتي يمي صرتي دجاجة مال شركة هههه

رديت عليه بضحكة .. جنت دوم اتعارك اني وفافي وهاي من تعاركنه بالباب اتذكرها ليش لان هي شافت المسودن وركضت واني انخلست واستحيت من موقفها جان اكو شباب واكفه

طبعا هي لا تخاف من مسودن ولا تستحي من الناس بس هيج هي خبله بكيفها تتصرف

رزلتها طول الطريق ارزل بيها واهدد بيها اكول لامي عليها وهي ترد الكلام مرتين عليه تالي ضربتني واني كتلتلها بيومها هههه

عزا والله عيب  شلون جنه نتعارك بباب البيت وين جان عقلنه صدك مزعطه هههه بينا رس من بابا شويه مخبلات

حضني وهو يبتسم كال .. باجر تداومين وغصبا عليج حتى من ارجع من دوامي امر عليج اخذج تمام

رديت عليه .. ممحضره نفسي لا اعتذر

غطا راسه وهو يكول .. بالسته الكاج حاضره ولا تناقشين

كعدت بغضب وضربت ايدي على المخده .. اناقش اناقش وما اروح ما اروح

رفع البطانيه من وجهه وهو يكول .. اريد اسجلج محاضره بالموبايل اعاتبج بيها لان تعبت من الحجي حتى كل ما تتعصبين اشغلها منج حتى اخلص واخلص نفسي

اشرت على نفسي .. يعني اني لغيوه وطايحة حظ تمام حلووو من هسه اذا تطلكنة ابني اني اربي وهااا لا عبالك انت تدفع نفقه وتسلمني كامل حقوقي يالوريث الشرعي لبيت جدك يالملك وليام

ضحك وغطا راسه وشخر

فتحت عيوني مصدومة .. عزاااا هذا شوكت نام هسه جان ديحجي

حاولت اصحي .. اكعد اكعد دنحجي هاي شبييك

نفخت بضجر حقه الرجال والله كاعد بالاربعه الصبح عنده شغل وانوب رجع للبيت ياثث بيه واني فد وحده حيه بطرانه ويييع شكد مليقه عود حامل وتتعيقل عووذه شنو ممصدكة دعوفي الرجال ينام سم حتى سم

ما اجاني نوم وكفت رتبت ملابسي جبتهن من البيت بجنطة وكذلك رتبت ملابس الاشتر وبعدها رجعت نمت بصفه

....................

فافي

اليوم مصطفى ماكو هاي شنو بس لا تزوج وناوي يطلگني عزااا وين اودي جهالي احميد وزهيره منو يربيهم

كلت خلي اتصل عليه جااا شنو هو غير فاتحني بموضوع الخطوبه يعني يعتبر زوجي رسميا بس بدون عقد

شكد مضلومة اني مستغلني مصطفى شافني فقيره البزون تاكل عشاي وما احجي

اتصلت بيه جاوبني كال ... هلا بفوفايتي هسه جنتي ببالي اجيت اتصل بيج

رديت عليه.... اي واضح كلاوات كلاوات الشعب العراقي كلها وين جنت من الصبح لهسه ما تكول وين جنت شو فاتحتني بموضوع الخطوبه ونقرضت ليكون معاجبك نسبي وتراجع

عادي عيني بالناقص اصلا مو كولش موافقه عليك اني بنيه مسكينه وعلى كد حالي وانت واهلك اخاف تستغلون طيبتي الله وياك ان شاء الله تلكة احسن مني

جاوبني وهو يقاطع كلامي ... هووووب هوووب شبيج صدك جذب ما خابرتج كم ساعه سويتني بعد ما خطبج ومطلكج وماخذ الجهال صدك جذب تخبلتي

رديت عليه بغضب ... ياااا اخاف ما تقبل شحدك تاخذ الجهال الجهال عندي ما انطيهم

ضحك وهو يكول ... هههههه يله الجمعه حضري نفسج الوالده راح تجيكم تشوفج

انصدمت ... هووب هووب عود صدك تحجي يمعود وين الجمعه وانت يعني صدك فاتحت اهلك بالموضوع

جاوبني بثقه ... اي والله فاتحتهم امي ما قبلت بصراحة لان انتي اخت زوجة اخوي الاشتر بس اني اصريت

كلامة صدك فور دمي كتله ... شنووو شنوو معاجبها المدام مو شوف كول لامك ما عدنا نسوان للزواج يله باااي انوب معاجبهم صدك ما تستحون

رد عليه ... اوكفي بس احجي وياج اني تعاركت وياها وتعصبت وكلتلها لو فافي خلطه لو ما اتزوج

جاوبته بحمااااس ... اوووف اروح فدوووه الصافي فشخة وبعدين شبيها امك معاجبينها ليكون مو كد المقام ومندري برواحنه

ضحك وهو يكول .. كدها كدهاا هههههه احببج زماله

رديت عليه .. دمشي ولك لا تغلط والعباس اسوي الدم للرجاب واني فافي كلي زود وفخر اليتجاوز عليه ابيت الطابوكة براسه

دخل ابويه احتاريت شلون اقفل الموبايل صارت بيه رجفه قفلته بسرعه وهو يصيح ... ولك اميين ابن الجلب وينك

طلع امين شايل قراءته كله .. امشي روح ساعد ابو سعدون ينطيك عشر الآلف نستفاد منها

اني من كال هيج تعصبت فار الدم بجسمي كتله ... لا ما يروح ما يروح والله العب لعب تريد عشره اني انطيك

رد عليه .. خوش صارت عشرين منج عشره ومن ابو سعدون عشره الحمدلله وشكر يارب ما تنسى عبدك صدك لو كالو رزقكم في السماء وانتم لا تعلمون اجه الخير اجه الرزق

تعاركنه وياه  ردنه ما قبل اخذ امين وراح وداه يساعد ابو سعدون

متت تعصبت جيهان احت تتخربط من الخوف على امين والله بس شفت ابوي طلع لبست صايتي ورحت اركض جبت امين واجيت وتعاركت ويه ابو سعدون وحتى تفلت بوجهه

بس شفت امين انعكف وخاف ما عرفت شبيه هو خاف لان اني تعاركت ويه ابو سعدون لو خاف عليه من ابوي ما اعرف ليش انخطف لونه وضاج

حضنته وبسته نومته بحضني وجيهان غسلت وجهه وباسته انطته فلوووس

مر اليوم الحمدلله بسلام وابوي تاخر ما اجة همزين جان ابو سعدون ظل يشكي مثل العجوز المتعاركات وياها جنانينها

......................

سولين

كعدت الصبح لكيت روحي شالخه رجلي وحاطتها على خصر الاشتر بدون لا خجل ولا مستحه عزا شكد عيب هسه يكول ما صدكت نامت يمي انوب ظلت تشلخ وتملخ

شلت رجلي بسرعه وكعدت هو باوعلي بسرعه كال باسف .. ليش جنت مستمتع وتاخرت خمس دقايق لخاطر هاللقطه الرومانسية العذبه

جاوبته .. كول صباح الخير هسه وبعدين عود احجي هيج كلام وبعدين اني ما ادري رجلي هي صعدت عليك يعني مو قصدي

ضحك وهو يكول بعد ما عض شفته بسخافه.. لقطة تاريخيه لازم تتدون بالتاريخ

شتت نظري من كلامة ونظراته السخيفه ودرت وجهي كال .. يله خلي اروح الشغلي

وكفت كدامة كتله .. تخذني للجامعه

باوعلي .. انتي مو كلتي ما اروح للجامعه شغيرج هسه

جاوبته .. صوج الهرمونات

رد بضحكة ... هههه اموت على هرومانتج يله بدلي انتظرج

غسلت وبدلت خليت شويه مكياج وهو بدل وطلعت لكيت العائلة المنحطه كلها كاعده تجمع خباثة العراق

كلها تخوزر بينه جنهم ثيران مسابقة النطح

عفناهم ومشينه سمعت وجيهه تكول .. اييي يفتر بام بنطرون

هو رجع خطوات ولازم ايدي كلها .. شكلتي

ردت عليه بدون نفس.. ما كلت شي

جاوبها ... احسن ما نريد نسمع صوتج

ضحكت على كلامة وياها وهم محد حجه منهم وطلعنه وصلني للجامعه ماكو ما اعرف احد بيها كعدت اخذ محاضرات وحجيت ويه الدكاتره ما شاءالله طلعوا كلهم يعرفونه وتعاونوا ويايه شرحولي وانطوني المهمات

جان يوم حلو نوعا ما

طلعت انتظرته بالمطعم قريب من الكليه كال .. هسه جايج لو تعبانه ادزلج صفاء

رديت عليه.. لا لا تعال انت عندي ملابس ببيت ابو تيل الكهربني اريد اجيبهم وبعدين نرجع يم وجيهه السعدانة

ضحك كال .. يله تمام

انتظرته شويه واجه تغدينه بالمطعم وطلعنه رحنه للبيت ابو تيل دخلت شكد مكروه هاي البيوت تعاسه هنا خو هذا البيت شكو شي فكر صار الي بيه

اخذت ملابسي منه وشغلات محتاجتهم فتحت الباب باوعت الصورة سوادي ابتسم كتله .. الله يرحمك يارب ارتاح مني بعد ما تصبح بوجهي

دخلت شويه واندك الباب صحت بصوت دلوع  .. اشتر تعال افتح الباب ما اكدر افتحه مو اني حامل

رد عليه.. جاي هسه افتحه لحظه مو عساس انتي مفاتحته وكل شويه ورحتي تاملتي وجهي سوادي ودخلتي

ضحكت بصوت .. هههههه مزاجي ميقبل افتح لباب هالمره شسوي كله بسبب ابنك ابو هرمانات

طلع من الغرفه ونزع الجفوف البلاستيكيه ضحك وراح فتح الباب

من فتحة سمعته يحجي بحنيه وهدوء شويه واشوف اخويه امين دخل انصدمت من شفته عبالي جاي هو واخواتي

بسته وحضنته كتله ... انت ومنو جاي

رد عليه والدمعه بعينه ... لوحديي

رمشت بعيوني ممستوعبه الوضع .. شلووون ليش اجيت الوحدك وين تندل انت

جاوبني وبجة بسرعه .. عندي موضوع اريد احجي وياج

نهاية البارت .. يتبع

كونوا انتم كونوا بخير ... احبكم 💔

لا تنسوا التصويت والمشاركة بكم نكتمل❤️