رواية #وكر الأشتر الفصل الخامس وخمسون 55 - بقلم الكاتبه سمو العراق

رواية .. وكر الاشتر
البارت الثاني
بقلمي .. نور سمو العراق

💔💔💔💔💔💔💔💔💔💔💔💔

لا أعلم
ربّما يُؤلمني شيء لا أعرفه..
ربما وداع قديم لم أبكه، ربما حزن قديم لم أشكوه
ربما ذكرى استيقظَت فجأة، ربما لمس أحدهم جرحًا قديمًا
وربما مجرد ألم اعتدت عليه فأصبح يعدّني رفيقًا له
لا أعلم!".

................................................

جنت بحالة ذهول من كلامها بحيث و وكفت وكعدت بنفس اللحظه  والاشتر حسيت لونه انخطف وتوتر وجان عبالك منتظر ردة فعلي منتظر شحسوي وشنو يكون ردي

تقربت مني بفرحة وحضنتني كالت .. مبروووك يعمري والله نسيت اباركلج من فرحتي

لحظات من الصمت والشرود لفيت ايدي عليها وباعتله بملامح جامده وما تعبر عن شي وهو نظراته جانت كلها حزن ويأس

ابتعدت عني كالت بمرح وهي تباوعله .. يعني اذا اجت بنيه تسموها على اسمي تمام

ابتسم بوجهها كلها .. تمام تمام

بلعت ريكي وحجيت بهدوء .. من رخصتج حبيبتي هسه اجي

عفتها ورحت دخلت للغرفه سحبت نفس جنت احس نفسي مخنوكة احس نفسي مجامعه شتاتي

تنفسي سريع اديه ترجف ترجف ما اعرف شنو الي صار بيه ولا اعرف شنو الاحساس الي دا اعيشه حاليا شنو شبيه اني

حطيت ايدي على بطني احس خليتها على جبل مو على بطني احس بشي ما اعرف شنووو اني يعني من بعد كل الي صار احمل ابن الاشتر ببطني !

ابتسمت من بين افكاري رمشت بعيوني ممستوعبه الي ديصير حااامل اني حامل معقووله يعني اعيش حياة الامومه

ضحكت بسرعه بعيدا عن كل شي بعيدا عن حياتي عن كل وجع حسيت بيه بس هذا الشي احسه مثل البلسم الي شافه كل جرح بيه وطيب كل خاطر مكسور بداخلي

مثل السحر شي عجييب وكأن من بعد ما استوعبت حملي احس اني ملكت الدنيا احسني فخوره بنفسي ولو هو مو انجاز بس هيج جان احساسي

لان أحساس الامومه غير ياخذ العالم ثاني يارب يرزق كل محروم ويرزق كل الناس بالذريه الصالحة

مزاجي يتغير كل ثانيه تعصبت فجأة .. يا حقيير يا اشتر يا متستحي يعرف بيه حامل وما يحجي هو وصفاء عود ليش ما يحجون ليكون ما عاجبهم اخلف الهم عشتووو

بسيطه تروح زينب لو متروح اليوم اهجم اليوم افلش البيت على راسهم لعد ما يكولون اني حامل يمكن يردون يوكعونه بس ليش هيج يتعاملون وياي خرب ولا عندي حظ ويه العالم حتى انت صفيه طلعت خبل مثل اخوك

عدلت نفسي وطلعت من الغرفه رجعت كعدت ابتسمت بوجههم بتوتر هو جان يباوعلي مثل الخايف مدري شبي حتى خلسني

كالت ... اني لازم اروح اليوم عازمة صديقتي ولازم اروح اخاف توصل قبلي عيب منها هههه

وكف هو واخذ سويج السياره كلها .. يله خليني اوصلج

بهالاثناء دخل صفاء سلم علينه والتهه  صفاء يحجي ويه اخته

لزمت ايد الاشتر وهمست ... لا تروح عندي موضوع وياك

باوعلي وبلع ريكة كال .. صفاء وصل زينب اني عندي شغل مهم اليوم لو اطلع سلامات لو اقره على روحي السلام

باوعتله بحدده وزينب راحت هي وصفاء اول ما نسد الباب اني تخصرت وركزت بنظراتي عليه

وهو كذلك ما نزل نظره مني كتله ... عود عيني ليش ما تكول مدامتك حااامل شنو نيتك احجي احجي

رد عليه بهدوء .. جنتي مريضه ما ردت اشغلج

رفعت حاجب واني متخصره ... ما شاء الله عذرك اقبح من فعلك

شووف اني اعرفك اعرف شنو نيتك انت تريد توكع ابني حبيبي حتى شنو متريد تتحمل مسووليته لان انت متزوجني هيج بس تلطش بيه وباجر عكبه تزوج سالي

بس لا والف لا ..شووف شووف شلون الله فضحك الحمدلله والشكر يارب من اقرب الناس انفضحت اشكرك يارب لان طلعت حوبتي

ابني اني اربي أدلللة دلال ما اخلي بحاجة شخص مفهوم

ضحك وهو يكول ... هههه هرمونات الحمل بدت تشتغل  دام هيج تفكيرج وابنج حبيبج لعد احنه بخيير

عقدت حواجبي مستغربه... شنو قصدك ؟

تقرب مني وحضني بحب .. قصدي ما دام راضيه بالحمل اني ادللكم

حطيت ايدي على صدره ابعده عني ... انت شبييك شنو راضيه ولا تغير الموضوع وتحضن وتبوس كول ليش ما كتلي حامل

رد عليه بصدق .. والله جنت متوقع ما تقبلين بالحمل ولا تقبلين بالطفل بظل هاي الاوضاع وجنت خايف من ردة فعلج

الا شلوون ما اقبل تحملين واتبره منكم هو غير اني فرحتي انكسرت لان خايف من ردة فعلج  بس الحمدلله حاليا اني اسعد شخص بالدنيا

عقدت حواجبي بتساؤل .. بس هاي انت شنووو شو بسرعه تحبل شسالفه

رد عليه بضحكة ... مفعولي قووي بس لا تحسديني

انتبهت على نفسي هاي شبيه اني شو اجفص انوب كل سالفه شامرتها على هرمون الحمل خوش لكيتلي حايط نصيص

اخذ بيدي وكعدني واني اعرج برجلي كال بفرحة ... شنو شعورج وانتي حامل

جاوبته بتفكير .. ما ادري اني فرحانه بس احس نفسي صايره عصبيه فانت لازم تتحمل مزاجيتي وعصبيتي حتى يطلع الطفل حلو هيج الدراسات تكول

ضحك وهو يكول .. هو اني متحمل مزاجيتج قبل لا تحملين مو انوب حامل هسه لو تكولين اذبحلي عايد هم اذبحة واني الممنون

ابتسمت .. ها تمام لعد بيك امل تكون اب جيد لطفلي طبعا

باسني بهيام وهو يكول .. ابوووسج انتي وطفلج

رديت عليه واني امسح البوسه .. لا تبووس من هرمونات الحمل النسوان ما يحبن رجولتهن

رد عليه ببرود وثقه .. لا اصلا انتي تتوحمين عليه مبين عليج

رفعت حاجب .. ليش يمه انت فراوله لو برتقال

ضحك وحضني وهو فرحان وسعيد حسيت فعلا كلامة صحيح ان هو جان خايف من ردة فعلي

....................

جيهان

بعده كريم عدنا مخلصها بس حاضني كال .. انزعي حجابج اريد اشوف شعرج

هزيت راسي برفض وخوف جنت خايفه يشوف رگبتي وينقرف مني جنت حيل خايفه ومتوتره

لزم طرف الحجاب وراد يسحبه عطت بيه واني متعصبه ومتوتره صحت... لااااا عوووفه شنوو السالفه عوووف

تفاجئ من ردي ومن عصبيتي وعرف بسبب الحرگ ما نزعت حجابي

تنهد وابتعد بسرعه رجع باوعلي كال .. ليش هيج تسوين اني زوجج سترج وغطاج

جاوبته بخوف وقلق .. ما اسوي بس ما اريد انزع حجابي يعني مو اجباري هي

رفع حاجب وهو يكول ... اهااا يعني باجر عكبه اذا تزوجنه انام وياج بحجابج

تلكئت بالكلام وكل شي ضاع مني جاوبته .. شنو شبيك شنو هالكلام

رد عليه بعدم معرفه .. والله ما اعرف كولي الروحج

بللت شفايفي بحييره .. اسووي عمليه وان شاء الله نتزوج

باوعلي بذهول كال .. يعني انتي هسه ما تنزعين حجابج لان ما تردين اشوف الحرك ترا اني شايفه

وبعدين اني اذا اريد اسوي عمليه اسويها الخاطرج انتي وتددلين قبل لا نتزوج اسوي العمليه

جاوبته .. تمام وكطعها من مهري

ضحك كال .. اي مو هي سلفه واكطعها من مهرج دنجبي لج

ابتسمت على كلامة كال .. شو احسج اليوم مهمومة احجي شبيج منو مضوجج وتعلمي شنو يصير وياج كليلي صيري البلبل الفتان

ضحكت ... ههههه لا ماكو شي مبيه شي الحمدلله ليش هيج تحس

رد عليه وهو يرخي ضهره على الكرسي كال .. والله هيج حسيت وما اروح الا تسولفيلي ليش ما فتحتي خط عليه

تنهدت وجاوبته .. اني ما اريد من هسه احجي واكول اهلك واهلك وتظل تضوج مني وتكول هاي تفرق بيني وبين اهلي بس بصراحه اني احس بيت جدو عكاب ما يحبوني وحتى بيبي ام حسن وكوثر وكذلك حنان كلهم حتى جدو وليش وشنو الي اني مسويته مدا اعرف

رد عليه باستنكار .. لا مستحيل اهلي يحبونج وابوي لو ما يحبج ما قبل اخطبج

جاوبته بضحكة حزينة ... اي انت جبرته على هذا الشي اني عادي اقبل اسمع منك واقبل تبرر الهم بس الي اكدبي الكلام هو تسجيل الصوت الي سمعته

عقد حواجبه .. تسجيل صوت ؟

هزيت راسي بقبول .. اي تسجيل صوت وصلته اليه ايو واجت وكالت اهلك يحجون علينه يكولون وسخين قذرين منحطين عائلة تعبانه واصلا انتي مرفوضه عندهم بس قبلوا بيج بسبب الحاح كريم

ورغم هذا الكلام بس اني ما حجيت شي وكلت خليها تحجي لوحدها بس الي فعلني ودمرني هو كلامهم عن امي زانيه مقتولة بغسل عااار

بجيت بسرعه والعبره تكسرت بصدري حطيت اديه على وجهي واني اخفي المي ودموعي

سحبني بسرعه وحضني حييل باس راسي ورفع راسي وهو يبوس بدموعي وخدودي كال بسياسيه .. جذابه حبيبتي تريد تضوجج وتقهرج اةلان طلكتها واخذتج

هزيت راسي برفض ... لا كلامها صحيح مسجله كلام عن كوثر وهذا الي سمعته عن لسان كوثر والله

تنهد وبلل شفايفه بحيره رجع باس شفايفي كال .. بس ارجع للبيت اخليها تتصل بيج وتعتذر منج واحاسبها هيج وذيج الادبسز وما يصير خاطرج الا طيب

حطيت ايدي على شفايفه ... لااااا عموو لا تحجي شي ما اريد مشاكل

لزم ايدي حيل وعضها  وهو متعصب ... عمووو ولج شنووو والله بعد كلتي عمو الا اكص لسانج

رفعت ايدي واني اتوجع ... اااه اااه توجع توجع توبه بعد ما اعيدها

ابعد اسنانه عن ايدي وهو يباوعلي بذوبان كال .. حلووه انتي

ابتسمت ونزلت راسي

وكف وهو يعدل ملابسه كال .. يله راح اروح اني اليوم ذن الادبسزيات الا اطيح حظهن ما دام هيج سوالفهن ولحد الان مستمرات يخبثن

لزمته من قميصه برجاء ... لا لا فدووه بداعتي ربي يوفقك لا تحجي والله ما اريد مشاكل وياهن عيب من جدو هماتين هسه يكول شبسرعه نافقت بس شوف غير مره احجي الله عليك والله استحي

تنهد وحجه بهدوء .. مدام هيج عناد بيهن الاسبوع الجاي نسوي حفلة الخطوبة روحي للصالون ونسوي حفلة بالقاعه وكل شي على حسابي اسويلج احلى حفله اخليهن ينسن الخبث ويكعدن يسولفن بجمال الحفلة

حضنته من دون سابق انذار واني اضحك رديت بحماس ... احببك احببك

رفع راسي ونزل وجهه الي كال .. واني هم احببج احببج

ابتسمت .. مجنت متوقعه ولا واحد بالميه ان ممكن اني انخطب الك ووتحبني ايد مجنت اتوقع تحبني

عقد حواجبه باستغراب... لييش ما متوقعه

رفعت اكتافي بعدم معرفه ... ما اعرف بس مجنت متوقعه ابد جنت احسك خيال وحلم ومستحيل يتحقق

باسني باذاني وهو يكول .. والخيال الجنتي بيه صار واقع والحلم صار حقيقه واني هم مثل شعورج جنت عبالي تحسيني عمج ليش لحد الان اني اتكهرب من كلمة عمو لان صايره عند فوبيا من هالكلمة

ضحكت ... واني جنت احبها لان جنت خاتله وراها وما فاصحه عن مشاعري

ابتسم وباسني بس حسيته ضاج والهم دخل بدواخله بعد ما حجيت اله عن اهله

خله وراح بعد ما ودعني اول ما فتح الباب وابوي لكاه كمزت من مكاني وصرت وره الباب هو بسرعه سلم عليه وراح

ابويه دخل كال ... شني تعشه هنا اكل شرب ايي هو اني بس ظال اصرف على النسايه غضب مو نسابه الناس تستفاد من نسايتها اني اصرف عليهم

جاوبته ... لا ما اكل ولا شرب كل شي ماكووو

رد عليه .. ما انطاج فلس منا منا  والمهر ما انطاه الج ..؟بعد اني ابوج تاج راسج لازم تنطيني فلوس المهر هيج حق الله يكول

هزيت راسي برفض.. لا كل شي ما انطاني والله

رد عليه وهو يتفل عليه .. تف فكر ططوه تبجين بباب العباس امشي ولي من وجهي امشييي لا بارك الله بيجن

عفته ورحت لكيت فافي تشخر وامين نايم بصفه نمت يمهم وغطيتهم دحست روحي دحس

...........................

صفاء

اخذت اختي زينب اوصلها جانت اريحيه تسولف وتتشاقه وتضحك اني احس نفسي عنها غريب بس هي ابد ما حسستني غريب

اووف ياربي يعني معقووله هيج يصير بينه احنه اخوان بس عبالك غربه بحيث اني مستحي وخجلان وعبالك مصعد وياي بنت الجيران

كالت وهي تقطع سلسلة افكاري .. صفاء اني حبيت احجي وياك لان ما ردت اضوج اخويه اشتر واني اعرف هو شلون يضوج وينقهر علينه اني حبيت احجي وياك بموضوع اختي زهراء

باوعتلها بذهول ... ليش شبيها زهراء

جرت نفس وزفرته كالت .. متزوجة واحد هو ملازم اول بس شايف روحة شكوكي ويتعيقل وايده والضربه وياها لو تشوف تبجي على حالها وعمتي الي ربتها مالها شغل بيها وما تتدخل

وزهراء حيل مظلومة عند زوجها حابسها لا يخليها تطلع وذاك اليوم رافع عليها مسدس يريد يكتلها حيل مسترخصها ويكلها منو يطلعلج يا جلب حتى اعل ما عندج

فتحت عيوني بعصبية ومصدوم من كلامها .. زهراءاختي هيج يسوي بيها رجلها واحنه ما ندري يا وسفه ويا حيف والله ما جابته امه الي يمد ايده على اختي اليوم العن خيييره

ردت عليه وهي تحاول تهديني .. مو هيج صفاء هاي عود انت العاقل وبعدين هو هذا وراه ضهر وهو ملازم اكيد ما يخاف ومحد يكدر عليه غير الاشتر وبعدين هي عندها اطفال منه مو مال هيج نتصرف

بس اريد فديوم تروح ن الها انت واشتر ومصطفى حتى يعرف رجلها ان عندها اخوان وعندها زلم تسد عين الشمس

رديت عليها بقهر .. بسيطه بسيطة كله بسبب ساهر وتحسين الحقراء والله اذا ما كلت للاشتر وخليته يسحلهم سحل فلا اطلع صفاء

جاوبتني .. حجيت وياها ذاك اليوم وظلت تبجي وكالت خلي اشتر يجيني هو وصفاء مليت تعبت صايره خدامة عند عيالي ومحد راضي عني ولسانهم ولغلطه ودوم يعيروني باهلي

كتمت غضبي واخذت الرقم منها وصلتها ورجعت بس صدك انقهرت شلون هيج يستقري عليها وشلون يضربها وياذيها ويعيرها بوحدتها وقلة حيلتها مو هذا الاشتر سولين شكد وحيده ما عندها غير امين وهو طفل بس ما سوه بيها هيج ولا اذاها

شلون هذا يستغل كل شي الصالحة وهاي راح نرجع اختنه الثانيه ونلم شكلنا ان شاء الله ما ظل شي

..........................

فافي

محتاره يربي شسوي هذا صافي فشخة يريد يخطبني من كل عقله اكله انت سكير ما اقبل بيك يكول الشعب العراقي كله سكران

اكله انت تدور ملاهي ونسوان يكول الوطن العربي كله يحب النسوان منين ما اطلعله يطلعلي

غلست منه انوب يريد يجيب امه عزااا شوفني صورة امة اللبس شنو الشعر شنو بس لا انوب ما تقبل بيه حتى الا احرك روحي بتيزاب صدك جذب انوب ما تقبل وابنها سكير واني اتدلع عليه

خليت ورحت للسوك واشوفه واكف براس الركن كاشخ ومبدل ويلمع شحلاته يركض وراي اني ام خلطات وييع شكد تافهه

يله ميخالف وين يلكه مني مال وحلال وجمال

غلست منه ومشيت وهو اجه قريب مني كال .. افيان ممكن نحجي شويه

رديت عليه .. لا مو ممكن تدري ليش لان ما اكدر ابوي هاليام موجود واخاف يجيني يبووو غير يهجم عليه يكتلني اني وياك

رد عليه بغضب .. شحده دخلي يروح شنو واكف وياج قابل شافج تدكين وتركصيلي

هزيت ايدي .. اي هم عودها ادكلكك واركصلك ولك احجي شتريد مو شوهت ابو سمعتي واني سمعتي نظيفه فافي الحفافه على سن ورمح

رد عليه بتنهيده .. اريد اخطبج احببج يعني شلوون ما نتزوج مثلا مو حتى راح اطلع عن الطريق

جاوبته .. ما اكدر اتزوج بعدني صغيرونه ولازم اكون نفسي يله ما اريد رجال يصرف عليه

رد بقهر .. شوفي اني مية وحده تتمناني بس اني اريدج الي فلا تتعيقلين وقبلي

جاوبته بغضب .. وتقارني بالزبايل العندك انت صدك ما تستحي روووح انت طالق بااااي تم الحظر

ضحك .. هههه ولج تعالي مو هيج عليمن هالحظر ما دكليلي دتعالي خلينه نتفاهم يچبدي

رديت عليه.. ما احببك

ابتسم وهو يكول .. بس نتزوجج اعيشج ملكة

تخصرت ... يا سبحان الله مثل كلام ابوي من خطب امي

مصطفى...هههههه والله انتي ما تنكدرين انتي مشعوذه محد يكدرلج هسه كولي شوكت ناخذ موعد ونجيب الولاده

رديت عليه .. مو هسه خليني اعدل وجهي استعمل خلطتي وكذلك اشرب فيتامينات وعود تعالوا اهلا وسهلا عين غطا وعين فراش

عض شفته وهو يكول ... اوووف اذا نتزوج اسوي عليج حظر التجوال بالغرفه

باوعتله بقرف ... شكد نيتك زفره امشي روح روح تربيه ماكو ينطون صمون ما ينطون تربيه ويع

عفته ورحت وهو يذب كلام ويتغزل خبل صاير صدك يحبني دا اتخيل نفسي متزوجة وكاعده بقصرهم الفاخر وامه تعذبني واني فقيره ومسكينه ما احجي مثل سندريلا واخواته سحارات عزا شو حلوه راح اتزوجة

بس صدك اخاف امه وكحه واني فقيره ومسكينه شلون اخاف تسيطر عليه اووف هذا الفقير مظلووم

بس يالله ميخالف هي هاي الحياة الزوجيه لازم بيها سعالو يطلعن يخربنها

.........................

سولين

اني والله ضايجة لان بصراحة احس كل شي متراكم عليه جبت كتب وظليت ادرس وهو الاشتر صديقته محلله ظلت تفهم بيه وتقريني يا كثر صديقاته بس احسن من سالي بالف موه مودبه وخلوقه حييل مو مثل ذيج السعلوه

فدا اقره وهو يعني كايل للكليه اجي بس وقت الامتحانات بس شنو البيبي مضوجني احسه خبل على فافي ما اعرف شنو يريد

ماثر عليه ساعه يلطم ساعه يضحك يعني قصدي مزاجي يتغير بالدقيقة الف مره مزاج مال مخابيل

اندك الباب رحت فتحته اجت بوجهي سالي عابت الوجهه سدت نفسي من كل شي جنها بومة

دخلت بعد ما سلمت عليه كالت .. الاشتر نص ساعه ويوصل

رفعت حاجب بسخريه .. ما شاء الله حافظه المواعيد هههه

ردت عليه بثقه .. اي طبعا هسه انتي متعرفين شوكت يجي بس اني اعرف

جاوبتها بعد ما كعدت ... اوووف الحمل موتني انوب اتوحم فراوله اشتر يكول اول مره اشوف فراوله تتوحم على فراوله

غلست ما علقت على الموضوع وبعدها كالت .. اي صدك مبروك الحمل

حطيت ايدي على بطني واني ابتسم ..عمري ربي يبارك بيج يوم الج ...

كالت بقرف .. بس على العلاج الي اخذتي وعلى الصعقه الكهربائية ما اعتقد يطلع صاحي هسه يطلع خبل

ضحكت ...حبيبي وليدي ان شاء الله يطلع مثل ابو محقق مو مخبل

ردت عليه .. تدرين هو الزواج مو حلو اصلا شنو تعالي كابلي رجال وكعدي انوب تعالي خلفي هسه اني كلها تركض وراي وما اقبل باليوم يصارحوني عشره

جاوبتها...اي البنيه الشريفه مثل فرجة الاسنان ما تصلح لغير شخص واحد والبنيه الدايحة مثل فرجة الاحذيه ياهو اليجي يفرج بيها

وكفت متعصبه كالت ... شقصدج

رديت عليها باستنكار .. شبيج عيني قابل انتي دايحة مدا اقصد عليج

انفتح الباب و وكفت رديت عليه ببتسامة ... اجه ابو جهالي

باوعتلي بقرف معاجبها الوضع

فتح الباب دخل وهو شايل كارتونه مال علب فراوله كال .. جبتلج فراوله يفراوله

ابتسمت ردت اخذها منه ما قبل كال ... لا اني اشيله انتي حامل شنو قابل اني حامل ههههه

ضحكت ... ههههه شكرااا

تقربت منه وهمست بخفوت ..سالي عدنا من تروح نتعارك تمام؟

رد عليه بتساؤل .. ليش نتعارك ؟

رديت عليه ...بعدين افهمك ادخل لا تحس

ضحك عليه ودخل خله الفراوله على الميز وهي وكفت مثل السعدانع تحجي وياه وتتدلع والله شنو جايبه شغل مهم وتحقيقات اوليه ما اعرف شنو

وتتقرب منه وتتلزك نستني حتى الماده الحفظتها صبرت نفس ما اطردها

بعد ما طلعت من البيت وانطته كافة المعلومات وهو جان متفاعل وياها ويسألها

اول ما نسد الباب كتله ...اي تعرف حتى الوقت سالي خانوم

ضحك كال ... اي طبعا غير زميلتي بالشغل شلون ما تعرف

اخذت باكيت الفراوله ورحت دا اغسله كال .. وينج مو كلتي نتعارك

رديت عليه بملل ... خليها باجر مزاجي مدري شبي مو مال عركة

ضحك كال .. فاهم هرومانتج ودام هيج السالفه معزومة انتي الاسبوع الجاي حفلة خطوبة اختج جيهان وكريم

مديت راسي من الباب بفرحة .. صدددددك اروووح منه هسه اذا ما قبلت اتطلك

رد عليه بسرعه .. روحي عمي روحي منو كلج لا ترحين

قلصت عيوني بانزعاج .. اي تريد تخلص مني حتى تشتغل عدل انت وسالي

حط ايده على راسه .. ياربي دخيلك صبرني منا لمن تجيب اني داخل الشماعيه

جاوبته بغضب .. شقصدك اني اسوي حاله نفسيه

رد عليه ... لا عمي لا مو انتي سالي

رجعت بطمانينة ... هااا عبالي طمنتني

كال ... نروح نشتري ملابس للخطبه

رديت عليه .. نروح ليش لا انتظر بس اكل فراوله واجي

كملت اكل ورحت غسلت وبدلت رحت وياه  اشتريت ملابس واجيت جان يوم حلو

وصار يوم الخطوبه اخذني هو كبل للقاعه لان اني ما اكدر اروح للصالون ولا انتظر

جانت قاعه حلوه واختي طالعه تجنن من اجت من الصالون بستها وحضنتها وبجيت

فافي حضنتني حيييل وتبوس بيه كلتلها ... على كيفج ترا حااامل لا توكعين النونو

كمزت بفرحة كالت ... صددددك من شوووكت اوووووي راح اصير خاله افرح عيني كالت حفافه...

ظلت تهوس ... افرح يالخالتك حفافه افرح يالخالتك حفافه اهووو اهوووي كللللوش من شوكت ولج

رديت عليها بضحكة ... ههههههه من زمان صار هواي

فتحت عيونها مصدومة كالت بقهر... يمه من حقارتج عود عبالج اكلج مبروك ويتربى بدلالج لا عيني لا والف لا لج صدك ما تستحين ليش ولج ما تحجي هاي واحنه اخواتج وما ندري لو ما عادميج بخطوبة اختي جان جبتي يله درينه صدك لو كال ابو المثل ناس زاحت المستحه والله انتي حيييه ام راسلين فد حيه مشفت مثلج

ضحكت عليها .. ولج هو اني ما ادري جنت محد يعرف غير نسيبج

رفعت حاجب .. عود تحجين هيج عبالج اكرهه لا عيني لا لا كلبي لا لالا احببه لو مهما يسوي اي همزين ضم عنج لان انتي خبله مو مال واحد يكلج انتي حامل فدوه نسيبي الكفوو بس هو يفتهم

غميتها ورحت مو صاحيه رحت كعدت يم جيهان باركتلي بحملي وباستني وفرحانه عود مثل ذيج الخبله سحلتني سحل خلتني حتى ما اعرف شحجي سوادين

انوب تدك وتركص بنص العالم وتغث بيهن خوش مشتغلتهن والله خوش تسوي بيهن كفوووو من فافي الا اخطبها لحماي ههههه

اريدها تخبل العوائل مثل ما هسه خبلت اهل كريم 

صفنت على الحفله وعلى الاجواء تذكرت امي شكد جانت تتمنى تكون بمثل هيج جو شكد جانت تتمنى تشوف عمر كريم مخلي ايده بيد جيهان

سحبت نفس وزفرته الله يرحمج يا يمة الله يرحمج وينور قبرج شكد مشتاقتلج وشكد بيه حسره عليج اتمنى ازور بس قبرج حتى من قبرج انحرمنه

عضيت على شفايفي اكتم دموعي طلعت من اجواء الخطوبه واني امسح دموعي واصبر نفسي على فراكها وحسرتي عليها

.........................

وصلنا للقاعة هو نزل قبلي اجه فتحلي الباب بحماس وفرحان حيل ومد ايده الي ونزلني.

جنت مخبوصة خبص متوترة حيل رفعت راسي باوعت لعيونه جانت نظراته الي تختصر كل شي.

حبه وهيامه بيه وفرحته بهاليوم عبالك واحد منتصر بمعركة بعد اقتتال طويل وعقيم.

ابتسمت بوجهه بتوتر وهو باس راسي بوسه حنينة ودافية حيل حولت كل التوتر والرجفان الي بداخلي الئ شعور حلو ودافي.

دخلني جوه للقاعة بس ودوني لغرفة العروسة حتئ يعلموني عالمراسيم الي راح تصير واني اصلا كوة جاي استوعب.

بعدها طلعت وهو شال بيده بوكيه الورد وومشئ باتجاهي وسلمه اليه صارت دموعي تكت بلحظتها نسيت الدنيا وحسيت بس بوجوده.

دخلنه جوه للقاعة ايدي حاضنه ايده ومايلة عليه مشينا علئ طول الممشئ الي يقسم القاعة نصين ومزين بالورود البيضة والوردية الفاتح  بلون بدلتي وعلئ انغام موسيقئ تركية رومانسية.

باوعلي مبتسم واني شويه واخلي راسي علئ كتفه الي طولي يوصل اله.

رفع ذقنه ليفوك عود رافع راسه ويباوعلي يضحك
ابتسمت اله ودموعي ماكدر اسيطر عليهم بوري وانفتح

وراي خواتي فرحانات الي ويم الكوشة جانت كوثر وجهه مايكصه السيف لابسة بدلة قصيرة بيضة  ومدنفشة ومسوية تسريحة ليفوك بس نظراتها عصرت گلبي وقهرتني

اني لا مااذيتها ولا يوم حاجيه عليها مادري ليش هالكره هذا الي بكلبها ناحيتي.

تذكرت تسجيل  الصوت الي سمعته الي ايو موووكته هسه اتذكر سوالف فاشلة خليني ووي فرحتي يربي مشاعري مخربطة ولا اكدر ماافكر واحسب وتجي علئ بالي شغلات موو وكتهه هسه.

حنان وام حسن واكفات علئ صفحة وهمينه ضايجات ومطنكرات حتئ لا صفگة ولا هلهوولة وينططن بعيونهن.

عبالهن من يسوون هيج يخربن فرحتي صح انقهرت مامرغوب بيه بيناتهن بس ايد كريم الي تشد علئ ايدي بلحظتها تنسيني كل تصرفاتهن.

كعدنا بالكوشا قرب شفايفه يم اذني وهمس
الي وياه الگمر ماعليه بالنجوم.

باوعتله مستغربة شلون قرا افكاري شلون حس بيه
هو غمزلي وابتسم بمكر

واني رديتله نصف  الابتسامة مصدومة

لزم ايدي قووي وباسهه بحرارة ونزلني برشافة
حتئ  نركص جان عبالك طاير ومالك الدنيا.

فكرت بالمثل الي همسه بي الي قبل شويه
وفعلا ليش اهتم الهم عساهم مافرحوا خليني افكر بنفسي شويه.

وصار لازم ايدي ورافعها ويركصني واني خجلانة حيل
اجتي فافي همست باذني ولج هاي فرصتج يله حرگيهن حرگ كافي بچي عبري عن فرحتج بطريقة ثانية غير العوي.

ضحكت بصوت عالي وهو قرب يمي بفضول
كال شبيهه ام اللسان شتكولج.

تقربت يمه بدلع و انطلقت بالركص علئ اغنية حسام نسمع احلئ هلهولة للغالي الحلو طوله الف مبروك كولوله
الف مبروك يالغالي .

جنت اغني بالاغنيه واضحك وااشر عليه بخطوات هادئة وهو فرحان ويحضني يوبوسني

كالت رنا .. يمه فدوه باع كريم شلون فرحان مو مثل من  خطب ايو وجهه يلطم وخجلان ومستحي هسه يركص ويحضن ويبوس

ابتسمت بخجل على كلامها وفعلا هو الغالي الحلو طوله

........................

سولين

بعد ما رجعت من الخطوبه دخلت بنومة عميقه ما كدرت اكعد منها الا ثاني يوم الصبح على لمسات وهمسات من الاشتر

باوعتله بذهول لزم ايدي حييل وعصرها كال برجاء ... اريدج سنند

عدلت كعدتي وبعدت الفراش مني كتله باستغراب ... ليش شكوو صاير شي تدلل اصيرلك سند

تنهد وهو يكول .. اليوم اواجة بيت ساهر اليوم ارجع حقي اليوم اني مرجع املاكي كلها اريدج وياي تقويني واقويج

بللت شفايفي بحيره ... انت تدلل بس شلون ما اعرف شلون اساعدك

تنهد وهو يكول ... راح نعيش بذاك القصر نكعد باملاكنا ببيوتنا وحلالنا نواجهم وما نخليهم يتنعمون باملاكنا الساكت عن الحق شيطان اخرس واني سكتت عن حقي هواي

واليوم رجعلي حقي اليوم اني انافسهم بكل شبر يملكونه ازالة الشيوع الصالحي والدولة واكفه بصفي واليوم يطلع وياي جيش كامل حتى ارجع حقي

بس كل ذول مو مهمين عندي صح هم قوه بس اني قوتي تقوه بيج واريدج وياي تعيشين وياي هناك و وعد مني شاربي ازينه اذا خليت واحد منهم يتقرب منج وياذيج

رجفت ايدي بخوف وقلق وبلعت ريكي .. اسندك اني بس ما عندي قوه للمواجة

رد عليه .. ما تواجهيين انتي بس اوكفي بظهري واني بالمقدمة بس لا تعوفيني اريدج وياي

ابتسمت بوجهه وخليت ايدي على خده كتله ..اني وياك لا تخاف

وكفت غسلت وجهي واسناني بدلت ولبست حجابي لزمت ايده وسندته مشيت وياه واريده ياخذ حقه واني وياه

ابتسمت بوجهه اطمنه واقوي رفع ايدي وباسها ركبنه بالسياره جان لابس اسود ومسدسه بحزامة خفت من المسدس اخاف يتعارك ويطكله واحد طلقه

وصلنه ونشوف صدك الشرطة والسيارات مطوقه المكان

نزلنه من السياره هو لزم ايدي ومشينه دخلنه للبيت جان موجود المحامي والمبلغ وضابط كذلك

باوعت بارجاء البيت جان مو عبالك بيت لا قليل بحقة كلمة قصر الاثاث الجمال المساحة ولمعة كل شي بهرني واثار جنوني

حتى اني نسيت الي صار ونسيت الشرطة ونسيت ساهر وتحسين وامهم وانذهلت بالمكان

فزيت على صوت وجيهه وهي تصيييح ... مالك حصه ويااااانه اطلع اطلع مناااا

سحب ايدي وكعد على القنفه الفاخره وكعدني كلها .. احترمي نفسج واحترمي مالك هذا البيت الي هو اني انتي مو شريكة بالورث بس ابنج شريك فانلصمي احسن الج

اشر للمحامي والمبلغ وهو يكوله ... فهمهما شلون هي مطروده من الورث وكذلك فهمها جدي شلون حرمها من كل شي

هي ظلت تلطم وتصرخ وتحسين يصيح وساهر خبص الدنيا خبص

همست بخووف .. ذوووله وحوش

ابتسم ابتسامة جانبية كال .. وحوش واحنه بغابه بس خليج قووويه

باوعتله بثقه كتله ببتسامة حلوه ...اذا انفرض علينا نعيش بالغابات فراح نكون أسودها .!!

نهاية البارت ... يتبع

كونوا انتم كونوا بخير ... احبكم 💔

لا تنسوا التصويت والمشاركة احبتي بكم نكتمل 😍

......................

اي