رواية #وكر الأشتر الفصل الثاني والعشرون 22 - بقلم الكاتبه سمو العراق

البارت الواحد والعشرين
رواية.. وكر الاشتر
بقلمي.. نور سمو العراق

💔💔💔💔💔💔💔💔💔💔💔💔

ڪن قويآ وآياك آن تنحني مهما كآن آلآمر؟

فربمآ لن تآتيك آلفرصه كي ترفع رآسڪ مجددآ "

#الاشتر

..............................

جيهان

الي يكدر يغير مجريات الاحداث والي يكدر يوكف بوجهه المستحيل هذا انسان جريئ وانسان شجاع

والانسان الشجاع ياخذك للنجوم والجبان ياخذك للموت فديروا بالكم ترتبطون بانسان جبان بقراراته بشغله بكلمته بوعوده بعهوده

ابويه اعتبره جبان دوم ياخذنه للموت واسهل طريقه اله  ياخذنة بيها للهاويه ...رجل اختي شجاع اخذ بيدنه للنجوم اي دا احس من خربت الخطوبه احس صعدت للسما من كبر فرحتي

والمره لازم يكون بظهرها رجال قوي مو شرط قوي بنية وهيئة لااا قوي باسلوبه بشخصيته شلون يوفر لقمة عيش وما يخليج بعازه هاي بحدها شجاعه

اذا ياخذ حقج من عيون الي ظلموج هاي اكبر شجاعه والي ما يرضا عليج بالباطل هاي شجاعه مو مهم ان نتزوج بعمر معين المهم نتزوج الشخص الصح حتى ما نوكع بنفس وكعة امي وحتى وان كان الزواج قسمه ونصيب عدنا عقل ونعرف شلون نفكر بيه واذا اشوف هذا الرجال مو صالح للزواج اتركة ولا اظلم نفسي واظلم ويايه طفل من نسله

بعد ما حجت المره الابويه الكلام ان ماكو خطوبه احس مثل المي البارد نزل على صدري حسيت براحة مو طبيعيه

بس ابويه تخبل كلها بغضب ... ليش ؟ شنو ؟ شكوو شصار احنه البارحة حبايب وتردون النسب ليوم شغيركم منو قاري براسكم على سمعتنه

جاوبته المره الضخمة بغضب ... عمي كفنا شرك طالبنه بطلابه ما نريد نناسبك انتم ناس اهل مشاكل هدو علينه ربعك زين وخلصنا رواحنا

لطم على راسه وهو يصيح .. هو اني منيلي ربع الله اكبر هو بس ابو سعدوه ورجليه بلاتين حتى ما بيه حيل هده

ردت عليه وملامح الغضب اعتلتها ... رجل بتك هذا ابو طبره اجانه وكال بصريح العباره انتم منهيين والبنيه اذا تقربتوا منها تصير بالتفگ

فتح عيونه مصدوم .. وهو شعليه ابن عمها ابن خالها شدخله اموت واعرف شدخله بتي واني حر بيها عسا ما انطيها للجلاب السايبه شله دخل

جاوبته ورفعت اصبعها بتهديد .. كعد وگال خطبه ماكو واني كاعد بالركن واريد واحد يتقرب اترس حلگة رصاص نسبكم ما يشرف البنيه صغيره وابنكم شايب ومطلك وابوها خبل

لطم على صدره بغضب وهو يصيح صوت بالسما وصوت بالارض ... اني خببببل اني بسيييطه يالاشتر بسييييطه

جر نفس وهو يحجي وياها ... والله انتم جبناء وما بيكم حظ ما تجون تخطبون والله شنو هددكم نسيبي ؟

عاطت بيه بغضب وهي تحط ايدها بوجهه... عمي نخااااف هو نسيبك ينجرع

صفك ايد بيد وهو يرد عليها ... يا وسفه ويا حيف يا وسفه ويا حيف محظر روحي وجايب اشكال والوان للخطوبه  ومحظر وادم وانوب دكولون الخطوبه ما تتم والله شنو مهددكم نسيبي هييي يا الله زلم انتم نعالات زين ما ناسبتكم

جاوبته ... خاااب دروح هو نسيبك غير لسانه شطوله ينكدر نجي منا يلوف منا انوب هددنه كال خطوبه ما تم كاعد بالركن والرجال بيكم يمر

ابويه ضحك بقهر وهو يصفك ... اييي صدك عمييي كول وفعل ما بيكم رجال تتراجفون مراجف ما خلاكم تجون من طاح حظكم كون

سد الباب بوجهه المره ودخل كال بعصبية... شوف الكلب شوف شلون يحرك كلبي كسر كلمتي ومشه كلمته

افيان سوت روحها ما تعرف .. اكلك يابه هو منو گله جيهان راح تنخطب يا منافق

اشر على روحه وهو يصيح بعصبية... انيييي اني النذل الكلب ابن الكلب عود كلت نسيبي خليني على صلح وياه كتله المصيبه  اجوها خطابه وراح افتك  منها

اردف وهو يلطم ويتولول... اوووف ربي شمسوي بدنياي حتى هيج يصير بيه بس اريد اعرف شمسوي حتى الدنيا تمشي وياي عوجه

هزت ايدها افيان ما عجبها الكلام همست .. غير هو انت اعوج حقها الدنيا تمشي عوج وياك

رجع كعد على الدرج وينفخ بضجر.. كلت راح ارتاح المشوهه هم على گلبي منو ياخذها وميثم رضا بيها بعيبها تاليها يجي ذاك الجلب ابن الجلب ويخرب عليه شغل

كلامه كولش حز بخاطري وعبالك اول مره يحجيها شلون يذلني ويهيني عبالك اني عبا عليه حتى خلاني استهين بنفسي واشوف روحي محلوه كد ميكول مشوهه ومحد يگلبها ومحد ياخذها حيل ينتقص مني

تغاضيت عن كلامة حاليا اني اسعد انسانه بالدنيا حلو من انتي تحسين نفسج صاعده للاعدام وباخر لحظات الحياة يجيج عفو عام هيج جان احساسي كولش فرحت ودعيتله بظهر الغيب

يارب يحنن گلب سولين عليه ويحنن گلبه عليها شفت بيه سند وعزوة الحمدلله عسا ان تكرهوا شيئا وهو خيرا لكم صدك كرهنا الاشتر بس طلع خير النه

اجت افيان فرحانه ... اروح فدوه النسيبي ابو طول الحلو ابو طبرة الحلوه شلون فرحنا اليوم

اردفت بتفكير ... بالقران لو اكض سويلينه الا انام بشعفتها حارمة الرجال ولج اني عندي هيج رجال غير اخبله هسه تلكين لسانها شطوله يلعلع انوب صايره صفره جنها كراطة حجار وتتعيقل على نسيبي الكفو اووف مال راشدي اصحيها على زمانها

ضحكت على كلامها.. بلكي الله وتتعدل امورهم احسه خوش انسان

ردت بصدمة.. تحسينه!! من امداج امده احساسج ولج هذا الكفو اندارله سبع فدوات

ظليت اضحك عليها انوب اجن نسوان حفيتهن وافيان صبغت شعرهن حيل صار عندي حماس للشغل بعد ما خربت الخطوبه الحمدلله ياربي

...........

سولين

جنت حيل متوتره واروح واجي وافرك باديه من القلق والخوف وهو اليوم ما طلع اني بصراحة ما عندي ثقه بيه اخاف جذاب مراح خرب لخطبه

اني جيجي اموت عليها تمنيتها تتزوج كريم لان هي تحبه بس بعد مو نصيبها بس مو معقوله تتزوج ميثم مطلك تلاثه وهي الرابعه باجر عگبه هم يطلگها وترجع لضيم ابوي

باوعت للاشتر جان واكف على المرايه الي بالحوش ومخلي الخاولي على كتفه وهو يدندن باغنيه... ويحي أنا بحت لها بسره
أشكو لهـا قلباً بنارها مغرم
ولمحت من عينيها ناري وحرقتي
قالت على قلبي هواها محرم
كانت حياتي فلمـا بانت بنأيها
صار الردى آه علي أرحـم

جان يحدد لحيته بموس الحلاقه ومعجون الحلاقه ويدندن ويباوعلي سرحت بكلمات الاغنية كولش حلوه وهماتين اكتشفت هو يحب الاغاني الفصيحه ما يحب الطربگة مثلي

كطعت اغنيته وآني أساله.. اكولك فدوه يعني صدك اختي بعد ما يخطبها

رد عليه.. افااا تشككين بقدراتي

تنهدت.. لا مو هيج ابد بس اخاف ابويه يروح من وراك وينطيها الهم

جاوبني ببرود.. اي ابوج نذل كل شي يسوي ويفرها عليه على ابو جبروني من هاي لكلاوات ما يدري بيه كلهن طاكات جوه رجليه لهذا السبب اني خليت ورحت لاهل الولد وما رايدين رواحهم اذا احوا وعتبوا باب بيتكم

ابتسمت.. يله وين الله وصدك خربت

ضحك.. ابوج من البارحة لليوم يتصل ممجاوبه

رديت بتوسل.. جاوبه بلكي عنده خبر يطمني

جاوبني بقرف.. خيولي مالي خلكة

اردف بضجر.. شكد اضوج من هذا الموس ما يحدد عدل

جاوبته.. ليش ما تحدده بخيط

باوعلي.. تعرفين ؟

ابتسمت .. اي اعرف قبل جنت احف ويه امي واسوي شيره واصبغ خبره بهاي السوالف

عض شفته بسخافه.. اموت على الخبره

نفخت بعصبيه.. كل شي ما اعرف اجذب عليك

غسل وجهه ونشفه بالخاولي وكعد على القنفه كال .. تعالي المصلحجيه تعالي حددي لحيتي بالخييط

جاوبته بتشرد وعصبيه.. هييي شني ما اعرف احدد للزلم بس للنسوان

رد عليه.. تجين لا تعرفين شلون اگوم اعاقبج

تافئفت جاوبته.. اروح اجيب خيط واجي

دورت بكره ماكو فرحت همزين ماكو حتى ما اكعد يمه رجعت عليه .. اكلك بكره ماكو

رفع موبايله وهو يتصل شويه واجاه الرد كال .. الو عايد جيبلي بكره من المحل بسرعه

فتحت عيوني مصدومة يا عزا ما نخلص اليوم سكتت شويه ماكو دقايق واندك الباب دخل وبيده اربع بكرات الوان كعد وشمر وحده عليه كال .. يله يبويه هاي بكره تعاي شوفي شغلج شوفيني شطارتج

كعدت قريب منه ما يفصل بينه سانتميترات اخذ الخيط طبكته مرتين وتقربت احدد بالحيته جان هادئ اول بدايه واني صايره تقريبا بحضنه

كل شويه ورفع المرايه وكال.. اكطعي هاي الشيبه

جاوبته .. من اكطعها يكثر

رد ببرود.. خلي يكثر الشيب وقار

استسلمت اله ودا احدد من جهة الثانيه وجهه صار برگبتي احس بتنفسه كولش ارتبكت كلت يمكن عادي بس دا احسه يتقصد انوب كل شويه وحك خشمة برگبتي واني كل شويه وكامزه وعايطه

وهو يرد ببراءة.. شبيج حتى خلفه بعد ما تصير عندي كل شويه وكمزتيني

جاوبته بغضب.. هي شني انت بس تسوي حركات سخيفه لو ما كطعت خمس شيبات هاي عود مشيب وهيج لو لحيتك كلها سوده شسويت

حط ايده على خده وهو يرد عليه.. كملي كملي

كملت دا احف وهو مخلي عيونه بعيوني ارتبكت من نظراته حييل لزم ايدي و وكفني كال .. تدرين اني قبل سنه شايفج

عقدت حواجبي.. شلون يعني

كال ... اول يوم دراسي الج جنتي لابسه صدريه حصر حلوه عليج وبيها جاكة لربع رجلج جان لونها رصاصي ما جنت اضن ان انتي بنت عامر لان ممعقولة هذا الخبل هيج يخلف صكوك

جاوبته بحيره.. مشايفتك اني شفتك اول مره من جنت بسيارة ..

حط ايده كدام وجهي يمنع كلامي

بلعت ريكي وكملت .. هو ابن عمتي ما بينه شي بس انت بذاك الوقت نقذتني يعني لو ابويه شايفني مخلاني اكمل السادس زين انت ليش ما خليت ابويه يشوفني انصدمت منك بصراحة

احتضن وجهي وهو يباوع لعيوني كال .. ما اعرف محبيت تتاذين

نزلت عيوني بخجل .. زين ليش تزوجتني

رفع حاجب بتفكير .. ما اعرف ما عندي اجابه

جاوبته بقهر.. عندك بس انت متريد تحجي

ضحك وهو يتمعن بملامحه بالمرايه ومجاوبني استفزني بحركته هاي

وكفت بعصبيه ومشيت عنه .. انت دومك من احجي وياك تسفهني وتخليني احجي الوحدي اسلوووووبك محلووو

رد عليه ببرود.. مو اجي احصرج

جاوبته .. اي هو انت بس هاي الفالح بيه تحصر وتبوس واذا ما حصرتني شنو خايفه

شفته وكف واني انهزمت طگيتها ركضه بس ما حسيت بيه اله سحبني من وره من ثوبي احتضني من وره وشفايفه تهمس عند اذاني وهو يكول .. هااا خايفه لو شنو

جاوبته واحس جسمي تصلب واني احاول افك نفسي منه .. وخررر وخررر ونبي ما اقبل هسه يجي صفاء عيب منه اوي شكد عيب

رد عليه ببرود.. قافل الباب

باوعتله ببراءه وحزن مصطنع .. حباب عوفني

ابتسم كال .. انتي حيل مميزه تجمعين بين شيطان لئيم وملاك بريئ

جاوبته بمزح .. وانت ممقصر تجمع بين كل شي

اندك الباب حيييييل تهطر تهطر عافني بسرعه وراح يفتحه وهو يصيح .. شكوو منو هاجم اليوم يمعودين صدك جذب

اول ما فتح الباب واسمع صوت ابويه وهو يحجي بصوت غاضب ... الاشترر شسويت كطع الاعناق ولا كطع الارزاق

هو سحبه بسرعه ودخله للبيت واني انهزمت جوه بسرعه للغرفه اباوع من الشباك سحبه دخله للبيت وهو يحجي من بين اسنانة.. صوتك لا يعلى منطقه نظيفه وسيرتي محموده فنلصم احسن الك ما اريد تششوه صورتي كدام جيراني

عقدت حواجبي باستغراب.. شنو هاي وين منطقه نظيفه وهو سيرته محموده هو غير طايحلهم دك

ابويه حجه بصوت متوسط وهو يريد يبجي و وجهه نار .. اموت واعرف ليش خربت خطوبة جيهان

ترك ابويه وراح كعد واخذ باكيته وكعد يدخن شلون يستفز ابويه كله.. والله بصراحة انت من كلت خطوبة بنتك كلت لازم أسال عن عديلي خوش رجال لا لان بصراحة ما اريد واحد يصير عديلي مو من مقامي

ابويه جاوبه بحرگة گلب يتمنى يدگ على راسه .. مو من مقامك شنوو جاي تنطي بنتك لو انطي بنتي

جاوبه الاشتر بصوت تهديدي ومستفز .. بنتك اخت مرتييي والي يناسبك يصير عديلي وخليها ترجيه باذنك اي واحد يريد يناسبك اذا مو من مقامي مرفوض

صاح ابويه بصوت عالي وهو يتهدد .. شنووو مرفوض انت شدخلك ابن عم ابن خال

تافئفت الاشتر بدون نفس وهو ينفخ الدخان من بين شفايفه .. اهووو لا تدوخني شوفلك نسيب بيه حظ ينافسني وانطيها خوما تنطيها للزبايل

ابويه وعلامات الغضب احتلت ملامحه .. وانت منو ليكون رئيس الولايات المتحدة

رمق ابويه بنظره مقرفه .. واني جم مره كتلك اسمي لا تقارنه ويه الزبايل ويله تفضل ما فارغلك

ابويه لطم على وجهه .. زييين انت ليش ما اجيت گتلي ارفضهم ليش رحت الهم وكلتلهم مرفوضين ليش فشلتني

جاوبه بهدوء .. حتى مره ثانيه من يجيك نسيب تباوع لشغله تباوع لشكلة تباوع لاخلاقه مو يا مهتلف يجيك تنطي ذن بناتك عرضك اختار الهن الزين مو بس تريد تخلص منهن ومن هسه اكلك اي واحد يقل مني بدرجة مرفوض

عامر صار نار وهو يرفع اديه وينزلهن وساعه يدك على راسه وساعه على صدره كله .. بس هذا مو قانون هذا انتقام انت صدك تحجي ترا ماكو هيج حجي بس عندك شنو انت متعافي

جاوبه الاشتر ببرود .. اي والله متعافي وانت تدري بيه متعافي من زمان فاتقي شري وخليك ادمي

رد عليه ابويه بكل غضب .. بسيطه يالاشتر بسيطه

وكف بغضب وهو يتقدم منه زنگة من رگبته وهو يصرخ بيه .. شنووو ولك عامر المهتلف تهددني لك بالقران هسه ادفنك هنا بصف التيل منو يطلع وراك كلك خلك واحد مستهتر مشمور من العشيره وترا سوالفك كثرت وساكتلك بمزاجي

من شفت الاشتر هيج يحجي ويه ابويه ما اعرف ليش ابتعد شويه واني ابجي شكد هضيمة هسه لو ابويه خوش ادمي لو ابويه زين اني اقبل هيج يصير بيه اقبل الاشتر هيج حجي وياه بس هو هاين نفسه بنفسه وحتى هاي اهانة الي

شكد عيب من اسمع مطرود من العشيره يعني احنه حتى من عشيرتنه منبوذين الم اعتصر روحي وخفق بوجداني شنو من حياة هاي البنيه سندها من ابوها واحنه ابونه يبيع بينه بيع ودينهان من زوجي !! شكد صعبه

رغم اكرهه اموت منه ورغم من شفته اتمنى اطلع واذبحه شفت بيه عذاب امي شفت شلون ضرب امي وجرم بيها شفت شلون قتلها الحقير الكلب

احس روحي تفور من القهر ياريت يطلع من البيت ياريت يروح لان اذا ظل راح ارتكب بيه جريمة شكد اكرهه ورغم هذا يعز بنفسي واحد يرزله ما عنده اي هيبه يعني اذا ابوي هيج شلون يترزل وهاين نفسه بعد الرجال يحترمني

مسحت دموعي وحسيت بيه طلع تركت الوضع واخذتلي زاويه بالغرفه اذب بيه همومي لحد الان موقف موت امي يجرح كل جزء بيه ويدمرني ولا اكدر اتخطه هذا الموضوع ولا اكدر انسه كل لحظه بيه وحتى من اتذكر هذا الموقف اكره الاشتر اكثر واشمئز منه لان جان شاهد على مقتل امي

بعدها طلعت شفته مبدل و واكف ديروح حجيت وياه بهدوء.. بلا زحمة

دار وجهه عليه وهو يركن مسدسه بحزام البنطرون عقد حواجبه بتساؤل

بللت شفايفي بحيره .. ادري طلباتي كثرت بس ما عندي احد غيرك

تقرب مني واحتظن اكتافي قربني عليه كال ..تامرين امر المصلحجيه احجي شتردين

نزلت راسي والحزن معتليني جريت نفس وزفرته جاوبته .. لا تعوف اخواتي ابويه من يتعصب او واحد يستفزه يضرب اخواتي فأني اخاف عليهن منه لا تعوفهن

نفخ بضجر ورد عليه.. لا تخافين ان شاء الله بس اخلص شغلي اروح امر على اخواتج واخوج

حسيت دخت حاولت اتوازن مكدرت عرفت الضغط هبط عندي من ابجي يهبط ضغطي لزمني وهو يرفعني لصدره كال بقلق واضح على نبرة صوته .. شبييج ؟

جاوبته بتعب.. ما اعرف دخت

حط ايده على بطني كال .. خاف حامل

ضربته على ايده .. منين حامل من الهوا شلون عليك سوالف تهبط ابو الضغط

رد ببراءه عود هو مسكين .. شمدريني غير انتي تكولين دايخه كلت خاف حامل

بعدها غمزلي .. شرايج نجيب نونو نتونس عليه دام ظالين لوحدنا

نفخت بضجر .. كافي ما احب هيج كلام هسه راح تروح لاخواتي

رد .. اروح يابه ليش ما اروح بس قبل كلشي بوسه

جاوبته بعصبية.. اهوو والله انت المصلحجي

ضحك .. اي مصلحجي ومصلحجيه كل من يخدم مصالحه اكو احلى من هيج

ابتسمت .. لا ماكوو

كرص خدي وراح وهو يخابر على صفاء وكله تعال يم .. سولي تخاف وحدها

.........................

صفاء

جنت بالكوفي اشرب اركيله ما اشوف اله واحد سحب الكرسي وكعد يمي تفاجئت باوعتله شفته مصطفى كتله .. ها ولك نذل شجابك صار فتره مختفي من يوم خبرت عني الكلب ساهر هو وتحسين

جاوبني بملل وهو يدخن بجكارته .. اسكت ترا صاعد الراسي ولعبانه نفسي

باوعتله بقرف .. سكران

جاوب ببرود.. لا منسم مجرد ربع ما مكثر

هزيت ايدي بعدم قبول وبعدها حجيت .. راح تضيع وتضيع نفسك من وره هالكلاب ذول مستهتر ملاهي وشرب ونسوان شلون يصير براسك خير ما اعرف

رخة ظهره على الكرسي وهو يضحك اخذ استكاني وشرب الجاي كال.. حلوه الحياة بس لازم تكون كلش مركز وتعرف شلون اتوفق بين الونسه والحياة بنفس الوقت

رديت عليه.. انت فد واحد ساقط

ابتسم بخبث .. ساقط مو ساقط مراح يتغير شي

ضحكت .. والله حرامات تسعه وعشرين سنه من عمرك راح تضيعيهن هيج

ضحك بصوت عالي... ههههه انت لو خبل لو خبل بابا متونس وعايش حياتي شبيك انت وعندي سفره للبنان شايف بارات لبنان لو يسولفولك اووف مو نسوان ضيم

جاوبته بحقد .. خلي النسوان الك تاليها يصير بيك ايدز وتموت وتظل تتحسر على حياتي

عدل كعدته بهمه .. صدك ليش ما اخذك وياي للبنان طلع جواز وخلينا نروح سفره حلوه اونسك اخر ونسه حتى دكول اخوي ميحبني

جاوبته بنفي قاطع .. تسلم ما اريد اني اخوي الاشتر مو انت ممشيني على درب العدل انت تربية ساهر وتحسين العارات صاير مثلهم عار

ضحك ورجع ارتجى على الكرسي باريحيه .. اشكرك مقبولة منك

بعدها اردف .. شنو مرة الاشتر ما حبلت

رديت عليه.. شمدريني مو عيب هذا السؤال وبعدين اني علاقتي بيها قليله ما اسال هيج اساله حتى اخويه أستحي أسأله

جاوبني بشرود.. بس حلوه ما توقعت هيج زوجته حلوة وصغيره ولسانها طويل تربية زوجهه شفتها بس مره وحده وعرفتها لبوه ترفض الانصياع لكل شخص

ضحكت .. اي والله هههه خرب لك فد وحده نجره خوش بنيه فد احبها من تشوفني تصير داعشيه الحجاب ينزل لعيونها عود عبالها احط عيني عليها

ابتسم مصطفى كال .. اذا عندها اخت اخطبها

جريت نفس وزفرته .. الله كريم نشوف وانت شنو ما خطبت بنت تحسين

رد عليه بانزعاج.. لا وين غير اخوك رفض بعد شسوي تكفيت الشر وهم هدد خالي تحسين بعد ما كدرت

تعصبت من كلامه .. اشو دكول خالي تحسين منين اجه خالك نسيت انت هذا الكلب شلون دمرنه هذا خال ساهر مو خالك وهذا ثعلب باجر عكبه يغدر بيك

جاوبني .. من باب الاحترام اسمي خالي وهو ممقصر وياي وما اتذكر سوه شي بس هو الاشتر هيج من وحده حاقد عليه ويتخيله ان هو السبب بدماره نسه روحه هو دمر نفسه بنفسه

اشرت اله بقمجي الاركيله .. مصطفى امشي اطلع منا افضلك لان بصراحة الكلام وياك ضايع وانت حيل مستفز احسك تتقصد تستفزني وتنكر الحقيقه

وكف وهو يطلع مبلغ من جيبه كال .. هاك هذا مصرف الك اخاف محتاج شي

وكفت وحطيتهن بجيبه بغضب تحت صدمته كتله بعصبية .. فلوس الحرام للحرام مو الي روح اشرب عرگ ادخل ملهى كيت على راقصات الحمدلله لگمة الحرام ما داخله بطني مو مثلك

ضحك بغرور وهو يباوعلي بعدم اهتمام وخله وراح صاير حيل نذل اي طبعا اذا تحسين العار غركة بالفلوس وخلاه نسه نفسه هذا شلون يتأدب ما اعرف

...................

جيهان

بعد ما ابويه رجع ثاني يوم الظهر ما اعرف وين جان اجانه متخبل هو هيج طبعه من واحد يستفزه يشمر حركته بينه بحيث ما يكدر ياخذ حقه من العالم يجي ياخذه منه مو احنه ظالات مكفخه اله ولا حول ولا قوه

اتخبل ظل يفلش بالبيت فوك ما هو مفلش ويصيح ويغلط .. كح ساقطات كله من وراجن انتن ساس البله اني انهان من وره وحده مشوهه وعلي اليوم اله احرك البيت

لازم صوندته ويجول علينه مثل الخندير خلينه وانهزمنه منه بالغرفه وهو فلشها تفلش امين سوده عليه من الخوف تخربط وهو يبجي .. ولج يمه وينج راح يموت اخواتي

حظنته واني ابجي بعدها مد راسه من الشباك وجهه ما بيه رحمة عبالك شيطان ... بالقران ما تفتحن الباب احرك البيت هسه ارشه نفط واحركة بكيفجن بعد

حظنت اخواني وابجي يالله شلون شلووون والله تعبنا متنه وكفت كدام الشباك باوعتله شفته يرش بالبيت بالجليكان مالت النفط

ظليت اصرخ اني اعرف هاي المأساة مالت الحرق ظليت الطم واصرخ وما اعرف شنو اسوي ياربي دخيلك ياربي شلون راح نموت راح يحركنه ويحول احترك البيت شلون ورطه ربي دخيلك ربي رحمتك يمممه ولج يمه وينج تعالي شنو عذابنا وين عفتينا

افيان ظلت تبجي كالت .. خلي نفتح الباب وننهزم للسطح هذا خبل فتحنه للباب وهو بالمطبخ يدور على جداحة يحرك البيت

اول ما صعدنه السطح وهو اندك الباب بقووه كتله .. اميين روح افتح الباب بسرعه

ركض امين بسرعه فتح الباب سمعت صوت الاشتر وهو يكوله .. هلا برجال البيت شلونك ابوك موجود

رد عليه بخوف .. اي اي عمو موجود جوه ادخل ادخل

فرحت حيل اباوع لافيان تضحك وتبجي كالت .. اي همزين اجه الحمدلله الف حمد وشكر الك يارب

ركضنه بسرعه رجعنه للغرفه

دخل جوه وهو يصيح ... لك عاااامر شنو ريحة النفط هاي وينك

طلع ابويه من المطبخ وهو يرد عليه بضحكة متوتره ... هااا ابو ابراهيم اهلا وسهلا لا ماكو شي بس مثل ما تعرف نمل وصراصير ذبيت نفط بلكي يموت

رذ عليه .. دتعال رايدك بالاستقبال عندي موضوع وياك

اخذه ودخل جوه واحنه طلعنه بسرعه غسلنه البيت من النفط هذا لا انوب يروح الاشتر ويرجع يحركنه ظلينه نغسل بسرعه بسرعه

كملنه وهو لحد الان موجود بس صار هدوء وماكو اي صوت تقريبا ظلينه ساعه كامله وبعدها اندك الباب مره ثانيه

امين جان طالع دزته افيان يجيب بخور ريحة البيت تعط من النفط فطلعت اني كلت بصوت اقرب للهمس.. منو تفضل

رد عليه بصوته لاحبه .. ها جيهان اني عمو كريم

فتحت عيوني مصدومة كريم مجنت متوقعه كريم يجي جاوبته بخوف وقلق .. هلا عمو بس ما اكدر افتح الباب بابا هنا روح لا يشوفك

رد بضحكة واضحة على صوته .. لا تخافين ادري بيه هنا افتحي هو اني جاي عليه

ترددت افتح الباب حيل حاز بخاطري موقف كريم حيل مقهوره منه من خطب صح مبينه شي بس ما اعرف اكو شي بداخلي يوجعني حسيت بوجع وجرح عميق بداخل روحي

فتحت الباب و رفعت عيوني اله ابتسم وباوعلي بنظره اول مره اشوفها بعيونه حيل قلقت كال بهدوء.. شلونج عمو

جاوبته بحسره والدمعه لمعت بعيني .. الحمدلله مبروك على خطوبه ان شاء الله بالرفاه والبنين

جر حسره ورد عليه .. ان شاء الله ابوج وين

اشرتله .. جوه هو ورجل سولين

رد بدهشه .. هااا رجل سولين هنا يله لعد خليني اتعرف عليه

ابتسمت بوجهه مجامله وهزيت راسي بموافقه مشه خطوات وصل لعند باب الاستقبال وباوعلي ركز عليه بنظره حيرتني وخجلتني نزلت عيني بسرعه وخليت ودخلت للمطبخ اقرب مكان الي للهروب من نظراته

شفته دخل وركضت واني اباوع عليه من الشباك شفته دخل بهيبته وحظوره الحلو سلم عليهم وكعد وابويه من شافه انكرص واستغرب ظل عبالك كاعد على نار واني هم استغربت من جيته

الاشتر تكلم بصوت جهوري .. اي ابو امين ما عرفتنا على الاخ

رد عليه ابويه بقلق واضح عليه وضحكة متوتره .. هااا اي هذا كريم ابن عمي هو ضابط بهندسة المتفجرات

الاشتر باوع لكريم ورد عليه .. اهلا وسهلا بيك اني نسيب ابو امين زوج بنته

كريم بهدوء.. اهلا بيك تشرفت بمعرفتك بس تدري شكلك مألوف ما اعرف وين شايفك

الاشتر قلص عيونه ورد عليه .. واني هم شايفك بس ناسي وين او يمكن من وقت طويل شايفك يله يخلق من الشبه اربعين

كريم بضحكة .. فعلا يخلق من الشبه اربعين بس والله شايفك حتى إلي متأكد منه اكثر هاي الطبره الي بحاجبك

الاشتر مسح على حاجبه وهو يضحك .. هههه اي لكل يعرفني منها ميزه حلوه الحمدلله

كريم .. هه الحمدلله اي شلونكم ان شاء الله بخير ابو امين شلونك

ابوي جان صافن رد عليه.. هااا اي الحمدلله بخير شعجب جاينه

رد عليه عمو كريم .. والله الوالد دزني عليك يريدك بموضوع ظروري ان شاء الله اذا ما عندك شي مرلي باليل او باجر بكيفك

ابوي جاوبه بأدب اول مره أشوفه مؤدب ولو هو بس من يشوف الاشتر يتأدب كله .. هااا اي ان شاء الله يتدلل عمي بس اخلص شغل اجي ويامرني امر

بعدها ظلوا يسولفون بالسياسه ومواضيع عامة وكريم يسولف عن شغله وعن تفكيك المتفجرات اندمجوا حيل الاشتر وكريم وبعدها تبادلوا الارقام

ومن راد يروح الاشتر كريم طلع وياه راحوا سوه واحد ارتاح للثاني

وابويه اول ما راحوا وهو عقد الحواجب شيريد ابو كريم مو طردني من العشيره انوب هسه شيريد والله لعبت نفسي من الوضع بس اريد اعرف شنسوي بحياتي حتى هيج متبهذل خرب حظي

هزيت ايدي شلون بيه هذا انوب ما راضي حتى على رب العالمين استغفر الله يا الله

.....................

سولين

كعدت الصبح ضايجه مدري شبيه من اكعد الصبح فد اضوج صايره حتى اكره الصبح اكول هسه لو امي ما ميته جان هسه اني اداوم جامعه واحب الصبح دوام و واهس بس بعد شسوي كل واحد وحظه ونصيبه

الاشتر ماكو من البارحه نمت بالثنتين باليل وهو ماكو وصفاء اجه نام من وكت خطيه شكد حباب وفقير طلع مو حقير مثل ما توقعت خرب انوب اني شكد ما استحي وحيه لعبت بيه لعب من اجه للبيت

حتى طردته ثوول حتى ثول بس والله شسوي غير هو الاشتر جابه واجه من دون مقدمات هم حقي ما اثق بيه هو اني الاشتر ما اثق بيه مو انوب اخو بس لا والله طلع حباب ولطيف

كعد الصبح كال .. صباح الخير سولين

جاوبته بهدوء .. هلا صباح النور اكلك اخوك وين ما يلفي للبيت

رد عليه .. موجود نايم ترا البارحه اجه بثنتين ونص جنتي نايمه

هزيت ايدي ... اي عشتو مسوي فضل جاي من وكت خرب حظي شتا وبارده يدخل بالتلاثه وبالثنتين لعد لو صيف شوكت يدخل وجهه الصبح

ضحك كال ... والله ما اعرف يا خويه اني طالع تردين اجيب ريوك

رديت عليه ... لا على شنو هسه هو يكعد ويجيب لعد شنو شغله

ابتسم كال.. بكيفج يله اني رايح

خله وطلع واني دخلت سبحت احب سوالف الشيره والحفافه دائما اسوي اعشق هاي الاشياء تاخرت بالحمام

طلعت لكيته كاعد على القنفه لابس دشداشه سوده اول مره اشوفه لابس دشداشه وكاف ردانه للعكس وكاعد ياكل كاهي وكيمر وجاي

استغربت كتله .. هاي شنو انت سويت جاي والله عمي معدل انوب مسوي ريوك الروحك

كال وهو ياكل .. لا بويه اجه عايد وسوالي ريوك حتى كال ادري شبيها مرتك ميته ما تخدمك جاوبته مدري وين طمست

جاوبته .. وين طمست يعني جنت اسبح وبعدين شبيه هذا عايد شاد وياي عابت مرتك ومرتك عبالك شريجته هسه واذا سوه استكان جاي طارت الدنيا لو شنو

رفع عيونه اليه كال بحده .. كافي تأدبي لسانج كصي شويه

سكتت بزعل وكعدت كال .. تعالي تريكي

اجيت كعدت مقابيله والخاولي على راسي واكلت وياه اي اني عند بطني ما عندي كرامة اكلل وادلل روحي

كال .. حظري نفسج راح يجونه خطار

عقدت حواجبي .. منو ذول الخطار انوب

رد عليه .. سالي واختها

وكفت مصدومة ومنزعجه ... اكلك اني هاي جالي مو متحملتها مو انوب اختها كلهن نايمه ما اطلع الهن

رد عليه ببرود .. ليش خوش بنات وراقيات

ضحكت ... ههههههه كولش خوش بنات وهن يتخشخشن بالبيوت

رفع حاجب بغرور .. اي بيوت شبيج انتي هذا شغل

جاوبته باستفزاز .. شيشتغلن رقاصات

رد بعصبيه ... عود خلي يجن واكعدي جفصي هيج حتى اكص لسانج وحق العباس

جاوبته بحسره .. اي هو انت بس عليه تكفخ بيه وهي هاي سالي سلها البين كون تغلط عليه دكول ما لايكتلك ما تحجي

رد يبرر الها ... مو قصدها

ضربت رجلي على الارض بعناد .. لا قصدها واعرف متقصده عشتوو تفار على صديقها الجاسوسه العوبه المعفنه اكرهههههها

تافئف بانزعاج واندگ الباب وكف ديفتح الباب واني اخذت كاهيه خليت بيها كيمر وشردت بالغرفه اي والله جوعانه جاا اموت من جوع لخاطر جالي واخته

باوعت عليهم من الشباك واني اكل والغيره ذابحتني دخلن سالي العوبه لابسه بنطرون كيلوت عريض ولابسه بدي ضيق للخصر هاينك اسود وشعرها لافته كبايه ليفوك ومطلعه زلوف منا ومنا وحمره حمره بس بعد ممخليه شي بس تكتل من الجمال خلتني شلت روحي وركعتها بالكاع ام بنطرون شكد اكرهها

واختها تختلف عنها مبينه اكبر شعرها صابغته اشكر ولابسه بنطرون وقمصله جلد سوده كله لابسه اسود هم حلوه بس مو بحلات سالي

كعدن مقابيله يسولف وياهن بهدوء بدون ضحك ولطلطه وهن كذلك يبسبسون مدري شيحجون اني مستغربه ذن ما عندهن اهل شلون يجن هيج وحدهن معقوله اي يمكن دايحات الله اعلم

انوب يا الله لا عندي حمره لا عندي مكياج وجهي اصفر لبست ثوب بسيط وظفرت شعري ما لبست حجاب كرصت خدودي حيل وطلعت

سامت عليهن بس بالايد مو مباوس خيولن يتعيقلن ويتدلعن وهاي سالي شويه وتنام بحظن الاشتر

كعدت هن يباوعلي صفح ما عاجبهن وجودي وسكتن ما حجن شي و وحده تباوع للثانيه

كالت سالي وهي تبتسم مجامله ... هااي اختي مارسين

استغربت .. دارسين

رفعت حاجب متعصبه وباوعت للاشتر كال وهو يضحك يركعلي .. شويه سولين سمعها ثكيل مارسين بابا مارسين

ابتسمت .. هااا اهلا وسهلا اسمج غريب

ردت بغضب.. اسمج هماتين شنو اسم ابره مال سكر هههههاي

وهاي سالي عساس ما صدكت ماتت من الضحك وكفت متعصبه دا اهجم و وكف الاشتر لزمني كال .. تعالي سولين صدك عندي شغله نسيت انطيها الج

اخذني واني درت وجهي اباوعلهن واخزرهن وهن كذلك ويع ولا محبوبات دخلني للغرفه كال .. دقايق واجيج لا تطلعين

هو طلع واني طلعت وراه كال .. مو كتلج لا تطلعين

جاوبته بكذب .. نسيت

عض شفته باسى وخله وراح تكفيت الشر وكفت اصنط عليهم سمعته يكولها.. هذا اريده يتأدب اريد يا سالي كون ما يصبح عليه الصبح واني اثق بيج

جاوبته بثقه .. تتدلل بس انطيني عنوانه و وين يشتغل وان شاء الله باجر خبره عندك

رد عليها .. تمام باعي من ترحين ادزلج السيفي مالته كامل على الموبايل

ابتسمت .. تمام تدلل

بعدها خلوا وطلعوا وهو طلع وياها يضحك ويسولف وياهن واني اشتعلت بيه النار هذن شنوو ترا دخت ولعبت نفسي بالقران خلي يرجع اله اسويها معركة صفين انوب دراسين وجالي عليه خوش والله بيت مال كح بسيطه يالاشتر ترجع لو لا

.....................

رنا

اجانه كريم ظل يسولف وكعد يم حارث جانت خطيبته كل شويه تتصل كلها .. من ارجع اني اتصل بيج

ورجعت اتصلت مره لخ تريده بس يحاجيها ورجع كلها .. ترا مراجع كتلج من ارجع

بعدها سواه سايلنت وظل يسولف كال .. رحت البيت عامر دزلني ابوي عليه علمود العشيره وهناك لكيت رجل سولين شو مبين خوش ولد هو صح ما ينغلب بس رجال وكلامة حلو وبكل شي يفتهم مو همجي مثل عامر

حارث تخبل كله .. صدك تحجي اسكت كريم هذا اكبر همجي وحقير ما شفته شلون هجم على بيتنه وشلون يريد يكتلني وهددني واخذ سولين مني هذا احقر من عامر

كريم بهدوء ... على كيفك يمعود ما كلت شي بس مجرد ما سولفت وياه اكتشفت عنده جانب حلو احنه الي نريده شنو بس كون سولين مرتاحه وياه وكون ما معذبها وهذا اهم شي

رد حارث بغضب .. لا مو اهم شي اهم شي تتطلك منه وترجع الي اني اولى واحق بيها منه اني حبيتها قبله بس هو حقير اخذها مني وهو يعرف بيه احبها لان مره جانت وياي وهو شافنه ماكو هيج حقاره

تنهد كريم وسكت وامي كعدت تسكت بحارث وتحاول تهدي بيه

اني عفتهم يسولفون ودخلت اتصفح بالفيس اثار انتباهي منشور على وحدة من القنوات العراقيه بالفيس كاتبين حصاد اليوم .. رجل كبير بالسن يقوم بالتحرش الجسدي وتهديد معلن وابتزاز واضح لاحد االفتيات الشابات مما ادى الى اعتقاله من قبل الفريق الركن عبد الستار شمهود واحد ابطال الفرقه ال... بالقرب من سوق ...

ما ركزت بالصوره بس شفت التعليقات الغلط والسب على هذا الشخص وتعلقات تموت ضحك اكو كله حجي شمالك مستهتر هو انت حتى اكسباير وينك وين الفتيات الشابات اقره بالتعليقات واضحك

بعدها ركزت بالصورة هم جانوا ممطلعين وجهه بس جسمه قلصت عيوني واني اركز هاي الملابس اعرفها وهاي الهيئة هم اعرفها وحتى المكان والمنطقه رجعت ركزت مره ثانيه واني لطمت خدي ... عزاااا

اجيت اركض الهم .. تعالوو. شوفوا خالو عامر معتقلينه متحرش ببنيه شابه ومعتقلي وهسه بالسجن

نهاية البارت ... يتبع

كونوا انتم كونوا بخير.. احبكم 💔

موش تنسن التصويت بعد گلبي حتى ترتفع الروايه بيكم احبكم كولش هوايه

وشفت اكثر البنات من سوليين كالت عن الاخت الاكثريه معلقه ان هن وحيدات ما عندهن اخوات اني هم وحيده بس ان شاء الله اني اختجن وانتن اخواتي وكل الهلا بيجن 😍❤️

..................