رواية #وكر الأشتر الفصل الحادي وأربعون 41 - بقلم الكاتبه سمو العراق

بارت 40
رواية وكر الاشتر
بقلمي .. نور سمو العراق

💔💔💔💔💔💔💔💔💔💔💔💔💔

- ولمَ يعدَ هنأكَ متسعَ لشمعهَ أخرى  ، ولم يعدَ هنأكَ رمأد يكفَي للحظأتَ ألرثاء ألقَديمهَ !
•  موجوع قلبي | ⌯

لازم تغلسون على السحك لازم 🥺

...........................

سوليين

وجع اخترق صدري واختناق تسببلي بس صحت شويه و حركت روحي وعرفت اني حتى الصوت العالي ما اكدر احجي بيه لان يسبب اليه اذيه حتى لفظ الكلمات بصورة صحيحه ما اكدر الفضها حتى بلع ريگي ما اكدر ابلع بقوه لازم بحذر عرفت اني منتهيه اني حتى تنفس ما اكدر اتنفس

باوعت اله والدم ملوث شفايفي باوعتله بحزن وكسره جان يشوف كسرتي بعيونه محملته الذنب اني ماتت امي ضوه عيوني تقبلته وتقبلت فكرة امي ماتت بس بعد فترة اكتشفت اله ايد بموتها

اشحت بعيني عنه وهو تقرب مني يحجي بلهفه وحنيه وحزن واضح على نبرة صوته وهو يكول .. بس اهدي والله كل شي ينحل وكل شي افهمج عليه ترا مو لهلدرجة اني حقير حتى ااذيج او ااذي امج

ردت عليه الممرضه برجاء .. ياريت ما تتعب لان تنفسها ديضيق ونخاف الضلع المكسور يدخل الرئة واذا انثقبت الرئة راح نفقد المريضه صدكني

بلل شفايفه بحيره وتنهد وهو يرد عليها .. تمام راح ابتعد عنها بس فهميها لا تحجي ولا حتى تحاول تلفظ الكلام صحيح اي كلمة تنطقها اذا متاذيها حتى لو غلط لا تحاول تصححها

ردت عليه الممرضه .. تمام ان شاء الله اني هسه افهمها واكيد هي لازم تساعد نفسها لان علاجها بيدها واكيد لازم تبعد عن الانهيارات

مسح على وجهها بتوتر وما يريد يطلع بس مجبور يخاف على حالتي تسئ اكثر

طلع وهو حزين ومجروح بس ما اقبل منه كل شي ما اقبل تعبت روحي ذابت من حزني على روحي وعلى امي شلون يردوني اتنفس ببطئ واني شفت بعيوني امي شلون ماتت ماتت قتل مغدوره مظلومة كرهته ياربي كرهته واسمه يخنكني يخنك روحي يخلي مو بس تنفسي يصعد حالتي كلها تصعد وانتكس

اجه الدكتور اخذوني مره ثانيه وهم يسوون اشعه للرئة جان الوجع قاتل بكل جسمي بس ما جنت اكدر احجي اووون من الوجع وما احجي ما اكدر حتى ابجي لان ااذي صدري واحس سجين نابته بضلعي اااااه يالوجع ما ينحمل بس حتى من الوجع صوتي انبح واني الهج .. ياربي دخييلك ياربي دخيلك

احس بخنكة احس ما اعرف شنو كل شي يوجعني رجلي توجعني مو رجلي الي صابيها الي انداست بالعربانه لا رجلي الثانيه هي ما بيها شي بس ما اعرف موتتني من الوجع احس اريد اموت اريد اموووت تعبت كون اموت واخلص من هالوجع مستعده اموت الف موته بس ما اتحمل هيج وجع راح اموت

اخذولي اشعه ورجعوني النفس المكان واني ابجي حجيت ويه الدكتوره .. فدوه رجلي هاي موتتني راح اموت شبيها ليش هيج توجعني هي حتى ما مجبسه

ردت عليه ..حبيبتي لا تخافين هاي رجلج ما بيها شي بس لان الفقرات مكسوره هيج جاي تتاذين منها لان دتضرب على رجلج

رديت عليه بصوت مبحوح وتعبان.. فدوه انطيني مسكن

جاوبتني ... انطيناج والله وميصير تاخذين اكثر لان يصير تضارب بالعلاج

بجيت بحسره .. بس والله موجوعه مدا اسكن فدوه بس هالمره حتى لو يتضارب حتى لو اموت ميخالف اي شي بس خلي ارتاح متت

جرت نفس وزفرته كالت .. وشيخلصنا من اهلج ما تكليلي أن شاء الله شويه وتسكنين هسه يمشي العلاج بيج

حتى ما اسحب نفس وزفره رديت عليها بتعب .. ما عندي اهل اني بس امي وماتت ما عندي احد خلي يتضارب العلاج خليني اموت احسن

بدلتلي الكانوله وهي تكول .. لا شلون اخواتج ما نشفت دموعهن عليج وزوجج ابد ما تركج خطيه حييل مصدوم بحالتج وكل شويه يوصي عليج ويروح ويجي وابد. ما تركج ولا لحظه صح هذا واجبه بس يعني اكو بيهم حشاج حقراء يتركونهن بأمس الحاجة الهم بس هو الحمدلله ما تركج ومبين شكد يحبج

باوعتلها بغواش والالم ما يخليني انام كلامه ما اثر بيه بس اخواتي سوده عليه ما عايفاتني وجايات الخاطري يعمري عليهن شلون احبهن واذا اريد اعيش بس الخاطرهن لان مكدر اعوفهن واروح وهن لسه جرحهن ما طاب على امي

درت وجهي والدمعة تلالي بعيني والدكتوره كل شويه تدهن رجلي السليمة بدهن اعصاب حتى تخفف من الالم الصار بيها وهي ابد مدتسكن ابد موتتني

.........................

صفاء

من بعد ما طلع الاشتر منها وصارت ضجة على حالتها عرفت هي رفضت مقابلته والصار هذا بسببه بس هو شلون يعوفها كل شي بيها يقوده الها وما يكدر يتركها ولا لحظه

جان مخبوص ويه الدكاتره وهم اخذوها بالسديه سوولها اشعه ثانيه لان تقيئت دم وهذا اثار الخوف بداخلهم لان هي ضلعها مكسور ويخافون يثقب الرئة وهذا يسبب عندها اختناق وانخفاض بالاوكسجين بالتالي ممكن تنفقد

ظلينه منتظرين تقريبا ساعتين وطلعت الاشعة رحنا للاستشاريه هناك والدكتور شاف الاشعه كال .. الضلع يضغط على الرئة ويسبب الها وجع ياريت تكدر تساعدنا وياريت اي شخص يسبب عندها انهيار ما يدخل عندها لان بس تنثقب الرئة او تتعب اكثر من هيج راح نفقد المريضه

جاوبه الاشتر بلهفه وخوف ..  لا لا هذا هو مستحيل مراح اخلي اي واحد يدخل عليها

الدكتور .. حتى الي يثير عاطفتها يعني مثلا تفرح من تشوفه وتشهك هم راح يسبب الها ازمة يعني ما نريد اي جهد على الضلع بحيث طلبنه منها حتى تلفظ الاسماء والاشياء والكلمات حسب ما يريح تنفسها وقدرتها على الكلام حتى ما تتعب نفسها ولا رئتها وضلعها المكسور

رد عليه الاشتر .. لا هذا هو مستحيل مراح اخلي اي شخص يدخل عليها بس طمنوها الكل موجود ومنتظرها بس نخاف عليها

طلعنه برا واشوف حجي اديب كاعد هو راح كعد يمه وينفخ بالجماير عبالك هو عايز هم حتى زادت عليه الهموم

باوعله حجي اديب وهو يكوله .. ها وليدي شلونها البنيه ان شاء الله صارت زينه

رد عليه بتنهيده وقهر .. والله ما اعرف حالتها ما تطمن وضعها كلش تعبان ومن تشوفني تتعب بالزايد واني اذا ما شفتها وحجيت وياها ما احدر اتطمن
وهي موجوعه وحزينه وما تريدني احجي وياها واقابلها

رد عليه حجي اديب وهو يكول ..وانت لا تستسلم خلي حزنها الك قضيتك الاولى وحسسها بمدى حبك الها وتقاسمها وجعها وحسسها ان هي بكل صفاتها تخصك حتى حزنها واوجاعها تخصك اتمسك بيها ولا تخليها تفلت من ايدك هي هسه بأمس الحاجة الك

جاوبه بوجع وهو يسحب جكاره ثانيه من باكيته كال .. والله شكلك يا حجي انعادت عليه مأساة اختي رحيق نفس الوجع ونفس الاذيه مالحكت عليها وسولين مستحيل اخليها

تركتهم ومشيت و وجع بصدري قوي بمجرد ما انذكرت اختي

رجعت تذكرت سولين من جنت اخاف منها وهي جانت تصيح وتشتغل وتسب باخوي وتكول هو اني من شفت الطبره بحاجبه ما تفائلت بالخير هسه يطلع حرامي بايگ بيت وضربوا بحاجبه وطيروا اي لعد شنو منين اجت الضربع قابل محرر القدس لو محرر بلاد الاندلس والله يا الله

رجعت اتذكرت حادثة طبرة حاجب الاشتر

جنه كاعدين بغرفة وحدة غرفه رغم بساطتها ورغم تعاستها بس جانت جامعتنا

خاليه من اي اثاث مجرد حصير قديم ومخدات وصندوك صغير بي ملابسنا والحايط ماخذ رطوبه يلعب النفس والغرفه بيها شباك طلاقتين مزنجر ومتصدء

جان الاشتر عمره ١٥ سنه واختي رحيق هي توأمة يعني بعمره

جان فاتح الشباك طلاقتين ومخليه ايد على جهة الشباك اليمنى وايد على اليسرى ويرفع روحة وينزلها يتدرب بالشباك ونازع تشيرته

اختي رحيق جانت كاعده توكل باخواتي  جاي وخبز صاحت عليه بتعب.. اشتر خويه انزل لا توكع الغرفة بينه

رد عليها بنفس مگطوع وهو يلهث.. لازم اقوي نفسي لازم اساعد نفسي ويصير عندي جسم قوي حتى اكدر اواجهه بيها تحسين الكلب هو وزمرته النعل وهذا ابن وجيهه الچلبه

جاوبته بصبر .. عوفنه منهم ومن مشاكلهم فدوه

نزل من الشباك وهو يمسح بوجهه كال... انطيني الخاولي خلي اروح اسبح

حركت نفسها جاي توكف خله ايده كدامها گلها .. اكعدي اكعدي انتي تعبانه اني اخذه

اخذ الخاولي واني ركضت وراه كتله بطفولة.. الاشتر خلي اروح وياك

ضحك كال ... تدلل

ديمشي وتلاگة هو وساهر ابن جدتي وجيهه تغاضى عنه بس ذاك وكف كدامة ما خلاه يكمل طريقه

رفع حاجب الاشتر وباوعلة بنظرة استفهام

ساهر بغطرسه وخبث...من تفوت من كدامي كول بلا زحمة ياحيوان

ابتسم الاشتر بخبث ورد عليه ... بلا زحمة يا حيوان

انتفض ساهر بعصبية وضرب الاشتر بوكس على وجهها على اثرها جن جنون الاشتر وصار واحد يضرب الثاني

طبعا الاشتر هنا عمره ١٥ وساهر عمره ٢٠ سنه بس شايل حقاره وچلابيه محد شايلها

خنگ الاشتر وهو يصيح بوجهها... حيوووان حقير تغلط عليه اليوم اذا ما ربيتك ما اطلع ساهر

رد عليه الاشتر من بين اسنانة وهو يستفزه .. امشي ابن الكواده

طلعت رحيق وهي تصرخ وتبجي تريد واحد يفارغهم ويفزع لان ساهر اكبر من اشتر واشتر ما سد لسانه

صرخ بيه ساهر بكل غضب وهو خانگة ... انيييي تغلط على امييي اليوم اله انيمك بالمستشفى لك عار الدايح

الاشتر رد عليه ... اكل نعال ساقط بيك خير ما ذاك اليوم سكطك تسكط شطوط

دفعه و وكف وهو يلف الخاولي على ايده ويفح بعصبية ابتسم بحقد وخبث ساهر وطلع سجينة صغيره ام الياي وهجم بيها على الاشتر ضربه من بدايتة حاجبه لحد بداية عظمة الخد

صرخت رحيق واني ركضت عليه جنت طفل ظليت اصرخ واضرب بي والدم نزل من عين الاشتر بغزاره احتارت رحيق شلون تسد مجرى الدم

اجت سليوة مرة  تحسين تركض وظلت تغلط واخذت ساهر وراحت

رحيق لزمت الاشتر وهي تريد تشوف عينة كلها .. ما بيها شي وخري عوفني ما بيها شي

كلتلها وهي تنتحب.. مو كتلك لا ترد عليهم مو كتلك لا تحجي اسكتي شوف شلون ضربك وشوهه حاجبك

رد بعدم اهتمام .. ما بيها شي ما بيها شي هسه تطيب

خله الخاولي وهو يمسح الدم ودخل سبح طلع من الحمام شفت عينة مكانها صاير ازرك والحاجب مفتوح ومبين اللحم وبداية خده كذلك

رحيق توسلت بي يروح للمضمد يضمدها كلها بعدم اهتمام .. ما بيها شي لا تلحين

راد يطلع كلتله .. وين رايح

جر نفس كلها .. رايح لحجي اديب مشتاقله

طلع  اختي كالت روح وياه لا ياذي نفسه عاد من يشوفك يبطل يسوي مشكلة واني طلعت وراه تمسكت بقميصه كتله اروح وياك

ضحك واخذني وياه دخلنة الحجي اديب لكيناه يشتغل بمحلة يصنع فخاره مال مي

من حس بوجودنه بعد ما سلم الاشتر رفع راسه انصدم من شافه وكف وهو لابس قميص ابيض وفوكاة سويتر صوف مخطط وبنطرون اسود

كال بخوف وهو يتلمس جرح الاشتر .. هاي منو ضربك

رد عليه .. ابن العاهره

تعصب حجي اديب ورد عليه .. كم مره كتلك لا تتلفظ هيج الفاظ هسه احجي منو ضربك

تجاهل كلام حجي اديب وظل يقلب بالفخاره بإعجاب كلة ... حلوووه

حجي اديب تعصب كلة .. منو ضربك

رد عليه ببرود .. متسوه نسولف بيها شنو شلونه الشغل

صك على اسنانة بغضب... الاشترررر

جر نفس ورد عليه .. اكو غيره ساهر الچلب

تنهد .. ليش ضربك

رد عليه بنفس البرود وهو يتفحص الفخارة.. بعد كواد ليش ضربني؟

سحبه من قميصه بغضب .. كم مره كتلك لا تفشر ؟

رد عليه .. مدري ما حاسبهن

حجي اديب .. ليش ما رحت ضمدت جرحك ؟

رد عليه ببرود.. ميحتاج

حجي اديب جاب مراية صغيرة مكسوره وخلاها كدام وجهه كله.. شوف شلون شكلك صاير روح خيطه بلكي يتحسن

اخذ المراية من ايده وهو يتفحص وجهه وركز بجرح حاجبه كله .. حلوو احس منطيني شكل مرعب وهذا الي ادوره

الحجي باستفهام.. انت شتحجي ؟

رد عليه بحقد وتنفسه ثكيل.. شكد حلو الظلم الي يجي وراه انتقام راح انتقم من كل واحد اساء الي بيوم من الايام

ما احتاج بس الوقت حتى اكون من دون گلب وعندي جسم صلب وبعدها يبدي الحساب حجي اديب

تقرب منه حجي اديب بحزم وهو يحجي وياه .. من تصير عندك شهاده من تجتهد بمدرستك وانت شاطر وتدخل القسم الكتلك عليه راح تنتقم من كل من اساء الك ولاخوانك وامك وحتى ابوك انت بس امشي وراي انت بس سوي الكتلك عليه وشوف شلون راح تكون فد شي والكل راح يهابك ويدور رضاك

جاوبه بحده وهو يباوعله ويفح من قهره ...واني من ايدك هاي لايدك هاي وجاي اسوي كل الي كتلي عليه ومحد يعرف حتى رحيق اختي ما تعرف مثل ما وصيتني ما حجيت

جاوبه بفخر .. الاحبه بيك انت امين وابد ما تطلع السر وابد ما تحجي شي يخصك وانت تستاهل هيج قسم لهذا السبب اني جاي اشتغل عليك واريدك تواصل بدراستك مهما واجهتك ظروف ومصاعب

رد عليه بقبول .. ان شاء الله حجي

رجعت من ذاكرتي وهذا جزء قليل نقطه ببحر من الي صار بينه من جنه عايشين ويه ذول الوحوش الي ما رحموا ايتام وشتتونه وطشرونه الله ينتقم منهم ويجازيهم بافعالهم

...........................

فافي

جنت حييل ضايجة على اختي وما الي خلك لإي شي جنت موجوعه عليها رغم ما شفتها ما قبلو نشوفها كالو حالتها تعبانه ويخافون عليها جنه ابد ما نلتقي بيها بس من تنام نروح نباوع الها من الباب ونشوف حالتها تكسر الخاطر

الله يعين قلب امي وهي بگبرها امي تموت على سوليين ودائما تميزها عنه اكو شخص يكون مميز هي هيج مميزه ومتعلقه بماما حييل حتى مره من المرات تخربط امين ونامت بيه مستشفى امي وسولين ماتت من البجي على امي ومن رجعت امي شافتها منهاره عليها اخذتها وياها وام حسن ظلت تحجي عليها كلتلها ليش هيج معلمتها عليج باجر تتزوج هم هيج تظل تبجي عليج؟

امي ظلت تبجي وردت عليها .. لا ما ازوجها اخليها يمي ما اكدر ابتعد عن بناتي ولا اكدر ابعدهن عني ما ازوج اي وحده منهن اخليهن بحظني ما اريد الرجال يهضمهن وياذيهن مثل ما تاذيت

جانت امي ما تقبل تزوج اي وحده بينه حتى من يجون خطابه ترفض وما توصل خبر لابويه لان تعرفه يجبرنه وجانت تطرد اي وحده تجي تخطبنا تدور النه انسان زين

جنت كاعده وشفت مصطفى اجه وهو كاشخ ومبدل اخر كشخه ولابس نظارته الشمسيه الفاخره تدل على البذخ والترافه العايش بيها

نزل نظارته واني تخبلت مال الزمه وافلشها على الراسه ابو الملاهي ابو النسوان شنو عدنا عرس لو داخل ملهى هيج مستهان باختي حتى جاي كاشخ اخر كشخه ما شاء الله مبين الحزن عليه من كشخته

وكف يمي وهو ينزع نظارته كال بغرور ... شلونج فافي خلطه شلونها اختج

جاوبته بسخريه .. وهي شنو اختي داخله عمليه تسوي تجميل لو شفط اختي متكسره وبين الحياة والموت وانت جاي عبالك واحد متشمتت شكد ما تستحي

رد بملل .. اهووو شنو متشمت اشو متعرفين تحجين بعدين اني هيج يعني هاي ابسط ملابسي

باوعتله بنص عين.. اموت واعرف منين تجيب فلوس لا شغل لا عمل نهار كله تكيت على الحبايب بالملاهي وكل هذا تشتري خلطات كومة وانت لا شغل ولا عمل كول منين تجيب فلوس احجي مو حتى حرام عليك هذا التبذير

جاوبني بضحكة .. هههه ولج يا ملاهي صار اسبوع مرايح من صادقتج لحد الان

وكفت مفزوعة ومتعصبه ... خاب دطيير انوب مصادقني لا صديقتك اني ولا شي مجرد اني انسانه ناصحة الك لوجهة الله والرسول صلى الله عليه واله وسلم يكول .. من رأى منكم منكرا فليغيره بيده ، فإن لم يستطع فبلسانه ، فإن لم يستطع فبقلبه ، وذلك أضعف الإيمان )

رد عليه وهو يضحك ويستهزء .. واذا كلش كلش ما كدرتي تغيريني

جاوبته بحده ...بطابوكة

ضحك .. ههههه انتي شبيج هيج بسرعه تهجمين اذا على لبسي يعني اني هيج طبعي احب اكشخ واذا على الفلوس خزينتنا ما تخلص ههه شنسوي يعني

باوعتله بملل .. دروح روح لاخوك كله خويه شتحتاج شلون صارت مرتك واني بخدمتك ابيع روحي الخاطرك

باوعلي بقرف .. لا ما احب اتلوگ ما اروح

فتحت عيوني مصدومة ومتعصبه .. تتلوگ ؟ لك الاخ سند انت شنو هذا منطقك وشنو هذا اسلوبك والله اذا ضليت هيج تتصرف احضرك وقد اعذر من انذر

جاوب ببرود .. واذا ما حظرتي وشنو يعني قابل انتي فد مندله شو شايفه روحج زايده عن اللزوم

درت وجهي واني احلف بصدق .. تام وحق ابو فاضل وحق سيف العباس وروح امي اذا ما رجعت للبيت وحظرتك واخليك تموت وتنجلط وما تحصل على خلطاتي ونصائحي

باوعلي بغموض .. صدك تحظريني ؟ يعني عادي عندج

رديت عليه .. اي عادي بالقران ولا يرف الي جفن اصلا اكيف لان بصراحة تعبت واني انصح وانت ما تنصح بس يله ميخالف الله يجعله بميزان حسناتي

باوع على الاشتر وهو يفرك بوجهه كال .. يله راح اشوف شمحتاج

وكفت واني ارد عليه ... اي كفو هسه رضيت عليك وحسسه مو اني دزيتك حسسه انت اجيت من كيفك

باوعلي بخزره عود ما راضي واني قابلته بنظره مقرفه قرفانه من وضعه كال بتهجم .. كون مال بوكس انوم معانيج بوجهج

رديت بقرف وعصبيه.. خاب دطيير شحدك تمد ايدك خاف ذيج المره ما نومتك بالجملة العصبيه هالمره لا كبل انومك بالردهه مال العناية المركزة

باوعلي من فوك ليجوه عبالك يباوع على حشره وخله وراح واني لحكته اريد اتاكد منه اخاف يلعب بذيله منا لو منا

هو وكف كدام نسيبي الكفو وهو يكول .. ها الاشتر شلونك ان شاء الله زوجتك ما بيها شي

باوعله وتنهد ورد عليه .. لا الحمدلله شويه احسن شكرا على سؤالك ما قصرت

رد عليه وهو يكوله .. لا شلون الاضفر ما يطلع من اللحم والدم عمره ما صار مي وشنو تحتاج اني حاضر المهم تكون بخيير

الاشتر بهدوء وهو يكول .. كفو منك  وما اصير بخير الا تكف من  ساهر وتحسين. الحقراء

بلل شفايفه مصطفى بحيره ورد عليه .. والله هالفتره ابد ما محتك بيهم ورغم يتصلون وساهر يتصل على امي ويكلها مصطفى ماكو بس اني ابد ما اخابره مبتعد من مشاكلهم

احتضنه الاشتر وهو يكوله بحب .. ايي هسه ارتاحيت لا عبالك ما احبك ولا عبالك انت قليل عندي انت مثل صفاء واكثر وذول حقراء يدكون بيك الناقصه مثل ما دكوها ويه غيرك ذول غدارين وما عندهم صاحب صديق ما يحبون غير نفسهم انت كون حذر واكطع علاقتك بيهم

اردف بحذر .. انت تعرف ساهر النذل خطب افيان من ابوها يعني وصلت بيه الحقاره يعاديني بنسابتي

اني انصدمت حسيت وكع كلبي ببطني ومصطفى عاط فضحنه بنص المستشفى وهو يكول ... شنووو شنووووووووو لا يا حقييير يا ساهر

لزمة الاشتر ناحيته وهو يتلفت بالمكان ويحجي وياه بهمس .. نصي صوتك فضحتنا وبعدين هذا الحادث وكل شي صار بسبب ساهر هو خابر ابو سولين وكله اني هددته ورفضت يصير عديلي وصار الي صار

مصطفى انجن .. بس اوكف هو هذا ساهر شلون هيج يسوي يعني مو يعرف بيه اني دا اتواصل وياها حقير يعني شلون هيج يلعب من وراي بالقران ما اخلي يتزوجها لو على كص ركبتي انوب لازكلي ببنته التطلكت هديوه المخبله

الاشتر بتنهيده .. عوفنه منه ان شاء الله اني اشتغل عليه انت كل شي لا تسوي انت بس ابتعد عنه وخليني انام مرتاح واكعد مرتاح لان بالي وهمي كل عندك لا تشغل بالي اكثر واني مصايب امة محمد كلها على راسي

مصطفى نزل عيونه بخجل ورد عليه .. لا هذا هو راح ابتعد عنه وفافي هم وياي دتنصحني صار اسبوع تقريبا مسهران برا ولا شارب الحمدلله

هو باوعلي بنص عين وهو يكول .. انتي ليش ما تكعدين مو كتلج علاقتج بيه هذا فد واحد ساقط ومنحط اخاف ياذييج

مصطفى باستنكار .. هاي شنووو انووووب شو كابله وبزه بعينه صدك جذب شبيه ساقط والله جاي امشي عدل

ضحكت كتله .. لا تخاف ساقط على روحة مو عليه واذا تجاوز بكلمة عدنه بلوك بالبيت اركعه ببلوكة اعجن الجمجمة اله

هو ظل يضحك ومصطفى يباوعلي بعصبيه وشاد على شفايفه ويتمنى لو يهطرني براشدي ويريح نفسه

.........................

سوليين

جانت اديه ترجف من الوجع وليلي كله ما انام صرت افكر بحياتي اني شنو الي سويته بروحي اني ليش هيج صار بيه منو السبب ابويه لو الاشتر لو ثنينهم وجعي هذا يخليني كل لحظه اتحسب بيها عليهم

دخلت الممرضه باوعت عليها خلت الي علاج ومسكن شويه حسيت هدء الوجع وصرت زينه حمدت الله وشكرته ماكو احسن من الصحة لان الوجع من يوصل حده يتمنى الانسان لو يموت ولا يعيش هيج شعور

بحيث تمنيت يكطمون رجلي ولا اتحمل وجعها جنت موجوعه حييل

دخلت عليه ممرضه جديده ما شايفتها كعدت يمي وهي تكول .. شلون صرتي هسه ما تحسنتي

رديت عليها بصوت مبحوح .. احس شويه الالم هود احس احسن

كالت بحذر وهي تتلفت يمنى ويسرى كالت .. اني اجيت من طرف ابن عمتج حارث ماكدر يدخل ولا كدر يشوفج

باوعتلها بحذر واني احجي وياها .. شبيه شيريد

كالت .. يكول خلي تحجيلج شنو سبب الحادث وهو يعرف زوجج وابوج هم وره قتل امج وهو السبب بكل شي هو سلمها لابوج وخلاها قتلها واتهمها باشياء مالها صحة

شهكت بوجع ولزمت صدري الضلع احسه نابت بگلبي .. هو هيج حجه كافي لا تحجين شي ما اكدر اتحمل الدكتور ما يقبل ما يقبل اسمع اي كلام يغثني

ردت عليه .. يكول خلي تنطيني اي معلومة منها واسجنهم واعيشهم بالسجن واخذ حق امج انتي بس احجي وخليني اوصله حرامات هيج يضيع حق امج وهم حتى ضابط تحقيق ما خلوه يدخلولج واكيد يغيرون اقوالج

شهكت بوجع وظليت ارجف الوجع رجع هاج عليه وصرت ابجي بصوت مسموع وادي على جرحي اريدها بس توخر منها واني ما عولت سكن الوجع عندي

خلت هي وانهزمت اول ما شافت حالتي هيج ودخلت دكتوره عليه باوعتلها باستغراب وذيج توترت وخلت وراحت

وصلت عندي الدكتوره وهي تحجي بخوف .. شبييج هااا رجع عندج الوجع

ظليت ارجف اريد احجي ما اكدر ما اكدر حتى انطق بكلمة وحتى لساني ثكل وعيوني غوشت وهي صارت تروح وتجي وتريد تساعدني بكل طريقه

طلعت شويه وشفته هو دخل وياها ويحجي بعصبيه يكلها .. يعني هي جانت ساكته وممتوجعه وسكنت علاجها جبته من خارج المستشفى شنو الي يخليها ترجع تتاذه هيج منو دخل عليها

ردت عليه الدكتوره .. والله محد بس اني والممرضات ودكتور الخفر يجي باليل ومراقبين حالتها بحذر ودننطيها دافع معنوي وكذلك دننطيها كورسات شلون تتنفس بيها وشلون تساعد نفسها بالفظ الكلام وهذا كله ما نسوي ويه المريض بس هي لان حالتها خاصه

طلع من الغرفه وهو متعصب خفت لا يفهم شي من الممرضه وانوب يروح يهجم على حارث واني بعد ما بيه للمشاكل والله ما بيه

وخايفه اصحى ومن اطلع ياخذني وياه واني ما متقبلته والله حتى انتحر بسم الحيه الي اخذه واخلص منه

رجعت انطتني علاج عبالك خدرني حتى ما اكدر احجي ولا اكدر ارفع اطرافي ظليت مثل واحد مبنج بس اباوع بعيوني

شفته دخل عليه مره ثانيه وملامح الحزن والقهر واضحة على معالم وجهه سد الباب بهدوء ودخل واني حتى تنفسي احسه انكطع هادئة حييل والغرفه هادئة ما اسمع بس صوت حذائة ما جنت اريد يتقرب ولا يكون عندي بس جنت لا حول ولا قوه جنت مثل الميت بس عيوني تباوع

لزم ايدي وهو يبوسها بحنية ويكول .. الوصلته الج الممرضه جذب و ما صار وبس تصحين وحالتج تصير زينه راح اكشف هواي اوراق كدامج

وخليج على يقين اني احبببج اموت عليج بحياتي ما حبيت شخص بكدج غير اختي رحيق بس تدرين شنو ثنينجن زيدتن همي اني ما اريد اكون سبب بتعاستج بس شنو ألي تامرين بيه اني حاضر عسا ما تطلبين موتي بس لا تطلبين تبعدين عني

جانت بس روحي تنازع لا اكدر احجي ولا اكدر ابجي ولا حتى اكدر اتحرك وتبدر مني اي ردة فعل

وكف وهو يدنك عليه باسني بجبيني وطول كال .. قاسمتيني تعبي يا مجروحة من تعرفت عليج حسيت انولدت من جديد يارب ما اضيعج

اردف بلهفه وحب وهو يكول .. ولج انتي ضحكتج صارت بيتي گلبي اسود على الكل بس والله عليج ابيض وطاهر لا تظنين بيوم من الايام ااذيج

انتي الحيه الاحبها انتي نسبتي هذا اللقب عليج وانتي فراشه مو حيه انتي كل شي حلو

تركني وراح واني بس الدموع الها الجرئة تنزل مني وتكون لا اراديه بحالتي الي صارت ابجي والدموع اخذت حييز من معاناتي

......................

جيهان

جنه اني وافيان كل شويه ورايحين للمستشفى خطيه اخو الاشتر ياخذنه لو حارث لو جاسم لان كريم مو هنا راح لشغله من البارحة

نروح ما يخلونه ندخل عليها واني اظل كاعده اصلي الها وابجي  منا من اتعب اخر شي اجينه ما يخلونه بس نباوع الها من الجام لو من الباب ميقبلون ندخل عليها

باليل ما يقبلون واحد يبات يمها فرجعونه رجعنا جاسم ابن جدو كهلان خلينه ورجعنه ابوي جان كاعد يكرط كعك افيان ما تكعد اله تحجي كلتله .. شنو صلاوات مشتري كعك

رد عليها .. لا وزعوا بثواب الحسين واكلتهن تردن ؟

استغربت اشو هذا متغير مو مثل قبل شبيه شنو نيته اني ادري بيه جذاب وبعمره ما ينعدل بس براسه موال شنو براسه ما اعرف

اني ما حجيت لفافي عن كلامة ما ردتها تصدك بكلام ابوي عن الاشتر وتكرهه وانوب تروح تسويلنه مشاكل ففضلت السكوت

كال ... اي شلونها بنيتي سوليين كاسره ضهري وخاطري بس شسوي اذا هذا ما يقبل ان شاء الله الله يموته ويخلصنه منه

ردت عليه افيان .. اسم الله اسم الله ان شاء الله الموت لاعداء نسيبي شلون هيج تحجي عليه

هو شمر عليها استكان الجاي وهو يغلط عليها ... يا بت النعال يا بت الجلب يابت العار ولج هذا نسيبج الداكة صدرج بيه لزمني فطسني تفطس حقيره كلبه امشي ولي من وجهي لا ازوجج لساهر غصبا عنج

تخصرت وهي ترد عليه ... يااا حتى نسيبي يلعب لعب انوب هو شلون يحب ساهر يتخبل منه

سحلتها منه سحل واخذتها ما تكعد ولا ترد لسانها وهو يصيح ويغلط وظل يفشر

عرفته هذا ما ينعدل ما تصير اله جاره ابد

كعدت وهي تطكطك بموبايلها عبالك مصاير شي ابد ولا تهتم للرزايل والغلط عندها برود مو طبيعي

حجيت وياها بخوف... ضمي الموبايل لا يجي ويشوفج بالقران الا يذبحج ويشرب من دمج

فتحت عيونها بصدمة وعلى وجهه ملامح فرحة كلتلها .. شبيج شكو

ردت عليه .. عمو كريم مجاوب عليه وكاتب اهلا اختي تفضلي

تقربت منها واني اباوع للكتابه كلتلها .. طفي عوفي هسه سولين مريضه مو وكت هاي السوالف

ردت عليه .. اي والله خلي يولي فد ططوه بس كلنه نلعب عليه اختي تمرضت بس لا شور بينه عزااا لا بس شنو شدعوه شمسوين مغتصبينه

ضربتها على راسها حيل .. ولج حيوانه انتي ما عندج غير هاي السوالف الجايفه متستحين انتي

ردت عليه وهي تفرك براسها بوجع كالت .. شسوي غير متعلمة من زبوناتي هيج يحجن متعيني هاليام ماكو كل ما يجن اطردهن ونذرت ما احف واشير الا سولين متعيني عليها تصير زينه

رديت عليها بملل.. دعوفي الموبايل ونامي

جاوبتني .. بس خليني انصح صافي كم نصيحة اريد اجر من رب العالمين لان اجه للطريق صافي ابو العرك

اخذت منها الموبايل بالكوه وطفيته وضميته وخليتها تنام لان اذا تظل تظل سهرانه للصبح واني ما اريدها اصلا تحجي ويه مصطفى وهم ما اريدها تسهر

كعدت الصبح تقريبا ساعه بالتسعه لكيت البيت فارغ ابوي ماكو وافيان نايمة وامين نايم

نظفت البيت وخابرت على جاسم يجي ياخذنه البيت بعده ينث تراب لان بنيان جديد ما ينظف بسرعه

اندك الباب اني عدلت حجابي وصحت منو تفضل

ردت عليه مره صوتها مالوف ومار عليه كالت .. اني ممكن. تفتحين الباب

فتحت الباب وهن دخلن انصدمت من شفتهن عزا هاي منو ايـــــــــو وامها شجابهن شلون اندلن بيتنا شعندهن جايات

همست بتوتر وقلق .. هلاو

باوعتلي بقرف وهي تكول .. ابوج موجود لو لا

رديت عليها .. لا مموجود بس ليش محتاجات شي

باوعتلي ايـــــــــو وهي ترفع حاجب كالت بحقد ... اي اليوم اني جايه واريد احجي لابوج عن كل شي احجيله شلون اخذتي كريم مني

باوعتلها مستغربه ... شنو اخذت كريم منج ؟ انتي شدتحجين

خفت منهن حييل خفت يذبن عليه تهمه ويسولهن سالفه عليه ويخلن ابوي يذبحني

كالت امها بحقاره .. اي مو انتي ذبيتي روحج عليه وهو طردج وكلج ما اريدج وانتي لزكتي لزك يا عديمة الكرامة والله اليوم احنه جايين ونريد نخلي ابوج يردج لان انتي ما الج رداد عيب عليج الولد ما يريدج ويريد ايو شكو تتلزكين بيه وعدنا شهود عليج كوثر تشهد ضدج

رديت عليها بعصبيه .. خليني محترمتج خاله وبعدين اني شدخلني غير بنتج ام السحوره سوتلها سحر وهو لزمها وطلكها قابل شنو اني كايلتله طلكها

ما اشوف اله اجه ايوي من بعيد واني من الخوف رجف كلبي كلها .. خيير شكو انتن منو

هو انها حجت بتمسكن وهي تبجي .. خويه جايه على الله وعليك اريدك ترجع حق بنيتي من بنتك وخليني احجيلك شسوت بيها وشلون خلتها تتطلك

نهاية البارت ... يتبع

كونوا انتم كونوا بخير .. احبكم 💔

لا تنسوا التصويت والمشاركة بكم نكتمل 🥺

التصميم من ابداع ام عبد الرحمن من متابعين كروب الفيس 😍