رواية #وكر الأشتر الفصل الأربعون 40 - بقلم الكاتبه سمو العراق

بارت ٣٩
رواية وكر الاشتر
بقلمي .. نور سمو العراق

💔💔💔💔💔💔💔💔💔💔💔💔💔💔

- ولمَ يعدَ هنأكَ متسعَ لشمعهَ أخرى ، ولم يعدَ هنأكَ رمأد يكفَي للحظأتَ ألرثاء ألقَديمهَ !
• موجوع قلبي | ⌯

.........................

صفاء

من اصعب واشد اللحظات من شخص يفقد انسان عزيز عليه او يحس ان هو بخطر يتمنى الموت يتمنى لو يحول الآلم بيه ولا يشوفه يتألم

نزلت من سيارتي بسرعه شفتها واكعه والاشتر كاعد مقابيلها وهو رافعها الصدره ودمها مقتص منها وسايل على وجهها واديها وحجابها متخربط وجهه اشباه بالاموات الساكنين ثلاجات الموتى

صرخت بصوت عالي عليها صرخت من قلب موجوع عليها لان بصراحة اني اعزها واحترمها واقدرها رغم عصبيتها ورغم انهياراتها ونكدها بس تظل زوجة اخوي تظل انسانه انظلمت عدنا وتعبت واحتلت هواي من تفكيرنا وتاذت بسببنا

ما عرفت سبب ازمتها ولا عرفت شصاير جنت منهار عليها وحتى اكثر من الاشتر الي جان حاضنها مصدوم بيها وما يقبل حتى واحد يلزمها منه

وابوها واكف يصييح ولازم رجال ضعيييف حييل عظام صدره مبينه من القميص المقلم وهو يهز بيه بعنف .. ولك انت كتلت بنتي موتت شمعة بيتي والله ما تروح والله اسجنك وتفصل غصبا عنك

والرجال جان خايف لابس جراويه على راسه لافه ويبجي وهو يكله.. والله شتريد اني حاظر شتريد اني تحت امرك بس اهدى شويه لو اعرف ابيع بيتي كل شي ما املك بس هالبيت بس كون البنيه ما بيها شي والله ابيعه واعالجها

تركته يتداهر هو وياه واني ركضت على الاشتر واحجي وياه بصياح .. شبييها شبيهااا شصار وياها احجي شصاااار

رد عليه بجمود وحسره وجان يحجي ويرجف .. ما ادري اديه ما تعيني اخذها مني اخذهاااا راح تموت

اخذتها منه وشلتها اني ما اكدر الها اني ضعيف وناعم مثلها مو مثل اخوي

خليتها بالسياره والعالم ملتمة والحصان واكف وهو هادئ ومفتوح من العربانه ومنزل راسه

خليتها بالسياره وانطلقت بيها لاقرب مستشفى ما استقبلوها هناك ونقلوها باسعاف بسرعه المستشفى الجملة العصبيه

جنت الوحدي بس وياي واحد من الجيران والاشتر ما اجه جان مرتبك محتار وقلق وحييل خايف عليها بحيث مكدر حتى يعيين نفسه حسيته هو السبب بالحادث او هو السبب بلي صار الها

جانت جريحة مكسوره وبسرعه ورمت عينها واكتساها اللون البنفسجي جانت جثه هامده ما تمت للأحياء باي صله ورمت عينها ورم غريب وصعد الجفن لاعلى وجهها بحيث احس عينها راح تطلع من وجهها

بجيت عليها لان حالتها تحسسني بالخطورة وكآن هاي البنيه مهدده بالموت شنو الي صار وشلون صار الحادث هذا كله ما اعرفه ولا اعرف شنو الدار بينهم وشلون طلعت من البيت

وصلنه للجملة العصبية دخلوها للطوارىء واني راحت للاستشاريه انتظرتهم هناك وطلعوا الدكتور جان دكتور شاطر وهو الي عاين حالتها كال .. عندها نزيف داخلي وعندها كسر بالقفص الصدري وكسر الفقرة الرابعه والخامسه  ورجلها أيضا متضرره

هاي بعد ما اخذوا اشعه كامله للجسم تنهدت بحيره البنيه متكسره تكسر ورايحة وتعبانه حييل وهي اصلا حالتها النفسيه تعبانة وما عندها قوه وضعيفه

ظليت كاعد بالمستشفى وبعدها شفت الاشتر اجه من بعيد وهو ملهووف اجه عليه وهو يسالني ... هااا بشرني هااا احجي شلونها سوليين وييينها

رديت عليه.. والله ما اعرف شكلك مو زينه كل شي متفلش بيها

باوعلي وهو بقمة غضبه وتوجة للدكتور وهو يحجي وياه .. دكتورر احجي المريضه سولين شلونها شنو تحتاج اذا اكدر انقلها لغير مستشفى خاص او للخارج اخاف افقدها

رد عليه الدكتور بهدوء وهو يكوله .. احنه كل العلينه دنسوي وممقصرين ابد وياها بس هي حالتها تعبانه وما عندها مناعه وعندها فقر دم

جاوبه بلهفه وهو يكف ردانة .. اني مثل زمرة دمها اخذ شكد ما تحتاجون اخذو المهم سوليين تعييش وشكد ما تردون فلوس اني مستعد وياريت تنطيني اسم افضل دكتور مختص بحالاتها حتى لو اخذها المستشفى الخاص بيه حتى يسويلها عمليه او يعايين حالتها

الدكتور جاوبه .. هي حالتها تحتاج الاكثر من دكتور لان الصاير بيها اكثر من حالها يعني هم براسها وهم عندها كسور هسه خليها هنا ومن تصحة ان شاء الله تسويلها عمليه

مسح وجهه بتوتر وتنهد بحييره .. زين شلون طمني ريح گلبي كول ان شاء الله تطيب كول ما بيها شي

جاوبه الدكتور .. ان شاء الله تطيب ادعولها

ابتعد عن الدكتور وهو محتار وجهه ما يتفسر ويفرك باديه بتوتر واضح عليه باوعلي وعلى وجهه ابتسامة حزينه وهو يكول .. خسرت كل شي كل شي يا صفاء

تقربت منه وآني اسأله .. زين بس كلي هو شنو الصار شطلعها شلون صار الحادث

تنفس بغضب ورد عليه .. كله من وره ابوها العار الحقيير والله وروح رحيق اليوم اذا ما رحت وكسرته مثل ما تكسرت فلا اطلع اشتر

مشه خطوات واني لزمته .. بس اوكف بس احجيلي شكو شبيه شسوالها هو شلون سبب الحادث ولازمله رجال ويكفخ بيه

بلل شفايفه بحيره وجاوبني .. سمعت حديث دار بينه يخص امها وهي انهارت وطلعت من البيت مهزومة منه

رديت عليه .. هي دومها مستعجله وما تفهم الكلام تاخذ الكلام من وجليه وتطفر بيه

تنهد وهو يجاوبني .. لا لا حقها هالمره اني مجنت ناوي احجي بيه بس ابوها خربط كل وضعيتي ورغم ما حجيت منه بس جملة وجنت كلش حذر بس هي فهمت فهمت كل شي وحقها ما الومها نزل عليها كل شي مثل الصاعقه

هي شافت امها شلون انضربت شافت مشهد امها وهي تنازع بروحها وابوها المجرم على راسها واني من ضمن الحضور حقها تهج وما تظل ولا دقيقه بالبيت

هي ما نست مقتل امها واني ما اكدر انسى شلون من طلعت ورفسها الحصان على صدرها بحوافره وداس عليها جنت مرعوب وكفت بحاله هلع لا اكدر اركض الها ولا اكدر اكعد واسكت بس كل الي اعرفه من شفتها رجليه ما كدرت تمشي خطوه وحده

باوعلي بنظره كلها الم و وجع كال بحزن.. شفتها شلون تتخبط بين حوافره

كمل كلامه بحسره وتنهيده .. احسه يدوس على صدري مو على صدرها احس اني صرت جوه حوافره مو هي

كعدت اواسي واصبر عليه وشويه واجه حجي اديب هو وابنه وبعد اجه عايد كلهم جانوا كاعدين بالحديقه وهي محد اجه من اهلها ولا حتى ابوها شكد مسكينه تايهه محد الها محد يسال عليها ولا ينشد على حالها صدك الواحد من دون امة يضيع

كعد حجي اديب وهو يواسي كله .. بويه استهدي بالرحمن كول يالله ان شاء الله تطيب وتصير سوالف

جاوبه والحسره واضحة على ملامحة وهو يكوله .. الخيل داس على صدرها وهذا الكسرني

هز رأسه بأسى حجي اديب وهو يكول .. السلام عليك يا سيدي ويا مولاي الله يساعد قلب زينب احنه حافر واحد داس على صدرها وما متحملين شلون سيدتي ومولاتي شافت خيول الاعوجيه وهو تدوس صدر الحسين وتهشمة

كمل كلامه وهو يكفكف دموعه ويكول .. الحسين سيد شباب اهل الجنه واحد من اصحاب الكساء ابن بنت رسول الله يسحكون صدره الشريف بخيولهم

باوعله الاشتر وهو عاقد حواجبه وقابض على ايده كال بتنهيده .. السلام على الحسين وعلى اصحاب الحسين

جاوبه ججي اديب وهو يكول .. اجو لابن زياد وهم يكولون نحنُ رَضضْنَا الصَّدرَ بعد الظَّهْرِ بكلِّ يعبوبٍ شديدِ الأسرِ

كلهم ابن زياد .. منو انتم

ردو عليه وهم يكولون ...نحن الذين وطأنا بخيولنا جسد الحسين حتّى طحنّا جناجن صدره .

كمل وهو يكول .. الله ينتقم من كل من اسس اساس الظلم عليك يا ابا عبدالله

ورجع لزم الاشتر وهو يصبره .. ان شاء الله ربي يصبرك من صبر جبال الصبر السيده زينب عليها السلام ويشتفي مرتك ويرجعها الك سالمة

جاوبه بجمود .... اميين بس تدري شنو الي كاسر خاطري راحت زعلانة مني والحادث صار بسببي اني اذيتها تعبتها وهي متستاهل والله رغم جنت احاول أرضيها واصلح كل شي بس بالحظة كل شي خرب وكل شي انهار كدامي

رجع باوع الحجي اديب وهو يكوله ... احجي وياي صبرني لا تخليني هيج لان راح اطك واموت ما اعرف شبيه اتمنى اروح لابوها واذبحة بيدي وما يشفه غليلي كل شي بسببه هو العار هو لو مجاي ما جان صار الي صار ولا طلعت مرتي

ظلينه كاعدين وهي بالعنايه المركزه بعد ما سوولها عمليه وقفوا النزيف بس هم خايفين لا الضلع المكسور يدخل للرئا ويضربها وهنا بعد ما نكدر نسيطر على التنفس والاوكسجين فنخاف منها تسحب نفس عميق وتاذي الرئا لان حاليا منكدر يسوي اي تدخل جراحي

هو تخبل من سمع هيج حالتها وظل شويه وبعدها ركب سيارته وراح وما نعرف وين راح

.........................

افيان

جنه كاعدين ببيت جدي كهلان وهو ابوي اجه اخذنه بسرعه بسرعه وهو يغلط علينه ويسب ولعب لعب مدري شبيه انجلب علينه

خلينه ورحنه دخلنه للبيت جان مجرد هيكل بعده مكامل بس الغرفه الاخيره جانت ملبوخة والباقي بس طابوك ومطبك كاشي وبيها بيبان وشبابيك

هو كال بعد ماكو ما عندي فلوس ما اكدر اكمل كل فلوسي العند حلوم انصرفن اكعدن بالبيت هيج وانجبن

كعدنه واستسلمنه للامر الواقع كلنه شويه شويه نكمله بعدين دام هو ما ظل شي

انتبهت على ابويه جان متوتر وخايف ومرعوب مدري شبيه يريد يموت وكل شويه وباوع الموبايله وكل شويه وكمز من الباب يندك حييل جان خايف ويحسس الواحد بيه شي

طلع من البيت واني رحت لجيرانه اطلبهن خمسه ما ينطن عاد كنكت عليهم شهر كامل حتى اطلع فلوس الخمسه اني فافي محد يغلبني

رجعت يم جيهان واني اضحك وهي ضايجة صايبته كأبه من الصبح مدري شبيها

لكيت خلي اروح اسويلها شي اونسها حتى تفتره شويه طلعت الها حساب كريم بالفيس وظليت اكلب بالمقاطع

جانت مقاطعه حلوه تخص مكان عمله ومتفجرات وهندسة المتفجرات صحت الها واني اضحك .. جيجي يحلو تعال شوفك عمك حبيبك شلون يفكك متفجرات يم يفككج ان شاء الله

شمرة عليه المكناسه بغضب وهي تكول .. شكد ادبسز وسخيفه شنو هالكلام ولج بعدج طفله شنو هالكلام

جاوبتها .. نيتي صافيه شدخلني بيج تفسرين الكلام حسب نيتج الخايسه

هي تقربت مني وهي متعصبه واجت تباوع للمقطع جان هو كاعد على ركبه بمنطقه زراعيه ولازم ابلايس احمر صغير ولابس ساعه سوده ومحبس بالبنصر وشفقه عسكريه وملابس عسكريه وديفكك عبوه ناسفه ويشرح شلون يفككها ويقطع اسلاكها

جانت تباوعله وعيونها تلمع بحب كال .. بله ادخلي على التعليقات دنشوف العالم شنو تكول

ضحكت ودخلت الها اول تعليق جان من بنيه مكتوب على حسابها كاتبه ..ما شاء الله عليك الله يحبك كل الصفات الحلوه جمعها بيك جمال وذكاء ورزانة وشخصيه حلوه وقويه هنيال التاخذك

وهو مجاوبها .. شكرا اختي العزيزة على هالاطراء الجميل

ضربت جيجي واني اضحك .. ههههه لج بابا يتغازلون بعمج حبيبج

باوعتلي منعصبه كالت .. خاب انجبي شهالعبان نفس شنو عمج حبيبج كولي بس حبيبج

ضحكت ... ههههههه لا متطورين صلاوات

بعدها رجعنه نقره بالتعليقات من ضمن التعليقات جان مكتوب ..جنت اتمنى ادخل هندسة متفجرات لكن اهلي ما قبلوا وخافوا عليه ودخلت هندسة مدني وتندمت لان ما احبها بس ياريت تفهمنا شلون دخلت هذا المجال ياريت نفهم

هو راد عليه باسلوب حلو وراقي .. حياك الله حبيبي الغالي بالعكس حبيبي اختصاصك ومجالك حلو ياريت تحبه راح تبدع بيه وتكدر تطوره .. اما عن سوالك شلون دخلت هذا المجال هو اختصاص بصنف هندسة الميدان او الهندسه العسكرية بعد ما تكمل الدوره الاساسية بعدها تكون بيها افرع من احد افرعها هو معالجة المتفجرات والقنابل الغير منفلقه هو مجال حلو بس شويه خطر ويحتاج حنكة وذكاء ودقه

و واحد كاتب اله ... اتمنى اصير مثلك او اصير فد شخصيه مشهوره

هو مجاوبه .. حبيبي تسلم ان شاء الله تصير احسن مني بس ياريت ما تسعى وره الشهره وتقود شخصية الضابط الحقيقي حتى يتحقق طموحك وتطور من نفسك واكيد راح تنجح والكل يفتخر بيك تمام

باوعت الجيهان واني اضحك وهي سرحانه بخيالها وياه كالت .. شفتي شلوون ترا حتى ردوده حلوه ما يحب يكسر خاطر واحد وتلوميني ليش احبه والله هو ينحب

باوعتلها بغموض وبعدها حجيت وياها .. نراسله ؟ من غير حساب ونشوفه اذا يحبج او لا

فتحت عيونها مصدومة كالت .. عزا بعينج كون انتي صدك ما تستحين شلون هيج تسوين

رديت عليها بانزعاج .. دطيري ما استحي شمسويه اله قابل مغتصبته

ضربتني حييل وهي متعصبه من كلامي وجرئتي ضحكت عليها وحجيت بحماس .. لا والله شبيج ادخليله بحساب واصبغي بيه دامة متفاعل وبعدها كليله اني جيهان هيج افتهمتي احسن ما يطير من ايدج مره ثانيه

تنهدت بحيره وردت عليه .. اخاف اني ما عندي جرئة وما اعرف شلون احجي وياه وبعدين يمكن ما يستجاب اليه اني شلون بهاي الحاله

ضحكت .. هههههه ولج هسه انجرب شكو بيها وبعدين مو احسن ما ظال يجيج وين الشايب والعايب على الاقل هذا هم شايب بس تحبي هههههه

باوعتلي بنص عين معاجبها الوضع ودارت وجهها واني كعدت وسويت الحساب كتبت عليه .. حساسه ودمعتي الماسه

ورجعت رتبت الحساب وكتبت عليه بالبايو جنى ادرس بجامعة بغداد قسم علوم سياسية اتذكرت قسم رنا ورجعت كتبت لو ان هذا العالم بطيبة قلب ابي ما تاذيت ابدا

هو ادري السالفه جذب بس شنو ابعد الشبهه عن جيهان حتى ما يحس بيها لان هو يعرف ابوي كل سالفه عوجة مسويها

بعدها دخلت على المراسله اول شي دزيت طلب وانوب رسلت اله رساله كتبت .. هلاو سيدي فدوه اذا موجود ياريت تجاوب

باوعتلي جيهان بفهاوه وهي تكول .. عزا العزاج ولج شسويتي شراح تكولين انتي منو

ضحكت .. هههه ولج راح اكوله اني وحده بيت خالي من الموصل وهم مهجرين انت وين مكانكك وتحررت مناطقهم لو لا لان هم لحد الان موجودين هنا

باوعتلي وعاقده حواجبها وفاهيه من كلامي كالت .. شكد حية انتي ومتستحين ولج شلون هيج عيب نضحك عليه

جاوبتها بعدم اهتمام .. خاب ديله ضلت علينه دخلينه هم نضحك مو ملينه وطلعت رواحنه وانتي تحبي سوي مثل ما اكلج وجرجري وبعدين كليله اني جيجي تمام

ردت عليه بخوف .. اخاف

غميتها .. دمشي ولي شكد ططوه تخاف بس عود هسه من يتزوج كعدي دكي ولطمي مثل النعال

هي تعصبت وظلت تحجي شلون اغلط عليها واني ظليت اضحك وعفتها

دخل ابوي بسرعه لزمت الموبايل وضميته بصدري صار دنيا اليل تقريبا ساعه ب ١٢ باليل وما اشوف اله الباب انهجم هجوم ويندك بصورة قويه وسريعه

رحت اركض فتحت الباب وجان نسيبي الكفو دخل بسرعه بعد ما دفع الباب واستوطن البيت وهو يكول ... وييين ابوج الزمال

رديت عليه بسرعه .. نايم بالصاله ليش شبي شمسوي انوب

هو تركني وتوجهه للصاله وهجم عليه وهو نايم سحلة سحل من فراشه كعد ابويه مرعوب وهو يصرررخ ... يممممه والله ممسوي شي والله كل شي ممسوي

بعدها باوع واستوعب هو منو كله بخوف وقلق .. هاااا الاشتر هااا سولين ماتتت ماتت بنتي ماتت لا اله الا الله

هو ندفه ببوكس خله اسنانه وكعت بحلكة وهو يشحط بدمة احنه ظلينه نصرخ من شفته الموقف واني حاولت الزم نسيبي احلي يعوفه لا يموته

دفع ايدي وهو يصرخ بوجهه ورجع رفعه مره ثانيه وهو يكول ... يا حقييير يا حيوووان يا سافل يا منحط ان شاء الله يومك قبل يومها يا كوا.. يا ساقط لك بالقران انت تحمد ربك تكعد وتعيش لان وروح ابوي وروح امي ما اخليك عايش لا والله اخليك تتمنى الموت وما تلگاه يا عديم الشرف

رجع ضربه براشدي وهو يهجم عليه .. لك انت شنو من مله انت شنو من بشر بنتك بين الحياة والموت وكاعد تدور فصول انت وذاك الزمال ساهر ساهر يكوكك وانت تركض مثل الجحش

رد عليه ابوي وهو يبجي .. والله والله مالي شغل هو ساهر وحجي تحسين كلولي كالو لا تعوف حق بنتك ودزو وياي جماعة خلونه ندك بيت الرجال ابو الحصان وطالبت بفصل الها علاج الها

رفعه من قميصه وهو يصيح بوجهه وابوي يرجف مثل السعفه وعاط بيه .. انت منو كلك انيييي ادور فصل منو كلك اعالجها بفصل الرجال اني اعتقته لوجهه الله تعالى وهو ما اله ذنب هي طلعت كدامة بسبب افعالك الجايفه هاي بدل ما تدعيلها تكوم بالسلامة انوب رايح هاجم على الرجال الفقير تدور فصول

رد ابويه وهو يبجي ويهطر بحلكة .. والله بعد ما اعيدها والله هذا هو راح اعتذر من العالم وكدام الكل بس بشرني شلون صارت بنيتي سوده عليه

تفل عليه بغضب وهو شاد على شفايفه .. هامتك بنتك لو هامتك ما رحت تدور فصول براسها يا عار يا حيوان

اني جنت خايفه ومرعوبه من كلامه وهذا الكلام اشاره تبين ان سولين مسويه حادث

اني عطت بصوت عالي وجيهان صرخت وهي لازمة الاشتر تتوسل بيه وتحجي وياه .. شبيها سولين شبييها شصار وياها احجي فدوه والله من الصبح كلبي يوجعني حاسه صاير شي

جاوبها بهدوء وهو يتنهد .. سولين سوت حادث وهي حاليا بالجملة العصبية بس أن شاء الله مبيها شي

ظلينه نبجي ونصرخ واحنه نتوسل بيه ياخذنه الها ونرجف بس احنه خفنه عليها خفنه تكون ميته لزمت ايده جيهان بتوسل ونحيب .. فدوه هي بيها شي خاف ميته فدوه احجي والله كلبي مشلوع عليها

جاوبها بتنهيده وسحب ايده منها كلها .. والله لا تخافين ما بيها شي ان شاء الله هسه تكعد وتصير زينه

لزمته بتوسل ودموعي مثل المطر ... فدوه اخذنه الها اخذنه نشوف اختي الله يوفقك

باوعلنه بحسره وهو يبتسم ابتسامة حزينة كال .. كل ما تضوج مني وكل ما تنهار اجيبها الج وتصير زينه وهالمره اريدجن تجنها بلكي تكعد وتصير زينه

رحنه نركض بسرعه واحنه نبجي وكلوبنه مثل النار عليها وبدلنه بسرعه ورحنه وياه ودموعنا تشكي حالنا

وخلينه ورحنا الها .....

...................

جيهان

من بعد طول الطريق واحنه على فرد دمعة وعلى فرد حرگة گلب وصلنه للمستشفى دخلنه وهو ويانه لكينه هناك اخو صفاء واهله ما اعرف اي شخص منهم بصراحة بس عايد اعرفه

ردنه ندخل عليها ما قبلوا ما قبلوا اي واحد يدخل عليها كالو مو زين عليها وخلوها هي بالعناية المشدده و الحمدلله من بعد ما سوو الها عمليه توقف النزيف عندها

وكف يمه واني اساله .. فدوه بس كول شلون سوت الحادث وابوي ليش هيج وياها شنو ابويه سبب الحادث احجيلي فدوه ريحي كلبي

تنهد وهو يجاوبني كال .. ما اعرف شكلج بس هي طلعت وصار الحادث وانضربت بعربانه وحصان وهو السبب عندها كسور هو الحصان اذاها

ظلينه كاعدين للفجر ندعي ونبجي و ننوح اني واختي واخوي وهو كل شويه يروح ويجي مع العلم كال اخو عنده شغل مهم بالبصره بس هو ما راح واعتذر منهم

بعدها كالو واحد منكم يدخل عليها اني توسلت بيه ادخل الها لان هو كل شويه يروح ويدخل عليها ويجي بس احنه محد دخل عليها منه

دخلني عليها باوعتلها من الباب شفتها نايمة ملفوف راسها وعينها رزكه وحاطين بحلكها صونده وجهاز تنفس ورجلها مجبسه لحد الفخذ وكوه تتنفس وجهه يخوف اصفرررررر وشفايفها بيض

انهاريت عليها ظليت ابجي بصوت عالي اعتقد وصل المسامعها وهو من شافني هيج بسرعه صاح الممرضه وطلعتني توسلت بيها توسل بست ايدها وما قبلت تحجي اي شي ما رضت

طلعت شفت جدو كهلان وعمتي وجاسم وكريم كلهم موجودين عفتهم ورحت كعدت على المصطبات بالحديقه وبجيت بجيت من كل كلبي واحتضنت وجهي باديه ونحب .. ولج يمه لج تعالي شوفي شوفي سولين شصاير بحالها فدوه يمه ادعيلها انتي يم رب كريم ادعيلها يرحم ويعطف على حاله يمه ما نريد ننفجع بشخص عزيز علينه مره ثانيه لحد الان ما تخطينه فاجعة موتج انوب تروح سولين

اجت افيان وحضنتني وهي تصبر بيه وتبوس بيه وترجع تبجي بس اني لان شفتها ت منهاره بلعت ريكي جاف مثل الحنظل وحضنتها كالت .. شبيها حالتها خطره موو فدوه احجي كلبي حيوكف

تنهدت ومسحت دموعي.. ما ادري ادري عقلي راح يوكف ليش هيج صار لج متكسره تكسر ما ظال بيها شي صاحي

ظلينه كاعدين وبعدها اجه عمو كريم والاشتر كالو .. روحوا هسه ماكو داعي وبعدين تعالو لان أهل المستشفى ما يقبلون هالكد عدد روحن وبعدين تعالن

اول مره ما قبلنا بس بعدين استسلمنه للامر الواقع واخذنه عمو كريم ورحنه

اول ما وصلنه للبيت لكيت ابوي وجهه كله دم وعادي عنده مكتول كتله من هاي التمام ويشخر شخيره يجيب التايهه ولا مهتم للكتله

باوعتله وتنهدت .. شنو من مله شنو من گلب بنته بين الحياة والموت وهو كاعد يشخر ولا مهتم وهي الناس الغربه كاعده وساكته ومحروك كلبهم عليها

صكيت على اسناني اتمنى لو اشرب من دمة واقتله بيدي حقير نذل كل شي هو السبب بيه

ظليت كاعده منتظرته يكعد وفافي نامت خطيه هبط ضغطها هناك وما تحملت خطيه نامت

كعد وهو يباوعلي انصدمت بيه وهو يضحك ويكول .. ها بابا جهونه شلون صارت اختج

باوعتله بحده وعصبيه.. اذا هيج هامتك اختي ما رحت الها بالمستشفى مو حتى الناس الغربه اجت وانت ابوها ما اجيت

رد عليه بحزن .. شسوي رحت للمستشفى وطردني رجلها وانتي شفتي البارحة شلون لزمني وكتلني واني رجال جبير لا حول ولا قوه وما اكدر عليه

تنهدت وسألته.. هو ليش صار الحادث وشلون صار

كعد مقابيلي وهو يحجي بحزن .. لان هي عرفت بيه هو السبب بموت امها

فتحت عيوني مصدومة و وكفت مرعوبه من كلامه .. شنو شلون شلون هو السبب بموت امي غير انت قتلتها انت ليش تجذب

نزل راسه وهو يكول بحزن .. اني رجال اطلع واطب ما ادري بالدنيا طشت رشت وهو خابرني بيوم من الايام وسلمها الي كال لكيناها ويه واحد جانت بشقه مال دعارة وجانت تستغل البنات المراهقات ودام تشتغل بالمستشفى تسويلهن عملية ترقيع لذلك عليها تهم هواي اكتلها واغسل عارها واخلص منها لان هاي خاينه وعايبه

رمشت بعيوني مدهوشه مصدومة ومغبونه كل الم العالم بيه ... شلون شلون هيج امي مستحيل تسوي هيج شي انت واحد جذاب انت تريد تشوه سمعة امي وجبت حياتك تريد تشوهه سمعتها

جاوبني وهو يحلف .. وحق كل حرف بالقران لا جذاب ولا شي وهسه اختج بس تصحة راح تسمعين منها هذا الكلام هو ضحك عليه هو دمر عائلتنه انوب كعد يهدد بيه ازوجة سولين وخلاني جبرتها عليه ومتندم اني على كل شي متندم ومقهور حرمتكم من امجن بس هو السبب هو لعب بعقلي واني ايار جنت احبها واموت عليها اعشكها بس شسوي غير هو لعب بعقلي

ظليت محتاره مصدومة عقلي طفر من راسي لا اكدر احجي ولا اكدر اسكت بس شلون يعني معقوله الاشتر هيج يسوي والله ممعقولة

رجعت سألته.. زين شنو غايته حتى هيج يسوي شنو المغزى واصلا شنو مصلحته من هذا كله

رد عليه .. اني اكلج شنو مصلحته مصلحته يريد يخليني ازوجة سولين لان هو مره خطبها وحاجيت أيار وما قبلت كالت اريدها تكمل دراستها واني رحت وكتله امها رفضت وهو شد حرابه ويه آيار الله يرحمها وحط عقله وياها منا لمن سوى عليها تهمه وخلاني اكتلها واني حيل متندم وضايج من عملتي

عفته ورحت واني ابجي مصدومة منهاره حقها احتي تنهزم حقها كل شي تسوي اذا رجلها هيج وملفق تهمه على امي وهي شافت شلون ابوي كتلها وجان هو اصلا موجود وياها ليش هيج يارب ليش هيج يصير ويانه والله تعبنا وين الحقير يصير بطريقنا

محجيت لافيان عن كل شي ما ردت اتعبها فوك ما هي تعبانة بس معقوله كل الحجاه صح والله مدا اكدر اصدك بيه ابد ما اكدر

.....................

رنا

اجت ام حسن عليه مقهوره خطيه على سولين كالت مسويه حادث وهي بالجملة العصبيه وامي وحارث راحو الها حارث تخبل انجن عليها شفت الحب بعيونه شفت شكد هو يحبها ويريدها بس القدر فرقهم

هم راحوا للمستشفى واني خليت ورحت لبيت جدي كهلان صار هواي مرايحة الهم كعدت هناك يم كوثر كالت بانزعاج .. وهي شبيها غير تنتبه ليش اول ما طلعت راحت تفلشت هسه مو هاي اني اطلع وامشي وشكد داومت جامعه ما فديوم سويت حادث بس الضاهر هي ممتعلمة ولا متطلعه على العالم ومتعرف تمشي بحذر

حجيت بتنهيده .. لو تشوفين شلون حارث تخبل عليها وكال الا هسه اروح الها واشوفها مستحيل ما اكدر هيج اصبر وسولين بين الحياة والموت وخله وراح هو وامي ومستعد لكل شي حتى يعالجها

ضحكت بسخريه.. هه على شنو قابل حترجع اله وبعدين هي متزوجة اصلا ما تباوع بوجهه بس اخوج يركض وره سراب وبصراحة ما عنده شخصية بحيث يركض وره وحده باعته وراحت تزوجت ولا حتى فكرت بمشاعره

رديت عليها .. اولا هي جانت مجبوره ودزتله رساله ومدري يا ساقطه ما وصلتها اله ثانيا هم ما بينهم شي ولا قصة حب حتى تفكر بمشاعره وهي ترا مو بطرانة بس حظ ما عندهن بنات خالي من كد ما عباد الله فاتحة عيونهم عليهن مسكينات

سكتت مجاوبت وانلطمت على حلكها كلتلها .. شنو ايـــــــــو تطلكت بالمحكمة مو

ردت عليه .. هاي مسكينه فقيره مدري منو لعب بعقل كريم وغيره عليها الا هو يموت عليها وجان يفديها بروحة بس بعد مدري منو سحرته وغيرته عليها

ضحكت .. هههههه منو غير هي مسويتله سحر وهو لزمها وطيح حظها وادبها والطلاك قليل بحقها اصلا لان هاي مجرمة تريد تبهذل كل العائلة

باوعتلي بطرف عينها وخلت وراحت معجبها كلامي وجانت حاسه بالخطر بعد الحادث الصار تخاف لا حارث يرجع السولين وتخاف لا سولين تتطلك بعد ما جانت الساحة فارغه الها

دخلت ام حسن وهي تكول .. شلون لكيت عروس الكريم تجنن بس كون يقبل يتزوجها والله اكيف اطير من الفرح يا ايو يا خبارها تجنن

..................

صفاء

من بعد يومين تقريبا هي جانت فاقده وجانت بس على المغذي وداخلة غيبوبه صارت مشاكل وصارت مطاحن وعامر داك بيت الرجال وهو رجال فقير لا حول ولا قوه والاشتر تخبل انجن خله وراح طلعه من السجن واعتذر عن الدكة الي صارت دز حجي اديب وناس كبايريه

الحمدلله على كل حال نريد بس سلامتها ما نريد اي شي والرجال فقير نخاف من غضب الله علينه واصلا هي الي صارت كدام الحصان اثارت غضبه

اجت اختها جيهان شكد عاقله وهادئة حيل محبوبه ولطيفه واكو ناس من كرايبها جان موجودين والله هواي واحد رجال كبير وشباب تلاثه ومره واخواتها ثنين واحنه همين وحتى مصطفى اجه انصدمت من شفت مصطفى اجه لزمته كتله .. شعجب اجيت

رد عليه بغرور .. اجيت لخاطر فافي خلطه لان اني وياها اصدقاء

جاوبته ... ايبااااه لو والله اخاف ما ترضا من شوكت صرتوا اصدقاء وجاي تقوم بالواجب

رد عليه .. والله من فتره وعرفت اختها مريضه واجيت اشوفها وان شاء الله اي شي تحتاجوا اني حاضر وخادم

ضحكت بسخريه.. هه هاي كلها الخاطر افيان عمي هنيال افيان لو ندري هيج من زمان ركعناك بطابوكة

ضحك.. هههه لا مو هيج بس اني احترمها واعزها صح هي بعدها لسانها طويل بس خوش بنيه تنصحني وتغلط وترجع تهدئ يعني شي حلو

جاوبته بتنهيده .. اها تمام دام هيج خليك وياها ان شاء الله ربي يصلحك على ايدها هو احنه شنريد وبعدين انت شكو هالكد كاشخ ترا انت جاي مستشفى مو جاي نزفك

ضحك .. ههه والله ما اعرف اذا ما اكشخ متعلم وبعدين هاي اعتبرها ملابس بيت يعني مو شي اوفر

رديت عليه .. ههههه لا ابد ماكو شي اوفر

شفت جيهان من بعيد اختل توازنها حطيه هن من اختهن سوت الحادث لحد الان وهن ابد لا ياكلن لا يشربن بس يبجن حالتهن حاله وكل شويه وحده منهن متخربطه

فدوه شلون وحده تحب الثانيه يارب يحفظهن ويخليهن وحده للثانيه ماكو احن من الاخت

بس اثار غيرتي الشاب الطويل الواكف قريب منها والي لزمها من خصرها قبل لا توكع وتهوى للارض وكعدها وهو يحجي وياها بلطف وحنيه عرفته هذا كريم الي هي تحبه وهو حسيت بخوفه عليها حسيت بعطفه وحبه الها يعني مبادلها المشاعر

تغاضيت عن مشاعري ودامها تحبه ربي يسعدها وحاولت اشيلها من بالي ومن كيانيواتمنى الها كل الخير هي والي تحبه ودفنت كل مشاعري داخلي وما ظهرت منها اي شي رغم جنت اتمنى اكون الها وتكون الي

خليت ورحت يم اخوي جان بس ساكت ولا يحجي حرف وشارد بذهنه ابد مو ويانه وكل تفكيره بيها تذكرت حالته هاي مثل ما ماتت رحيق فضل السكوت عن فعل اي شي وجمدت كل مشاعره وكل ذره بجسمة

حطيت ايدي على جتفه وحجيت وياه بهدوء .. اشتر ان شاء الله اليوم تكعد وتصير زينه يارب

سحب نفس وزفره وهو يرد عليه .. ونتائجها شنو راح تكعد وهي كارهتني وكل وجع بيها تنسبه اليه ومستحيل تظل وياي اني اعرفها والادهى من هيج رجلها سكطت يعني صارت عرجه

وانت تعرف هي شكد تحب نفسها وشكد تحب تتباهى بروحها وما تحب اي عيب يكون بيها

صفنت عليه وسالته .. عرجة؟

تنهد ورد عليه.. اي الدكتور كال مستحيل تصحى وهي تمشي باستقامة لازم تميل ورجلها وتعرج بيها اني ما عندي مشكلة بس هي اكيد هي ما تقبل وراح تشوفني اني السبب بكل شي صار الها واني ابد ما الومها ولا اكدر اجبرها على شي وما ارفض الها اي طلب بس مستحيل اقبل الها بطلب واحد اذا طلبت مني اطلكها اني ما اكدر مستحيل اكدر اخليها تعيش ويه غيري او تبتعد عني لازم اصلح كل شي لازم

جاوبته بحيره ... الله كريم خليها تصحى وان شاء الله كل شي ينحل وتتفهم موقفك تجاها

تركني وهو يباوع على غرفتها وتارك العالم بضجته وهو متقوقع بصمتها وصامت وياها وعايش بدوامتها وحدها

..................................

سولين

احس بخدر بجسمي احس اني بعييييده عن العالم والعالم كله وراي واريد الحك بيهم ما اكدر اتقرب اتقرب وهم يبتعدون اكثر واسمع طكطكة ما اعرف مال شنو اسمع اصوات ناس تحجي وضجيج حييل يصدع بحيث راسي صار طبل

فتحت عيوني ببطئ واني اشوف الصداري البيض وادوات الاجهزة الطبيه بجيت بصمت وبعدها شهكت اجت عليه وحده من الممرضات وهي تركض وكالت بحذر.. حبيبتي بس اهدي حاولي لا تبجين نخاف على الضلع يضرب الرئة حاولي حتى من تتنفسين ببطئ اذا انضربت الرئة مراح نكدر نسوي شي حبابه ساعدي نفسج وخليج قويه وتنفسج خلي هادئ

اشرت على حنجرتي واحس شفايفي يابسه كلتلها .. اريد م مم مي

ردت عليه .. تمام بس شويه صحصحي واني اجيبلج مي بس خليج هادئة ولا تتحركين لان لحد الان الفقرات ممرتاحه والرئة تعبانة بس اهدي شويه

رجعت اشرت على حنجرتي واني اكلها .. اريد اكح بس ما اكدر بلعومي يابس

انخطف لونها وهي تكول .. على كيفج خليج حذره لا تكحين حييل وهسه اجيبلج مي يله هسه اجي

خلت وطلعت والدكتور اجه بدل المغذي وضربتي بالمغذي ابره ورجع باوع التخطيط القلب كال بهدوء .. عفيه سولين قويه آن شاء الله تصيرين زينه زوجج ما عافج ولا دقيقه والكل منتظرج حتى اخواتج

عقدت حواجبي والحسره اعتلت وجداني بجيت بسرعه وهو بسرعه حط ايده كدام وجهي وكال بحذر ... لا لا لتبجين نخاف من الضلع المكسور يزلف وياذي الرئة لا تتنفسين حيل خليج هادئة

خفت من كد ما يحذرون بيه وظليت كل شويه بالعه حسرتي على روحي واني استذكر الصار الصار اقسى من حالتي وصلت المرحلة حبيت بيها الاشتر وبعدها انخدعت بيه طلع هو مسلم امي لابويه وقتلها وليش سلمها ليش ما عتقها وخلاها رجعت النه ليش ما لزمه من كتلها ماكو عذر يشفع الهم قتلها كرهته حيل كرهته والسواد غيم على عقلي وين اروح وين امشي هذا مجرم وجذاب وكل شي سواه ما يشفع سوايته بأمي

لمحته من الغرفه من الباب الزجاج وسمعت صوته وهو يحجي ويه الدكتور صوته مثل العاصفه عصفت بصدري

وكل شي انعاد عليه انعادت عليه دموع امي من قتلوها وجانت تباوعلي بحسره ودموعها تنزل بصمت وعذاب ما كدرت ما انهار واطلع كل الي بداخلي

صرخت بصوت عالي واني ابجي .... لاااااا لاااا طلعوووا طلعوااا ما اريده ما اريد اسمع صوته هو السبب هو السبب بكل شي

جنت اصرخ بصوت تعبان وصوت رايح حتى كوه احجي صوتي مبحوح وكوه يطلع من حنجرتي حسيت بوجع اخترق صدري وبطني حطيت ايدي صدري بوجع واشوف الضجة مال الدكاتره واني فاتحه عيوني ومصطكة من الوجع حتى ما كدرت احجي كلمة شفته يحجي وياهم وملامح الضيق والانزعاج مبين على وجهه واني ظليت أتقي دم

نهاية البارت .. يتبع

كونوا انتم كونوا بخير ... احبكم 💔

نور سمو العراق

لا تنسوا التصويت والمشاركة بكم نكتمل 🥺