رواية #وكر الأشتر الفصل الثاني وأربعون 42 - بقلم الكاتبه سمو العراق

بارت ٤٢
رواية ... وكر الاشتر
بقلمي .. نور سمو العراق

💔💔💔💔💔💔💔💔💔💔💔💔💔

كل اختيارات الله صالحة حتى وإن كنا لا نفهم كل أسبابها.♥️

بارت ابو القفلات🌚

غلسوا على السحك🥺

........................

صفاء

بعد ما استقبله وكعدوا سوه اني رحت سويت جاي جنت مستغرب من الوضع خال سولين!!! هي منيلها خال واعرف امها ميته وما متعمق بقضيتها ولا سائل عنها

جبت الجاي وخليته كدامهم وكعدت جان انسان مبين عليه واعي وشخصيه حلو ومن كال اني خال سولين يا سبحان الله بسرعة اجت على بالي جيهان يشبهها حييل حتى نفس بشرتها ولون عيونها حتى نفس هداوتها

كعدت بهمه وعقدت حواجبي واني اترقب الوضع هو باوعلي ورجع باوع للاشتر وكآن وجودي مسبب عائق الحضرته

ابتسم الاشتر بهدوء وهو يرد عليه.. عادي ترا صفاء اخوي وتجايتي تكدر تحجي كدامة

تنهد وباوعلي كال .. والنعم منك ومنه

اردف وهو يتنهد بحيره كال .. تدري اني رجعت من السفر واختي علاجها صعب واستقريت بالبصره اختي صار بيها شلل وانت تعرف ما تكدر تمشي وحالتها تصعب على الكافر وانت تعرف النسوان ما ترحم

باوعله الاشتر وهو يتسائل .. شلون النسوان ما ترحم قصدك يا نسوان

سحب نفس عميق ورجع زفره كال .. اني متزوج بنيه هي بنت اوادم وعاشت وياي على الحلوه والمره وسافرت باختي وعالجتها ورجعت وظلت عند اهلها واتحملت كل شي

بس انت تعرف بعد ما رجعت المره ما تتحمل وخاصه هذا الوقت الاخ ما يتحمل اخو مو مره ضريره وبحاجة الكل لهذا السبب زوجتي حيل تتذمر من وجودها

وكف الاشتر وهو مستنكر كلامة .. اهااا وانت شنو رايك بتصرفاتها وافعالها راضي عنها لو شنو

رجع بشار وكف وهو متعصب .. لا شنو ارضى على تصرفاتها كلتلها يا مره هاي اختي الروح فداء الها واني عد عيناها لو اعرف اكعد بالبيت اخدمها و اكل الوحل مراح اتخلى عنها وكلتلها اذا معاجبج تكدرين ترحين لاهلج وكل شي ينتهي بينه

نفخ بضجر وكمل كلامة .. تمشي عدل يومين وبعدها ترجع تتذكر وتنك فوك راسي واني ما اريد اضربها واصير مثل نسيبي العار السكط اختي ولحد الان ما اخذ جزاءة

جاوبه الاشتر .. المره الي ما تريد اهلي ما اريدها المره الي ما تحمل اختي وهي ضريره ما راح اتحملها ومع احترامي الزوجتك بس هي ابد ما عندها عرفه انسان مثلك يداري اخته وما تركها بازمتها هذا رفعة راس واكيد اذا وكعت انت راح تسندها مثل ما سندت اختك بس هي تدور راحتها على حساب راحتك

جاوب بحسره وهو يكول .. طلبت مني اخليها بدار العجزه هم يداروها بس اني ما كدرت والله ما كدرت ما اكدر اخلي اختي تنام بعيده عني ما اكدر اخليها بمكان اني مموجود بيه

احتضن وجهه وهو يبجي بحسره ويضغب بحيث اني ما تمالكت نفسي وتذكرت اخواتي وشلون تفرقنه وكل من راح بحال سبيلة ونسعى الجمع الشمل بس رحيق ما تنجمع ويانه وهي اكثر وحده تعبت وعانت بينه

بلعت ريكي وتنهدت وكتمت عبرتي حسره بداخلي تاكلني اكل وحاس بمعاناته ولمحت بعيون الاشتر وجع والم وهو يتمالك أعصابه تقرب من بشار وحضنه وهو يواسي على اخته

بعدها ابتعد عنه ولزمه وهو يصير بيه ويحجي ويه .. كافي دموعك غاليه واني وياك وزوجتك عوفها مالك شغل بيها ما نريد نسبب الها مشاكل واني راح اخلي ممرضه او مساعده لام سولين تساعدها وتلبي كل احتياجاتها ومصاريفها كلها على حسابي

جاوبه اخوها وهو يكفكف دموعه وهز راسه بنفي .. مشكور ما تقصر والله بس ما اريد اني اريد من جيبي ما اريدها تحس بنقص وحتى هي زوجتي وصيتها كلتلها لو تاذيها بكلمة وحده مراح تلومين غير نفسج والطلاق مصيرج

طبطب على كتفه الاشتر وهو يكوله ... لا تستنكف مني اني اخووك وهم حاب اكفر عن ذنبي تجاه ام سولين انت هم تعبت وصرفت هواي وما قصرت تجاه اختك لذلك اني راح اخلي الها مساعده تلبي كل احتياجاتها بعيدا عن عائلتك وبهيج شي زوجتك بعد ما تحجي واذا ظلت بعدها تتذمر طلكها لان هاي مو وجهه نعمة

ضحك بشار بحسره وهو يكول .. صدك مو وجهه نعمه وما وكفتلي بوكت الضيق تنك فوك راسي واني تعرف بيه نقطة ضعفي امي

الاشتر غمض عيونه وهو يصبر نفسه كله .. حافظ على اختك ترا اذا خسرتها راح تندم اختك مظلومة وان شاء الله يرجع حقها لان اذا ماتت وهي مماخذه من حقها شي مراح ترتاح ابد صدكني

بشار .. تدري اني من زمان فاتح القضية بس الي صار اكثر المحاميين جذابين وبس يردون فلوس واكثرهم ما عوفوا يحققون بالقضيه لذلك سديتها لان بس الخساير وماكو شهود ماكو اي شي يدل على برائتها ولا اكو شي يدل على الجاني الي ورطها مجرد هي راحت لبيت مريض وبعدها طلع بيت بغاء ودعاره وصارت عليهم كبسه شنو الاسباب ما معروف

اني هذا عامر بنعال ما اعترف بيه ورغم ضربها وعوقها بس هو والنعال حسابه بعدين يجي بس الي يهمني هو حق اختي اختي مظلومة ولازم ينكشف كل شي صار وياها ولازم تتبرء من التهمه الي صارت عليها والعار الي خلوه وسام بصدرها

الاشتر رد عليه وهو يباوع الساعته كله .. هذا هو أن شاء الله قضيتها استلمتها ونشوف شنو ومنو وره الي صار وان شاء الله حقها راجع الها

باوعله وهو يبتسم وكال .. قاتل متسلل كل ما يخلون محقق يحقق بقضية المجني عليه يموت المحقق بسبب القاتل المتسلل لحد ما اجة المحقق الجنائي السري

رفع حاجب الاشتر وهو يبتسم وحك طرف حاجبه المطبور وهو يكوله .. جنت اتمنى تكعد اكثر بس سولينا مريضه لازم اروح اشوفها

وياريت تنطيني باقي الملفات وكل شي يخص امها وكذلك الادعاء والتبليغ  وتقرير الطب الشرعي

رد عليه بتنهيده .. صدك شلونها ما صارت زينه والله لو تعرف بحالها آيار الا تجي من لبصره لهنا تموت على بناتها وتحن وتون عليهن

الاشتر .. وبناتها مو احسن من حالها ما يمر يوم اذا ما ذكرناها ولو هن معدلات ما كعدن وسكتن وسون كل شي وحتى عدلن البيت

بشار .. هي اختي معدلة وهن طالعات عليها ان شاء الله بس يرجع الحق لاختي مراح اخليهن راح اجيبهن يمها واطلكها من هالعار الصخل وان شاء الله يعيشون بسعادة

اردف .. ردت اجي اشوف سولين بس اخاف اخواتها يشوفني او هي تشوفني انوب هي مريضه وضلعها مكسور انوب تنتكس حالتها واني اصلا ما الي وجهه اقابلهن حتى اختي دوم فشلان منها وما اعرف شلون احط عيني بعينها واني جذبت عليها وحرمتها من بناتها

بس والله المصلحتها لان اني تعبت تعبت من هذا العار رجلها وجنت بحالة عصبية وجنت منهار على اختي وقتلها باليلة ظلمة لهذا السبب ردت بس اكون بعيد من اي شي يخص عامر وان شاء الله تفهم السويته كل لمصلحتهن

رد عليه الاشتر وهو يكول .. أن شاء الله

طلعوا برا وهو رجع السيارته جاب كل شي يخص اخته وانطاه للاشتر وبعدها سلم عليه وراح واحنه رجعنه للمستشفى

.......................

سولين

مسكينه امي لبسوها ثوب العار وقيدوها بخطيئة تتبرء منها السما  وضلموا انسانه كلها حنية ونقاء

اجتمع عليها الظلم والظلمات وانكسر ظهرها وهي تحاول توصلنا وحتى ما كدرت تدافع الكرامتها المشروخه ماتت ظلم انقلت بدم بارد

يمكن ذيج الفتره التهيت وحاولت انسى بس هسه لا رجع كل شي مثل الاول اتخيل موقفها شلون من سلمها لابوي شلون كلبها يرجف وهي تخاف منه وهو قاسي ومجرم وياها ياربي دخيلك ما اكدر اتخليها

فدوه ربي شيلها من بالي بس لحظات لان والله ما اكدر حتى اتنفس وضلعي يوجعني احسه داخل العظم بگلبي

سوده عليه يمه شكالت روحج وهم عدموج بيدهم شلون جنتي خايفه منهم ااااه گلبي يوجعني ما اكدر ابث حزني على خواتي ما اريد يتاذن مثلي ولا اريدهن يتعبن خليني بس اني متحملة هالهم وحدي

هو اليوم لا شفته ولا اجاني صرت اخاف منه حسيته غدرني اني شفته بذاك اليوم المشؤوم بس ما جنت اتوقع يطلع هو مسلم امي لابويه ولا اعرف شنو الي صار

انفتح الباب درت وجهي شفتها من بعيد غمضت عيوني بقهر شكد اكرهها ما اريد اشوفها ما اطيق وجودها

اجت لابسه كالعاده ملابسه الضيقه لابسة تشيرت بهاري صوف وبنطرون ثلجي وحزام جلد جوزي وفاتحه شعرها كعدت على الكرسي وحطت رجل على رجل وهي تكول .. حبيبتي الحمدلله على السلامة ان شاء الله ما عندج غير العافيه

باوعتلها بطرف عيني وجاوبتها .. شكرا سالي ما قصرتي

كالت وهي تحرك شعرها بغرور .. اي بشريني شلون صرتي سألت عن حالتج كالو كولش مو زينه حالتج جدا تعيسه

رديت عليها بوجع وعصبيه.. كولي موتي وفضيها

ضحكت ... ههههههه لا اسم الله عليج عمري ان شاء الله عمرج طويل وشدعوه لحد الان عصبيه هاي فوك ما مكسره وهم لسانج بعده اطول منج

درت وجهي للجهة الثانية مزعوجة منها ومن وجودها ومن كلامها وما عندي طاقه اجادلها وارد عليها تعبانه حييل

كالت بحزن مصطنع..شكد انقهرت عليج واسباب الحادث حيل استفزتني

باوعتلها بسرعة.. استفزتج؟

دنت كرسيها عليه اكثر وهي تكول.. ترا الاشتر كذب عليج اني لحد الان ضابط وابد ممفصولة بس هو كال هيج لان يكول ما عنده ثقه بيج ودائما تبيعيه

رديت عليها بقهر.. زيارة المريض ما تتعده الخمس دقايق وانتي صارلج قرن كاعده تكدرين تتفضلين وتطلعين

كملت كلامها وهي تكول .. ترا اني ضابط بتربة جبيره وممفصوله حل شي اعرف عنكم وكل شي اعرف عن الاشنر واليوم حابه اكشف الج عن هوايه اشياء اشياء تخص اهلج مثلا امج شلون ماتت وابوج شلون تعرف عن الاشتر

بلعت ريكي وبس ارمش بعيوني حييل صابني وجع بس تمالكت نفسي واني حابه اسمع منها كل شي كالت .. ابوج انسجن هو قبل مسجون والسجن الي هو بيه لكوه بيه سجين ميت

من بعد ما اجت الجنيات واخذوا كافة البصمات سجنوا الضابط والسجانين طلع السجين مقتول وصارت تهمة على السجناء من ضمن الي عليهم اطار التهمه جان ابوج

من بعد ما تمت تبرئة الكل والكل خله محامي ابوج جان ما عنده محامي ومخلصها بس بجي واني عرفته على الاشتر كتله هذا من ضمن المتهمين بقتل السجين اخذ كافة المعلومات عليه وحتى سوه تحري على بيته من ذاك اليوم وهو ساعده وكله راح اساعدك وبعدها اكتشفوا الجنائيين والمحقق الجنائي ان المقتول انقتل على ايد احد ضباط السجن بسبب رشوه والسجين مهدده ان يخبر النزاهه عنه وعنده دليل عليه لذلك تم قتله هاي بعد ما الجنيات تحققوا من كل شي وابوج تبرء وطلع من السجن

وهاي قصة تعارف ابوج ويه الاشتر ومن طلع هو صار جاسوس للاشتر يخبر عن كل شخص بمنطقته عنده اعمال شغب او عنده سوالف مخدرات او متهم بقتل يعني هم تجند بفترة من الفترات بس بعدها طرده الاشتر لان لوگي

اني جنت بدوامة من كلامه دايخة ودا أتأكد ان الاشتر شي كبير وخايض هوايه معارك وسوالف جاده وشغله يخص الجنايات بس من كالت ان ابويه لوكي ضجت من كلامها اي كلمة عنه تمسني رغم يستاهل بس مدا اكدر اكو شي يرفض اي كلام ضده

باوعتلي بخبث وهو تكول .. وهسه راح احجيلج عن الي صار بامج وشلون الاشتر سلمها لابوج وشلون جانت تتوسل بيه وباست حتى ايده جانت حييل مقهوره بس هو جان ممهتم لكل توسلاتها ودموعها وكل شي راح بمهب الريح

بلعت ريكي بغصه وعدلت نفسي احس عبرة خنكت صدري كلتلها بتعب .. احجي

تنهدت وجرت نفس وظلت تباوع للباب الغرفه وهي متخوفه من الي تريد تحجي بعدها كالت .. خلي اشوفه اخاف اجه ما اكدر احجي بوجوده تطير رگبتي

اتصلت بيه مجان اكو رد رجعت اتصلت واني كاعده على نار منتظره جواب منها وبعدها انفتح باب الغرفه وموبايله يرن باغنيته المعتادة ... فعذبها حتى اذاب فؤادها وذوقها طعم الهوا والتذللي

قفل الخط وهو يرد عليها بهدوء .. هاي شنو من شوكت انتي هنا

ابتسمت و وكفت وهي تعدل بشعرها ولازمة موبايلها كالت .. قبل تقريبا نص ساعة اجيت اشوف سولين كوه خلوني ادخل كالو ممنوع ومن شوفنهم الباج مالتي يله قبلوا يدخلوني

رد عليها بجمود .. اي اني رافض كل شخص يدخل عليها ما اريد اي شخص ينتكس من حالتها

ضحكت .. هههه لا بالعكس ارتاحت بوجودي الحمدلله بس شويه احسن من قبل لان سالت الدكتور وطمني عليها بس عي شويه تتدلل عليك ههه

بلل شفايفه من دون ما يباوعلي ورد عليها .. الحمدلله المهم عندي تطيب خليها تدلل

اخذت جنطتها وهي تضحك كالت ... امم يله ان شاء الله غير مره اجيج طبعا كولش اسفه اجيت متاخره بس والله انت تعرف عندي ظروف وعندي شغل مو قصدي وان شاء الله ما عندها غير العافيه

دخل ايده بجيوب بنطلونه ورد عليها بملل وهو يتنهد .. لا عادي تسلمين ما قصرتي

خلت وطلعت بعد ما باستني واني اتمنى اكوم ارفسها ببطنها اكرها وشكد ما تحاول تبين ان هي كيوت ما اهضمها ولا احبها

طلعت وسدت الباب وهو تفرب مني وحط ايده على راسي وهمس عند اذني .. شلونه الكتكوت

باوعتله بحده وعصبيه وجاوبته .. مثل متشوف مكسره وكاعده هسه ارتاحيت اكييد اموت واعرف انت شنو من بشر

عقد حواجبه وهو يسالني .. ليييش

عضيت على شفايفي واني احارب دموعي .. انت سبب بموت امييي انت شفتك بيوم قتلها جنت موجود شلون عندك قابليه تتخذني زوجة وكل يوم اشوف موت امي بوجهك كل يوم اشوف نفس المشهد كل يوم اعيش نفس الالم بوجهك اشوف اليوم الي بيه انهاريت وفقدت اعصابي واغمى عليه لان امي ماتت قتل بوجودك وعلى ايد ابويه وتطلع انت السبب

كلش ما حابه اشوف وجهك كلش دا اتذه من اشوفك وكلبي ينعصر عصر وجودك يمثل ماساة امي شلون خدعة شلون غدر منك تتزوجني تنام بصفي تبوسني وتبني عائلة ويايه وانت مجرم ويه ابوي

وكف وهو يتنهد ويحاول يكتم غضبه كال .. تمام اني كتلج كل شي نحجي بيه بعد ما تطيبين لان انتي حاليا مريضه ما اريدج تتاذين اكثر بس صدكيني راح تعذريني

من كال راح تعذريني اكد الي ان كل الكلام الي انحجة ضده صح وهو سلمها هزيت راسي بنفي .. مستحييل اعذرك ولا راح اعذرك لو تقدم الف عذر الا اذا رجعت امي من گبرها بهذا اليوم راح اعذرك واعتقد ما شفنه ميت رجع من موته ؟

جاوبني وعلى وجهه ابتسامة كال .. نرجعها ليش لااا

شديت على شفايفي بجزع وغضب والدمعه تلالي بعيني شلون يستهزء بيه شلون يستهزء بانسانة ميته

رديت عليه احرك گلبه مثل ما حرك گلبي كتله ... اكرهك امووت منك وصدكني وروح امي اطلع منا مستحيل ارجع وياك مستحيل تشوف وجهي ولا اكعد لحظه وياك واذا جبرتني انتحر واخلص من همك

وانت دومك جابرني عليك تتذكر من كتلك بالخطبه ما احبك ما اريدك وانتخيت بيك تفسخ الخطوبه ولا همك دمع عيني ولا همك وجعي والمي اخذتني بس حتى ترضي غرورك وعجرفتك على حساب تعاستي و وجعي

حط ايده على الجرباية اتكئ عليها ونزل نفسه الراسي وهو يباوع لعيوني كال بنفي ... لااا لان احبببببج

باوعتله بحده وشفايفي ترجف ومشدوده بقسوه نزل نظره لشفتي وباسني حييل

ما جانت عندي طاقه اخوض معركة وياه وابعد عنه ما جنت اكدر اضربه بس احرك ايدي يتحرك الضلع المكسور واتاذه هو مراح يتأذه بس اني اموت من الوجع

رفعت ايدي ونبتت اضافري بكل قوووه وبكل اعصابي بضهر جف ايده حييل بحيث حسيت بالدم اخترق اضافري ابتعد عني بارادته ورفع جف ايده وهو يبتسم باسف .. الوحيده المسموحلج تاذين اسم رحيق على جفي

مسحت شفايفي بثنين اديه ورديت عليه بغضب ... اكرررررهك اموت منك شايف تحسين وساهر شلون تكرهم اني اكرهك اضعاف كرهك الهم

باوعلي بحقاره وهو يبتسم كال .. واني احبج اضعاف حبي لرحيق

ظليت اتنفس بصعوبه واباوعله اريد انتقم منه .. گلبي مو ملكي ملك انسان غيري

رد عليه بثقه وهو يحول .. گلبج ملكي گلبج الييي ومحد يتجرأ ياخذ اي شي يخصج مني

جاوبته بتسرع وحقد اريده يطلكني .. اخب حارث

هز راسه بنفي .. جذابه متحبي

رديت بعناد وعيوني تريد تنط من مكانها ... احببببببه

باوعلي بنظره غامضه وهو يكول.. مستحييل تحبي

جاوبته بحقد .. ما احبه ولا احبك

ابتسم وهو يكول .. اي هسه تمام راضي عليج

تنفست بغضب .. اكرهك

مشه خطوات وفتح باب الغرفه ورفع اصبعه بتهديد كال .. طالع اني ما اريد استنزف طاقتج وانتي مريضه وانتي حاليا دتجاهدين في سبيل تغيضيني بس ما غضتي اله نفسج

سد الباب واني استسلمت الضعفي بجيت بحسره شلون تخلص وياه ما اريده ما اريده هذا بس لا انوب يخليني اعيش وياه بس لا يرجعني لوكره الي ما شفت منه راحة دا اتحسر على نفسي شلون ما اكدر احسه وحس ومحاصرني وين انهزم منه وين انطي وجهي مليت

..........................،

جيهان

جنت كاعده دا احف بمره وافيان طالعه تشتري خلطات هي وامين وابويه مموجود

جان ابويه مموجود هالايام يطلع ويتاخر خلصت من المره انطتني فلوس اخذتهن منها وبعدها خليت وطلعت وراها وصلتها بباب البيت

رجعت دخلت كعدت دا اباوع بالموبايل اتصلت على الاشتر كاتبه عليه فافي نسيبي الكفو سألته عن اختي وهو الحمدلله طمني عنها وحجيت وياها شويه ظليت ابجي وهي تبجي وانكطع الخط

بعدها خليت وكعدت ادعيلها وظليت اتصفح بالموبايل بملل وما اعرف ليش كل شي يقودني اله رحت باوعت بحسابه شويه حاذف صور عرسه كلهن يعني قصدي صوره بالقاط مو هو والعروس بس هو حاذف كل شي ومنزل مكانها صور خطوبة اخو

اندك الباب بسرعه وكفت وضميت الموبايل بصدري كلت خاف يجي ابويه الا يذبحني على القبله اذا لكة الموبايل عندي

فتحت الباب بس محد دخل ورجع اندك مره ثانيه كلت .. تفضل منو ؟

رد عليه .. ها جيهان اني عمو كريم

احس مشاعري ارتبكن وظليت اردم بروحي فتحت الباب ورديت عليه .. اهلا وسهلا عمو

فتح الباب ودخل من دون سابق انذار واني الموت دخل برجليه لا اكدر اطرده ولا اكدر احجي كلمة كتله .. ها عمو اهلا وسهلا

رد عليه .. هلاو بيج شنو بابا وين ؟

جاوبته بارتباك وتلعثم .. ها والله ما اعرف طالع من الصبح

دخل وكعد على الدرج وطلع موبايله كال .. خلي اتصل بيه بلكي يجي

ظليت ارجف وامسح بوجهي عزااا بس لا يغتصبني لان فافي تكول ما ارتاح لكل واحد يكول عمو كل واحد يكول عمو نيته مو صافيه وكلمتك فاقدة العفه

بعدها فكرت يغتصبني شنو كبر لفني هاي فافي حتخبلني من كثر ما تسولف سوالف معفنه هي وزباينها بس اني جنت خايفه خايفه لا يجي ابويه ويفهمه غلط انوب يذبحني مثل امي

انصل وهو يكول .. هلا ابو جيهان اجيتك للبيت مموجود وين الكاك

اردف .. اها تمام يله شويه واني جايك اوك تمام

قفل موبايله وهو يباوعلي نظراته بيهن وميض حلو كال .. شنو مناويه تضيفيني ماي جاي

جاوبته بضحكة متوتره .. هااا اي هسه تتدلل

مسح على شواربه ونظراته تخترقني كال .. ما يدلل عليج حيوان جيجي

ابتسمت وخليت ورحت امشي بسرعه ورجل تطك برجل من الخوف والله صعبه بس اني وياه بالبيت وفوك الضيم اني احبه ومتقبله كل شي منه

باوعتله من الشباك شفته مطلع موبايله وداخل على الفيس ويقلب بالمحادثات

جبت الجاي وهو لحد الان وجهه بموبايله اول ما وصلت عنده هو انصل واني دك الموبايل بصدري حسيت الحياة وكفت عندي بحيث الاستكاين ظلت تهز وترعص ونغمة افيان الصاخبه .. باوعلي

ظليت اطكطك من الخوف وكلت هذا هو انفضحت عزا بعينج افيان عزا بوجهج شسويتي بيه شسويتي من مصيبه

قفل الخط واخذ الجاي من ايدي وهو يكول ..شنو هذا منين هاي الاغنية

بلعت ريكي وارجف .. هاااا موبايل فافي اتصل

وجهه نظراته لصدري وهو يكول .. ويينه

بلعت ريكي بخوف رديت عليه .. هاااا ما ادري

عقد حواجبه بعدم قبول.. ليش تخلين الموبايل بصدرج يسبب امراض طلعي

ظليت اتلكلك بالكلام ... عم همم هم عمو لاا

رد بانزعاج وهو يكول .. دروحي لا تظلين ترعصين طلعي الموبايل وانطيناه وهذا منو اتصل انوب

ركضت بسرعه طلعت الموبايل من صدري وحذفت الفيس بسرعه ورجعت اله لازمة الموبايل بيدي وامشي بخجل انطيته اله هو ظل يباوع بيه كال .. ليش حذفتي المكالمة

رديت عليه بفهاوة .. هاااا لا محد متصل مماسحة شي

باوعلي بحده وهو يحجي من بين اسنانة .. رن الموبايل شلون محد متصل

هزيت راسي بنفي .. ما اعرف اني بصراحة مو كولش اعرف بالموبايل بس يمكن اشتغلت نغمة يعني دست على النغمات او شي

رد عليه بحده .. بعد لا تخلي بصدرج عيب منين متعلمة هاي السوالف

جاوبته بخجل .. ما ادري من زباين فافي

اتصل الموبايل وهو بيده واغنية فافي المعتادة .. يمكن نايمة بصفة وعطرها تارس الغرفه يمكن باسته بخده نست عشرتنه والكعده

هو باوعلي وهز راسه باسى كال .. لج شنو هاي هاي انوب الاغنية منو مخليها اغنية ليلة دخله

جاوبته ببراءة .. هي فافي

باوعلي من فوك ليجوه وهو يكول .. ادري وانتي شنو دورج هنا هو منو هنا الجبير انتي لو هي ليش مخليتها هيج انوب منو هاي سليمة ام الجكاير

رديت عليه بفشله .. زبونه نحفها

رجعت اتصلت مره ثانية وهو فتح عليها خط ديتاكد منها وهي اجه صوتها يلعلع خشن ... هاااا فافي اليوم الحجي يريد يعرس عليه اريدج تهلسيني تخلبين الحجي عليه كون اريدج تسوي صحراء قاحله كل شي ما بيه فدوه اريد شيره خضره احسن من ذيج

هو قفل الخط واني ماعت روحي انطاني الموبايل وهو يتنهد حسيت انقرف من كلام سليمة ام الجكاير

مشه خطوات ودار وجهه عليه كال .. محتاجة شي شكد ما تردين انطيج بس لا تلوثين اديج بجسم اي وحده

رديت عليه بنفي وبسرعه .. لا لا لا اني ما اسوي هيج اني بس مجرد احف الوجهه والحواجب

رد عليه بقرف .. اي ما احبج تتجرئين اكثر بله افيان خبله ما عليها عتب بس انتي لا اشوفج بريئة مو مال هيج سوالف

هزيت راسي بقبول حتى ما اعرف شنو ارد عليه وهو خله وراح انوب اني مدري شبيه من الفشله والخجل احس اريد ابجي اريد الطم شلون موقف سخيف احس كل شي عرف عنه واحس عرف اني حذفت المكالمة بعد ما عنده ثقه بيه

اجت فافي مثل الرعيده وهي تصيح هاااا وينج جيجي الفاهيه افهى الفهاوة تعالي تلكيني تعبانة

اجيت اركض عليها واني الطم وسولفت الها كل شي صار قبل شويه كعدت تضحك وميته وتكرر .. هههههههههه يمه متت ضحك لج انتي شنو شكو سالفه عوجه وخايسه تصير وياج عود ليش هيج ليش حظج معفن هههه يمه كلبي راح يوكف من الضحك

صفنت عليها .. بس اريد اسالج سؤال انتي شنو من مله اكلها شك بيه عندي واحد وفتش الموبايل وانتي كاعد تتمضحكين انوب خابرت سليمة واول ما فتح خط من دون ما يكول الو وهي خرطت الاول والتالي وما تحجي غير عن ال... سوالف فساد

رجعت تضحك .. ههههههه خرب اموت عليها ضحك سليمة ام الجكاير بس تفشر تموت ضحك شلون تونس تنسيج هموم الدنيا جان كللها تعالي فافي تشيرج

بعدها تقربت مني وهي تغمزلي .. اي ولج بشريني ما حصرج شي شياتين ما اخذله بوسه حبه مقبلات سوالف فساد على كولتج

ضربتها بعصبية .. انجبي ادبسز شنو حصرني هو غير من الخوف قطرة دم ما ظلت بيه اجيت انجلط

ضحكت .. ههههه لعد من يبوسك يحلو يجيجي شتسوي تموت انت تموت

تافئفت بغضب وعفتها ورحت زايحة المستحى كولش متخبله. هاي مو صاحية

....................

جاسم

جنت اني وحارث بسيارتي اني جنت يمهم واخذته وياي بطريقي يريد يروح يجيب علاج لامة من الصيدلية

جنه نمشي بالطريق جانت ظلمة وتقريبا داخلين على الساعة ١٢ ما اشوف اله حاصرتنه سيارتين و نزلوا منها اربعه مسلحين وملثمين يخوفون اتقربوا من السياره وفتح بابها وهو يوجهه سلاحة علينه كال  .. حارث انزل من دون اي كلام

ارتعبت منهم ورديت عليه .. شنو حارث ينزل انتم منو اصلا انتم شتردون نعرفكم تعرفونا شنو جايين هاجمين علينه

جاوب وهو يرجهه سلاحة على حارث وكال .. عود هناك من تشوف استاذنا احجيله هذا الحجي وترا كلامنه مو وياك احنه كلامنة ويه حارث وهو يعرف شمسوي

جاوبه حارث بخوف واضح على نبرة صوته .. شنو اني شنووو عداوتي وياكم ما عندي اي شي وياكم وانتم منو احجولي اذا مسوي شي غلط اصحهه

حط المسدس براسه وهو يكوله .. هناك من تشوف استاذنا راح تحجي وياه وراح تتفاهم وياه لذلك امشي من دون ما تتعبنا ونتعبك

جان شكلهم يخوووف ضخام حييل ولابسين اسود ومعضلين بدكارديه مدري شنو يخوفون وانوب ملثمين ومساحين وسياراتهم من هاي الراقيه المظلله

حارث تعصب وهو يكوله .. ما امشي وياك هلى اي اساس امشي وياك واصلا اني منين اعرف استاذكم شمدريني ما اروح وياكم وتعلسوني لا والله ما اروح لو شيصير

سحبه واحد منهم بغضب وجره ناحيته واني لزمته .. على كيفك خويه ما كال  شي من حقه شنو على اي اساس تاخذوا انتم شنو مستهترين بالقران اني اخوي مهندس متفجرات وعنده رتبه اخلي يطلعكم من جوه الكاااع ويعتقلكم شنو لهلدرجة الدنيا تايهه عندكم

باوعلي بنظره حاده وبطرف عينه كال .. تنزلون وتمشون لا بالقران امشيكم جلاليق ترا لحد الان محترمكم ومقدر وضعكم

بعدها صاح واحد باسم وهمي مبين كله .. گزارة تعال اربطهم واشمرهم بالصندوك لان دوخوني وسوق انت سيارتهم والحكني على المكان الي مفروض نلتقي بيه

لزمونه تلاثه واحدهم بي مية كيلو وكل واحد جفه بية خمس كيلوات يخفون خو اني هذا الي لزمني زنده عبالك صينيه وكله وشوم زنده شعرضه

جتفونه واحنه نصيح ونغلط وربطو عيونه وادينه ورجلينه وحارث من كد مل ظل يصيح واحد منهم كله بانزعاج .. لك هذا شنو ظال يجوعر مثل المطي دضربه خليه يفقد الوعي وخلصنه منه

صدك هو ذاك ابو زنود ضربه باخمس المسدس اسفل عنقه خلاه يفقد الوعي ويوكع صريع الاغماء

صرخت عليه واني حلكي مربوط بعدها شاله واحد بيد وحده وخلاه بالصندوك واني ربطو عيوني وخلوني بصندوك ثاني مو ويه حارث

حسيت نفسي بقبر رجفت خفت بصراحة موبيلاتنا الحقراء اخذوهن سرعان ما خلونه بالصندوك

تقريبا وقت مر ساعة بالتمام وما اشوف اله فتحوا الصندوك ونزلوني منها حسيت دخلونه ببيت او غرفه هيج شي وحارث خلو بصفي وهم يكولون هذا حارث اهم من هذا منعرف منو

شويه وحسيت بصوت حذاء صادر من بعيد وهو يحجي وياهم بامر وكأن كل الموجودين هم خدم عنده كلهم بصوت يملي الغرور.. كلت بس حارث جاسم المن جاي

استغربت هذا منين يعرفني وشلون يعرفني لان الوياه مجانوا يعرفوني 

جاوبه واحد منهم وهو يكوله .. استاذ هو هذا سطرنه سطر وظل يغلط ويتهدد فجبناه وياه وحيل استفزنة

جاوبه بهدوء .. تمام خليهم هسه بعدين نتصرف وياهم وحرر اديهم وانطوهم مي ولكل حادث حديث

حسيت بيه طلع من الغرفه وهم اشتغلونه حرروا اجزاء منه بس خلو ادينه مربوطه ليوره وخلوا وطلعوا

جانت غرفه طينيه باااااارده ومهجوره الضاهر ما بيها غير حصير قديمة وفخاره مال مي مكسور نصها ومصلايه عتيكة وتربه

ظليت اكل بروحي شلون هسه شلون ورطه انوب اهلي واهل حارث مناك والله ان حارث تنجلط وابوي يتخبل شنو ذول ارهابيه لو يساومون على فلوس

بس ليش طلبوا حارث بالاسم شنو القضيه والله السالفه تدوخ اني شورطني وبس لا يطلع حارث متورط ولازمين عليه لزمة

باوعت الحارث رفسته برجلي اريده يكعد اريد اعرف ليش هم طلبوا بالاسم ليش هيج صار وياه شنو قضيته بس ما كعد عبالك مضروب بنج مو بحافة المسدس الفاهي

.................

فافي

جنت طالعه دا اجيب شغلات تخص الحلاقه وهاي السوالف اول ما وصلت للركن واشوف صافي فشخة منتظرني يم الركن واكف بصف سيارته وكالب خلقته زعلان عشتو

باوعتله بقرف وعفته ورحت شلون سخيف ديشرحلي على الدوره الشهريه عساس اني ما اعرفها

مشه ورايه وهو يكول .. عبود خلطه شنو ليش مترد من اتصل

درت وجهي عليه بغضب .. وانت منو حتى ارد عليك يا متستحي يا ما عندك خجل

تنهد وهو يكول ..انتي شنو من مله صدك جذب هو منو ما يعرف الدوره وبعدين مو زين افيدج كلت هاي طفله ما تفهم خليني اعلمها يمكن محد معلمها

تخصرت ورديت عليه .. عشتو. محد معلمني وانت تعلمني؟ صدك ما تخجل ولك شسفتني صح اني حفافه وكلهن طاكات جوه رجليه بس ترا عندي خجل ولا شاربه عرك ولا مفتره بملهى

ضحك وهو يكول .. هههه عمي اعتذر اذا هيج الموضوع يضوج بس ترا عادي واحنه دارسي بالمدرسه هذا الموضوع وتحريت عنه وبحثت اكثر وعرفت الاعراض وحجيت من حرصي عليج لا اكثر ولا اقل

رفعت اصبعي بتهديد .. هاي اخر مره تحجي ويايه هيج كلام والله شكد جريئ ومتخجل ليوم تحجي هيج انطيك مجال باجر تحجي غير شي تريد تستغلني

رد عليه بانزعاج .. دنجبي شكد تحجين استغلها عبود لج اني شبعان وقنعان من النسوان يا ما سهرنه وتعرفنه ولعبت نفسنا شنو قابل اكلبج حتى استغلج

باوعتله بنظره مقرفه من فوك ليجوه.. اذا اني هيج مو مهمه شكو كاعد من الصبح هنا جنك ديج هراتي مكابلني وكاعد وتريد بس تحجي وياي

ضحك وهو يكول .. مجاي عليج بس محبيت تفهميني غلط وتشككين باخلاقي

رديت عليه بسخريه .. لا صدك جذب انت ابو اخلاق الحلوه يرحولك فدوه على فدوه

ضحك وهو يكول .. هههه والله من احجي وياج اتونس انتي طاقه ايجابيه رغم مخبله وبيج خيط مكطوع بس الكلام وياج ممتع

رديت عليه بملل .. صلاوات تمدح تذم ولك خاف شارب

ضحك.. هههههه لا صار فتره مشارب ليش ما تعزميني على كهوه

تخصرت بغضب .. لا والله انوب اني احف واهلس مكسور ضهري وتجي انت على الحاضر تخلص فلوسي بعزيمة شكلولك عليه حاتم الطائي لك عيني اني ابخل من خلف

كال .. لعد شلون لازم تعزميني فد يوم حتى نتعرف اكثر

رديت عليه بكذب وسخريه .. تمام عود من الله يفرجها علينه اجيب جاي من البيت بترمس واعزمك

رد عليه يسايرني .. خوش جيبي ترمزج ترسي جاي وهاا بلكي مناك نشتري كلاصات

جاوبته بصدمة مصطنعه .. صدك تحجي اشتري كلاصات خيير خيير شنو عندي البنك المركزي لا يابه لا عيني نشوف بطاله مال مي فارغه نكص القمع وناخذ الجعب ونشربك بيه جاي

ضحك ... ههههههههه لا بالقران غلبتي خلف سته صفر

رفعت حاجب وعفته درت وجهي دامشي واشوف ابويه طلع من الفرع وصادفني باوعلي مثل الثور الهايج وهو هجم عليه

.................

سولين

جنت نايمة على فراش المرض عقلي يشتغل خلاني اخابر جيهان ارتاحيت شويه من سمعت صوتها احبها اخيتي فقيره وحبابه اول ما سمعت صوتي بجت

هو ابد ما تركني يطس ساعات ويرجع عليه يدخل اسوي روحي ما اشوفه لو اسوي روحي نايمة هو لوتي يعرف بيه ما نايمة يستفزني يظل يتلمس بشفايفي لو يلمس طرف اداني يخليني افز مرعوبه ومتعصبه وبهيج طريقه يعرف اذا جنت نايمة لو استدعي النوم

واكثر الاحيان يكعد يمي صفاء شلون حباب شلون اخلاق وكل ما اتذكر اول ما دخل علينه وطردته اموت بدمي والله تحسوا متربي عشر مرات اخلاقه حيل عاليه

ويعاملني عبالك طفل شلون يسأل عني شلون يحجي وياي حتى من كثر ما حنين هيج اتمنى ابجي يغمرني الحنين على نفسي يارب يكبر امين ويصير مثله هيج مثل حنيته

حسيت كولش تقربت منه وصرت اشكي اله وابجي واحجيله عن كل شي يصير وياي عبالك صديقي اشكي من اخو وشلون اتاذيت منه وشلون جبرني على زواج منه

بس هو ابد ما جان ينطي باخو وجان يقاتل قتال الابطال عن اخو بس حيل كبر بعيني ومواقفه وياي تشهدله

جنت اني اصارع بروحي جنت الوحدي الملل والوحده كاتبتني شوكت اطلع من المستشفى واخلص احس اليوم يمو عليه بسنه حييل ما احب نومة المستشفى اكعد بالزباله اكعد بالبيت المسكون ولا اكعد هنا يضيق صدري من هذا المكان

من نمت شويه وبعدها فزيت على صوت الدكتور وهو يحجي ويه الممرضه ظليت مغمضه عيوني سمعته يكولها .. مستحييل هاي البنيه تمشي على طولها ابد ما تمشي مشيه صحيحه لان الفقره ما اثره على رجلها وحتكون عرجة

فتحت عيوني مصدومة مرعووووبه .. اني اصير عرجة والعالم تتنمر عليه لااااااااا مستحييل

نهاية البارت ... يتبع

كونوا انتم كونوا بخير ... احبكم 💔

صوتوا جبيداتي حتى ما تهد عليكم فافي ترا صاعد عندها هرمون الخبال🌚