رواية #وكر الأشتر الفصل الحادي والعشرون 21 - بقلم الكاتبه سمو العراق

البارت العشرون
رواية .. وكر الاشتر
بقلمي.. نور سمو العراق

💔💔💔💔💔💔💔💔💔💔💔💔💔

#الأخت
لو كان بين إخوة يوسف أخت واحدة ..
لقصت أثره كما فعلت أخت موسى لتعيده إلى حضن أمه ..🤍
فالأخوات والبنات لايعرفن أبداً طريق ( الجُب ) .
يعرفن فقط طريق ( الحُب ) . ♥️

قال عليه الصلاة والسلام :
لاتكرهوا البنات فإنهن المؤنسات الغاليات ...

................................

جيهان

جنه كاعدين ابويه يخابر بخطيب الغفله الجديد ميثم فد اكرهه هو اصلا هم شايب مو شايب شايب بس يعني ببداية الاربعين ومببين عليه وعنده بنيه بكدي مربيتها عمتها فد عائلة منحطه هو هذا حظي خطابتي من ابو سعدون وميثم وشيل ايدك

لعبان نفس وقرف واحد يرتاح لو يروح بنفس المزبله جنت ابجي ما اريد اني ما اريد اتزوج والله حتى استحي اكول وضميري يانبني بس والله لحد الان مطالعه من صدمة كريم ولحد الان ممتخلصه من حبه شلون اتزوج شخص ثاني انوب شلون شخص تافهه ومنحط ومطلگ تلاثه واني الرابعه

حسيت نفسي محاصره وماكو امل للرفض هي اختي سوليين لسانها شطوله جبرها وخلاها تزوجت ابو طبره غصبًا عنها وحتى بعد ما سال عنها عايشه ميته المهم يتخلص منها

الم بروحي احس اوراق عمري وكعت كدامي واني مدا اسوي شي مجرد متفرجه خلص العمر ومفهمت شي من حياتي من غير تنمره وكلامة المر

اندك الباب خفت حيييل كلت يمكن اجه هذا المعفن ميثم هو واهله لان كل شويه واجونه

طلع ابويه لابس دشداشته كلها طكع مال دهن بريك وهو يصيح... اجييت اجييت على كيفكم ومرض حتى مرض

بس بصراحة جان الباب يندك حيل اول ما فتح بابا الباب واحسه اندفع بقوه ودخل جوه باوعت شفته .. زوج اختي سولين جان لازمة من دشداشته وسحلة جوه

من شفته حنيت و ونيت يمه ما اعرف شصار بيه شفت بيه اختي شفت بيه سوليين گلبي فرفح وانتعش اتمنى اتقرب منه وأساله عن اختي شلونها شلون احوالها مرتاحه لو لا بس ما اكدر هو دخل مثل الاعصار وابوي منا

ابويه باوعله بخوف وقلق .. ال ال الاشتررر

رد عليه بعصبية... لاااا كسار راسك ولك ليش اتصل عليك ما تفتح خط شنو ترقيت لو بعدك زعلان

رد على ابويه ... بعدني زعلان نسيت انت بعتني الخاطر مرتك واجيت تكتلني

ابتعد عن ابويه وهو يحك لحيته .. هااا اي هم صدك

اردف بعصبية.. بس تستاهل محد گلك تتدخل بيني وبينها مرتي بعصمتي طالعه من عصمتك ماكو داعي تظل تهوبز فوك راسي

وبعدين هسه عوفنا من هالكلام .. من اتصل ليش ما ترد ادري بيك بخيل بس ترا اني المتصل الرصيد مني

سكت مجاوبه جر نفس وحجه بامر.. سويلنه طريق اريد اتفضل جوه

ابويه صاح بهمجيه... هيييي طبن لحد تطلع جانه خطار

خليت ودخلت بالمطبخ وفتحت الشباك اباوعله دخل بطولة الفارع وشخصيته الجاده مبينه العصبيه على ملامحه والاسود مكتسي هندامة شكلة يرعب ما اعرف شلون اختي عايشه وياه خطيه يمكن ظالمها لان مبين عصبي حيل وما يرحم واتمنى يطلع اسلوبه ويه اختي غير عن شخصيته وياه ابوه وبعيدا عن ملامحه الحاده المتعصبه

اجه ابوي للمطبخ وهو متعصب كال.. سويله جاي تورطت بيه ورطه اذا ما يشمرني بتهلكة ما يرتاح اكلج عود حطي الكعك الناس ترتاح بجال النسايه واني ظال انگل عليهن كعك وجاي مدللهم دلال الله اكبر عليكم ان شاء الله

هزيت ايدي وسويت جاي وكعك انطيته اله اجت افيان من السوك راحت هي وامين دخلت وهي تصيح ... الله اكبر على راسك عامر فاضحنه فضيحة لاگتني ام تيسير دكول صدك اختج شردت وابوج انطاها فصليه

ركضت عليها وسديت حلكها لا تفضحنه كلتلها ... لج انلصمي رجل سولين هنا

فتحت عيونها مصدومة والفرحة غمرت ملامحها كالت بحزن وعيونها تسولف عن شوقها ..يمه صدك عود ما جابها وياه مشتاقتلها لج والله احس بنغزه بصدري حسيت اكو خبر عنها واحو شخص عدنا من ريحتها

ابتسمت ومسحت دموعها .. اسكتي يروحي خلي نشوف بلكي سولين بخير ولو وجهه يلطم ما يجي منه خير بس نكول بلكي

رحنه اني وياها نباوعلهم من الشباك مال الاستقبال هو جان كاعد كعده مال ناس ثقه ويخرط بالاستكان دفع الماعون وهو يكوله .. شيل كعكاتك مني اتزوهر من اشوفهن

فرح ابويه واخذهن حطهن على صفحه

بعدها حجه وياها بتوتر وهو يتصنع ضحكة مرتبكة... ههه شنو اليوم جاينا مو عواديك

رد عليه بهدوء وهو يجر نفس ويزفره...جاي اخذ البنات مدامتي طالبتهن

وكف ابويه بعصبيه... شنوووووو شكلت ؟

باوعله وهو كاعد ورد عليه.. اكعد استقر دام كلت شنو معناها فهمت

ابويه بغضب .. لا والله مجاي افهم

رد ببرود .. تمام افهمك سوليين مريضه وحابه تشوف اخواتها واني وعدتها اجيبهم وقبل لا ترفض ترا هاا من هسه اكولك نصير مو خوش وادم

ابتسمت بنشوه واني اباوع الافيان الي ضحكت بسرعه وحضنتني والفرحة غامرة وجهها

بس حطم امالنه ابويه من حجه بعصبية ... لا بناتي ما يطلعن من هذا البيت الا على جثتي مستحيييل لو اعرف اسويها كاتل ومكتول ما يطلعن

رد عليه الاشتر بقرف .. اهووو شكد تحبن تاكل رزايل لا تتعبني بابا وكول للبنات يحظرن نفسهن

تعصب ابويه وهو يصيح ... كلت ما يرحن الا على جثتي وبعدين شنو انت منو هتلر لو ارطغل

الاشتر عقد حواجبه وجاوبه بغرور.. ومنو ذول الزبايل وتحطهم ويه اسمي

سكت ابويه بس اديه ترجف ويفرك بيهن بتوتر وكف الاشتر وتراجع ابويه خطوات تقرب منه وصفه على الحايط ويحجي وياه بصوت اقرب للهمس بحيث ما سمعنه شي شكد حاولنه نسمع بس ماكو

وابويه من الكلام الي دار بينهم حسيته شويه وينجلط لزم ليده وهو يتوسل بيه .. لا والله اخذهن اخذهن بس دير بالك عليهن ذن بنياتي محد الهن غيري مسكينات متعلقات بيه

انصدمنه من كلامه شوكت هو يحمدنه لا والادهى من هيج احنه شوكت تعلقنه بيه اصلا لا نطيقه ولا يطيقنه

طلع ابويه واحنه شردنه للغرفه كال بصوت عالي بعد ما دخل للغرفه.. وينجن هييي

وكفنه عبالك مندري شصار كال بقلة حيلة.. روحن حظرن ارواحجن ذيج ام سبع ارواح مريضه ورجلها يريد تشوفنها

افيان لعبت باعصابه ... لا بابا منروح انت منوافق وهذا جبرك احنه وياك مو عليك شفته شلون يهددك وانت صرت هلكدوتك ( وتاشر بأصابعها)

رفع رجله ونزع نعاله وگطفه عليها وهي انهزمت اجه بالحايط كلها ... بت الجايف تعيريني بسيطه ترجعن لو مترجعن يله ولن حظرن رواحجن

احنه ما صدكنه من فرحتنا صرنه وحدة تركع بلخ ونبجي من فرحتنا اول مره نحس بطعم السعاده الله شكد حلوه السعاده يارب ان شاء الله دوم

وبدلنه الامين طلعنا لگيناه واكف بالحوش سلمنه عليه هو كال بجمود .. هلا خويه

بعدها كال ..تفضلن وياي بالسياره

خلينه ورحنه امين اجه يكعد يمنه وهو سحبه من ايده گلة وهو يضحك.. تعال بابا انت رجال تعال اكعد بالصدر هههه عوف اخواتك لوحدهن

ارتاحله امين وكعد يمه جان لطيف يحجي ويه امين ويسولف عبالك ولد جبير حبيت اسلوبه ويمشي بهدوء رغم الطريق طويل بس ما حسينه بيه واحنه نحلل شخصيته اني وافيان

احلى شي عجبنه هو تعاملة ويه امين محترم امين امثر من ابويه ويوصي بيه .. دير بالك على دراستك ولازم شهادة بيدك تكون سلاح الك اريدك بطل واذا طلعت الاول على الصف اجيبلك هديه حلوه افاجئك بيها

رد امين بطفولة وحماس.. شتجيبلي

رفع حاجب وهو يسوق .. مفاجئة ميصير نحجي بيها

ظل يضحك امين ولزك بيه كل شويه وكله .. عمو انت حباب عمو انت احسن واحد اختي سولين شلونها

ضربه على كتفه وهو يحجي وياه.. والله انك كفو ما نسيت اختك عجبتني ولك ملعون

ابتسم امين ورد عليه... احب اخواتي

جر نفس ورد عليه بحسره.. واني هم احب اخواتي

استغربنا معقوله عنده اخوات يعني سولين هسه عايشه عند اهله وين الله ويطلعون اهله خوش ناس ومريحين اختي بلكي الله

وصلنه للبيت جان بيت اقل ما يقال عنه تعبان

وهي جانت كاعده القنفه ونايمة مثل الملاك البريئ عيونها تمليها الهالات السوده والشحوب طاغي على بشرتها مو اختي سوليين الحلوه

انتبهت عليها ضعفانه وبروز بضعمة الترقوه واضح وضايعه بالقنفه صايره جلد وعظم شكلها حزني واثار عاطفتي بجيت عليها بصمت وافيان ما تحملت تشوف شكلها بجت وهي تلزم ايدي وتعصرها

جانت ايدها مشكله بيها الكناوله من دون مغذي او شي احتمال تاخذ ابر بالوريد صفنت عليها ودموعي مثل الشوارع الفايضه مريضه سوده عليه شبيها سولين لإي حال وصلت

كعدها هو وهي جانت تفتح عيونها والدمع حتى وهي نايمة متمرد على عيونها ومبلل اهدابها

اول ما فتحت عيونها ببطئ بعدها ارتعدت وتوسع بؤبؤ عينها مصدومة من اخواتها لجايات يواسنها على ظيمها

......................

سولين

الاخت شي مختلف عبالك رب العالمين انطاك روح ثانيه بهاي الدنيا مستحيل اكو شخص يعوض مكان الاخت هي السند هي الحنان هي الوطن

الاخت هي القلب الثاني وكاتمة الاسرار وعلاج الهموم والايام الاخت قصة منكدر نختصرها بجملة

هدمتنا الحياة وحطمت مشاعرنا وكسرتنا المواقف وتاذينه وحل علينة الدمار بس ظلت مشاعرنا هي هي نرتعش اذا وحده شافت الثانيه

اول ما فتحت عيوني شفتهن مثل الحمام المفرفح هيج طايره رواحن واكفات يباوعن عليه واني نايمة وروحي ذايبه من الحزن

ما اعرف شصار بيه من شفتهن وكأن الدنيا زهت بعيني ركضت الهن واني اتعثر بخطواتي وقبل لا اوصلهن هو ترك المكان وراح

حظنتهن واني ابجي وانوح ابوس بيهن بديهن وما مصدكة هن كدامي لزمت جيهان وحظنتها بكل قوتي واصرخ ... جيهاااان صدك عود دا اشوفج كدامي يمه اخيتي يمه سوده عليه اروحلج فدوه

حظنتني وهي تبجي بصوت عالي من دون كلام وتشهك وتشم بيه ابتعدت عنها واباوع لافيان فافي الحلو ابو المشاكل احبها رغم عركاتنا سوه

حظنتها وهي شلال الدمع غاسل وجهها بستها بسرعه وحظنتها وهي تبجي بالم وتحجي.. سوليين مشتاقتلج والله ارجعي بعد ما ااذيج ولا احجي ولا اكول اي شي لج عفتينه انتي وامي بنفس السنه عفتنا وحدنه اني وجيهان تعبنا حيل

رفعت اديها وبستهن وظميتهن الصدري واشهك من الوجع الي احتلني شفت بيهن امي عبالك حاظنه امي مو حاظنتهن شكد بيهن عطرها شكد بيهن من حنيتها وعطفها

محتاره شسوي مثل الطير المنحور جنت اركض الافيان وارجع الجيهان واحظن امين وابجي على صدره اركض واتعثر بخطواتي وكعت على ركبي واني ابجي

لميتهم كلهم بحضني ابوس بديهم واستنشق عبير عطرهم روحي وعقلي هم سكتني ومسحن دموعي

وكفت من الفرحه والضحكة مخلوطه بدموعي مشيت خطوات بحماس ورجعت بستهن مره ثانيه

باوعت الغرفته واحس عيوني تلمع بفرحه فرحني اليوم حيل فرحني ما اعرف ليش حسيت بامتنان اله اريد اشكره

باوعتلهن واني اضحك وابجي.. شويه واجيجن لا ترحن

خليت ودكيت الباب عليه كال.. ادخل

دخلت باوعتله جان داير وجهه للكنتور ويسفط سترته ديعلگة تقربت منه وحظنته من وره حسيت جسمه تقلص وتصلب

نزل راسه لاديه ورفع اديه احتضنهن بحب حطيت راسي على ظهره وابجي ... فرحتني

رد عليه وهو تلمس الكانوله .. ان شاء الله دوم يبويه شفتج شلون تحظنينهن ان شاء الله يوم الالي

استغربت وعقدت حواجبي .. عندك اخوات

دار وجهه عليه وسحب اديه خلاهم على صدرة كال ..عوفينا من هالكلام گليلي شنو حابين تتغدون انتي واخواتج

ابتسمت .. شنو شو تعدل بالبيت وتشريلي ملابس وانوب تريد تغدي اخواتي اعترف منيلك فلوس

خله ايده على خاصرته بمزح ورد عليه.. بعت كليتي

ضحكت ... ههه لا والله صدك منيلك

رد بحب .. شبيج احجي صدك واخواتج اول مره يدخلن عليه شنو رايج اخلي صفاء يجيب الهن مندي اكله مال عظامة

تعصبت .. شنو قصدك احنه ملطلطات ومعظامات اشو ما اخليهن يتغدن هنا

ضحك ولزم ايدي جان دكم قميصه من اعلى الصدر مفتوحة دخل ايدي بقميصه انصدمت من حركته وسحبت ايدي بسرعه

كال بضحكة.. لج شنو ملطلطات اني حجيت هيج شي شبي عقلج شافط بس لان اكله راقيه وتبيض الوجهه هيج كلت

جاوبته بهدوء وفشله .. بكيفك

كال .. ديله سويلي طريق خلي اطلع اني وصفاء واخذن راحتجن شسون سون

جاوبته بترقب ومزح.. اذا نحرك البيت عادي

عض شفته وهو يرد .. هلا بوكر الحيايه سولين واخواتها

ابتسمت .. اخواتي فقيرات بس اني حيه

هز راسه بنفي.. الصغيره اوكح منج بس الجبيره حيل فقيره حتى متشبهجن

رفعت حاجب.. هاا تباوع على خواتي

ضربني على راسي على كيف كال.. انجبي لج اباوع لخواتج شنو تراهن مثابة اخواتي وكافي تلحين سويلي طريق

جاوبته .. وشنو تخلينا وحدنا هنا بله اني صارت عندي مناعه كل شويه اكشن وعصابه هاجمة عليه بس اخواتي ممتعلمات

ابتسم كال ... لتخافين كثفت المراقبه

حطيت ايي على ايد .. عشتووو

عض شفته بذوبان .. اموت على لسانج هذا ..جبت اخواتج بس لخاطر هاللسان الشطوله

ابتسمت ونزلت راسي بخجل

كال .. ممكن ابوسج

رفعت حاجب.. تأدب

ضحك وبعدها سويتله مجال طلع وصاح على صفاء راح وياه

رجعت يم اخواتي ولازمة اديهن بحماس .. شنو احجن شكو ماكو ولجن ميته شوق الجن خرررب كون هيج اخليجن بگلبي واقفله عليجن اروح فدوه لهلوجوه الحلوه

لزمتني جيهان وهي تسأل عن حالي .. اخيتي شلونج شو شكلج متغير وتعبانه شبيج ماذيج الاشتر

تنهدت وما ردت اخوفهن عليه لبيهن مكفيهن ... لا الحمدلله ماشي الحال زين حباب نوعا ما بس عنده صديقه حلوه تجنن اسمها جالي مدري سالي

ردت افيان .. دليني على بيتها اله اروح اطيح صبغها وين كاعدين عيني عشتو انوب اسمها سالي سلح البين ان شاء الله محبيتها

ابتسمت .. لا ولج هي ما اذتني بشي بس مدري محبيتها هم نفسج مبينه داهيه انوب مجنده عود شنو مجندة ؟

جيهان ردت بفهاوة .. يعني جنديه تلبس بدلة عسكرية وتلزم رشاشه على القاطع تحارب دواعش تدخل معارك

ضحكت.. ههههه عود صدك بس لا ما اعتقد مستحيل هي حيل نازكة مو مال حروب يجوز معاركة من نوع خاص

اردفت بتغيير .. هسه عوفنا من سالي گوللي عامر الخسيس شلونه وياجن

نفخت افيان بضجر ... دهر صابه المصيوب ان شاء الله انوب متخبل بالزايد بس ربج اشتغلنه اني وجيجي وننطي فلوس وشويه يسكت ويهجم مثل الثور

جريت نفس وزفرته .. الله كريم بلكي الله يخلصجن منه صدك كوثر شلونها رنا وعمتي شلونهن ونبي فد مشتاقه الهم بالخصوص كوثر شكد مواقف حلوه بيني وبينها ولا انساهن

جاوتني افيان .. لا تخافين عليها كويثر داومت جامعه وتعرفت على وحده يكولون صاكة مصكصكة وخطبتها الكريم ورنا بعد روحي عليها ما نستنا

وكفت مصدومة من كلامها ... شنووو كريم خطب

باوعت الجيهان نزلت راسها بحسره ومجاوبتني كملت افيان .. اي عيني خطب وراح يتزوج ومن عائلة راقيه يكتون فلوس والعروس من جماعة دا اكولج وهياته ههههه وين الله وتجيني اصبغ شعفتها صفره

بللت شفايفي بحيره و جيهان وجهه ظل ينطي اللوان سكتت محجيت شكول شحجي واني اعرف اختي بانيه عليه امال وگلبها عنده سود عليه جيهان ما فرحت ..

جاوبت واني عيني على جيجي كلتلها .. الله يسعده

رحت جبتلهن مي ورجعنه نسولف وفرحانات شويه واندك الباب طلعت صحت .. منو

رد عليه صفاء.. ها خويه اني صفاء هاي صينية المندي جبتها

اخذتها وتشكرت منه كعدنه خلينا الاكل واحنه متفاجئين اول مره ناكل اكله بيها خير جان عباره عن تمن احمر وفوگاة لحم كتف ونص دجاجه وملحقات الاكله كعدنه جنه مماكلين انطيت الامين خاشوكة سحبتها من ايده افيان كالت .. هاي اكله باليد اطيب خلونه ناكل بدينا

كملنه اكل واخذتهن واني اضحك .. تعالن اشوفجن اناقة غرفتي ههههه

هن اجن ويضحكن دخلن جانت عباره عن جربايه حديد وكنتور تلث طلاقات عتيك ودبة المي ارو وجامة لازكتها بعجين بالحايط

كالن مجاملة .. حلوه بس دبة المي ارو شنو

ابتسمت .. هاي القفل السري مالتي اخليها أعيش بأمان بس مره وحده خذلتني ومدري صدك مدري جذب الله اعلم

ردت جيهان باستغراب .. ليش شكو ؟

هزيت ايدي بعدم رضا .. عساس زوجي داخل عليه وحاضني وبايسني واني مدري بس جذاب ماكو هيج كلام يتخيله

افيان ردت .. ليش ولج متنامون سوه

هزيت راسي بنفي

غمتني.. امداج امدة حظج لج صيري مثل ذن الي يحفن يمي عجايز ومحتارات شيسون الزلمهن

تنهد بحيره.. يمعوده هذا الرجال غامض وبس مشاكل على ساعه يموت خليني هيج احسن اصلا اني ما احبه ولا عندي علاقه بيه خليني هيج احسن

كعدت على الجربايه كالت .. اكولج هذا ابوج يريد يزوج جيهان ميثم ابن ميثم هذا الي تزوج وتطلك تلث مرات

فتحت عيوني مصدومة.. شنووو شنوو شنوو لا والله اخاف ما يقبل والله العظيم العب لعب اخاف عباله جبرني على الزواج مستحيل اخلي يجبر جيهان لهذا ابو النسوان

ردت عليه جيهان والدمعه بعينها ... ما يكدر زوجج يساعدني ويخلي ابويه يرفض طلب ميثم

تنهدت ورديت عليها .. ميخالف اكوله ان شاء الله يوافق واذا موافق ازعل زعله قويه وننهزم كلنه هههه هزمه جماعيه

جهيان مسحت دموعها.. ما اعرف ضايجة كولش ما احب اتزوج هذا المقرف هو وامه واخواته كل وحده شكبرها انوب يجعصني

ضحكت وحظنتها .. يعمري والله اخلي اشتر يحجي ويه ابويه واكيد ميخلي يخطبج والله ترا اشتر صح خبل وخبيث بس مرات حباب

قررت احجي وياه بموضوع جيهان لان من سابع المستحيلات اخلي اختي تنظلم وتنجر فوك ما هي مظلومة جنت اتمنى تتزوج كريم وتنسعد بس بعد قسمتها مو ويه كريم

ظلن للمغرب وبعدها خلن و راحن اخذهن الاشتر وصفاء ظل يمي خطيه يخاف عليه خاصه بعد ما صار ذاك الموضوع

انوب من راحوا جنت اباوع عليهم من الباب شفت سوادي عيونه زرك مبين مكتول اول ما شاف الاشتر دخل لبيتهم مهزوم منه

يمه من شفته شلون انرعبت وخفت منه اتذكرت موقفه اخر مره سديت الباب بسرعه

............................

صفاء

خابرني الاشتر خليت ورحت الها شلمت عليها دخلت جوه ما الي خلك الها صح تحمدت الها بالسلامة بس جنت خايف اخاف احجي كلمة وتنهد عليه وهي معروفه بالهدات

كعدت جوه وشويه سمعت صوت بجي ونحيب صار عندي فضول قوي اشوف شكو وخرت البرده وشفتهن بنات شابات

رغم الموقف الحزين بس اثار انتباهي وحده منهن جانت شكلها لطيف وعيونها عسليه على صفر هيج شي جانت احلى وحده بيهن كلش شكلها مريح للعين

عفت الموقف كله وصفنت بيها ومن كلام سولين عرفتها اسمها .. جيهاان

سديت البرده واني ارجع اتلفظ اسمها واركز بيه جيهااان ما شاء الله شلون حلوه وشكلها راقي وبسيط بس ما اعرف يمكن متزوجة

حكيت جبيني ورجعت افكر .. بس اخاف وكحه مثل اختها هو الاشتر ما كادر الاختها اني اكدر الها استغفر الله يمكن متزوجة

بس لا ممعقوله متزوجة هو الاشتر كال اني متزوج الوسطانيه والكبيره والصغيره لحد الان ممتزوجات بلكي الله ممتزوجة

حتى بلكي استقر واخذ بيت وان شاء الله احجي ويه الاشتر اذا يقبل اتزوجها ما اعرف اول مره تدخل بنيه لگلبي وارتاح الشكلها وهيئتها حتى من تبجي لطيفه ورقيقه عكس سولين خبصت الدنيا جنها مخبله

بعدها اخويه طلب مني اجيبلهم غدا خليت وطلعت اول ما فتت منها رفعت عيني الها واني اتلصص عليها بس هي ابد ما شالت شرحة عينها

رحت والطريق كله افكر بيها مثل الهواء نقيه وصافيه مثل المي شايله بوجهه حزن ما شايلته جبال حاولت اعرف شنو سرها شنو سر التأمل بيها اخت سولين اخلاق وادب مثلها ربي يحفظها ويرزقها ابن الحلال

حاولت احجي ويه الاشتر بموضوعها بعد ما وداها بس ما اعرف تراجعت كلت اخاف البنيه مرتبطه و بالها احد واخاف تنجبر عليه لان اني اعرف ابوهن ظالم ودوم يجبرهن على هذا الشي ففضلت السكوت

وحاولت اتقرب من سولين حتى اعرف اذا اختها ببالها واحد ابتعد واذا لا ان شاء الله اني متقدم واخليها اسعد انسانه بالدنيا كلها

وربي يقدرني واقدرها واحطها بعيوني حمامة بيضه وشفافه ملاك تخدشها النظرات واني الي نظره بالمره اعرف اذا زينه او لا وهي غامرها حيائها شلون سرقت گلبي بدقايق

اتصل موبايلي شفتها هدى فتحت خط كالت .. الو هااا صفاء راح افسخ الخطوبه امي تعاركت هي وخالتي وهو الكوا.. غلط عليه بعد ما عزيته ورزيته ان شاء الله ترجع علاقتي بيك احسن من قبل يله بااااي حبيبي

قفلت الخط واني تنهدت ... هاي شبيها رب مال شفوط شكد شافطه وخبله احس بيها خيط همزين ما حبتني جان اشتغل ضميري وظل يانبني

رجعت دزتلي رساله كاتبه.. حتى النيشان والذهب من امي عود عشتو ابن اختها وتساعده واني دللته دلال الكيك والشربت والطلعات والونسات والبوس تالي يكول روحي الخبله مو زين راضي بيج .. صفاء احببك باي

هزيت ايدي وحذفت رسالتها خبال حتى خبال بله هاي مال زواج بس امها تافهه ميته اله تزوجها

رحت للنهر مكاني المفضل واني بالي عند الحمامة الحلوه وياخذني التفكير بيها للبعيد

.........،.....................

رنا

بعد ما راحت كوثر شفت اخويه حارث ظال بس يصفن وحالته حاله ما استغربت الوضع لان اني اعرف شنو الدار بينه وبين كوثر واعترافها المفاجئ لحارث من دون علمي

اتذكرت الرساله الي رسلتها سولين لاخويه وهي تطلب منه يساعدها ويخلصها من زوجها النذل

جنت افكر معقوله الرساله تكون بيها طلب مساعده ومن ظمنها اعتراف صريح من سولين لاخويه بحبها اله معقوله لان سولين ابد ممعترفه لاخويه بحبها بس جانت تسكت وجنت احس بيها متقبلته وتتودد اله

رحت لغرفة اخويه واني اريد اصارحة بالرساله دكيت الباب كال ... ادخلي

دخلت باوعتله وجهه تعبان ومهموم ولتعب واضح على ملامحة كعدت يمه واني ابتسم ... حارث خويه شبيك اشو احسك مو طبيعي

بلل شفايفه بحيره وهو يجر نفس كال .. راح احجيلج موضوع بس ما اريد واحد يعرف بيه

ابتسمت ... عرفت هذا الموضوع اكيد موضوع كوثر

باوعلي باستغراب ... شكوو منين عرفتي هي مفاتحتج بالموضوع وليش ما كلتلي انحرجت حييل لو اعرف بالموضوع جان عرفت شلون اتصرف

هزيت راسي بنفي ... لا لا والله ما اعرف حتصارحك ولا اعرف تحبك اببد بس سمعتها وهي تحجي وياك وما عرفت جوابك

نفخ بضجر وهو يرد عليه... والله حيره يا رنا ما حبيت غير سوليين سولين هنا تدگ بصدري دقيقه ما نسيتها ومستحيل احب صديقتها او اتزوجها مو لهلدرجة نذل وتعرفين اني لحد الان عندي امل بسوليين

هزيت راسي بنفي... لا خويه لا عوف سوليين بحالها زوجها مجرم ما يرحم شفت شلون دخل علينه انت مو گده والله مو گده

عدل كعدته بعصبيه وهو يحجي بغضب ... شنو قصدج اني ما بيه خير مو رجال

نفست كلامة بسرعه ... لا لا خويه والنعم منك انت رجال وتاج الزلم بس خويه هذول عصابات ويخوفون هو صديق عامر شتترجة منه وبعدين انت تعرف خالي و موقفه منك عوفنه منهم وانسه سولين

جر نفس عميق وزفره كال .. ما اكدر معشعشه بدماغي بالقران ما اكدر تدرين رحت لابو فاضل ردته يشيلها من گلبي بس ماكو زدت بحبي الها

يمكن تناسيتها ونسيتها بس كوثر فتحت كل جروحي تعرف بيه احب سوليين واصلا من اشوف كوثر اتذكر سولين وافرح من اشوفها ما توقعتها تجي تعترفلي بحبها كلش ما توقعت صدمتني

وهاليومين اني صاير نار نعادت عليه حياتي ويه سولين شلون جنت اخطط وشلون افرحها واخليها تكمل دراستها وافتخر بيها بس شسوي حظي زفت

اجيت احجي وياه على الرساله بس بعدها تراجعت ما اريد انطي لاخويه امل والبنيه تزوجت ولا اريد تصيرله مشاكل ولا يسويلها مشاكل واعرف الي وياها ما يرحمون من ابوها الزوجها لذلك فضلت السكوت

تافئفت ...اي وانت شجاويتها ؟

تنهد بضياع ... مجاوبتها استحيت منها كلتلها الله كريم

بس اني متعجب هي مو صديقة سوليين يعني شلون الها نفس تجي تصارحني بهيج موضوع هي مو تعرف احب سولين

رفعت اكتافي بعدم معرفه ... والله ما اعرف يا خويه

عفته وطلعت واني الف فكره ببالي والرساله اخذت حيز من تفكيري شلون خبيثه ما وصلت الرساله وحكمت على سوليين تتعذب وتتزوج من الاشتر وتنهزم وتصير سمعه عليها الله يطيح حظج يا كوثر

.....................

سوليين

من بعد ما راحن اخواتي كل ما احاول افتح الموضوع مال جيهان ويه الاشتر ما اعرف شنو لازم تطلع فد شغله تعكر عليه الامور اخر شي كلت لازم اكعد اله ركبه ونص مناطره اخاف يطلع

وكل نا احجي وياه وكال .. مستعجل مستعجل بعدين بعدين موتني ولا يلفي يجي نص من ليل بس صفاء موجود وميطلع مميعوفني لوحدي

اخر شي قبل يوم من خطوبة جيجي كلت لازم احجي وياه قبل لا يروح لكيته كالعاده ينظف بسلاحه

كعدت يمه وحجيت بهدوء... شلونك

رد عليه وهو مرحز بسلاحة .. كل ما انظف مسدسي تجين تسألين شلوني واني اكولج من الاخير احجي شعندج

ابتسمت ... اي صح مصلحجيه اني

ضحك وهو ينيشن بسلاحة كال... اي هو اني مسميج سولين المصلحجيه احجي يبوويه شعندج

بللت شفايفي وعدلت كعدتي بحماس... اختي جيهان اجيتك على الله وعليك اريدك تحل مشكلتها انت صاير حلال المشاكل ولو ما اعرفك نجر وتحل الكلفات ما اجي وادك بابك

رد عليه وهو ينطيني على كد عقلي.. لا ولو تدلل ابو كاظم ان شاء الله محلوله شبيج تحجين جنج شيخ

رفعت حاجب .. شنوو ليكون الشيخ احسن مني

رد وهو يعض شفته بذوبان .. يروحلج فدوه اولهم شيخ عشيرته احجي بنيتي واعتبريها محلوله

فركت اديه بتوتر وحجيت .. ابويه يريد يزوج اختي جيجي لواحد نذل تقبلها اختي جوج الحلوه تتزوج واحد مطلك تلاثه وهي الرابعه وعنده سبع اخوات كلهن عجليز بكدك

لزمني من فكي بس قوووي كال ... هذا الحلك اذا ما ينباس ما يمشي عدل

جاوبته بتوتر ... لا لا ونبي دا الطف الجو هيج طبعي اضحوكيه

باوعلي بنص عين وعافني وطلع جكاره حجه والجكاره بين شفايفه.. اي ما شاء الله تموتين ضحك ما اكدر عليج هه

عدلت كعدتي ... وهسه شنووو تساعد اختي ونبي تدخل بيها الجنه فد فقيره مو مثلي اني وفافي حيايه ولسانات هاي حيل فطيره وفقيره

ابتسم على كلامي .. كال هذا هو ان شاء الله اختج ما تتزوج الا ليعجبها

وكفت بحماس... خاب يروحلك فدوه لبالي اشكرك شكد حلو من تصير حباب خليك هيج دائما

ضحك و وكف كال .. ادللي راح اظل هيج وانتي هم ظلي هيج عاقله

ابتسمت.. تتدلل

كرص خدي كال .. متغيره حييل ذبلانه الله ينتقم مني نسيتج ما اعرف شلون غفلت عنج

جاوبته بحقد .. اي والله دخلص موضوع اختي وان شاء الله نتعارك اذا ما نخطبت ما احجي بس اذا انخطبت اهجم هجوم كاسح

كال... لا دام هيج اروح اهجم من هسه وخربها ما الي خلك لسانج الطويل

ابتسمت عليه وهو لبس سترته وراح واني ظليت انتظر منه خبر بلكي الله ويخرب الخطوبه ولو هو اذا راد شي يسوي ما اشك بيه

....................

جيهان

كعدت من الصبح واني ابجي وانوح اليوم الخطوبه وكلبي يرجف ما اريده والله احس صغيره عليه احسه مقرف و وسخ متزوج تلاثه وعمده اطفال والاه ما اريده بس منو يحس بيه

حسيت بظلم طاغي يقتل وجداني ويجرح كل جزء بيه

كعدت صليت وبجيت ودعيت ربي يخلصني من هاي الخطوبه دعيت من كل كلبي وسجدت سجدة طويله لحد ما حسيت خارت قواي كد ما تعبت

بجيت بصمت واجه ابوي بهمه كال... اكلج حظري روحج بسرعه هسه يجون الخطابه

بجيت وحظنتني افيان ظلت تبجي مجان عدنه سبيل للهروب من هاي المشكلة بدلت بس حتى مكياج ما خليت بس بدلت ثوبي

افيان ما قبلت كالت عيب من العالم اخاف عازمين خلت الي شويه مكياج خفيييف وكعدت الدموع تكت من دموعي والله حتى تعجبت دموعي تنزل عشره عشره مو دمعه وحده

شويه واندك الباب انخطفت روحي من الخوف فتح ابويه الباب وهو يخبصنه .. اجووو اجووو يله ولجن حظرن الكعك

فتح الباب واباوع مره وحده كلتله بعصبية.. اكلك الخطوبه خربت فكنه منك ومن مشاكلك عوذة حتى عرذة شلون ناس بس مال مشاكل تف

نهاية البارت ... يتبع

كونوا انتم كونوا بخير.. احبكم 💔

اعتذر منكم البارت مو بالمستوى المطلوب ويمكن يفتقر للإحداث بس والله صار عندي ظرف طارئ وتخليت عن بعض الاحداث ان شاء الله اكتبهم بالبارت الجاي واعتذر عن التاخير يس صدقا صار عندي ظرف ما فرغت اليوم

غلسوا عن السحكات من دون مراجعة ولا تنسون التصويت 💔