رواية #وكر الأشتر الفصل التاسع وثلاثون 39 - بقلم الكاتبه سمو العراق

بارت ٣٨
رواية ... وكر الاشتر
بقلمي .. نور سمو العراق

💔💔💔💔💔💔💔💔💔💔💔💔💔

–
أودّ أن نڪون معًا ولو تأخذنا الحياة على حافّة هذا العالم ‏نتشاطر هذا الحُزن ‏ونبڪي فوق عواتق السنين الموجِعة ‏أنسى الحُزن بضحڪاتك وأذوب في عينيك ‏إلى مالا حدَّ.

.................................

سوليين

بعد ما بدلت ملابسي دا اروح للخطوبه جنت كولش فرحانه لان هو وافق اروح جنت اضن ميوافق لان هو يكره حارث والخطوبه ببيت اهل حارث لذلك جنت متوقعه ما يقبل

بس تفاجئت برده من وافق اروح صدك تغيرت نظرتي عليه وحسيت بيه متفهم وما يظلم عكس ما جنت اشوفه قبل حتى تغاضيت عن وجوده بمقتل امي واني شفت ابوي هو الي قتلها ودمرها

دا البس بالحذاء وهو طلع لابس ملابس مرتبه وحلوه وكذلك هو طالع مرتب وديرش بالعطر اني كتله .. هااا شنو انت هم معزوم مو

جاوبني بهدوء.. اي معزوم عزمني كريم بس اني ما اروح لان بصراحة ما احب اسبب مشاكل واعرف اهل حارث ما يتقبلون الوضع ففظا للنزاع مراح اجي بس اوصلج وان شاء الله باليل ارجع اخذج

سكتت مجاوبته وبعدها هو باوعلي كال .. طلعتي حلوووه ولج اغاااار عليج من عيون حويرث هذا فد واحد مطي

ضحكت وعزيت راسي بنفي .. ههه لا لا مستحيل ترا ما بيني وبينه شي والله هو مجرد جان معجب بيه وهسه يمكن حتى الإعجاب راح

جر نفس وزفره وهو يكول .. لا خلي يولي اصلا ما اريدج تحتكين بيه ولا تحجين وياه كوني بعيده عنه احسن لان هذا ممستقر عبالك مو مره متزوجة

ضحكت .. ههههه تغار عليه فدووه واخيرا لكيت واحد يغار عليه

باوعلي بنص عين .. اغار شنو جاي احذرج يالخبلة احذذرج افتهمي خليج بعيده عنه لا احصرج واحصر الخلفج

باوعتله بقرف .. وييع شوكت تبطل سوالف الحصر ؟

ضحك وتقرب مني مد ايده من جوه القميص وهو يتحسس خصري كال .. اصلا تدرين اني بعيد عنج كل البعد ولو واحد غيري من زمان انحرف وغير مسيرته وياج بس اني ما اريد شي بالاجبار واني لحد الان احس حتى البوسه اخذها جبر فما مسوي شي من صدك ولا حاصرج الحصره الصدكيه

سحبت نفسي منه بخجل وشتت نظري جاوبته ... هو عود من البس البدله احصر براحتك

ابتسم بسخريه .. عمي البسي بدلتج ادللي اسوي عرس بس مو تشوفيها واكفه صارلج هواي عندي وما معرسه عليه مدري ما معرس عليج

جاوبته بصدق .. اي اني اريد كل شي حلو كل شي اريد بدلة اريد تسريحة قاعه ونعزم اهلنا يعني شي حلو تفهم عليه موو

هز راسه بقبول .. اي اي افهم لعد شلون ما افهم تردين تفتخرين كدام اهلج وناس وهذا من حقج كل شي تردي يجرالج وهذا شاربي ازينه اذا مسويتلج احلى عرس

ابتسمت بحب ... شكرا جزيلا يا احلى عريس هههه

تقرب مني باسنييييي حييييل بشفايفي وابتعد وهو يمسح شفايفه بالكنلكس كال .. هاي مصايب الحمره تطبع بشفايفي

خجلت منه ما رديت عليه وظليت محتاره افتح الشال وارجع الفه وخلينه وطلعنه وصلني لبيت عمتي وهو راح كال عنده شغل شوف هو ابد مو شكوكي ابد ما يشك بيه واني شكد شكوكيه شكيت كاشخ ومبدل راح السالي الجالي

دخلت على بيت عمتي فرحاااانه وجانت العروس رناوي هسه جاي واني كولش فرحت بيها صرت اركص واهلهل وحاضنتها ابوس بيها خفت اخرب مكياجها وهي تبوس بيه ودكول ... خربي خربي هو جاستن راضي بكل شي ههههه

ظليت كاعده يمها ودخل حارث سلم عليه بس جان حيل متوتر ومبين الانزعاج على وجهه وضايج حييل وجهه اسود حسيت بيه شي وجنت اظن ان ممكن ضايج لان اني اجيت ويمكن شاف اشتر هو جابني وشاف شلون جان لازم ايدي ويداهرني ويتشاقه قبل لا ندخل

جنت حسبه تاخذني وحسبه توديني انوب كلت اوووي خاب دروح هي شنو غير زوجي هو شدخله واني شدعوه شايله اله هالكد اهميه

ظل طول فترة الخطوبه هو يريد بس يحصلني بمكان حسيت بيه عنده كلام يريد يكوله حسيت عنده فد مشكله يريد يطرحها

بس اني جنت خايفه حيييل وجنت لازكة باخواتي وجنت اصلا كاعده طول الفتره يم رنا حتى شنو ما ينفرد بيه او يكعد يمي وكل شويه اباوع اخاف يجي اخاف يلزمني حيييل حيييل خفت منه ومن تصرفاته

وبعد ما خلصت الخطوبه و وظلينه لليل اني خليت وطلعت وياهم جنت دا اريد انهزم منه جنت خايفه ما اريد اظل بييتهم جنت اخاف يختلي بيه لان حسيته بس يريد يلزمني حسيته يريد يحجي

توسلت بيه رنا هي وعمتي توسل ما قبلت اظل رغم اشتر كال اخذج من بيت عمتج بس اني فضلت اروح وما اظل هنا احسن ما اريد اظل يم حارث لان حالته ابد ما تطمن

و آول ما طلعت هو وكف يمي كدامهم كلهم وكال .. سولين ممكن شويه احجي وياج على انفراد عندي موضوع وياج

هو باوعله عمو كريم وعقد حواجبه وحجه وياه بحديه كله .. حارث مستعجلين نريد نروح

جاوبه برجاء .. لا بس شويه والله ما اتاخر وياها بس شويه

جنت متردده ومستحيه من حارث وبعدها وكفت وياه بس مو بعيد لا قريب منهم بس مو كولش كال .. سوليين انتي صدك قبل لا تنهزمين وقبل لا تتزوجين دازتلي رساله بيد صديقتج حوراء حتى توديها الكوثر وكوثر توصلها اليه

رفعت عيوني بتفكير جاوبته ... اي صح بس مجان اكو رد من رسالتي 

تنهد بغضب وقهر كال .. ما وصلتني الرساله ولج سوليين ما وصلني اي شي وحق الله وعرشه ما وصلني اني لو واصله رسالتج اخلي الدنيا تتثالث بس كوثر الكلبه الحقيييره ما وصلت شي والله والله البارحة من سمعت اجيت اخابرهم واخرب الخطوبه

بس اميييي اميييي هي الي ما قبلت توسلت بيه باست حتى ايدي انييي انييي اخلي اختي تتزوج اخو هااااي الكلبه عديمة الامانه والله والله لو واصلتني الرساله جان هسه انتي بحضني مو بحضنه

فتحت عيوني مصدومة وقرفانه جاوبته ... انت شتحجي الرساله راحت بوقتها وكل شي انتهى حارث لا تسويلي مشاكل وانسى كل شي انسى اني انتخيت بيك انسى اني دزيتلك رساله فدوه والله ما اريد مشاكل كافي تعبت

ما اشوف الا لايت السيااااااره انصدمت وارتعبت من شفته الاشتر هبطت من الخوف

نزل من سيارته وسلم عليهم وبارك للكل من دون ما يسلم على حارث اني جنت اطكطك من الخوف وما عرفت شحجي وفافي خلستني خلس

باوعلي وهو يكول ... اجيت اخذج يله امشي

باوعتله بخوف وقلق وابتسمت بتشتت وفافي كالت ... لا فدوه حباب خليها تروح ويانه لبيت جدي والله صار هواي مشايفيها

وجيهان كالت بفهاوه .. اي والله خليها يمنه مشاقيلها حييل

هو جاوبهن وملامحة جامده وما تعبر عن شي بس اني حسيت ولاحظت انزعاجة كال ... لاااا والله انريد نروح باجر عندي شغل ولازم اروح باجر عندي روحة للبصره وراي كعده

توسلوا رادوا ما قبل واصر اروح صرار قاطع

ركبت بالسياره وهو ساق بسرعه وطول الطريق ما فتح موضوع ولا نطق بحرف واحد جنت خايفه منه ومن ردة وسكوته عذبني اكثر سكوته خوفني و وترني

حاولت أفتح موضوع وياه حجيت كتله .. احم اشتر ترا مصار شي مجرد هيج جان نقاش بينه

من دون ميباوعلي كال .. تمام

صدمني اكثر ردت احجي اشرلي اسكت وهو جره اتصال سريع ومن دون ما افهم من الاتصال شي لان جان مجرد ارقام واللغاز ما فهمت منه شي

وما قفل الخط اله من وصلنه للبيت اول ما وصلنه هو دخل للغرفه وسدها نام واني خليت ورحت نمت ما تجرأت احجي وياه بس شفته ميريد يحجي ومن كعدت الصبح دكيت الباب ماكو فتح الباب لكيته طالع مموجود

ضجت حييل وانقهرت هو ليش هيج ليش ما تفهمني معقوله اني حسدته اووف شلون مشكلة

حتى من الخوف اني نسيت حارث ونسيت الرساله ونسيت كوثر الحقيره شلون غدرتني وما وصلت رسالتي وهي امانه كلبي ديوجعني منها شلون امنت بيها وما شفت منها غير الغدر

..........................

فافي

من بعد ما صار الحادث والرمي اجت الطلقه بفخذ حنان والدم ظل يصب وهي من الخوف و الرهبه اصطكت لا تحجي ولا تصرخ بس صارت صفرررررره

وجدي ظل يصيح وام حسن تصرخ وتلطم وجاسم يصيح وابو ايات شرد ركب سيارته وانهزم

شالوا حنان واخذوها للمستشفى وام حسن راحت وياهم وهي تلطم وتبجي

دخلنه جوه وكوثر تبجي وتنوح كالت .. الله لا يوفق الكان السبب كل من خرب بين ايـــــــــو وكريم ربي ينتقم منه ويعاقبه ويطيح حظه ويجازيه بافعاله

كملت كلامها .. شلون جانوا حلوين شلون جان يحبها ويداريها ويموت عليها بس بعد الناس وحسدهم ناس تطب وتطلع عليه ومن شفناهم زادت المشاكل

جانت تقصد علينه عساس احنه حاسدينهم انوب شكد حقيره ذبت الصوج بينه وما ذبته بمرة اخوها الي حرظت ابوها على عيالها واجه يتهدد بمسدسه وكتل المره انوب تبرر الهم افعالهم اموت واعرف هاي شمسويه لكوثر حتى هيج تسوي وهيج تفعل

جاوبتها اني .. لا والله طلعتوا محسودين ما تكولين مرة اخوج عفطيه وكل سالفه عايبه عندها من سحورتها لمشاكلها هي وامها انوب ابوها اجه هاد عليكم وكسر رجل المره انتي شنو من مله حتى تدافعين لاعدائكم

باوعتلي بقرف وهي تكول ... وانتي منو يمج شبيج نبصتي بنص السالفه على شنو شكو اخاف صدك انتم حاسودين وهاي سوالفكم حتى هيج حجيتي لان الي بعبه صخل يمعمع

ضحكت .. هههه الحمدلله عيني شبعانين وقناعنين وعيونه متروسه لا نحسدج ولا نحسد غيرج ولا نقلد غيرنه مقتنعين بالعدنه ولا نركض وره احد وادينه ذهب نلزم التراب يصير ذهب هم اني وهم اخواتي

وصدك الي بعبه صخل يمعمع يمكن انتي هيج وصايره تمعمعين وتتجاوزين وبعدين هااا ترا احنه كاعدين ببيت جدي واذا معاجبج ذاك ابوج وكليله واذا رضا على كلامج احنه طالعين

سكتت محجت بس تهز برجلها والحجل يرن علينه فد شايله حقاره مو طبيعيه ومستقتله على ايـــــــــو استقتال مو طبيعي عبالك ايـــــــــو دتنطيها نوط الشجاعه

والله ل١٢ وخابرت على عمو كريم عبالي ميدري طلع مخابره جاسم وكايله ورايح للمستشفى وكال .. سوولها عمليه الطلقه بس باللحم داخله لان ضاربه بالحايط وراجعه عليها وهسه هي زينه ما بيها شي

حمدنه الله وشكرناه وباليل تقريبا للوحده هم رجعوا وصار الحجي طلعوا مناك جاسم وكريم وحارث وبعد ناس من العشيرة واخو حنان داكين بيت اهل ايو واهل ايو مهزومين بغير بيت يخافون على رواحهم وصايره طكة وطيح يعني ايو ما ترجع لو تسوي سحر بصين بعد

عفتها ورحت كعدت بالغرفه مالتنه وجيهان الدجاجه لفت راسها ونامت ياربي راح تموتني لا تسهر لا تفكر كبل تنام شسالفه عاد فكري

ظليت ضايجة واطكطك بالموبايل شفت اجت رساله من مصطفى بسرعه دخلت عليها كاتب .. شلونج

رديت عليه .. هلا بالاخو شلونك

جاوبني .. دا احس احجي ويه رجال

كتبت اله .. كفو من شواربي هسه المهم شلونك وجهك شلونه على الخلطه

هو ادري بيه يشمرهن بالزبل بس ما احب اقلل من منتجاتي فمصدكة روحي هو يستخدمهن

كال .. افاااا تخبل امي صارت كزازه منهن وبشرتها صارت تنافس بشرة انجلينا جولي

رديت عليه .. بس خلي تكمل هالكورس مال الخلطه وشوف النتائج المبهره يظلون يسوون دراسات على وجهه وبعدين تدري شيصير

جاوبني ... اي شيصيير

رديت عليه .. انجلينا جولي تحذف كل صورها وتعتزل التمثيل وبعدها اعتقد تنتحر لان اجه منو ينافسها احتمال امك تصير هوليوودية من كد الجمال

ظل يضحك بس مجاوب كتبت اله .. اي بشرني اليوم مبين مشارب ويسكي مو ؟

ضحك... هههههه لا مو البارحة سهرت وشربت وكل شي سويت

كتبت .. ما شاء الله مفتخر بمفعل المنكر هيج صارت الناس لا خجل ولا مستحى شرب ونسوان

رد عليه.. هموم الحياة شلون تنسي اذا ما سوي هاي الشغلات

جاوبته .. تنسي بذكر الله بالصبر وبالتقرب من الله عزا وجل من تدور حلال من تترك هاي الشغلات من تترك الخمر تدري هسه انت مثل الخنزير لا والله الخنزير احسن منك

جاوب بغضب ... هيييي لا تتجاوزين ترا ممتجاوز عليج اني دنحجي باحترام احجي باحترام

تنهدت .. شوف لا تحجي ويايه بهذا الاسلوب ترا ممتجاوزه عليك وهاي حقيقتك يعني هو اليشرب شيصير من الملائكة غير من الخنازير واصلا اني من دا احجي احجي المصلحتك حاول تصلح من نفسك

رد عليه .. ما اكدر اني بعد تعلمت ادمنت على هاي الاشياء مرات اضوج وين اروح عاد اروح للملاهي اشرب انسى هيج احسن

كتبت اله .. زين تمام خلينه نتفق كل ما تحن لهيج شغلات وتريد تسوي تعال اشكي الي واحجي ويايه اني اكعد انصح بيك منا لفد شهر ونشوف اذا تنكطع عندك هاي العاده او لا تمام

رد عليه ببصمة وصوته ملهوف .. اي تمام حلو هيج لان بصراحة اني دا احس ابد ممرتاح حتى من اطلع من الملهى او من اصحى من السكر احس نفسي ضيعت نفسي وضميري يشتغل باول ساعات وبعدها اضوج واريد ارجع لنفس السالفه

كتبت .. اي حقك لا حسيب ولا رقيب امك ما تخاف عليك وانت هيج تسكر ما تخاف عليك تضيع تتخربط امورك وتسوي حادث وانت سكران بس صدك لو كالو ينطون خبز وما ينطون تربيه

رد عليه .. ادري انتي تنصحيني تذليني تهينيني شتردين بالضبط

كتبت .. اي شسوي اذا اني عصبيه ما اتحمل وانت تدوس بالمصارين

ظليت احجي وياه حسيت بيه مهموم حسيت اكو شي كاسره بحيث موصله لهاي الحاله وهاي نتيجته كلت خلي اشوف وين اوصل وياه وخليني انصحة بلكي يستعدل ويصير ادمي واخلي يشتري بفلوس العرك خلطات هم مستفاده وهم راضيه ربي وهم مانعته من السكر خرب ضربت تلث عصافير بحجر

....................

سوليين

مر يومين وهو مطنكر عليه هو صح لا يحجي ولا يغلط ولا يضرب بس ميحجي ويايه عبالك نعال مكطوع حيل يغث غثني حييل

وكل شغله على الحاسبه وعنده صور وملفات يدقق بيهن ويتصل واني لابسني اريد ابجي

خليت ورحت كعدت يمه وجني ولا كاعده يمه تنهدت بحيره واباوعله وبداخلي كلام هواي لزمت ايده وهو باوعلي وجر نفس ورجع كمل شغله وايدي على ايده

سحبت ايدي من ايده و حجيت بهدوء ... لازم تسمعني صح انت كلت لا تحتكين بحارث ولا تحجين وياه بس والله جنت مهزومة منه بكل الوقت بس من ردت اطلع هو عنده موضوع وحجه وياي

باوعلي كال ..تمام

انقهرت بالزايد ورجعت حجيت .. زين ليش هيج ما تحجي وياي ترا ضجت والله حيل ضجت ليش ما تحجي وياي ما تكعد يمي مثل قبل انت لازم تتفهم امري وموضوعي

تنهد وهو يحك بوجهه بملل كال .. كتلج اني لا تحتكين بيه اني ما اريد يصير عنده امل ما اريده يتعلق بيج انوب كاعده ودك سوالف وياه ترا ميصير هيج هاي واني موصيج عبالك اني ابد ما الي احترام عندج

جاوبته بفزع .. لا لا ونبي ابد مو هيج اصلا اني حييل احترمك وادافع الك كدامهم وما اقبل اي واحد يحجي عليك حتى مره تعاركت ويه كرثر على مودك بس والله هو صاح عليه واستحيت اكوله ما اجي هو جان عنده موضوع وراد يفتهم مني

كال ببرود .. اي وشنو موضوعه الجايج بيه

بلعت ريكي وجاوبته بسرعه .. هو كال انتن تعرفن جاسم هم عنده علاقات هيج شي هم جان يباوع عليجن معرف شنو

رجع كمل على حاسبه وهو يكول بهدوء .. جذابه

فتحت عيوني مصدومة هذا شلون عرف جذابه كتله ... هاااا لا

سكت محجه ويايه ورجع يشتغل بهمه فاني حجيت بصدق .. اني مره دزيت رساله طلبت بيها مساعده حارث من ابويه بس هي خبيثه ما موصله اله الرساله وهو هسه يله عوف وديعتذر مني كال والله ما وصلت وديريد يعاقب كرثر والله

كال بتنهيده ... هسه تمام بس ميخالف لا تحجين وياه ترا اني ما اريده يتعلق بيج وما نريد ندخل بمشاكل احنه بغنى عنها فهمتي

هزيت راسي بقبول .. اي صح كلامك كله صحيح بس ونبي اني جنت اتهرب منه اتهرب منه بكل صوره وجان يريد يحجي ويايه عن هذا الموضوع بس والله ابد اني منطيته مجال ولو تلاحظ هو حجه ويايه برا لان جنت لازكة بالنسوان فما لكة فرصه غير الشارع يحجي بيه

فتح ايده واحتضني وهو يكول .. يله ان شاء الله ماكو شي خلي يولي ما يسوه نزعل منج لخاطره

ضحكت ولزمت ايده الي على جتفي كتله .. اي هسه تمام

تقرب مني وباس خدي حيييل كال .. اريدج تعذريني هاي الفتره مشغوول حييل لازم اروح للبصره وارجع عندي شغل هناك وان شاء الله بس اكمله راح اتفرغلج

سالته بترقب .. لعد والجامعه شوكت اقدم

كال.. اي اكيد نقدم خلي ينفتح باب التقديم ونقدم ونداوم وكل شي نسوي

اردف بحب ... احبببج

ضحكت وباوعت للحاسبه مفهمت منها شي جانت مجرد غرفه وبيها تخطيط وبيها ارقام مدري شنو

باوعتله دا اريد اسال كال بنفي قاطع ... لا تسألين لان مراح اجاوب شغلتها تدوخ هاي

ضحكت ... ههههههه زين سؤال اول ما طلعتلك عذر ليش ما صدكت وكلت جذابه

باوعلي بثقه ... لان جذابه ما جنتي متشتته وما خليتي عينج بعيني متعرفين تجذبين ومشتته نظراتج

باوعتله بترقب وشك ... اي اي كمل دا افتهم منك شلون تكشف العالم

تقرب مني وهو يبوسني كال .. اكشفهم من ابوسهم

..........................

جاسم

من بعد ما صارت عشاير قدمنه دعوه على ابو ايات وهو انهزم وعشيرته فصلت اخذنه فصل تنكيل بيه وتنكيس الراسه الفصل ابوي انطه منه للعشيره ومنه انطاه الحنان لان هي اكبر المتضررين وحتى الخساير صفت الها

خليها سميره راح تحتار شتسوي بالخلقه بعد ما اجتها لهده مال فلوس والله شدخلني بيهم اني وين هسه واكع بالعسل خاطب رناوي ودك غزل وياها وانوب مو هيج فد فرحان هي جانت تشتغل بمعهد واني جنت اضوج من صاحب المعهد بس جنت اخاف احاجيها وتكمز عليه عاد هو طاح بيها وفصلها وطردها واني مي بارد ونزل على كلبي راح اشغلها بغير معهد

جنه واكفين اني وكريم بالباب واجن نسوان سلمن علينه ودخلن جوه كريم كال .. ذن شعندهن دخلن علينه شيردن

رفعت اكتافي بعدم معرفه .. والله ما اعرف ليش  وشعندهن

دخل جوه واني دخلت وراه جيهان جانت تسوي جاي هو كلها .. اكلج ذن شعندهن جايات النسوان

باوعتله باحراج وكتله.. هااا ما اعرف يمكن على بيبي ام حسن

اخذت الجاي وهو صاح عليها.. صيحيلي ام حسن وياج بسرعه

هزت راسها بقبول وخلت وراحت صاحتها واجت ام حسن كالت بحنية .. ها يمه كريم محتاج شي

هو سألها بانزعاج .. هذن النسوان اجن دخلن علينه اعرفهن اني شعندهن جايات شيردن وهاي اكثر من مره يجن

جاوبته ام حسن وهي تحضن جيهان .. اي يمه اجن على بنيتي جيهان يردن يخطبنها الكرابتهن بالكوت

هو تخبل فتح عيونه مصدوم كلها .. شنووو يخطبن منو باعي كليلها ما عدنا بنات للزواج وذول الناس اعرفهم ما عندهن حيا حضوري ولا عندهم احترام واصحاب مشاكل وين تردين تورطين هاي الفقيره المسكينه وياهن

ردت عليه ام حسن .. شو يكولون خوش ناس وهم ما الهم لا لكرابتهم بالكوت خلينا نسأل عنهم يجوز خوش ناس

جاوبها بغضب عارم كلها ... ام حسسن روحيييي كليلهم ما النا عندكم مره واطرديهم لا بالقران ادخل اني اطردهم

باوعتله بقلق وفشله وراحت كالت .. خوش خوش راح اكلهم بس نصي صوتك لا يسمعونك

باوعلها بانزعاج وهو يكولها .. انتي بس لا موافقه تتزوجين

هزت راسها بنفي.. لا ما اريد اتزوج هي بيبي ام حسن بكيفها تقرر

مشه خطوات طالع من البيت وبعدها دار وجهه عليها ورفع اصبعه بتهديد وهو يكولها .. زوجج اني اجيبه لا توافقين بإي واحد مفهوم

ردت عليه .. يجوز محلو ميعجبني

جاوبها .. لا هالمره لازم يعجبج يعني مجبوره

خله وطلع واني اضحك وطلعت وراه كتله .. هااا هسه هم انكر هم كول ما احبه

باوعلي بعناد وغضب وهو يكول .. احبها وهسه شتريد

ضحكت .. اريدك تتزوج

تنهد كال .. خلي اطلك ذيج الطركاعه بالمحكمة وانطيها كل حقوقها وبعدها اكعد المح الهاي المفلوكة اشوفها تتقبلني لا قابل هيج اجيت ما اريد اظلمها او اجبرها

تنهدت .. والله احسها تحبك

لزم ايدي بحماس كال .. صدك شلوون حسيت شو تصيحلي عمو ومطفيه من الرئيسي وحتى ما فديوم باوعت بوجهي ودوم خجلانه ومهزومة مني ولو هذا طبعها هي مو مثل البنات ما اعرف شنو الي يرضيها وشنو الي تحبه تدوخ غريبه رغم شكد احسها بسيطه بس متتفسر

غمزلته واني ابتسم .. راقبها راقب تصرفاتها وراح تعرف

تنهد وكعد بالحديقه على الكرسي كال .. انت تعرف هاي ايات من مسويه سحر القميص الي والتراب لاهلي ولعابه المجكجكة لجيهان

فتحت عيوني مصدوم .. عود صدك تحجي جيهان شدخلها

بلل شفايفه بحيره كال .. مو هاي كوثر التافهه حاجيه الها مره مو اني وصيت كوثر تجسلي نبض جيهان وهي ما وافقت وهاي راحت كالت لآيات فهاي عبالها اني كرهتها من وره جيهان فسوت الها وربك لزمتها مسويتلها خبال تريد تخبلها

وكفت مصدوم ... لا يا كلبه تريد تخبل لبنيه شلون الها نفس شلون حقيره وحيوانه مو هاي روح هاي حتى من عذاب الله ما تخاف والله الطلاگ قليل بحقها صدك قليل

تنهد وهو يكول .. بحياتي ما كرهت مره مثل ما كرهتها لك مو ادميه ومنافقه وهاي كوثر صايره مثلها وطبعا حذرتها منها وكنلها طعنت بشرفج وهي ولا مهتمه ما اعرف شمسويتلها وعلى يوم الزمها الا اسكطها تسكط لان حييل تمادت وتفرعنا من صادقت الغضب هاي

رديت عليه .. اي صح لازم نراقبها نشوفها شتسوي لان صايره مو منطقيه وصايره حيل تقلدها عبالك مدري شبيها تخبلت

هز راسه بقبول .. رب ضاره نافعه يجوز زواجي من ايات سببلي مشاكل بس كشفلي اختي شنو مصادقه وراح توصل بيها للهاويه

رديت عليه .. اي والله صدك عسا ان تكرهوا شيئا وهو يخيرا لكم

ظلينه نسولف ونحجي ونراقب كوثر لان صايره حيل رعنه وحتى طريقة كلامها ولهجتها تغيرت صايره ايات النسخة الثانية

...........................

صفاء

جنت كاعد بالبيت ابو التيل لان راح يرجع بيه الاشتر كال وانت تدير بالك على سولين لان هو عنده شغل هناك

جنه نشتغل بالبيت شويه رتبناه والاشتر اتصل وهو يكوله ... متاخذها لو نخله تطلع براسك ما اخليك تاخذها

اردف .. حتى لو ابوها حتى لو هو ينطيها الك ما اخليك تاخذها انت شنو وتاخذ البنيه ترا بعدها طفله وصغيره وانت متزوج وعندك عايله ولانعل ابووك يا ابو حقارتك

كمل كلامة بعصبيه .. واذا انت ساهر نعال عليك وعلى شخصيتك واني ما اقبل واحد مثلك تافهه ومنحط يصير عديلي

كمل بضحكة .. شنوو شنوو انت عمي ولازم احترمك؟ انعل ابوووك لابو عمي

صوت شويه جان عالي سمعته وهو يكوله .. تسب جدك بهذا اليوم

رد عليه الاشتر.. احتركت لشة جدي بهذا اليوم لان خلف واحد عار ومنحط مثلك على العموم لو تصير السما جوه والارض فوك ما اخليك تاخذها مفهوم

قفل الخط وهو مزعوج كتله .. خيير شكو

جاوبني .. هذا الكلب ساهر يريد يتزوج اخت سولين وذاك العار ابوها منطيها اله بالقران اذا اروح اله الا ادفنه فوك السطح لك هذا راح يموتني راح يجلطني

رمشت بعدم استعياب .. منو منهن يريدها

رد عليه.. يريد افيان

انصدمت من كلامه .. افيان طفله حتى اصغر من بنته شلون يريد يخطبها زين بعدين هو مو متزوج وحتى بنته متزوجة

جاوبني ... اي كلب نكاله بيه هيج يسوي يريد يتقرب من ابوهن حتى يسيطر عليه ويسوي كل شي ضدي

رديت عليه .. زين وهسه شلون

جاوب بجديه وغضب .. اكتله وادفنه ومحد يدري بيه ولا اخلي يزوج افيان الساهر انوب هم عوزها ولو هي هاي ما ينخاف عليها تلاعب عامر مصلخ ومتاخذ ساهر بس ما دام هالسالفه صارت ضدي اني اتكفلها

خله وطلع راح كال باليل اجيب سولين لو باجر الصبح كتله خليها الصبح خطيه شنو باليل  على الاقل تكعد مصحصه

من راح اني ظليت ادكدك بالباب اعدل بيه واتصل موبايلي رفعته شفتها هدى بنت ساهر حييييل هاي شكد قديمة ما ماتت

هي تزوجت ابن خالتها اخره مره سمعت وهي يوميه فاسخه وراجعه اله وتالي تزوجت

فتحت خط اجاني صوتها وهي تكول .. هلا بالحب شلونك عمري اموت عليك

رديت عليها بغضب .. ولج انتي مو متزوجة شلون بيج هديوه الهبله ليش ما تكعدين

جاوبت بضحكة ... هههههههه انت والله قديم تطلكت ورحت قبل اسبوع لك طلع مو رجال بيد امه بربوك عاد تطلكت ربك ما عندي جهال يله هسه شوكت نتزوج اني وياك ترا طولت ميصير هيج

رديت عليها بضحكة .. انتي من كل عقلج اتزوجج يوميه جايتني احبك وتالي ترحين تتزوجين وبعدين شنو طولت شنو واعدج بالزواج اني لو مطلكج من رجلج دروحي

كالت .. اوك يالله حبيبي باااااي ماما تصيحلي

غميت روحي من كلامها هاي بنت ساهر لاكفه بالقران مو صاحيه هم جهال ساهر كلهم بيهم خيط مو بس هاي

.......................

سوليين

الاشتر قرر ياخذني للبيت ابو تيل شنو الغايه وليش ما اعرف عاد اني استسلمت للامر الواقع وخليت ورحت وياه

اول ما دخلنه للمنطقه واشوف الصوره مال سوادي منوره المنطقه وعبالك يباوعلي حييل خفت من صورته عبالك دافني هنا مو بس الصوره جانت صوره ضوئية تتظمن تلث صور ومكتوب اسمه وايات قرانية مثل كل نفس ذائقة الموت وهيج يعني اترحمت عليه

وخليت ورحت دخلنه للبيت شفته شويه صاير زين مطور منه وصاير حلو بعدني ما نازعه صايتي وحجابي واندك الباب حيييل

هو وكف راح يفتح الباب وشفت ابويه دخل بغضب وعصبيه وهو يصيييح ...انت شنوووو شنووو ليش تتدخل ببناتي هسه ساهر اجه سوه بيه فلك لعب بيه لعب

عاد الاشتر سحبه حييل من ياخة فانيلته وسحله دخله جوه بالغرفه وهو يكوله .. لسانك لا تطوله هناااا مفهوم لك عاااار

شمره بالغرفه ودخل بيها وسد الباب

اني من شفته احس روحي طلعت واحس اني انذليت مو هو ليش هيج ديهين بنفسه والله صعبه اشوف زوجي يهين ابويه بس شسوي اذا هو يجيبها لنفسه وهو ميحترم نفسه وتخلي العالم تهينه والله اعلم شمسوي من مصيبه اليوم

رحت انسمع عليهم سمعته يكوله .. انت شلون تتجرا وتوافق على ساهر من دون علمي انت شنو نسيت روحك لو شنو ترا والله اطيح حظك واهينك

وهااا لا تنسى شلون طلعتك من السجن وبريتك من التهمه من تهموك بالمخدرات ومن مات الرجال داخل السجن جان رحت بيها اربعه ارهاب

صفنت بكلامة واني افكر بيه شنو شديكول معقوله ابويه من انسجن قبل بتهمة مخدرات طبعا ابويه انسجن كذا مره ومن بين السجنات عمتي سجنته ام حارث لان اخذ حقها وحرمها من ورثها ومن ذيج الساعه هو يكرهها

وقبلها هو هم انسجن وطول واحنه كل ما ينسجن نرتاح منه وحتى محد يروحله ويشرف قضيتة شنو انوب من وحدهم يطلعوا وهاي اكثر سجنه طول بيها وتالي طلع مثل الشعر من العجين

رد عليه .. اي صح الك فضل عليه بس كافي ترا ملييت ملييت اخذت سولين مني فلشت بيتي وبنيته خربت خطوبة جيهان ما خليت ابني يشتغل ويه ابو سعدون يعني انت ذليتني مو بس شلعت كلبي

جاوبه بغرور ... تدري شنو المتحسف عليه متحسف اني سلمت الك ام سولين بيدي بوقت مقتلها

هو كال هيييج واني روحي طااااارت احس عقلي طار من راسي هو سلم امي لابويه هوووو لا ياااا حقييير يا كلب

صرخت بصوت عالي واني اهجم على الغرفه ودخلت عليهم هجمت عليه بغضب .... حقيييييير الله لا يوفقك الله ينتقم منك تسلم امييي اله انت  يا ظالم الله ينتقم منك الله يعاقبك شسوت امي وهيج سويتو بيها انت كتلتها انت وابوي انت سببببب انت سبب

لزم اديه وهو يهديني ويكول .. بس وكفي سوليين مو هيج بس افهمي خليني افهمج كل شي

رديت عليه وابجي وكلبي متكطع من القهر .. شتحجييي شتفهمني انت ذبحت روحي انت قضييت عليع قشمرتني ولك اني شفتك شفتك وياه انتم مجرمين قتلتوا امي حرمتونه منهاااا الله يحرمكم من هوا الجنه

رجع لزم اديه ويحاول يصحيني من انهياري بس اني جنت فاقده واصرخ وحتى حجابي تخربط واضرب بيه وما خليته يتقرب مني حركة بداخلي توجعني اميي ماتت وطلع هو الي مسلمها اله

دفعته ودموعي مثل المطر وكلبي يرعد من الغيض والغضب دفعته وطلعت اركض وهو ضرب ابوي بوكس من قهره عليه و وكعه بالكاع

ركضت وفتحت الباب الرئيسي وهو طلع وراي ويصيح ... سوليين سوليين بس اوكفي خلينه نحجي

جنت اركض بسرعه ما اريده ولا اشوف بعيني دموعي حجت الرؤيا عندي ما اشوف اله رجال صاعد على عربانه مربوطه بحصان ومحملة عتيك

الحصان ما اعرف شنو الثاره واني اصلا متوتره وابجي ودايخة صرت كدامه ودا اغير طريقي وما اشوف الع رفع حوافره ورفسني على صدري وهو يصهل بصوت عالي ويزكط

وكعت من الوجع واحس اضلاعي تكسرت والرجال يصيح ويحاول يهدي ماكو

حسيت بيه يشيلني وركعني والتاير مال العربانه داس على رجلي حييل والدم يتناثر مني

ظليت اتنفس كوه وحسيت بشخص جرني وهو يخليني بحضنه ويمسح الدم من وجهي باوعت عليه بغواش شفته هو وبعدها اغمى عليه

نهاية البارت .. يتبع

كونوا انتم كونوا بخير ... احبكم 💔

لا تنسوا التصويت والمشاركة بكم نكتمل ❤️