رواية #وكر الأشتر الفصل الحادي وثلاثون 31 - بقلم الكاتبه سمو العراق

بارت ٢٩
رواية .. وكر الاشتر
بقلمي .. نور سمو العراق

💔💔💔💔💔💔💔💔💔💔💔

"‏كالشاطئ المهجور، قلبي
لا وميضٌ ولا شراع."

- بدر شاكر السياب

اعتذر اتاخر البارت بسبب بطلتي جانت تفتر 😅😅
بس يله ميخالف باجر عطله اكعدوا اسهروا عليه 😆

...................................

صفاء

مرات الانسان يحس ان جسمة ما يكدر يتحمل كمية الالم الي بداخلة ولا يكدر يكبت بداخله اكثر ومن يصير وياه موقف صعب يحس نفسه ان هو بساعاته الاخيره وما يكدر يلفظ انفاسة وبعدها نتسائل هي الالم الحياة لعد شلون بسكرات الموت وتعبها
الله يجيرنا ويغفر النا

من بعد ما صار اطلاق نار كلش قووي وبعدها حسيت بالدم انرشك بجام السياره على اثرها صرخت سولين وفقدت وعيها

شفت الاشتر ملامح الآلم على وجهه و وكع المسدس من ايده دار وجهه عليها رغم وجعه بس باله عندها همس .. سولييين

صحت بصوت غاضب ومتعصب .... اشترررر اشررر دم دممم انت انضربت

اشولي بوجع وروح مسلوبه .. شووف س سولين شبيها

باوعتلها وروحي ذايبه واتنفس بغض شفتها مغمي عليها دنكت  لزمت السلاح ظليت ارمي بعشوائية وصرخ ... اخووووي اخوووي انكتل محد ظل النه خلصتووو على عايلتي

بعدها عم السكون واني اصرخ نزلت متوتر فتحت باب السياره شفته مضروب بجتفه والدم مفيض صدره تفيض نزعت قميصي بسرررعه وحطيته عليه وابجي ... خووويه اشتر خويه اكعد بس طمني كول انت بخيير

جان يفتح عيونه ويرجع يسدها وتنفسه ثكل وما كدر يحجي انرعبت من شفته هيج والمصيبه السياره بنجرت لان هو حقراء رموا على التاير بعد ما يمشي

فزت سوليين وهي تصررخ بصوت عالي وتبجي ... مااااات ماااات امييي ماتت امي مثله اني شفتها مااااتوا. لاااا لاااا

جانت منهاره وخبلتني وهي تصرخ ما عرفت شنو اسوي سحبتها نزلتها من السياره وكعت من طولها وتصرخ وكأن يمر عليها موقف يرعبها تنهار وتتشنج وترجع تهذي وتحجي كلام ممفهوم

ظليت محتار اركض عليها اسكتها وانوب ارجع للاشتر اسمعه يان بصوت موجوع وما يكدر يحجي

عطت بيها بعصبيه ... كاااااافي اسكتي لا تخبليني خليني اعرف اتصرف اخوي راح يموت وانتي بس تصرخين اسكتتتتي

باوعتلي بحيره وبهتت ملامحها وعيونها طفت من كثر ما بجت تنفست بضيق وكوه تلتقط انفاسها لزمت راسها بوجع ... اااخ راسي راح اموووت راسي حينفجر

ظليت واكف على الشارع ادور سياره بلكي تجي اخابر محد يجاوبني خابرت على مصطفى ماكو

هي وكفت باوعتله وشافت دمة بجت ولزمت القميص رصته على كتفه وتمنع تدفق الدم صاحت عليه بصوت عالي.. انت ما عندك اصدقاء مثله راح يموت وانت بس تخابر انطيني موبايله خلي يفتح الرمز ونخابر على ربعه

ركضت بسرعه دخلت بالسياره وسحبت الموبايل من جيبه وخليته كدامه احجي وياه لزمت وجهه هي وحاجته بحنية .. اشتر عفيه حباب بس كول الرمز شنو دنخابر على واحد يجينه حتى ناخذك للمستشفى وتطيب كول الرمز شنو

فتح عيونه وغلقهن ويتنفس بسرعه كلها بصوت متقطع.. سوليين

جاوبته بلهفه ودموعها مطر ... هاااا احجي حباب

حجة بصعوبه كال بهمس .. ال... رمز

باوعتله بترقب ولهفه والدمعه تسبق الدمعه ... اييي شنو

بصوت گووة ينسمع بس يحرك شفايفه وصوت نفسه مسموع ..اسم..ج

رمشت بعيونه ممستوعبه غلاتها عنده اشرت على نفسها واهدابها غركانه بدمعها المالح ... اسمييييي

هز راسه باي وبعدها استوعب الفقدان الوعي شهكت من بين دموعها ومسحت خده بحنان اخذت الموبايل منها ودكيت الرمز اسمها وفتح بسرعه تفاجئت فعلا مخلي اسمها رمز ليش هالكد يحبها مع العلم اخذها مجبوره وممبادلها الحب ليش هيج مأمن اسمها على حساباته واسراره وموبايله

خابرت على عايد ماكو اتصلت على حجي اديب ماكو استغفر الله من واحد يريدهم بسرعه يختفون

بعدها اتصلت على سالي ثواني وردت عليه كال .. هلاوو ابو ابراهيم شلونك

جاوبتها بلهفه وسرعه وقلق .. اني صفاء اخوو الاشتر فدوه اخوي تصوب واحنه باطراف بغداد بهذا المكان ( ....... ) عفيه بسرعه دزيلي سياره اسعاف بسرعه ترا اخويه نزف هووواي

جاوبت بخوف وقلق واضح على نبرة صوتها .... عزاااا لا لدكولها منو صوبه وشعنده اصلا بهاي المنطقه وين انضرب احجي بسرعه لا تقلقني

جاوبته بسرعه.. مو وكت هذا الحجي بسرعه دزيلي سياره

ردت عليه .. تمام تمام هسه ارسلك دوريه وهماتين إسعاف يله مع السلامة

قفلت الخط ورجعت اباوع السولين كاعده قريب منه وتمسح العرگ من جبينه وتحجي وياه وضاغطه على جرحه تبجي وما تعرف تواسي نفسها وكل شويه. وكلتله .. حباب حاول تساعد نفسك عفيه لا تمووت

استغفرت ربي حتى ما تعرف تواسي مثل العالم مخلصتها حباب وحباب صدك طلعت فطيره وبالمواقف الجاده متعرف تتصرف وبس لسان كولة اهلنا كلب خالي ولسان عالي

طلعت من السياره وهي تلوح بيدها بكل قوتها على كل سياره تمر بالسايد الثاني وملامحها ضايعه وتطلب الخلاص لاشترها ودموعها اختلطت بدمة ... اوكفوااا زوجي راح يموووت تعالو انقذوا

صرخت بجزع واول ما رجعت للسيارة بخيبة امل تعثرت و وكعت على ركبها واديها كعدت على الارض وهي تداري دموعها وروحها ركضت عليها واني اسالها .. بيج شيء ؟ مو كتلج لا تنزلين من السياره

ضويت الها بالايت مال الموبايل وهي رفعت اديها برجفه ودموع عيونها ما بطلت شافت الدم يابس على اديها المجرحه

وكفتها ونكثت التراب من اديها وكعدتها على الرصيف حضنت وجهها بطفوله وحزن وبجت من اعماقها وحجت بحسرتها .. راح يمووت والله راح يموت

ظليت محتار بيهم واديه ترجف وحتى ممسيطر اوكف على رجليه خوف عليه وخوف لا يرجعون علينه ويكتلونه لان من الرمي الصار اعرفت احنه المقصودين وهم ناوين  على القتل

بعدها شفت من بعيد سيارة الإسعاف وسيارة النجده و وراهم سياره ثانية جايين بالطريق

جانوا قريبين تقريبا استداره كاملة بس رغم القرب حسيتهم بعيدين وبعدهم علينه من السما للأرض وصلوا النه ونزلت سالي من سيارتها وهي ملهوفه والمسعفين كذلك نزلوا

فتحوا السياره وهم يسعوا بالاسعافات الاولية وبعدها صعدوا بالسديه ونقلوا بسياره الاسعاف

سولين بجت بسرعه وعصبيه كالت .. اني اصعد وياه ما اكدر اعوفه الوحده

جاوبته بحنيه .. اي صعدي واني رايح اصعد ويه النجده

صاحت عليه سالي ... لا تعال اصعد ويايه سيارتي

خليت ورحت وياها بسيارتها جانت تسوق بمهاره وثقه مصدوم منها اني وتمشي وره النجده وسيارة الإسعاف

وصلنه للمستشفى بعد مرور وقت طويل واخذوا بالطوارئ كالو عمليه واحنه ظلينه واكفين بالطوارى وكفت يم سولين روحها رايحة و وجهها صار اصفر يخووف حسيت بيها راح توكع

لزمتها كعدتها على مصطبه وجبتلها مي خطيه حقها لان الموقف مرعب ويخوف حقها تنصدم وتنرعب حتى لو مجانت تحبه او مو زوجة فعلية اله

................

جيهان

من بعد  ما صار الرمي وبعدها صار هدوء تام حسيت الباب انفتح بسرعه وهم دخلوا دخلوا ثنين ويه ابويه نفسهم الي جانوا يحجون وياه قبل شويه

دخلوا ملهوفين ويلهثون وكل واحد بيده سلاح احنه من شفناهم الرعب دخل بينه واعتكفنا على نفسنا من الخوف والرعب الي شفناه بجيت وحظنت افيان وامين واني اخفي نفسي عنهم

مع العلم هم ما جانوا مهتمين النه ولا اصلا باعوا علينه مشكلتهم والموقف الصار اهم منه

حجه هذا الرجال اي يكون عمره بالخمسين كال لابويه .. دام بعد ما رمه علينه معناها مات ويمكن الي وياه ماتوا او تصوبوا وهم اصلا بطريق مهجور وما عليه سيارات وبستان معزول محد راح ينقذهم ولا احد راح يلگاهم هسه انت لازم شنو تسوي

جاوبه ابويه بخوف وقلق ... اي شنو اسوي فهمني ؟ لان مو معقولة يموت قريب من مزرعتي لا انوب ابتلي بيه

جاوبه ذاك الثاني الي بيه شامة كبيرة لحمية .. لا تخاف هسه احنه راح نطلع من الشارع الثاني وراح ناخذ عائلتك وانت وبعدها ناخذك على بيتك

عقد ابويه حواجبه بخوف واستغراب .. شنو هالكلام معقوله يعني تردون تبلوني بموته

جاوبه الثاني.. لا لا لا صدك جذب شلون نبليك احنه نريد نساعدك لازم ترجع البيتك حتى يكولون ان انت مجنت متواجد بهذا المكان وما تثبت التهمه عليك

ابويه جاوبه بغضب ... اني شني كاتل ضارب حتى مسدس ما عندي غير هو مسدسك وانت ضربت بيه ورميت اني شدخلني

عاط بيه الرجال الحبير ... اهووو شنو انت شكد تلغي شنو ناوي علينه تريد تشهد ضدنه شو تحرك كدامي لا افجر راسك وادفنك ببستانك هاي فوك ما نفيدك

مشه ابويه واخذنه وياه ركبنه كلنه وره يالله شلون دوهنه وبهذلنا ياخذنا من مكان المكان مثل الاسارى والله ملينه وين راحت امي عنه شلون جنه عليشين تحت سدها شلون جانت حاميتنا تبهذلنا من بعدهل حيل تبهذلنا

وصلونه للبيت ونزلونه كال الرجال الشاب .. باوع سوي روحك كل شي ما تعرف وخلي الناس تشهد وياك ان انت موجود بالبيت اليوم تمام

رد عليه ابويه .. خوش بس انتم لا تتخلون عني

ضحك .. هههههه ما نتخله عنك لا تخاف ويمكن اصلا مات بعد منو يعترف بس للضروره احكام لهذا السبب خليك ببيتك احسن ما تظل بالبستان ويعتقلوك

هز راسه ابويه بقبول وبعدها احنه ندخلته جوه وهو ظل يلطم شلون راح يبلوني وبعدين كال واني شدخلني خلي يولون حتى سلاح مثل الوادم ما عندي دخليني اكل واشرب واتبطح ونارهم تاكل حطبهم هو عندهم ثارات بينهم اني شكو من كون مرض سرطان بكلبهم وكلب الخلفهم

...........................
سوليين

لحظات مثل انتزاع الروح من الجسد موقف مر عليه اصعب من الموت تهسرت من الخوف حسيت نفسي محاصره بالموت عبالك بجبهه عسكرية الله يساعد الناس الي بالحروب وشكد عانوا

والله مووت موت احمر شفته بعيني ومن انضرب الاشتر الي جنه شادين العزم بيه مات كل امل بينه صرت ابجي واصرخ واحاول اصحيه ارجع ابجي وانوح وهو گوووه يحجي شفته يريد يموت والله جان يريد يموت تغيرت ملامحه وشحب وجهه مثل الاموات

ومن بعد ما اجت سالي حتى ما شفتها ولا لمحتها جان بالي عنده جنت هايمة وروح طايره صعدت ويه بالإسعاف ابجي عليه واحجي وياه وهو فقد وعية لزمت اديه باردة مثلجه فركتها بيدي وادفيها باديه وماكو

وهم سعفوا بالاسعافات الاولية وبعدها وصلنه للمستشفى اخذوا واني احس الوجع صعد اقصى حالاته بحيث احس شعر راسي ينزع من جذوره من الوجع بحيث كل شويه واحس دينغمي عليه وعيونه حتطلع من الوجع الي اجتاحني  ظليت كوه اتنفس وكوه احجي

ظل بالعمليات تقريبا ساعه وطلع الدكتور ركضت عليه سالي  قبلي وقبل حتى صفاء وهي تحجي .. ها دكتور بشرني

جاوبها بهدوء .. الحمدلله كدرنا نطلع الرصاصه وان شاء الله عمليته ناجحه لحد الان ما فاتحة البنج من يصحى نخليكم تشوفوا

احتظنت اديه الصدري وابجي همست .. الحمدلله لله يارب الحمدلله الف حمد وشكر يارب

ظليت كاعده انتظره يصحى واول مره انتبه على سالي من طركاعه على راسها نصاص الليالي وهي ويانه جانت لابسه بدي ابيض ضيييييق ولابسه بنطرون كابوي ازرك مدري شلون مدخلته بجسمها وفاتحه شعرها ولابسه احزام جلد جوزي وحذاء جوزي

وماخذه المستشفى طول بعرض والواحد حتى يستحي يوكف بصفها حظورها طاغي ياول حظ من حظي النسوان رجولتهن يصاحبون الجلح واني مصاحب سالي ما الها منافس

كعدت مقابيلي رجل على رجل واني عيوني مورمة وصايتي كلها تراب واديه كلها دم وحتى وجهي ملطخ بالدم باوعتلي صفنت بوجهي وهي تهز برجليها بتوتر كالت .. عرفتو منو وره الاغتيال

جاوبتها بعصبية .. شمدرينا قابل احنه شرطة هو صار رمي وانضرب زوجي سوده عليه

باوعتلي بطرف عينها ومخليه وجل على رجل ودارت وجهها ما عاجبها الوضع والله لو ما الاشتر مريض اله اضربها ابرة بنج ما تصحى منها الا بعد عشر سنين

وكفت مشت كدامي بتوتر وجسمها يهتز كدامي استغفر الله هاي شلون اهلها يخلوها هيج تطلع عمي الله يساعد الزلم شلون متحملين وجالي تفتر كدامهم هي وعربانتها دهر صابها وصاب اهلها

انوب من تمشي تفر فر واني انوب مستحيه من صفاء وامسح بوجهي عبالك اني الفر مو هي ومنزله راسي خجلانه خرب هههه

طكطكت اصابعها وكالت .. اتاخرت كولش والاشتر لسه ما صحا

رديت عليها بسخريه .. ما ترحين لاهلج ومشكورة ما قصرتي عود راح اگله انتي نقذتي

باوعتلي بقرف كالت ... لاااا حبيبتي الاشتر اول ما يصحا ( تحجي كله بالاااه ) اريد اكون اني اول وحده يشوفها

وكفت متعصبه وتخصرت ... لا والله واني شنو هنا خراعة خضرة غير اني زوجته ولازم اني اكون اول وحده متواجده عنده

رفعت حاجب وباوعتلي .. عمري هذا شغلي ميصير انتي تدخلين

رديت بسخريه .. وشنو شغلج تدعيله وتطلعين لو انتي مغذي لو كبسوله اشوو دروحي

ضحكت باستهزاء وخلت وراحت حجت ويه الشرطي الواكف بالباب وسمح الها تدخل واني تخبلت رحت اركض كتله بعصبيه.. اريد ادخل

جاوبني ببرود .. ما يصيير

فتحت عيوني مصدومة ومتعصبه .. شنو ليش بله مو زوجي وبعدين شنو تدخل الغريبه وما تدخلني

جاوبني بجمود .. رجاءا لا تتدخلين بشغلنه تفضلي عود من نصيحج تعالي

باوعت الصفاء وعيوني احسها طلعت كتله .. شنو هاي اشو مهزلة اني مرته ميقبلون ادخل وسالي ام الحصر يخلوها حتى هنا تفرقه يعني الا نتعره يا الله العالم تمشي عدل

سحبني وهو يهدي بيه .. على كيفج اسكتي عيب مو لان هي جابت النجده والإسعاف فأكيد الدكاتره الي جوه والشرطة المتواجدين ياخذون اقوالها

فتحت حلكي بذهول .. لا والله لعد اني مو جنت وياه مو شهدت على صوابه شنو اني ليش محد معترف بيه شنو اني نعال لو جرجوبه اشو اريد اشهد واسولف واحجي اني موجوده بمسرح الجريمة

تنهد وسكت بعدها كال ..اخذوا اقوالي مو بحاجة اقوالج

كعدت حطيت رجل على رجل .. اي طبعا اني مو مهمة اني هامش حتى محد يكولي زوجج بخير زوجج مبيه شي وبعدين خلي تطلع جالي منه لا احرك المستشفى الرجال مبنج واخاف جالي تعتدي عليه

ضحك صفاء بصوت عالي وهز راسه بأسى واني صافنه عليه هذا ليش يضحك حجيت شي غلط اني كال ... الله يلعن ابليسج يا سولين والله العظيم ضحكتيني لج انتي شنو كل هالهوسه لان سالي دخلت للاشتر

نزلت راسي بفشلة .. مكروهه وحقيره ما احبها اكرهها تحاول تستفزني بكل طريقه هي تعيل بيه اني ابد ما اعيل اصلا اني مو حيه بس هاي حية وكوبرا هم

طلعت سالي من عنده وهي تضحك وتباوعلي تغور بيه شلون عار وحقيره ولج بنت النعال شرايج احنه وتغورين بيه رجلج هو

كوه تعوذت من ابليس وما هجمت عليها وركعتها بجهاز الضغط أن شاء الله ينشك بنطرونج ولو تكيف هي

ردت مره ثانيه ادخل بس هذا الشرطي ابو كرش عاند ما قبل ادخل بس مخلي جالي تصول وتجول جنها حصان شارب نفط

بعدها انوب طردوووني خرررب والله انصدمت صدمة اني انطرد وانام بالحديقه اجه صفاء توسل بيه اروح للبيت وهو وياي يروح والاشتر ظل وحده بس اجت ناس يا ابو ناس حجي اديب بعائلته

واكو شخص يسموا ابو ايه هذا يصير ابن حجي اديب بس شنو عجيب غريب عبالك الاشتر ابنه مو معرفه بيه وبين من الناس المعروفه والعندها جاه

وصلتنه سالي الجالي بسيارتها ومشغلتلي اغنية عبالي حبيبي الاليسا صدك لو كالو الناس بالناس والكرعه تهلس بالراس احنه وين المسعده ام بنطرون وين

انوب مسلطنه وعايشه الجو ولا مهتمه الوجودي ولا الوجود صفاء

اجاها اتصال وهي ردت ... كافي تتصلين بيه خلص شغلي هسه وحرجع باي

وصلتنه للبيت ورحت واني سبحت وبدلت وسديت الباب بدبة المي ارو ونمت حتى ما فكرت بشيء من كد ما موجوعه ودايخه وتعبانه وبالي عند الاشتر

.....................

جيهان ...

كاعدين أني وأفيان وگدامنا ابويه يگرط بهالكعك ويوگع فتاته على حضنه وعلى الارض ويسوي صوت مقزز بحلگه وهو يطحنه بأسنانه ..

كاعدين ونباوعله بخوف قلق واشمئزاز وهو مبحلگ عيونه علينه ويگرط

كال ولجن شكد طلعتن فلوس من الحفافة والهلس جيبنهن يله وحطنهن گدامي

بقينه وحدة تباوع للثانية وهو شمر الخاشوگة مالة الچاي الي چان يشربه علينا وصاح بعلو صووته
گمزنه من مكانه
شحچيييي جييبن الفلووس يله ويينهن

عبالك تذكر مدري شنو والله هذا الرجال خبل هسه تذكر الفلوس لو شنو

جاوبته افيان بنتر :- منين اكو اصلا احنه مااشتغلنا مجنه
موجودات هنا غير رحنه لبيت جدو من وراح

گرصتها احذرها متحجي وياه بهاللهجة خاف يثور علينا اني كولش أخاف...

رد عليها .. بنات النعال شعدجن عند بيت نعلان ما كعدجن بيتجن لو تحبن الدياحه ولخواره مثل امجن

كرصتها مره ثانيه ما تحجي

هي ولا اهتمت ولا خافت صفگت باديها بأسف
وتحجي وياه بدون خوف بدون حواجز الي كدامها ابوها وكأنهُُ شخص من الشارع

ماعدنه وماننطي يعني صدگ چذب تأخذ تعب بناتك بدل متنطيهم انت من يامله !!

دفر الگلاص لبعييييد برجله ظل يفتر وانرگع بالحايط وانكسر بالنص وتناثر الگزاز منه

باوعتله وانخمش گلبي من مكانه .. واجه امين ختل ورايه وصار يرجف

افيان واكفة على حيلها وهو هم وكف على حيله ونظراته كلها تهديد وافيان ولا ذرة خوف مستعدة لكل شي وجاهزة لكل ردة فعل منه مثل أنثىٰٖ من حديد

يمشي ببطئ باتجاهها وعبالك دينطيهه فرصة حتى تغير رأيها وتتراجع وعباله نظراته المرعبة الي بيها عبالك البؤبؤ حيطلع منها هلكد ما مخنزر

عباله بهيج هي حتستسلم وتنطي فلوسها او تعترف وين خلتهن بس هي ابد ولا يمها عبالك اكو شي يحميها منه ، قوتها ولا مبالاتها واستعدادها لتحمل كل الاذية جان مثل درع حصين يحيط بيها

ظليت اتوسل بي ماريده يضربها كل اعصابي وخلايا الالم عندي تتحفز من يضربها عبالك الضرب بيه مو بيها كلش انقهر عليها واتاذه ورغم هي ما تحجي وتتصنع الامبالاة

مد ايده وملخها واني افارغ بينهم ويدفعني اوكع للارض مثل غصن شجرة يخط بالكاع وتهزمه الريح القوية

ويه وگعتي اشوف أمين متكور وكاعد على الكاع ويناشغ ويشهگ يربي هذا الطفل هم شنو ذنبه وشون راح تتحمل نفسيته وهو شاهد على هالعذاب والعنف

وبثواني اكوم اوكف واستجمع قوتي
‏اتوسل بي و احاول اوخره منها

وهو مستمر يضرب ويهدد
طلعي الفلووس طلعيهن ماتطلعيهن احرگج هسه واشوهج متخاافين ولج ادفنج جووة التبليط اشوف منو يفزعلج بت السكط

وهي تقدم اديها ليكدام تحمي نفسها منه ، هو مرة يلكط شعرها يعته حييل ومرة يلزمها من ملابسها يفرهااا فر بأيده

وكله وماتبلع لسانها وتصييح ولااانطيك ولااافلس والله حتى لو عندي مليون ماانطييك اشمرهن للجلاب وما انطيك

تستفزه وماتسكت عنه ولاتخاف عبالها يفيد هيجي مبقى بيها عظم صاحي كسرها ، توكع للكاع ويسحلها وتكوم مثل الصاحي

واني حتى جتافي احس توجعني من التدفع واني أحاول اسحبها لو افارغهم ...

واحنه على هالحال واندگت الباب بقووة ، أصلا اندفرت دفرررر وحتى صوت سيارة شرطة بررة وصوت اجانه من ورة الباب يصييح بنبرة أمر صارمة افتح الباب لك ...

راح وهو يعدل ملابسه وهندامه ويتلفت علينه ويتهدد بيده يكول هسه ارجع الجن

واحنه مثل الي طلع من معركة طاحنة واكفين ونتلمس ونتعصر بادينه واني كتفي وافيان تلملم بشعرها وتعدل بملابسها وتعصر بيدها وتمسح وجهه من الدم

انفتحت الباب واسمع صوت واحد يكول لابوية انت عامر
.... ؟

جاوبه اي اني ليش

رد عليك القاء قبض تفضل ويانه االمركز

جاوب شمسوي ؟

... انت اعرف شمسووي عليك تهمة شروع بالقتل

كال والله ولااكاتل احد ولا شي تتبلون عليه انتوا

لزمه من ملابسه وانسحل وكاله امشي نتوسل بيك احنه امشي واخذوه وراحوا

هم طلعوا وافيان طكتها بهلهوله .... كلللللللللللللوش توه الله التفت وانطانه توه الله التفت وانطانه كللللوش ربي فدووووه احبك اموت عليك هيج اريد هالمرة يخيس عامر بالسجن ما يطلع

كعدت تهز ركبه وتركص وفرحانه وتهلهل وما نسمع بس صوت سيارة الشرطه وهي تصيح .. عااااشت الحكومة عاشت الدولة تحيه لكل الضباط تحية لاصغر شرطي بالعراق وترجع تركص وتهلهل

ضربتها .. ولج كافي لا عبالهم عدنا عرس

رجعت تهلهل .. هو هذا عرس وعرس جبييير اليوم اوزع الخلطات ببلاش بهاي المناسبة العظيمة

وتصييح ... عاشت الحكوووومة عاش الشعب العراقي العظيم تحية خاصه للضابط الاعتقل ابويه تحية خاصه للقدم بلاغ على ابويه تحيه خاصه لنسيبي الكفو

.....................

سولين

فتحت عيوني ببطئ واحس عبالك ابر تبززني رجعت نمت مره ثانيه واشوف الباب اندك مره ثانيه

فتحت عيوني وحجيت بصوت عالي.. منووو ؟

رد عليه بهدوء .. اني صفاء سولين حظري نفسج دنروح

وكفت لبست نعالي وحجابي  وطلعت وباوعتله .. شنو وين نروح للمستشفى

جاوبني ... لا لا حننتقل من هذا البيت لان الاشتر بذاك البيت الثاني

عقدت حواجبي .. الشقه

هز راسه بنفي جاوبته .. لعد اذا هيج تعذرني ما اكدر اروح وياك بصراحة حتى لو عشت وياك وانت اخو بس ما عندي ثقه بيك واعتذر اذا كلامي قاسي

ضحك وفتح موبايله واتصل حجه شويه وانطاني الموبايل كلت .. الوو

رد عليه بنعاس .. سوليين تعالي ويه صفاء لا تخافين

فتحت عيوني مصدومة من صوته .. عزاا صحى ما بي شى

همست .. الحمدلله على سلامتك ان شاء الله ما تشوف شر

رد عليه .. الله يسلمج

لبست بسرعه وغسلت وخليت ورحت هو مشه بيه بطريق طووويل و وعر و وصلنه عند بيت شبه مهجور ومرعب اكثر من ذاك البيت

دخلت باوعت هم حوش وغرف بس الفرق جان اكو استقبال ذيج بس غرف والتيل ماكو هناك اكو تيل

دخلت للاستقبال شفته بيها نايم ونازع قميصه وايده مربوطة على صدره تقربت منه وبجيت من شفته بهذا الحال هو بسرعه فتح عيونه اليه ومد ايده الثانيه اليه

حجيت بهمس ودموع .. اشتر

رد عليه .. يا گلبه الاسود على الناس والابيض عليج تعاي بويه تعاي

تقربت منه ولزمت ايده وبجيت سحب ايده وظل ميسح على راسي وهو يصبر ويسكت بيه كال .. كافي لا تبجين هذا اني ما بيه شي ليش تبجين

باوعتله وعيوني كلها دمع .. شفتك تموت انت ردت تموت والله حيياك

جر نفس ورد عليه .. ما بيه شى والله هذا اني كدامج بخير لا تخافين

شهكت من بين دموعي .. اني راح اصير حبابه بعد ما احجي وياك ولا اصير حية

عض شفته بلهفه .. خاب هو انتي وينج وين الحيه انتي غير مال كرط

ابتسمت ومسحت عيوني ... انت تحبني اني قبل عبالي تكرهني

ضحك وهو يتوجع كال ..والله انتي نعمة والي يكرهج ان شاء الله يعمى

خجلت من كلامه ونزلت راسي حط اصابعه جوه حنجي ورفع راسي همس بحب ...احبببج

دمعت عيوني من الموقف وبلعت ريكي جاوبته .. حبك الله

عقد حواجبه مستغرب .. شنو هاي انوب حبك الله

رديت ببراءة .. يعني الله يحاوطك بمحبته وعطفه ورحمتة

رد بلهفه .. وان شاء الله يرزقني حبج وعقلج وروحج

همست بخجل .. ان شاء الله بس ما شاء الله زين ما جنك البارحة تصوبت

رد بضحكة .. قل اعوذ برب الناس وبعدين اني متعلم هاي زلاطه هي بجتفي وما مخترقه شي شغلة عادية

دخل صفاء وهو جايب برتقال وفاكهه كال .. سولين بعد اخوج سوي عصير للاشتر

جاوبته .. اي تتدلل انت وياه

دا اريد وكف هو لزم ايدي ورجعني كال .. عوفي العصير هسه خليج يمي روح صفاء انت اعصر عصير قابل ينرادلها روحة للقاضي

ضحك صفاء وخله وراح يسوي عصير وظليت كاعده يمه هو بس يباوعلي ويخجلني واني نار تفور بداخلي اريد اشكي اله من سالي الجالي شلون تتشمت بيه بالمستشفى بس سكتت عيب مو لهلدرجة وصلت بيه الرعونيه

جاب صفاء العصير شربته وشويه هو نام واني طلعت دا اكتشف البيت واركانه

اثار انتباهي وحده من الغرف حاولت افتحها جانت مقفوله استغربت ليش قافلها افتح بيها ماكو خليت ورحت دخلت للغرفة شفت الغرفة الثانية بيها كنتور كل ابوابه مكسرة بس باب واحد رحت عليه دا افتحه ماكو طلع مقفول هاي شكو

ليش هيج هذا البيت كل اركانه مقفله شنو السالفه الحمدلله والشكر طلع عدنه بيت ينقفل وصارت عدنه خصوصيه ههه مو مثل ذاك البيت اسده بدبة المي ارو

بس ليش جابني هنا ونقلني من ذاك المكان وهذا المكان ما يقل قذارة من ذاك المكان

.....................

جيهان ..

بعد ما اخذوا عامر للسجن بقينا ابيتنا ، ظليت بيومها صافنة افكر شنو من حياة عايشها ابوية !! بهاي اذني سمعت الشرطي يكوله عليك القاء قبض جريمة شروع بالقتل ..

هالكلمة بالذات خلتني صافنة معقولة الموضوع يتعلق بأمي ! زين شنو يعني شروع بالقتل ؟ ليش الحقها الضابط بكلمة قتل ليش مكال قتل لوحدهه ؟ احس دماغي تضاعف حجمه من كد التفكير بالموضوع

طبت افيان كعدت يمي وتأفأفت كالت بحسرة ايه ايه بعد الام الحال يغم

باوعتلها باندهاش معقولة قرت افكاري ! شتقصد هالبلوة هاي

كالت اجه كريم يكول امشن وياي شنو احنه نظل من بيت لبيت والله تعبت اريد استرزق اريد ندبر خبزتنا خبطاتي اريد ابيعهن

جاوبتها .. مو تردين توزعيهن مناسبة سجن ابوج

دفعتي كالت .. دولي عمو كريم يريدج ابو حبيبتي كليله منروح

وبس سمعت اسمه صارت الحسرة جاهزة حتى يمتلئ بيها كلبي

صار ذكر اسمه  يمي كله حسرات وقهر ...

كالت شبيج تباعين اني ماروح وكتله هالحجي بس هو ما قبل وكال صيحي جيهان

تبعثرت نبضات كلبي شوكت اسيطر على نفسي شوكت اقتنع هو مو الي ليش كل مرة كلبي يعورني عليه

امين كلها  وانت ليش مترحين لبيتهم ؟؟

ردت وهي تأشر بأديها ولك شعندي شعندي مكابلة الحياية  ايه  وكوثر ؟
خبل انت نشتري راحة بالنا لو  جيهان تكيف تروح  تريد  تكابلين كريم وتكعد

ماكملت سديت حلكها بسرعة وكتلها اشش مو  هو هنا لييسممع طاح حظج مو كتلج نسيته

دفعتني وهو صااح جيهااان

غمضت عيوني صدك حسيت بكلبي يريد يطلع من مكانه بهاللحظة حروف اسمي بلسانه وصوته الها  وقع غريب متناغم بطريقة أجهل اوصفها طردت هذا الاحساس مني واني اقاوم روحي اصعب مقاومة

هي بس سمعته اشرت بيدها على الباب ديله روحي يصيحلج

دااكوم سحبتني من ملابسي
كالت جيهان كوليله خلي نبقى هنا محاجة نروح هنا احسن لاتضعفين جيهان وتنصاعين اله تدرين انت هناك تتعب نفسيتج بسبب السموم الي تفحها كوثر  وايو نعالووو واذا نروح الزمهن واكتلهن

ضحكت كتلها بهدوء عيب ديصيح خلي اروح اشوف شيكول

فررت بيدها لااا ربحنا والله اكيد رح يقنعج ويخلينه نطلع مناا

ابتسمت مشيت باتجاهه واحس داامشي على كلبي مو على الكاع

احس روحي تسحبني سحب حتى توصلني يمه وتقابله وتلتقي بي

وبس شفته اجت عيني بعينه جانت نظراته تنبأ حدسي انو هاي النظرات الها تفسير ثاني وعقلي ينكر ويوكه عند حده

وروحي تسأله شسويت لكلبي حتى خليته يتمناك لهذا الحد !

صراع شتات الم روحي وتتبعثر گدامه شعور مزعج ومؤلم بنفس الوقت ..

سلمت عليه ونزلت عيني منه. لميت اديه لبعض وصرت اعصر بأصابعي

وهو ظل يحجي وياي بهدوء .. كال يله جيهان امشي وياي انت وافيان وامين لتبقون لوحدكم هنا

كلت واني كوة اسيطر على رجفة لساني لاعمو تسلم والله احنه هنا زينين ماعلينا شي

طلعت افيان من الغرفة اي صدك عمو بلا منروح ونزعج العروسة وتصير هوسة

ابتسم رد عليها بجدية ليش هالحجي افيان هوسة شنو ؟ اكو أحد يكدر يحجي وياكم واني موجود !!

كالت لا مو احنه منتوالم وياهم والله واذا طلع عامر هم مايرحمنا بقينا هنا احسن..

ضحك ولج عامر شنو يبقى ابوج ويالله ماريد اعتراض حضروا نفسكم وامشي وياي ..

امين جان بصفه لازم ايد كريم و متونس لان حياخذنه ويعصر بيده متحمس

وبعد اصرار منه لبسنا ورحنه وياه ، كعد امين بالصدر واحنه وراه يباوع بالمراية شتردون تتعشون اذا بنفسكم شي كولوا

كالت فافي لا والله مجوعانين اصلا گرطنه كعك بالبيت هذا الي زاد من عامر قبل العركة مالحك ياكله

هو ضحك ياعركة

كرصتها اني وهو نزل تسوك ترس السيارة مسواك وانطه علاكة لامين متروسة حلويات وجباسة وحبشكلات

ورحنه لبيتهم ..

وصلنا ونزلنا سلمنه وجوه انكلبت ووجوه فرحت ..
جان دنيا ليل كعدنا تعشينا جنت احس بكريم يبوك من عيونه نظرات ويباوعلي اني انزعج وبالعكس ماافرح بعد هو تزوج شكو

ومرته محاوطته باهتمامها احس خانكته خنك وهو مزعوج وكوثر كل همها بس تزعجني كل شوية ذبتلها حجاية وتمدح بجمال ايات حتى تتغزل بيها اكثر من كريم

نمنا بالليل وصار الصبح كعدنا تريكنا اجه كريم يسألنا شلونكم نمتوا مرتاحين البارحة ناقصكم شي

يهتم بينا هواي ومحاوطنه بحنيته وايو احسها تريد تنفجر من الغضب

هو يريد يروح لشغله اجت خلت اديها على كتفه
وبدلع حبيبي هاي الحلقة نسيتها عالمغسلة البسها حبيبي لتنساهه بعد 

يريد ياخذهه منه سوت نفسها تلاعبه عود ضمتهه وراها
وضحكت وتباوع بعيونه اني البسك

مد اصبعه الها ولبسته وافيان تهمس باذني باعي شقاهه شكد ماسخ ايييع

باوعتلها بتحذير وخزرتها تسكت مالج شغل بيهم

كوثر كاعدة وتخوزر

طلع كريم واجت يمنه ايو تحجي مثل حية مجلجلة
وتبث السم الله يعينك عالعيشة الي عايشينها اووي لو منكم انتحر كل يومية ابيت ااففف

بالله  افيان يمكن بيها مجال واحد ياخذج ويستر عليج الا جيهان خطية

جاوبت كوثر اي كلش مقهورة عليها يمكن تظل طول عمرها هيج وباجر عكبه امين يتزوج وتصير مكفخة لمرته وخدامة لجهاله

عفتهن ومشيت رحت للحديقه وكلبي يغلي من الوجع والقهر والعذاب حسيت بحاجتي الامي شلون كلامهن ياذي ولا يحسبن حساب للكلمة كلامهن مثل السوط المسموم حيل يجرح

...........  .......

رنا

رحنه البيت جدو ابو كريم دنشوف العروس بس احنه اتاخرنه يله رحنه الهم وهماتين سمعنه خالي عامر رجع للسجن متهم بقتل نسيبه الاشتر

عزا هذا خالي خبل مدري خبل يعني يقتل هاي ثاني مره يقتل قتل مرته وانوب اغتال نسيبه هذا صدك تخبل وانجن وما يستحي كون اعدام

دخلنه للبيت بنات خالو عامر جانن عدهم كالعاده افيان لازمة حنان وتحف بيه وتهلس وذيج مكيفه عليها

وايو بغرفتها كالو هيج وقت ما تطلع بس من يصير الغدا تتغده وترجع الغرفتها لان عندها امتحانات

جاوبت افيان ام حسن وهي تحف .. اي سوده عليه مو تدرس دكتوراه هي كلها خلك بكلوريوس وهيته اداره واقتصاد لو تدرس طب ايـــــــــو شسوت يمكن تختفي

حنان ردت عليها .. اي بالعباس بعد نسوان يدوخن شلون بتعايرن وعلى يوم الزمها الا اطلع التنعوص من خشمها وخشم الخلفها

ام حسن بعدم رضا.. لا يمه عيب هالكلام ما نحب المشاكل احنه وبعدين هي بعدها عروس وينها وين التنظيف تخلص امتحانات وبعدها نخليها تشتغل

حنان بحقد.. هو ذاك اليوم كلتلها من تخلصين امتحانات نقسم الشغل ترد عليه لا اوووع ما احب هيج سوالف عود اني قررت نخلص الشغل بينه من دون تقسيم

كملت بتنهيدة .. واني ادري بيها جذابه وحقيره تريد تخلي الشغل كله عليه بسيطة لا وانوب دكولي اذا نقسمه اني اغسل بس مواعين الريوك وطاوة البيض ما اغسلها تلعب نفسي من البيض

افيان حجت .. ولج الزميها وبالطاوه على راسها خلي تعرف ان الله حق لج لا تصيرين فاهيه لج موتيها

ضربتها جيهان .. كافي افيان عيب هالكلام خطيه البنيه هم بعدها عروس وتدرس على شنو شادات وياها عوفنها

حنان باوعت لجيهان .. دروحي انتي الفاهيه ما بيج حظ كلام فافي عين العقل لازم اكضها واشكها نصين هاي ام التنعوص موتتني شكتني شك

طلعت من غرفتها وهي لابسه تراك ماروني ومخليه حمره مارونيه وشعرها صابغته لون حيل حلووو اشكر على ثلجي هيج شي ولابسه العدسات

حنان همست .. العدسات خاسن وكطنن بعيونها من اجت لحد الان ولا مره نزعتهن

حكيت طرف عينها بنعاس كالت ... هلاوو

وكفت امي سلمت عليها وباركت الها واني كذلك وحنان تباوعلها بقرف وهي اصلا ما شايله حنان من كاعها ولا معترفه بيها

كعدت على القنفه وحاطه رجل على رجل والشبشب ابيض لابسه وتبرد باظافرها وتخابر ولا عبالك موجودين ولا عبالك جايين نبارك الها

كالت .. هااا ماما تمام منتظرتج تعالي يله عمري بااااي مووواح

خلت وراحت وام حسن وراها وحنان ركعيهن بغمة بثنين اديها

ظلينه نضحك عليها وكعدت تكص بيها وبامها وكوثر ابد لا نزلت ولا شفنه خلقتها اندك الباب راح امين فتحه

دخلت ام ايو سلمت ودخلت تلكتها فافي العياره .. اهلا وسهلا هله بالنسابه خاب شكد احبج انتي طاقه ايجابيه يفدووه

ضحكت ام ايو وباستها جانت لابسه بنطرون اسود عريض ولابسه قميص سمائي ومخليه الشال على شعرها بإهمال

اجت ايو حظنتها وباستها ودخلن جوه بعد محد شافهن وكوثر نزلت حظرت الهن ظيافه ودخلتها جوه لغسل كوون لهلطول

ظلن كاعدات بالغرفه من اجت لحد ما طلعت اول ما طلعت اني جنت بالصاله وهن وكفن بباب الغرفه سمعتها دكولها .. ديري بالج هاي السنه لازم تنجحين واقري زين مو مثل ذيج ألسنه من راحت عليج بسبب غبائج

ردت عليها .. ههه غير انتي ما تعرفين شصار

لزمتها امها بغضب .. شصار ولج

جاوبتها ومن حجت اني فتحت عيوني مصدومة عزااا هاي شكد جذابة وحقيره واستغلاليه لا صار لازم اكول لكريم ليش هيج ظال ميعرف بسوالفها

نهاية البارت .. يتبع

كونوا انتم كونوا بخير .. احبكم 💔

لا تنسوا التصويت والمشاركة بكم نكتمل احبتي ❤️