رواية #وكر الأشتر الفصل الخامس 5 - بقلم الكاتبه سمو العراق

البارت الخامس
رواية..وكر الأشتر
بقلمي..نور سمو العراق

💔💔💔💔💔💔💔💔💔💔💔

"ليس كل من فقد والديه يتيم ، هناك أيتام آباؤهم أحياء "

............................

صرخت وشهگات ودموع فايضه

دموعي وصوت نحيبي خلته يديرلي ظهره ونظره عطف بعيونه

جنت بحاله صدمه بالحظه خوف ورعب وكعت امي مثل الورده والارض متعطشه الدمها المهدور

صرخت بعد ما لصقت نفسي بالحايط واصرخ بصوت هو اركان البيت..لااااا يمه يممممه كتلت امي يا حقيير

تقرب مني وعلامات الحقد والغل والحقاره مستوطنه وجهه خفت منه و وكعت على الارض وجسمي يرتعد من الخوف

صكيت على اسناني وركضت عليه بوحشيه نابعه من روحي ومن قهري على امي ملخته تملخ اصرخ واضرب بيه بوحشية...حقير حيوووان امييي لج يمه

دفعني بكل قوه بحيث تكسرت عظامي بالحايط

وشفت صديقه كعد ركبه ونص وهو يحاول يصحيها ويجس نبضها بس هي جانت متشنجه و وجهها اصفر ودايره عينها الدامعه اليه

انهرت انهيار مو طبيعي كورت اديه واني اضرب على صدري بكل قوه حسيت القفص الصدري تفلش

ملخت شعري وكطعت نفسي تكطع واكمز من مكان المكان

عاط بيه بكل قوه وهو يكوله...خلينه ناخذهاا على المستشفى بسرررعه

رد عليه بتوتر وقلق ...خليها تموت احسن

صرخت بي ورجعت هجمت مره ثانيه...يا كلبيا حقير يا زمال اريد امي ولج يمه فدوه يمه عيشي الخاطري

سمعت صوت اخواتي واخويه ردت اطلع الهم اركض واصيح ...كتل امي اميييي امي ماتتت جيهان افيان تعالن شوفن امي

شفت الرجال شال امي وهو يغطيها بالعبايه

وابويه سحبني مخلاني اطلع ضربني بوكس على وجهي قوي على اثرها فقدت وعيي وحسيت الدنيا اسودت بعيني ودخت

......................

رنا

كعدت الصبح على صوت الصياح واللطم فزيت مرعوبه من الخوف شفت امي ادور على جواريبها وتصيح.. عزا بعينك عامر صخام الصخم وجهك عامر

بلعت ريكي بخوف.. شكوو شصاير شبي عامر

عافتني وطلعت تركض وهي تنوح و وجهها مخطوف اجه حارث يركض وهو يدور على الرشاشه لزمته واني ارجف وروحي رايحة.. شكو حارث احجي مو خبلتوني

رد عليه بعصبيه وسحب نفسه كال.. خالة العار كتل خالتي آيار ام جيهان

لطمت على خدي برعب وخوف.. عزا عزاااا صخام شلوون شلون كتلها صخام الصخمه وماتت ؟

كال.. اخوها كلب الدنيا كلاب ودك بيت جدي كهلان وبيت خالي واني رايح اشوف شني السالفه

ظليت ابجي وانوح.. عزا خطيه بنات خالي شلون بيهن يمه هسه سولين تتخبل تموت على امها

كال بحده وغضب.. بالعباس اذا ما احط طلقه براسه واكتله فلا اطلع حارث لج هذا طغى حيوان وحش محد يرده

لزمته بقلق واني ابجي.. مالك شغل حارث هسه هو ما دام كتلها راح يدخل سجن ويطيحون حظ حظه انت لا تتهور

رد بحسره.. بالي عند سولين والبنات شحالهن هسه بعد ما كتل امهن هذا الخايس الجايف

سألته بترقب.. ليش كتلها؟

جر نفس وزفره.. يكول غسلت عاري

جاوبته بعصبيه والدموع ماليه وجهي.. دخلي يغسل وجهه النذل القذر والله خالتي آيار اشرف من الشرف واشرف منه ومن الخلفو والله مستحيل اصدك مستحيل ام جيهان ما تنجرف وره السوالف الطايح حظها ام جيهان قمة بالادب بس خالك هو الحقير النذل  كون ينسجن كون يعدموا

تافئف بضيق وحسره.. مدري وين شرد وعاف الناس تتلاطم ماتت المره وهذا دم محد يرضا يتنازل عن دمة

لطمت على وجهي واني ابجي.. سوده عليه يا خاله عساه بحركة كلبج ان شاء الله دمج ما يضيع ان شاء الله الله لا يوفقك الله ينتقم منك ومن امثالك

حارث لا تخلون البنات عنده هذا مجرم هذا حقير لا انوب يكتلهن خطيه هسه تلكاهن منهارات على امهن سوده عليه اتمنى اروح واحظنهن وابجي وياهن شسوه بيهن هذا الكلب

حارث اخذ الرشاشه وراح واتصل موبايله فتح خط وهو يحجي ويه كريم كله.. هااا كريم شنو يعني هسه ام جيهان بالمستشفى يعني مميته ها إي الحمدلله بلكي تعيش

لزمت والامل مقطوع.. شنو بشرني

جر نفس وزفره كال.. كريم يكول امهن بالمستشفى بس حالتها حيل خطره وما اعتقد تعدي سلامات لان حتى امعائها طالعه

حطيت ايدي على صدري وكوه اتنفس.. بلكي الله ويرحم بحالها ويعطف على بناتها وتصير زينه والله خليها تتطلك وتاخذ بناتها منه هالعار الحيوان

خله وراح حارث واني صرت نار اتصل على سولين ما ترد متت رعب عليهن خطيه سوده عليه شحالهن هسه هو يضرب امهن راشدي يتخبلن مو انوب ضاربها طلقه وموصلها للموت

اتخبلت ما اكدر اكعد هنا وما اعرف شنو الصار خابرت امي ما ترد خابرت كوثر مترد كلها اختفت فجأة

ما عندي حل غير جاستن اتصلت بيه الوحيد الفتح خط كال.. هااا احجي بسرعه مشغول

جاوبته.. انت وين

رد عليه.. وين يعني بمصيبة خالج الزفت ما يموت ونخلص منه هسه كولي شرايده مشغول

جاوبته بحزن.. حباب تعال اخذني لاهلك والله اخاف انوب هذا خالي مو امان اخاف يهجم عليه ويكتلني

جر نفس وزفره كال.. ما اكدر اجي بس راح ادزلج السايق تعالي وياه

جاوبته.. يا خاف يخطفني

رد باستهزاء.. استقري انجلينا جولي محد يخطفج تعالي واسكتي محد فاضيلج زين مني ورديت عليج

جاوبته.. ديله لا خلف الله عليك

قفلت التليفون قبل لا اسمع رده رحت احظر بنفسي هسه يجي السايق والله ماكو ربع ساعه و وصل عندي خليت ورحت لبيت جدو

لكيتها كلها مسلحة ولازمة الباب جدي وكريم وجاسم واخويه حارث وناس من العشيرة وجدي يحجي وياهم بامر ويطلب منهم الهداوه ولتحلي بالصير ويكونون مستعدين لأي شي لان شيخ عشيرة خالتي ام جيهان هددهم واخذوا عطوه

دخلت جوه لكيت ماما كاعده تلطم وتبجي واصرخ وام حسن كاعده تهدي بيها وتمسح وجهها وحنان واكفه بباب الغرفه وخطة الكحل موجوده بعينها ابد ما تبدلها وكل شويه وتأفئفت وتنهدت واستغفرت ربها

وكوثر تبجي لان هي حيل تحب ام جيهان وجانت دائما تروح الهم بحكم سولين صديقتها

كعدت يم ماما واني اواسي بيها كلتلها.. يكول حارث بعدها مميته

لطمت على صدرها وهي تنوح... ولج حالتها خطره حالتها خطره المره بغيبوبه على ساعه تموت الله لا يوفقك ياعامر كسرت ظهر البنات بامهن

وكفت بلحظة صمت بعدها كلتلها.. صدك البنات وين ؟

كالت وهي تلطم.. ما اعرف انهزم واخذهن وياه بيتهم فارغ

فتحت عيوني بصدمة كبيره من كلامها... عزااااا وين اخذ البنات عزا بس لا انوب يكتلهن صخام الصخمك كون محد عرف وين مكانهن

هزت ايدها وهي تنوح.. ماكو فص ملح وذاب

ضربت على خدودي.. وين اخذ البنات من فلك فلكك كون سوده عليه ام سولين شحالج هسه على بنياتج

......................

سولين

فتحت عيوني بغواش واحس بوجع بوجهي مو طبيعي فزيت مرعوووبه اني يمكن احلم اني بحلم مو بعلم اكيد احلم

اني ما شفت امي ماتت كدام عيوني ولا شفت ابويه كتلها ماكو هيج شي هاي احلامي دائما هيج

جنت احجي هيج اكذب الواقع باوعت الاخواتي يبجن وافيان عيونها مورمة وتدخل للغرفه وتطلع منها وتشهك بصوت مسموع وتهمس بصوت ناصي.. ماما ماما ماتت

وجيهان نايمه ومتغطيه بالبطانيه وحاطه اديها على شفايفها وتمنع صوت نحيبها لا يطلع والدموع تشكي حالها وامين حاضنها ويشهك

وكفت مرعوبه كل هذا يدل على ان الشفته حقيقه الشفته مو حلم لشفته واقع و واقع عمر

صرخت بصوت عالي فززتهن ... جيهااااان افيااان امييي ماااتت امي ماتت صحيح الي صار ابويه كتلها موووو احجن

ركضت على افيان واحتضنت وجهها بديه واني اتوسل بيها... كولي جذب كولي انتي تحلمين رزليني طيحي حظي مثل كل مره كولي خبلج السادس قابلة بكل شي بس لا دكولين الي شفته حقيقي

بلعت ريكها وهي تبجي ودموعها مثل المطر كالت بصوت مذبوح من الآلم .. شفتها وهي سابحه بدمها امي ماتت

عفتها واني ارجف وعيوني احسها مفتوحه بوحشية .. ايييي اييي اني هم شفتها تون من الوجع شفتها متمدده وغرگانه بدمها شفتها تموت شفتها تموت

رجف گلبي واني اتذكر الموقف .. شفته هو شلون واكف وسلاحة بيده هو الكتلها هو المجرم الظالم كسرنا وما عمرنا

كعدت على الارض واني اصرخ بصوت عالي وصل لعنان السماء... لالااا لاااا يمممه يروحي يمه وينج لاااا ما اكدر بدونج

باوعت الجيهان عيونها صايره مثل لون الدم ولاصقه روحها بالحايط وتبجي مرعوبه

ركضت عليها واني احجي وياها...جيهان شسوي جيهان امي ماتت كتلها النذل عامر كتلها شفته بعيني والله شفته بعيني

ظلت تشهك وتبجي ... امي سولين اريد امي هي وعدتني اظل وياي طول العمر شلون هيج تخليني واني بحاجتها

وكفت واني منهاره انهيار تام ممتوقعه الي صار ابد كله بسببي اني الرجعتها لهذا الكلب الحيوان اني الحقيره الظلمتها لو ما اني جان هسه هي عايشه معززة مكرمة عند اخوها بس اني لرجعتها لهذا النذل

جنت امشي واحجي واهوج .. اني السبب اني السبب

مر عليه طيف عيونها من تباوعلي عيونها كلهن دموع وحزن نظرة الم مليانة هم وغم وحسره

رجف كل جسمي امشي بلا وعي راسي احسه حينفجر من الالم واحس بالدم على شفايفي صرخت بااااااااه كطعم انياط كلبي وضربت الشباك بيدي

تناثر الكزاز بكل مكان ودخلت اجزاءه بيدي ركضت عليه افيان وهي تصرخ بوجهي... كااافي كاافي سولين راح اموت راح انجن منا امي ومنا انتي ومحد يصبرنا على مصيبتنا

بهتت من الآلم وجاوبتها وتنفسي ضيق... شتردين اصبرج على امي اصبرج على روحي ولج هاي مو بس امي هاي روحي وعقلي صديقتي واختي جنت اخاف عليها من الهوا شلون هيج صار بيها لو مخليتها متطلكة

شلون نعيش من بعدها جانت درعنا الي نحتمي بيه جانت تنضرب في سبيل ما ياذينه جانت تجوع في سبيل توكلنا تحملت كل شي لخاطرنا احنه ملازم نظل هنا احنا لازم ننهزم منا هذا انسان باع دينه هذا وحش خطر علينه ما اكدر اعيش ويه واحد اذه امي وتسبب بقتلها

ركضت للباب اريد افتحه ما كدرت باوعتلها بصدمة و وجهي محتقن من الدموع... شنووو

هزت ايدها من بين دموعها كالت... قفل الباب علينه

مسحت وجهي بكم ثوبي وجاوبتها.. خلينه نفلش الباب وننهزم

جرت حسره ومسحت بقايا دموعها كالت... احنه مو بيتنا

عقدت حواجبي بعدم استيعاب واني اباوع لارجاء الغرفه هاي مو غرفتنه هاي شنو احنه وين هذا مو بيتنا

تقربت منها وهزيتها بعنف... وين احنه

كالت وهي تبجي وكوه افهم منها.. هذا الرجال اخذ ماما وراح وهو يغلط على عامر الكلب وركب سيارته كال حاخذها للمستشفى

وبابا دخل علينا واحنه نصرخ اني وافيان وانتي متخربطه وهددنه بالسلاح وركبنا بالسياره وانتي شالج وخلاج بالسياره وانوب جابنا هنا وقفل الغرفه وراح

صفنت واني اباوع من جام الغرفه المكسور هذا البستان كال بعته جذاب طلع ما بايعه وخله عمه ام حارث تنازلت منه وهاي غرفه من طين بنص البستان شكد نذل وحقير وطماع

بعد ما كتل امنا انهزم واخذنا حبسنا هنا لو نموت جوع محد يدري بينا ما راح اكول وينج يمه ما اريد احملج اكثر من طاقتج بس ادعيلج وين انتي بيا مكان اذا بيج روح من عمري على عمرج

غصيت بالكلام ما اكدر احجي واصدك الصار .. واذا مم متي عساه بحرگة گلبي وربي ينتقم منه يا طاهره يا روح الروح ما انساج ولا حنسى الي شفتي وشلون انسى هالذكرى التوجع وبگلبي صار الآلم

صار اليل واحنه على فد بجيه وعلى فد نوحة ساعه احضن افيان وساعه امين وجيهان تكسر سكان الگلب ابوسها واطمنها واظمها الصدري

اتذكر امي شلون جانت توصيني عليها وشلون تبجي عليها وكعدت تجمعلها فلوس حتى تطيب خاطرها وتعيش مثل لبنات

امي شرف امي تاج وبيرغ عراضه امي نوماس للغيره بس وكعت بيد واحد فاشل دمرها من صغرها الله ينتقم منك ويقبح شكلك فوك ما هو قبيح

اتذكرتها بيوم من الايام

كلتلها بحب... تدرين ماما جيهان اذا تزوجت عمو كريم حتكون اسعد وحده بحياتها لان حيل تحبه وعمو كريم خوش انسان وشخصيته حلوه

ردت عليه وهي تبتسم... سوده عليه هي لو مو مريضه اكيد يتزوجها ويخطبها لان بنيتي جيهان جنها القمر بس عيونها تسوه ديره

اردفت بحالمية كالت.. اتمنى تتزوج الي تحبه وتتزوج عن قناعه اهم شي الآنسان يكون مقتنع بشريك حياته ويكون اختياره صح وهي حبيبتي حلو اختيارها اتشرف اني بكريم اكيد

جاوبتها.. اي صح حلو اختيارها بس هذا حب من طرف واحد

كالت... مظل شي واستلم السلفه واظيفها على الفلوس الجمعتها واسويلها العملية وان شاء الله اكدر اجمعها بلي يحبه گلبها واسعدها خطيه خلصت عمر من عمرها وهي حزينه ومعتكفه على روحها

ابتسمت.. صدك ماما انتي شلون تزوجتي ابويه

جرت حسره شكبرها كالت... عساني لا تزوجته ولا شفته جان يشتغل عند ابوي عامل بتصليح السيارات وجان فقير ومؤدب اثاريه نغل يكسب ابويه خادم عند ابوي

واني جنت صغيره اخذله اكل وهو المجلوب حاط عينه عليه ووطوخ علاقته بابوي وظل يطور بشغل ابوي وشاركة وصار ايده اليمين ابوي صار يموت عليه

وبعدها خطبني من ابوي كيف عليه واني تخبلت ما ردته جبير جان عليه وجنت طفله جبرني ابوي عليه وتزوجته وبعدها طلعت سوالفه المعفنه وظل يتعارك ويه ابوي ويتحجج انوب فك الشاركة ويه ابوي ويشك بيه ويكتلني واني بسرعه حبلت بجيهان ردت اطلك بس ما نطاها الي

وهو عصبي ومجرم جان يضربها رجعت لخاطرها وحياتي نذرتها الها انوب انتم صرتوا كلت بلكي يستعدل وما استعدل هو ذيل الجلب ينعدل

رجعت من واقعي على صوت شهكات جيهان رحت حضنتها واني اصبر بيها مسكينه وافكر بأمي.. والله امي الج وشرف حلوه وصغيره او محتويها مصار الي صار بس هو كلب يحس بنقص بنفسه حملها اكثر من طاقتها يشك بيها وبينا ويتخيل اشياء مصارت ابد

دائما جان يكول النه من احنه صغار منو دخل على امجن امجن هم تدخل زلم اني شفت واحد دخل للبيت ويظل يحقق وهي تتخبل من شكة وتظل تتعارك وياه وهو يموتها كتل

حسره بداخلي عليها على هالملاك الطاهر الي خلص عمره بالهم والغم والحسره وضاع بسبب اجبار جدي الها

.........................
رنا

جدي الشيخ تخبل من بعد ما انهزم عامر وعاف الناس تترادم طبعا هو الي خبر جدي عن الجريمة صديقه لعامر وهو الي شهد وياهم ضد عامر

طبعا اخوها متخبل زرف بيت عامر تزرف وراد يحرك بيته بس عشيرته ما قبلت لان المنطقه شعبيه وما رادوا الجيران يتأذون بسبب هاي الأفعال

جان الشيخ كاعد وهو يصفك باديه والولد كاعدين كريم جان بالدوام قبل الحادث وخابروا ونزل اجازه

العصر جدي راح عليهم واخذ منهم عطوه عشرة ايام وهدنه بين الطرفين وكلهم التردونه احنه حاظرين واذا تردون تكتلون عامر اكتلو

وراد عليه بشار خال سولين كايله.. هذا اني وياه گوه اكتله لو يظل يوم بعمري هذا وصل اختي للموت واخلي عايش لا والله وسفه على شاربي ازين شاربي واكعد بنص النسوان اذا خليت دم اختي يروح هدر

وكايله.. ام جيهان بيرغ اخوتها احنه نتنومس بيها مدام الكل وهذا يتهمها اتهام باطل ويريد ينهي حياته لا والله وسفه على شواربي اذا ما اخذ حقها على دمها اخذه على شرفها واتهامه الها باطل وام جيهان تشرفه وتشرف عشيرته وخليها تگوم بالسلامة والنه تصرف ثاني

جدي جان يمسح على لحيته وهو يتنهد كال.. منو الي يحضيلي بعامر اوووف الزمة واصلخ جلده العار الكلب

كريم جان كاعد يمه كله.. هذا واحد طغى ولازم تتسجل دعوه عليه حتى يتم القاء القبض عليه والله تماده هواي وطغى محد يرده والله اني من اخو ام جيهان اكتله واتفل على گبره شلون هيج يتجرء ويكتل المره

اردف بتعب... اوووف والله العظيم هذا مال واحد حتى من العشيره يطرده ويخلي تايهه بدون سند ولا اهل شنو ذنبه نتحمل اخطائة وافعاله المعفنه والله ما اعرف شلون متحملينه على مصايبه هاي

رد عليه الشيخ وهو يتنهد ويسبح بسبحته.. شنسوي يا بويه غير ابن اخوي و محسوب عليه

تعصب.. يابه ما يصير هذا انجلب والله حتى حرام نوكف وياه ما عنده حق واحنه واكفين ويه الباطل خلي يكتلوا يطبه مرض هاي نتيجة افعاله خلي يتعلم من افعاله وبعد ما يظلم العالم

شذنب ذيج المره الي بين الحياة والموت تفقد حياتها بسبب افكاره وسوالفه التافهه هسه المره حتى او عندها شي عارها على اهلها منو هو حتى ينهي حياتها ويكتلها مدام بناتها

انوب اخذ البنات مدري وين ما وين مدري انوب يكتلهن هذا ما يتأمن اني مجاي اكدر استوعب شلون ظالات وياه وشلون اخذهن وراح

مجاي اكدر اتخيل خوفهن ورعبهن منه هن من غير هيج وهيج يخافن منه مو انوب كتل امهن لازم نلگاهن بأسرع وقت ومنخليهن يمه

رد الشيخ.. الله كريم ان شاء الله يرجعهن

وكف كريم وهو ياخذ السويج .. صدك جذب واحنه ننتظره يرجعهن خليني اروح ادور عليه بلكي الكاه لبنات يخافن وجيهان مريضه انوب تموت هي اقل موقف تتخربط مو انوب موقف قتل امها

اخذ السويج وراح رحت وراه دا انطي رقم سولين بلكي يكدر يحصلها او من خلال الرقم يحصل موقعها ويجيبهن صدك والله لبنات ما اعرف شلون ظالات يمه مد اكدر اتخيل واستوعب هنا وحدهن يمه هن يخافن من امهن تروح المكان مو انوب هو كاتلها وهن اخذهن وانهزم

شفت حنان قبل لا يركب السياره وكفته نزل راسه وهو عاقد حواجبه وجكارته بيده كلها.. تفضلي

جرت نفس وردت عليه.. لا تتعب نفسك شفتك شلون منهار وتعبان وحقك انت لازم ترتاح من تجي من دوامك مو انوب تجي على مشاكل ابو جيهان هذول عائلة متفككة ما يجي من وراهم غير وجع الراس

رد عليها بجمود.. الله كريم

ردت ببتسامه.. دير بالك على نفسك

جاوبتها بتشرد.. تمام

مشه خطوتين واستوقفه صوتها.. من تجي شنو حاب اسويلك عشا

باوعلها بنظره عتب.. يا اكل بابا شبيج انتي متشوفين حالتنا مال اكل يعني اني كل همي اشوف البنات وين راحن و وين وداهن هذا الكلب

جاوبته... لا تخاف عليهن وحدتهن لسانها شطوله خاصه هاي افيان تعادل عشر نسوان ذاك اليوم شسوت بيه وحتى الفت عليه قصه وتجذب اكبر جذابه هي واخواتها

رد عليها.. اي افيان متسكت عن حقها بس جيهان فقيره ومريضه وتخاف اخاف عليها يوكف گلبها من الخوف هي وسولين حتى افيان تخاف من ابوها وهو اصلا مجرم وكلب ما عنده رحمة

عافها وراح وهو يدخن بجكارته وركب سيارته من كراج للبيت وطلع وهي سدت الباب شكد حقيره شلون تحشي براسه عليهن هذا ابن رجلها وهيج تشكيله لعد للشيخ شتحجي

بس سميره ممرتاحة الها ابد ممرتاحة لان احسها تتودد الكريم زين شتريد يموت الشيخ وياخذها او تتطلك وتزوجه؟

زين هي حرام شرعا حتى لو مات ابو وحتى لو تطلكت لا شرعا ولا قانونا تتزوجة وتعتبر من المحرمات بس هاي الا اذا تحب المحرمات وناويه تعيش بالحرام  وتدور بس حب وزنا من دون زواج واستقرار

خليت ورجعت كعدت يم كوثر طبعا كوثر تموت على سولين بس تبجي عليها وكل شويه تتذكرها وتتصل عليها ماكو

كلتلها تخابر كريم وتنطي الرقم بلكي الله ويحدد موقعهن لان هو عنده اصدقاء يعرفون بهيج شغلات

خابرته وانطته الرقم الي بعدها كالت.. تدرين ذاك اليوم عمه ام حسن تحجي ويه جدو كلتله ليش ما تخطب سولين الكريم والله تلوك اله وهم دارسه وعاقله وخوش بنيه

اني انصدمت من كالت هيج معقوله ام حسن تفكر بسولين لكريم هي مو تعرف اخويه حارث يحبها

كلتلها.. اي وشكال جدو

ردت كالت.. لا مقبل كال ابوهن مو خوش ادمي وما اريد اورط كريم وياه وبعدين هنه يصيحله عمو عمو مو مال اخذ سولين اله

جاوبتها مستغربه.. بس ترا سولين ما تقبل تتزوج كريم وهي تعرف حارث يموت على تراب رجليها ومن الصبح لحد الان ما كاعد بالبيت وهو يدور عليها وعلى اخواتها ولو يلزم خالي الا يذبحه

كالت بحزن.. رغم اخوج يحبها بس اني جنت اتمنى تتزوج اخويه كريم وتكون قريبه مني لان هي اكثر انسانه تفهمني واكثر انسانه احبها احبها من دون اخواتها

جريت حسره.. ترا جيهان فقيره ومسكينه

ردت.. ما اندمج اني ويه جيهان مو مثل سولين تسولف وتضحك ودمها حلو جيهان جامده حيل ومتسولف صح فقيره بس متنحب ابد

جاوبتها بحده.. بالعكس حيل محبوبه ومسكينه وتحتاج الي يحتويها ويطيب خاطرها بس مو الله يساعدها على ضيمها مو زين منها وتسولف وتحجي ورغم كل شي هي حلوه وطيبه وما تجرح ابد اصلا حتى ما تحجي هادئة حيل

كالت.. اي مره من المرات كريم كلها انتي كل شي بيج حلو بس هدوئج يقلق ما اعرف ليش

رديت عليها.. شلون يعني هدوئها مقلق

رفعت اكتافها بعدم معرفه كالت.. والله ما اعرف هو هيج كال

سألتها.. زين جدو ليش ما خطبله جيهان مو هي الكبيره

جاوبت باستنكار... لا يمعوده وين جيهان و وين كريم مستحيل بابا يفكر ولو تفكير يخطبها الكريم

عفتها ورحت خابرت على حارث كال رحنه ندور اني وكريم وماكو وسولين موبايلها عايفته ببيتهم مماخذته واخذته اني عندي بعد ما اعرف وين راح نلكاهن

ظليت للصبح اني وامي كاعدات نصلي ندعي الهن بالصبر وينزل الامان على صدرهن ويعديها على امهن سلامات

..................

سولين

جنت كاعده وسانده راسي على الحايط والدمعه ما نشفت من عيني حاضنه جيهان بيدي اليمين وأمين بيدي اليسار جانت جيهان تغفى وتفز مرعوبه عبالك اختي الصغيره مو الكبيره وامين حتى وهو نايم يشهك من كثر ما بجى على امي

افيان جانت كاعده مقابيلي وعيونها ما نشفت من الدموع بس اقوه منيه شويه وصامده

وصوت الكلاب يعوي يرعب المكان بحيث اني كل شويه وفزيت حيل اخاف من صوت الكلاب

شكد حقير ونذل حابسنه من الصبح لحد ما ظلمت الدنيا والفرفه ما بيها بس كلوب اصفر صغير وانارته خافته

لا شاربين مي لا اكل وهو منو يكدر ياكل وريگنه جاف ومر مثل العلقم مأساة مرة علينا عبالك سبايا

الاب لازم يكون سند واحنه مالنا سند تحسرت على امي اتمنى تكون بخير وكل ما تذكر مشهد موتها تصيبني حاله من الهلع والهيستيريا وافقد من البجي

وجيهان من تشوفني ابجي ينغمي عليها وهاي ثالث مره بهذا اليوم اغمى عليها

ايدي كلها دم والجرح انفتح من ضربت ايدي بالجام من حركة گلبي على امي باوعتلها لحد الان تقطر دم وتجمع البقيه على جف ايدي وتيبس وجف

منو الي يخلصني من هاي الحياة منو يطلعني من هذا المستنقع زاد عليه الحمل واني اشوف اخواتي واخويه لا حول ولا قوه ما معقوله اني الي جنت ادور حنان امي اصير الهم ام بوقت صغير بوقت اني مذبوحة بي وماكو بخيالي غير مصرع امي ودمها المهدور بكل ضعف

حسيت بالباب يتحرك وكأن واحد يريد يفتحه جنت على أهب الاستعداد مستعده اواجه هالوحش البشري الي هو ابويه المجرم قاتل امي بكل صلافه

انفتح الباب ودخل وقفل الباب وهو مبهدل و وجهه اسود وعيونه عيون مجرم فرحان بجريمته ومتلذذ بافتراس فريسته

باوعتلها وتجسد كدامي منظره وهو لازم المسدس وطلقته الطاغيه استقرت بجسم امي المهدور

كعد مقابيلنه واني احس خشمي دخل بيبي فلفل من كثر الحرگة والااة إلي تلتها الف اااااه

احتقن وجهي واني اصبر بنفسي بللت شفايفي من كثر ما جفت من خوفي منه وحقدي عليه

فرك وجهه وهو يشحط بلعومه وتفل على يساره حسيت بمكية قرف مو طبيعيه اتمنى اكوم اخنكة اكتله واتخلص منه

كال بحقد.. شوفن اني كتلتها امجن ليش لان هي خاينه خانتني وجان لازم تموت وهذا جزائها وكتاب الله يكول واجب كتلها

غمضت عيوني بجزع احس بيهن ابر كد ما يوجعني من كثر البجي واحس بعد حتى ما اشوف بيهن ورمن حيل وتضاعف حجمهن

يحجي بالدين اي كتاب اباح قتلها هذا منين ياخذ فتاوي

رجع كال.. الي اريده منجن هو ان تنسن عدجن ام اسمها آيار هاي ما تتسمه ام يكولون الجنه تحت أقدام الامهات بس يقصد بالأمهات الطاهرات العفيفات مو امجن الكح

هنا نهارت كل حصوني وذرة صبر ما ظلت عندي دفعت اخويه واختي و وكفت بكل حيلي عطت بيه بغضب... امي اشرررف منك ومن الخلفوك يا عار على الزلم امي تشرفك وتشرف عشيرتك يا حيوان

فتح عيونه بغضب عارم و وكف بكل غضب وهجم عليه جنت واكفه صامده مأيسه من الحياة ما دافعت عن نفسي

صفني على الحايط بضربه قويه وخنكني حييل حسيت روحي طلعت من بين اديه فتحت حلكي اسحب انفاسي حسيت رجليه ظلت ترجف وتشاهدت على نفسي

عاط بيه بصوت عالي ... بت النعال اذا ما لحكتج بامج العار ما اطلع عامر انتي مثل امج عار وكح

لزمته جيهان وهي تتوسل بيه كال وتبوس بيده يعوفني وافيان تجر بيه تريد تخلصني منه بس هو يصيح ويغلط بصوت عالي

ضرب جيهان على حلكها بقوه صرخت وهي تحط ايدها على شفايفها والدم لوث ايدها

دفعني على الارض ورفسني كوه التقطت انفاسي حسيت خشمي طك دم

كل هذا و وكفت بتعب واني امسح الدم من شفايف جيهان الي من ضربها انرعبت وظلت تنوح بصوت يوجع الگلب حضنتها ونومتها بصفي

كالت بصوت مليان حزن ومغبون... سولين اريد امي ما اريد اظل هنا

مسحت دموعها وحضنتها.. لازم نطلع منا خلينا نسكت ما نستفزه حتى يأمن بينا وننهزم منا

اتصل موبايله وفتح خط كال.. الوووو هااا لا ما اجي ولا ادليك مكاني اعرفك تريد تغدر بيه

كمل وهو يفرك بوجهه.. عادي حتى لو ادخل سجن اطلع بعتباري غسلت عاري وقضية غسل عار ما اخذ عليها مؤبد

اردف بعدم اهتمام.. اي ماتت خابروني كالو ماتت للجير وللجهنم

نهاية البارت .. يتبع

كونوا انتم كونوا بخير.. احبكم💔

نور سمو العراق

لا تنسوا التصويت والمشاركة احبتي بكم تكتمل الرواية❤️

واعتذر عن البارت المؤلم 🥺

انتظروني بالبارتات القادمة❤️