رواية #وكر الأشتر الفصل السادس 6 - بقلم الكاتبه سمو العراق

البارت السادس
رواية.. وكر الاشتر
بقلمي.. نور سمو العراق

💔💔💔💔💔💔💔💔💔💔💔

.........................

تعرفون شعور من شخص يريد يدعي ربه بس ما يكدر يحس نفسه مكبل وخاطره مكسور حتى من الدعاء ولشنو اصلا يدعي لخاطر منو مع العلم متبلد من الداخل ومحتاج لشعور الدعاء

والي يزيد من الهم والغم صدرك المختنك والي تحس بداخله حجاره وصاير عباره عن أنقاض من الماضي والحاظر

احس بداخلي الم .. الم صبر والم كسرة گلب الم خيبه وخذلان والم الوحده والحسره والدموع التحرك

الحمد لله منتظره العداله اللاهيه ويا عظمة الجبر الالهي والصبر مفتاح الفرج وكل شخص ظلم امي حيتحاسب ويتعاقب واملي بربي كبير والحمدلله على كل حال لا أعتراض على آمره وأرادته

وقتديت برسول محمد صل الله عليه واله وسلم من امرنه بالصبر والشكر لله بالسراء والضراء بحديث نبوي .. عجبا لامر مؤمن كله خير اذا اصابته سراء شكر فكان خيرًا له.. واذا اصابته ضراء صبر فكان خيرًا له

الحمدلله يارب ان شاء الله صابره بالسراء والضراء بس ياربي اطلب منك طلب ان تنزل على روحي السكينه والصبر موت امي صعب ابتعادها عني مثل انتزاع الروح من الجسد عدم وجودها بحياتي مثل سكرات الموت

تعرف ياربي هي شلون جانت اله خيمه وسكان واحنه ضعيفات لا حول ولا قوه ما نكدر نواجهه هيج انسان طاغي وحاقد وكل الأمراض النفسيه بيه

من علن عن موت امي المزعوم حسيت عبالك انركلت ببطني بضربة قويه كطعتني لأشلاء عصرت ايدي جيهان حييل ودموعي تنزل بصمت

قفل التليفون وهو ينفخ بضجر..شلون بلوه هذا لياخذله مره ما بيها خير ما يتحمل من وراها بس المصايب هسه اني منين اجتني هاي المصيبه

باوع علينه وهو يتفل علينه... تف عليجن وعلى خلقتجن الزفره هم البنات للممات

اشوفلجن زلم بيها حظ واخلص من همجن بله ذن يمشن الا هاي المشوهه ياهو ياخذها

يحرك الكلب بكلامه حيل طاغي ومتعجرف للحظات تمنيت لو اني متزوجة حارث ابن عمتي وخلصانه من هم اهلي وضيم ابويه اريد مكان هادئ مكان ما بيه هذا الحزن والهم والغم

خله وطلع وهو يقفل الباب بعد ما سبب مدينة منكوبه داخل صدر جيهان وهو ينعتها بالمشوهه ومحد بعد يأخذها وتظل طول عمرها بكهفه وبداخل هالمستنقع القذر

اعتكفت على نفسها وهي تداري دموعها انسانه محطمة لأبعد حد ضعيفة شخصية مسلوبة الإرادة مريضه نفسيه وكل هم العالم داخل صدرها ومتحجي

زادت عليه المسؤوليه ما اكدر اخلي اخواني هيج الحزن مغطيهم حاولت اصبر عليهم بس هيهات اني محتاجة واحد يصبرني على بلواي وعلى المشهد المفجع الي شفته

احس بداخلي مقبره وامواتها مساكين احس روحي مثل الحمامه الهايمه وتدور على مكان يأويها

ماتت امي بعد منكعد على صوتها ولا نسولف الها همومنا تحطم كل حلم بداخلي وفقدت رغبتي بالحياة ما عندي غير ربي هو يرزقني الصبر وما اريد غير الصبر لان حنجن والله

غلب علينا النعاس ونمنه شويه فزينا على صوت الباب وهو ينفتح دخل وهو شايل علاگة بيها اكل كعد ياكل وكل شويه مشحوط ويطلع اصوات مقززه اثناء الاكل

صاح على أمين بحنية.. تعال بابا اموني تعال اكل

رد عليه امين بخوف وهو حاضن جيهان.. ما اريد

تنهد ورجع كال.. ليكون مقهور على امك لان ماتت باحر تكبر وتفهم السويته المصلحتك لان هاي عار عليك مفهوم حبيبي وباجر من تكبر اصدقائك راح يعروك بيها لذلك اني كصيت المصيبه من ساسها

عضيت على شفايفي واني اصبر نفسي ما اكدر اعيش وياه ولا اكدر اتقبل كلامه على امي شلوون ياربي شلون مصيبه ادعي عليه بالموت والله حرام شلون اكدر اعيش وياه

بس اتمنى ينسجن وياخذ إعدام لان قتل امي بدم بارد وامي متستاهل الموت ولا تستاهل الي صار بيها

كمل اكل وعاف الفضايل كال.. تردن تسممن تعالن تسممن

باوعتله بنظره استحقار وافيان وجهها احتقن هي متعرف ترد لسانها كلتله بعصبية.. مناكل فضايل احنه

شمر عليها بطل البيبسي اجه بكتفها بس هي استقبلته برحابة صدر وما اهتزت كلها بغضب.. على يوم الحكج بامج يا عار يا بنت العار

همست بصوت خافت وهي تفرك بكتفها... همزين تعرف نفسك

كلها بحده.. شگلتي

ردت عليه.. محجيت شي

باوعلنه وهو يهز براسه ويتوعد بيه.. بسيطه بس خلي اخلص من هاي المشكلة واني اعرف شلون اربيجن ادبسزيات دايحات امهات الشوارع عود عبالجن مثل قبل تطلعن وتطبن بكيفجن والله الاخليجن تتمنن الموت وما تلگنه

خله وراح طلع ضال يطلع ياخذله ساعه ويرجع يظل يرزل ويسوي تصرفات غريبه ومو منطقيه

كالت افيان بحده..كله بسبب جدي هو السبب بكل شي الله ينتقم منه وهو بقبره الله يحركة بنار جهنم هو زوج امي لهيج انسان عار على الزلم اصلا عار على الامة الاسلامية كلها

جاوبتها جيهان.. حرام الرجال ميت ميصير تحجين هيج الميت متجوز عليه غير الرحمة

باوعتلها بحده وغضب... طبه مرض يستاهل ان منترحم عليه هذا ميستاهل الرحمة اصلا شنو فرقه عن عامر ثنينهم نفس الطينه وبعدين هو هم مجرم من زوج امي غصب عنها لشخص متريده

وبعمره عامر ما احتوا امي ولا طيب خاطرها ولا عوضها طغى واجرم بيها وحتى من راد يطلكها منه مقبل تاخذنه وياها لان ميريد يتحمل مسووليتنا وشمرنه على عامر وكسر رگبتها بينه وخلاها ترجع بكل ذل وتخضع العامر بسببنا

لو هو بس قابل ياخذ حضانتنا واحنه صغار لو مخلينه ويه امي ومطلكها منه مجان امي صار بيها الي صار ولا تماده عامر وكتلها

حطيت ايدي على شفايفي مصدومة .. افيان طفله بس تحجي كلام اكبر من عمرها واني دائما جنت اشوفها وكحه وصلفه وما عندها تربيه وحقوده بس هسه اكتشفت ان هي تظم بداخلها وهسه انفجرت وكل شي جان مآثر بيها وهي تتصنع اللامبالاة

صنعوا منها شخصيه عدوانيه جريئة متغلفه بالقسوه والحقد وصنعوا من جيهان شخصيه معدومة بعدها بقوقعة الطفوله

شديصير بينا ياربي مسحت دموعي ونمت واني الهج بذكر امي الي ما راحت عن بالي ولأ دقيقه ولا ثانيه

معقوله نزلوها بالكبر اول ليله الها وهي بعيده عنه بالها يمنه واحنه مو يمها ولأ ودعناها بلحدها احس بغصه اصلا ممصدكة الغاليه ماتت ولا راح اصدك امي الحلوه الكلها رقه وعذوبه تموت هيج موته ويعتبروها عار مستحيل والله مستحيل...

.......................

رنا

من بعد مرور تلث ايام ما سمعنا خبر عن ام جيهان بس اخر شي كالو ان حالتها خطره وبالمستشفى واحنه لحد الان عند بيت جدو كهلان

البيت كئابه وضوجه اجه حارث وكريم كالوا ما خلينه مكان يعتب علينا ماكو راد كريم يبلغ الشرطه بس جدو ما خلاه لان لحد الان الشرطه ما عندها علم بموضوع القتل ولحد الان اني مفاهمه الموضوع شنو وليش تستروا عن خالو يعني هو اخوها تستر عن القاتل اني كنت متوقعه ان هو ما يريد يفضح اخته على ان هي انقتلت بغسل عار او هيج شي

حارث كال.. ما كدرنا نحصل مكان سولين لان موبايلها للاسف عايفته بالبيت فاخر مكان جان الها بيبتهم القديم

كريم جر نفس وهو يهز برجله بتوتر كال... مشكلة والله مصيبه هذن البنات راح يعيشن بظلم ويه عامر لان عامر حقير ومراح يرحم بحالهن ابد والله لو يقبل اخذهن عندي منا لما يكبرن ويستقرون واني اصرف عليهن

مسح حارث وجهه بتوتر وهو يرد عليه.. اي كلب وحقير ما يقبل واحنه ما بيدنا شي هو ابوهم الاولوية اله اني لو عليه اتزوج سولين واجمع اخواتها وياها بس هو نذل سد كل الطرق بوجهنا وبعدين هوما يقبل يناسبني بعد ما سجنته ورميت على بيته

كريم ... ما اعرف من يا طينه مخلوق ممستقر وبهذل نفسه وبهذل عائلته حقير ونذل الى ابعد حد والسبب هم من اهلها من انطوها لهيج واحد عار وكل الصفات السيئة بيه

جاوبته .. فدوه كريم انت مو تفكك عبوات خليه بوحده من السيارات المفخخه وانسفه نسف وخلصنه منه

رد عليه بضحكة مستهزئة . .. هو اني لازمة وما مخليه بسياره ومسوي تشريب بس خلي الزمة اله اترس حلگة تي ان تي

ظلينه كاعدين شويه وحارث طلع اجت بيبي ام حسن واجت كوثر وحنان كعدن ظلن يسولفن على كريم وهو مال من سوالفهن خله وطلع

وحنان خلت وراحت نامت ماما كالت.. بالي عند البنيات سوده عليه يخافن منه وامهن جانت درع الهن ما تخلي يحاجيهن مره راد يكتل افيان ومخلته فلش الماسحة على راسها وما خلته يضربها وياذيها شلون بيهن هسه وامهن ماكو اريد من الله يحفظهن ويستر عليهن منه

بيبي ام حسن ردت عليها... اي والله ان شاء الله يارب يحميهن من وبس يرجعهن اني اكول للشيخ يزوج سولين الحارث لان دريت بي يحبها

واخلي يخطب جيهان الكريم وبعدين نخلي كريم يتزوج عليها بس المهم يحميها من ابوها

ماما تخبلت فتحت عيونها بعصبية كالت.. شنو يتزوجها وياخذ مره عليها شنو هالكلام صدك جذب

ردت ام حسن بخيبة امل.. اي جاا هي لبنيه مريضه ومشوهه مو مال زوج بس هو ياخذها بس يحميها من ابوها ومن حقه يتزوج وحده تليق بي

وكفت امي باستنكار كالت الها... لا يم حسن ما جنت اظنج هيج ولا جنت اظن هاي نظرتج لبنات اخوي انت تدرين شجاي تكولين تخلين لبنيه تتعلق بي وانوب يتزوج عليها ويكسرها وبعدين شنو مصيرها وياه من ياخذله مره وهي ينبذها تعيش بذل ابوها ولا تعيش بهيج ذل

ام حسن بلعثمة.. والله مو قصدي بس اني اشوف كريم شخصيه وخوش ولد يستاهل ياخذله وحده كامله والكمال لله وجيهان يعني مو مال تتزوج كريم وهي اصلا مريضه

امي بحده.. عوفي لبنيه ولا تزوجيها وتظلميها مثل امها خليها تندفن بظلم ابوها وتنتظر الفرج ولا تنهين حياتها بهالطريقه الجشعه

كوثر ردت على امي... ام حارث على كيفج يعني هي مو من مستوى اخويه هو مهندس متفجرات وهي اصلا مدارسه وهو ميت الف وحده تتمناها وهي اصلا محد دك بابها وخطبها بعيدا عن ان هي مشوهة بس هي اصلا متصلح للزواج مريضه نفسيه وكل الأمراض بيها يعني من سابع المستحيلات اخويه يتزوجها بس باجي ام حسن دكول ان تقنع بابًا يقنعه يتزوجها من هذا الباب وهي حابه تساعد لا اكثر ولا اقل

ماما جرت نفس وردت عليها.. جيهان احلى اخواتها اصلا تختلف عنهن اختلاف بالشكل والملامح وحده لو مشوهه الكل يتمناها وبس تسوي العمليه تصير زينه وازوجها تاج الزلم..

ردت .. اي عمليتها غاليه خوما ياخذها الرجال يكعد يسويلها عمليات هسه هو الرجال وين يتحمل

كالت امي.. والله اني لو حارث ما يحب سولين جان خطبتله جيهان وبعد دم عمري وسويتلها عمليه بس شسوي وهو گلبه معلك بأختها

وحتى كريم اذا يتزوجها ما اعتقد يقصر وياها ويجيب مره على راسها لان كريم شهم واخو اخيته وما يظلم بنيه مظلومة وياه واني ابصم بالعشره اذا صدك تزوج جيهان راح يموت عليها يبوس تراب رجليها لان فقيره وفطيرة وطيبه عبالك طفل

دخلت حنان كالت... لا كريم مستحيل يفكر بيها لان هو معتبرها بنت اخو وهي تصيح اله عمو صح مو عمها اخو ابوها بس بمثابة عمها ودائما منتبهه عليه يسميها كله عمو حتى خاف مخليه ببالها شي تشيله من بالها ودكول هذا عمي

امي تخبلت كالت بغضب عارم.. اكلجن شو انتن سويتن بنت اخويه كاتله روحها على كريم وام حسن دكول يتزوجها ويتزوج عليها شنو سالفتجن والله اني ما اقبل وحده منجن اجيب سيرة ذيج لمسكينه على لسانها وتظلن كل وحده مطلعه سالفه عليها والله اكول للشيخ وهو يتصرف اذا هيج

ترا حرام عليجن والظلم ظلمات يوم القيامة وترا هاي لبنيه من اهل الله وتشور لان فقيره وطيبه وما عندها وحده من ثنين وكل واحد يجيبها بسوء لله يضره وهسه تشوفن

ام حسن تخبلت كالت.. والله مو قصدي ابد اني احبها جيهان واحب اخواتها واني من ردتها لكريم بس ردت اساعدها لا اكثر ولا اقل بس احتمال تفكيري كله غلط

امي جاوبتها... اي غلط يم حسن غلط شلون هيج تحجين

دخل كريم وهو يتسأل...شكو شبيكم صوتكم واصل للديوان

ردت عليه بيبي ام حسن وهي تضحك.. هااا لا ماكو شي

باوعلهن بشك بعدها كال.. سوو جاي اجه اخو ام جيهان هو وعمامه

نطت حنان من مكانها... اي تدلل هسه اسوي اني

هو عافها وراح وهي راحت تسوي جاي اجه جاستن اخذه منها تفشلت سميره عبالها كريم هههههه

......................

جيهان

مرة ايام على مقتل امي الدمعه ما نشفت من عيني امي ما اعرف شلون اوصفها صح مرات تكون قاسيه بس ماكو اطيب منها تعبت حيل ويانه ما مصدكة امي ماتت جنت انام ساعات ما اخاف احد يكولي ليش ممنظفه ليش ممسويه غدا لان هي جانت قايمه بكل هذا جنت ما حاسه بشي بوجودها

ورغم حزني جنت انام وراسي بارد انام مرتاحه وما عندي شي ولا افكر بباجر شنو يصير جنت فرحانه حيل لان جانت تجمع بفلوس عمليتي جنت اكعد اكابلها من تحسبهن وتفرح ودكول ما ظل شي ان شاء الله راتبين واخذج ارجعج احلى من قبل افرح حيل واحضنها وابجي على صدرها وابوسها بيدها وراسها وهي تظل تضحك دكول.. هيج تحبيني لو لان حسويلج العمليه

جنت اصفر عليها وما احجي جنت اشوف على ملامحها التعب تتعب وتتحمل اكثر من طاقتها في سبيل بس تجمعلي فلوس وابويه جان ابد ما يفكر بيه ولا فد يوم اتذكر ان اني تشوهت بسببه

رجعت بذاكرتي لايام طفولتي طفولة قاسيه تحمل كل أنواع الذل والمعاناة جانت امي زعلانه عند بيت جدو وتريد تتطلك

جان عمري سبع سنوات جنت طفله خايفه من كل شي اجه ابويه من شغله وعاط بيه كال .. ممسويه غدا

رمشت بعيوني ممستوعبه والدمعه تلالي بعيني والغصه خانكتني جاوبته.. ما اعرف

رد عليه بعصبيه حاده.. طالعه على امج عربه امشي ولي گليلي بيذنجان هم كولي ما اعرف حتى اكص لسانج

رحت للمطبخ وابجي ما اعرف شنو اسوي ولا اعرف شلون اكصص البيذنجان اتذكرت امي شلون تكصصه وصرت اقلدها واني اصلا ممسيطره على السجين وجرحت نفسي

ظليت ادور على الجداحة ماكو طلعت من المطبخ و وكفت بباب الغرفه بخوف كتله.. ماكو جداحة

كال وروحه بخشمة.. روحي لدكان ابو سعدون وخليله اريد جداحه وسجلها على ابوي عود

لبست نعالي ورحت جنت حلوه بيضه ودبدوبه لابسه تنوره كابوي للركبه وتشيرت ابيض وبي ورد وردي بالصدر وضافره شعري كصيبه واصله لنهاية ظهري

هو ابو سعدون جان بنص التلاثين بس وجهه اسود ويلعب النفس سنونه طوال من شافني كان من كرسيه واجه يمي كال.. هلا حبيبتي شتردين

بلعت ريكي بخوف من وجهه القبيح وجاوبته.. بابًا يكول اريد جداحة وسجلها على حسابي

كعد ركبه ونص وحط ايده بقذاره وفساد على خصري كال.. اي يدلل ابوج شنو هالجمال تشبهين امج تخبلين

ابتعدت عنه بخوف و وجهي احس نار اطلع منه كال.. لا تخافين لا تخافين تعالي ادخلي جوه انطيج جداحة

هزيت راسي بنفي... لا لا ماما متقبل ادخل جوه

لازم ايدي وباسها وهو يحجي بصوت اشبه للنعاس.. اني احبج بس تكبرين اتزوجج تعرفين من اتزوجج شنسوي

فتحت عيوني مصدومة من كلامه دفعته بكل قوه وطلعت اركض من المحل وابجي احس انتهك برائتي احس لوثني رغم مسوالي شي اكثر من الي ذكرته بس جان ناوي على شي واني صح صغيره بس حسيت بنيتة حقيره ونية سوء

طلبت من جيرانه جداحة لان اذا ارجع من دون جداحة بابًا يموتني كتل دخلت للبيت واني ابجي واحس عيوني غوشت خليت وشغلت الطباخ وترست الطاوه دهن وهو يفور شمرت البيذنجانه من بعيد كلها مي وهي الطاوه كبت ردت اطفيها مكدرت

وكعت الوصله من ايدي ودنكت اجيبها اتزحلكت الطاوه من الطباخ و وكعت عليه حسيت بنار جهنم نزلت عليه ظليت اصرخ بصوت عالي واني اتبرغث على الأرض مثل الحمامه المذبوحة وتلوه من الوجع

اجه يركض ملهوف عليه من شافني واكعه والطباخ مشتعل والطاوه والزيت الحار كله حرك جسمي واني وكفت من حلاة روحي اركض اركض ادور على مي ابرد نفسي واشوف اللحم كله وكع وماع من جسمي

هو جاب سطل مال مي وشمره عليه جنت ارجف من الوجع واصرخ من نقلوني لردهة الحروق اتوسل بيهم بس واحد منهم يساعدني يساعد وجعي ويطفي النار الشاعله بروحي بدو ويايه رحلة علاج تعيسه وأليمة التهب الحرق وهم يكشطون بالحروق ويرجون ليوره

ماما من سمعت اجت تركض وضجت المستشفى بصريخها ما عافتني ولا لحظه ورجعت وتحملت ابويه لخاطري احد ما طبت وهي حلفت بعد لو تموت ما تتطلك وتظل ويانه حتى ما تتاذه اي وحده بينا

لحد الان عندي فوبيا من النار من الناس الغرب من المطبخ وبطلت من المدرسه لان جنت ما البس حجاب والحرك برگبتي مبين ونازل على ظهري واعلى صدري ورجلي اليمنى بس الفخذ بس شكلة مقزز ومحلو

حتى هو ابويه جان يكول لامي لا تخليها تجي تكعد يمي من اكل تلعب نفسي من الحرگ الي برگبتها جنت انقهر واظل ابجي من كلامه وبعدها بطلت من المدرسه ولبست حجابي وابد ما نزعته اخاف الناس تلعب نفسها مني مثل ما ابويه تلعب نفسه مني

معاناة وماساة مرة عليه نمت بالمستشفى شهر كامل لحد الان گلبي يرجف من اتذكر صوت العربانه الي جانوا يجيبون بيها العلاج من يكشطون الحرق اظل ارجف من الخوف بمجرد ما اسمع صوتها صادر من بعيد معلن عن دخوله الغرفه انهار واظل ابجي لان الوجع ما يحس بيه غير صاحيه وجع جبار ما تمناه العدوي

اعتكفت من بعدها على نفسي دفنت طفولتي واحلامي تحت ركام الماضي وآهات الحاظر

حجيت لامي عن ابو سعدون وموقفه وياسر وماما ما قصرت راحت رزلته وفضحته كدام اهله وتفلت عليه وهو من ذيج الساعه يكره امي يتخبل منها

جانت امي صمام الامان ابنه جانت دوه لجروحنا ماتت ومات كل شي حلو وياها

جنت دائما افكر بعمو كريم احبه اموت عليه واعرف ان اني اركض وره سراب وجان عندي امل امي تساعدني وتوكف ويايه وتوج حبي اله باحسن قصه بس هي راحت وماتت وحتى حب كريم مات بداخلي وانتهى الشغف عندي

............:::::.

جاسم

مرتين اجه اخو ام جيهان ؤهؤ يتهدد ويطالب بدم اخته وابويه يصبره وكله لو اعرف مكانه والله ما اقصر واسلمة الك بيدي واني الممنون

ابويه هم خابر على عامر وكله المره ماتت راده يسلم نفسه للشرطه بس هو انوب زاد كسر السيم كارد ويطلع خارج نطاق الخدمة وما ناوي يرجع

وبيوم من الايام بعد مرور اسبوع المره دخلت بغيبوبه بس اتعدلت مرحلة الخطر

باليلة بارده وبيها مطر اندك الباب وطلع كريم دخل كال بحيره.. يابه هذا بشار اخو ايار يريدك

طلعنه كلنه للديوان جان كاعد وملامح الغضب مستوطنه وجهه وشفايفه مشدوده بقسوه سلمنه عليه وكعدنا

كال بعد ما سحب نفس وزفره ... اختي ام جيهان طلعت من المستشفى بس طلعت على ضرر ما تكدر تتحرك وما معروف شكد اظل على حالتها هاي

الي اريده منك يا ابو كريم تعلن موتها بالنسبه العوائلكم وبناتها و إي رابط بيكم ما نريد لا من بعيد ولا من قريب وهذا النذل راح اطلكها منه غيابي

ابويه استغرب كله وهو يعقد حواجبه... شلون اعلن موتها ما فتهمت بويه؟

عض على شفايفه وتنهد ورد على ابوي.. يا ابو كريم انت تعرف شكم مره ردنه نطلكها منه وبسبب بناتها ما تتطلك ترجع مذلوله اله مكسور ظهرها بالبنات و ولد واني اريد تفهم بناتها ان امهن ماتت حتى ما ياثرن عليها وترجع

واني اصلا اريد اخذها واسافر اعالجها بالخارج ونستقر هناك وما اريد اي صله بيكم صح الجاي اسوي غلط بالنسبة البناتها بس صح بالنسبه لأختي لان اختي ما شافت بس الظيم والقهر من هذا العار خلوها ترتاح وانتم اخذوا بناتكم وانطونه بنتنا

واني لو جنت كبير بذاك الوقت مستحيل اخلي اختي تظل عنده لو دقيقه وانت يا شيخ وعدتني اختي ما يصيبها مكروهه ورجعتها لخاطر هالشيبه الكريمة وتاليها رجعتوها جثه لو ما ربك ستر

انت هم تتحمل المسؤلية يا ابو كريم لان اني من رجعتها رجعتها بمسؤوليتك وبكفالتك بعد ما انت تكفلتها بس الظاهر هذا عامر محد يوكف بوجهه حتى انت يا شيخ لهذا السبب اني اريدك تعلن موتها حتى ينقط رابط الوصل الي بينا وبعد ما الكم عدنا شي

يا اما اصير قاتل ومقتول واحنه نطالب بالقصاص والدم وعامر اكتله لو يظل يوم بعمري

وانت يا ابو كريم توافق على شرطي وتحقن الدم احسن ما تصير بين العشاير احسن ما اصير كاتل ومكتول وانت اعرف قضيتنا ما بيها امل لان اول وتالي هي تتطلك وتبتعد عن بناتها بس اني الي اريده اكطع الامل عند البنات واخذ اختي واسافر واعالجها بدل ما ياثرون عليها ونصير بخبر كان

رد عليه ابويه بعد ما تنهد بحسره..الله كريم بويه موافق على شرطك وهذا احسن حل

أنتفض كريم من مكانه ضد كلام ابويه وضد كلام خال البنات كال... شلون هيج شلون تكسرون بالبنات هيج وتعلنون عن موت امهن وهي عدله وهن بحاجتها

رد عليه خالهن... اختي جابت حياتها تضحي لخاطرهن ومستفادت شي هن اذا يحبنها يخلنها ترتاح وراحتها وياي خليني اخذها واروح بعيدا عن بناتها وعن المشاكل وهن اكيد باجر يتزوجن وانتم اكيد متعرفوهن وكل وحده تأسس بيت بس تظل اختي ويه هذا العار واني هذا الي ما اقبل بي وانت يا كريم هم ما تقبل

كريم بعصبية.. بس البنات حيل متعلقات بأمهن وظلم تبعدهن عنها وهن كلهن آمل بيها تيتمهن وامهن عايشه حرام وقهر احنا نحاول نجمعهن بأمهن بعيدا عن عامر

استقطع كلامه بنفي قاطع.... لاااا مستحيل مستحيل ما اريد لا عامر ولا بناته وكتلك بيني وبين عامر الدم خلي ياخذ بناته واني اخذ اختي وكل واحد يروح بحال سبيله ورجاءا لا تناقشوني اكدر اخذ اختي واطلع للخارج من دون علمكم بس اني ما حبيت تكونون وراي وحبيت انطيكم خبر فحقنا للدماء اعلنوا عن موتها

كريم مقبل بس ابوي سكته كله كافي كريم هذا هو الصح خلي المره ترتاح وان شاء الله الي يريده بشار يصير من باجر اعلن عن موتها بالنسبه العوائلنا وانتم تحلفون على كتاب الله متحجون ولا تطلعون هالسر

كريم تخبل وما قبل يحلف بس بعدها ابويه جبره واني اصلا اخاف ما احلف ما اعرف شلون يصدكون بيه واني مبدل نص بدلات الوطن العربي بس بعد شيسوون انغدروا بس لا والله ما احجي هذا سر

مر شهر كامل بعدها على اختفاء ابو البنات تالي ابويه اعلن عن موتها وراد يسوي فاتحه بس بعدها ما سوه خاف من ان تصير عليه اثم اكثر من هيج

من عامر حس ان الوضع هذا هو يطمن رجع للبيت وابوي انطاه الامان رجع لبيته هو والبنات واجانه للبيت يطلب السماح والعفو من ابوي  ابوي جان مموجود

هو شافه كريم وهو تخبل اول ما دخل جان كاعد على اعصابه كال هو بفخر.. هذا تاج اخلي على راسي لان اني ما رضيت بالعار وكتلت مرتي

رد عليه كريم بغضب ولك انت اكبر عار انت شنو وتسولف بالعار والتاج انتي اصلا غاط بالخيسه انت مستنقع مال قذاره

هو تخبل كال.. سد حلكك كريم لا الحكك بمرتي

كريم ركعه بستكان الجاي وهجم عليه مرعده تمرعد نريد نخلصه منه ماكو شكك قميصه عليه واني لازمة وعمتي ام حسن تتوسل بيه يعوفه

طاح بيه وسحله وطرده بره البيت وذاك يتهدد بسيطه كريم بسيطه بعد تحلم يكون عندك ابن عم

رد عليه بغضب وسخريه.. عساس شلون ابن عم كلك مفخره لك تسوي فضل يا زبالة العشيره

ومن يوم العركة لحد الان وهو مجاينه وميقبل واحد يشوف بناته وابوي هم كال عوفوا ما دام ميحترم خلي يولي طاح بي وشمره من العشيره وهو تخبل شلون شمرناه من العشيره

.................

سوليين...

بعد ما ماتت امي وره شهر رجعنه لبيتنا محد اجانه ولا احد سال علينه لان هو من رجعنه كتله عمو كريم موته اموت لهذا السبب هو قاطعهم بعدين جدي شمره من العشيره خلاه تسودن بالزايد

ظل يروح ويجي ويتحجج علينه انوب صاحب ابو سعدون ياكل شويه ومدخله للبيت يدخنون وينطي فلوس ويداينه معرف شنو غايته

جانت الساعه بالتسعه باليل تقريبا

كهرباء ماكو والجو بارد كل وحده لافه روحها ببطانيتها وكاعده كالعاده ماكو نفط نترس الصوبه يجيب النفط يبيعه الوالد ..

ما اعرف ليش احس واحد وعصر گلبي احس البيت يلطم كئيب لحد الجنون شهكت بعمق وسحبت انفاسي

حسيت نفسي اختنگت لدرجة الموت وعقلي حيطفر من راسي جنت غرگانه ببحور من التيه والضياع ومشهد مقتل امي لحد الان يتجسد گدامي

نفضت افكاري من راسي بس مستحيل اكدر اتجاوز الي صار ولا اكدر اتغاضه عنهم واسكت وشلون اسكت عن ناس تجردت من الإنسانية وتجاوزت كل قوانين البشر وعاشوا مثل الوحوش حتى يرضون غرورهم ...

مستحيل اكدر أعيش ويه أبويه الي قتل امي وبهذلنه مستحيل اكدر اباوع بوجهه ايده اخذت على القتل باجر هم يذبحني بدم بارد ويدفني مثل امي

خووف وحسرة دبت باعظامي رعب ظلام اذيه انتقام وحوش بشريه كل هذا محاوطني وراعبني رعب يعقد لساني عن الكلام

درت عيوني بارجاء البيت الي جان محاوطه ضوه خافت مصدره جاي من الشمعه المركونه بزاوية الشباك ..باوعت الاخواتي كاعدات وساكتات حتى ما يسولفن واخويه الصغير نايم

الغرفه بكل ما بيه تحجي قصة ظلم وبشاعه للواقع بعد ماكو فرحة بحيث قلبي مدا احس بي ينبض الحياة تساقطت كدامي مثل اوراق الخريف ماكو شي يخليني اتمسك بهاي الحياة...

حطيت راسي على المخده والدمعه تنزل بصمت من عيني والكل غافل عنها محد يعلم بحالي غير ربي كتمت عبرتي ومسحت دموعي..

حسيت بالباب افتح واحس تفتحت وياه جروح گلبي ابشع انسان بحياتي استوطن الغرفه وهو يصيح بصوت عالي...بنات الزمال اكعدن لا اطيح حظجن بس مال نوم وعلف مثل البهايم

غمضت عيوني وعصرتهن حييل واني اتصنع النوم ما اريد اشوفه ولا التقي بي يا ريت اموت وما اشوفه

حسيت باخواتي كعدن وافيان ترد عليه...خير شصاير محتاج شي

رد عليها...حظرن نفسجن بسرعه عندي ظيف دقايق وجايجن بسرعه سون جاي

جاوبته...بس ما عدنا جاي انت تعرف

جاوبها ببرود ...كعدي امين يروح يجيب

ردت عليه جهيان بصوت يرجف...بس امين نام من زمان وخطيه نكعده والجو بارد

نتر عليها بكل غضب...بت النعال بت الكلب ادز وحده منجن حتى....لو اروح اني !! كعدي ونلصمي لا اخبزجن خبز بالصونده...

جاوبته افيان ...بس ميكعد هو نومة ثكيل

رد عليها بعدم اهتمام..ذبي عليه مي بارد وهو يكعد..

سكتت مجاوبته ومنو تكدر تفتح حلكها بكلمة مستقوي علينه واحنه لا حول ولا قوة

حسيت برفسه على رجلي صرخت وفزيت من مكاني..كعد مقابيلي،وملامحه تخووف سد حلكي بجف ايده وهو يهمس من بين اسنانه ..لا تصيحين عندي خطار شوفي ولج محد هنا غيرج سوسة البله اكعدي حظري جاي وعشا انتي وهالبهايم بلكي الله واخلص منجن ومن ضيمجن

بلعت ريكي والدموع متجمعه بعيوني ما اعرف شنو احجي لا اكدر ارفض ولا اكدر اقبل من خطاره وشنو هذا انوب يريد يخلص منه الشك لعب بعقلي وبطني لوتني

دزيت امين خطيه يخاف راح جاب جاي واجه سويته وديته اله شفته نفس الشخص الي حظر موت امي

سمعته يخوط بالجاي وبس صوت الاستكان صادر كله... الموضوع الي ناوي عليه تكنسله

باوعت من الشباك انعصر صدري من شفته هذا الرجال جان شاهد على موت امي

ابوي رد عليه بخوف.. شلون اكنسله واني حددت موعد

ضرب قبضة ايدة على الطاوله كمزت من مكاني وابويه فز مرعوب كله بغضب عارم... تكنسله وغصبا عنك هسه لو لموعد باجر مفهوم

ابويه ديحجي هو قاطعه كله بصيغه امر... مفهوووووم .. وشدد على الكلمة

رد ابويه بذلة... مفهوم

عدل كعدنه وهو يرتشف من استكانه ويباوعله من فوك ليجوه كله.. نبدل الموعد ونحدده الي شنو رايك

نهاية البارت... يتبع

كونوا انتم كونوا بخير.. احبكم💔

موش تنسن التصويت خوش 🥺💔

......