رواية #وكر الأشتر الفصل الثالث وأربعون 43 - بقلم الكاتبه سمو العراق

بارت ٤٣
رواية .. وكر الاشتر
بقلمي .. نور سمو العراق

💔💔💔💔💔💔💔💔💔💔💔

لقد تَجاوزنا الأَلف ميل، لنْ تهزِمُنا الخُطوةَ المُتبقية.

...................................................

افيان

عزا اني ابويه شافني من بعيد واني گلبي تحول من اليسرى لليمنى صار ساعه يمين ساعه يسار  عبالك مشغلتله اغنية ساجدة عبيد ظليت ارجف يممه راح انكتل

والله ما بيه حييل كتله بصراحة ابوي يوجع من يكتل كله بصونده عبالك مطايه مو بنات رقيقات

كلت يربي شسووي شسوي وهو اجه هاجم عليه عبالك ثيران مصارعة حتى شكيت بنفسي لابسه احمر

باوعت المصطفى وفتحت عيوني مرعوبه ومدهوشه من وجوده وهو اجه ابوي سحلني من صايتي وهو يصيح .. ولج كح.. ادبسسسز شعندج وياااه احجي لا اذبحج هااا صايره تتمعشكين من وراي دك سوالف صاحبج هذا الساقط

جاوبته واني ابجي واتمسكن .. بووويه انت سندي انت رفعة راسي مليت متت تعبت اني اتهدد كل يوم من هذا اخو نسيبي الكفو ركعته بطابوكة لا افتكيت شسوي يابه شسوي اكتل روحي هاي كل يوم هو هيج كل يوم يهددني ويريد يقتلني لان ضربته براسه

مصطفى باوعلي مصدوم من كلامي وفتح شفايفه راد يحجي بس شيحجي اذا هو اجته تهمه اقوى من الطابوكة النامت براسه

ابوووي باوعله بغضب .. صدك هالكلام

هو رد على ابويه بصدمة ... هاااا ما ادري

جاوبته ودموعي عشره عشره .. ما يخلي كلمة ما يهددني بيه بويه اني مظلومة مظلومة وين اروح متت يعني اطلع على باب الله انرزق يجي يركض وراي ويهدد اذبحج واموتج واطلع الطابوكة من خشمج ترضاها

ابوي باوعله بغضب وهو يكوله ... انت شتريد من بنتي تسكت منها لا اسويها عشاير والله وخلي اخوك هذا الي كل يوم يهددني يلزمك مو بس يوميه فالح هاد عليه

بعدها سحلني حييل وهو يكول .. بت السكط بت العار ما تحجين ليش ساكته ليش ما كلتي يهددني ما فضحتي كدام العالم  بلكي نحصللنه فصل منه

كملت بتمسكن .. شسوي ما اكدر احجي بابا انت تعرف عمدي زبتئن واخاف على سمعتي بس يعرف هيج واحد لاحكني ويتحرش بيه بعد محد تحف وتهلس عندي هم اخاف على شغلي والناس تدور السمعه شسوي سكتت وانلصمت هو هذا الفقير حقه ماكول

ابوي تخبل ظل يغلط على مصطفى ويصيح .. انت ما تستحي انت ما تخجل ما عندك اخوات روح لاخوك يربيك مو بس كادر عليه والله اليوم اسويها عشاير اخابر تحسين وساهر خلي يفصلون ابنهم يتحرش ببنتي نظر عيني

جنت مصدومة من نظر عيني اني شكد جذابه وحيه بس ما اوصل لهنا مال نظر عيني وفلذة كبدي

عفته يتداهر هو وابوي واني انهزمت للبيت لطمت على خدي عززا العزاني صخام الصخمني يبووو جان كتلني ابوي بالشارع تف عليه وعلى الخلفني شلون ما اخذت حذر عزا نسيت عبالي ابوي بعده بسجن

شفت جيهان كاعده على كد حالها مسكينه تقري بأمين شلون معتنيه بيه وحتى هي مو هلكد بالدراسه بس تطلع باليوتيوب تفهم وترجع تقري

غلست ما حجيت الها اي شي عن الي صار وظليت ابوي اجه ينطح وظل يخابر بتحسين انوب ظل يكفر ويغلط هو بصراحة متغيير هالفتره ما اعرف شعنده ولا اعرف شنو يدور براسه غريب صاير مو مثل قبل جان يضرب يغلط هسه متبدل شويه عبالك واحد يقره براسه ابد ممصدكة بيه

تقريبا لليل وما اشوف الا دك الرسايل صار هجوم عليه فتحت الرساله واشوف مصطفى نازل عليه دوسه ونص .. ادبسز ساقطه جذابة انعل ابوج لابو حتى الجابج ولج والله ادا الزمج الا اطلع حليب امج من خشمج يا نعال يا حيوانة بسيطه بسيطة

رديت عليه بغضب ... خااااب هييي هييي شكو هاجم عليه وتفشر احترم نفسك احسن ما اخليك تعرف قدرك وقيمتك يا متستحي يا ابو الملاهي يا ابو النسوان

جاوبني بعصبيه ... هاااا ابو النسوان وانتي شنو ويه لسانج هذا جذابه ولج شلون هيج تحجين عليه كدام ابوج ولج انتي شنوووووو من مله بس احجي انتي شنووو

عاد اني ما تحملت وكتبتله بكل غضب .. وشتريد عيني اكوله هذا المندوب مالتي لو يجي يشتري مني خلطات لو زعلانة منه واجه يصالحني هاااا بله احجيلي شنطي عذر وبعدين تستاهل منو كلك تعال والزم عليه الطريق وبعدين والله الي يجي من ايده الله يزيده

دزلي بصمة وهو يكول بقلب محروگ .. فد اكررررررهج

رديت عليه ببصمة  واني اتمسكن دا اريد ابجي .. لا صافي فدوه مكدر اعيش من دون حبك ... خاب دطييير يكرهني هو اصلا عادي شعور متبادل

رجع كال بهدوء وهو يصبر نفسه .. تمام بعد ما تشوفين وجهي ولا احجي وياج ولا حتى اشتري منج خلطات

رديت عليه برساله .. عادي اصلا عندي قدرة عجيبة بان احولك بحياتي من انسان مهم لمزهريه ما بيها ورد

شاف الرساله وبعد مجاوب بس مبين محترك گلبه مني بس خيولي والله يستاهل يعني الا يسويلي مصيبه يا الله يرتاح خلي يطير اصلا ضميري ميت من زمان ما يشتغل عطلان

.................................

صفاء

جنت كاعد بالمستشفى باليل يم سولين جنت احجي وياها وبعدها عفتها نامت طلعت برا شفت الاشتر واكف وهو يسولف ويه كريم ابن عم ابو سولين

اجيت سلمت عليه و وكفت يمهم هو كريم حجه ويه الاشتر وهو يكوله .. ما اعرف من احاني اتصال منك بسرعه اجيت ردت اعرف شكو

جاوبه الاشتر بتنهيده .. بصراحة اني لازم اادب حارث والي دا اسوي المصلحته حتى ما يضيع فهو عندي ويا ريت تطمن امه واخته اخاف يظلون بقلق

رد عليه كريم وهو يكول .. اي زين تسوي لان فعلا راح يضيع نفسه وامه دزت عليه وحاجتني واني من حجيت وياه ما اهتم الكلامي ولحد الان يخطط ويه ساهر وتحسين

الاشتر بجمود .. ترا تحسين وساهر مو حبا بيه بس هم اعدائي كل شي يسوو ضدي وباجر اخاف يغدرون بيه ويكتلوا مثل سوادي بس تخلص مصلحتهم وياه لذلك خليني اعاقبه وبعدها

كريم بثقه .. ادري بيهم بس هو ما يفهم ما صدك واحد يوكف وياه ويراعي مشاعره غيرهم لهذا السبب هو التجئ الهم وهم الزموا من نقطة ضعفة

الاشتر ... اي وجاسم اخوك جابوه وياهم على الواهس بصراحة وبختهم مقبلت

كريم بضحكة... ههههههه خلي يمكن هذا هم ينرادله كرصة اذن لان هذا معروف بالسوك يبدل بدلات اريدك تتوبه وتگلة وحده مبدل بدلتها مشتكيه عليك

الاشتر ببتسامة ... ها اذا هيج تتدلل راح اتوبه الك ههه

شفت من بعيد من بوابة المستشفى دخلت جيهان وهي شايله بيدها جنطه واغراض انصدمت هاي شنو جايه وحدها و وكريم باوع تجاه ما اباوع

تقربت منه وسلمت وهو اخذ الاغراض من ايدها ويحجي بانزعاج عبالك شي يهمة .. شنو انتي منو جابج

ردت عليه بهدوء ولطف .. ابويه جابني وصلني لباب المستشفى ورجع مكدر يدخل يخاف لا الاشتر يطرده

رد عليها وهو عاقد حواجبه .. اهاا يله عود من ترحين اني اوصلج وافيان ليش ما اجت وياج ؟

ردت عليه.. هااا مو امين عنده امتحان رياضيات واني ما اعرف اقري هي ظلت تقري واني اجيت ويه ابوي

بعدها راحت وكعدت على المصطبات متوتره وتحاول تشتت نظرها وهو اتبعها بنظرات ملهوفه تدل على حبه الها

زين اذا هو هيج يحبها وهي اعترفت تحبه ليش هو يصيحلها عمو وهي كذلك شنو القضيه هو صح مبين كبير عليها بس اذا يحبها يحاول يغير من الكلمة

تنهدت بحيره وطردتها من تفكيري خطيه ان شاء الله الله يجمعها وياه لان تستاهل وتحبه واهم شي راحتها ابد مو اناني بحبها وتمنالها الخير

بعدها اجت وهي تكول .. اشتر هاي ملابس جبتها السولين وهماتين سويتلها اكلات تحبها يعني شي بسيط

اخذنه منها وهو يرد عليها.. شكرا ما قصرتي

هزت راسها بنفي... لا لتحجي هيج هاي اختي يعني اني ممسويه شي الها واني اصلا مقصره بحقها واتمنى اشوفها وادخل يمها واكعد اسولف وياها اشوفها شلون صارت

تنهد وهو يبلل شفايفه كلها .. ان شاء الله تشوفيها بس اريدها تتحسن لان اخاف عليها اخاف الرئة تنثقب وهي مكسور ضلعها ان شاء الله بس تتحسن كلكم تدخلون تسوفوها

بجت بسرعه عبالك دموعها محضرتهم شبسرعه وكعن ادري شنو محضرتهن جنهن خرز

تقرب منها كريم وهو يكولها يله ابوج اجه خابرني خليني اوصلكم

خلت وراحت وياه طلعت وياهم وفعلا جان ابوها موجود نفخت بضجر وعفتهم ورحت دخلت جوه

رحنه اني والاشتر دخلنه على سوليين شفناها كاعده باوعتلها جانت صامته صامته بطريقه مرعبه

لا تبجي ولا تحجي ما تفضفض شنو بداخلها حتى من سألناها على حالها مجاوبت بعيونها برود مثل الجليد وهذا الشي بين ان هي متحطمة.. متحمطة تماما

حجه وياها الاشتر وهو يلزم ايدها كلها برجاء .. سولين احجي شبيج بيج شي اروح اصيح الدكتور

باوعتله بنظرات فارغه ما تدل غير على تعبها والمها ودارت وجهها منه وهي تكتم عبرتها سحبت اديها منه بهدوء وشدت بيدها على السديه وتداري بروحها مثل الطير المذبوح

حالتها تخوف مو قانونيه شبيها البنيه رغم الصار جانت تحجي وتسولف وحتى مرات تتعارك ومن اجي يمها تشكيلي وتطلب مني هسه ماكو مثل الميت وفاتح عيونه ومنعرف شنو البيها

وكف وهو متوتر باوعلي وهو يكول .. روح صفاء صيحلي الدكتور بسرعه اريد اعرف شبيها ليش هيج حتى كلمة وحده مجاي تنطق شبيها شصاير وياها

رحت بسرعه وكضت صحت على الدكتور واجه هو وياي حجه وياه الاشتر بخوف وتوتر .. بس دكتور بلا زحمة شبيها ليش هيج حالتها ليش ابد مجاي تحجي وبس صافنه صاير وياها شي داخل عليها شخص

جاوبه الدكتور بنفي... لا ابد محد داخل عليها واني موصي الممرضات عليها محد دخل عندها بس احتمال حالتها النفسيه تعبت بسبب دخولها المستشفى وحالتها الصحية ان شاء الله ما بيها شي تتحسن لا تخاف عليها

صمت يواني وبعدها حجه بقلق .. ما اعرف حالتها ممطمنتني ياريت لو تكلي شبيها او ممكن اشوفلي دكتور نفسي

جاوبه الدكتور .. راح انطيها ابره وعلاج ضد الكابه لان تكأبت بسبب الي صار وياها

الاشتر بنفي ... لا لا ما اريدها تاخذ هواي علاج لان يقلل عندها المناعه اذا شي نفسي اكدر احجي وياها واحله بس اريد اعرف سبب الي وصل حالتها لهنا يعني هي الصبح مجان بيها شي منو الغيرها فجأة

تنهد الدكتور وهو يرد عليه .. كتلك حالتها الصحيه سببت عندها كأبه فجأة الله يشافيها

هو باوعلها بحيره وضياع وتنهد والدكتور طلع واني ظليت وياه بعدها نامت وهي حزينه مكسوره لأبعد حد

الاشتر باوعلي كال بضياع ..تصرفاتها وضعفها وضياعها يحرگ گلبي ويدميه الي يشوفها يكول حيه شرسه بس اني اشوفها بزونه ناعمه

هشاشتها صراخها عنفها كل شي بيها يثيرني بس جمودها وبرودها ياذيني ما احب اشوفها بهيج حاله اتخبل احس راح افقدها من تتعصب تضرب تفلش ارتاح حتى لو تغلط وتسب وتتجاوز بس من تصير بحالة سكون لا اخاف عليها اخاف افقدها

باوعتله بأسف.. تعبت البنيه حييل تعبت وبصراحة هي ناويه على الفراگ بس تعرف انت متعوفها بحالها ولا تتخلى عنها بسهوله وتريد الحل حتى تتركها

باوعلها وهي نايمة .. ادري بيها هي تكهرهني وما تحبني وصح اني تجبرت وتسلطت عليها وتعتبرني سبب بمعناتها وتغيير حياتها بس اني مو هيج كل شي سويته المصلحتها لان ابوها راد يزوجها لاتعس خلق الله على الاقل اني احبها وحاولت اعدل من الي صار واعدل حياتها بس هي ما انطت مجال

سكتت مجاوبته وخليت وطلعت تاركها وياه لوحدهم لان شفته متضايق من وجودي

واني بصراحة حجيت الحقيقه اله حجيت عن المها منه عن جزعها وكرها المدفون اله هي متريده متحبه تريد تطلع من حياته بكل صوره بس هو ممنطيها مجال

........................

سولين

من بعد ما عرفت بحالتي وعرفت برجلي صارت عايبه وما اكدر امشي واعرج احس طلقه نبتت بصدري حتى ما حجيت شي وصرت عبالك بدوامة

اني من النوع الي احب نفسي احب اهتم بروحي اطول اضافري شعري جسمي اريد كل شي حلو حتى مرات اذا سن من اسناني انزف اتخبل اروح للدكتور احشي وافرش اسناني واهتم بادق التفاصيل ما احب افقد اي شي من حالي

تخبلت من كال صارت عرجة يعني امشي ومشيتي مو صحيحة والعالم تتنمر عليه وبعيدا عن العالم اني احس انكسرت فقدت شي من روحي

بجيت بصمت على روحي بجيت بوجع طاغي على معاناتي ضلعي مكسور رجلي مكسوره اني شصار بيه ليش هيج صار وياي

والي فهمته من الدكتور مو رجلي المكسوره هي الي راح اعرج بيها لا رجلي الثاني لان ماثر عليها العمود الفقري وكسر الفقرات وطول العمر هيج اظل يصيحون عليه العرجة

جانوا يدخلون الاطباء وهو دخل ما احس بوجودهم وحتى يحجون ويتناقشون ما اسمع كلامهم ولا افهم شنو يحجون جنت متقوقعه بيني وبين نفسي بعيده عنهم حتى صفاء حجه ويايه ما جنت اسمعه جنت بعيده عنه وبالي ابد مو وياه احس روحي بغير عالم

حسيت بيه دخل ما باوعلته ولا شفت وجهه حسيت بيه يمسح على شعري وهو ضايع ما يعرف الطريق السعادتي ولا يعرف شلون يواسيني

حجه بصوت هامس وهو يكول .. ادري بيج تعبتي وصار هواي الج بالمستشفى وحقج تنتكس حالتج بس ان شاء الله اليوم كلتلهم يطلعونج واكيد علاجج تكملي بالبيت

مجاوبته ولا حتى باوعت بوجهه

تقرب مني اكثر وكعد على طرف الجربايه رفع راسي بيده وباسني بهدوء بطرف شفتي وهو منتظر ردة فعلي

ما بدرت اي ردة فعل وعيوني مركزة بفراغ واحد قبض على ايده وضرب السديه بغضب وهو يكول .. سوليين لا تعذبيني احجي كولي اضربي اغلطي بستج انتي مو تكرهيني يله ثوري عليه تخبلي سوي اي شي بس لا تظلين هادئة اتخبل من هدوئج

باوعتله بطرف عيني والدمعة مشكلة باهدابي جاوبته بضحة مستهزئة.. صرت عرجة

رمش بعيونه ولانت ملامحة تنهد بضيق وهو يرد عليه .. شنو هالكلام منو كلج منين سمعتي

صديت عنه وجاوبته .. مو مهم المهم عرفت

رد بسرعه عليه ولهفه ... لا ماكو هيج كلام وانتي ما بيج شي ورجلج ما بيها شي

رديت عليه .. اتمنى

لزم اديه بحسره وهو يبوس بيهن كال ... احببج والله مستحييل اخليج هيج مستحييل كل شي راح ينحل صدكيني

باوعتله بحده .. اذا تريد تحل شي طلكني

بلل شفايفه وهو يتنهد كال .. زين افهمي وبعدين اطلكج

هزيت راسي بنفي وبنفاذ الصبر .. لو مو تبرر لو شيصير ما اقبل اني ما اريد ما اريدك تعرف شنو ما اريدك انت غامض انت ما اعرف شنو عنك وعن اهلك اني اريد اعيش الروحي تعبت منك تعبت من كل شي

واذا تحبني طلكني وخليني اعييش حياتي بعيده عنك وعن كل شي صار بينه ما اريدك

عض شفته وهو يصبر نفسه .. تمام مثل ما تردين ان شاء الله اطلكج بس اصبريلي

صفنت بوجهه واني اشوفه جذاب ما يطلكني لو مو مريضه جان عرف شلون يجازيني على كلامي كتله .. جذاب

رد عليه بعنف وهو يكول .. لو ما مريضه جان عرفت شلون افرك حلكج جذاب شنو

باوعتله بحسره كتله ... اذا رجعتني لبيتك راح اكسر ضلوعي كلها

اخترقني بنطرات حاده وهو يكول .. اهااا تفضلين تعيشين عند ابوج وما تعيشين عندي اذا اني سلمتها لابوج ابوج قتلها

غمضت عيوني بهدوء ورديت عليه .. لو بيدي ما اعيش عند اي واحد منكم اعيش بس ويه اخواتي

رد عليه .. تمام روحي عند اهلج بس صدكيني مراح اطلكج وابوج اذا مس منج شعرة ادفنه بأساس البيت تمام مثل متردين

مسحت شفايفي بطرف اصبعي واحس من كد ما كاتمة بگلبي راح انفجر وكلبي يرجف والدمعه وكعت من دون سابق انذار

مسح على شعري وباس راسي وهو يكول .. الملك يريد يفاركني بس يله يهوون ميخالف تصيرين زينه ونحجي كل شي

رفعني من صدري وهو يعدل نومتي وغطاني وباسني بضلعي المكسور بهدوء وطلع جنت حيل هادئة وما بدرت مني اي ردة فعل

ونمت والدمعة بعيني انذكر امي وكل تفاصيلها مشتاقتلها منو ياخذني القبرها ويريح گلبي

.............................

جيهان

جنت كاعده يم افيان بعد ما رجعت من سولين هو كريم رجعنه جنت صافنه وافكر بسولين ولا وحده منه شافتها ولا دخلت عليها بس كون الاشتر يكولها اخواتج يجنج وما عايفاتج والله مقهوره عليها كلبي يرجف بس لا بيهل شي وما يحجون

فافي نايمة ورجليها وحده فوك الثانيه وتطكطك بالموبايل صحت عليها بغضب .. هييي انتي طفي الموبايل لا يجي ابوي ويفلشه على راسج

ردت عليه بعدم اهتمام.. يمعوده ابوج دايح مدري وين يفتر ويه ساهر مدري تحسين عود من اسمع طكطكة بالباب اضمه بصدري

هزيت راسي بنفي.. لا عمو كريم يكول لتخلي بصدرج مو زين

ضحكت وهي تكول .. هههه عمج والله ساقط يحب الصدر جا شبي الفخذ

ضربتها بغضب .. ولج استحي شكد منحطه والله بس تطلع سولين من المستشفى اخليها تربيج

ضحكت وهي تكول .. ولج الفخذ اقصد على دجاجة مو عليج لا تفهميني غلط بالعكس عمج اخلاق وادب يأمر بالمعروف وينهي على المنكر

باوعتلها بقرف وبطرف عيني عزا البنيه حتصيع من عدنا نازله على الترابي اخلاقها تبرت منها

كمزت وهي تكول ... عمج اتصل عمج اتصل يله ولج حاجي سوي روحج زعلانه وتردين تبجين لان ضلمج ورزلج وغلط عليج

دفعت ايدها وجاوبتها .. امشي ولي ولج والله ولا اجاوبه اخاف يمه هو اني هيج واحس كلبي راح يطير وانجلط

فتحت خط وهو يكول الو الووو وهي تاشرلي اجابه وشمرت الموبايل وطفرت

لزمت الموبايل ورديت بعد ما حطيت شالي حاجب بيني وبين شفايفي واني احجي وارجف .. ااا الوو

رد عليه وهو يكول .. الوو اتصلت عليج مرتين مجاوبتي عرفت لحد الان زعلانة مني بس بصراحة مجان قصدي اتصرف هيج واصيح عليج جدا اعتذر

جاوبته بلبكة ... لا لاعادي مصار شي واني همات اسفه لان شويه لحيت وانت من حقك تنزعج همات شغلك متعب

كال .. شسمج

صفنت ... هااااا ليش

رد عليه .. لا هيج مجرد سؤال

ابتسمت .. اعتقد موجود بالبايو مووو ؟

ضحك وهو يكول .. اي صح نسيت جنى حلقبج جيجي !

فتحت عيوني مصدومة ... هااااا ليش جيجي

رد عليه بسرعة .. ليش معاجبج ؟

هزيت راسي بنفي .. لا عاجبني بس هيج حبيت اسال بس يعني صديقاتي يدلعوني جنونه

ضحك .. اي وابوج شيدلعج مبينه تموتين على ابوج

رديت عليه بفشلة ياربي ما اعرف اجذب .. ها اي صح اكو واحد ميحب ابو

كمل كلامة وهو يكول .. شفت البايو هوايه مبينه متعلقه بيه

هزيت راسي بقبول .. اي صح

كال .. انتي جنتي تركضين

ابتسمت .. لا ليش

رد عليه ... احس نفسج عالي حييل عبالك جنتي تركضين

ابتسمت بخجل .. سيدي لااا بس شويه مرتبكة

رغم كل شي جنت احس صوته بيه شويه نوع من الغرور بس ما اعرف هو ليش اتصل وكعد يحجي ويايه وضجت بنفس الوقت يعني هو يمكن ميحبني عادي يحجي ويه بنيه

كمل كلامة وهو يكول .. اي احجيلي وين بيتكم شنو قسمج يا مرحلة بيا جامعه

ارتبكت وانصدمت .. ياربي كل شي ما اعرف والله كل شي ما اعرف ظليت امتمت جاوبته ... ها اي اني مرحلة ثانية قسم كهرباء بيتنا بالموصل

رد عليه .. كهرباء قصدج هندسة كهرباء

كال ... اهااا قصدج هندسة كهرباء ما شاء الله جيجي مهندسه طلعتي

صفنت بخوف .. هااا لا تكول جيجي كول جنى احلى

رد عليه بغرور.. جنى جنى مثل متردين يالمهندسة

ابتسمت .. ههه تمام شكرا

كال .. يله اني تعبان اريد انام غير مره اتصل بيج

رديت عليه .. تمام اخذ راحتك

جاوبتي .. تصبحين على خير

سديت الخط وارجف اديه ترجف واحس وجهي نار ركضت للمرايه واباوع الوجهي ضحكت يمه صايره دم حمرررره وهسه ايقنت بجملة صرت حمره من الخجل فعلا صرت حمره من الخجل

بس شلون اني والله خايفه اخاف يعرفني وانوب اخاف يتعلق بجنى وينصدم من يعرف اني يبووو يطركاعه فافي ذابحتني ذبح بسوالفها شلون بيه

اجت افيان كالت .. ها بشري شكال ما كال عمج الشريف العفيف

ابتسمت .. لج شكال هو اني من الخوف انذكر شحجيت ضليت اخيط واخربط بالكلام وارجف حتى هو حس بيه وكال شنو جنتي تركضين نفسج عالي

ردت بسخرية .. جا اذا باسج شلون تموتين اذا نام وياج تنجلطين

كفختها على راسها بغضب .. ولج زماله انتي والله طالعه من الطريق شنو ينام شنو يبوس شبيج خبله انتي منحطه ادبسز

ردت بانزعاج .. اوووي شدخلني لعد من يتزوجج شيسويلج يدغدغج وهاا من هسه اذا صرتي حامل الجهال الي اني اربيهم

جاوبتها بقرف ... اي حتى الكاهم دايحين بالشوارع وكلهم يشربون عرك

ظلت تضحك هي واني خليت وكعدت كلتلها .. اكولج احس صوته بيه غرور وكوه يحجي مدري شنو جنه منعس مدري شنو

ردت عليه .. مو مثل مصطفى كل ما احجي وياه وتكب العيطه وتبدي الرزايل والعرك زعلان عشتو طبه مرض هو العايل مو اني

رديت عليها .. انتي تعيلين ببليس يا مو انتي

عفتها تضحك ومطلعه اغنية جديده تمثل حالها عشتو مظلومة صحت بصوت محد سمعني

وكل شويه وكالت مسويه روحها تبجي ... مظلومة سوده عليه فافي تمثلج هاي الاغنية يالمظلومة يالفقيره

غميتها ورحت متسودنه كولش

.......................

جاسم

جنه كاعدين بنفس المكان بعدها اجو نفسهم ذول المعضلين اخذونه بمكان ما نعرف وين ومن وصلنه نزلونه من السياره و دخلونه بمكان مثل المقر اني ما خلوني ادخل ودخلو بس حارث

جنت اصيح واحجي هم ابد ما اذونه بعدها كال واحد منهم .. تعال ادخل شكد تصييح

دخلت باوعتله انصدمت شفته لابس ملابس كلها سود والقلم لازمة بين اصابعه ووكاعد على كرسي وكدامة مكتب ويحرك بروحة بالكرسي يمنى ويسرى

باوعلي وهو يكول ... هلا بجاسم شرفتنا

فتحت عيوني مصدوم ومدهوش ... اوووه هذا منو زوج سولين بس ليش اخذ حارث وشنو الي صار وشيشتغل شو عجيب غريب شلون هاي الناس كلها تشتغل عنده وذول اهل العضلات والزنود شنو منين يوكلهم ينرادلهم روانب مو راتب

بلعت ريكي مصدوم وجاوبته بفهاوه ... هلا بيك

اشرلي بطرف القلم وهو يكول .. تفضل ابو محمد اكعد ولا تصيح ولا تتعب نفسك ماكو شي مجرد توبيخ الحارث والمصلحته طبعا

ظليت صافن يا مصلحته يا نعل هو غير اخذونه سحل وحارث لحد الان دايخ من الضربه

صاح على هذا الزندة جنه صينيه وهو يكوله ... كزاره جيب جايات للشباب

جاوبه بطاعه .. تامر استاذ

وكف وهو بمشي بهدوء و وكف بصف حارث وحط ايده على جتفه وهو يكول .. شلونه ابو الحوارث صاير يشتغل ضدي ويه عدوي ولاااا رايح الممرضه وراشيها حتى شنو تخرب بيني وبين زوجتي

رجع باوعلي وهو يكول ببراءة.. تقبلها جاسم

جاوبته بنفي .. لا ما اقبلها اكيد بس شعجب حارث مو من طبعه هيج يسوي

باوع الحارث بطرف عينه وهو يكول بغرور .. حارث من النوع الي بسرعه ينضحك عليه وعباله ساهر وتحسين يحبوا ويسون كل شي المصلحته وهو ما يعرف مصلحتهم فوق الجميع وهذا شعارهم

حارث هز راسه بنفي.. ما عندي شي وياهم

نزل راسه عليه وهو يكول بهمس ... صدكتك بس اتفقت تخرب بيني وبين زوجتي وتلفق سيناريو كاذب على لساني وكذلك تسحب معلومات ضدي للخونه

رجع باوعلي وهو يكول بحيره .. ترضاها جاسم ترضاها هيج يورط نفسه ويه ناس محرمين ما همهم غير القتل وهدر الدم

باوعت الحارث بعصبيه ..انت شنو متكلي ما تخاف على امك على اختك انت شنو من مله شتعرف من الناس وتركض وراهم يمعود خيولون لا تورط روحك خطيه امك

نزل راسه وهو يتنهد بحسره كال .. تمام راح اكطع علاقتي بيهم

دخل ابو زنود وانطانه الجاي والاشتر كاعد على طرف القنفه الي بصف حارث واخذ الجاي وهو يخوطه ويكول ... ايييي عاشت ايدك كزاره تكدر تتفضل

طلع كزاره الي وجوده يسد النفس لان يسحب الهوا كله ما يخلي اوكسجينه وحده

حجه حارث بهدوء من دون ما يشرب الجاي وهو يكول .. هي متريدك هي تريدني حتى كتبتلي رساله بس ما وصلت الي ما وصلت بالوقت الصح جان عرفت شلون اتصرف صح

وكف الاشتر وهو يباوعله ... يا رساله تقصد و شوكت كتبتلك

وكف حارث كدامة وهو يكوله .. اني اكلك شوكت من خطبتها وما قبلت بيك هي رسلتلي الرساله يعني هي على ذمتك واني كلش فرحان برسالتها ونخوتها بيه بس شسوي كل شي صار ضدي

سحبه من ياخة قميصه وهو يسحلة ... احترم نفسك ولا تظل تخربط بكلامك مفهوووم لا تعرف شلون اطيح حظك وخليني محترمك

رد عليه .. والله ممخربط بكلامي مرتك دزتلي رساله وهي على ذمتك بس قبل لا تتزوجك

جاوبه بحده ... وينها انطينياها

حارث بتنهيده .. كتلك ما وصلت الي والرساله عند كوثر اخت جاسم

جاسم .. فتحت عيوني مصدوم معقوله .. معقوله يعني اكو رساله عند كوثر لو هذا ظل يخربط كولة الاشتر

باوعلي الاشتر وهو يكول ... جاسم اذا متجين الرساله من اختك انسى حارث ولا تلعب بذيلك لا منا ولا منا لان متعرفني زين

باوعت الحارث مدهوش وحارث قابلني بنفس النظرات رديت عليه .. واني شعرفني ما تختي شمرت الرساله

رد عليه بجمود .. استفسرلي منها ولا تحجي عن اي شي يخص حارث تفاديا لسلامتة

سكتت مجاوبته والله هذا مو امان ولا جماعته امان ودخلونه من زاغور الزاغور ضيعوا كل شي علينا

صاح على واحد من ربعه وبعدها خله وطلع اخذونه ثنينه اني وصلوني لباب بيتنا وحارث ما عرفت وين اخذوه والاي مكان راح

الله يطيح حظك يا حارث شسويت لو لاصم حلكك وساكت مو احس اني اخيط وهو يفتك شكد مطي

........................

افيان جنت احف بالنسوان واندك الباب طردتهن ورحت فتحته يبوو شفته نسيبي عزا هسه يكول هاي شكد طماعة حتى نص اليل تحف تكرف كرف بالفلوس

رحبت بيه بحماس.. هلا والله هلا بنسيبي الكفو اهلا وسهلا بيتنا جان اظلم وهسه صار ضاوي ونور على المنطقه

ابتسم بهدوء وهو يكول .. تسلمين عامر موجود

جاوبته .. يطك منخر ويشخر هسه اكعده الك

رد عليه .. لا اني اكعدي اخاف يضربج هذا مخبل

دخل جوه وكعد ابوي بصوت واحد ومن دون ما يلمسه صاااح ..... عاااااااااااامر اكعد

كعد ابوي وهو يرجف ... هااا هااا منو شكو والعباس كل شي ممسوي وحتى ساهر وتحسين كطعت علاقتي بيهم

سحبه من دشداشته و وكفه كله .. هاي الكلاوات مال عفت ساعر وتحسين خليهن على صفحه و روح اسبح وغسل وتعال عندي موضوع وياك

جاوبه بقلق .. يعني ضروري اسبح

الاشتر بنص عين .. اي ضروري قابل شبي السبح يكهرب دروح يله

ابوي خله وراح بسرعه يركض خايف منه وتلوموني ليش احب نسيبي عمي غير كفوو غير صكار عامر ابوي ما يخاف غير من نسيبي

خليت ورحت طلعت خليته ياخذ راحته سمعته وهو يتصل ويحجي كال ... عايد اريدك تعرفني على الشباب اصدقاء زياد وجياد ولد تحسين بس من غير ما يحسون ولد تحسين يعني بس ذولاك دوش وذاك مدري شسمه كلهم هذا تاجر سلاح ويشتري منكم اريد اشتري منهم سلاح اكثر من ساهر اريد يأمنون بيه حتى. بعدين نشوفلهم حل

قفل الخط ورجع دز بصمة هالمره مو اتصال وهو يكول .. شنو وين صارت الرساله منتظرها على نار

شويه وطلع ابويه من الحمام وهو ينشف بشعره بالخاولي ولابس نفس الدشداشة باوعلي بقرف وهو يكول .. امشي امششي منا عاب هالشكل وبلا

خليت ورحت وبعدها رجعت اريد اشوف شنو الموضوع نسيبي حبيبي شيريد من ابوي اوي فدوه معقوله هذا اخو صافي

صافي زعلان زعلان الاسمر ما يگلي مرحبا وما رايد اصلا غير كلمة مرحبا اوووي طبه مرض شدخلني

سمعت نسيبي وهو يكول الابويه .. باجر الصبح سولين تطلع من المستشفى البنيه حالتها النفسية زفت وحالتها على كدها وحابه تكعد هنا اخواتها يدارنها اذا سمعت بيك هيج خاطف على خشمها ما تلوم الا روحك يعني سولين اذا اجتها من الله اريدها منك

جاوبه ابوي بضحكة متوتره ... اهلا وسهلا بيها عمت عيني عليها بنيتي احطها بعيوني ادللها دلال ما توصيني عليها

باوعله بقرف و وكف كال بملل.. يله اني رايح وما اوصي لان تعرف الي يجرالك حتى بالكلام ما تزعجها صحتها على كدها ومزاجها متقلب فراعي شعورها واسكت منها حتى لو تدوس بمصارينكم

ابوي بجدية ولو هو جذاب ....لا شلون صدك جذب خليها تدوس على راسنا شعدنه غيرها نحبل نجيب

هو رجع باوعله بقرف من جذبه وكله .. سويلي طريق اريد اطلع

اني خليت وانهزمت وهو طلع اباوعله من بعيد وفرحانه باجر نشوف اختي باجر نلتقي بيها بعد رحلة مرضها حبيبتي

بجيت عليها بحسره وكعدت جيهان كلتلها وطلت تبجي وكعدت تنظف باليل وغسلت فراشات كالت حتى خاف تجي تلكه كل شي نظيف

جنه فرحانين لان حتطلع من المستشفى عبالك عدنه عيد سوينه كل شي لليل وحتى ما كدرنا ننام نريد بس نشوفها

....................

سوليين

بعد ما سجلو الي خروج هو اني لحد الان مريضه بس اختنكت وهو كال احسن حل اخليج يم اخواتج فتره ترتاحين بطران الا اتطلك واشوف منو يمشي كلامة

اني مجنت اكدر امشي فهو شالني وخلاني بعربانة المقعدين تنهدت على حالي احس العبرات متراكمة بحنجرتي وما اكدر اطلعها ولا اكدر ابلعهن

باوع باسف على حالي وهو يكول .. شنو هاي وتشيلج جا اني وين صرت

رفعني منها وشالني جنت تعبانه لا حول ولا قوه ومستسلمة بكل جوارحي بجيت بصمت ومن دون ما يحس بيه ولو هو شلون ما يحس هو يحس بيه حتى من ارمش

نزلني هو وصفاء وخلاني بالصدر وربط عليه حزام الامان وهو يكول لاخو ... صفاوي حبيبي اعذرني كعدت مرتي بالصدر تعرف بالحال انت

رد عليه صفاء بضحكة .. ههههه لا يابه عسا ما اكعد بالصندوك المهم راحتك

ابتسم عليه ورجع كعد يسوق لزم ايدي وهو يتنهد درت وجهي منه مغبونه ومقهوره عنده رغبه بالبكاء وسيطرت عليه الكآبة

وصلت للبيت شفت بيتنا متغيير عن قبل جان نكره مثل القبر وهسه بنيان جديد صح بس طابوك بس احسن من قبل بهواي

نزلني هو وشالني وصفاء دك الباب فتحت الباب فافي وهي تبجي وتصرخ عبالك شلون امي من ماتت

من شفتها هي تبجي انرعبت ظليت ابجي وهو ضمني الصدره ويسكت بيه ... حبيبي كافي مو زين عليج لا تبجين تاذين ضلعج ترا اخذج وياي

سكتت واحس روحي تريد اخواتي واخوي هو مقبل يدخلن عليه لان ظلن يبجن وهن وعدنه ما يبجن وبس يشوفني

جانن فارشات الي دوشك جديد بس هو ما قابل وجايب جربايه طبيه شلون بالمستشفى تنرفع وتصير كعده لان مرات ما اكدر اكعد فبس تنداس الدكمة تنرفع موجوده بس بالمستشفيات الخاصه بالكسور بس هو ما يصعب عليه شي وجابه

دخلن عليه وهن يبوسن بيه واخويه اموني بجاني حييل بحيث صرت اشهك يبجي ويبوس برجلي حييل اذاني موقفه

والاشتر شاله وباسه بخده واني رفعت ايدي ودموعي مثل المطر كتله .. جيبه عندي

قربه مني حضنته وابوس بيه وهو يبوس بكل وجع بيه خبلني هذا الطفل شلون حنين عليه

اذكر من جان صغير يغني ماما ردي عليه بابا رد علية ماما ردي جيجي ردي اغنيه حلوه جانت مال اطفال

يكمل الاغنيه كلها واني اجاوبه واغني ...حبيبي اموني الغالي لا تحزن لا
تبالي سامحنا فـ الكل مشغول لكنك ستجد الحلول

بست ايده وظليت حاضنته واشم بيه اخوي الوحيد طفل مظلوم عاش بنص القهر وتيتم من امي وتحمل جشع ابوي

وجيهان وافيان يبوسن باديه ومحتارات يشيسون اليه بس ابوي ما شفته ولا اريد اشوفه كارهته حييل كارهته

هو قبل لا يروح باس جبيني وانطاني فلوس وكال .. امرلج ان شاء الله كل يوم

طلع من عندي وصفاء كذلك تحمدلي بالسلامة وكال اجيج والله وشتردين بس خابري واي شي اني اجيبه الج

تشكرت منه وهم خلوا وطلعوا للعصر اجه ابوي لا دخل ولا اجاني ولا سال عني واني اصلا ما اريده كلت الفافي تسد الباب

شويه واجت فافي كالت .. طلع ما يجي بعد هو و١٢

ظلت تسولف عليه وتحجي وجيهان كذلك تشكي منها ما جنت اكدر اضحك بس سوالفهن تضحك

اندك الباب وراحت جيجي تفتحه ما اشوف الا دخلت درت راسي واني اباوع للباب واشوفها دخلت بكامل اناقتها وهي تكول ... الحمدلله على السلامة سمعت بيج واجيت شفتي شكد احبج

نهاية البارت ..يتبع

كونوا انتم كونوا بخير .. احبكم 💔

نور سمو العراق

موش تنسن التصويت راحت عيوني واني اكتب🤭💔🌚