رواية #وكر الأشتر الفصل السابع 7 - بقلم الكاتبه سمو العراق

البارت السابع
رواية.. وكر الاشتر
بقلمي.. نور سمو العراق

💔💔💔💔💔💔💔💔💔💔💔

"‏تبكي لأن كل الأيام
تفرُّ مِن بين يديك

والعمر يفرّ
والحب والرفاق

وكل شيءٍ فيك
يذهب ولا يعود
أبدًا."

- هاجر الصباغ.

....................................

انذهلت من كلامهم المعلن مفهمت شنو المقصود جان عقلي مشوش والأدهى من هيج هم يحجون الغاز وحجيهم مبطن

تعبت اريد افهم هذا صديقه شيحجي وشنو الي يكنسله وشنو الموعد الي حتحدد من جديد

تقربت اكثر واني اريد افهم بعد ما نطق الطرف الثاني اخر جمله ابويه استبشرت ملامحه وعبالك دخله للجنه وكف من صدمته كله.. صدك يعني انت تريد القرب مني معقوله لو اني جاي احلم

رد عليه بثقه وهدوء... ليش منصدم وممصدك قابل اجذب عليك مثلا

ابويه جاوبه.. لا بس اني لان غسلت عا

بعده ممكمل كلامه واتصل موبايله اشر لابويه يسكت وكطع كلامه ظل يستمع للمكالمة تقريبا تلث دقايق من دون ما ينطق بحرف

بعدها رد ببرود ممزوج بخبث... اوك لا تتفلسف على فاضي

اردف باستهزاء... لا يابه فدوه لا تهجم بيتي

بعدها كمل بشراسه.. انت تحمد ربك لحد الان ساكت عنك !! وهااا انتبه لحد الان يعني وراك مشوار طويل وياي

قفل الخط وهو يشرب استكان الجاي دفعه وحده باوع لابوي بعدم رضا.. بارد

جاوبه بقلق.. غير انت صار ساعه تسولف اكيد يبرد يله هسه اخلي البنات يسون جديد

رد عليه بسرعه.. عوفه لتزعجهن ما اريد

بعدها ركز بتجاهي اني جنت اباوع من الباب جان كال لابويه... احس اكو شخص خارج الاستقبال

ابويه بضحكة متوتره...محد بس البنات ورجعن نامن نامت عليهن طابوكة

هو من كال هيج واني اطكها بركضه للغرفه وانام بسرعه كالت افيان بحده.. شوكت تبطلين تتسمعين على سوالف ابوج التافهه

تنهدت واني اكل بشفايفي... لا جنت اريد اسمع اذا جابوا موضوع امي او لا جنت اريد خبر عن امي لهذا السبب استمعت لأطراف حديثم اريد اعرف ليش ابويه قتل امي شنو السبب

باوعتلي بحده كالت... كافي سولين اصحي على نفسج لا يلمحج ابوي ويذبحج وره امي ما بينا حيل للمصايب بعد رواحنا خلصانه

باوعت شفت جيهان نايمه خطيه نامت من دون عشا وضعفااانه وجهها صاير جلد وعظم وحيل متغيره غطيتها ورجعت كعدت يم افيان

حاولت اتقرب منها واصحح علاقتي بيها كلتلها.. هذا الرجال هو شاهد على موت امي وشهد على جريمة ابوي ويعرف السبب

عقدت حواجبها وردت عليه.. يعني نفس ابويه نفس التعاسه

هزيت راسي بقبول.. اكيد نفس التعاسه بس ابويه يخاف منه وما يرفض اوامره عجيب هذا الشخص مطيح حظ ابوي رغم ابوي اناني وحاقد وميحترم

ردت عليه.. اييي بلكي الله ويطيح حظه ويخلصنه منه

عدلت كعدتي.. اكولج ديكول لابويه تكنسل الموضوع شنو الموضوع مفهمت انوب يكوله حول الموضوع اليه شنو ذول شاربين لو شنو ايييع

جانت تكرط بأظافرها كالت بتفكير.. انتي انتبهتي الشغله ابويه روحة ميحترمها وبخيل هاي اول مره يصرف على خطار يجيه بحيث دز جاي مصدومة بصراحة

عقدت حواجبي بتفكير... اي والله شلون فاتتني هذا شنو سره وليش ابويه يتكهرب منه ويخاف عصابه شنوو؟ هو شكله مال عصابه

اردفت بحماس.. بس تدرين الجاي مالته برد وشربه ورزل بابا جان بابا كله اروح اخلي لبنات يحمنه هو مقبل كله لا تزعجهن

ردت بسخريه..زين والله يفكر بينه

هزيت ايدي... لا بشرفج دخلي يطير ابوج وصديقه اثنينهم مو أمان واني هذا الشخص حيل خايفه منه وعلى شنو يخططون ما اعرف

سمعنه اصواتهم وهم ديطلعون باوعت اني وافيان من الشباك شفناهم هو جان لابس بالطو طويل اسود ولفاف اسود وابيض وقميص ابيض وبنطرون اسود والجو بااااارد يموت برد بحيث هو يحجي والدخان يطلع من بين شفايفه وعاكس عليه بس ضوه گلوب الحوش

سأله ابويه بترقب كله... انت شعرفك بسالفة ابو سعدون واجيت هاجم عليه

رد عليه ابويه بثقه مصحوبه بغرور.. لا تنسى ااني ظلك والطير الطاير اذا طيرته اعرفه وين يحط لذلك لا تلعب من وراي

جاوبه.. بس ذن راجعات الي

رفع اصبعه وهو يهدده بهدوء تام.. حلگك تفتحه وياي بس وقت الاكل بس بغير موضوع متناقش مفهوم ؟

هز راسه بقبول ونزل راسه للارض وهو يفرك بلحيته والحسره بداخله شفته مذلول وما راضي عن رزايله لمستمره اله

واحس بانتعاش بروحي اي الحمدلله اجه من يذله بس هم نفس الطينه شنو الفايده ناس اتعس من ناس

بعدها اشر لابويه بطرف جكارته.. سنك وين ؟

جاوبه ابويه بقهر .. هذا ابن عمي العار كريم ضربني بوكس وكع نص سني

عقد حواجبه باستغراب.. ليش ضربك؟

عامر بحقد.. بعد ليش واحد مستهتر عود هو مهندس متفجرات وشايف روحه على العالم بس بسيطة اني اله ...ما تورطه بفد شغله وتزحلكة

باوعله بنظره حاده الجمت لسانه وخرسته بعدها كمل كال لأبويه .. الحجايه الي اشوفها ما بيها خير خليها جوه لسانك لا تطلعها

رجع اتصل موبايله مره ثانية فتح خط وهو متجاهل ابويه رد بهدوء.. هلا سالي يله هسه راجع ونتناقش يله دقيقتين وأوصل

قفل الخط ورجع باوع لابويه كله... الامانه العندك خدش ما اريد بيها

رد عليه.. تدلل

خله وطلع من البيت وابويه وراه يهلي ويرحب بيه دخل للبيت بعد ما راح صديقه وهو ينفخ بضجر كآل بانتصار.. وهاي خلصنه بعد وراي علتين شيخلصها ما ادري

راح نام بالاستقبال وافيان باوعتلي مستغربه كالت.. ممعقولة هذا الشخص بحبروته وشخصيته وهيئته يحجي ويه وحده اسمها سالي

جاوبتها.. ما اعرف اني هم مستغربه يعني احس سالي ناعمه وحلوه ولازم يكون حبيبها كيوت ولطيف ومن جماعة ماما غطيني مو صديق أبويه الي بس يرزل وما شفته يضحك ودوم عاگد الحواجب انوب حاجبه مجروح اكيد متعارك ومضروب

خلينه ورحنه نمنه افكر طلعت النتائج صار هوايه والناس اكيد داومت جامعه واني حتى نتيجتي ما اعرف شنو ناجحه راسبه شكد معدلي ما اعرف ابويه سد علينا جميع المنافذ واخذ الموبايل مني حسره ودمعه لو امي هنا جان اني هسه احظر الجامعتي وفرحانه حيل بس وين اني حظي مدري بيا طينه نايم

اشتاقيت لامي حيل طگ گلبي عليه واني الي حعيش طول عمري من دونها ومن دون حنيتها و وكفتها الحلوه ويايه

تعرفون  من شخص يروح منه شخص عزيز وهو مكادر يرجعه يصير اكو حولكم شي يغلي وانتم مگادرين تتقبلون موت هذا الشخص ومراح يرجع تظلون تعيطون تبجون ومحد ينكسر خاطره لدموعكم

تعرفون شنو الشخص من يكون مشتاق الشخص مستحيل يرجع!!متكدرين تشوفي ولا تحجين وياه ولا حتى تسمعي

والاسوء من هيج ان يكون هذا الشخص هو سندكم بالحياة ومن صلب العائلة ومركز البيت وسكانه وعشت وياها سنين الي هي امي

شعور جدا زفت

فعلا شعور زفت واني جنت من اسمع شغله احجيها لامي وهي تكعد تفسرها وتفهمني وما فديوم اجه ابويه اذا ما هي قامت بواجبه احنه مالنه شغل احنه بإي شي احس الدنيا صعبت عليه وصغرت بعيني

نمت واني اداري دموعي وادعي الي ولاخواتي بالصبر ما نريد غير الصبر ويفرج همنا لان تعبنا بهاي الاشهر حييل

.....................

جنت كاعد بالسنتر والعرايس يفترن عليه والعمال يطلعون بالبدلات يشوفوهن جنت كاسر السناتر احلى سنتر بي بدلات واني بطبعي امين ما احب اقشمر الوادم

دخلت مره هي بنتها عروس كالت اريد بدله حلوه كون ومملبوسه طبعا عندي العمال على گلبي يستلمون العروس وام العروس ما شاء الله تخبلين عمي ام العروس هيج جا العروس شلون يسطروهن سطر ومدللين زبائنا ما شاء الله ممقصرين

جنت كاعد والمكتب كدامي وادخن اركيله والمحل ضاج بالعالم خير من الله

دخل كريم استغربت هاي اول مره يجي لا مو اول مره ثاني مره اول مره من بدلت بدلة اخت صديقه وهو هد عليه وانهزمت

بس اني والله ما بدلتها هذا العامل ماجرها لغير وحده ودك الناقصه بعد شسوي اكتل روحي

دخل لابس قميص تشيرت هاينك اسود وقمصله جلد سوده وبنطرون كحلي نفخت بضجر راح يخطف الانظار مني واني من تدخل للمحل تاخذلها صفنه عليه معروف جاستن مو جاسم محد يعرف اسمي جاسم

كعد بدون ما يسلم و وجهه عبالك شهر صفر حجيت بسخريه.. عاد سلم السلام لله ترا

رد عليه باستهزاء.. لالله مو الك المهم طالعه روحي وحتى ما الي خلك اسلم اعذرني

سحب مني خرطوم الاركيله وهو يدخن كتله...زين شبيك طالعه روحك قابل مثلي تحب رنا ولابستك مثل النعال

رد عليه بقرف.. انت شوكت تبطل سوالفك وبعدين اشك بيك تحب رنا

جاوبته.. خلي تولي نعاليش على العموم المايريدني ما اريده هسه لو تصير نفرتيتي

بعدها كملت بهيام.. بس احبها الحيوانه

ظل يدخن من دون ما يرد عليه وصافن كان يفكر بشي كتله.. شكو كريم شبيك

تنهد وجر نفس كال.. ما عجبني ابوي هالمره احسه غلط وحيل غلط من وافق على شروط خال البنات ظلمهن حيل وهن ميستاهلن واحس ضميري ممرتاح ابد حتى ما اعرف افكر حتى مكدر انام شلون هن مفكرات امهن ماتت وهي عايشه هذا الموضوع يدك بصدري

تقربت منه وركزت بعيونه.. وشراح تسوي

بعد القمجي من بين شفايفه ورد عليه بجمود.. لازم اروح
لخالهن اخلي يتراجع عن قراره

عقدت حواجبي باستغراب.. كريم هاي اول مره تكسر كلمة ابوي شلون تتصرف من وراه

رد عليه.. لان قراره معجبني قرار تعسفي بحق البنات ومحد غيرهن راح يتاذه مدتشوف الكل عايش حياته
طبيعيه بس البنات خطيه ما يصير يظلن عند ابوهن وهو مجرم وكل سوالفه مبيهن حظ

رديت عليه.. بعد هو ابوهن منكدر نسوي شي وبعدين ابوي مو شمره من العشيره

جاوبني.. وهاي هم غلط راح يسرح ويمرح بيهن ابوي استعجل هواي استعجل بقراراته وكآن يريد بس يخلص من عامر ومن بناته جان لازم ياخذ لبنات منه ويحميهن هذن ذمة

عدلت كعدتي ..تدري ابوي فضا للنزاع هيج سوه ترا هوايه امور تترتب على قتل ام جيهان يعني حتصير بين العشيرتين من غير الفصل واصلا هي تتطلك متظل عنده بعد ما هدد حياتها بالخطر ولو هي المره شظال بيها ابوي شاف احسن حال اخوها ياخذها ويكول ماتت

وكف وهو يشمر قمجي الاركيله على المكتب كال.. خليني اروح احسن

وكفت.. اروح وياك ابو الشباب اني هم ضميري ممرتاح

باوع بارجاء السنتر كال.. شاك بيك مبدل بدله
وتريد تنهزم

ضحكت... والله اني ما الي شغل هم العمال يبدلون

رفع حاجب .. افصلهم

رفعت عيوني ليفوك بصبر..ان شاء الله

خله وطلع من السنتر وركب سيارته ركبت بصفه كتله.. وين رايحين يمعود

رد عليه بملامح جامده.. اريد اروح لخال البنات اجبره يعلن عن الحقيقه بدل ما يحرم البنات من امهن ويعيشهن بعذاب الفقدان والحزن والحسره عليها واصلا اخته ما ارتاح بهيج قرار ابد ما ارتاح وهي الي خلصت عمر من عمرها في سبيل ما تبعد عنهن واشوف الحزن بعيونهن بإي حق هو هيج يجرم بحق البنات ويحرمهن من امهن ويحرم امهن منهن

جاوبته بضجر.. اول شي اخوها من اخذ هيج قرار اله عليه ما يريد البنات ويه امهن لان يعرف عامر ما يخليها تاخذ البنات وبعدين هو عامرمسويها غسل عار والرجال يمكن ما يريد فضيحة واني احسه ناوي على شي من هدد بقتل عامر والبنات اذا عرفن امهن عايشه مراح يخلنها وهم ترجع العامر ويرجعون النفس النقطه او حتى اذا تاخذهن وعامر كاتلها بغسل عار مراح يخلي بناته عندها

باوعلي بحده.. بس ما اعرف ما مرتاح لهيج قرار بغض النظر عن كل شي اني ما هامني غير البنات لان فعلا يضيعن اذا امهن اروح منهن هسه هو عامر لو بي حظ جان ما اهتميت بس هو ما بي كل خير الهن

سكتت مجاوبته و وصلنه لبيت بشار دگينه دگينه ماكو طلعت مره جيرانهم كالت... ها يمه محتاجين شي

جاوبها كريم كلها.. شنو الجماعه ما موجودين اشو ادك بابهم محد طلع منهم

ردت عليه بأسف.. سافروا وقفلوا بيتهم وراحوا صارلهم بالأسبوعين خطيه شلون ناس شلون عالم الجيران تخبلوا من عافوا بيتهم وراحوا

سألتها.. شنو السبب

ردت .. ما اعرف يمه بس هم صارت الهم مشاكل اخر فتره بسبب نسيبهم العار الله يطيح حظه وبعد راحوا الله يحفظهم وين ما جانوا شلون ولد بشار كلها تحلف بأخلاقه

كريم مسح وجهه بتوتر وتشكرنا منها ورحنه ركب السياره وعلامات الغضب على وجهه كال.. خلينا نروح لبيت عامر

جاوبته بنهر واستنكار.. يمعود صدك جذب انت شتحجي مو ذاك اليوم كتلته همزين ما اشتكه عليك ابوي مو كلك ابتعد منه

رد عليه بعصبيه.. خيولي السكط ميكدر يسوي شي مالك اروح ورجله فوگ راسه واذا خايف انزل من السياره

جاوبته بصدمة.. شبيك كريم تخبلت شنو هالطرده النازكة هسه اني شحجيت مو زين انصحك

رد بغضب..انصح نفسك بالأول يله تنصحني وبكيفكك تريد تمشي وياي اهلا وسهلا ما تريد انزل هنا وارجع اخذلك تكسي لسنترك العرايس منتظرات اطلالتك

هزيت ايدي.. لا عمي اروح وياك احلف عليك تحب وحده من البنات

فتح عيونه مصدوم ونزل من السياره فتح باب السياره وسحبني من ايدي وطردني كال وهو بقمة غضبه... ادبسز

رجع ركب السياره وشخطها وخلاني مذهول من تصرفه لا بالعباس هذا اخوي جن تخبل مو صاحي وين كريم العاقل المؤدب هذا مسودن بي خيط

هزيت ايدي ورحت اخذتلي تكسي ورجعت للعرايسي سوده عليه منتظراتني

..........................

جيجي

جنت كاعده بالغرفه دا اصلي لماما واقره الها صورة يس جنت دائما اقراها واهديها لجميع لاموات من ماتت ماما لحد الان اني مو هلكد بالقراءه بس من أسمع قرآن تعلمت اللفظ والقراءة شويه

جنت من اقراها عيوني ما تبطل من البجي الجرح جديد والحزن بأوله لحد الان جرحنا اخضر وما نسينا ماما ولا لحظه ولا راحت من بالنا

جنت لابسه عبايه الصلاة واقره سمعت صوت سولين وهي تبجي وتصرخ بصوت عالي فز گلبي

باوعت من الشباك شفت عمو كريم حاضنها وهي تبجي وتشكي من حالها ومن حزنها على موت ماما

ابتعد عنها شويه وهو يمسح دموعها ويمسح على راسها ويصبرها.. يله عمو امسحي دموعج كافي حبيبتي هذا امر رب العالمين ما عدنا أعتراض عليه والحمدلله على كل حال

مسحت دموعها وهي تشهك سولين من النوع الي فعلا معتبره عمو كريم عمها وجانت بحالة حزن فضيعه احنه يمكن ممصدكين ماما ماتت يمكن معتبريها زعلانه وترجع بيوم من الايام بس سولين هي شهدت مقتل ماما لهذا السبب هي تنهار وتبجي بكل الاوقات ومرات تجيها حاله هستيريا من الصراخ وكأن مشهد عالق مخيلتها

جانت تريد من يواسيها على موت امي لان احنه حتى مو مثل العالم لا فاتحه ولا احد جبر بخاطرنا عليها ولا اصلا احد بجه ويانه ومسح دموعنا فهي من شافت عمو كريم حضنته وتبجي وتشكيله من موت ماما وشلون قتلها بابا

جنت اباوعله واني لابسه عباية الصلاة وابجي بصوت مسموع رغم حزني على امي بس جنت احسه هو ملجئي واماني جنت اريد اعيش وياه بعيدا عن كل المشاكل خاينه بيه احبه وخجلانه من حبي اله

حاجيته بنظرات عيوني واحس شرياني انتفض دمة بوريده احبه اعشقه روحي متعلقه بيه واستحي واخجل منه ومن احترامي وعشقي اله سميته عمو حتى ما يحس اني احبه حتى ما يخلي ظنون وشك بداخله تجاهي

ويعاملني مثل ميعامل اخواته عبالك اطفال شفنه منه حنيه اكثر من ابويه يحترمنه يراعي مشاعرنا يلگة حل حتى يطلعنه من الي احنه بيه ما اعرف شلون اوصف كريم

وحتى لو هو ممقدم اي شي النه اني احبه بكل سلبياته وايجابياته حتى اخطاءة احبها احب نظرات عيونه ثقته بنفسه اناقته كلامه عصبيته حركات اديه نبرة صوته طوله كل شي احبه بيه

جنت اتمنى ايدي وياه قصه حب افتخر بيها كدام نفسي وكدام الناس بس اني استخدمت حبي وهيامي بيه بسريه تامه لان اعرف حواجهه صعوبات واعرف هو ما عنده مشاعر تجاهي وهو يعرف حالتي

الانسان من يحس الهموم والاسرار تاخذ مساحة كبيره من حياته وبعد ميكدر يسيطر عليها

يروح لامه... واني امي ماتت

جنت اتمنى اروح اله هو بالذات اشكيله همي ابجي على صدره اسولفله عن شنو اعاني بس ما اكدر ما اكدر اني مو مثل سولين سولين متحبه كدرت تشكيله بس اني احبه واخجل اشكيله

وحتى مطلعت من بعيد اباوعله روحي ترجف واشهك وحاظنه ايديه الصدري همست بصوت معذب ما يسمعه بس ربي... كريم امي ماتت

افيان وسولين جان واكفات يمه وسولين تبجي وتحجي وهو يهز راسه باسف وگوه مصبر نفسه اول انسان اجانه واول انسان واسانه على جرحنه هو كريم لا خاف من ابويه ولا نسانه

بعدها تنهد وسألها بأسى... وين جيهان ما شفتها

احس گلبي طلع من مكانه ورجليه ترجف خوف ورعب احساس ما اعرف شلون اوصفه ابتعدت من الشباك وارتجيت على الحايط حطيت ايدي على صدري يخفق بقوووه

جاوبته سولين.. اصلي لامي مسكينه تعبت نفسيتها حيل

جر نفس ورد عليها.. صيحيها خليني اشوفها

دخلت سولين وعيونها حمر من البجي كالت.. جيهان عمو كريم يريدج

استحيت اقابله استحيت يشوفني واني بهالحالة ما ردت اشوف العطف بعيونه رغم احبه همست بعذاب.. ليش ما گلتيله نايمه ما عندي طاقه اشوفه

تقربت مني وهي تمسح دموعي.. عمو كريم يحبنا ومخاطر بنفسه وجاي يشوفنا وما نسانه عيب اطلعي شوفي

مسحت وجهي بعشرائيه واني افرك باديه وخليت وطلعت برا لكيته واكف بطوله الفارع بالحوش حتى النفس كطعته

باوعلي ببتسامه حزينه كال.. جيهان

عندما تحب شخصٌ ما فإن طريقة نُطقهِ لإسمك تكون مختلفة تشعر بالأمان عندما ينطق إسمك

من كال جيهان حسيت اسمي حلو عضيت شفايفي واني اكتم دموعي تقرب مني وهو يحجي ويايه عبالك طفله  نزل نفسه الي وراسه صار مقارب من رأسي أحتضن اكتافي باديه كال... شلونج بابا اريدج تقوين نفسج وتصيرين سباعيه انتي اختهن الجبيره لازم تصيرين قويه حتى تكدرين تعينين اخواتج

عضيت على شفايفي بقسوه والحرگة احسها صارت بخشمي بدون ما اجاوبه جر نفس عميق وشاف الضعف بعيوني ولگاني تايهه اصلا اني اريد واحد يداريني مو اني اداري اخواتي

دموعي جانت مثل المطر ايقنت وتأكدت لامسن احساسه كال.. احجيلج سر بس يظل بينه

رفعت عيوني لعيونه من دون سابق انذار واني اباوعله اريد اعرف شنو السر كال بحيره.. امج

حطيت ايدي على شفايفي واني اشهك من دون ما احجي

بلل شفايفه بضياع احسه تايهه وما يعرف شنو يسوي مسح راسي وكال.. لا تبجن ترا بعد ما اجي خلونه نحجي ونسولف شويه

سكتنه وكعدنه بالحوش كال.. شوفن بابا انتن لازم تعتمدن على نفسج بقدر الامكان حاولن تبتعدن عن عامر ولا تستفزنه ابد خاصه انتي جيهان اوه قصدي افيان

اي افيان ابد لا استفزي ولا تردين عليه خليه يحجي ويسكت الوحده لحد ما نشوف فد حل نخلصجن منه تمام بس انطني هاي المده بلكي اكدر اسوي فد شغله اخلصجن منه

افيان ردت عليه.. مكروه حقير اتمنى اكتله والله ذاك اليوم هو نايم اجيت اركعه بالجاكوك لو ما ربك ستر وتعوذت من ابليس حيل اكرهه واكره كل شي بيه

رد عليها بحده.. افيان اتحكمي باعصابج وعوفي صيري مثل اخواتج هذا ما عنده رحمة انوب ياذيج خليج بعيده عنه تمام ولا تراددي ولا حتى تردين

سولين جاوبته.. اي هم كلتلها هو خبل انوب يروح يموتها مثل امي بس هي متاخذ الكلام وتعاند

رد عليها... لا ان شاء الله بعد متعاند

سولين حجت بحسره.. عمو وهماتين اريد اشكيلك من جيهان بس نايمه ولا تاكل ولا تحجي اني مليت وتعبت اريدها تكون طبيعيه ماكو متسمع الكلام

باوعلي بنظره عتب كال... لا جيهان حبابه تسمع الكلام ان شاء الله منا ورايح تاكل وتكعد وتسولف مو هيج جيجي ؟

هزيت راسي بقبول واني اكدر ارفض واكل بشفايفي بعدها وكف وهو يعدل بقمصلته طلع محفظته وهو يحسب بالفلوس كال.. عمو جيهان هاي الفلوس خليها عندج شنو تحتاجون دزوا بس كون ابوج ميعرف بيها

كالت افيان.. خليهن بصدرج أأمن شي لان ابوج مثل العتوي ينبش الميت من گبره ويطلعه

متت من خجل وجهي ظل ينطي اللوان وسولين كرصتها وهي تداري الموضوع .. لا عمو شكرا ممحتاجين

كال وهو يغلس عن كلام افيان.. ميخالف حتى لو ممحتاجين اخذوهن اخاف تحتاجن

لزم ايدي وخلاهم بيدي واني احس تكهربت وكعن وتطشرن كلهن من ايدي حمر وخضر دنك جمعهن ورجع انطاهم الي

جنت بحاله ذهول لازمتهن وصافنه لا كول اي ولا. لا حتى شكرا ما كلت مصدومة وبس صافنه

سلم علينا وبعدها خله وطلع وهو يوصينه على نفسنا ظليت واكفه بمكاني حتى ما اعرف شنو اسوي

رجعت سولين انطيتهم الها لان اني ما اعرف شنو اسوي اصلا اخذتهن وظمتهن وظلت تتصرف بيهن شويه شويه

راح واخذ عقلي وقلبي وياه واني ادري مستحيل ننجمع ومن سابع المستحيلات يتصرف ويايه وكآن بنت اخو مو انسانه تحبه ومخلي بينه فارق كبير هو عمي واني بنت اخو هذا هو الي يفكره هو صح ابن عم بابا مو اخو بس هيج فتحت عيوني وهيج لكيت الوظعيه كلها تسمي عمو احسه ممكتوب الي واني اركض وره سراب الله يعين گلبي

...........................

سولين

من بعد ما اجانه عمو كريم اني عبالي شفت واحد من اهلي انجنيت ما اعرف شلون تجرأت وحظنته واني ابجي وانوح وهو خطيه تخبل ما اعرف شلون يطيب خاطري ظل يحاول يسكتني ويصبر بيه اني واخواتي

خطيه انطانه فلوس ظليت اصرف منهن شويه شويه من يروح ابويه يطلع ادز امين يشتري لاخواتي ويجيب اكل من المطعم  واشمر الجياس بعيد ادزهن بيد امين حتى اخاف عامر اله نيه يدور الزباله ميلگة شي

مر تقريبا تلث ايام وهو دخل علينه متخبل عيونه براسه لزم الصونده وهجم علينه وهو يصيح بصوت عالي ... ولجن كح... تدخلن زلم من وراي ولجن احجن منو دخل عليجن قبل يومين

انهزمنه بالغرفه وهو دخل مثل الثور الهايج محد يكدر يوكف بوجهه امين ظل يصرخ حظنته جيهان وهي تبجي وتصرخ

بعد ما كدرت ياذيهم وكفت بوجهه وصرت كبش فداء تذكرت امي من جانت توكف بوجهه ويكتلها ضربني بالصونده على ايدي خلاني شاغت روحي كال مليان غضب هز ارجاء الغرفه... ااحجي ولج ساقطه منوووو مدخلات للبيت بدون علمي اليوم الحكجن بامجن عليه العباس

جاوبته بخوف ورجفه واني اتفاده الصوندات .. عمو كريم والله محد دخل علينه بس عمو كريم

وكفت ايده الي جان يضرب بيها وعقد حواجبه باستغراب... وهذا شعنده جاي وليش اجه اصلا احجن لا اموتجن سوالجن شي احجن

بلعت ريكي واني اجاوبه بخوف... لاا والله مسوه بس كال محتاجين شي فلوس اي شي ومقبلنه

دمغني على راسي.. طاح حظج يا عار ما اخذتي منه فلوس شعره من جلد خنزير

وبعدين شكو يدخل عليجن صاير حنين الگواد لو ما عنده غايه ما يجي مو طردوني من العشيره شكو بعد

ويجي كلب ابن كلب ويگلك ليش تكره البنات هناك استلم لو ولد ما اخاف يطبون ما يطبون شلي غرض يظل ولد بس البنيه عار وتظل عار

ردت عليه افيان بحده .. لعد امك مو بنيه هم عار لان جابتك

هو تخبل ركعها بالصونده على وجهها خلاها شاطت للستار

رد عليها وهو يتوعد بيها... بسيطه بس خلي اخلص من كريم اذا ما رجعت وطيحت حظج اطلع عار ابن عار اذا ما ربيتج من جديد

خله وطلع وهو يصيح ويغلط وهي مسحت وجهها وملامحها احتدت وكأن ما صاير شي ظلت تباوع للسكف وتهز رجلها بتوتر وتكتم بداخلها..

......................

رنا

رحت لبيت جدي كهلان والله ضوجة واحد وين يروح عاد بيت كهلان اقرب شي واحد يروح يقضي عندهم وقت ظاله لا تعين لا فلك اسود من بيت لبيت

كوثر نجحت ودخلت كلية أداره واقتصاد وسولين طلعت معدل ٨٥ بس خطيه حتى متعرف بنفسها ناجحه اخابر عليها ما اكدر احصلها وحارث اجه يروح الها للبيت وامي حلفته ما يروح لان هي تعرف خالي يكره حارث وخافت على البنات يتاذن بسببه فحلفته ميروح ويستر عليهن

دخلت وصحت.. مي مي عطشانه

طلع جاستن من المطبخ وهو ياكل بلفه كال... ادري شني جني شوكت دخلتي شوكت صحتي

جاوبته.. اهوو لحد الان ممتعودين عليه لازم تتعودون اجيكم بكل وقت

رد عليه .. دام هيج كومي شربي روحج مي ولا تاكلين تبن وتتشرطين

هزيت ايدي وتغاضيت عنه... حبي حنونه مي بسرعه خطاركم كاتله العطش

جابت لامي وهي تضحك والكحله واصله لاذانها كالت ... هههههههه هلا وغلا نورتينا والله

رديت عليها.. عمري اموت عليج اروح فدوه الجدو الذواق جايبته بيبي تجنن مثلج

ضحكت بثقل وخلت وراحت كلها نايمه كريم باجر دوامه ونايم من وكت وكوثر جايه من الجامعه ونايمه وظال بس جاستن يفتر عليه بيرمودته ساعه يشرب كهوه ساعه يطلب اكل دلفري واني مكنكه واباوع على وادم

ما نشوف الا انهرج البيت كمزت من مكاني وجاستن كمز كال..شنهاي هذا منو الهطر الباب تهطر

فتح الباب ودخل علينه خالي جنه بعير يجوعر وهو يصيح وينه كريم وينه كريم صاير شريف ويفتر على بناتي اليوم احرك البيت عليه

طلع جدي من غرفته وكريم هماتين وهم مستغربين من الوضع هجم عليه كريم وسحبه من ياخة قميصه وهو يعيط بيه.... هييييييي شبيييك شكو جاي هداد منخلص منك مثلا

رد عليه وهو يتلوه مثل الحيه.. والله كول الروحك كاعد بأمان الله تشوفني ماكو تجي تتختل ببناتي شقصدك هااا شعندك وياهن شفتهن الوحدهن كلت خلي اقشمرهن واضحك عليهن

كريم شد على شفايفه بقسوه وجابه براشدي لزكة بالكاع وكع على الارض وهو مصدوم وحط ايده على خده

هجم عليه كريم وجاستن وجدي ما خلوه ظل يتهدد عليه ويصيح.. لك يا كلب يا حيوان يا زمال بناتك عرضي يا عار والله اليوم اشرب من دمك ابن الكلب

لزمة جدي وهو يحجي وياه بعصبيه... كافي كريييييم كافي اسكت مو اني ابوك احجي وياك

صاح بوجهه ابو . هذا العاااار يتهمني ويه بناته واني بمثابة عمهن اني على الوادم الغرب ما حاط عيني احط عيني على ذن المسكينات

سحب عامر وهو يسحل بي مثل الطلي القايده الجزار ... امشي اطلع برااا والله اذا شفت وجهك ادفنك بمكانك زماااال

جان يحجي وجهه صار احمر وعيونه تنطق بغضب جان حيل مزعوج من اتهام خالي اله طرده بالشارع وبيبي ام حسن تتوسل بي وجدو يريد يلزمة ما يكدر كلهم ما كدروا عليه كد ما جان اعصاب وطالعه روحه ومتعصب

ظلوا واكفين بالباب عامر يتهدد على كريم وكريم گوه لازمينه لا يرجع يكتله مره ثانيه ا

ما نشوف الا واحد صاعد على ماطور ظل يرمي على رجلين علمتوهم ظل يكمز تفاجئنا وبيبي ام حسن ظلت تصرخ بس ما عرفنه منو هذا وهو جان متقصد عامر لو كاتله مع الاسف هو مبين مراقبه بس ما صارتله فرصه

رجع يركض وهو يختل بين احظان كريم وكريم دفعه

جدي تخبل من شاف الوضع هيج جدي من النوع الحيل يخاف على ولده من كل شي طرد عامر ودخل ولده جوه

عامر اخذ نعاله وخله وراح وهو يغلط وقميصه ممرعد من الحاله

دخلنه جوه وكريم يفح من العصبيه وابوه ظل يحجي عليه كله .. مو كتلك يا كريم كتلك چفيني الشر هذا ما وراه غير وجع الراس هذا ما وراه غير المصايب هذا مطلوب شفت شلون متربصيله اني لو جايتكم طلقه تايهه وكاتله واحد منكم اني شسوي شكول الكم انطي وجهي

جان ساكت وما يحجي بس وجهه كل علامات الغضب بيه كالت حنان.. يله حجي الحمدلله على سلامتكم بعد كريم اخذ درس واكيد ما يروح الهن

هو من حجت هيج باوع الها بحده وكآن ما رضا عن كلامها

ابو كال بغضب.. شمحلاه ويروح والله يا كريم اذا رحت لا انت ابني ولا اني ابوك فكنا من المصايب

هو تجاهل كلام ابوه وخله وصعد الغرفته وعاف الوضع طكة وطيح وناس تحجي على ناس وحنان تحشي براس الحجي مالتها

......................

سولين

من بعد اسبوع كامل شكيت الي وصل خبر عن كريم هو ابو سعدون محد غيره فتان المنطقه فد اكرهه من شفناه ما شفنه خير شكد ططوه

ظلينه انوب محد ابنه حتى عمو كريم ماكو بس احنه هماتين ما نريد يجي بصراحة ما نريد اله من ورانه مشاكل خطيه هو هم شنو ذنبه

باليل تقريبا بالعشره نظفت البيت وعشيت اخواني ودا انام

دخل ابويه مثل المكروص وجهه بين ستين شيطان كال .. سون جاي بسرعه

وكفت ورحت سويت جاي محد يشرب عدنه جاي غير صديقه لان هو يكرهه امة محمد كلها وميقبل يظيف اي شخص دوم يبجي بوجهه الله

كملت الجاي صبيته انطيته اله كال.. عدلي روحج وتعاي خلي يشوفج خطيبج

باوعتله باستغراب.. خطيبي منو خطيبي؟

رد عليه بعصبيه.. بعد منو خطيبج الاشتر تبوسين ايدج وجه وكفه عليه

نهايه البارت.. يتبع

كونوا انتم كونوا بخير.. احبكم💔

نور سمو العراق ❤️

لا تنسوا التصويت والمشاركة بكم نكتمل 🥺