رواية #وكر الأشتر الفصل الثامن والعشرون 28 - بقلم الكاتبه سمو العراق

البارت السادس والعشرون
رواية .. وكر الاشتر
بقلمي .. نور سمو العراق

💔💔💔💔💔💔💔💔💔💔💔💔💔

اعتذر منكم احبتي ظروفي حالت بيني وبينكم كنت بمجلس عزاء فقيدتي إنا لله وانا اليه راجعون

💔💔💔💔💔💔💔💔

ماذا تحبين ؟
_أُحِبهُ،
ألا يكفِي أن أحِبهُ وحدهُ، أن أحِبهُ بِجميع تَصرفَاته، بِجنونهِ ومزَاجيَته،
بِحزنهِ وفرحهِ،
ألا يَكفي أن أُحِبهُ هوَ ذاتهُ كُل يَوم وكُل سنة وكُل العُمر،
ألا يكفي أن سقفَ أحلامي هَو ومَبسمه ووجهه الملائٍكي ، فإنٍي أُحِبه كَحب الأرض الظَمأة لِلماء، وكأنَني الأرضُ وكأنهُ المَاء الذي يَروي ظمأي،
وتقول لي مَاذا تُحبين ..؟!
فوللهِ أحِبهُ،
أحِبهُ دائِماً وأبداً

..............................

جيهان

قبل لا نروح البيت الاشتر

جنت نايمة ظليت تقريبا لتلاثه باليل منايمة من بات عمو كريم يمنه بسيارته جنت خايفه وخايفه حييل كلت يمكن يستغلنه لا ام لا اب والشيطان شاطر واليوم الاخت باخو ما تثق خفت حيل من استغلاله ورغم اني اعرف كريم كولش زين واعرف اخلاقه بس الحذر واجب والشيطان شاطر ولسه ممات

بعدها غلب عليه النعاس وكفت غطيت فافي لان فافي من تنام مشكلة رجل بالغرب ورجل بالشرق والثوب صاعد لضهرها وتشخر لان هي عندها جيوب انفيه فدائما تشخر وتزعج الي ينام يمه جانت سولين كل شويه ورافستها وتفززها حتى تبطل شخير

رجعت غطيت اموني وبسته بخده باوعت من الشباك شفته بعده كاعد على الدرج والظلام محاوطع وجان الجو نسبيا بارد همست .. غطيتهم كلهم بس ما اكدر اغطيك

ضحكت واني افكر بيه خطيه ظل بايت هنا لخاطرنا هو عاند يظل هنا واني عاندت اظل ببيتنا خطيه استسلم للامر الواقع وظل يمنه

تحمحمت وصحت عليه بصوت هادئ.. عمووو

باوعلي بسرعه وركز بيه كال .. هاا عمو

ابتسمت بلطف .. انطيك بطانيه ومخده الجو بارد لتتمرض

ضحك كال.. ادري شنو سجينه انتي وتحاجيني من ورا الشباك

جاوبته .. لا بس قافله الباب ما اكدر كل شويه فاتحته كلت احجي منا اخاف تحتاج شي

تنهد ورد عليه.. ليش قافلته خايفه مني

رديت بسرعه وبنفي قاطع .. لا لا عمو شلون اخاف منك شنو هالكلام

اردفت بحزن مصطنع ..بس خطيه اموني يخاف من البزازين اخاف تدخل علينه بزونه هسه تريد بطانيه

رد عليه بضحكة و وكف كال .. لا حبيبتي راح انام بالسياره

عقدت حواجبي بحزن .. اخاف تتكسر بالسياره نام بالاستقبال احسن خليني افرشلك فراش

باوعلي كال .. لا لا ماكو داعي متعلم بالشغل انام بالسياره العسكرية عادي انام بسيارتي واشغل تدفئة

جاوبته .. براحتك

خله وطلع من البيت بس ظل الباب الرئيسي مفتوح واني خليت ورجعت لفراشي استسلمت للنوم العميق

تقريبا الساعه بثمانيه الصبح اندك الباب تلث مرات فزت فافي وهي تصيح ... مااا احف ما احف روحن تعالن الظهر

ورجعت نامت وتشخر ولا جنها هسه كعدت تصيح وكفشتها واكفه حالها يخزي بس حليوه فدوه الگلبها

وخرت الفراش من جسمي والنعاس غالب عليه تمطمت و وكفت عدلت حجابي ولفيته عدل فتحت الباب سمعت طكطكة بالمطبخ

رحت بسرعه شفت عمو واكف بطوله الفارع وبكامل اناقته وهو يشغل الطباخ همست .. صباح الخيير

باوعلي وخله القوري على الطباخ كال .. صباح النور همزين اجيتي اني متعلم اتريك من الصبح دكيت الباب اختج ام لسان مدري شكالت كلت الظاهر نايمات دخلت للمطبخ ومحتار منين ابدي

ابتسمت .. اسويلك ريوك

رد بسرعه .. اي طبعا لعد على شنو مكعدج تركصيلي

اختفت ابتسامتي ولعبت نفسي من كلامه وكتمت غضبي هو حس بيه ضحك كال .. شبيج اتشاقه وياج

سكتت مجاوبته وعفته بس ما اعرف ليش كلمته حزت بخاطري والشي الي ضوجني يمكن هو هيج يتصرف يريد يستغلنه لان من دون اهل وسند بلعت ريكي بخوف بس لا عمو مو هيج وابد ما فديوم استغلنه

حس بيه ضجت من كلمته وحس بنفسه جفص اني ما احب الميانه الزايده لان طياح حظ لذلك جنت محترمة نفسي وكلامي وياه قليل اصلا ويه الكل

راب حاجبه بتوتر وحجه بهدوء.. جيهان انتي سادس ابتدائي بالدراسه مو

باوعتله .. لا صف خامس وبطلت

كال بتساول.. هم تحبين ترجعين للمدرسه وتدرسين

هزيت راسي بنفي ... لا ما احب الدراسه اصلا كسلانه جانت المعلمة دكول انتي طينه والها عيون

ضحك .. هههه اي لان بالج مو يم الدراسه شي اكيد تصيرين طينه والها عيون

ابتسمت.. اي ما احب الدراسه عمو اسويلك بيض وطماطه لو شنو تريد

رد بعدم اهتمام.. بكيفج

خله وطلع من المطبخ واني كعدت اتفنن لكيته جايب طبقه بيض وصحن كيمر وصمون كريم واسمه عليه فعلا كريم ههههه

وهاي المعفنه فافي كتلها خلينا نتسوك دام رجعنه البيتنا راحت جابتلها علاكة وترستها خيار وطماطه من بيت جدو كهلان وراحت الحنان دكلها اخذت كيلو طماطة وكيلو خيار وبيذنجان وبتيته وربع لحم لان بعد اطلبج عشر الالف

كلتلها حنان .. ياااا مو انطيتج ستين

ردت فافي بعدم رضا .. لا والله الماده غاليه وحسيت انقطيت اني بمية ما اسوي عاد اخذت مسواك حتى ما يظل دين عليج وهم ابري ذمتي

ظليت اكرص بيها اريد ماكو جابت العلاكة واجت همزين كوثر وام حسن ما شافنها بيها رس من عامر مال لطلطه

سويت ريوك واخذته اله هو شافني اخذ الصينيه من ايدي وهو يكول ... اييي بعد عمج اجه بوقته

كرفصت كدامه صبيتله جاي بس بدون ما اكعد كال .. اكعدي تريكي

جاوبته بهدوء.. اني والله عمو عكسك ما اتريك الصبح تلعب نفسي لازم متاخره

رد عليه .. اها تمام براحتج

ردت اطلع وكفت بباب الاستقبال بعدها درت وجهي عليه كتله .. عمو شوكت تتزوج

نفخ بضجر ورد عليه.. ما اعرف والله يا عمو الله كريم البارحة دزو عليه اهل ايات وكالو لازم تستعجل جدها يريد يموت

اردف .. اني اعرف هاي سوالف الاهل حتى يعجل العريس بالعرس بس بعد همه هم حقهم

ابتسمت .. ان شاء الله بالتوفيق ربي يرزق الذريه الصالحه ومبروك مقدما

كال .. جيهان احس امج بالغت برتبيتج

عقدت حواجبي بعدم استيعاب.. شلون مفهمت

رد عليه.. كلش خلوقه ومؤدبه والله حاجيها وراج مو كدامج

ابتسمت على كلامه الي تغلغل بفرح بداخلي.. شكرا عمو شهادة اعتز بيها وعلگها بالاستقبال

ضحك .. ههه كوني انتي مصطلحات افيان عوفيها

ابتسمت .. بعد من رافق القوم اربعين يوم صار استاذهم

بعدها تنهدت بحيره وهو ياكل كتله برجاء .. عمو ممكن طلب اذا منصير زحمة

رد عليه.. لا عمو رحمة اطلبي

بللت شفايفي بحيره .. عمو اخذني لقبر امي والله طاگ عليها هيج اتمنى احضن ترابها وابجي عليها مدام ابويه بسجن بس يطلع ما يخلينا نزور

جاوبني بسرعه والارتباك واضح عليه...ما اعرف خالج هو الي دفنها حتى قبرها ما كال وينه

كتمت حزني وداريت دموعي وخليت ودخلت جوه بعدها هو صاح عليه كال .. اني راح اروح اذا تحتاجين شي هذا رقمي وخابريني هسه راح اشتريلكم موبايل وخط واجي

جاوبته .. لا عمو والله ممحتاجين شي وهي فافي كالت راح تشتري موبايل وسيمكارد

باوعلي بنظرة عتب وخله وطلع شويه واجه جايب وياه موبايل وخط جديد فعله بس مو موبايل راقي لا عادي سامسونك بس بيه كاميرا

اخذته منه وتشكرت وهو خله وراح فعل بيه بس رقمه كال .. لا تحجن دكولن عدنا موبايل تمام

هديت راسي بقبول وهو خله وراح كعدت افيان شافت الموبايل فرحت بيه ظلت تطكطك صور والله لو يدري ابويه اله يشنقنه احنه وكريم

ظلينه شويه واندك الباب راحت فافي فتحت الباب واسمع صوتها وهي دكول .. هلا هلا بنسيبي الكفو اهلا وسهلا نور البيت بوجودك والله

هو رد عليها .. كفو من شاربج بويه يله بسرعه حظرن نفسجن وامشن وياي

طلعت سلمت عليه و وكفت كلتله افيان .. شنو ليش عمو صاير شي اختي مسويه شي اعرفها حيه ولسانها طويل بس لا ركعتها بربعيه وفوخت گلبك

ضحك عليها كلها .. هه لا يابه ما بيهن شي بس خابرني كريم وعنده دوام باجر وانتن متقبلن ترحن عندهم كلت اجي واخذجن عدنا

افيان خلت وركضت واجت وبيدها علاكة كلتله ... نسيبي الكفو هاي فلوسنا اني واختي جيجي جمعناهن نشتغل ونحف ونسوي شيره نجلط نسوان من الشعر

كرصتها بخجل وهمست من بين اسناني .. عزا بعينج كون لصمي حلكج

باوعتلي ورجعت كملت بحماس .. خويه شوف نريدك تكون البنك مالتنا لان شنو بصراحة نخاف يطلع عامر من السجن وياخذ فلوسنا انوب صار خريج سجون وانت عندك الحساب

ابتسم على كلامها واخذهن كلها .. ان شاء الله بالحفظ والصون وشنو تحتاجون اني حاظر

رفعت اديها وهي تدعي بحماس .. ربي احفظ ابو طبره وخليه خيمة على لسانه وكص لسان اختي وخليها تحبه

ضحك على كلامها ومشه كدامنا واحنه حظرنه نفسنا ورحنه وراه وصلنه لبيت اختي وافيان المصيوبه سوتلها مصيبه وفشخت الولد بربعيه

...............

سولين

بعد ما فافي ضربت مصطفى براسه تخبلت ما عرفت شنو اسوي ظليت الطم واصرخ وخابرت على الاشتر من موبايله

شويه ودخل الاشتر يركض هو وصفاء وعيونه بكصته ومتعصب من شفت وجهه ما استبشرت خير هو حيل يحب مصطفى ويخاف عليه من الهوا انوب اجت فافي وفلشت راسه

سحبه لصدره ورفعه وهو يضرب على خده .. مصطفى مصيفي حبيبي

صاح على صفاء بصوت عالي خله صفاء طفر من مكانه .. صفاء بسرررررعه جيب مي و وصله

ركض صفاء للمطبخ واني ركضت عندي ثوب شكيته بالنص وفافي شارده كاعده بالغرفه وحاطه ايدها على حلكها وتباوع بصدمة عساس هي مصدومة

عضيت اصبعي اتوعد عليها .. بسيطه فافي اذا ما كتلتج فلا اطلع سولين بسيطه

باوعتلي بنظره عود منقرفه من كلامي انوب فوكها معاجبها

ركضت انطيتها للاشتر كصاه بالنص ومصطفى بده يصحصح وشربه شويه مي خابر على عايد جاب المضمد

خلينه ودخلنه جوه اني واخواتي ونباوع من الشباك بعد ما اجه المصمد ابو سعديه حتى مضمدهم مدري شلونه جان مصطفى كاعد على القنفه والاشتر لازم ايده وابو سعديه يخيط براسه كال ابو سعديه .. ست خياطات هاي منو ضاربك بس لا واحد من المطيرجيه والله ذول المطيرجيه اكبر كواو.. دوم يشمرون طابوك هسه لو ميت الولد ورايح بيها بشنو ربحنه بالطيور

رد عليه الاشتر بتنهيده .. شنسوي الله كريم

طلع المضمد ومصطفى منزل راسه وحاط ايده على جبينه ويدلكة بهدوء كال .. اخخخ راسي راسي احس مخي طاح بحلكي هاي بتمن هاي المستهتره الادبسز

رد عليه الاشتر وهو يشربه بالعصير .. انجب لا تغلط عليها هاي اخت مرتي ولو ما انت هاجم عليها ما تتجاوز عليك

سكت مجاوبه كله .. خليني اروح

جاوبه .. اكعد ما بيك حيل تمشي نزفت دم هواي ارتاح واكل حتى ما تدوخ وتوكع

تنفس بغضب ورجع كعد كله الاشتر .. اي شعندك جاي احسن الك هيج

جاوبه هو بعصبيه .. والله ما ادري بيك مخلي ببيتك مجرمات شكت راسي وخلت دمي بطولي اريد اقدم دعوه عليها اسجنها

كمزت من مكاني وكلبي وكف من كلامه وهي باوعتلي متعصبه كالت ... شوف هذا مصدك روحه هي ربعيه نيمتها براسك لو ضاربته طلقه شلون انوب يريد يسجني تهي بهي شكد مستهتر هذا منو

رد عليه الاشتر .. انجب ولك شنو تسجنها شحدك تعتب باب المركز حتى خاف هي ما نومتك بالجمله العصبيه اني انومك ولك هاي عرضي شحدك تتعده على عرضي

جاوبه بجمود .. بسيطه يصير خيير

رجع الاشتر شربه عصير كله .. شو تهدد هاي البسيطه وراها مصيبه وكل الي يكول بسيطه اتمنى اذفنه قبل ما يعتب باب الحوش

جاوبه بعصبيه .. ما مهدد

كمل الاشتر.. شوف لا دكول اخت مرة الاشتر ضربتني عيب وزحمة هسه يكولون رجال شاربه يوكف عليه الصكر تضربه مره وتخلي دمة بطوله

جاوبه مصطفى .. اخذتني غدر درت راسي ما اشوف اله الربعيه نابته براسي

ضحك الاشتر كتم ضحكته وبعدها ضحك بصوت عالي .... هههههههههههههههههههههههه

باوعله مصطفى بعتب كتم ضحكته الاشتر وهو يكوله .. اعذرني مصطفى بس السالفه تضحك

جان نازع القميص كله دم وهو مبين رياضي هاي رياضي وتمدد لو مو رياضي يمكن يم بير عليوي وحاظرين الدفن هسه

ولابس بس الفانيله البيضه وكلها دم وقميصه بيه دم نزعه هو صاح عليه الاشتر ... سوليين بويه تعاي

طلعت بسرعه اركض كال .. جيبيلي قميص من قمصاني لمصطفى

رحت ركضت جبت قميص وانطيته اله بسرعه شمره عليه كله .. البسه وخليني احاسبك

لبس القميص وراسه ملفوف بشاش ابيض كله بصدمة .. تحاسبني  فوك حگه دگة

رد عليه بعصبيه .. اي احاسبك جاا شنو تهجم على مرتي ومحد بالبيت عبالك هيج تروح السالفه وتنطم حتى لو مركوع براسك تتحاسب

جاوبه بغضب .. اني مجاي على مرتك اني اجيت عليك انت اعرف محد غيرك دز عليه عصابه وسلبوني واخذوا مني هويتي وجوازي والفيزا لا اخذوا فلوس ولا سيارتي

جاوبه الاشتر بصدق وجمود ... اي عفيه ما شاء الله ذكي عاشت ايدك لك مصطفى وحق الياء والقران الي نزل على صدر محمد اذا ما تمشي عدل اعرف شلون امشيك

رد على الاشتر بغضب .. على شنو وشمسوي ترا كل الي سويته دا اروح اتونس بالبنان سياحه مجرد سياحه

سحبه من ياخة قميصه بغضب .. اهااا ليالي لبنان بانتظارك ترا عرفتك وين حاجز وشنو غايتك وشنو نيتك انت شنو لهلدرجة قذر كل همك النسوان

رفع اديه باستنكار ... لاااااا توبه بعد هالفشخه تبت من النسوان كرهت شكو مره لك شنو هاي ما ينجرعن

ضحك الاشتر باستهزاء .. ههه والله انت ما تتوب وان شاء الله يارب طابوگة  نسيبتي تجيب نتيجة وياك اصلا اني لازم اروح انشكر منها دامك كرهت النسوان بهيج وضع احنه ممنونين لام طابوگة

مصطفى بسخريه وحقد ... اي كلش ممنون وها ترا لا عبالك اني تجاوزت عليها وحجيت هي فد وحده لسانها طويل ومستهتره غلطت وسبت ولعنت ومحجيت وتاليها تضربني والله اذا ما اكسر ايدها فلا اطلع مصطفى

اني دمي فار من عصبيتي كلت بس يطلع احجي ويه الاشتر واسولفله عن الي سواه ويانه

بس فافي وين تتحمل طلعت بسرعه واني اجر بيها كلتله بعصبيه ... لااال لهنا وكافي سكتت هووواي ولك انت فد واحد متستحي

رجعت باوعت للاشتر بحزن وعياره .. خويه ابو ابراهيم ترضاها ترضاها عليه واني عرضك واخت مرتك بمثابة اختك ترضاها عليه يفشر عليه فشار ما ينلبس عليه ثوب غطيت وجهي بشالي من الخجل

رفع اصبعه بتهديد ... جذابه اصلا ما حجيت وياها

عطت بوجهه ورديت عليه.. انت الجذاب اختي مو جذابه وانت فعلا غلطت وفشرت وكلت عاهره

لزمه الاشتر بغضب وهو يخض بيه ... لااااا يا ادبسز شلون ولك تفشر وتجي البيتي وتتهدد على مرتي واخواتها

رد عليه بغضب .. ممتهدد ولا حاجي شي

جاوبته افيان وهي تتخصر ... لا تهددت وغلطت وكلت عاهره ولك اني عاهره من تروح ستين فدوه اليه ولك روح لمكان سكنه وأسال هناك بس اسال فافي الحفافه وهم يكلولك اني شنو

ضحك باستهزاء .. هه انوب حفافه

جاوبته بغضب .. حفافه واشرف الشرف افضل ما افتر بملاهي لبنان واصرف فلوسي على الحرام

انتر بوجهها بغضب .. شقصددددج

الاشتر لزمه وسحبه كله .. كافي خلينا نطلع عرفت منو الغلطان

سحبه من ايده ومشوا خطوات

جا غير تسكت ردت عليه .. الفنان القدير توفيق الدقن يقول ..احلى من الشرف مفيش

دار وجهها عليها ونظراته تتاملها بحقد كلها .. شقصدك

سحبه الاشتر بعصبيه .. دكافي خليت عقلك ويه هالطفله هي طفله شتفتهم

مصطفى بقهر .. بالعباس اني الطفل محد طفل غيري ظلت طفله اذا هاي طفله لعد اني شنو

سديت حلكها ودخلتها جوه وهم طلعوا من البيت خطيه صفاء بين هذا الموضوع كله ابد ما فتح حلكة ولا حجه كلمه وجهان جانت جوه ما طلعت

لزمتها بغضب واني احجي وياها .. ولج انتي شلون بيج شلووون بيج متكليلي شلون هيج تتصرفين شلون تضربين الولد

ردت بغضب عارم و وجهها احمر من عصبيتها وشرايين ركبتها بارزه .. اي ما تشوفي شلون يفشر عليه والقران لو ما شويه جان فضحته فضيحة الساقط ابو الملاهي هسه اني طلعت مو زينه فوك ما دافعت عن بيت نسيبي

لطمت على وجهي .. ترا متت منج هاي بعدج ما اجيتي سويتيلي مصيبه شلون

عاد هي تخبلت .. اكلج هييي ترا ما كاعده ببيتج ببيت نسيبي وهو الي يجابنه ولا خلف الله عليج تعيرنه ببيتها عساس شلون بيت الجريذي ما ينام بيه

انصدمت من كلامها .. اني ممعيرتج اني دا اكول صيري عاقله

تخصرت وهي تصيح .. لا والله هو هذا حماج الخبل يخلي واحد عنده عقل شكد عيب عليج تبيعيني لخاطر حماج يمه صدك لو كالو يجي زمن الاخو ما يريد اخو

جيهان تدخلت كالت .. لا فافي مو قصدها سولي بس هي دكول عيب ولان ولد منعرفه عيب هيج نتصرف وياه

ردت بغضب.. والله هو الي ميعرف العيب اني بس ابوي مفشر عليه انوب يجي هذا يفشر عليه يريد ياخذ دور عامر ما عولت ارتاح من عامر يجيني عامر ثاني لا والله ما اقبل

سكتت منها وعرفت الكلام وياها ضايع لان الي براسها براسها ما تتنازل وعصبيه حيل

كعدت على الارض وهي تنعي وتبجي بالجذب وهي دكول مثل العجايز.. اسمر يبو عيون الوسيعة قاطك اضمة لو ابيعه يا صافي يا يمممة احوووي ينار كلبي

رجعت كالت .. همزين ما مات جان هسه ادگ والطم عليه ونعي واكول ..

لگعد على دربه وتاني
ونشد على حلوالمعاني
وسفه يصافي الضيعاني
والشوفته مشتاگه اني

ضحكت عليها حتى احساس مثل الوادم ما عندها شكد خبله انوب كعدت تنوح وتستهزء شكد حيه

.....................

صفاء

بعد ما طلعنه برا ومصطفى عيونه بكصته متعصب حيل من الوضع والاشتر طلع وراه

لزمته بحنية كتله .. على كيفك يابه لا تتعصب انت هم متكعد راحه شكو تفشر عليها

رد عليه.. دخلي تولي فد وحده ادبسز

الاشتر جان يخابر رجع عليه كله .. هاا مصطفى شلون صرت

جاوب .. زين بس ياريت ترجع جوازي

الاشتر بحده .. من تمشي عدل وتبطل سوالف تحسين وساهر داك الوكت انطيك جوازك وانطيك جنسيتك

مصطفى بقهر .. زين اذا انت هيج كارهه تحسين وساهر اكتلهم واخلص منهم ليش مطولها

جاوبه بضحكة مستهزه .. حجي اديب مره من المرات كلي حكمة كال سالو حكيم كلوله ليش ما تنتقم من اعدائك كلهم ما معقوله اعض جلب عضني

المقصد من كلامي ما يصير اردله نفس الجريمة اريد ااذي بس على البارد من دون ما اوكع نفسي بمشاكل يعني يضربني طلقه اروح اضربه طلقه لا هذا مو منطق لازم اطلع الطلقه من عيونه

مصطفى .. بس هو يكول اني بريئ من كل التهم المنسوبه اليه وحتى يمة دكول دكول اني بريئة

الاشتر عقد حواجبه بحقد .. تسمي وجيهه العار يمة ؟

رفع اكتافه بتبرير .. ما اعرف الكل يصيح الها يمه واني وياهم مع العلم ادري بيها هي جدتنا وهي دكول انت ساس البله وانت ساس المصايب

رد بضحكه مستهزئة .. هه شوف مصطفى اني مثل البحر ابلع بس ما اشتكي بس اذا هاجت امواجي اخليها كلها تتراجف مني واعرف شلون ارد الهم الصاع صاعين

اردف بجدية.. وجيهه هي ساس البله هي ساس المصايب هي بسببها راحت رحيق وشتت كل العائلة ظليت من دون عائلة بسببها

تقرب من مصطفى وحط ايده على كتفه كله .. الي اريده منك اريد تعرف عدوك من صديقك ترا لا عبالك ساهر و وجيهه وتحسين حبا بيك هيج يسوون ومدللينك لا ترا انت غلطان هذا كل كله الي يسوو عناد بيه وحتى يكسبونك الهم ونجحوا وراح تضيع وتضيع نفسك

كمل بحسره .. مستحييل تلگة واحد يحبك بكدي مستحيل تلگة واحد شايل همك بگدي انت اخوي انت وصية امي ومستحيل اضحي بوصية امي

رد عليه مصطفى بعصبية.. امي ما تحبني امي ضحت بيه وانطتي ما وصت بيه لا تضحك علييييه لا تلعب باعصااااابي اني مو ابنها لو ابنهاااا ما انطتني

مشه وهو محروگ گلبه والالم جارح احساسه عرف الاشتر ما يكدر يحجي وياه كال .. صفاء روح وراه لا تعوفه الوحده

خليت ورحت ركضت وراه هو صعد بسيارته فتحت الباب وصعدت وياه باوعلي بعصبيه.. منو سمحلك تصعد وياي

رديت بعدم اهتمام.. اني سمحت النفسي شنو عندك اعتراض

رد عليه بانزعاج.. انزل اريد اروح للبيت

تنهدت .. ميخالف خليني اروح وياك اخاف تتخربط يصير بيك شي عاد اني اسوق مكانك

ضحك بسخرية .. صدك هي هاي شسمها الضربتني

جاوبته .. اندري يمكن اسمها افيان

رد بعصبية .. هي هاي مال افيان مال انتقام اشك بيها مرض متلتزمة طول اللسان

ضحكت ... هن الظاهر كلهن عصبيات

رد عليه.. اي هي وين بيتهم تندله

عقدت حواجبي.. ليش شعندك ببيتهم ليكون ناوي تهجم عليها ببيتهم

ضحك .. هه شنو ما رايد نفسي لا بس هيج اسال يعني اسلوبها مال وحده كاعده بمنطقه معفنه لهذا السبب هيج اخلاقها

نفيت كلامه .. لا ترا هن مؤدبات وخوش بنات بس انت ما تحب تنطي بنفسك ولا تكول انت الغلطان

جاوب بحده .. ما غلطان

سكتت منه هو اكبر مني ما احب اتجاوز عليه فساكت منه وهمين الاشتر ما يقبل واحد يضغط عليه ومسايسه ولو هو مطي مو مال مسايس

...............

رنا

امي كالت اريد اروح احجي ويه ام حسن عن كوثر وعن الي ديصير هي ما رادت توصلها للولد لان امي ما تحب المشاكل بس كالت ام حسن بمثابة امها واكد ما ترضا بالغلط

فخلينا ورحنه اول ما دخلنه لكينه حنان كاعده مغنتبه وضايجة ما اعرف شبيها مع العلم جدو اجه من العمره وجاب الها شنو تريد مدللة دلال بس هي ما اعرف شبيها اليوم ضايجة

سلمت عليهن كلهن وجاستن جان مدد على السجاده وبيده الريمونت كال ببراءه .. رنا ما اكدر اكعد تعالي بوسيني

امي ضربته على راسه بالكوشه كلتله .. ولك شنو تبوسك اشو انت متستحي انوب كدامي ولا يكول اني امها

عدل كعدته وحط المخده بحضنه كلها .. شوكت ناويه تزوجيها اليه مو انحرفت

ضحكت امي كلتله.. انت شعاجبك بيها شو كومة بنات يفترن عليك بالسنتر ما تخطب منهن

رد بغضب .. افا واعوف رناوي لج ام حارث احبها صح هي ما بيها شي ينحب بس بعد شسوي الحب اعمى واثول

جاوبته بقرف .. خاب دروح يحبني هو لا احبك ولا اريدك

رد عليه بعدم اهتمام.. طبج مرض ظلي عنسي

عفته ورحت كعدت يم حنان كلتلها .. شكو حنون اشو مفعله وضع الطنگوره

جاوبت .. لا ماكو شي بس اني ضايجة اكلهم اجلوا عرس كريم فد شهرين بين ما اعدل وجهي ما يقبلون يردون هذا الاسبوع

فتحت عيوني مصدومة.. لا جذب لج شلووون بعدنا حتى ملابس مثل الوادم ممشترين شنو هالسبرايز المفاجئ هاي شنو احس انضربنه بوري

ردت بقهر وحقد .. اي غير ايـــــــــو العوجه ام حلك الاعوج تريد هسه تعرس فلفلت والله شنو اخاف جدو يموت وما اسوي عرس مثل ما اريد عساج متي انتي وجدج وافتكينه منج

ضحكت باستغراب من دعاويها .. هه لا يمعوده صدك جذب لا تدعين عليها خطيه هم حقها تفرح بزواجها واذا صدك جدها يريد يموت من حقها تتزوج وتفرح لان اذا مات يمكن ما تفرح مثل ما هو عدل واحتراما اله اكيد يكنسلون العرس

حنان بقهر .. يمعوده جذابه جدها عرج ما يطكه بس هي تريد تتزوج ام حلك انوب ذاك اليوم كتلها وين نافخة حلكج دكول لا تبيعي ( طبيعي ) اني ما انفخ لان اني اخاف من الابره اني ابره ب... ما ضاربه مو انوب بحلكي جذابه ام حلك تارسته فلر وتخبن عليه عبالها زوج

ضحكت عليها وخليت ورحت شفت امي راحت هي وام حسن دخلن جوه رحت وراهن لكيت ام تحجي ويه ام حسن وهي دكولها .. بس رنا ما تجذب وهذا الكلام سمعته نصا من لسان كوثر الايو

جاوبتها ام حسن باستنكار .. لا كوثر مو خبيثه وكوثر طيبه واصلا هي شدخلها بجيهان اصلا هو بنفسه كريم كال ما اريد جيهان من كعدنه وحجينه وياه وكتله تزوج عليها من تتزوجها ما رضا وكال ما مفكر بيها

كطعت كلامها كلتلها .. بيبي اي هذا الكلام بعد ما كوثر انطته نفي قاطع بعد هو كال متريدني فمن حجينه وياه اخر شي هو رفض لان جان يعرف ردة فعل جيهان

ام حسن بشراسه .. لا بس كوثر ما تجذب ومو خبيثه وبعدين شنو مصلحتها حتى هيج تسوي وتبعده عن جيهان لا أحس الموضوع جذب

اشرت على نفسي بصدمة .. يعني اني اجذب

كالت .. لا احتمال صدك جيهان ما تريد كريم واكيد ما قبلت بيه لان تعتبره بمثابة عمها وهي اصلا تصيحله عمو اي صح كوثر ممجذبه هي جيهان رفست نعمتها برجلها بعد شكو شسويلها كوثر تبوس ايدها فوك ما راضي بيها

امي تعصبت .. اكلج شنو الما راضي بيها خو ما ابنكم راح دز اخته يتوسل بيها ترضا بيه هسه منو الطلع يركض وره منو جيهان لو كريم ؟

سكتت ام حسن مجاوبت

امي كملت كلامها .. جيهان لو ما حلوه ومؤدبه وتجذب الرايح والجاي ما ابنكم كتل روحة ودز اخته عليها لو ما اخته لعبت لعبتها جان هسه عرسها

ام حسن .. لا بعد هو قسمته ويه آيات وايات ماكو منها مثقفه ودارسه وحلوه صدك بس كريم اخذله مره ومحظوظ بيها وبأهلها

كملت كلامها .. وانتي ام حارث سدي الموضوع مال كوثر ولا تسوين طلايب بين كريم واخته

ماما انتفضت من مكانها و وكفت كالت الها .. صدددك تحجين ام حسن لا والله ما توقعتج هيج عبالي معاتبه واجيت اعاتبج تاليها هيج تحجين هاي وانتي عمتي تاليها طلعت اني اسوي مصايب وطلايب مع الاسف عليج

خلت امي وطلعت وركضت وراها ام حسن وهي تبوس بيها وتتعدر منها كلتلها .. اعذريني ام حارث عمه بس والله مو بيدي اني احب كوثر وما اقبل واحد يحجي عليها وبعدين هذا الكلام راح وقته لان كريم خطب وهذا الاسبوع عرسه يعني مو معقوله نخرب عرس لبنيه ونكسر بختها بسبب كلام من الماضي

امي بحده .. اني ما كتلج خربي العرس ولا كتلج افسخوا الخطوبه بس جيت اعاتبج بس انتي انهديتي عليه عبالك عدوتج

باست امي وهي تتعذر منها كلتلها .. هسه عوفينا من هالكلام ومعزومين بعرس كريم وخلينا ننسى الصار احنه اهل وحبايب مو مال زعل خلينا نغسل كلوبنا ونعيش على حب الله

سكتت امي وبعدها اجه جدو هم عزمها على العرس بس كريم جان مموجود بالدوام

......................

سوليين

بعد مرور ايام جانن اخواتي كاعدات عندي مرات نروح الصبح كلنه نشتغل بالبيت ويجي الاشتر ياخذنه الحمدلله تحسن وضعنه شويه وتعودنه على بعض

من رجعنه بالسياره كال .. الجمعه عرس كريم وخابرني كلكم معزومين

انصدمت من كلامه حيل انصدمت درت وجهي على جيهان بسرعه وتلقائيا من دون سابق انذار شفتها تعصر باديها ودلاله على توترها

بللت شفايفها وباوعتلي بكيرياء وكأنها دكول لا تنقهرين اني كدها مو زعلانه

تنهدت ودرت وجهي ليكدام افيان كالت .. يله خوش صار النه قرن ما شايفين عرس هي بس عود سولين وحتى ما ندري شوكت تزوجت صارت مصايب

درت وجهي عليها .. انجبي بعدني مخطوبه ممزوجة عود بعدين اسوي عرس واعزمجن

الاشتر جان بس يستمع الاطراف حديثنه وما يحجي من وصلنه انقهرت على جيهان عرفتها دتصارع بروحها ودتبين ان هي بخير بس هي ابد مو بخير اصلا الرجفه اعتلت جسمها والحسره والضيق بين على وجهها

دخلن للغرفه واني دا ادخل صاح عليه الاشتر كال .. سولين تعالي اريدج بشغله

استغربت وخفت عزااا بس لا يريد يتمم زواجنا يعني كال شوف هاي مصدكة روحها مخطوبه عبالها اسويلها عرس هه شكد بطرانه خلي اغتصبها وحتى عرس ما اسويلها واطيح الفاس براس

وكفت محتاره اروح لولا وبعدها كلت اذا تقرب مني اعيط واستنجد بفافي واخليها تركعه بطابوكة مثل ما فشخت مصطفى

دكيت الباب كال .. ادخلي يبويه شيلي الكلافه

ابتسمت ودخلت لكيته دينزع بساعته باوعلي كال .. تعالي انزعيها ممسيطر

تقربت منه ولزمت ايده نزعتها بهدوء لف ايده على خصري وقربني عليه باوعتله بدهشه .. هااا خير

ابتعد شويه وهو يحك لحيته .. لا هيج ماكو شي اخذت ميانه

رفعت حاجب مستنكره كلامه ضحك وأتقرب مني احتضن اكتافي وتنهد كال .. سولين اريد احجي وياج بموضوع وهذا الموضوع مو هزل ولا مني هذا الموضوع اريدج تاخذينه بعين الاعتبار

عقدت حواجبي وباوعتله بنظرة تساؤل كال .. حجي اديب انسان راقي وصايم مصلي ويعرف ربه كلش زين خابرني وكال تحلمت بام زوجتك مو مرتاحه بمكانها

من ذكر اسم امي حسيت كلبي تكسر وتكطع وصل بلعت ريكي ودمعت عيني لا ارادي

كمل كلامه وهو يمسح دموعي كال .. حجي اديب كال سالتها ليش هيج حالج ليش ممرتاحه بمكانج منو وياج فهي مجاوبته وتبجي كايلتله بناتي

شهكت والدموع شلال من دمع ... لااا ليش احنه بالعكس انصلي الها ونصوم ونسوي كل شي يرضيها

رد عليه .. اي بس هي كايلتله الاسود الي لابساته دمرني وغيمة سوده عليه وجاي اتاذه من اشوفهن حزينات وقاتمات على كلبي بدموعهن وبالاسود خليهن ينزعنه ويبطلن بجي

رفعت عيوني الها والحسره بداخله كطعت روحي سألته ببراءة واني ارفع اصبع واحد.. معقوله نحزن بس سنه وحده على امي بس سنه؟

لزم اصبعي ونزله وهو يتنهد .. يبنيتي لو تلبسين عمر اسود مراح تحصلين شي غير تعذبين الراحو وتاذيهم والحزن بالگلب مو بالثوب انتي صيري عاقله ونزعي من اخواتج وهاي وصية ميت لازم واحد يحققها وهي لو ما متعذبه ما تجي للحجي ودكوله يعني هي طلبت بلسانها انتي ما تنقهرين عليها مو خطيه امج

حطيت ايدي على شفايفي وبجيت بصوت عالي .. والله ما احدر ما اكدر شنو هذا حزني على امي والله احس گلبي انكسر والله انت حاس بيه مو هيج

سحبني الصدره وحضني كورت اديه خليتهم على صدره مسح على ظهري وايده الثانيه على شعري كال .. الله يرحمها بويه هذا امر الله حرام الجزع ودعيلها الله يرحمها ويريحها ولا يغضب عليها

همست .. امين

بعدني شويه عنه ومسح دموعي ورجع حضني كال .. نروح اني وياج نشتري ملابس للعرس حتى نطلع كشخه واشتري لاخواتج هم وانزعوا الاسود

بلعت ريكي والشهكة بعدها بصدري جاوبته .. بس ما اكدر اعوف اخواتي هنا تعرف المنطقه مو زينه واخاف عليهن اني وانوب اخوك اخاف يهجم عليهن وهاي فافي مخبله تروح تذبحة

تخصرت بعدم رضا ... لا والله مو عساس اخوك مقصر مينجرع ومكروه وخبيث وحقيير وكل السوالف المعفنه عنده ويستاهل الطابوكة براسه يفشر على فافي عساس هو احسن منها يروح فدوه لفافي

لزم كصيبتي وهو يحجي بهدوء .. لسانج طويل اطول من كصيبتج

جاوبته بعناد .. ممجذبه

رد عليه بهدوء .. حتى لو ما احب تتجاوزين على اخويه

جاوبته .. عشتو شلون اخووو

ضحك على كلامي كال .. اخوي لو عار هم انقبله واظل وراه واصلحة

ضحكت بسخريه .. اي كعده يم الصراصير ودوحي وسوادي وهو ينصلح هه

رفع حاجب مستنكر كلامي كال .. مو اجي ابوس

وانهزمت وفتحت الباب ... ايييي منطقه طايحة حظ تلوگ لاخوك

ركض عليه واني ركضت بسرعه انهزمت منه ما اشوف اله انعت راسي وانسحلت من كصيبتي لزمت راسي واني احجي بعصبيه .. عوفني كطمت كصيبتي شنوو وخر عوفني

سد الباب ودارني عليه وهو يحجي ويعض بشفته بشغف كال .. خليني احصرج وادبج لان هاليام امورنه تمام وماكو عقوبات كله عقوبه خفيفه ماكو قصوى

باوعتله بعناد .. ترا ممجذبه اخوك ما عنده تربيه هاي يمكن لان مو انت ربيته لان والله صفاء احسن منه لان تربيتك وهذا لا تربية ساهر وتحسين اييع ينرادله فرمته

كرص خدي حييل كال .. يله حظري نفسج نروح نشتري ملابس

جاوبته باستنكار .. لا عفيه لعد واخواتي وين يظلن

كال بثقه .. باعي البيت هذا محاصر ومطوق من كل الاتجاهات ومشدد عليه حراسه لا تخافين ماكو شي

رديت عليه .. مو دخل علينه مصطفى وكعد يفشر

الاشتر ... اي عادي مصطفى مسموح اله يدخل هو واحد من سكان البيت

ترددت اروح وياه بعدها اخذني وراح وخلصها عليه .. تنطيني بوسه لا اگلب السياره وكل شويه متعاركين وهو راسه والف سيف لو يگلب السياره لو انطي بوسه

ويمشي بالسياره سريع ويركصها ويشخطها ويفحط ويخليني ادك والطم ويرجع يهدد تالي كال .. هاي هم صايره لو احجيها لمخبل ميصدكني اتوسل بمرتي على بوسه شنو هالظلم

حلفت اله بعد ما خله گلبي بيدي حلفت بس نرجع للبيت ابوسه واشترينه فساتين كلش حلوه وراقيه هو كال فلوسهن عندي بس اعرفه جذب مياخذ منهن دفع منه

وجبت فستان الجيهان يجنن تقصدت اجيب الها هيج فستان حلو وراقي واختاريت لونه بنفسجي فاتح وجان هذا اللون دارج وحلو واعرف هذا اللون يحبه كريم بس هي متعرف لهذا السبب اختاريت البنفسجي للحنه

....................

رنا

يوم الحنه

طبعا الحنه جانت باحد قاعات بغداد الفاخره جان كل شي من الطراز الحديث وكل شي على حسب الاصول البنات يركصون والديجي مشتغل وجايبات فرقه بصراويه يدكون ويركصون كل شي حلو وراقي

بصراحه ارقى حنه شفتها بحياتي جانت ايـــــــــو لابسه بدله بنفسجيه تكون مثل السمكة مخصرة لاخر الركبه وبعدها تكون منفوشه ومن دون اكمام ولابسه ذهبها ومسويه تسريحة بسيطه جان شعرها من كدام بف صغير وكذله حلوه والبقيه مفتوح ومبروم بشكل انيق وحلو ومكياجها فاتح وحلو ما بي اي مبالغه بس عدساتها اوفر جانن رصاصيات فاتح محبيتهن بس البقيه لا تجنن حيل نازكة وراقيه وجانت تركص على انغام الاغنيه المشتغله

وكوثر لابسه فستان طويل احمر وهماتين جانت حلوه وراقيه

وام العروس تجنن طالعه لابسه فستان ذهبي وفوكاه مثل البشت اسود وبيه ورد ذهبي وملمع ومسويه تسريحة وشعرها صابغته اشكر والعدسات

بس المصيبه حنينه حنان لابسه فستان ستريج طويل لونه بنزرقي مدري شني ما يعنرف لونه لا هو ازرك لا هو بنفسجي لا هو بهاري مدري شنو

وصابغه شعرها فافي مدري يا لون وخاطه الخطه الفرعونيه لعيونها ومسويه تسريحة ومخليه باروكة من جوه ما تشبه لون الصبح حرفيا سعلووووه

ظلينه نركص وهسه دخل كريم بس هو دخل يعني القاعه بس نسوان والعريس دخل وحده

كعد يم ايو ولبسها الذهب وكصو الكيكه وشربوا عصير

بس لحد الان ما اجن بنات خالي عامر وامي كل شويه وسالت عنهن اني هم ضجت لان ما اندمجت ويه العالم على الاقل اندمج ويه بنات خالي احسن من حبيباتي

ايو جانت تصحك وهي دكول .. لبست بنفسجي لان لون كريم المفضل

لزمت ايده وهو ابتسم الها وبعدها وجهه نظراته للمدخل مال القاعه وهو يركز بنظره واني على اثر انتباهه درت وجهي

شفت دخلت مثل الحوريه اول مره اشوفها بهذا الجمال ولو ما ملامحها حافظتهن ما عرفتها

وكف كريم وهو يتنفس بسرعه مسح وجهه بتوتر ورجع كعد وكل شويه ويسرق نظراته الها

جانت تمشي بثقه ونظراته تشع بالجمال جانت لابسه فستان بنفسجي مزوخ على جسمها ومبين منحنياته جان ردان وبالصفحه اليمنى كريستال فضي وهاينك يعني الرگبه ما مبينه وبيه فتحة بالجهه اليسرى واصله لنص الساق وطويل حييل يسحل وراها

ما. شعرها الي محد شايفه من سنيين طويله وحتى ايقنه ان ما عندها شعر او شعرها مو حلو بس خابت توقعاتنه وشعرها الي مسرح بشكل حلو واصل لحد ركبتها ولونه مثل خيوط الشمس ويه جمال وجهه وكأنها ايه من الجمال ومكياج خفيف بارز ملامحها الانثويه اول مره نشوفها بهذا الشكل وكأنها داخله تحدي وهي الفايزه من دون منازع

همست كوثر بخبث.. هاي جيهان الحيوانه لابسه نفس العروس بسيطة اني اعلمج

نهاية البارت .. يتبع

كونوا انتم كونوا بخير.. احبكم 💔

لا تنسوا التصويت والمشاركة بكم نكتمل احبتي 😍

ولكاتبه نورا ناصر والكاتبه وئام الشيخلي