رواية #وكر الأشتر الفصل الرابع وأربعون 44 - بقلم الكاتبه سمو العراق

بارت 44
رواية .. وكر الاشتر
بقلمي .. نور سمو العراق

💔💔💔💔💔💔💔💔💔💔💔💔💔

- وفجأة تصبح الاشياء التي كنت تُضحي من أجلها عابرة ، تمر بجانبها ولا تلتفت .!

..............................

سولين

هاي الانسانه مثل السوسه الي تنخر السن وتوصل للعظم وتتلف كل شي اذا ما تسممني بعيشتي ما ترتاح واني ما الي خلك الها ولا السوالفها

باوعتلها بطرف عيني ودرت وجهي منها قرفانه من وجودها ومن كل شي يخصها سلمت على اخواتي واجت سلمت عليه باستني بخدي

وكعدت على الارض على المخده وهي تكول .. اممم ما اعرف اكعد على الكاع اني متعلمة كولة اكعد على القنفه هاي انتم شلون عايشين هيج بلا قنفات

نطت افيان من يمها وهي تكول الها .. شنو شلون عايشين ليكون القنفات اكل وشرب حتى منكدر نعيش من دونهن

ضحكت وردت عليها .. هههه لا عمري بس اني لان ممتعوده على هيج كعده دا استعصب الامر يعني هسه اني مدا اكدر اخلي رجل على رجل

افيان بضحكة.. ههههه انتي كعدتج سنكوحيه احنه كعدتنه على كد حالنه

صفنت مستغربه هاي منين تجيب الحجي سنكوحيه شنو ؟ يله ما عليها عتب فافي

رجعت ضحكت سالي بصوت عالي... ههههههههه عمري دمج خفيف حبيتج

فافي.. بعد كلبي دام حبيتيني الا اصبغ شعفتج صفرة

سالي... هههههههه لا بشرفج ما احب الشعر الاصفر

تافئفت بضيق.. فافي روحي جيبي شي نشربه

كمزت من مكانها .. يااا شدخلني اني گلي الجيهان فقيره ما تحجي شي

جيهان  وكفت وهي تكول بفشلة.. عمري سولين دزيت امين هسه راح يجيب عصير

سالي .. لا عمري على شنو كلفتي نفسج اني المهم دا اريد اشوف سولين لان خطيه اخر مره عفتها متكسره وهي لحد الان ما تبشر بالخير صحتها

افيان بعدم رضا .. شنييي خيه سالي ضميرج  هم عطلان مثل ضميري شلون تكولين كدامها مكسره لا مكسره ولا شي بس هي تدلل على نسيبي اوي فديت نسيبي شلون مشتاقتله

سالي.. لا عمري مو قصدي والله متكطع گلبي عليها كل يوم اتصل بالاشتر بس والله هو ميطمني على صحتها يكول مو تمام لهذا السبب اني هيج حجيت

نفخت بضجر من كلامها ومن حقارتها شويه واجت جيهان جايه عصير وبسكت وطلعت هي وافيان وكالت الها .. عوفيها وحدها خليها تاخذ راحتها

شربت شويه وخلته مكانه وعبالك منقرفه من وضع بيتنا هو بنيان جديد بس هيكل لحد الان ما بيه لبخ ولا بيه سيراميك

باوعت بارجاء الغرفه وهي تكول .. اممم هاي شنو حيجي الشتا شلون هيج لحد الان هيكل طابوك هذا متعرفين شلون يذب عليكم برد من زروف الطابوك البخوا احسن بس هو ابوج وين فد واحد بخيل

حكيت شعري بملل ورديت عليها.. بعده مكامل بيتنا ان شاء الله يكمل انت لا تاكلين هم احنه نموت من البرد مو انتي

تنهدت وهي تكول .. تدرين انتي بعد مستحيل تمشين مشيه صحيحة وهذا كله بسبب الاشتر خلينه نكون واقعيين اني رغم حييل احبه واحترمة بس الحق يقال

ما عنده مبرر التصرفاته كعدج ببيت زباله وتصرفاته وياج مو منطقية ما عنده ثقه بيج وكاتم عنج اسراره وكل شي يخصه ترا الزواج تبادل مو اعتكاف وهو معتكف بروحة عنج

اني دائما اكون ضده واحجي وياه واكوله اذا تحبها احجيلها كل شي ليش هيج ما تسولف الها عن موضوع امها

ودائما يرد عليه ... لا هي مو كد الثقه ما احجيلها اي شي لان هي تفضحني

رديت عليها بقهر .. بس شعجب تحجين لشي الصالحي واني اعرفج تكرهيني وتحبي يعني هسه اني لازم اصدك ان انتي هيج حجيتي وهيج تدافعيلي

ضحكت وهي تكول .. اني صح مرات اكون مستفزة وفعلا احبه ولحد الان بس اني ما احب الباطل والشي الغلط احجي عنه وحتى كتله طلكها اذا انت هيج ممرتاح وياها وهي تبيعك باول المشوار وانت متثق بيها

صفنت عليها بحسره جاوبتها .. ما شاء الله مصلحة اجتماعية صايره باعي لا تحجين وياه ولا شي اصلا احنه اكثر ثنين متفاهمين

جاوبتني .. تدرين انتي اصلا انخدعتي بكل شي اصلا اني تفاجئت من سمعت ان الاشتر تزوج وحده من بنات عامر والله بصراحة صدك انصدمت لان الصار ما يستوعبه العقل حتى ان الاشتر ياخذ وحده منجن وهو جان شاهد عن الي صار ويه امج

اشرتلها تجي يمي وهي اجت بسرعة وكعدت على طرف القنفه سالتها..شنو الصار ويه امي احجيلي بكل التفاصيل

هزت راسها بنفي وهي تكول .. لا تراجعت عن قراري تراجعت عن كل شي ما احجي اي شي يخص الاشتر مو اني ما اكدر لان بينه ثقه وبينه شغل ما اكدر اخون شغلي وياه افتهمتي عليه

ضحكت .. ههه هسه اتذكرتي بينكم شغل وامانه انتي شكد حيه ومنافقه

رديت عليه بثقه .. ههه عادي احجي اي شي بس اذا حابه تفهمين موضوع امج افهمي من غيري من ابوج مثلا ولا تستمعين للاشتر لان حيقدم مببررات لنفسه احجي ويه ابوج وشوفي الموضوع شنو

تنهدت وجاوبتها ... ما عندي كلام ويه ابويه واسمع لكل الاطراف بس اريد اسال هو ليش تزوجني

باوعتلي ودارت وجهها وهي تكول .. شوفي هو بحكم شغله حييل مغير من شخصيته بس هو يختلف الف وحده تتمناها بالخفاء بس بالحقيقه هو مشرد وصاحب مشاكل ومو فد شي بس اذا نرجع للواقع وبحكم شغله وياي راح نكتشف شغلات حلوه

لذلك جنتي طعم سهل اله ومن ضمن خطه جنتي لا عبالج يعني حتى يكدر يكمل خططه ويبين لخصمة ان هو استقر وتزوج ولحد الان يعاني من الفقر وتزوج وحده من اتعس خلق الله حتى محد يشك بيه من ناحية شغلة ومن ناحية كل شي ديسوي

صفنت عليها بحييره وهلع .. شدتقصدين مدا افهم شنو تحجين انتي احجي بشكل مباشر وعوفي الغموض والكلام الغير مباشر

ضحكت وهي تكول .. دا انطيج رؤوس اقلام وانتي لازم تفكين كل الشفرات اني ما اكدر احجي كل الكلام لان عليه مسوؤليه فلازم انتي تتحرين وره الكلام الي انطيته الج بشكل غير مباشر ولا تنسين الاشتر بمهمه

اردفت بخبث وهي تكول ... انطيج مثال عدنه شخص متخفي يشتغل ويانه بالدائرة مسوي روحة فكر حتى يوصل للي ايريده لذلك تدرين شيسوي يصعد على بايسكل يروح منا ومنا حتى محد يشك بيه وهذا اسمة ابو ياسر

يعني لا يغرج البيت الي بنصه تيل ولا يغرج البيت التعبان المحفر كل شي بداخله شي وكل شي مخفي عنج وانتي جنتي من ظمن الخطط

بلعت ريكي بصعوبه وقهر شلون موضوع يحز بالخاطر ويكسر الظهر دخت حسيت كلامها صحيح لان فعلا اكو هوايه اشياء مخفيه عني

وكفت وهي تعدل احزام بنطلونها ... فكري بكلامي عدل وشوفي اني شكد اريد مصلحتج وحاولي تدورين الحقيقة وين تمام

وهاااا امج موضوعها ظلم بظلم وهم ياريت تفهمين

خلت وطلعت واني احس دخت من كلامها وانقرفت منها ومن الاشتر ياريت يطلعون من حياتي هو وياها وكل واحد موجود وياهم اكرهم اتخبل منهم دخلوا حياتي دمروها ولعب بينا لعب

......................

جيهان

من بعد ما طلعت هاي البنيه الي اسمها سالي شفت اختي بس تصفن وما تحجي شي حاولت احجي وياها اطلعها من المود الي هي بيه بس هي جانت شارده بخيالها وجانت عبالك ما تسمعني

فعفتها براحتها وخليت ورحت دا اسوي غدا واجت عمتي ام حارث ورنا سلمن على سولي وكذلك هن خطيه ممخليات شي مجايباته وياهن

فاني كلت خليهن يتغدن يمنه وبعدين يرحن ويه ما دا اسوي غدا وفافي كاعده تحف بالنسوان اجت رساله من كريم باوعت شفته كاتب.. اسف طفت الكهرباء وانتي تراسليني

استغربت عزا هاي اني شوكت راسلته صخام بوجة فافي مراسلته وداكة اليتيمة انوب هو كايل الها اشو انتي كاتبه بالبايو اني علوم سياسية وبعدين من خابرتج دكولين هندسة كهرباء دخت

هي مجاوبته بضحكة.. هههههه اي مو اني عندي ثنين شهايد اني بصراحة من النوع الي احب الدراسه واحب ادرس وكل وقتي الدراستي لذلك دارسه هندسه وكذلك دارسه علوم سياسية

هو راد عليها.. زين شلون رهمتيها علوم سياسية تخص الادبي والهندسة يخص العلمي شلون كدرتي تدرسين بقسمين

مجاوبته .. هاااا اي مو اني علمي بس لذلك احب علوم سياسيه ودرستها حتى لو جان ادبي تتقبل الجامعات طلاب العلمي عكس الادبي محد يتقبلهم بالاقسام الطبيه والهندسية

مجاوبه ... اهاا تمام

فهي سألته... اي وانت شنو دراستك وشلون تعينت وشنو حالتك الاجتماعية وسنكل لو مرتبط

هو ممجاوبها بعدها جاوب وكال طفت الكهرباء وكعد يشرح عن قسمة

رديت عليه.. كولش حلو بس خطر دير بالك على نفسك اخاف يصير بيك شي

جاوبني بسرعه... لا بالعكس اني عندي خبره بشغلي لذلك ماخذ حذر ومتمرس على الشغله لا تخافين

كتبت .. اي بس مكلت مرتبط لو سكل( سنكل )

رد عليه وهو يصحح كلامي كال .. سنگل ما اعرف ليش مرات هوايه تسحكين ومرات اكتابتج مضبوطة

ضحكت عزا بس لو يعرف اني ما اعرف اكتب وفافي اسطه بالكتابه لذلك اني كومة عندي أخطاء املائية وهو دقيق بالإملاء لذلك هو يكعد يصحح اخطائي وفافي لا ابد ميصحح الها

بعدها كمل كلامة وهو يكتب .. لا ممرتبط بس اني جنت متزوج وخرب زواجي يعني صارت مشاكل بين الطرفين ما تفاهمنه وكل واحد راح بطريق الله يسعدها ويسعدنه

رديت عليه... اميين بس ولو فضول مني ليش تطلكتها يعني بس لان مشاكل

جاوبني .. والله يعني مشاكل سدي موضوعها ما يسوه نحجي بيه اي احجيلي انتي مرتبطه لو لا

جاوبته .. لا والله ممرتبطه ولا ببالي احد

رد عليه.. مرات احسج مو انتي نفسج تحجين وياي ساعه هادئة وساعه خبله وهواي تجفصين

ضحكت .. هههه لا هو اني نفسي

رد بشك.. متأكدة

خفت من كلامة جاوبته.. اييي هو اي يعني مزاج اني برج الدلو مزاجيه وتعرف مزاجيات الابراج بعد برج هوائي حسب الجو يشتغل

كتب.. احسج ترابي حيل هادئة

سكتت مجاوبته وهو اتصل اول ما اتصل قفلت الخط بخوف ورديت عليه.. بس بلا زحمة سيدي مدا اكدر افتح خط عمتي عدنا

كال .. هي وبنتها

انصدمت وكتبت .. شنو

كتب بضحكة... ههههه يعني اكيد عمتج لازم تجي هي وبناتها وانتن البنات تلتمن على بنات عمتجن هذا حال اعلب العوائل العراقية

ضحكت ..ههههه اي صح هو هيج بنات عمتي منتظراتني كل شويه يصيحن عليه

كتب.. بكدج ؟

رديت عليه... لا اصغر مني بالجامعة يدرسن

رد عليه.. اها الله يحفظهن يله روحي يمهن من تخلصين خابريني

جاوبته .. تمام ان شاء الله

خليت ورحت لكيت عمتي ام حارث تصلي بالغرفه ورنا كاعده هي وسولين تسولف عليها اثار انتباهي بكلامهن من كالت ... انتي تدرين بكريم يحب جيهان وهي كذلك تحبه اني سمعت كل شي

صفنت بكلامها وطرت عبالك صارت عندي جناحات وطرت بيها صدك كريم يحبني معقوله يحبني والله حنيته وكلامة وكل شي بيه يدل على حبه اليه وما يدل على عطف بس ليش ما خطبني ليش اختار غيري وكسر گلبي

رجعت كالت ... بس تدرين ام حسن وكوثر مستحيل يخلن كريم يتزوج جيهان ام حسن لحد الان تقلل من قيمة جيهان كدامة وتكوله اذا تزوجتها تزوج غيره لان مشوهه مو مال تخلص عمرك ويه وحده مشوهه

فتحت عيوني مصدومة ومرعوبه من كلامها حسيت برجفه سحبتني لليمنى ورجعت بيه لليسرى شلون هيج كلام يجرح وياذي ويفقد الشخص قيمتة بنفسه خلني اكره روحي وفعلا دائما اشوف بيه عيوب ما اتقبلها بنفسي شلون كريم يتقبلها بيه وهو مشايف منهن شي

سولين انتفضت ضد كلامها وهي تكوله.. وبالناقص منهن اصلا هن ذن شنو حتى يحجن على اختي لا ام حسن ولا الاكبر من ام حسن هو كريم اذا يحبها فعلا يخطبها ويتزوجها ويوكف وياها ضد الكل لا ام حسن تمنعه ولا كوثر

ردت عليها رنا وهي تكول.. تعرفين شنو ام حسن ورنا اتفقن ويه حنان امها تعرف وحده كشافه حتى تكفخ كريم من جيهان لان يكولن هو هاليام ما عنده سالفه غير جيهان واحنه ما نريد ناخذها

احس انصعقت من كلامهن وما ادري شوكت بجيت دموعي تنزل واني ما ادري بيها لهلدرجة اني مقرفه حتى ما يردن حتى اكون زوجة لابنهم يعني لهنا وصلن يسون حتى يكفخن الرجال مني زين شنو فرقهن عن ايو والي سوته ايو واشو ام حسن وحنان صارن شريفات شلون ايو تسوي سحر وبس الساقطه تسوي سحوره هسه شنو فرقهن عن ايو

وليش ما يردني لكريم لان محتركة يعني هيج لازم ينهن حياتي زين لو امة موجوده هم تسويله سحر وتبعده عني؟ لا مستحيل لام ما تسوي لابنها تخاف عليه ممعقوله تسويله هيج شغلات تخوف

مشيت بحسرتي وروحي ذبلانه صارت عندي ردة فعل شلون اتزوجة اخاف عليه واخاف على روحي ما اريده يتاذه ابد بسببي محد يخاف عليه كثري والله لا عمته ولا اختة اني احببه حييل ما اريده يتاذه بسببي

كملت الغدا واني روحي ذايبه ومجروحة احس نفسي مكسورة نصين بسبب الي صار احس مختنكة حييل احس نفسي نكره

دخل ابويه وهو متعصب مدري شبيه يغلط ويسب عمتي خطيه خافت احتارت وين تظم نفسها منه وكذلك رنا

هو من شافها تخبل انجن باوعلها وهو ياشر عليها بحقد .. هاي شنييي هاي منو جابها هنا شتريد جااااااايه شعندج جايه ولج

ردت عليه عمتي بخوف وارتباك وهي تكول... على كيفك خويه على كيفك جيت اشوف سولين

شال الكرسي وركعه بالكاع وهو يصيح ... انعل ابوج لابو حتى سوليين امشي اطلعي برااااا اطلعي برا ما اريد اشوف وجهج ما ارييييدج هنا بت النعال بت الزمال ام اللگم ظاله ملطلطه من بيت لبيت تدورين بيت يلفيج حتى تاكلين بيه يالفكر امشي اطلعي برا الدايحة ام البيوت

بجت وهي ترد عليه .. على بختك خويه اجيت اشوف بنتك لان مريضه بس انت ما تصيرلك جاره واني ام اللگم ولك اني ام حارث الكل تحلف براسي وانت هسه جاي تعيرني وتتصيح دايحة بالبيوت واني اختك عرضك

سحبها من عبايتها وطردها برا البيت ورنا تخبلت كلتله.. طاح حظك يا عار يا ما عندك خجل انت صدك واحد ما تستحي وحقيير

هو شمر نعاله عليهن ويصيح.. امشن ساقطات كح.. تردن تعلمن بناتي على السوالف المو زينه

عمتي تفلت عليه بحقد صدك ما تحملت وتفلت عليه وهي تكوله .. تف عليك وعلى ساعة السوده العرفتني بيك يا ما تستحي يا ما عندك خجل يا عار على الزلم

طردهن برا البيت واحنه ظلينه نلطم من الخجل وسولين تخربطت شكو سالفه ما بيها خير يسويها شلون فشلنه ويه عمتي وطردها ما تصير اله جاره ابد اببد ....

.......................

صفاء

جنت اني والاشتر كاعدين بالبيت القديم وجان عايد كل شويه يتصل بيه ويحجون سوه بعدها اندك الباب واني رحت فتحته دخل عايد وياه ثنين شباب و وجههم منكرش وبيه حبوب وشكلهم مطروده منه الرحمة واحد منهم مكسور سنه واكع كله والثاني اسنانه كلها مسوسه حتى الاماميات شكلهم حيل مقرف ويلعب النفس

دخلوا جوه وسلمو على الاشتر وكعدو سويه عايد كال للاشتر .. هذول الشباب الي يردون يشتغلون وياك

هو جان كاعد ويدخن وكباله طاوله كله .. اي اهلا وسهلا بيهم اتشرفت والله شسمهم الجماعة

رد عليه واحد منهم .. اني اسمي سكان وهذا صديقي دوش

الاشتر بهدوء .. تمام اهلا وسهلا بيكم وخلونه ندخل بموضوع شغلنه احسن اني تاجر سلاح واريد اشتري منكم كمية من السلاح اسفرها للبصره وهناك يستلموه مني فعايد كال ان انتم ما شاء الله عليكم تبيعون اسلحة

رد عليه واحد منهم وكال.. اي واذا تريد نعرفك على جياد وزياد هم همات ويانه يشتغلون بالسلاح ويصدرون

الاشتر بجمود.. لا حاليا اريد بس انتم اشتغل وياكم واذا وثقت منكم ان شاء الله اشغل الجماعه وياي

وبعدها قدم الهم كارت وهو يكلهم .. هذا رقمي ابو مالك تتصلون عليه ونلتقي بس باليل وهنا ومن دون معرفة اي شخص غيركم انتم الاثنين وهااا متجون من غير عايد

جاوبه سكان وهو يكول.. تدري احنه ما ندلينه المكان ابد ولا عرفنه هو من وين اجه لان جابنه من الافرع لذلك. مفهمنه شي من الطريق وهذا الطريق اصلا شبة مهجور

جاوبهم .. هذا مكان شغلي يعني بصراحة محد يندله غير عايد وغيركم وان شاء الله اذا وثقت منكم راح اطور شغلي وياكم واسحب كل السلاح منكم ومن دون ما انتم تصدروا للبصره وهذا الشي خطر عليكم

عايد كال.. هم جانوا اصدقاء سوادي الله يرحمة بس مات وهم لحد الان يبجون دم عليه

جاوب الاشتر وهو يكول.. الف رحمة ونور تنزل على گبره ان شاء الله بس اعرفه سوادي جان يشتغل وياي وصار خلاف على بينه وبعد ترك الله يرحمة

صفنت على كلامهم وحسيت بيه لغز هو ماكو مستحيل اخوي ما يشتغل بالاسلحة بس اعرفه هذا مخطط منه حتى يتخلص من ولد تحسين ويفرغ لتحسين وساهر

ظل يحجي وياهم واتفقوا على هواي شغلاتت وجان يريد الامور متستر عليها مو مكشوفه

بعدها من راحو هو خابر على واحد اسمة كزاره وهو يكوله ... كزاره طلع حارث من الحبس وكله الرساله وصلت للاشتر وهو يعرف بالرساله من زوجته بس جان يريد يستلمها بيده

قفل الموبايل وخلينه وطلعنه يريد يروح السولين حجيت وياه بتنهيده .. اشتر اريد احجي وياك بموضوع

رد عليه .. شنو هذا الموضوع

جاوبته.. سولين حيل ما متقبله تصرفاتك واموضك وياها وتحسك غريب عنها هيج فهمت منها وكذلك اريد اعرف شنو سر الرساله الي دتحجي بيه

جاوبني..المصلحتها هذا الغموض ما اريدها تتاذه اخاف تتعرض لكل شي لذلك اني ما اخلي اي سر عندها وسر الرساله هو سولين طلبت مساعدة ابن عمتها بوكت اني جنت خاطبها وهي صارحتني بهذا الشي واعرف موضوع الرساله بس وعرف حتى المضمون بس ردت الرساله عندي وسايرت حارث وهسه استلمتها من اخو كوثر وعرفت هي كوثر الي ما سلمت الرساله وطعنت سولين لصالحي

جاوبته .. بس سولين ما تحبك

باوعلي بطرف عينه وهو يكول ... جانت تحبني ترا بسبب ابوها خرب كل شي واكيد لازم اصلح كل شي وهمزين ذكرتني خليني اخابر ابو ايه

عقدت حواجبي ورديت عليه... شعندك ويه ابو ايه

رد عليه.. مو قدمت السولين بجامعة اهليه تحليلات مرضيه واريد اشوف قبولها طلع لو بعده وكذلك اريد ادفع بقية القسط ما اريد كل يوم دافع قسم

ضحكت... هههههه يعني عبالك بهيج تراضيها تره هي حيل مكسورة منك

جاوبني بتنهيده.. اقل شي ممكن اقدمة الها وان شاء الله اصلح كل شي ومن راح احجيلها راح تفهم ان اني مو قاصد الي صار بأمها

نفخت بضجر ورديت عليه.. شنو هسه انت مو لازم تروح الها

رد عليه.. اكيد بس خلي اخذ الها عشا من المطعم واخذ الها شغلات تحتاجها

خلينه ورحنه وصدك هو جاب الها كل شي تريده وخله وراح واني وجعت خابرت مصطفى ورحت يمة هاليام متخبل مدري شبيه بس يصيح ويغلط وروحة بخشمة

.....................................

سولين

جنت كاعده اباوع على اختي وهي تحجي جيهان تتذمر من تصرفات فافي وتنتقدها تكول حيل متخبله وتصرفاتها مو منطقيه ومتخبله وكذلك يعني تحسيها طالعه عن الطريق تتلفظ كلام اكبر منها ووهاليام مخلصتها ويه مصطفى اخو الاشتر الحمدلله صار كم يوم متزاعلين لج ما تكعد هسه تذبنه بتهلكة

رديت عليها بصدمة.. عزا بعينها كون هاي صدك تخبلت شوداها المصطفى هو مصطفى اخو الاشتر ما كدر عليه انوب فافي صدك تحجي هاي لج هو هذا مكبسلجي وشراب عرك انوب ابو ملاهي ونسوان وممخلي دوله مرايح الها هذا ساقط مو مريح

جيهان .. والله شكولج يا سولين جذابه منافقه تألف قصص يعني حالتها مو طبيعيه لج اخاف عليها لا تودي نفسها بتهلكة انوب وين ننطي وجهنا اذا صار بيها شي

اني انتفضت من مكاني وتعصبت .. والله اذا ما طيحت حظها فلا اطلع سولين هي ما تخاف بس مني بس خلي اطيب واني اعرف شلون اتصرف وياها الخبله هاي استهترت

اندك الباب وراحت جيهان فتحتهادخلت وهي تكول.. اهلا وسهلا تفضل تفضل اي سولين كاعده

سمعت صوته وشمئزيت منه شجابه اني ما اريده انطه كل العلاليك الجيهان وهي راحت وهو اجه كعد قريب مني حضني وهو يبوس بخدي ويكول .. شلونها گليبي

جاوبته بقهر.. زينه الحمد لله عايشه كل شي ما بيه

قربني الصدره اكثر وهو يكول .. مشتاقلج خو ما عامر زاعجج او مسويلج شي

هزيت راسي بنفي واني عاقده حواجبي بحده وانزعاج واضح على ملامحي

باس خدي مره ثانيه وهو يكول.. شحده ياذيج ما رايد روحة والله حتى ادفنه بالاساس مال البيت

باوعتله بعصبية... اي هي هاي سوالفك قتل دمار انهيار

عض شفته وهو يكول ... انهار من اشوفج تصدكين

درت وجهي ضايجة منه مجاوبته كال.. يله لازم تصيرين زينه حتى شنو اخذج للجامعه لان سجلتج تحليلات مرضيه

باوعتله متعصبه.. ومنو كلك تسجلني اني ما اريد اسجل بهيج قسم اريد ادلة جنائية

رد بضحكة.. يابه الادله الجنائية بيها دورة ضباط ستة اشهر

جاوبته .. وشنووو يعني اصير ضابط مثل سالي واعتقلك واذبك بالسجن انت وابوي حتى تكملون صداقتكم بالسجون اكثر مكان يليق بيكم

رد ببرود.. لا لغيت طلب الصداقة وياه ما بينه اي صداقة

باوعتله بحقد ومن بين اسناني حجيت ... انت منو وشنووو

نفخ بضجر وهو يكول .. اني حبيب سولين

جاوبته بغضب.. مو حبيبي ولا شي وهااا اني مو حدخل كليه اتطلك منك واتزوج طالب جامعي مثلي احسن

كال ... اهااا ليش منو راح يطلكج وترا الجامعه اهليه يعني ادفع قسط يعني

رفعت حاجب.. وشنو تهددني بالقسط وبعدين انت تدفع لكامل السنين لان يعتبر مهري بعد الطلاق يعني يعني هاي حقوقي

ضحك وهو يكول... ليش هو انتي مسلمتني حقوقي حتى تدورين حقوق ست سولين ؟

رفعت اكتافي بخبث واني اجاوبه.. جنت كدامك ما اخذت حقك جدا اسفه ضاعت الفرص بالحقوق عليك استاذ اشتر

بلل شفايفه بخبث وهو يكول .. حقوقي اخذهن قبل الطلاق ولازم يعني مستحيل ادفع على البلاش مو صح

رديت عليه باستنكار .. وشنو اني سلعه عندك لو سيارتك حتى تريد تستهلكني وتقبض حقك

ضحك وهو يحول.. لا صايره زينه الحمدلله تحجين وتحاورين وتخبثين وتتشمتين

جاوبته بعدم معرفه.. دا ابين الحقيقه الك جان كل شي كدامك بس متعرف تستغل الفرص

عض شفته ولزم وجهي بثنين اديه وباسنييي حييييييل خنكني رفست برجلي وهاج الوجع عليه

ابتعد عني واني متوجعه عطت بيه .. رجلي توجعني انت شبيك ما تحس انت ناوي تموتني

غمزلي وهو يكول .. لا اريد استلم باقي حقوقي سويتيلي واهس وذكرتيني بيهن

مسحت وجهي بتوتر ورديت عليه.. انت ناوي تستفزني واني ما الي خلك الهاي السوالف طلكني من دون مشاكل

رد عليه بخبث.. بوسيني واطلكج

جاوبته بقهر.. جذاب وتضحك عليه ادري بيج

ابتعد عني وهو يعدل بسترته يريد يروح كال .. اي عفيه همزين تعرفين اضحك عليج ويله طيبي حتى اشتريلج ملابس للجامعه تخبل

رديت عليه بحده وعصبيه والم.. اي بالجامعه واعرج ما اروح ولا اداوم روح انت داوم كثر شهايد

تنهد وهو يكول .. لا ان شاء الله متعرجين كل شي راح ينحل صدكيني اصلا من رحت للجامعه وشفت الطالبات ايقنت انتي اجمل طالبه جامعيه لعاي السنه او بهاي الجامعه

جريت نفس بغبن .. شكد سهل الحجي اسهل منه ماكو

تقرب مني وهو يكول .. بس صعب تعجبني بنيه وانتي عجبتيني

ضحكت بخبث... تزوج سالي تفيدك

بلل شفايفه وهو يكول ... اووووه سالي بيش الكيلو كلبي اسود عليها وابيييض مثل الثلج عليج

نزلت عيوني واني كوه اتنفس وبصعوبه حط ايده على صدري وهو يحول .. لا تفكرين هواي ولا تاذين نفسج كل شي يتصلح واحبببج احبج بكد امة محمد

احتضن وجهي وهو يكول .. اني جبت الج كل شي بس كون تكونين راضيه ومقتنعه ولا تاذين روحج يا روحي

طلع فلوس من جيبه وخلاهن بيدي كال .. هذن الج واني كل يوم اجيج

رفعت راسي وحجيت .. اريدك بموضوع

قلص عيونه وهو يكول .. اي شنو الموضوع الي ترديني بيه

بللت شفايفي بحيره وكتله.. اريدك تخلص فافي من مصطفى لان اخاف منه وهو مو محل ثقه وهي نهار كله اتصالات وياه راح تنحرف وتطلع عن الطريق انوب هسه الكاها بالملهى تدك وتركص وياه كل شي تطلع منها هاي بعد دام رافكت صافي

ضحك وهو يكول .. اختج ما تكعد ليش ما كطعت علاقتها بيه اني مو وصيتها وكتلها احضري بس ولا يهمج ان شاء الله احجي وياه واخلي يبتعد عنها اني هم ما اريد مشاكل النسابتي واخوات مرتي الحلوه

شتت نظري وبعدت ذهني عنه وبعدها تقرب مني وباس راسي وضمني الصدره وهو يتنفس سريع

ابتعدت عنه وكلبي يدك سريع وهو حس بنفوري فودعني وراح واختي خطيه جابت العشا وكتلها صيحي فافي وامين خلونه ناكل سوه وصدك اكلنه سوه وجيهان طلعت فافي وامين وطفت الكلوب عليه وخلتني انام

جنت افكر ابوي ليش هيج حقير وياي حتى ما صدك جذب كال الحمدلله على سلامتج ليش هيج وياي ولو هو مو بس وياي هو ويه الكل هيج هو رب الطرد اخته وفشلنه وياها وهي جان تشوفني والله خلاني ارجف من القهر حتى ضلعي احسه طلع من مكانه من القهر

حسيت بحركة بالغرفه درت وجهي وشفت خيال ضخم خييم عليه باوعت ما ميزت هذول ثنين فتح الكلوب وهو يكول .. تفضل عيني تفضل ادخل هاي هي كدامك

باوعت بسرعه وشفته من الخوف احس كلبي طلع من مكانه وضلعي طفر من صدري هذا الوجهه اكره هذا الي جوه شفتي بالجكاره شعنده شيريد مني وليش ابوي دخله عليه يمه كلبي راح اموت

نهاية البارت... يتبع

كونوا انتم كونوا بخير .. احبكم 💔

مو تنسن النجمة الزركة

واعتذر عن قصر البارت وعن التاخير ان شاء الله باجر اعوضكم ببارت طويل واحداث جديده وطويله تدللوا 🥰🥺❤️