رواية #وكر الأشتر الفصل الثامن وأربعون 48 - بقلم الكاتبه سمو العراق

بارت ٤٨
رواية .. وكر الاشتر
بقلمي .. نور سمو العراق

💔💔💔💔💔💔💔💔💔💔💔

"أكادُ أُجزِمُ بأنَّني العِلَّة .. كُل شيءٍ تَلمسُه يَداي يُصبح مُلطَّخاً بالحُزن".

غلسوا على السحك البارت طويل جدا 🌚

.......................

جاسم

جنت بالسنتر مخبوصين ناجر بدلات ونرغب العرايس بالبدلة بعدها تعبت عفت الشغل  على العمال ورحت للبيت اول ما دخلت واني اسمع صوت العياط والصريخ

دخلت اركض مثل المفزوع واشوف عمتي ام حسن ورنا وام حارث وكرثر وحنان كلهن مجتمعات ويعيطن وگلابات الامة گلاب

صحت بيهن بصوت عالي .. شكووو شبييجن شصاير ابوي صار عليه شي

ردت عليه عمتي آم حسن وهي تلطم ... لا يمممه كريم كريم مدري ميت مدري عدل خابرونه كالو انفجرت عليه عبوه

فتحت عيوني مصدوم واحس رجليه ما كدرت اوكف عليهن كلش انهاريت ركضت عليه رنا ولزمتني كال بخوف .. جاستن ان شاء الله ما بيه شي كولوا يا الله

رديت عليها بغضب .. شلون ما بيه شيي شلووون لج هو بنص المفخخات اذا مفجوره عليه مفخخه شظال بيه

اتصل موبايلي رفعته شفته رقم غريب ما كدرت ارفعه ولا كدرت احجي كلمة وحده خفت حييل خفت انصدم بموت اخوي واني ما عندي غيره وكريم مو مثل اي اخ كريم سند اخوي الجبير عكازتي وتجايتي

رديت عليهن بحيره وحسره .. ما اكدر ما اكدر افتح خط اخاف صاير شي

جان موقفي اضعف من موقف الموجودات حييل خفت وقلقت شجعت روحي وحجيت بصوت يرجف ... الووو الووو

رد عليه .. احنه من مستشفى ال( ... ) النقيب كريم تصوب ببطنه ودخل عمليات نزيد كافة مستمسكاته

جاوبته برجفه وقلق.. بيه شي عدل فدوه احجي ما بيه شي طمني فدوه خويه

رد عليه بهدوء .. ان شاء الله ما بيه شي هو حاليا بالعمليات لان اضطرينه نطلع الشضيه منه على العموم تعالو للمستشفى وكملو باقي الاجراءات

قفلت الخط وركضت بسرعه واني اطلع كل المستمسكات والفلوس وطلعت اركض وام حارث وحوثر وعمتي ام حسن وراي وهن يبجن

ظلت بس رنا وحنان بالبيت وحنان تدك وتلطم وتبجي و وجهه اصفر وشعرها اصفر جيس كركم ويلطم

اول ما طلعنه ونزل ابوي من سيارته وجهه مخطوف وذايبه روحه كال .. كررريم بووويه كريم مصوب وليدي عينوني على كريم ما اكدر امشي على رجليه

لزمته واني اهدي بيه .. اهده بويه والله ما بيه شي هسه حجيت ويه الضابط الي سلمهم للمستشفى وطلب المستمسكات كال ما بيه شي صدكني بويه

حضني وهو يرجف .. بوو بويه فدوه اروحلك بويه بس كلي اخوك كريم عايش ما مات بويه والله اموت وراه انه اموت ما اتحمل بعده عني انه يروح لشغله احسب اله ساعه ساعه

بست ايده واني اطمنه .. والله ما بيه شي كال مصوب ما بيه شي وداخل عمليات ان شاء الله هسه بس نروح يطلع من العمليات

ركبنه بالسياره كلنه وخلينه ورحنه اول ما دخلنه للمستشفى جانت طياره ناقلتهم من مكان شغلهم لمطار بغداد

ثنين ضباط مستشهدين وهو متصوب وبعد ولد عسكري وياهم هم متصوب وحالته ممستقره

حسب ما سمعنا من كلام الضابط الي نقلهم والممرضين

خطيه واحد منهم ما لگوا اله جثه طاير صاير وذر لحم وجمعوا بكارتونه الضاهر هذا الشاب هو بعمق الانفجار

واصدقائهم يبجون ويلطمون واهاليهم على يصبرهم على بلاواهم يكسرون الخاطر اخذوهم نقلوهم للطب العدلي

واحد بيهم جان صارله عشرين يوم من متزوج والله من شفت جنازته طلعت واهله يبجون ومرته تبجي احس الموقف يدگ بگلبي وبجيت عليه من كل گلبي حتى ابوي بجه وياهم وكعد يواسي بيهم ويصبرهم

كعدنه ننتظر كريم يطلع من العمليات بس طول وذاك الولد الي وياه نقلو بالعناية

اجو الضباط والعساكر وهم يتطمنون على حالة كريم

واحد منهم جان وياهم هو سولف الانفجار كال .. احنه جنه كاعدين وجنه بمزرعه  جانت ملغومه مرات يجي قطيع مال ابقار لذلك احنه مسيجيها

والنقيب كريم جان دائما يفكك بيها والحمد لله الامور ماشيه طبيعيه وعدنا ضابط ويانه وهو نفس اختصاص النقيب كريم وهو كعد يفكك الالغام الموجوده

والضاهر هو خطا بالاسلاك فانفجرت بيه احنه ما شفنه الا هو صار وذر مال لحم وطار و وضابط ثاني خطيه جان قريب منه بس النقيب كريم والعسكري الثاني جانوا بعيدين وتصوبوا

ابوي مسح وجهه ورفع اديه للسماء وهو يكول .. الحمدلله الف الحمدلله يارب بهاي ولا بغيرها الحمدلله ياربي نذر عليه اذا كريم طلع بالسلامة اذبح عجل لوجهه الله تعالى

ظلينه منتظرين تقريبا ساعه واجه الدكتور كال .. الحمدلله على سلامته تعده مرحلة الخطر وطلعنه الشضايه من بطنه وان شاء الله خير

تشكرنه من الدكتور وظلينه واكفين منتظرين شوكت يدخلونه عليه ونشوفه بس الدكتور ما سمح بهذا الشي وكال خلو يرتاح بعيدا عن النفس والضوضاء

شويه واجه حارث خطيه ما قصر راح جاب عشا واجه لان ظلينه لليل

ومن بعد ما اجه حارث اجه الاشتر هو واخو سلم علينه وتحمد لابوي عن سلامة كريم

وحارث من شافه تخبل مو غيره ولا حبا بسولين بس هو ضايج لان اخر مره اخذه وخلاه يومين عنده وظل يحجي وياه بخصوص اقاربه

لذلك هو حيل ضايج منه وتالي خله وراح والاشتر هم ترخص لان كال سولين وحدها ومريضه اخاف عليها اترخص منه وراح

.......................

سولين

كعدت الصبح لكيت صفاء كاعد على القنفه يلعب بموبايله سلمت عليه .. صباح الخير

سد موبايله احترام اليه ورد .. هلا خويه صباح النور همزين كعدتي حتى اعرف شتردين ريوك

ابتسمت .. بكيفك عادي انت شتاكل اني اكل

رد عليه.. راح اجيب لبلبي وصمون حار ..كلش احب هاي الاكله تحبيها انتي؟

هزيت راسي بقبول .. اي احبها يله روح واني حسوي جاي

جاوبني بسرعه كال.. لا لا لتعبين نفسج ابد اني اسوي جاي انتي مريضه ما تكدرين هسه ارجع واسوي

رديت عليه بضحكة .. لا والله شدعوه شبيك ما بيه شي عادي الامور طيبه الحمدلله وصحتي زينه

ابتسم كال .. ان شاء الله دوم زينه يله خليني اروح

طلع من البيت واني اباوعله شكد انسان نقي وهادىء ولطيف كل شي بيه لطيف وحباب

والله جنت عبالي فد واحد مستحي او عفطس وهتلي يبوو ومن اجه شكد عيب شلون رزلته وشلون تعاركت وياه وهو حتى ما فتح حلگة بكلمة واني لحد الان ممعتذره منه على الصار

دخلت للمطبخ جان الجو بارد شويه دفيت نفسي  على الطباخ وغسلت القوري سويت جاي وحظرت الصينيه طلعتها خليتها بالصاله وفرشت بساط وانتظرته يجي وهو ما اتاخر شويه واجه كعدنه نتريك ونسولف

حجيت وياه .. شنو اخوك شو ماكو وين يفتر

رد بضحكة .. هههه والله الله اعلم وين هو كعدت الصبح ما لكيته بس الضاهر هو بشغله

سكتت وظليت اشرب جاي هو حجه ويايه بنيره هادئة.. سولين عندي موضوع وياج

باوعتله .. اي شنو الموضوع

كال .. بصراحة اني كلش حاب تخلصين جامعتج حرامات هيج ظاله انتي مو قدملج الاشتر وبدت المباشره مالتج ليش مترحين تباشرين ليش هيج ظاله

تنهدت ورديت عليه... تدري ليش لان ما اكدر امشي واعرج

ود باسف وهو يكول... انتي ليش تنهين حياتج بعاي الطريقه يا ما اكو ناس فاقده رجلها ونظرها ومريضه وهم يدرسون ويجتهدون ويكافؤون نفسهم انتي مثقفه ودارسه شلون تقبلين بهيج تفكير يعدم حياتج

وبعدين اشتر ترك شغله وراح سوه كل شي الج حتى تداومين جامعه ودفع قسط كامل وكذلك سوه الج مباشره ليش هيج ما تثبتين النفسج انتي كدها

باوعتلها وجريت نفس وزفرته .. ما اعرف يا صفاء احس ما الي خلگ للدراسه ولا عندي شغف لهذا الشي احس فاقده الشغف وما عندي واهس مثل قبل بالدراسه

كال بحماس .. زين عندي فكره ليش ما نروح اني وياج للجامعه ونشوف هناك شلون الاجواء يجوز تغيير رايج ها شكلتي

جاوبته بتردد وحيره .. هااا والله ما اعرف احس نفسي تعبانه واستحي ادخل للجامعه اعرج

نفخ بضجر وهو يكول .. يا خويه انتي ليش تربطين مستقبلج برجلج بابا هسه سوي نفسج رجلج مبيه شي وتمشين طبيعي تمام هسه خلينه نروح ونجرب شكو بيها

نزلت عيوني بحيره .. ما اعرف خليني اشوف الاشتر اكوله اذا قبل نروح نروح

رد عليه .. ميحجي شي اني اقترحت عليه هذا الاقتراح وهو ما حجه شي اني ما اخطي خطوه من دون علمة لذلك اجيت وفاتحتج بالموضوع وهو كلش حابج تدرسين

ضحكت .. تمام نروح باجر شنو رايك

كال .. لا باجر احد خليها لبعد باجر لان الاحد حيل ازدحام

هزيت راسي بقبول ورجعت اكل واحس بتوتر مو طبيعي بس سمعت بالدوام جنت شكد اتمنى اداوم بس هسه لا حييل ماحابه الدوام ولا الجامعه

باوعت للباب شفته انفتح دخل هو يمشي بثقه باوعلنه كال ... صبحكم الله بالخير يابه

رد عليه صفاء.. صباح الخير تعال تعال خوش ريوك والله

كعد على القنفه وهو يكول .. لا ما اريد والله متريك برا اي سولي شلونج

جاوبته .. الحمدلله زينه

خليت و رحت للمطبخ باوعتله من بعيد شفته يحجي ويسولف ويه صفاء وبعدها باوع للمطبخ ونظراته قلقتني عبالك مال واحد متوعد بيه

اجيت جبت مي انطيته الهم و دا اروح للغرفه هو كال .. شنو شو شفتيني وانهزمتني معقوله هيج وجودي يسبب ازمةً

باوعتله مستغربه من كلامة كتله .. لا مو هيج بس تعبت صار هواي كاعده وضهري يوجعني انت تعرف

اشرلي .. روحي ارتاحي

خليت ومشيت خطوات واحس اكو شي معجبني بوضعيته شبيه ليش هيج ديحجي

حسيت نفسي مو مرتاحه خليت ورجعت كعدت يمهم هو كال .. هاي شنو مو تعبانه روحي ارتاحي

هزيت راسي بنفي.. لا اريد اكعد هنا

ضحك بسخريه وهو يكول ... عنوديه برج العناد انتي متصير الج جاره

سكتت مجاوبته بعدها كال.. صدك بعد باجر ترحين انتي وصفاء للجامعه يعني وافقتي تداومين

رديت عليه .. مو وافقت بس هو كال خلينه نروح نشوف الاجواء

جاوبني بجمود .. اي روحوا شوفي الاجواء وان شاء الله خير ليش لا

وكف بعدها وهو يعدل ملابسه .. يله اني اروح عندي شغل

باوعتله بحقد .. كله عندك شغل بس اني مو من ضمن شغلك انت مو كلت احجيلج عن موقف امج والصار اشو لحد الان كل شي ماكو محجيت شي ليكون الك ايد بالسالفه وتدور على حجه تركع بيها السالفه

رفع حاجب بسخريه وهو يكول .. افااا ومن شوكت اني اركع الج على العموم ان شاء الله باليل اسولفلج

كعدت ضايجة يوميه اليوم باجر اليوم باجر ومخلصها جذب بجذب عليه هيج اني مو مهمه اله وحتى اوجاعي متهمه

اندك الباب و راح صفاء فتحه سمعته يكول .. اهلا وسهلا.. تفضلي تفضلي

ردت عليه وهي تكول بغرور ونبرة صوتها المزعجة .. الاشتر موجود رحت المكان عملة ملكيته

جاوبها صفاء .. اي موجود ادخلي اهلا وسهلا

باوعتله بسرعه دا اشوف ردت فعله هو باوع تجاه الصوت وطلع باكيت جكايره ويدخن

دخلت وكالعادة لبسها فاضح ومقسم ملامح جسمها انوب سمنانه وصايره حلوه وملامحها الانثويه بارزه

خرب دا اخس نفسي يمها عبالك طالبه بالابتدائية انوب ضعفانه ممسوحه مسح لا تقاسيم ولا ملامح انثويه

تلقائيا حطيت ايدي على صدري خرب بيج سالي انتي وتقاسيمج

سلمت عليه وكعدت رجل على رجل وهو واكف جان هم سلمت عليه

كلتله .. ها عيني اجيت عليك انت لحد الان محليت مشكلتي شلون اني اطل هيج مو حتى سمنت من كعدة البيت ممتعوده

ضحك ورد عليها .. لا ان شاء الله بالاسبوع الجاي تباشرين شغلج انتي كولي يا الله وترا شغلتج صعبه واني كلش دا ابذل جهد بس ماكو كتلج شغلتج صعبه وينزلد الها صبر تمام

تنهدت بملل وهي تكول .. ما ادري والله ما اعرف احس كولش جزعانه وبس لو اعرف منو خبر عليه جان عرفت شلون اتصرف وياه

رفع حاجب وسحب نفس وزفره بغرور وهو يكول .. اكي عداوه او شوفي انتي شمسويه احتمال انحرفتي عن مسار شغلج واشتغلتي العاطفتج بدل عقلج

عضت شفايفها بتوتر وهي تكول .. منحرفت ولا سويت شي غلط بس ما اعرف ليش هيج صار لك زين ما انسجنت ربك ستر

رديت عليها بسخريه ...اخاف مسويه عمل باطل وحوبة العالم هاي

ضحكت بسخريه وهي تكول .. لا عمري ممسويه شي باطل الحمدلله راضيه ربي واصوم واصلي وكولش نزيهه بشغلي والاشتر يشهد عليه

باوعتله وهو باوعلي بملل كلها .. هسه عوفينا من هذا الكلام ما يوكل خبز انتي روحي لمحمكة التمييز وشوفي شيصير هناك بس وداعتج وصيت عليج وكالو تهمه باطله عليها وان شاء الله ترجع الشغلها

وكفت وهي تتقرب منه اكثر بحيث ما ادري ما اعرف شحس من اشوف جسمها ولبسها مغريه الى درجة شنو السالفه ليش هيج حلوه

لزمت ايده بتوسل وهي تكول .. اي فدووه فدوه لا تعرفني انت تعرف شكد اني اشتغلت الصالحك وشكد اني وياك تطورنا بشغلنه مو مال تعوفني بأول الطريق

رد عليها باستنكار .. لا صدك جذب هو اني لو اعرف الي خبر عنج جان عرفت شلون انصرف وياه وشلون اعاقبه لج متعرفين شلون محترك كلبي عليج

رفعت حاجب من جذبه ونفاقه هو منو خبر عنها غير هو يمه عزا شكد جذاب انوب عينك عينك كدامي كاعد يسفط عليها جذب مرتب

ابتسمت وردت عليه .. والله اعرف بيك حتى اختي كالت الاشتر ديشتغل بكامل طاقته حتى يثبت برائتج

جاوبها بثقه .. اي جااا شلون حق الصداقه هاي

ما كدرت اتحمل ضحكت بسرعه وبعدها حطيت ايدي على شفايفي اكتم ضحكتي رفعت ايدي باسف كلت .. ههه لعفو اسفه مو قصدي تذكرت سالفه

باوعتلي بطرف عينها وهزت راسها باسى وهو حك طرف حاجبه وهو يكتم ابتسامته

خليت ورحت امشي للمطبخ دا اجيب ضيافه وييع اني اضيف جالي البومة لا مو من طبعي جدا اسفه

شفتها اجت وراي وهي تكول .. عمري عطشت اجيت دا اخذ مي

ارتجيت على الكاونتر واني اباوعلها اخذت الكلاص وشطفته وهي تضحك كالت .. اووع المطبخ جدا مقرف بصراحة شلون عايشه بيه

رديت عليها.. مؤقتا ان شاء الله لان راح اكعد بأرقى بيت

ضحكت وهي تكول .. ان شاء الله ان شاء لله

بس اوكلج ونبي كولش انقهرت عليج من شفتج تمشين هاي شنو عبالي عوجة خفيفه اشو طلعتي حيل تعرجين تفرين روحج فر اووف استغفر الله الله يعاقب من يكون السبب

باوعتلها وسحبت نفس وزفرته جاوبتها .. والله يا عيني هذا قضاء وقدر محد كان السبب اوك حبي

ضحكت وعافتني وراحت وبنطلونها اموت واعرف شلون لبسته حامسه روحها بيه حمس شلون تكعد شلون تتحرك ما ادري هي يمكن قماشه فيزون مو كابوي

....................

جيهان

جنه كاعدين طبيعي وافيان محتاره شتسوي دايخة بروحها

عاد اني شسويت جبت خيارات ابوي وسويتهن طرشي احسن ما نشمرهن ويخيسن والطماطه عصرت نصها خليتها بالثلاجه والقويات للزلاطه

وعدنا بيتيه وبيذنجان وكل شي مسواك كامل ثرمت نصهن خليتهن بالثلاجة حشو مال دولمة سويت تفريزات عشتو مو احسن ما يرحن للزبل

دا احفر بالبذنجان وافيان تحف وافكر هاي شنو كريم من كتله اني طب مخدرات اشو بعد لا دز رساله لا بصمة بس لا كال هاي ثوله وبعد ما يريدني

سحبت نفس عميق وزفرته .. بس والله مو قصدي اني مدارسه وما اعرف ولا طالعه حتى جنت شويه احجي ويه اخواتي هسه شويه احسن من رافكت فافي قبل احجي خرطي ما عندي معرفه بالاشياء مدمغة بالحياة

كملت الباذنجان وخليته بالثلاجة وبعدين رحت اخذت الموبايل ظليت متردده اراسله لو لا اراسل لو لا اخاف بعد ما يريدني احجي وياه وافشل نفسي

بعدها كلت خليني اراسل واشوف شنو القضيه كتبت .. مساء الخير

مجاوبني اصلا الرساله ما وصلت ما اعرف ليش دب القلق بجسمي واطرافي ظليت محتاره شلون معقوله حظرني

خليت ورحت الفافي شاورتها .. اكلج هو حضرني اخاف محضوره اشو ماكو موصلت رسالتي

غمتني وهي تكول .. شلون محضوره وحسابه عندج وبعدين لا ما تشوفين صورج كلها طالعه عنده

عضيت شفايفي بتوتر .. لعد اشو لحد الان ممجاوبني صار تلث ايام معقوله بيه شي

ردت بملل وقرف .. لا تخافين عرج ما يطكه

عفتها ورحت احس روحي تريد تطير مني احس بيه شي رجعت انصلت عليه ماكو مديجاوب

فخليت واتصلت على رنا شويه وجاوبتني سلمت عليها .. هلاو رناوي عمري شلونج

رنا .. هلاوو بالحب شلونج جيجي ونبي فد مشتاقتلج لج شلونج افونه شلونها سولي شلونها يابه ميته عليكم بس شسوي لابوج طردني اني وامي شكد حقدت عليه

جريت نفس حزين وجاوبتي .. يعنري والله احنه الاشوق لج عيني هو ابويه منو محاقد عليه دكولي الله يساعدجن شلون عايشات وياه مخبل الله يعينه عليه

ردت عليه .. اي والله الله يعينجن اي شكو ماكو وين ما وين

ابتسمت .. ههه والله ماكو منتظرين عرسج نركص بيه

ضحكت وهي تكول .. وين يمعوده عرسي تأجل

استغربت .. يا عزا ليش شكو اجلتو

ردت عليه وهي تكول .. لج عيني شنو متدرون غير عمج كريم تصوب صارله تلث ايام شنو متدرون

فتحت عيوني مرعوبه واحس رجليه دخل بيهن الموت كلتلها .. شنووو لاااا صدك وشنو هسه شلون اخاف بيه شي

ضحكت وهي تكول .. ههه لا عيني لا تخافين لا تخافين عمج بطل مجرد تصوب واعتقد طلعوا للبيت لان جاستن كال اليوم يطلعوا للبيت

مسحت دموعي وجاوبتها .. الله عليج ما بيه شي

حسيت بيها انصدمت مني وهي تكول .. شنو تبجين

بلعت ريكي ورديت عليها بتوتر .. لا لا ما ابجي بس دا اكول شنو اني شويه فلاونزا

ضحكت وهي تكول ... لا والله دتبجين هيج قلقه وخايفه على عمج كريم يعمري اوووي الله يتمم الكم على خير

فتحت عيوني مصدومة وقفلت الخط بسرعه بوجهها كعدت على الدرج وبجيت بصمت مطبق ياربي دا احس نفسي فگر وما عندي حظ بالحياة بس حبيته وتطورت امورنه وعرفت بيه يحبني تصوب وجان مات وجهي مووخير عليه

احس نفسي ططوه كل شي اتقرب منه الطخه بالحزن

رحت دخلت للغرفه مال فافي جانت كاتبه الدين ممنوع والعتب مرفوع حفافه من دون حاجب تلث الالف حفافه حجاب فقط اربعه الف حفافة عروس عشرة الف وقد اعذر من انذر فافي لحلاقة السيدات الانيقات

ظليت اصبغ للبنات واحف بيهن وروحي تريد تطلع ومن خلصنه اجت فافي كالت .. شبيج انتي احسج مو على بعضج بيج شي عيونج طاكات حمر

مسحت دموعي ورديت عليها بحسره .. عمو كريم مفجوره عليه عبوه ومتصوب كلبي نار عليه

حطت ايدها على صدرها ... عزااا شلون وبس لا بيه شي منو كلج

جاوبتها واني اشهك .. رنا خابرتها وكالت فدوه افيان گلبي نار عليه

تقربت مني وحضنتني كالت .. دمشي خلي نروح الهم نشوف الوضع ونجي شنو رايج

هزيت راسي بنفي .. لا لا ما اريد عفيه ما اريد هسه يكولون اجت على كريم انوب هو يحس بيه واني استحي ما اريد افشل نفسي استحي

غمتني وهي تكول .. خاب شوف هاي الناس وين وصلت صعدت للقمر وهي بعدها تستحي خاب دطيري امشي ولي بدلي لا تظلين تنوحين عليه جنج عجوز متعاركات وياها كرايبها

وبعدين عيني اني راح اروح اكلهم اجيت على وجهي لان اتفقت احف حنينة ام عطوب وهناك عود ما ادري بالخبر وادك والطم واصيح ...بيك اشم ريحة امي كريم يا شيال همي
انسى الهضم لو صحت باسمي ... يا كريم يا عمي احوووي يا شيال همييي وهم اختي الخابصتني بيك

ضربتها بغضب وعصبيه ... ثول حتى ثول انتي شبيج ليش هيج تفاولين عليه اسم الله ان شاء الله من عمري على عمره بيش طالبته هالمسكين هذا

ردت عليه .. يمه من عيارتج تعالي احفج ويه هذا الوجهه اليلطم من يشوفج حتى جناوي الحساسه ودمعتها الماسه يحضرها من وراج

هزيت راسي بنفي ... لا ما احف

باوعتلي بنظره مستهزئة .. ليش يمه حزنانه بعدج ما صرتي ارمله امشي كدام عاب هالشكول من حشا خلقة الله تريد تروح هيج شاربه يحلف بيه الخير يمه موتيني امي ماتت خلت ضيم وهم على گلبي

تعصبت .. هي شبيج بس ترزلين بيه وبعدين ترا اني ضايجة ومقهوره على عمو كريم شنو احف واروح گلبي ما ينطيني شلون احف وهو طلع من الموا ومتوجع

رجعت باوعتلي بنظرة سخرية .. شنو ليكون رجلج وابو جهال وحزنانه عليه واني ما ادري

ابتسمت ... ان شاء الله

سحبتني واني اصيح وحفتني وبدلتلي واخذتني اني وامين وخلينه ورحنه لبيت جدي ابو كريم

.........................

سولين

اليوم قررت اروح اني وصفاء للجامعه لبست ملابسي جنت مرتبه وخليت شويه مكياج وطلعت شفت صورة سوادي عقدت حواجبي وخزرته ياربي ما اعرف ليش اخاف منه اخاف من يباوع عليه بعدها ترحمت عليه وصعدت بالسياره

ابتسمت بوجهه صفاء كال بحماس .. هااا مستعده

عصرت اديه بحماس .. اي مستعده كلش مستعده انت سويتلي حماس

ضحك وساق بسرعه وصلنه عند الجامعه ونزلت شفتها جانت حلوه بس صغيره دخلت واني اباوع للناس دايخة بيهم هاي وين احنه باوربا شنو هذا اللبس الحلو شنو الناس الحلوه معقوله اني بالعراق هاي ليش هيج حلوات

ابتسمت وامشي واني فاهيه وفرحانه وصفاء انتظرني بالأمنية تنهدت بفرحة وامشي نسيت نفسي شكد جنت اتمنى ادخل جامعه واعيش شعورها اكغد من الصبح واكتب ذكريات على جدرانها وتصير عندي صديقات ونطلع سفرات بس قدر الله وما شاء فعل الحمدلله على كل حال

باوعت للاقسام جانوا الطلاب مسويين ضجة وناس طالعه من المحاضرات وناس تاخذ صور وعشاق كاعدين يسولفون بينهم

جنتي اني اباوع عليهم وابتسم واضحك انضربت ببنيه لابسه كله اسود وحذاء لونها احنر صار حبيبها نفس لبسها وكذلك لابس حذاء احمر صارخ

هي عاطت بيه وكالت .. شبييج انتي متشوفين

رديت عليها بهدوء .. العفو اني جدا اسفه مشفتج والله

كالت بغرور .. مبين مرحلة اولى مو صح

ابتسمت .. اي صح مرحلة اولى

ضحكت كالت .. اي مبين عليج والله

ابتسمت بوجهها وخليت ورحت وسمعت حبيبها يكولها .. خطيه ليش عطتي بيها متشوفين مشيتها مو متوازنه

كالت .. اي صح انتبهت عليها عرجة

احس كلامها صابني بروحي ويدگ بگلبي لثواني تعكر مزاجي وضجت حييل وقررت اطلع من الجامعه

مشيت بسرعه د اطلع شفت صفاء من بعيد وهو يدخل للجامعه باوعلي وابتسم مشيت وصديت عنه واني ضايجة

تقرب مني وهو يكول .. ها سولين شكو شبيج ليش هيج ضايجة

تنفست بغضب .. ما ادري ما عجبني الوضع اريد اطلع منها محبيتها

ضحك وهو يكول .. اي مكان غريب عنج وما عندج بيه اصدقاء حتكرهي هيج طبيعيه الانسان يحب الاماكن الي دائما يزورها

لذلك لازم تصبرين وتحبيها ومن تبدي محاضراتج راح تعتمين للمحاضرات اكثر من الجامعه نفسها وتثير عندج صديقات حتى اني والاشتر واخواتج تلغينه من وجودج

هزيت راسي بنفي وانزعاج ضحك ومشه مشيت وياه وسال عن قسمي ودخل بالقسم شفت الطلاب لابسين لابكوت ويسولفون شعور حلو اجتاحني اني هم البس الصدريه البيضه ؟

تنهدت بحسره وهو ظل يحجي ويه القسم وكلهم مريضه وانطاهم تقاريري وكالو على الاسبوع الجاي تكدرين تداومين

طلعنا اني وصفاء من الجامعه وركبنه بالسياره كال .. يله خلينه نروح ندخل مطعم نتغده ونجي شنو رايج

ابتسمت بمرح ... اي حلو نروح ليش لا صار هوايه مداخله مطاعم اخر مطعم دخلتله اني والاشتر جان يوم يجنن

رد عليه وهو يكول .. ها حركات حلو يعني حبيتو بعض

جاوبته بصدمة... لااااا وين اكو لا حبينا ولا شي عايشين على حب الله

ضحك وهو يكول .. ترا اخوي والله يحبج

جاوبته .. حبه الله شدخلني بيه

ظل يضحك وبعدها خلينه ورحنه مطعم تغدينه جانت اجواء حلوه وصفاء حباب حييل وابد ما يقيد فعلا حسيته اخ وسند وصديق شلون يعلمني ويفهمني ويستحي حتى يحط عينه بعيني

شلون مؤدب شلون اخلاق احسن من اخلاق اختي فافي جنه بت بيت فدوه تربيه حلوه

وصلنه للبيت دخلنه شفت الاشتر كاعد على القنفه وحاط اديه على وجهها وجان بحالة سكون

اول ما دخلنه باوع علينه بنظره ما عرفت افسرها ما اعرف شنو غيره بس هو ابد ما يغار من صفاء بحيث هو جان يخليني وياه نفس البيت

بس تفاجئت من نظراته وحتى ما سال ولا حجه شي واني كعدت ردته يسأل بس ابد ما سال

خليت ورحت لغرفتي بدلت وهو ظل يحجي ويه صفاء وبعدها حضنه وباسه عبالك طفل وياه مو جبير حيل يحبه

بس اني شنو تفاجئت من تصرفاته ومن نظراته وعدم اهتمامة بيه

بعدها كلت خلي يروح هو شنو شدخلني اصلا هو موافق اروح ويه اخو بعد شكو

طلع صفاء وتقريبا نص ساعة فتحت البردة شفته من بعيد على نفس كعدته وعلى نفس نظراته الغامضه

اندك الباب وهو وكف بملل وراح فتح الباب بعدها دخل وهو وياه مصطفى اخو انصدمت من شفت مصطفى ظل يحجي وياه ويسولف وياه ويتفاوض بالكلام انصدمت هذا شعنده وياه

وكف وياه واني خليت ورحت طلعت بحذر من الباب سمعته يكوله.. تمام ان شاء الله نلتقي بغير مكان

عقدت حواجبي هذول شعندهم هم ما جانوا صحبه شعجب هسه تصالحوا وصارت بينهم موده ورحمة

.............................
جيهان

عساس قررنا نروح بأن احنه ما نعرف بعمو كريم متصوب بس افيان غيرت رأيها كالت .. لا لا عيني لا لازم الحب يحس باهتمامج فراح نكلهم خابرت رنا واجينه طايرين وملهوفين ودكينه ولطمنه ولتمت الوادم عليه والمنطقه كلها تصبر بينه ومكدرنه نصبر

اني جنت مثل الاطرش بالزفه شتكول اسوي مثلها كالت .. كومي سوي جدر شوربه خطيه مسوي عمليه ما ياكل غير الشوربه مت عيني عليه دلعي معدته اكو مثل يكول اقرب وسيله القلب الرجل معدته

رحت سويت شوربه وخليتها بجدر ثاني وطلعنه

رحت وأني شايلة جدرية الشوربة الدافية الي سويتها اله
مادري شبي گلبي احسه مرة يأذيني عليه ومرة فرحان لشوفته

بس وصلنا لبابهم انطيت الجدرية لأفيان تشيلها احس اديه ظلت ترجف ، حبه دائما يهزم ثباتي وكلما اقرب من شوفته افرح واخاف بنفس الوقت هالمشاعر تأذيني لدرجة اتلذذ بأذيتها

دكينه الباب طلعت النا ام حسن
شافتني اني بالذات ركزت عليه احس نظراتها بيها شي
بعدت نظراتها مني وكالت هاا اجيتوا؟

سلمنا عليها
كالت تردون تشوفون كريم
ورجعت باوعتلي

خجلت ودنكت ياربي احس مفضوحة بحبه اني

فيان كالت اي عمه هو شلونه هسه

دخلتنا جوة كالت الحمدلله الله طلعه من حلگ الموت بسلامة

فز گلبي من گالت هيج دنكت بسرعة بس اعصر بأصابعي

هي كالت دخلوا كعدوا هنا انتظروا يمه جماعته خلي يطلعون واطببكم تشوفوه

بقينا كاعدين واني انتظر علئ نار ياربي اريد اشوفه بس والله گلببي هم مايتحمل اشوفه بهالوضع عسئ بيه ولا بي شگد احبه

ورئ شويه سمعنا صوت زلم يحجون يم الباب البراني
ووراها طلع جدو كهلان وجاسم احنه كمنا وكفنه سلمنا عليهم ودخلونه علئ كريم جان بالاستقبال

جنت اريد اروح اشوفه وماريد تعبني هذا الشعور المتناقض كولش اخاف افوت عليه وتفضحني ملامحي
ومستعجلة واريد اشوفه وعطشانة علئ شوفته

دخلت ورئ افيان خليتها كدامي
وجدو كهلان كاله اجن بنات عامر يردن يشوفنك

سمعته كح مدري غص گلبه ماادري ماادري وظليت متسائلة هم شعوره مثل شعووري منو اكثر يحب منو اني احبه لو هو يحبني اكثر

دخلت واللتقت نظراتنه شفته مبتسم ومتوجع وملفوف بشااش، عورني گلبي دعيت الله بگلبي يحفظه وحمدت الله علئ سلامته

حسيت بنظراته مشاغبة وبيها سر مااعرف شنو للحظة حسيته يعرف اني نفسي اراسله
بسرعة دنكت

شغلة انو احبه ويحبني وادري بي يحبني وهو مايدري بيه ادري مخربطة حييل وحتئ كلما دااشووفه اخجل اكثر من قبل

كعدنا يمه وام حسن كالت تعبان خطية يريد يرتاح

فافي نطت كلتله جيهان سوتلك شوربة تجننن متعيني ماتت بجي عليك كوه سكتتها كتلها لا تعمين

ابتسم كال ...صدك جيجي ولزم بطنه اي والله جوعان وعلى شنو تبجين ما بيه شي

اني خجلت حييل وظليت اتحرك بمكاني واسب بافيان بكلبي شكد تخجلني

وجه كلامه لام حسن كاللها بلكي تصبيلي عمه بلا زحمة

هي كلتله خليها لبعدين هسه اصبلك مسويه كبة حامض اني وانت تحبها

جاوبها لا عمة اريد من شوربة جيهان اشو اشتهيت شوربة وبعدين اني مسوي عمليه مال كبه بيه حيل اهضم كبه هسه

هي كامت بس احسها ضايجة واني عركت من الخجل والفشلة

راحت جابت الشوربة بكاسة وخلتها كدامه وهو ظل يشرب

باوعلي وابتسم دنكت راسي خجلانه منه وفيان لاهية وي امين تسولف وياه

وام حسن طلعت وجدو يسولف وي جاسم

كال شويه جيبلي ملح

خليت ورحت جبتله ملح انطيته اله ..هو قرب مني كال بهمس جيهان وكليني من الشوربة

اني مااعرف شصار بيه باوعتله وخزرته
اريد بس اطلع اريد بس رجليه تعيني حتى اكدر امشي مكدرت من الخجل

هو حس بيه طكاهه ضحكة دخلت ام حسن وهو جان ياكل بشهية مفتوحة

ام حسن كلتله جيهان جايبة جدرية عبالك عدهه عزيمة تريد اصبلك بعد

جاوبها لا شبعت خلي لبعدين
ويمكن حس بيه خنست
كال جيهان ولو طيبة الشوربة ليش تعبتي نفسج

اني لساني بلعته بقيت بس اباوع بالعيون
فافي جاوبت بالوقت المناسب وكالت
لا شمسوية هي شوربة الف عافية انت لو تكدر تاكل جان ذبحنه الك عجل

هزيت راسي بس مابيه احجي
هو يباوعلي جان
وكال تسلم ايدج جيهان

رجعت هزيت راسي، كرصتني فيان
وعبالك صحتني لان كرصتها قوية
كتله الف عافية ان شاءالله تطيب

مادري حسيت جفصت مدري شبيه، رصيت علئ ايدي حيل عود اسكت روحي لان احس راح انفجر بالحجي

بعدها اندكت الباب وكالوا اجو جماعة زلم اله يشوفوه واحنه خلينه وطلعنا يمه احس ارتاحيت من طلعت والله مدري شصار بيه من الخجل ظليت اطك ببلعومي

............................

جنت نايمة وماحاسة علئ نفسي، فتحت عيوني شفت نفسي نايمة علئ صدره

سحبت نفسي تنهدت و ظليت اباوع لوجهه وصفنت بي ملامحه الحادة طبرة حاجبه و اثار السنين

للحظة سألت نفسي وين اني وشجابني يمه وشنو هالقدر الي خلاني بطريقه وخلاه هو بطريقي

طول عمري جنت اتخيل اتزوج ابن عمتي شكرية بس سبحان الله مدبر الامور من سابع سماء، يختارلنا اقدارنا ويرتبها

فكرت يمكن لو متزوجة ابن عمتي مجان راح يكدر بوجه ابويه ويحميني منه

واني صافنة بوجهه ومتشبعة انفاسي بريحته
مديت ايدي اريد ابتعد عنه
فتح عيونه
وابتسم

اني كبل گمت كعدت اريد اشرد ولان حركتتي ثكيلة بسبب رجلي مالحكت اشرد
وهو سحبني اله وحضني واني منطيته ظهر
خله اذني بين شفايفه
كشيت اني واكتافي طخت بصدره

همس يم اذني وانفاسه حارة حيل تطخ بركبتي
كال ليش جنتي صافنة عليه؟

رجعت كشيت وقشعريرة سيطرت علئ جسمي
كتله شوكت صفنت هو هسه فتحت عيوني

كال چ ذ ا ب ه

كالها هيج باحرف متقطعة ويهمس يم اذني

كلت بتلك لاء مو چذابه

رد والله جذابة شفتج صافنة بوجهي

كتله انت وين شفتني وانت مغمض

كال جا ما تدرين اني حتئ ومغمض اشووف

حركت نفسي اريد انسحب منه وخليت رجلي جوه
كتله والله انت تخووف انت مو ثقه

رجعني حضني وضحك ضحكة بصوت
كال كليلي شنو جنتي تدورين بوجهي و لكيتي ؟

درت عليه وباوعتله خليت ايدي علئ حاجبه وعيوني تتجول علئ ملامحه عدا عيونه

جاوبت الماضي كله

غمض عيونه ثواني وتنهد حضني حييل
وكال تاخرت علئ شغلي

سحبت ايده .. ليش احسك ضايج مني

رد عليه .. لا ليش ضايج يتوهملج لو ضايج ما نمت بحضنج

ابتسم بوجهي بغموض وخله وطلع صفنت على كلامة شبي هذا شو مو طبيعي

...........................

افيان

جنت دا اروح للسوك وما خذه خلطات المصطفى فشخة هو يطلب عدد بس اني اخذ اله اكبر عدد خلي يولي ما التزم بالعدد كايلتها من قبل

ظليت منتظرته بالركن حتى يجي يستلم الخلطات شويه وشفته اجه نزل من سيارته هذا شنو شو حلو يشبه نسيبي هاي اول مره اشوفه وانتبه اله

بس لا خيولي ما مهم الجمال المهم الاخلاق اني كلش اقدس الاخلاق الشخص اذا ما اخلاقه ومبادئة ما يسوه ربع بسوك الزلم

باوعلي كال .. هلا بعبود الاسمر شلونج ولج

رديت عليه بغرور.. هلا بصافي فشخة شوف عيني هاي الخلطات اليوم مندوبي عاطلة سيارته فجبتهن اني واتدلل حتى تكول اكرهك وشاده وياك

كال بصدمة .. لا حرامات ليش عطلت سيارته يله المهم جان اجيتي بسيارتج

رفعت حاجب.. لا عيني سيارتي فاخره مو مال اشتغل بيها مندوبه ذيج مال طلعات فخمة عيني

ضحك وهو يكول .. اي عمي حقج سيارتج ما تمشي بهيج مناطق

انطيته الخلطات واخذت الفلوس واني احسب بيهن

كال .. انتي بالنار على هالخلطات تقشمرين بالعالم

باوعتله بنظره مستهزئة.. لا والله ليش مقشمره العالم شنو بايعتلهم حصو لو حصار خلطه كل موادها اصليه ولو مو زينه جان محد اشتراها شكد خبيث تريد تفسد مشروعي اووف ناس عينها ضيكة

ضحك وهو يكول بلهفه .. ترا صايره حلوه

رفعت حاجب .. اي عيني هاي نتائج خلطتي لعد شعبالك مستعجله على اصلاح البشره اكثر مني

بعدها تنهد وحجه بجديه .. افيان اذا خطبتج توافقين

فتحت عيوني مصدومة ورديت عليه .. لا طبعا ما اوافق انت صح اخو نسيبي ونسيبي على راسي بس مو مال اورط نفسي بواحد مثلك مدلل وسكير وابو ملاهي صح تبت على ايدي بس لحد الان بيك ريحة عرك ما متخلص منه كلش

ضحك وهو يكول .. لا والله شبيج احجي صدك اني احجي جديات

رديت عليه... لااا انت جذاب تضحك عليه عود تريدني احبك وتنتقم مني انت حيه ثعبان ما احبك

هز رأسه بأسى وهو يبتسم .. ولج شنتقم منج صدك تحجين انتي خبله لو شنو

رفعت حاجب.. انت ما تحبني جذاب

رد عليه .. لا والله حييل معجب بشخصيتج حييل اكثر ما تتصورين انتي شي حلو بالنسبه اليه ما اكدر اكمل يومي من دونج

تنهد .. تمام عود احجي ويه نسيبي واشوف اكله اخوك صافي خطبني واني ما وافقت الا اخذ اذنك واذا قبل بيك اقبل اذا مقبل ابد ما اقبل

ضحك وهو يكول .. ههههه هسه لازم اكعد اتلوك لنسيبج منا لبعد شهر باعي لتحاجي هسه لان ميوافق بيه اعرفه يكرهني

ضحكت .. لا نسيبي ما يكره احد بس انت طالع عن الطريق لذلك لازم يوبخك يعني مستاهل التوبيخ

رد عليه.. هههه عمي راضي ميخالف

ابتسمت وحجيت بشك .. انت تحجي صدك لو تجذب اذا ناوي تلعب ترا ما الي خلكك

رد عليه .. لا والله ترا احجي صدك بس مو هسه تحجين ويه الاشتر خلي شويه احسن علاقتي بيه حتى يلين من ناحيتي

ضحكت .. ههههه تمام

اتصل موبايله ظل يحجي بيه بس ايتعد عني و ركب سيارته وهو يكول .. يله خابرني الاشتر عندي موعد وياه بعدين احجي وياج

هزيت راسي بقبول هو راح واني هم رحت كملت طريقي وافكر بكلامة عود معقوله يحبني لو يجذب عليه لا خيولي جذاب اني ما عندي ثقه بجنس ادم كلهم جذابين

................

سوليين

جنت نايمة بالغرفه الوحدي والاشتر مموجود جان موجود بس اجاه اتصال وطلع

وكفت دا اباوع الدنيا ظلت تنكط شويه شويه وهدوء حييل ويه سكون اليل بجيت ما اعرف ليش ما اعرف الكابه ليش مرات تسيطر عليه واضوج وتكاب فجأة مسحت دموعي وكعدت افكر بامي اتمنى لو امي عايشه ومميته ياريت الميت يرجع فد ساعه وحده ويشوف عيال بيته شصار بيهم

فتحت ضفيرتي واني اباوع الشعري طولان مو مثل ما عهدته قبل وصاير حلو هاي يمكن لان اخذ مقويات وفيتامين بعد ما ساءت صحتي

حركت خصلات شعري ومسحت دموعي عيوني صارن حمر وبردت حيل نزلت ارادان التشيرت على كفوف اديه وحضنت نفسي وارجف

شكد نظيفه اني رغم البيت وسخ مسويته حلو ورغم الحمام معفن بس ما فديوم ظليت وسخة وما نظفت روحي مزلوغه زلغ ورغم اتاذه من رجلي بس انظف جسمي وروحي وحتى احف وجهي احط الخيط بالشباك والمرايه كدامي واحف ابد ما اظل وسخة مثل امي الحمدلله طلعنه لامي مو لابويه

خصرت التشيرت على خصري واني اباوع الجسمي حييل ضعفان صايره جلد وعظم وحتى ضلوعي بارزه

حسيت بالباب انفتح بقوه درت وجهي بسرعه شفت خياله الضخم وهو يخيم على الغرفه و خطواته ما بيها اتزان

عقدت حواجبي واني اباوع الطوله الفارع ويه لبسه الاسود خفق گلبي بخوف وابتعدت خطوات همست .. اشترر

تقرب مني اكثر وهجم عليه بعنف ما حسيت بروحي الا على الجربايه وهو حاصرني وقيد مقاومتي صرخت بصوت عالي ... اشترررر شبييك لاااا وخررر انت شبييك شدتسوي عوفني

هجم عليه بكل عنف وهو يتمتم بكلمات ما فهمتهن جان وحش بالنسبه اليه جان ضخم واني طفله بين اديه ضربته خمشته صرخت استنجدت ما كدرت وسلبني اعز ما املك باليلة سودة عتمت كل حياتي

نهاية البارت .. يتبع

كونوا انتم كونوا بخير .. احبكم 💔💔

لا تنسوا التصويت والمشاركة بكم نكتمل