رواية #وكر الأشتر الفصل الثلاثون 30 - بقلم الكاتبه سمو العراق

بارت ٢٨
رواية .. وكر الاشتر
بقلمي .. نور سمو العراق

💔💔💔💔💔💔💔💔💔💔💔💔💔

‏"من يحبك
‏سيُحب أظافرك المُتكسرة أولًا
‏سيُحب الندوب التي على وجهك
‏هالاتك السّوداء
‏سيُحب مُبالغاتِك
‏بكاءك الغَير مُبرر
‏الجُرح الذي على إصبعكَ
‏سهرك المعتاد
‏قهوتك الباردة
‏وبشرتكِ التي أتعبتها تجارب الحياة
‏سيُحب الجزء الناقص قبل الكامل"
.......................

سولين

بعد ما راحن البنات الصبح اني نظفت وطبخت هو طبخي بصراحة يلعب النفس ما اعرف اطبخ بس محد ياكله بس اني وصفاء والاشتر يحمد باكلي بس مياكل يروح للمطعم ياكل

يعني مخلصها الله عاشت ايدج انوب ياكله خاشوكتين ويطلع يكول اكلي قليل بس مبين جذاب ياكل بالمطعم وصفاء مسكين ياكل كل شي

انتظرت اخواتي الضهر يجن بس ما اجن نعست خليت ونمت وهو اصلا مموجود بس سديت الباب بدبة مال مي ارو لان هو صاير منحرف ومو امان

نمت تقريبا ساعتين وكعدت شعري منكوش حكيته والنعاس بعده بعيوني وكفت عود عشتو نازعة الاسود لبست بجامتي البرتقاليه الجو صاير حار دخلنه على الصيف وبدو الطلاب تمتحن نهائي السنه

وكفت على المرايه المكسوره الموجوده بنص الكنتور باوعت الحالي استغفر الله ياربي طالعه من الحاويه البجامه وحده مرفوعه و وحده نازله وتشيرت طويل رصاصي والشعفه واكفه باوعت الروحي طالعتلي حبايه فوك شفتي لعبان نفس شكد اكرهها

طلعت برا منزعجة روحي بخشمي كعدت يم التيل باوعتله بقرف .. شنو انت مقيم هنا متولي الوزارة الكهرباء

تنهدت .. اوووف شبيه اريد بس اعارك

شفت الباب تحرك سحبت حجابي ولبسته باوعت شفته الاشتر دخل وهو يعدل بسترته لمحت المسدس استغربت وخفت هذا وين جان هو ومسدسه

كعد بصفي كال ... هاااا شلونج

جاوبته بانزعاج .. بطني توجعني

رد عليه .. خاف موعد الهرمونات

ضربته على ايده بعصبية .. يا هرمونات انت خو ما عندك سالفه غير الهرمونات

كال .. جاا شنو قابل حامل هي اكيد هرموناتج تغيرت لهذا السبب روحج بخشمج

مسحت وجهي بتوتر .. ما اعرف شو ضايجة انت وين جنت شفت سلاحك شو انت مدگلي عصابجي شرطي مافيا هم فهمنا

جر نفس وزفره كال .. لا هيج مشكله وحليتها

عقدت حواجبي .. ويه منو ؟

رد عليه .. ابن حجي اديب  متعارك ورحنه فضينه الطلابه

باوعتله بشك .. صدك تحجي

عقد حواجبه .. جاا شنو اجذب عليج

رفعت اكتافي بعدم معرفه كال .. تدرين انتي صايره حلوه ؟

عدلت شعري مستغربه .. منيلي اشو شفت روحي بالمرايه اجيت انهزم

ضحك .. لا حلوه بس يحتاجلج تعديلات

لزمت ايده بتوسل .. اكلك فدوه انت مو كلت اخليج تدرسين شوكت تخليني

كال وهو يسحب مسدسه من خصره ويامنه كال .. اي ان شاء الله بس انتي شنو عاجبج تدخلين يعني شنو القسم الي حابته

جاوبته .. احب التحليلات المرضيه

قلص عيونه وهو يباوعلي بغموض ... بس اني حاب تدرسين علوم الادلة الجنائية

استغربت وعقدت حواجبي .. شنو هذا القسم اول مره اسمع بي يعني قانون ؟

جاوبني بنفي ... لا لا هو قسم علمي وتخصص نادر وتعينه مركزي يربط بين العلوم الطبيه والقانونيه يعني يختص بالحوادث الامنيه والقانونية والاجرامية

ابتسمت بفرح ... الله حبيت احب اخوض هيج تجارب زين اذا الله سهل ودرست وين اتعين من اتخرج بالمحكمة

ضحك ..ههههه لا بويه يعني تتعينين بالطب العدلي يكون شغلج على فحص الجثث والادله والبصمات

عكفت نفسي ولزگت روحي بالقنفه ... لا يمه اخاف

ابتسم.. لا حلو من راح تدرسي راح تحبي مواده تكون بايلوجي احياء علم النفس قانون العقوبات مشهد الجريمة تحقيق جنائي سموم ومخدرات يعني بالمختصر شي كلش حلو وراقي

اردف ..بس تدرين لازم تكون اللغه الانكليزيه عندج قويه لان الدراسه هاي اغلبها انكليزي عدا كم ماده

سألته.. وانت انكليزيتك قويه ؟

جاوبني بثقه .. ofcourse

باوعتله بشك .. ما شاء الله عندك معلومات عن القسم كلش قويه معقوله دارس  ادلة جنائية

ضحك و وكف كال .. هااا قسم ينرادلة جرئة وانتي ما شاء الله السانج طويل وجريئة يلوكلج وذيج افيان يلوكلها تشريح جثث

ضحكت ... ههههههه وجيهان

رد عليه .. هاي نازوكية ينرادلها قسم مثلها نازك مدرسة مال رياض اطفال لان هاي مكانها ويه الاطفال

وكفت متعصبه وتخصرت .. يعني شنو قصدك احنه مخبلات لازم نعيش ويه الجثث اشو اله اقدم رياض اطفال بعناد جيجي النازوكيه على كولتك

سحبني من جتفي حييل كال .. ادري انتي الخبال يمشي بدمج يعني من اخليج قسم جنايات وكلولج هاي الجثه الادلة الها معنويه تلطشين لا الدليل فني

سالته .. وانوب شنو الدليل الفني والمعنوي

اتصل موبايله قبل لا يجاوبني ابتعد عني خطوات وهو يرد على الاتصال وبعدها راحت الغرفته واني طكيتها ركضه وراه بعد اني حدرس جنايات لازم اكون المحقق كونان وانتبه على مسرح الجريمة وانتبه على كل شخص مشتبه بيه مثل الاشتر اووي فدوه يلوگلي القسم نفس سوالفي

ظليت اتصنت عليه سمعته يكوله .. اهااا هاي شوكت طلع زين بس جان لازم تنطيني قبل  لا يطلقون سراحة على العموم مشكور مقصرت هسه اروح اشوف شنو الصار وياه وشلون طلعوه

حسيت بنغزة بگلبي .. عزا منو هذا بس لا ابويه الي طلع من السجن والله اخواتي ارتاحن منه شلون معذبهن وظالمهن ياريت يظل سنين بالسجن

باوعتله من الشباك رجع اخذ مسدسه وتوجهه لباب الغرفه واني طكيتها ركضه وانهزمت كعدت بمكاني بأدب ولا كأن قبل شويه مشتغله تجسس

باوعلي كال.. راح اطلع هسه اخابر صفاء يجي يمج اذا تاخرت لا تخافين ماكو شي

وكفت وجاوبته .. زين اخواتي شنو مراح تجيبهم اليوم

بلل شفايفه بحيره كال .. ما اعرف اشوف لان ابوج طلع من السجن مع العلم بعدها مدة حكمة

مسحت وجهي بتوتر وگلبي يدگ سريع ما اعرف شبيه اهتزيت بعنف من ذكر ابويه كتله .. شوف اخواتي فدوه لا تخليهن

تنهد ومسح على شعره .. اوك هو رايح اشوف شنو الوضع

خله وطلع واني احس نار بصدري هاجت عندي الشقيقه خرب شكد اكرهها من تهيج عليه تدمرني دمار احس عقلي يوجعني مو راسي

هذا مجرم بس لا يروح ياذيهن اذا عرف راحن العرس عمو كريم وهو ميحجي وياهم من بعد ما طردوا من العشيره

ظلت حسبه تاخذني وحسبه تجيبني وحتى نسيت كلام الاشتر ويايه رغم اني من جان يحجي عن هذا القسم اثار هوايه من الشكوك بداخلي يعني اني عبالي همجي بربري كل شي ما يعرف اشو طلع كل شي يعرف هذا الرجال كل يوم عن يوم يزيد غموضه ويحيرني واكتشف اشياء جديده بيه وحتى الاشياء الاكتشفها تروح مهب الريح لان سرعان ما افقدها وما اعرف شلون افسرها

....................

جيهان

مرات تمر علينا شغلات حيل صعبه بحيث تتعبنا نصحى تعبانين و ننام تعبانين مرات افكر احنه والله مماذين شخص ولا مسوين شي غلط ليش الدنيا هيج دارت بينا وليش من اقرب الناس النه

كل شي بشع وكئيب ومنطفي بوجود ابويه الي لازم هو يكون سند النه وكل مره يدخل علينا بسيناريو يعذبنا ويدمر حياتنا

اخذنا بنفس المكان الي لما قتل امي اخذنه اله غرفه مهجوره ظلمة بنص البستان وطبعا هاي الغرفه والبستان محد يعرف بيه غيرنا وغيره لان هو عساس بايع البستان وخله عمتي تنازلت وتالي طلع جذاب مبايعها وماخذه اله

خلانه بالغرفة جان الموبايل بصدري احس بيه يرن الحمدلله جان صامت جان تعزينه  وتصخمنا ما جنت اكدر اطلع الموبايل ولا اكدر اتصل بيه لان هو بس يشوفه ياخذة منه وبعدها شلون نرجع ونخابر الاشتر كريم اي واحد بس يخلصونا

لان هذا عامر رجع وحاد اسنانة عبالك احنه ساجنيه مو انسجن هو

كعدنه بالغرفة كالت فافي .. ولج هذا شرجعه من صخام الصخمة انوب متسودن بالزايد باعي خلي يطلع ونخابر نسيبي هو الوحيد اليكدر يطيح صبغه

همست الها وعيوني عليه .. دخلي يطلع واحنه نخابر خوما نخابر كدامة حتى ياخذ الموبايل

عقدت حواجبها بتساؤل .. هو شعنده جابنه هنا هذا عنده غايه لان مستحيل يخفينه بهالشكل اذا ما عندة منوال براسه

تنهدت وبصوت هامس .. والله ما اعرف شنو غايته بس اكيد عنده منوال براسه شوف شراح يسوي

اتصل موبايله وهو يرد ... هلا حجي تحسين ممنون منك انت الخير والبركة

جان الصوت شويه واضح وهدوء نسمع الطرف الثاني شنو يكول ومع ذلك هو فتح سبيكر لان ميسمع مدري شبيه ويحك بجسمة حييل يمكن بيه جرب من السجن بس يهمش بجسمه

الطرف الثاني گلة .. شفت هاي كتلك اطلعك من السجن وهاي طلعت ولا عبالك ترا دهنت زردوم العقيد يله طلعك

جاوبه بلهفه ولواگة .. ممنون حجي تحسين ما اكدر انسه فضلك انت وساهر مع العلم ما تعرفوني بس احسن بالف مره من نسيبي العار اتصلوا بيه الشرطة وطلبت مساعدته كال ميخالف وتالي لا اجه ولا سال عني واني حاقد عليه ليوم الدين

جاوبه ذاك ... ترا هذا فد واحد عار حاول تبعد بنتك عنه وتاخذها منه انت شلون ناسبته وهو بلا حسب ولا نسب مطرود طردة الجلب

عامر بحسرة مصطنعه .. قشمرني ولعب بعقلي واخذ زينة بناتي سولين دارسه وعاقله وفقييييييره لسان ما عندها وهو طايحلها دك وكتل وموتها تموت

اردف .. وهي اصلا ما تريده انجبرت عليه ولحد الان متريده ومن بعد الكتل والدك اجت وتوسلت بيه وكالت يابه خلصني منه راح انتحر راح اموت منه هذا عذبني ودمرني

كمل بكذب ..واني ردت اطلكها وسندتها بس شسوي هو اقوى مني وهددني وهدد بنتي واخذها وحرمني منها واني ابجي دم على شوفتها وصار من تزوجت لحد الان يوم ما شايفها شايف هيج ظلم

جنت مصدومة من كلامه وفافي مصدومة تباوعلي بدهشه وترجع تباوعله تريد تستوعب الكلام الي ديحجيه عامر

تحسين جاوبه.. ارفع عليه دعوه واني اسندك وكون بنتك تكون ضده

ابويه بسرعه ... اي اي اكيد ضده اصلا تكرهه ما تحبه انجبرت سوده عليه

افيان هجمت لزمتها واني اريد افتهم كالت ... لا ما اتحمل ما اتحمل كمية الجذب والنفاق لج مسيلمة الكذاب ما جذب بكدة

حاولت اهديها ورجعت اسمتع وهو يحك بجسمة ورجليه ايع حتى الدم طلعه من جسمه كد مت يحك

رجع تحسين كال .. شوف اني مصطفى هو دلاني على بيتك واجيت واستفسرت من الجيران كالو البنات عند الاشتر وانت بالسجن كلت اطلعك من السجن وارجعك لبنياتك احسن ما ظالات عند ذاك العار

عاطت افيان ... لا تغلط على نسيبييي الكفو  ما غيرك العاااار

ابوي باوعلها وهو يتوعد الها وسد سماعة التليفون بيده وهو يتوعد الها سديت حلكها واني احجي عليها .. ولج انلصمي من طاح حظج خلينا نفهم شسالفه

رجع يحجي وهو يضحك بتوتر وارتباك .. هههه ها حجي تحسين الشبكة ضعيفه مدري شبيها

رد عليه بغرور.. تمام بس شوف وحده من بناتك ضربت مصطفى ابن اخو ساهر وهذا الشي عيب وميصير يعني لازم تادبها ولو اني حجيت ويه مصطفى كتله البنيه مو قصدها واكيد هذا الاشتر هو الي محرضها لان عامر بناته مودبات مو مال هيج سوالف

رد عليه عامر .. لا لا ولا يهمك وحق علي اليوم اجنزها تجنز انومها بالمستشفى شلون تتجرئ وتضرب ابنكم هاي ادبسز اني ما عندي بنات وكحات ومحد تفك حلكها ولا تتجرئ بس مثل ما كلت الاشتر قشمرها ويمكن جبرها تسوي هيج يمكن هددها باختها الله اعلم هسه استفسر منها

صاحت بصوت عالي ... لا بالعباس اني ضربته لان حقير مو مؤدب يغلط عليه

هو عض اصبعه بتهديد وهي بعدها تلعلع وذاك يكوله .. ههههه كال صافي كال وكحه ولسان طويل كتله ان شاء الله نكصه

رد عليه ابويه بضحكة... ههههههه من ايدك هاي الايدك هاي حلالك واني ما نهزمت بيهن بس حتى نخلص الكلت عليه

صفنت بكلامه هذا شديحجي شنو يكص لسانها وشعلاقة مصطفى اخو الاشتر بيه وهو اصلا منو هذا تحسين ومنو ساهر ومبينين يردون السوء بالاشتر والعلاقه بينهن خربانه

حفظت الاسماء حتى كلت اذا رجعنه او اتصلت بالاشتر اكدر احجيله عن كل الكلام الي دار بينهم والضاهر ابويه لگاله ظهر يسند روحة عليه من بعد ما جان يزامط بالاشتر وحس الاشتر ما منطي مجال يتصرف من كيفه لذلك سند روحة على غيره

وبعدها استنتجت هو عناد بالاشتر طلعوه وتعرفوا عليه والضاهر بينهم مشاكل وتحديات بحيث رادوا يكسبون ابويه لصفهم ضد الاشتر والامور لحد الان مواضحة عندي

خلص اتصاله وهو هجم على فافي وهي ما ردت جانت واكفه بجبروت وهو يكفخ بيها وهي تصيح ... خاب اضرب اضرب عادي تعودت على الكتل بعد لا سد حلكي ولا ارد لساني تطبعت بالكتل

لزمتها خلصتها منه بالگوة كعدنه بزاوية الغرفه جنت ابجي وهي ولا دمعة خطيه وامين يبجي وهي ابد ممهتمة

كالت .. خرب خبطاتي نسيت اخليهن بالثلاجة بس لا يخربن كله من وره عامر ابو كعكات

ظل مگابلنه مثل البومة لا تزحزح ولا راح واحنه شلون نخابر كدامة ما اعرف بس احس بالموبايل يتصل

....................

جاسم

بعد ما خلص العرس وانتهى الحمدلله جان عرس حلو وتونسنه بيه مع العلم احس كريم ممهتم للعرس حتى بيوم العرس ما اشتره قاط جديد عنده قاط قديم لبسه مع العلم هو كلش انيق ومرتب وخاصه على اللبس يحب يكون كشخه ويلبس ارقى الملابس بس بعرسه خربها ما اهتم لاي شي ولبس اي شي

وجان يسأل عن بنات عامر ليشما اجن واتصل ماكو رد اني اعرف هو انطاهن موبايل محد يعرف بيه ومن اجه الاشتر حجه وياه كله شعجب البنات ما اجن رد عليه الاشتر .. ما اعرف ما قبلن يجن

المهم هو احنه ثاني يوم العروس ما طلعت وجنه منتظرين العروس تطلع صارت بالوحده وهي ماكو طيرت حتى حماسنه وخلينا وتريكنه

طلع كريم من الغرفه تقريبا بالوحده وباس ايد ابويه وسلم وكعد كله ابويه .. شنو شو عروستك ما تريكت ويانه

ردت كوثر وهي تضحك .. تستحي ايـــــــــو هسه حجيت وياها كالت كولش استحي من جدو ومن العائلة ممتعوده عليهن

استغربت اني كلتلها .. جا هي مو يوم وثاني يوم عدنا شنو السالفه شوكت استحت

رد عليه كريم بتنهيدة .. لا بس هي تعبانه من الحنه والعرس فما كدرت تكعد

جاوبه ابويه .. اي والله حقها العرس والحنه تعب الله يساعدها ولا تضغط عليها

كريم بعدم اهتمام.. لا قابل شعندي وياها

دخلت حنان مزعوجة وضايجة مدري شبيها كالت بصوت مزعوج .. حجي الغدا جاهز تعالو تغدوا

خلينا ورحنه نتغده وايو طلعت جانت لابسه فستان احمر شويه بيه كصو ولابسه شال ابيض مخليته هيج شعرها عادي طالع ومخليه حمره حمره ومكياج بارز وعدسات كالعادة

سلمت علينا وكعدت بصف كريم باوعتله وابتسمت وهو بادلها الابتسامة وحنان تباوعلها بحقد تريد تاكلها

جنه مسوين تشريب لحم وتمن احمر وسمج هي ايـــــــــو تاكل التشريب بجطل والسمج كذلك ههههه

وحنان قبل جانت تاكل عادي بيدها اشو هاي شافتها وكعدت تقلدها وتاكل بجطل ومتعرف ما عندها خبره مثل ايـــــــــو هاي مبينه متعلمة

كالت ايـــــــــو ببتسامة .. جدو اتصلت ماما وكولش تسلم عليك رادت تحجي وياك بس اني استحيت اجي اكولك

جاوبها ابوي .. الله يسلمها بس ليش جان اجيتي لا تستحين انه مثابة جدج ابوج التردينه كيفج لا تخجلين مني

نزلت راسها بخجل ولطف وردت .. شكرا جدو اني بصراحة كولش احبك واحترمك فعلا انت انسان قليل امثالك

كوثر جانت تباوعلها وتبتسم وفرحانه بايو عبالك بنتها مو صديقتها متفاجىء من صداقتهن بصراحة

كلها ابوي ..ويشهد الله انه حبيتج واتمنى تعيشين انتي وكريم بكل حب وسعاده

لزمت ايد كريم وابتسمت وهو باوعلها بشرود ورجع ياكل

كالت .. جدو ماما اتصلت واحنه من عاداتنا وتقاليدنا ما تنظف العروس الا تطلع لوره شهر حتى ملابسها وغرفتها ما تنظفها نخاف تنجبس وما يصير عندها اطفال

باوعلها كريم وهو عاقد حواجبه .. شنوو حتى الملابس والغرفه شنو يعني بله البيت بيها باب وجواب عسى ما تظلين سنه بس غرفتج وملابس لا هاي واكفه

باوعت للوجوه بفشله وكالت .. ما اعرف هيج عاداتنا ملازم العروس تسوي اي شي فقط تهتم بشهر عسلها واحنه مراح نروح شهر عسل بسبب امتحاناتي حتصادف فاجأنا

جاوبتها حنان بقرف .. اكلج شنو السالفه وين اكو هيج تقاليد عاد كولي للسبعه مو وره شهر وبعدين منو ينظف غرفتج وملابسج ترا هاي اشياء خاصه بيج شلون انوب نكعد نجلف ملابسج

ابويه ما رضا على حنان كلها ... اسكتي بويه خلينا نفتهم شنو السالفه

ردت حنان .. شنو حجي وين اكو وحده تنجبس من التنظيف شو اني اول يوم تزوجت ظليت اكرب ليل ونهار

ردت عليها ايـــــــــو باستفزاز .. مو عساس هسه انتي عندج اطفال

كريم تعصب .. اسكتي اياااااات

بللت شفايفها وهي تباوع الحنان بحقد وذيج تخبلت ابوي كلها .. لا بووويه آيات هاي نقطه وياج ما يصير نعير الوادم والله لو يريد يرزقها يرزقها لو انتي والكل يوكف ضدها وبعدين انتي عروس خاف الله هم يحرمج من الخلفه

جاوبته ... لا اذا ما اشتغلت احيد يصير عندي لان احنه ما شاءالله ما عدنا وراثه بقطع النسل الحمدلله كله توم وماما خلفت توم وماتوا

حنان لزمت راسها كلتله .. حجي راسي موتني مو تدري الصداع ما ي ليني انام وشربت علاج ينعس رايحة انام وخلي البنات يغسلن المواعين

عافتنه وراحت وايو تنفست بغصب كالت .. يله الحمدلله اني شبعت حتجي ماما وخالاتي ديجون يباركولي لازم احظر نفسي

خلت وراحت ظلت بس ام حسن وكوثر واحنه كاعدين بالسفره كالت ام حسن .. خويه ابو كريم جارتنه ام سجاد ابنها اندعم وطلع من المستشفى وخطيه هي تواصل وتافقنه انه ونسوان المنطقه نروح الهم ومنتظراتني ارووح ؟

رد عليها ابوي .. اي خويه روحي واذا محتاجة فلوس اخذي من محفظتي اي شي تحتاجين

جاوبتهم .. هووب هووب شو كلها طفرت من غسل المواعين ادري منو يغسل المواعين اني

ابوي ضحك كال .. لا كوثر هي تغسلهن

كوثر جانت مبتسمة من سمعت ابويه هيج حجه اختفت ابتسامتها كالت .. بس يابه امتحاناتي على الابواب اريد اقره

رد عليها .. اي يابه اغسليهن واقري منا الباجر

بللت شفايفها بقهر وكعدت تعزل بالمواعين وشالتهم تغسلهن وكريم غسل وشرب جاي جان كاعد يمنه اني ردت اروح للسنتر كال .. اروح وياك

ابويه .. لا بويه ظل يم عروستك

هو ابتسم كله .. لا يابه خالاتها وامها راح يجن ماكو داعي اظل خليهن ياخذن راحتهن

مشينه دنطلع واجت ايـــــــــو لابسه قفطان ابيض وبالنص ذهبي وصدره بيه ذهبي وكذلك ردانه كالت .. كريم وين رايح لا تطلع دكول ماما اذا طلع محيصير عندكم نونو

باوعلها بغضب بعدها ضحك كلها .. كاااافي معقوله انتي تصدكين بهيج تفاهات هاي الاجانب يطلعون ويطبون ويمشون وينامون بالحرام ويصير عندهم انتم شنو من عقليه

فتحت عيونها متعصبه .. شنو قصدك ماما تافهه

نفخ بضجر... لااااا

عافها وراح ورحنه سوه وهي تخبلت بس حقها اشوف كتله.. ليش طلعت ترا حقها تريدك يمها خطيه

كال .. هي شنو اكعد بنص خالاتها وامها شبيك انت شنو السالفه هسه مو من البارحة لليوم عندها بعد شكو

سكتت مجاوبته وخلينه ورحنه للسنتر اتصلت هي جاوبها كلها .. تمام من ارجعج اجيبلج ادللي

قفل الخط منها ورجع اتصل كتله ..انت بمنو تتصل

رد عليه وهو مرحز بتليفونه... بجيهان

باوعتله مستغرب ... اكلك انت تحب جيهان اشو بس تحجي بيها انوب من خطبت زدت شبيك

باوعلي بغضب كال .. انت صدك ما تستحي شنو احبها وبعدين ثاني يوم عرسي هيج دكلي كلام شنو معناها؟ وبعدين البنيه ما بيني وبينها شي وتصيحلي عمو وترا مجرد اريد اشوف وينها لان امها وصتني عليهن واني من واجبي اشوف وين هن لان ابوهن انسجن وهن اجن ببيتنا وتالي راحن وما اعرف شنو السبب ومنو غثهن

تنهدت .. تمام تمام افتهمت الله يسعدها خطيه فقيره وان شاء الله ربي يرزقها برجال زين يخلصها من عامر ونذالته

رد عليه .. اميين

....................

سولين

مر يومين واخواتي ماكو والاشتر كال رحت لبيتكم وابوج طالع من السجن وماخذهن كلش خفت وكلش قلقت عليهن هذا وين اخذهن وين راح بيهن من غضب الله عليه وعلى ساعة السودة العرفت امي بيه

وجان الاشتر كاعد وهو لازم اسلاحة ومتوتر كال .. هسه هذا وين اخذهن انوب مغير خطه وهن ميفتحن خط وانوب صار خارج التغطيه

فركت اديه بحسره .. فدوه استعجل هذا لا يروح يسويلهن شي والله هذا مو امان

فرك وجهه بغضب وبعدها وكف كال .. انتي ما تذكرين من اخذجن ذيج المره وين راح بيجن

جاوبته بتفكير .. جان عدنا بستان هو عساس باعه بس طلع جذاب مبايعه اعتقد اخذهن اله اذا تريد ادليك مكانه

كال .. وين بالضبط

اني بصراحة ما اعرف اوصف الاماكن كلش ما اعرف وصفت اله ما فهم عليه كتله .. خليني اروح وياك اني اندله بس كوصف ما اعرف اوصف

كال .. تمام بس خلي يجي صفاء حتى هو يرجعج من يروح ويانه واني اروح الوحدي

ابتسمت بامتنان اله .. اوك شكرا

ترس مسدسه طلق ومجاوبني ضجت منه هذا شبي شكرته كون يرد شبي هذا  يمكن ضايج على اخواتي و رسول الله (ص) يكول: (إحمل أخاك المؤمن على سبعين محملاً من الخير) خليني اعذره

دخلت للمطبخ المطبخ جان محفر والحايط مالته لبخ رصاصي ومحفر كسيت اكو شي يتحرك بالحايط كمزت من مكاني ورجعت خصلة شعري وره اذاني واني اترقب المكان بحذر

بعدها شفتها تفح وتمشي بالحايييط صرخت بصوت عالي ولزكت بالطباخ وكع قوري الجاي وطفر الجااااي على رجليه ظليت اصرخ بصوت وارجف واصيح ... حييييه يمه حييه

حسيت بيه دخل للمطبخ وهو ملهوف ويركض كال .. شكووو شبيج

اشرت عليها وهي تباوعلي وتطلع لسانها ااشر واديه ترجف وهي تريد تكمز عليه

سحب الماسحه وهو يشتت انتباهه بالماسحه بحيث ركزت على الماسحة وتركتني لزكت روحي بصف الثلاجه سحبها من ذيلها بحذر وهي لفت روحها و  كمزت عليه وهو بسرعه ابتعد وتركها

ورجع عاد المحاوله مره ثانيه صرخت بصوت .. خلي اطلع وظل انت والحياسه الوحدك اني اخاف يمه راح تاكلني يمه راح اتسمم واموت يربي شلون بيه

عاط بيه بصوت ... كااافي مو شتتي حتى انتياهي وربكتيني لا تتحركين لا تكمز عليج ولا تحجين ترا ما اضمنج

سكتت وارجف وابجي وهاجت عندي الشقيقه بطني ظلت توجعني لو حامل جان سقطت والله وروح امي حيه سودة مرقطه بابيض ورصاصي وطولها تقريبا متر تخوووف تخووف واني اصلا اتخبل من الحشرات والحيوانات حتى ريش الطيور عندي فوبيا منه

رجع وهو يعيد العمليه مره ثانيه ويمشي بحذر وايده مستعده والثانية بيها منگاش هذا الي نطلع بيه خبز تقرب منها اكثر واكثر وجهها المنگاش على راسها ولزمها بيه وبعدها مشه ايده عليها بلمسات رقيقه وسيطرت على راسها وصارت تحت سيطرته

جنت صافنه عليه متعجبه منه هذا كل شي يعرف وما قتلها صاح عليه بصوت هادئ انطيني بطل ميي بسرعه بس كون فارغ

انطيته البطل وهو خله مقدمة اسنانها بيه وظل يرص عليها وطلعت ماده مثل الصفره  ما اعرف ليش سوه هاي الحركة يمكن تذب سمها ؟

كال بعدها ... انطيني اي دبه بس كون بيها قبق حتى ما تفلت

سالته واني ادور بالكاونتر .. شنو راح تبيعها

ضحك.. ههه لا ولج شنو ابيعها دجيبي سطل ومالج شغل عجبتني هاي الحيه شكلها حلو ومبينه من النوع النادر

انطيته دبه شفافه بيها قبق هو خله الحيه بيها وقفلها حييل واخذها كتله .. شنو هنود انوب صرنه نصيد حيايه والله شوف مدام طلعتلي حيه بهذا البيت بعد ما اكعد بيه هاي منطقه رطبه ونائيه بيها حيايه هي هاي حياتي عايشه بنص الحيايه لو تطلكني لو تشيلني

رد عليه .. لا ان شاء الله راح ننتقل من هذا المكان بس اكتشفيلي بعد حيايه

اشرت على نفسي .. اني حييه يصياد الحيايه

غمزلي .. صدتج من زمان بس لحد الان ممطلع السموم منج ههه

ابتسمت على كلامه وهو خله وراح واني ابد ما دخلت المطبخ عزا والله بعد ما ادخل شنو ما رايده روحي انوب اني ما عندي حيايه بحياتي يعني اقصد نسوان بس جالي انوب ظلت تطلعلي حيايه حقيقيه

كعدت تعبانه وراسي هاج عليه شربت علاج واتلفت بكل مكان احس البيت متروس حيايه واني غافله عن هذا البيت العجيب الغريب هو من شفت التيل بنص البيت اني ائيست منه انوب هسه عرابيد وحيايه وعكارب اني وين كاعده يربي والله راح اتخبل

بس ظل السؤال يراودني هو وين اخذ الحيه لو مخليها محبوسه يمي اتونس عليها دام محد يدخل عليه

...........................

صفاء

رحت للمكان الي عايش بيه مصطفى دكيت الباب طلعتلي وحده ما عرفتها منو بس هي جبيره بالعمر وتنظف عندهم يمكن بعد ما اعرف الله اعلم و واضح التعب عليها

سألتها بخجل .. بلا زحمة مصطفى موجود

ردت عليه وهي تلهث من التعب .. اي نايم بغرفته محتاج شي

جاوبتها .. اني اخو اذا هاي كليله صفاء اجه عليك

راحت دخلت شويه واجتني كالت .. يكول خلي يصعد الغرفتي

دخلت للبيت جنت مذهول من البيت الي هو عايش بيه الحديقه جانت بنصها نافورة والمي الوان كل شويه وانطت لون شكل من غير المرجوحه والاشجار والورد كل شي راقي وحلو ويدل على البذخ والترف الي هم عايشين بيه

البيت عجيب دزاين عثماني مدري تركي حييل حلو صعدت الغرفته فتحتها

بااااارده مشغل السبلت الكنتوري ونايم على بطنه والوشم بضهره كتابه تقريبًا اربع سطور كتابه باللغه حتى مو اجنبيه ما عرفت معناها

وبصفها عگرب ملفوفه عليه حيه وهي بحلگة ما ادري منين يجيب هاي الوشوم

جان نايم من دون قميص ولا غطا وبس بالبنطلون والغطا مجلبس بس برجله اليمين وبقايا الغطا واكع على الارضيه البارده

هذا مدلل وعايش حياته مخلينه اكل ونوم ونسوان وشرب شلون ما يتخبل فززته بيدي .. اكعد هييي شنو تنبل مال نوم

فتح تك عين وهو يباوعلي .. هااا صفاء صباح الخير

هزيت ايدي .. هه يا خير هذا دباوع شوف الساعه بيش بالخمسه العصر

عقد حواجبه بانزعاج .. هذا شبيه الوقت يركض ركض شكو شدعوه مستعجل شمفتهمين بالله من الحياة

ضحكت ... اي اذا اليل سكران والنهار نايم حقك ما تفتهم وبعدين هاي الجريده الواشمها على ظهرك شنوو ؟

رد بسخريه .. ههه برشومة من ايام السادس

ابتسمت .. ههه صدك اثول بس انت برشومتك بظهرك بله شلون تشوفها

ضحك .. ههههه هاي جنت بالسادس ابرشم وسكرت باليل وبرشمتها بظهري جنت رايدها بيدي بس بعد سكران ما عليه عتب

ضربته واني اضحك .. شنو الاهل وين

تنهد كال.. اندري امي يمكن راحت هي و زينب للمول هن كالن اليوم يديحن

ضربته بغضب .. ولك انت ما تستحي شنو يديحين

فرك عيونه بنعاس .. ما اعرف يا اخي اني هيج ميانه وياهم

تحسرت عليه .. شلونها وياك هي

بلل شفايفه بقهر .. زينه بس مصره تسميني ماهر وتمحي اسم مصطفى لان زوجها الله يرحمة جانوا يسموا ابو ماهر فلازم يتغير اسمي واني اضوج اني من صرت وانولدت اسمي مصطفى بعد شنو هالواگة ماهر هي مال ماهر

ابتسمت على كلامة .. حلو اسم ماهر ليش ما متقبله

رد بقهر .. يعني فوك ما انسبت الغير عائلة ورضيت انوب يسموني ماهر عاد خلوني باسمي شمقصر وياهم الاسم

تنهدت بحيره... هسه عوفنا من الاسم گلي هي شلون تعاملها وياك

بلل شفايفه بحيره وهو يباوع الاضافره الضامره تحت اللحم كال .. يعني شلونها محد مدلل مثلي فلوس واحه لبس درست اخذت شهاده محلات شريد موجود خدم حشم بسسس !!!

عقدت حواجبي ملهوف على كلامة واني اريد افتهم منه اكثر كتله .. بس شنوو ؟

تنهد وهو يباوعلي بحسره .. ما بيها حنية االام

جاوبته بقهر ... اي صدك مو مثل امي حنينه

ضحك بسخريه .. ههه حنت على الكل بس عليه ما حنت

لزمت ايده .. لاااا يمعوود بالعكس الاشتر يكول جانت تموت عليك وتميزك

هز راسه بنفي والحسره كاتمه على گلبه.. لحد الان صوت صرختي باذاني انقهرت على نفسي واني طفل شلون انطاها گلبها تنطيني وتبدل روح بروح علمود رحيق ضحت بيه وتالي حتى رحيق ما حصلتها

تنهدت .. بعد هم استغلوها وخيروها انت بخير ورحيق مو بخير فقبلت تتخله عنك وتعيش بخير وتظل رحيق وياها حتى هماتين تكون بخير حتى لو كنت بعيد بس المهم عايش وسعيد

هز راسه باستنكار وعلى محياه ابتسامة حزينه .. مو بخيير

لزمت اديه بتوسل ... ارجع ويانه وتصير بخير

اشرلي بنفي قاطع .. ما اكدر ما اكدر اخذل ام ماهر ما اكدر اخذل امي الربتني

دا احجي وياه واندك الباب سمح الها بالدخول وهي دخلت جابت الاكل ما لذ وطاب خلته على المكان المخصص بغرفته وخلت وطلعت

كتله .. هاي شنوو المره

رد عليه بعدم اهتمام ..هاي وحده فقيره تجي تنظف عدنا بالاسبوع مره هيج وتروح وامي تنطيها فلوس هيج يعني بس خوش مره حبابه

بعدها كال .. اكلك هاي عبود سماره هم  تدرس البارحة شفتها بسوك

عقدت حواجبي.. يا عبود سماره

حك مؤخرة راسه وهو يكول بفشلة .. هاي الفلشت راسي

ضحكت بصوت عالي.. هههههههه قصدك افيان والله ما اعرف تدرس لا ما عندي علم بس ليش تسميها عبود سماره

ابتسم .. تذكرني بواحد بالمتوسطه جان ويانه وكح اسمه عبدالله طايحلنه دك نسمي عبود سماره

ظليت كاعد يمه نسولف ونضحك وبعدها اجت المنعوته بأم ماهر من شافتني وجهها انخطف وبين الانزعاج على ملامحها واني خليت وطلعت وما ظليت بوجودها لان اعرفها تخاف مني اخاف مصطفى منها

كله بسبب تحسين و وجيهة ام ساهر هي الدمرت مل عائلتنا الله ينتقم منهم وحسبنا الله ونعم الوكيل

..............................

جيهان

بعد ما طلع ابويه وتأمن المكان بسرعه طلعت الموبايل وخليت فافي تراقب من الشباك فتحت الموبايل ما ينفتح رجعت فتحته ما انفتح شغلته جانت الاشاره حمره ورجع طفى مره ثانيه

ضربت رجلي على الارض بغضب .. خرب بالحظ خرب بالحظ ما بي شحن وحتى شاحنه ما جبت هسه شلون انظل محبوسين هنا هسه وكتك تطفى

حاولنا نفتح الباب وننهزم ماكو يا الله شلون هذا قافله والله مصيبه لو اعرف ليش حابسنه جان ارتاحيت

شويه وحسيت بضجة بالخارج رحنه اني وفافي نباوع شفناه شخص اكبر من الاشتر بفد ست سبع سنوات هيج شي بيه شامة جبيره بس معرفت منو والثاني لا مبين عمره بالخمسينات بس الحقارة والدنائة كلها بوجههم ومقرفين حييل وجوهم مو رحمانيه

وجانوا يحجون بينهم جانوا نظيفين وملابسهم نظيفه عكس ابويه جان مخربط والوانه زاهيه برتقالي وفسفوري وكلهن وسخ ويحك بجسمه وراسه مدري شبيه

جان الوقت مغرب والشمس بدت تغييب وتختفي عقدت حواجبي وسالت افيان .. هذول منووو

باوعت الهم بقرف كالت .. اندري عاب هالشكول دكول نعالات مال حمام حشا خلقة الله

ضحكت عليها ورجعت كعدت بعدها راودني شعور غريب وكئيب معقوله ابويه يبيعنه لذول لو شنوو طردت الفكرة من بالي وما حجيت بيها لفافي خفت عليها تقلق وتخاف وهي كل همها وبالها عند خلطاتها اخاف يخربن دام الجو صار حار

وبعد نقريبا ساعه كاملة وما نسمع اله صوت الطلق يخيم على المكان ظلينه نصرخ و حظنت امين وابجي ولحد الان مستمر صوت الرصاص يدوي بالمكان

....................

سولين

بعد ما رجع من مدري وين والله ما اعرف وين جان اخذ الحيه واجه العصر وذاك اخو هم ما لافي اجه متاخر بعد ما اتصل عليه واني كلبي نار على اخواتي

كال .. يله خلينه نروح

اني بسرعه لبست وبدلت وطلعت وياه ركبنه بالسياره صفاء كاعد بالصدر واني ليوره جان يحجي وياه عن اخوهم مصطفى واني اصلا بالي مو عندهم

جنت افكر معقوله نوصل معقوله اشوف ابويه وتواجهه وياه نار شاعله بصدري اكره ابويه حيل وكل مره اتذكر شلون كتل امي وشلون جانت عيونها تصب بالدمع وهي تباوعلي لحد الان ما اكدر اتغاضى دموعها ولا اكدر اتناسى هذا الموقف تبجي علينه وتشيح بعيونها وكأنها رايحه بحسرتها علينه

بجيت بصمت مطبق وكل فكري عندهم والله متت قهر وتعبت وتعبت نفسي ينرادلي مصح كامل حتى يعالجني من الاني بيه اضحك واسولف بس بداخلي حسرة تهد جبال

وصلنه للمكان الي بيه المزرعه كان على ضواحي بغداد او بأطرافها من وصلت للمكان عرفت شلون ادلي وشلون اوصف اله كتله ادخل منا روح يسرى وهيج شي

هو جان يمشي بالسياره وتقريبا ظلمت الدنيا اول ما وصلنه للمزرعه وهوو وكف السياره طفاها وهو صار الرمي علينه صرخت بصوت عالي وحطيت اديه على اذاني وما اسمع بس صوت صدى الرصاص بحديد السياره

الاشتر سحب سلاحة وسحب صفاء من راسه خلاه جوه الكشن ودار وجهه عليه وهو يعيط بيه .... اكعددددددي جووووه لا تطلعين راسج ابببد

نزلت جوه واصررخ وابجي والطم وهو ماد ايده ويرمي عشوائي اولا مجان يشوف ولا يعرف مصدر الرصاص منين يجي وحتى ما كدر يسوق لا التايرات فشت من الرمي

وبعدها ما حسيت اله بالدم انرشگ بجام باب السياره على اثرها صرخت واغمى عليه

نهاية البارت... يتبع

كونوا انتم كونوا بخير ... احبكم 💔

لا تنسوا النجمة البرتغاليه 🌚