رواية ورود شائكة الفصل العشرون 20 - بقلم همس ليل

يسعد مساؤكم...من البارحة واليوم جماعة الفيس مسوين مظاهرات علية...ولخاطرهم ولخاطر تعليقاتكم الطيبة نزلت اليوم بدل باجر...
بس ترة ماكو باجر😒

ليس من العدل ان تستعمل نقطة ضعف احدهم ضده...
ولا ان تضغط على جرحه لمجرد ارضاء نفسك او غرورك...
همس ليل

ذيج الليلة الي مرت علية ما مار علي مثلها...
بس ليلة وفاة نور...
بقيت للصبح كاعدة وافكر ...
شصار بأبني...اكل ...شرب...بردان ...لو مدفي
اكيد خايف...
جنت كل شوي اكول حسبي الله ونعم الوكيل
اباوع لجربايته...
شلون ماما ...اول مرة تنام بعيد عني
كاعدة بجربايتي وشابكة رجلية...
ومخلية راسي عليهن...
ساعة دموعي تنزل...وساعة اظل احجي وية نفسي
فزيت على ايد تمسد راسي...
رفعت عيوني شفت احمد
_مايصير هيج...لازم تنامين شوية
رجعت خليت راسي على رجلية وماجاوبته
حسيت بنزلة الفراش من كعد مقابيلي
_هاجر...وعدتج ارجعله بس انطي صبر
_اني شمسوية بدنياي...
اب عافني واني صغيرة...
وحتى من ازوجت واطلكت من واحد سكط
كلها لامتني...
وجبت للدنيا ولد راح يظل يتعير بأبوه
_اذا تربى زين محد راح يكوله ابوك هيج
_لا يكلوله...
خلصت عمري شايلة ذنب ابوية بس يعرفون
شجان ...
تتغير نظرتهم لي...
_هذا مجتمعنا مايرضى على احد
المهم انتي ترضين ربج...
وتكدرين تحافظين على الناس الي تحبج
لشخصج...
_شعارات ..كل المجتمع يرفعها...
بس من تجي للواقع...
ماكو اي تطبيق...
_انتي تعبانة...نامي شوية...
والصبح الله يفرجها
كام وعافني...
وين يجي النوم لعيوني...
الصبح احمد كال راح اروح اخذ اجازة
وارجع...
جلبت بيه...
_شراح تسوي
_عليج الصافي
طلع وخلاني الهي نفسي بنور...
ومارجع...ادك عليه مايجاوب..
قريب الظهر اندك الجرس...
طلعت واني اخلي شال على راسي
احمد عنده مفتاح...
صحت منو
_اني خيتي ام كرار
طلعت فتحت الباب...
اقتربت مني بوستني
وجانت وياهة مرية...
_ام سامر...مرت حماج
هم البنية اقتربت بوستني
تطلع اصغر مني...لابسة عباية
الظاهر كلهن يلبسن عبي...
بس بكشخة...وجوة العباية
ماقاصرات لبس مرتب وعلى الموديل
_تفضلوا...
ردت ادخلهن للصالة ماقبلن
_نكعد يمج بالمطبخ
كعدن على ميز الطعام...
ام كرار...احمد حجالي على شغلة ابنج
الله يرجعه سالم بحق شهيد كربلا
_الله يسلمج
ام سامر...جان المفروض نجي نتعرف عليج
بغير هيج وضع...
بس حكم القوي
صاحت بيها ام كرار....انسام
ام سامر...على كيفج خية...
هسة لما امج زعلانة منج لان رحتي وياه للخطبة لسة
ام كرار...شلون يعني
ام سامر...معلينة....خالتج الله يرحمها جانت حبابة حيل...
هاجر...الله يرحمها
اجت نور تدفع بالحجلة....كامت ام كرار
وشالتها ...بوستها وهية تدفع بيها تريدني
ام سامر ...فدوة شكد تشبه امها...
بس لا تكون فقيرة مثلها...
ماتعيش بهالوكت...
خزرتها ام كرار...
اني ماجان لي خلك للمجادلة...
ولا رغبة اسمع شي ...رغم جنت اتمنى
اعرف شلون نور جانت عايشة وياهم
_اسفة ماقدمت شي
كمت بس ام كرار حجت
_لا خية وينج وين التقديم...
احنة جينة نشوف شتحتاجين...
اعتبرينة خواتج...واي شي مانقصر وياج
_تسلمين
ام سامر...اي حبيبتي...اخذي رقمي من احمد
وخابريني شوكت ماتريدين
ام كرار...وشلون تجين
ام سامر...عود اكول طالعة بشغلة للسوك
ام كرار...دكومي نروح كومي...
بعيطة اطلعين كلشي
ام سامر...اي والله...ابرطهن كلهن
تبسمت لحجايتها...مبينة فطيرة كلش
ام كرار...ضحكي خية...مادام احمد كال ارجعلج ابنج
يرجعه...
هاي دولمة سويتها لكم...ادري مالج خلك اتطبخين
ماجنت منتبهة من خلت جدر على الميز
اتشكرت منها ووصلتهن للباب...
ورجعت ادك على احمد...
هالمرة جاوبني...جاي بالطريق
بحيث اول مافتح الباب...
طلعت ركض عليه
_ها....وينه عمر
_مو كتلج عند ابوه
_يعني صدك طلع عنده
_اي
_شلون عرفت
_هالعار جبان...شوية انخض اعترف راسا
_وينه لعد عمر ...ليش ماجبته
_هاجر...كتلج انطي صبر...
خوما تعبر هيج...
لا تنسين رحنالهم وجذبوا وكالوا مو عدنا...
لازم نصوجهم
_يا تصوجهم ...يا عشاير
اريد ابني
_لازم هيج حتى مايعيدها...
_واذا كالوا حقه ابنه
_حقه يجي من الباب...مو خطف
_وهسة شلون...فدوة ما اكدر بعد
ماعندي صبر
_خلي نتغدى والعصر اتفقنا نروحلهم
صبيتله غدة بين ما غسل وبدل
_تعاي اكلي انتي هم
جنت واكفة يم الثلاجة اجيب خبز
_ما اشتهي
_لمن مسوية الدولمة لعد
_هاي ام كرار جابتها
_مو اكول
ماجاوبته...
كام من مكانه...ولزم ايدي وسحبني
للميز...
_اكعدي اكلي شوية حتى بيج حيل لفرحة رجعت عمر...
اكلت لكمتين...
هو كمل وكام لغرفته...
واني احوص...ليش هيج اعصابه باردة...
بعد ساعتين مرت دهر علية
طلع مبدل...
_ها وين
_نروح للفندي نشوف تاليتهة وياه
لا تخبصيني بالتلفون
طلع...واني ماخليت ما دعيت...
بس تاخروا لليل ماكو حس ولا خبر
دكيت عليه...رفضه
اخر شي تعبت رجلية من الفرة
كعدت بالكاع...
واتجيت براسي على الحايط...
يمكن من التعب غفيت...
سمعت صوت عمر يحاجيني
_ماما...ماما...
وايد ناعمة تمسد بخدي...
نزلن ادموعي واني عبالي احلم
بس صوت احمد وعاني
_هاجر افتحي عينج...
هذا عمر بحظنج...
فتحت عيني ملهوفة شفت ابني واكف يمي وايده فعلا على خدي...
لو شكد مااحجي ما اوصف شعوري...
شايفين الي على فراش الموت وفجأة ردتله الحياة
مو مثلي...
شبكت عمر واني ابجي واشهك....
_يمة وليدي...يابعد عمري
شوية اشمه وشوية ابوسه...
وهو حبيبي هم يبوس بية
بعد فترة خليته بحظني واني شابكته..
باوعت احمد ماكو...
يمكن دخل لغرفته...
_مامي أين نور
_نايمة حبيبي...
وين بقيت من اخذك ابوك...
_مرية ماعرفها...وبعدين رجعني يم بيبي
جان يمتمت من يحجي...
بس فهمت عليه...
_زين من بقاك يم المرية هم اجى عليك
هز راسه لا
يلا كوم...دخلته للحمام غسلت له...
واني اكلب بجسمه...
وطلعت لافته بالبرنص مالته واني شايلته
ماودي ابعده عن حظني...
لبسته ملابسه...وجان نعسان نام حبيبي واني اباوع عليه...
بعدين اذكرت...
غطيته وطلعت...
رحت دكيت الباب على احمد
سمعت صوته...تفصلي
فتت مرتبكة...
_ردت اشكرك
_على شنو
_على رجعة عمر
_المفروض على هيج اشكرج اني هم
_تشكرني...ليش
_على تعبج وية نور...
بس ترة الشغلة ما خلصت...
راح يرفع قضية ...
ولازم نعقد باسرع وقت بالمحكمة احنة نسينة هالشي
_وشعليه عقد المحكمة
جان متمدد على جربايته ومن طبيت عدل كعدته
وبقى كاعد على الجرباية...
واني واكفة مقابيله يم الباب
_ممكن يتهمج مزوجة بالسر
_يعني ماراح اخلص منه
_هو غبي...لو رايح مقدم دعوة جان كسبها بسهولة
بس من خطف عمر ضيع فرصته
_يعني ممكن هالشي نستخدمه ضده
_اكيد
_تعبتك وياي
تبسم....مداعرفج...ياريت ما اكعد الصبح
الكى ام لسان راجعة...
_تصبح على خير
سمعت صوت ضحكته وراي
خليت راسي على مخدتي...
واني حيل مرتاحة...
اول مرة احس بالأمان...وما اشيل هم باجر

وطبعا خابرت ماما وحجيتله...
خطية ظلت تبجي بالتلفون
_شنو من حظ عليج امي...

الاسبوع الي بعده التهينة نعقد باالمحكمة
وبالبيت رجعت حياتنا لروتينها

بيت اهلي رحنا اكثر من مرة نظفناه وجبت وحدة شالت الزوالي وغسلتهة
وام كرار اكثر من مرة رحنا زرناهة...
بس باقي اهله ماكو...
ادري هو يروح عليهم...

رجعت الهدنة بينا...ماكو مناوشات
واني هم حاولت اركز بالبيت...

خالد رفع قضية...
وصارت شغلة خطفه لعمر وجود شهود ان عمر وضعه زين ويانة...
قنعت القاضي ابقاء الحضانة لي حاليا..

احمد غير رقمي...واي رقم غريب صرت ما ارفعه
وحتى بيوم الي خالد ياخذ عمر...
فيكون عن طريق احمد وابو فهد

بيبتي طلعت من المستشفى...
وجان لازم تبقى فترة نقاهة يلا...
وكدر خالي يجدد لهم الفيزة...

دخل الصيف...ونور قبطت سنة...
وبنفس الوقت صار سنوية امها..
ومر على زواجنا اربع اشهر...
ماما رجعت حتى تحضر سنوية نور
ورحت لبيتنا....
فتحته وجبت وحدة نظفته وياي...
وواحمد راح يجيب ماما من المطار...
من وصلت...تلكيتها احضن بيها...

احمد ما حضر ويانة...
لان سوة السنوية يم اهله...
كلش انقهرت بوقتها...
احنة سوينا عشى...بحظور اهل امي...
ووزعنا هم ثوابات...
وثاني يوم اجى احمد اخذنا اني وامي للمقبرة
هاي اول مرة بعد زواجي اجي...
جنت استحي اوكف على كبرها...

حاجيتهة...نور شوفي بنتج كبرت...
بمكان ما اسويلها عيد ميلاد...
اسويلج سنوية...
حبيبتي اعذريني ماجان قصدي والله
الي صار...
جنت اقصد على زواجي...
احمد وكف مسافة...واني جنت احاجيها بصوت ناصي...
وامي تبجي...
من كملنا قراية قرأن يمها...ومشينا وصلنا للسيارة
سلوى...لعد وين احمد
التفت شفته كاعد مقابل القبر...
رجعت درت وجهي..
اني جنت شايلة نور...وامي كايدة عمر...
شوية واجى...بس ماخلى عينه بعينا....
رجعنا لبيت اهلي وماقبل ينزل...
بس نزلنا يم بيت اهلي ....راح
جنة تعبانين مو بس جسديا...
لا نفسيا هم...
دخلنا لغرفنا نمنا...
ومن كعدت جانوا الجهال بعدهم نايمين
لكيت ماما واكفة بالمطبخ...
شدسوين...
_جاي تريدين...
_اي
كعدت على الكرسي...
وهية صبت جاي وجابت كليجة وكعدت مقابيلي
_راح ترجعين
باوعت على كلاص الجاي
_احتمال ناخذ اقامة...
طبعا خالي اخذ الجنسية لان مرته جابت هناك والطفلة اخذت الجنسية...
وامي وبيبتي جان من زمان مسويلهم لم شمل
_يعني تريدين ترجعين لهناك...
واني ماما
باوعت علية...
_انتي عندج عائلتج...زوجج وجهالج
وباجر عكبة يصير عندج طفل ثالث
_يعني راح تعوفيني
_هاجر حبيبتي...صار وكت اطلعين من جوة جناحي
_ميخالف ابقي يمي...
_لا...اذا بقيت راح تبقين تحومين حولي
دنكت ودموعي نزلن...شو صايرة هواي
تنزل دموعي بسهولة..
طول فترة بقاء امي اني بقيت يمها...
احمد جان يجي شوية ويروح...
ويخابر يسأل اذا محتاجة شي...
بقت اسبوعين وبعدها رجعنا عزلنا البيت
وسافرت ماما...
احمد اخذنا سوية...نزلني بالمشتمل...
واخذ امي للمطار...
من شبكتني جان بصوتهة غصة...

فتحت باب البيت ودخلت وياي الجهال...
تبسمت ولا عبالك عايفة البيت...
كلشي بمكانه...مرات ترتيبه يربكني...
اكو شخص مرتب ونظيف...
واكو شخص نظيف بس ما مرتب
اني هيج...ما تلكين شي وسخ...
بس هوسة...يعني كنتوري كلشي نظيف
بس مامرتب...
المطبخ...كلشي نظيف بس ما اهتم بترتيبه
دخلت لغرفتي بدلت للجهال...
ورجعت بدلت وشمرت الملابس على الجرباية...
اذكرت نور من جانت اتكول شوكت تبطلين هوسة...
رجعت شلت الملابس من الجرباية وشمرتها بالكنتور
جريت الجنط وطلعت الملابس الصيفية...
قبلها جان الجو طيب....البس قميص بدون البنطلون
واسرقي باب.الممر...من يجي احمد يدك الباب
البس راسا دراكسود...
بس هسة احترت...ومن رحت للبيت جانت فرصة جبت ملابس...
من فتحت الجنط ظليت حايرة...
خوما البس برمودات...
مالكيت غير دشداشة قصيرة جوة الركبة بشوية
وربع ردن...
البستها...وطلعت جدر برياني ماما سوتهة قبل ماتسافر...
خليت على النار داحمي...وسويت زلاطة...
غديت الجهال ونيمتهم....
سمعت صوت الباب انفتح...
_السلام عليكم
التفت عليه...وعليكم السلام...
شفته عيونه حامت حولي
_تتغدى
_خلي اغسل وابدل
حضرت ميز الطعام...
هو خلص واجى كعد مقابيلي...
بس جانت نظرته مختلفة...
عينه ما نزلت من علية...
_هاجر...
رفعت عيني له
_نعم
_مو صار وكت تحولين بالغرفة
حجايته ربكتني...ورغم فهمت شيقصد
لكن غشمت نفسي
_ياغرفة
_غرفتنا...حولي ملابسج بيها
_مكفيني هذا الكنتور
ضحك...
_تغشمين نفسج...
العصر اروح للمكتب...حولي اغراضج واليوم نومتج بالغرفة...
كام من الاكل...لميت الميز
ودخلت لغرفتي...تمددت على الجرباية
وحجايته تردد براسي...
هاي نقطة الي ماجنت اتمنى اوصل لها...
بس لا مفر منها...شلون...
ماطلعت من غرفتي لحد ماسمعت صوت الباب الخارجي ينطبك...
والساعات لحد مارجع حسيتها جانت سريعة...
غسلت للجهال وعشيتهم ...
_جيبهم يمي لحد ماتسوين عشى
اخذهم لغرفتهم...بس اسمع صوت ضحكهم
وشوية ونصة الصوت...
وطلع احمد...
التفت عليه...
_وينهم
_ناموا...
_خلصت عشى تفضل
من كعدنا على الاكل...
_نقلتي ملابسج...
جنت مادة ايدي اخذ صمون من الحافظة
وكفت ايدي بالهوى...
وصفنت عليه
_،ها
_شنو ها...مو اتفقنا
_شوكت
_هاجر...هذا الاسلوب ما احبه
خلصي عشى وتعاي للغرفة
عافني وكام...بقيت صافنة على الاكل
يمكن ليلة عرسي ما ارتبكت هيج
كمت خليت الاكل بالثلاجة...
وكفت اغسل المواعين...
_يعني يومية المواعين تبات للصبح
اليوم نزلت الندارة الا تغسليها
جان ظهري له من يحجي...
عضيت شفتي مرتبكة
_عوفيهن وتعاي...
من ماجاوبته صاح بية
_كتلج عوفيهن...
سديت البوري والتفت عليه ..
جان واكف اباب الغرفة...ابتعد شوية وفتح الباب...
واشر بيده باتجاه الباب...
جريت نفس ....مشيت اقدم رجل واخر...
وبمجرد ما دخلت الغرفة...دخل وراي وسد الباب
بقيت ظهري له...وعيوني تفر على الغرفة عبالك اشوفها اول مرة...
فزيت من خلى ايديه على جتافي...
_هاجر...اخذنا الوقت الكافي...
هسة لازم نبدي حياتنا...
ماجاوبته ...سحبني باتجاهه...
بحيث صار صدره على ظهري...
هو اطول مني ...رغم اني مو كصيرة
بس يدوب راسي يوصل لجتف...
من طخ ظهري بيه...
كشت نفسي...وغمضت عيني..
احاول اقنع روحي...
اول وتالي الامر محتوم...
يلا شلون ماجنت امثل وية خالد...
امثل وياه...
بس هاي الفكرة عادت الصورة الي شفت خالد بيها
وحسيت شي صعد من معدتي لبلعومي...
وزاد من حسيت بشفايف احمد على ركبتي...
حاولت ابعد الصورة وافكر بشي ثاني...
بس لعبان النفس زاد من حظني وقربني لصدره
اكثر...
وبوساته زادت على ركبتي...
فجاة حسيت راح اتقيء...
دفعته بكل قوتي وطلعت ركض للحمام...
ظليت اتقيء...
سمعت ركعة الباب...
عرفته دخل بغرفته وسد الباب...
غسلت ورجعت لغرفتي...
شلون بية...خوما ابقى هيج
نمت...وكعدت الصبح على صوته بالمطبخ...
كمت من فراشي...شفته ديغسل
_صباح الخير
جاوبني بدون مايلتفت...
_صباح النور...
جانت نهاية سنة دراسية ...
وعنده مراقبة مال امتحانات..
دخل لغرفته يبدل...واني خليت القوري على النار
وطلعت الريوك...
طلع من غرفته...
جان مبدل ومتعطر...
_ماتتريك
_ما اشتهي
راد يطلع...لحكته....
وكفت كدامه...
_احمد
باوع علية...خير
_ما جنت اقصد الي صار البارحة
_هيج لعبانة نفسج مني
_لا ..لا والله
_لعد ليش
دنكت...لعبت نفسي من اذكرت
ما كملت بس عرفته افتهم شردت اكول
_تقارنيني بيه...اشكرج
عافني وطلع لشغله
اهووو...اجيت اكحلها عميتها...
يلا خلي يزعل بعد احسن..
على الاقل نخلص من هالموضوع فترة..
خلصت الصبح بالروتين العادي
وطلعت على الطرمة اغسلها...
ونشفتها بالماسحة..وصلت للباب...جان مسدود
بس مو عالي اكدر اشوف منه الي يمر...
سمعت صوت ميزته...
رفعت راسي....شفت امه وياهة ام سامر..
ماعرف شكالت ام سامر وامه عاطت بيها
امشي خايبة امشي...
التفت على بابنا...شافتني..
عوجت حلكها وهزت ايدها...
واحلف غمتني بدون ما تنتبه ام سامر
انصدمت بتصرفها...
كتلها الشعور متبادل...بس اكيد ماسمعتني
لان مسافة ماشية عني...
احمد تاخر بيومها...غديت الجهال ونيمتهم...
وخلصت كل الشغل وهو ماكو.....
باوعت الساعة ب٢ الظهر ...
وهو بس مراقبة يعني ب١٢ يخلص
دكيت عليه...فصله
شوية واجى...
دخل سلم...ويريد يدخل للغرفة...
_شو تأخرت..
وكف بمكانه بس مالتفت علية
_،عدنا تصحيح
_راح اصبلك غدة بين ما تغسل
_تغديت
_وين
التفت علية...
_من شوكت هالاهتمام..
سكتت...
_من يصير عدنا تصحيح...المدرسات يجيبون غدة
دخل لغرفته..

اذكرت نور جانت بوقت الامتحانات تخبص الدنيا حتى تسويلهم غدة
رحت خليت جدورة الاكل بالثلاجة...
وسويت جاي وجبن
طلع يريد يدخل للحمام...
_شو جبن وجاي
_اشتهيته
_متاكدة لو اليوم الاكل فد مرة
عرفته شيقصد...
_هذا الي اعرفه
_تتعلمين...شو امج اكلها يخبل...وحتى
بس ما كمل...
اني كملت بمكانه
_حتى نور اكلها يخبل...وخوب المعجنات
فد شي...
اما اني
كمت رفعت جتفي بحركة...
عفته ودخلت للغرفة...
ضجت من نفسي...
ماكان المفروض احجي هيج...
اضغط على نقطة وجع احد...
استغفرت ربي...
هسة شبية ...على الاقل اذكرله وكفته من رجع عمر لحظني ...
لو وكفته وياي بالمحكمة....
اتخذت قرار...احاول ابدي حياة جديدة
من كعدت وكالعادة لكيته رايح للمكتب...
نقلت ملابسي بالكنتور ورتبتها...
وسويت عشى....وفتت غسلت...
ولبست تراك شورته لحد الركبة وعليه تي شيرت ربع ردن...
تعطرت ورفعت شعري بشكل مرتب...
طلعت الجهال بالطرمة...
بس هالمرة بقيت يمهم...
شفته فتح الباب...ابتسمتله...
اول مادخل وشافني حسيت عيونه راح يطلعن من مكانهن...
كلت ياستار...
بخطوتين وصل يمي...
وجرني من ايدي دخلني للمطبخ
_شكو شبيك
_شلون طالعة هيج بالطرمة
_قابل بالشارع
_شفرقها عن الشارع...
وشكو واحد بالسطح يشوفج
جان صوته عالي...
_ماتكدر اتكول هالحجي بدون ماترفع صوته
_لان اريد ادخل الحجي بدماغج....
جنا واحد واكف مقابل الثاني عبالك
ديوجة تتناكر ...
دفعني عن طريقه ...
المشاحنة فرحتني...كلت خلص اجت منه
صحت براه...
_الجهال بقوا برة
فات من يمي يتأفف...
وراح جابهن واجى...
دفع نور علية...عمر يمي...
غسلت للجهال وعشيتهم وفتت نيمتهم
وهو بغرفته ما طلع...
هسة اني شورطني وخليت ملابسي بكنتوره
دكيت الباب...
_تتعشة
اجاني صوته..
_صبي زقنبوت...
صبيته وصحته...طلع تعشة وكام بدون مايرفع عينه
ولا يحجي حجاية
اريد ابدل ملابسي شلون...
رجعت دكيت الباب...
_فوتي
لكيته متمدد يتفرج على التلفزيون...
_اريد ملابسي
التفت صافن بوجهي
_شنو
طبيت داخل الغرفة وصلت للكنتور من الجهة الثانية
وعيونه تتبعني...
فتحت الكنتور...طلعت ملابس...
من اجيت اربد اطلع ..
_ارجعي هنا نامي...
طلعت للغرفة الثانية...
بدلت التراكسود بدشداشة قصيرة...
وعفت باب غرفة الجهال شوية مفتوحة
حتى اسمع صوتهم اذا كعدوا...
ورحت للغرفته...مترددة...اخر شي شجعت نفسي
ودخلت...
افترت للجهة الثانية...جانت وياي بطانيتي
نمت على حافة الجرباية...
وتغطيت ...
شوية وصوت التلفزيون انطفى...
وحسيته عدل نومته ...
ودقايق حسيتها ساعة...وما احس الا شي انطخ بية
فزيت وتصلب جسمي....