رواية ورود شائكة الفصل الحادي والعشرون 21 - بقلم همس ليل

هناك خيط رفيع بين الحب والكره...
والايام كفيلة بصقل تلك المشاعر واظهارهة على حقيقتها...مهما حاولنا ان نخفي او نداري...
همس ليل
حسيت على ايده من خلاها على خصري ويريد يسحبني بأتجاهه...
تصلب جسمي...
_شبيج ...شكو نقلتي ملابسج لعد
ماجاوبته وهو يسحبني بحيث حظني من ورة
ورفع راسه وبعد شعري وهمس بأذني...
_اليوم ماكو مفر...
نزلت ايده من خصري لحد رجلي وبدة يرفع بالدشداشة بهدوء...
وشفايفه نزلت على ركبتي من الصفحة...
وبهالاثناء بجت نور....راسا دفعته وكمزت
رحت لغرفتهم لكيتها واكفة بجربايته ولازمة الحاجز مال الجرباية وتبجي ...
شلتها من مكانها
_شبيج ماما...
خلت راسها على جتفي...وهية تشهك
سويتلها ممة وكعدت على الجرباية...
وخليتها بحظني ارضعها...
عمر كعد ...
_نام ماما بعد وكت
رفعت راسي على صوت احمد
جان واكف اباب الغرفة
_شبيها
_ما اعرف
_خاف موقتتها
كالها باستهزاء
دنكت اباوع لنور وماجاوبته...
سمعت خطواته من ابتعد وصوت باب غرفته من انسد...
خلصت نور رضاعة وبقت شوية يلا نامت...
بس ما جرئت ارجع للغرفة...
نمت بجربايتي...
والصبح من كعدت لكيته طالع لدوامه...
من رجع وكت الغدة ما حجى شي..
اتغدى ومن راد يدخل غرفته...
_العصر نروح لبيت ام كرار...
البيت مثل ماكلت غرفتين نوم ومطبخ مفتوح
وصالة...وهاي معزولة نادرا ما نستخدمها
لذلك اغلب كعدتنا بالغرف...
غسلت مواعين الغدة...
ونيمت الجهال...واخذتلي غفوة...
كعدت على ايده تهز جتفي...
فتحت عيني...
_ها
_الجهال كعدوا...كومي نروح
عافني وطلع...
كمت اخذت الجهال للحمام غسلت لهم
وبدلتلهم...وطلعتهم يمه...
جان كاعد بالصالة...
_بقيهم يمكم بين ما ابدل...
عمر جان هادي بس نور كلش حركة ووكحة
رجعت بدلت وخليت مكياج..
من رحت عليه للصالة..
جان بيده الموبايل يتفرج بيه...
رفع عينه عن الموبايل...
كصني من فوك لجوة...
رجع نظره على الموبايل...
_بدلي ملابسج
باوعت على ملابسي ...
جنت لابسة بنطلون وعليه قميص طويل
_شبيها ملابسي
_احنة اتفقنا من البداية لبسج اتبدليه...صح لو غلط
_وهسة مبدلته ولابسة قميص طويل
_لا...لو تلبسين جبة لو عباية
_شنو...خاف
وراسا سكتت بس شفته رفع عينه وخزرني
_اني هذا لبسي...
وكف مقابيلي...
_واني اتفقت وياج يتغير
جر نفس اهدي روحي
_بس مو مال جبة وعباية
_وشبيها الجبة والعباية...استر
هسة اكعد اتناقش على الاستر كلت وية نفسب
_ماعندي..وماعرف البس عباية
_البسي جبة...
وامشي هسة اشتريلج...
شال نور من الكاع بدون مناقشة...وحجى وية عمر
_يلا عموري امشي حبيبي...
كاد عمر وطلع بدون حتى مايلتفت علية
اخذنا للسوك...
جان هو شايل نور...واني كايدة عمر...
_الجهال هم اشتريلهم...
هو صدك جان لازم اشتري للجهال ملابس صيفية
دخلنا لمحل واختاريت للنور...
ومن جيت اختار لعمر...جان هو ينسقله
خلصنا وديريد يدفع فلوس
_ملابس عمر اني ادفعها
خزرني بنظرة حسيته راح يأكلني بيها
واول ماطلعنا...
_المفروض شجاوب هسة
_ما ملزم بيه انته
_مو هسة خلي نوصل للبيت..
بعد ماينفع حجي وياج صبرتلج هواي
سكتت...ومن دخلنا لمحل جبب...
ما اعترضت...كلت كافي خاصة الجبب جانت حلوة
اخذلي اثتين على ذوقه بعد ماقستهن
صارت دنيا ليل كال خلي نتعشة...
كعدنا بمطعم...وطلبنا اكل...
ورغم عصبيته من الموقف الصار...
بس وكاحة نور وهية تهامش على الاكل ضحكته
_ام بطن ...لا تظلين هيج توكليها
ترة سمينة صايرة
_لا حبيبتي مينلها...وزنها عادي مربوبة
_اذا طلع جسمها مثل بنت خالتها...لازم من الابتدائية
البسها عباية
غمزلي بعينه...
دنكت واني اول مرة احس بالخجل  وما ارده
جنت اني اوكل نور...وهو يوكل عمر...
وظل يحجي على مواقف طلاب وياه اتضحك
هذا وجه ثاني ماشايفته منه...
دوم اشوفه معبس لو يحجي جديات لو عصبي
بس مال يشاقة ويضحك...هاي اول مرة اشوفه
تونسنة وضحكنا...
برجعتنا...الجهال واحد ورة الثاني نام...
من وصلنا للبيت...
نزل هوة فتح الباب الخارجي...وباب الممر
اجى شال عمر...دخله للفراشه...
ورجع فتح باب السيارة من ناحيتي...
اخذ نور الي جانت نايمة بحظني...
وماكدرت انزل لان صدك صايرة ثكيلة...
هو شالها ودخل جوة...واني سديت الباب مال السيارة
وفتحت الباب الخلفي نزلت العلاليك...
من داسده ...انفتح باب البيت مو المقابيلنا الي بصفه
هو يمكن جان عدهم شي...بس اني ماعندي علاقة بالجوارين ..
طلعن مجموعة نسوان وبمقدمتهم جانت ام احمد
سديت باب السيارة ودافوت سمعت وحدة حاجتها
_هاي مو جنتج الجديدة
_هو منو معترف بيها عشتو...
حيل غثتني حجايتها...سديت الباب بقوة
ودخلت جوة
لاكاني احمد
_بعد اكو اغراض برة...
جاوبته...لا بس ماقفلت السيارة
_هسة اقفلها...
والجهال ناموا...
غمزلي وطلع...
جنت حيل ضايجة من حجاية امه...
ومن اودي اطلع حركتي باحد...
دخلت الاغراض وخليتهن على الميز...
ودخلت للغرفة اخذت منشفة ودشداشة
ورحت للحمام...غسلت وطلعت...
مالكيت احمد...باب الممر على ردته
الظاهر من طلع مارجع...
وين راح...رحت على جنطتي فتحتها وطلعت الموبايل...
دكيت عليه...سمعت صوت الموبايل يدك بالغرفة
طلعت لباب الممر فتحته...
واسنطت ماكو صوت بالشارع...
بقيت حايرة...وين صار...
كلت خلي انتظر شوية...
شوية وسمعت صوت الباب البرة ينسد ويدسرقه
لا اردايا لركضت لباب الممر تلكيته
اول ما طب حاجيته...
_وين رحت
باوع علية بعصبية...بس ما حاجاني
_مو داسئلك وين جنت
جان ظهره لي ويسد الباب...
التفت علية وجرني من زندي للغرفة
اول ما دخلنا سد الباب وهد يدي واني مستغربة
هذا شبيه
_شصار
_احجيلي انتي
_ماعرف عفتك تقفل السيارة ودخلت للحمام
طلعت انتة ماكو
_وقبلها
_هو لغز كول شصار
_ليش راكعة الباب بوجه امي والجوارين
وحتة ما مسلمة
صفنت بوجهه...
_شبسرعة وصلتلك خبر
_يعني صحيح
_وما كالت لك شحجت للجوارين
_مهما يكون جان كلتيلي مو تسدين بوجهها الباب
_اكولك شو خبصتني اسدين وجهها الباب
الي يسمعك هية جاية علية وسديته
هية طالعة من بيت جيرانكم
اتقدم علية بسرعة ولزمني من زندي
_طولة لسان ما اريد...واني كتلج اهلي
خط احمر ولازم تحترميه
_أفتهنا خط احمر...بس الي مايحترمني ما احترمه
حيل ضغط على زندي بحيث حسيت لحم ايدي راح ينكطع
_راسج اكسره...وهذا لسانج اكصه
جريت ايدي حيل منه وابتعدت مسافة عنه
_ماعاش الي يكسر راسي...
مادام مامسوية غلط...
حسيته ورث حيل وعيونه احمرت...
_بعلي انتي ماينفع وياج شي...
كل مرة اكول تستعدل...
بس الظاهر ماكو فايدة
_اني مو عوجة حتى استعدل...
مو اتحشي براسك وتريد اطلع رجولتك علية

بلحظتها جاوزت كل الخطوط الحمرة وياه...
اتقدم  باتجاهي بخطوتين  حسيته راح يضربني
بس جرني وشمرني على الجرباية ...
_توازين واحد على كتلج...
وهسة اشوفج الرجولة شلون...
نزع سترته...
الي صار بعدها مو جان سريع بكد ماجان غريب
ولا حلمت يصير وياي...
اني عبالي راح يضربني...ردت انهزم من الجرباية
اول ما تحركت جرني من رجلي...
وصار فوكي...باوعت عليه برعب...
حاولت ادفعه بس هو ضخم وثكيل...ثبت ايدي فوك راسي بيد وحدة..
والايد الثانية لزم دشداشتي من فوك وشكها...
شهكت من سوة هيج...
كمت ارافس برجلية اريد ابعده...
حجز رجلية بين رجليه....
ونزل على ركبتي ...ماجنت احسه يبوسني
جان يعاقبني...
حسيت بذلة واني اشوفه يحاول يفرض سيطرته علية
كمت احرك براسي بكل جهة...
اري ابعده...رفعت راسي وعضيته من جتفه
صاح من الالم...رفع راسه علية
_شكد عرمة
بس ما توقف...ومن فك ايدي يريد ينزع تي شيرته
بكل ماعندي من قوة دفعته...
عبالك ادفع جبل....
رجع ثبتني بمكاني...
_اليوم لو تموتين ما هدج
لحد ما انتهى مني ابتعد على صفحة...
وهو يدير وجهه عني...
كمت من الجرباية ...احس كل جسمي يأذيني
وحاولت استر نفسي بدشداشتي المشكوكة
من وصلت للباب سمعته يحاجيني
_هاي حتى تبطلين طولة لسان
مالتفت عليه ولا خليته يكمل حجايته
طلعت بسرعة و اسد الباب...
ما اريد اشوف نظرة شماتة بعينه...
دخلت راسا للحمام...نزعت دشداشتي ودست عليها
وفتحت الدوش وكفت جواه ودموعي تجري
وية مي الدوش...
عضيت ايدي بسنوني ما اريد صوت بجيي يطلع
هو ليش يستضعفون المرة...
سديت الدوش ...وباوعت شلون اطلع...شفت منشغة صغيرة...
لفيتها على جسمي...وما اهتميت طلعت
دخلت لغرفتي...بدلت ملابسي...
وتمددت بجربايتي واحس من القهر راح اطك
ماعرف شكد ظليت اتكلب اريد بس ابعد صورة الصار عن ذهني...
كعدت الصبح على صوت الجهال...
شفت عمر يحاول ينزل نور من جربايته
راسا كمزت عليهم
_لا ماما لا توكع شلون تريد اتشيلها
_ماما خطية تريد تنزل وانتي نايمة
_اي حبيبي كعدني...
اذا وكعت تنكسر ايدها...
نزلتها...هية صايرة تخطي وماتقبل احد يشيلها
تريد تسرح وتمرح بكيفها...
سويتلهم ريوك...وخليتهم يلعبون واني كعدت يمهم على الكرسي...احس جسمي كله يوجعني...
وكل ما اذكر البارحة احقد عليه كلش
باوعت لزندي مال لزمته صايرة زركة حيل...
كمت للمراية بغرفتنا...بعدت الدشداشة عن اجتافي
مناطق زركة...من جان يحاول يثبتني...
ايديه ثكيلة حيل...
سمعت صوت الباب..بقيت واكفة بمكاني ما اريد اواجه...
_هو باباتي شلونج...
عرفت نور تلكته
شلونك عموري حبيبي...
وين ماما...
_بالغرفة...
غمضت عيوني عبالك اريد اختفي...
دقايق وسمعت صوت باب غرفته انسدت
هسة خوما ابقى خاتلة بالغرفة...
طلعت للمطبخ ....خليت الاكل على النار
هو اليوم جاي من وكت...
شوية وطلع من غرفته...
اجى كعد على الكرسي...
_اكو جاي...طالع بدون ريوك
ردت اكوله سوي لنفسك...
بعدين بطلت من اذكرت البارحة...
خليت القوري على النار وطلعت اجبان وخبز خليته كدامه...
حسيت عيونه تراقبني...
صبيتله جاي ومن خليت الكلاص كدامه لزم ايدي
ردت اجرها
_اكعدي
جرني وكعدني مقابيله...
خاط كلاص الجاي وهو يحاجيني
_اذا متوقعة اعتذر عن البارحة غلطانة
ظليت اباوع ليده وهو يخوط
_انتي جبتيها لنفسك...كتلج اكثر من مرة
ضبي لسانج
_وقررت تعاقبني...
مو جارية عندك
رفع عيونه علية...
_شلون يعني وياج...
رجع باوع لعمر ونور وهمة يلعبون
_شلون بلة معاملج كجارية...
مقصر بشي...لو مكلف اكثر من طاقتج
لو ماد ايدي عليج
_مو حيوانة حتى تضربني
_بالضبط...ومثل ما محترمج
المفروض انتي تحترمين وتبطلين ملاسنة
عندج شي كوليه...
مو الا طولين لسانج...
_ليش انطيتني مجال احجي...
راسا هجمت ...
واهلي خط احمر واهلي كذا
باوع علية...
_هذا مو اتفاقنا
_اي بس مو يجاوزون وتريد اسكت
جر نفس...
_هاجر...امي مرة جبيرة بالعمر...
اذا حجت فعتبريها امج...
_ماكو احد ياخذ مكان امي
_اللهم ماطولج ياروح
لج بابا يعني احترميها مثل امج
_سؤال ...هية من ماقابلة على زواجنا
ليش ازوجتني
شو نور بقت ست سنوات ..لان ما راضية امك
باوع لكلاصه...
_الوضع يختلف
_شلون يعني
شال كلاصه وكام...
_عوفي هذا الموضوع
وكفت مقابيله...لا ما اعوفه...
باوع علية ورفع نظره ..
_شكد عنيدة...
وخر عني ودخل لغرفته
شوية وطلع...
_تريدين شي
_وين رايح...
_للسوك...لا تسوين غدة...حجيب جاهز
وصيته على حفاظات نور وحليبها..
وشغلات ثانية...
من طلع ظليت اباوع ابراه...
مستغربة من نفسي...
شو عديت الموضوع بسهولة...
ولا عبالك البارحة اتوعدله...
هزيت ايدي...والله يالله صدك مو عاقلة انتي...
رجع الظهر جايب الاغراض والغدة...
طب يسبح واني رتبت الاغراض وصبيت الغدة
من نكعد على الغدة...
يبقى يشاقة وية عمر ونور....
مايفرق بينهم...
خلصو الجهال غسلت لهم ودخلتهم ينامون...
ومن طلعت...
جنت مصممة اعرف منه...
دكيت باب الغرفة وراسا فتت...
شفته بالفانيلا... وشورت...واكف مقابل المراية يباوع لجتفه
باوع علية ورجع يباوع بالمراية
_كوليلي ملقحة انتي
_شنو
_لعد هاي عضة الله عليج
_وانتة قصرت ..ايدين لو كلابشات
رفعت ردن دشداشتي...صح جانت
نص ردن...بس مغطية مكان لزمته
طلعت المكان...
اقترب وصفن عليها...
_هاي شنو ...شكد ترف جلدج...
_يعني هسة صوج جلدي مو لزمتك
ضحك
_لو يسوون مسابقة بطولة اللسان..
تاخذين المركز الاول...
مد ايده يتلمس مكان الازمة...
بس من اتلمسها...
ماعرف شصار...فد شي اتحرك بداخلي...
راس سحبت ايدي...
هو ضحك...
_ليش شرفتيني هسة
_ها
_شبيج
_اذكرت...
عندك شي
_لا ...تردين شي
غمز بعينه
افتهمت قصده...بس غشمت روحي
_اي...سكتت شوية واني اشوف وجهه اتبسم
اريد نحجي
غلتم...اي تعاي
_مو هنا بالصالة
_حارة الصالة...ذكرتيني خلي نسويلها مبردة
كعد على الجرباية
باوعت ...زين تعال للمطبخ
_بابا شبيج خبلة...
داخلة بغرفة غريب وخايفة...
غير هاي غرفتنا...
_ادري وين اكعد ونحجي
اتربع على وسط الجرباية...واشرلي مقابيله
صعدت كعدت بالمكان الي اشر عليه
_جاوبني
_هو وين السؤال
_سألتك بالمطبخ
_هاجر ليش تلحين على نفس النقطة
_ريحني
_اذا جاوبتج راح اتزعلين...
_لا ما ازعل....
بس خل افهم...
جان نظره وراي...يمكن مامركز على شي محدد
بس مايباوع علية
_وضعنا مختلف...
الظروف جمعتنا...انتي وضعج
واني...وسكت
ولكن المرحومة  جانت اول نصيب لي ولها
يعني قابل اخذها غصب على اهلي
_وامك ليش رافضتها
_مو كتلج راح سؤال يجر سؤال...
هاي شغلة ثانية
شفته طولت سكته وصفنته عبالك راح بغير عالم
طلعت من الغرفة ...
فهمت الي راد يوصله رغم اختصر...
لكن حسيت ما راد يجرحني
فعلا نور جانت اول بخته وهو اول بختها
بس هسة هو ارمل واني مطلقة...
دخلت لغرفتي واني نفسي اعرف شنو جانت نقطة الاختلاف الي خلت نور مامرتاحة...
الي متأكدة منه هية امه...وهو حسب ماشفت مايكسر حجايتها...
زين ماجان لنور خاطر يمه...
على هاي الفكرة غفيت....
كعدت هو طالع للدوام...وكالروتين اليومي
من صار الليل وعشيتهم ونيمت الجهال...
طبيت للحمام...
طلعت لابسة البرنس ...
هو دائما هيج وكت اغسل...هو يكون بغرفته
ومايطلع...
بس اليوم لكيته متجي على باب غرفته...
من طلعت ...ابتعد شوية كأنما يسويلي مجال افوت
سويت نفسي ما افتهمت...
مشيت باتجاه غرفتي...
_ترة ملابسج هنا مو هناك
_لا عندي ملابس هنا..
بس مالحكت اكمل طريقي...
راسا جرني من ايدي ودخلني بالغرفة وسد الباب
_مو كلنا هنا نومتج
_بعد البارحة ما اعتقد
_ليش
_بعد اثار معركتك...معايفة نفسي...
ضحك...
_لا هاي مو مقياس...
اقترب وهو يمد ايده للبرنس من فوك
اني راسا ابتعدت...
خطوتين وانطخ ظهري بالباب...
_شبيج خايفة...
اريد اشوف الاثار الي تكولين عنهة
بسرعة جر البرنس عن جتفي الايسر...
شفته عدل وكفته واقترب...
ونظرته صارت جادة...
تلمس مكان الزرك باصابيعه
_هاي شنو...معقولة هيج
_مو كتلك مو ايدين
بقى يتلمس بيهن...
ردت ارفع ايدي ابعد ايديه...
بس شفايفه الي نزلت واخذت مكان اصابعه
شنجني وخلاني ما اكدر ارفع ايد...
شي زحف على جسمي...
ودغدغة غريبة حامت حول معدتي...
كل ما احس بشفايفه تطبع بمكان...
ومن سحبني للجرباية ...
ما كلت لا...بالعكس جان اكو شعور داخلي
يريد بعد من لمساته...
بعد هاي الليلة...حياتنا اكتسبت تغيير
جديد...
صار حياتنا كأي اثنين مزوجين...
نومتي صارت بالغرفة مالتنا...
وهو خلص دوام وصار يشتغل بالمكتب الصبح والعصر...
والجمعة عطلته...كام يطلعنا عصريات
وبين اسبوع والثاني نروح انظف بيت اهلي
طبعا عمر من شاف نور اتصيحله بابا
هو هم صاحله...
اني تفاجات بس تركت مجال له هو يقرر
شفته ما اعترض بالعكس...
اهله بقيت ماعندي اتصال بيهم بس ام كرار
وكم مرة من نروح اسمعهة تحاجيه
بعيد عنة ...
اتكله خلي يحاول يصلح بينا
جوابه ما يتغيير...هيج احسن
ومرة حاجتني...ليش ما اشجعه يوديني
كتلها بكيفه...
بداخلي اني ما اريد اتعرف عليها
ماما متواصلة وياهة بالاتصال...
مر شهرين والثالث...
كعدت تعبانة الصبح...وعبالك عندي انفلونزا
جسمي مكسر ومصخنة...
كوة كما سويت ريوك للجهال...
وجبتهم يمي بالغرفةيلعبون ونمت بالفراش
كعدت على صوت احمد يحاجيني
فتحت عيني جان واكف يم الجرباية وهو شايل نور
_شبيج هاجر...شعجب لسة نايمة
_تعبانة...احس نفسي مصخنة
_اخذج للمستشفى
_لا ميحتاج بس اريد ارتاح
_نامي ...اني باقي يم الجهال
حاولت اغمض عيوني واكذب نفسي
غفيت وفزيت على بجي نور...
جريت نفسي من الفراش...
وطلعت لكيتهم كاعدين بالغرفة...
ونور كاعدة بالكاع تبجي واحمد على الجرباية كاعد يباوع عليه
من وكفت بالباب رفع نظره علية
_هاي ليش هيج عنيدة
_شبيها
_ماتقبل تنام...تريدج...
_عمر وين
_خطية نام الولد...بس هاي جنفوصة ماتنام
ضحكت كوة...
_تعاي ماما ترة ابوج خلكه ضيك
نيمتها وهو راح لغرفته...
من طلعت كعدت على الميز...
_ما اكلتي شي
رفعت راسي ولا حسيت بيه من طلع
_ما اشتهي
_ليش ما اخذج للدكتورة
هو اول وتالي اروح كلت بگلبي
هزيت راسي...
كمت غسلت كوة وبدلت...ومنش كعدوا الجهال
كوة كدرت ابدللهم...
حجزت قبل ما اروح...ومن وصلت جان باقي قليل كدامي
احمد اخذ الجهال وطلع برة العيادة...
دخلت للدكتورة ومثل ما توقعت حولتي للتحليل
نزلت لكيته واكف يم السيارة...
_ها
انطيته الوصفة...
فتح بوب السيارة وصعدنا...وهو راح للصيدلية
من رجع...صعد خلى العلاج بحظني وساق بدون مايحجي
خليت راسي على الجامة
_ليش ضايجة...
ماجاوبته...
_هذا رزق ربنا واجانة...
المفروض تحمديه وتشكريه
هم ماجاوبته لحد ماوصلنا...
نزلت وعفته هو ينزل الجهال...
رحت لغرفتهم اتمدد بس نزعت الجبة..
اجاني وكف يم الجرباية
_هاجر...
باوعت عليه
_هيج ما رايدة الطفل
جريت نفسي واتجيت بظهري على الجرباية
_انتة ماتعرف شي
تعرف شنو معنى تبقى اشهر مكابل المغسلى تزوع
لو تعرف شنو معنى تعيش على المغذي
حتى وكفة ماتكدر تكوف...
_قابل تبقين تسع اشهرهيج
_اي ...وهاي جانت امي وياي
_شلون هسة واني وحدي..
وفوكه عندي طفلين
كعد يمي...
_اني موجود...
_بعد كم يوم يبدي دوامك
وحتى اني اجازتي راح تخلص
_عود سوي اجايز مرضية
باوعت عليه...
هذا هيج يحجي خلي يشوف الوضع
الشهر الثاني بس نحول عندي ...
وزين ماعندي غير شي
ومرة اشقى وياي...
_لعد وين الزواع والمغذي لو اتضحكين علينة
_اصبر جايك بالطريق
بس دخلت بالثالث..
واشتغلت ....حار وياي...
اكو ايام اكعد من الصبح ما اكدر اكوم...
والكانونة ما تنزل من ايدي...
جانت مرت صديقه ممرضة
يجيبها تشكلي الكانونة....وعلمته شلون يشكلي المغذي..
وخطية من شافت وضعي كامت كل ماتجي اجيب شي طابخته...
واخته هم خطية...تحسب حسابنا من تطبخ ادز
ومرات تجي تنظف البيت
احمد حاول بين شغل المكتب والمدرسة لان بلش دوامهم...
بس مرات جنت ما اكدر نهائيا اكوم
عاد هو   اتفق وية ابو المكتب يجيب الشغل للبيت...
والصبح سجل نور حضانة ياخذها وياه
ويرجعها من يجي من المدرسة
وبقى عمر يمي
خاف احتاج شي...
عمر صار عمره قريب الخمس سنوات...دائرتي مخلصتها اجايز
لحد مادخلت بالسادس....ما اشوف باب البيت الا من اروح للدكتورة ...
مرات اطك روحي من الفراش...
يطلعلي كرسي بالطرمة بس اغير هوى
تلث اشهر شفت المر....
عاد بالسادس شوية كمت اكدر اوكف على رجلية
مو مثل عمر للسابع بقيت...
نمت وحلمت نور اجتني وخلت بيدي محبس ذهب
بس ماشوف لونه بس لمعته...
جانت تضحك ووجهها كل نور ويضوي
بس ماحجتني...فتحت ايدي خلت المحبس وراحت
واني مبهورة بوجهها...
من كعدت بقيت صافنة بمكاني...
كلت لماما كالت هدية الميت زينة...
وبيج ولد...
كتلها اخذت سونار بالرابع وطلعت بنية
_شكال احمد
_كال كلشي نعمة من ربنا المهم تمام الخلقة
صح هو هذا جوابه بوقتها
لكن حسيته مثل الضاج...
يوم الحلم العصر...رحت مراجعة للدكتورة
واخذتلي سونار
نزلت مصدومة لاحمد...
بس شفته صاير نار من وكاحة نور...
صعدها بعصبية بالكرسي مالتها
_عفية طفلة شكد حركة
من صعد...
_شبيج عبالك مصدومة...
_بية ولد...
هو يريد يشغل السويج وكفت ايده
_شلون
حجيتله حلمي...
_وهسة الدكتورة من اخذتلي سونار
كالت ولد
_ليش مو كالت بنية...
رغم حجاه بس احس فكره بعيد
ويباوع لكدام مو علية
_اي...اتكول يصير خطأ لان بالرابع جنتي
هسة يبين احسن
_علي...نسمي علي
وساق السيارة...واني درت وجهي على الجامة
علي...جانت دائما نور اتكول احمد يريد ولد ويسميه علي...
عرفت صفنته ودته لنور...