_وشاء الحب_
( بقلم بسمة البياتي)
_البارت الثامن _
الگاعد يصير بيه عذاب نفسي خالي الرباني ومعتبرني مثل بنتوا اغار علية هالكثر!
صرت احسوا ملكي ما اريد تجي وحدة تاخذوا مني وأشوفوا جدامي وياها
ما اعرف شلون يصير الحب بس كل الي اعرفوا اموووت اذا تزوج
جدة بدت بخطتها وليل ونهار تزن برأسو بحجة مريضة وهاي اخر ايامي
خالي اخذها للطبيب گال مابيها شي
رغم كلام الطبيب ظلت بالفراش
اتكول قابل الدكتور يعرف احسن مني اني حاسة حالي راح امووت
شاهر متغير علية مو مثل الأول احسو يتجنبني مو مثل گبل وياي واذا راد شي ما يطلبوا مني يگول النجوى تسوي الو
عتبت علية وبجيت يگول ماكو فرق بينكم شفتها جدامي وصخرتها ( كلفتها)
اليوم باليل الكل ملمومين وخالاتي وازواجهن يتعللون يمنا
نعيمة... دام الكل مجتمعين هاا يمه شاهر شگلت بسالفة الزواج حتى اني وخواتك نروح نمشيلك لگيتلك خوش حرمة وفقيرة
شاهر... بس لو اعرف عليش مستعجلة طيبي بالأول وبعدين عود الله كريم شلون تروح تخطبين وانتي مابيج حيل تصلين للباب
.... ماكو أكرم من الله
وليدي سايمة عليك الله ونبيوا لاتعل افادي خليني افرح بيك گبل لاموت انت بس انطقها كل الحيل يصير بيه لو اعرف اروح امشيلك ازحوف
...اسم الله عليج يمه ألج طولت العمر وتفرحين بشوفة جهالوا
.... قابل ناخذ وكتنا ووكت غيرنا ماظل بالعمر شي اني خطار بهالدنيا
شاهر... لا أله الا الله كافي يمه شلج بهالسيرة الله يحفظج النة لاتضوجين التريدي يجرالج وانطيج كلمة جدام الكل بس اصبري جم يوم بين ماتصيرين زينة واطمن عليج وكتها روحي خطبيلي
... هاي جدامكم انطاني كلمة
بالحرام الحرام اذا تراجعت اهج من البيت وما اخلي احد بيكم يندل دربي
... وشوكت منطيج كلمة ومتراجع بيها سدج امين اذا زواجي يفرحج راح اتجوز وامري لله
أبو قادر.... بلجي تنفك الجبسة واخطب القادر ونسوي عرسكم سوة
قادر... لا جبسة ولاطرشي طلعوني من السيرة وال يرحم اهلكم زواج ما اتجوز
احلام... ظل هيج انت مو وجه نعمة عبالنة مثل الاوادم نزوجك ونوقرك اذا ماخطبت العامر گبلك وزوجتوا فلا اتسمى امك راح اخليك بحسرة الحرمة
نعيمة...تركي هذا دواه يمي خلي اخلص من زواج شاهر واتفرغلوا
... مو گبل شوية جنتي خطار وجاعد تودعينا هساع گضبتينا بالسيرة تريدين تخلصين منا
شاهر...فان حظك بيش طالبها يول
.. ادري بيها ماتزعل اطلع منها انت
حسن... يمه اني من اكبر اخليج انتي ازوجيني وما اضوجج
... گرب ( تقرب) احبك محد مريحني بهالبيت غيرك
فيروز... صافنة بالوجوه ما اكدر استوعب الگاعد يصير يعني شنو شاهر وافق وراح يزوج اختنكت اهجس حتى الهوا انگطع تركت الربعة طبيت للغرفة اجن بنوات خالتي يمي اريد اظل وحدي اطلع قهر گلبي ما اكدر ظلن يسولفن واني بغير عالم
لوين يلا راحوا
الكل طبوا الغرفهم ينامون
تركت الغرفة وصعدت فوك دكيت الباب
... فوتوا الباب مفتوح
... طبيت للغرفة افرك بيدي
.
.. عليش بعدج گاعدة ومانمتي
... عندي سالفة وياك
.. تعالي بنيتي شنو السالفة
... جيت گعدت جدامو ما اعرف شحجي بالگوة حابسة دموعي
وال يابة شبلاج عليش متوترة وتتراجفين احجي شمفينة بهالحزة
.. مامسوية شي بس اريد احجيلك شي
.. عجل يلا احجي الوكت تآخر اريد انام
.. گبل مدة من تمرضت جدة اجن خالاتي يمها سمعتهن يگولن
.. بتركيز اي شبيهن خالاتج
.... گالن الجدة استغلي مرضج وضغطي على شاهر حتى يتزوج وجدة مابيها شي مو مريضة بس هي جاي تمرض روحها حتى تخليك توافق على الزواج
... اهاا خوش شوفي بنيتي أول شي ما احب تصيرين فتانة وتنقلين الحجي التسمعينوا هالصفة موحلوة وما تلوگلج وثاني شي معليج بهالموضوع بعدج زغيرة لاتدخلين بسوالف الأكبار
... خجلت منو دنگت راسي هاا مو ماحبيت يمثلون عليك
... هالنوبة راح اعديها الج نوبة الثانية راح احسابج اذا تصنتي على احد ونقلتي الحجي يلا بنيتي روحي نامي تآخر الوگت
.... حدرت جوة واني ميتة من القهر خجلت من كلاموا ورزالتوا
بس ارتاحيت من حجيتلوا هسه بعد ما يتمم الزواج ويرفض يخطبولوا
ثاني يوم الوضع عادي مانفتحت السيرة وشاهر ماسوة شي ولا عاتب جدة مر يومين واني اتگرضم واترقب الوضع
كعدت الصبح على صوت الهوسة
عفت الفرأش وكمت امشي وافرك بعيني
خالاتي وبناتهن كلهن هين المطبخ مايبين من المسواك
هاي شصاير هين شنو هالخبصة
اصيل... امشي غسلي تا تتريگين
وتكفين الشغل ويا البنوات عدنا خطار اليوم
... منو الخطار
... بيت ام غازي
.... عوجت حلكي اليشوف خبصتكم يگول اول مرة يفوتون البيتنا لو ما كل جم يوم لافين علينا
نعيمة.... لاتكثرين حجي وامشي اشتغلي
... عجل مو مريضة ونايمة بالفراش وتريدين تودعين اشو اشوفج اليوم مثل الحصان
شالت البرجلها وزتتة علية هم زين اجة براس بنت خالتي
نعيمة...انگص لسانج مكصوفة العمر منو الحصان
.... هذا تشبيه خما انتي صدك حصان
احلام. هههههههه انعل يومج والله محد يضحكني من گلبي غيرج
نعيمة.. جاعدة ترزل امج وانتي مكيفة على سوالفها
ابتسام.... هههههههه لاتضوجين هي تحجي على نيتها خما متقصدة
اصيل... يولي تروحين منا لا ابتلي بيج من صباحيات الله
.... مشيت للحمام واني اكل بروحي نعامة سوتها صدك وتريد تخطبلوا يربي شسوي شلون ابعدها عنو
غسلت وجيت كعدت الوجه مايگصة السيف من القهر
.... تريكي شمنتظرة
... ما اريد ترى هاي مو حالة ماظل غير يومين للامتحانات وأنتوا تجيبيون وتعزمون ولازم اندك شغل
نعيمة... يولو توخروها من جدامي لا افين حظها
احلام... حگج يمه معليج بشي اخذي نجوى وروحي اقري اني هم عفت الولد بالبيت يقرون
..اخذت نجوى من ايدها وطبيت للغرفة
نجوى...جدة تريد تخطب تهاني البابا
.. اي اعرف تريدلوا البگرة
.... ما احبها
.. ولا اني يولي نجوى احجي ويا ابوج كوليلوا لاتزوجها
... لا ما اكدر اخاف
... ظلي بهذا خوفج الحد ما تجي تهاني هين وتصير هي الكل بالكل
... عجل شسوي هو يريد يتزوج خما امنعوا
اكلج اروح اساعد البنوات ميصير نعوفهن
... روحي انتي اني ماعلية
.... براحتج
... دفنت راسي بالمخدة خايفة تعحبوا وياخذها
اوووف خلي انتظر واشوفوا شراح يسوي
نجوى...ضايجة بكثر ضوجة فيروز اخاف بابا يتزوج ويصير عندوا جهال وبعد مايحبنا
طلعت اساعدهم واني ضامة حسرتي بگلبي
كومة انواع اكل مسوين دولمة ودليمية وسمج مسگوف ودجاج شوي من غير المقبلات والخبز الحار الحد ماكملنا تفلشنة من التعب
طبينا اني ورنا ونور للغرفة
رنا... دحجي المسعدة نايمة وخبصتنا اتكول اروح اقرأ
يولييييييي فيروزة كووووووومي
.... فان حظج شبيج تجوعرين
.... هاي عود جاعد تقرين
.... قريت ومن التعب غفيت
اجو الخطار لو بعد
. هساع على جية
.. والولد هين لو لا
... اي جو گبل شوية
.. اهااا عجل خوش
كمت بدلت ورتبت نفسي
نجوى.. هااا راح تطلعين لو تقرين
... اكيد اجي وياكم اسلم عليهم
نور... مامرتاحتلج يولي اهجسج ناوية على فاينة
... وشعندي وياهم
... مدري والله بس شكلج مايطمن
.. اطمني ماكو شي
... طلعت وياهن جوي الخطار تهاني كاشخة ذيج الكشخة عبالك عروس الملابس جديدة والمكياج يبووو انمردت من الغيرة
لجحت شاهر بالحوش الدشداشة بيضة تلهج ولاف الغترة على راسو طولوا وهيبتوا تخلي اي وحدة تنعجب بي فهيت واني ادحج علية
شافني ما اعرف شبي بسرعة صد ونطاني ظهروا
فات للاستقبال ويا اخوان البگرة تهاني وخواتها عود صارن من اهل البيت اجني يساعدنا
التسام... عبايتج مبينة جديدة لاتصير مركة
تهاني.. هساع انزعها لابسة هدوم مستورة جواها
... نجوى اخذت تهاني وراحن الغرفتنا نزعتها وجتي
صبينا الغدة الزلم بالاستقبال والنسوان بالربعة
اريد اكل ما اكدر عيني على جدة وتهاني مكعدتها بسدها وكل شوية مدري شتهمسلها وتهاني ادنج خجلانة وتبتسم.
كلت الحمدللة وكمت
اصيل... يولي كملي اكلج ماكلتي شي وانتي الصبح هم مامتريكة
..شبعت
.عالية.. عجل اخذي جنة بدرب غسليلها دمرت هدومها
... شلت حنة اخذتها غسلتلها طبينا للغرفة شفت عباية تهاني معلكة
حطيت جنة بالكاع
وگفت اگلب بالعباية
مممممم طلع عدها ذوق لو هي اكيد عدها ذوق دام حطت عينها على شاهر
العباية اسلامية وهسه طاش مديلها وغالية
عندي صبغ ظافر احمر جبتوا ودرتوا فوكها ليصتها بي خليت العباية بصف جنة
وانطيتها الصبغ بيدها تركتها وجيت
انگل المواعين ويا البنات
عالية. عجل وين جنة
... خليتها تلعب بغرفتي
راحت عالية سمعت صياحها ركضت عليها ما اريدها تضرب الطفلة
شبيج عليش حسج عالي
... يولي شوفي المصگوعة شمفينة كابة الصبغ فوك عباية البنية
.. فدوة الها جاهلة خما متقصدة هي شبيها ثولة تترك عبايتها بالكاع
جن البنات يشوفن شصاير وتهاني وياهن
من شافت العباية انصدمت وضاجت ماتكدر تحجي شي سكتت
عالية... اني اجيبلج وحدة بدالها
لا عيب شنو هالحجي السالفة ماتستوجب
فيروز.. هي جاهل ماتفهم شبيج كبرتي السالفة
صوج بتهاني عليش اتزت عبايتها بالكاع
والله علكتها ما ادري منو موكعها
.... عالية حاولت تعوضها بدالها تهاني سكتت مبين تريد وحدة جديدة بس امها من سمعت حلفت يمين متاخذ من عالية شي
... طبينا للمطبخ تهاني بعدها مبوزة
وكفت ويا نجوى تغسل المواعين وبدت تتلوگلها
... تدرين انتي جثير بيج شبه من ابوج حلوة مثلوا
.. اي ادري بنتوا اكيد اشبهوا
فيروز... هه شدعواج هالكثر مركزة بابوها
البنات كرصني تا اسكت تهاني ظلت تمتمت
... هااا لا ما مركزة بس هذيج النوبة شفتوا واليوم هم
... اي خوش
اخت تهاني خزرتني گالت واذا ركزت ماظل شس وتصير حرمتوا اليوم خالة نعيمة طلبتها الو
.... من سمعت الكلام حالتي مثل المحترك ويديرون علية نفط ويشب نار بالزايد
تهاني ضحكت مكيفة
اختها كملت كلامها اتكول اي والله مظل شي وتصير ام البيت
... حجيت بعصبية شنو أهل البيت ماتوا وهي تصير ام البيت مبينات داخلات حاميات
نجوى...جدة وامي هنا صاحبات البيت مو على تالي وگت تجي الغريبة تاخذ مكانهن
... هااا لا ترى فهمتوا السالفة غلط قصدت تصير وحدة منكم
تهاني. حياتي نجوى عليش معتبرتني غريبة اني گرابتكم واذا الله راد اصير مثل امج
... احد كايلج ماعندي ام وتصيرين امي من هسه اكولج لا عليج بيه ولا علية بيج
فيروز.. ردت احجي عالية سدت حلكي فاتت امي وياها خالة ابتسام للمطبخ
سهيلة اخت تهاني ظلت تشكيلهن من تهجمنا عليهن
اصيل.. فيروز ونجوى جدامي الغرفتجن
وانتن عذرنا البنوات بعدهن زغار لاتأخذن على حجيهن
سهيلة...لا عادي خيتي ماكو بين الاهل زعل
.... طبيت للغرفة احمس بروحي
ابتسام.. وتالي وياجن يولن موعيب تتكاونين وياهن وهنا خطار
... لا مو عيب الماتحترم نفسها من شعرها وامسح بيها البيت
اصيل... وكاحتها زادت ولسانها صاير اطول منها ما اعرف شلون شلت ايدي وضربتها
ماوعيت على روحي غير من سمعت صوتوا الضربة على خدها ظليت جامدة
ابتسام... لا اصيل مامقبولة منج شبلاج يولي
نجوى.... بجيت بصوت عالي بحياتها ماما مامسويتها وضاربتنة فيروز الدموع بطارف عينها ادحج على ماما بنكسار
اصيل... الكف هجستوا ضرب گلبي مو خدها
جرن دموعي ليش يولي خليتني امد ايدي عليج
الف مرة گعدت وحجيت وياج گوتلج كل فاينة تسويها وكل تصرف غلط ينحسب علية وراح يگولون اصيل ما عرفت تربيها
فيروز... ما جاوبتها خشيت جوة البطانية وبجيت بقهر محتاجة ابجي واطلع كل القهر الكاتمتوا بگلبي
... انكسرت أيدي ان شاء الله كومي يولي احاجيج
... بروح ابوج عوفيني اطلعوا من الغرفة ما اريد احجي ويا احد
اصيل... اجرجر وابوس بيها
دموعها مثل التيزاب اندار على گلبي
ابتسام... كافي عوفيها بعدين تعاي واحجي وياها متشوفيها شكثر مهضومة هساع
... شلون اعوفها بهالحالة
... البنوات يمها امشي وياي
... طلعت من الغرفة ما كدرت ارجع يم الخطار طبيت الغرفتي شگاعد يصير فيروز اكو شي غاثها احساسي مايخيب بكد البجي البجيتهيا بجيتوا
نجوى... فيروزة الله عليج كافي تبجين مو راح اموت من القهر
رنا... يولي بالقرآن شكثر محصلة جتلات من امي ابجي شوية وتالي اكمز هين وهين مثل القردة
عالية... هساع اني مو مجوزة وعندي جهال قبل جم يوم ضربت عبد جدامها تخبلت لزمت عودة الماسحة ووين اليوجعني
... وخرت البطانية ومسحت دموعي مابية شي ومازعلانة منها لاتخلون بالكم
كومن يم الخطار عيب عايفينهم هسه نعامة تجيكم بالنعال
نور. ههههههه والله لو تدري مسميتها نعامة تشلع اذناتج
... عاد شفايتلها لو نعامة حيوان اليف وبي كومة فوايد مو مثل جديتج متوحشة
عالية.. هههههههه انگص لسانج يمثبورة نصي حسج لاتبلينا
... سكتت يلا روحوا
نجوى. . جيت بسدها وحضنتها فيروزة شنو المضوجج
... مابية شي عليش ماطلعتي وياهم
... ما اطلع ما احبههم ولا مرتاحتلهم
...غمضت عيني وسكتت
اصيل.. جت نور گالت الخطار، راح يروحون تعاي سلمي عليهم مسحت دموعي طلعت سلمت
من راحوا جيت اشوف فيروز لكيتها نايمة
طلعت كعدت ويا امي وخواتي وبالي يمها
جو شاهر والولد يحجون ويسولفون واني بغير عالم
نعيمة. شاهر شنو رأيك اخطبلك تهاني حلوة وفقيرة
.....ما اريد وحدة ازغر مني الگيلي حرمة قريبة من عمري.
احلام... قابل خاش بالعمرين بعدك زغير وتهاني عمرها مناسب
عالية... سألتها گالت عمرها ٢٦
قادر... وانت ٣٤ الفرق مو جثير.
اصيل...شاهر ضاغط على السبحة وساكت ادري بي الخاطر امي رضى يجوز الموضوع صعب علية
... هااا يمه شگولت حتى امشيلك عليها.
.. الله كريم
... يمه انت انطيتني كلمة شو اهجسك غيرت
.. ما غيرت بس، مو هساع صبري منا الجم يوم
... صارلي سنين صابرة بقت على هالجم يوم
اشوف الوين تصل وياك
قادر... عجل العصابة وين اليوم مابينن
ابتسام... يبووو اسكت وخليها تكاونن ويا سهيلة
نعيمة... عليش تكاونن يافضيحة الفضيحة حتى الخطار ماسلم من شرهن
قادر... ههههههههه عرفت ورة خاتلتهن فاينة
شاهر... عليش تكاونن
... والله مدري من جينا اني واصيل مافهمنة شي
عالية... ماكو شي جنة گلبت صبغ الاظافر فوك عباية تهاني وسهيلة ضاجت كلمة منهن وكلمة من البنوات صار سوء فهم بينهن
نافع.. فيروز خما تجاوزت ادري بيها وكحة
اصيل.. وال يرحم اهلك عوفها ترى گلبي غادي نار
... ليش.
... مدري شلون ايدي طاوعتني وضربتها
من تذكرت رجعت ابجي
نافع.. يمعودة ليش تبجين انتي امها ماكو ام ماتضرب بنتها بساعة عصبية
... والله الهساع ما ادري شجاني وضربتها
شاهر... فيروز وين وشگاعد تسوي
.. نايمة
.. رنا امشي شوفيها اذا گاعدة صيحيها
فيروز... من اجتي ماما للغرفة جنت كاعدة بس مغمضة عيني سويت روحي نايمة
نجوى... بعدج زعلانة
.. لا عليش ازعل لو ازعل من الدنيا كلها من ماما ما ازعل
رنا.. هم زين گاعدات امشو خالي يريدكم
... كمنا اني ونجوى ويا رنا
الكل ملمومين بالربعة
دحجت الماما الدموع بعينها سودة علية ادري بيها مقهورة لأن ضربتني
جيت كعدت بسدها وحضنتها
... يبعد عافيتي لاتزعلين انكسرت ايدي على هالسواية
.. اسم الله عليج بعد روحي لاتكولين هيج لزمت ايدها وبستها
حضنتني بكل قوتها
رفعت راسي وجت عيني بعين المعذبني وگالب حياتي
بعد نظروا عني عبالك گاعد يتهرب من عيوني
نجوى. بابا اشرلي جيت كعدت بسدوا
شاهر.. شبيها سهيلة عليش تكاونتوا وياها
.. عين البنوات عليه ما يريدن احجي كوتلوا ماكو شي لايظل بالك
... عجل خوش
اذا خطبت وتجوزت خما تضوجين
. هاا لا عليش اضوج
... اريدكم دوم تذكرون كلامي ماكو شي اغلى من بنياتي عندي انتي فيروزة تظلون الروح والنفس وان شاء الله الافعال تثبت هالشي مو الكلام
فيروز.... حاضنة ماما وعيني علية دموعي تزخ هم زين الكل عبالهم تا ابجي لان مقهورة من ضربة ماما.
مايدرون شاهر بكل كلمة يحجها جاي يضرب گلبي
شاهر.. يمه اي وكت يناسبج روحي خطبيلي
يتبع
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!