_وشاء الحب_
( بقلم بسمة البياتي)
_البارت السابع _
جرني من شعري يواش ( على كيف) همس راح اضيف صفة جديدة الصفاتج الماتنعد هم ممثلة وهم جذابة
... ههههههه شبيك خالي كاعد اتشاقى ويا جدة
صديت عليه وجت عيني بعينو صفنت وفهيت حسيت بشي غريب اول مرة احسو
.... ول مو جاعد احاجيج شبيج صفنتي مثل الدابة
.. هااا ما سمعت
قادر... ماسمعتي لو غلستي حتى لاتترزلين
... وعليش اترزل انت اطلع منها وهي تعمر
... اليگول جاتل واحد من اهلج وهالكثر تضوجين مني
نعيمة... يولو انجعمو ولاتغيرون السالفة
هاا يمه شنو رأيك باجر اشوفلك حرمة وأمشيلك عليها
فيروز... اكول خالي مو جنت نعسان عليش بعدك گاعد وما تروح تنام
شاهر...رايح احسن من هالاسطوانة التنعاد يومية
نعيمة... ظل ميبس راسك الحد مايمشي بيك العمر وتظل على ايد هذا وذاك
ول قادر وانت عليش الهساعك بدون جواز البعمرك جهالهم بالمدرسة
.. من سوالف ابوي كرهت الجيزة
.... بعدوا يريدلك بنت عمك
... اي واني حلفت اظل طول العمر عزابي وما اخذها
فيروز... وعليش ماتريدها
نعيمة... حجي هالمصگوعة صح عليش متاخذها بنت عمك احسن من الغريبة
.... وال يرحم اهلج سدي السيرة يعني أصوم ومن افطر اجي افطر على هبة
فطور رجليها ينامن بي بريعصيات
فيروز.... يييييع شنو هاللعبان النفس
... عجل اني شكول ودومها طامسة بالحنة صابغة ايدها ورجلها
نعيمة... اذا مو رايدها شدعواك هلكد مركز بيها
.... شلون ما اركز وهي كلما تجي تجابلني وتگعد
نجوى.... خطية ترى والله فقيرة وعلى نياتها من تشوفنة اني وفيروزة تسألنة عليك تريدنا نحجيلها شتحب وشتكره
... ارجع البيتنا احسن من السيرة صار عندي جالي
نعيمة. .. عمت عيني عليج يمه احلام الظاهر حظها بيك مثل حظي بشاهر راح تظلون العمر كله امرمرينة
فيروز... انجضعت بفراشي تانام فكرت بيني وبين نفسي اذا خالي تزوج وجت مرتو وجابتولوا بنية ونسانة شراح يصير بينا
لا لا خالي ما يزوج هو مايريد
مدري شصابني هالليلة النوم طار من عيني ووجه خالي مايفرگني كلما اتخايل تجي حرمة تاخذوا مني گلبي يعصرني
بالگوة كدرت اغمض وأنام
نحوى.... ثاني يوم داومنة
بالفرصة بيدي كتابي گاعدة اقرأ عيني بالكتاب
وسن. أكولج نجوى
.. دحجت عليها واكفة هي وصديقتها
اي گولي
... جديتي گالت اصيل مو امج الحقيقية
امج حارگة روحها وميتة
... رجفت اول مرة أسمع بهالسالفة
وكفت جدامها عيب عليج لاتجذبين امي ماتت بحادث سيارة
.... ههههههه هاي منو الضاحك عليج
جديتي البارحة جانت تحجي الأمي اتكول ام نجوى علگت روحها. لان خاينة زلمتها
... تخبلت جيت اضربها لزمت ايدي خمشتها
زگحت بيها جذذذذذذذابة امي ماتسوي هيج
.... جديتي ماتجذب روحي اسألي أبوج وهو يحجيلج الصدك
... طلعت من الصف ابجي رحت الصف فيروز مالكيتها طلعت ادور، بالساحة لجحتها من بعيد ويا صديقتها ركضت عليها حضنتها وأبجي
... يولي شبيج منو وياج عليششش تبجين
.... الله عليج امي صدك مرة موزينة وعالگة روحها وميتة.
... شگاعد تحجين منين جبتي هالكلام امج ميتة بحادث سيارة..
... وسن بنت ابو زيدان اتگول جديتي حجت الأمي واني سمعتها
... غديت نار شفت ايد نجوى مخرمشة تخبلت بالزايد هاي وسن خمششتج موو
.. هزيت راسي والدموع تجري
فيروز عافتني وراحت تركضت ركضت وراها
... دخلت للصف لكيت وسن لمة البنات يمها تسولفلهن وتضحك
هجمت عليها جريتها من شعرها ورگعت راسها بالرحلة
ظلت تصرخ ملختها
نجوى والبنات يريدون يخلصوها من ايدي مايكدرن
نجوى... حلگ وسن انصبغ بالدم اريد فيروز تفكها ماكو البنات راحن للأدارة جت المعاونة
سحبت فيروز من ملابسها واخذتنا
المدرسات اخذن وسن يداون حلكها واني وفيروز دخلونا للمديرة
المديرة... انتي طالبة لو شقاوة شنو هاي التربية والأخلاق الطايح حظها
.... احنا مترييات احسن تربية الصوج موبينا
... وبكل صلافة تردين عليه
. . جت يمي ضربتني راشدي من قوتوا طرشت اذني ورجعت ضربتني مرة ثانية بالگوة حبست دموعي
.... تعالي ست ماجدة أريدج تنطيها فصل اسبوع وتنزلين خمس درجات من سلوكها
ومن يخلص الأسبوع ما اداوم اذا مايجي ولي امرها وانتي نجوى راح اسجلج اليوم غياب
... طلعنا من الأدارة نجوى نطت من البجي
المديرة حتى ما خلتنا ندافع عن نفسنا.
شلت هم بابا اذا ارجع شلون ابلغوا
رجعنا للبيت ساكتات
اصيل. أكفي فيروز شبي خدج احمر
... مابي شي
... وين مولية مو جاعد احجي وياج
تعالي نجوى شبلاكم عليش الوجه مگلوبة
...اريد احجي الماما اندكت الباب قوي
وصوت جدة وسن يلعلع
طلعن امي وجدة يشوفن شكو
اصيل... خير خالة شصايرة
... اليوم انسوي الدم للرچب (للركب) دحجي بنتكم مگصوفة العمر شاگة ثم ( حلك) وسن وملخة شعرها دخلي يجون الزلم اخليهم يسونها سواية گشرة على رؤوسكم
نعيمة. صلي على النبي
فهمينا السالفة منو المسوي بوسن هيج
.... فاينة الحظ فيروز
اصيل.. تخبلت من منظر لبنية ثمها وارم ومشكوك ووجها مزلغ والشعر منتوف
أمي بالگوة سكتت ام زيدان
سمعت صراخ فيروز
طبيت اركض لكيت نافع جاعد يضربها بالعكازة وين اليوجعها لزمت ايدو اتوسل بي عوفيها بروح اهلك لايصير بيها شي
... يطبها عرج عوفيني اخلص عليها وصلت وكاحتها وعرامتها للمدرسة
نجوى.. حضنت فيروز حتى بابا لايضربها
ام زيدان فاتت جوة وشافتوا من ضربها
المسمومة اتكولوا يبعد ايدي كسر ضلوعها.
اخذت فيروز وطبيت للغرفة قفلت الباب اخاف يرجع يضربها لان بعدوا لهساع متعصب
عليش ماحجيتلهم الصار
. ليش هما انطوني فرصة احجي
انجضعت بالفراش وطكيت بجي
.... يولي اذا عرفوا انفصلتي ونقصوا درجات من سلوكج عجل شراح يسوون
... ما ادري عووفيني ما اريد احجي شي
... ماما وجدة زعلانات مايحجن ويانة وبابا نافع متعصب وكل شوية يريد يرجع يضرب فيروز
اصيل... فوتي للغرفة وقفلي الباب نافع غادي نار
خاف يرجع يضربها
... طبيت للغرفة قفلت الباب ونجضعت بسد فيروز وحضنتها
بجيت مقهورة هم من الكلام السمعتوا
وهم بسبب الصار بفيروز من وراي
... عليش تبجين لاتخافين مابية شي والله اليضوجج اشرب من دموا وهاي وسن اذا بعد حجت انتف عطوبها واخليها عبرة الغيرها من البنات
... يبعد عمري وروحي
... حبيبتي
اشكد ضايجة بسبب الضرب والاهانات الحصلتهن بس ما مقهورة من السويتوا بوسن
شاهر. افتحن الباب
نجوى جفلت وترجف
... عفية فيروز لاتفتحينوا اخاف هم يضربج
... لاتخافين روحي فتحي حتى لو يضرب بقت عليه
شاهر. مو جاعد احجي وياجن فتحن الباب
... فتحت الباب فات بابا ضايج ومتعصب
... هاي شمفينات اليوم بالمدرسة
ول فيروزة زتي البطانية من راسج وكعدي احجي وياي
.... ما اعرف ليش ابد ما اخاف منو بالعكس احسو اماني وحمايتي زتيت البطانية وكعدت
باوع عليه فتح عينو
هاي شبي وجهج وعيونج
نجوى... المديرة ضربتها وبابا نافع هم ضربها بالعكازة
.... كعد بسدي ماتحملت حضنتوا وغصيت بالبجي
... وال يابة كافي تبجين مو عليتي گلبي احجيلي عليش ضربتيها
. رفعت راسي احجي ودموعي تزخ
انت الوحيد السألتني عن السبب الكل حكموا عليه من غير مايسمعوني
. عجل يلا احجيلي شصاير
... تقبل تجي وسن اتكول النجوى سمعت جديتي اتكول امج حارگة روحها لان خاينة ابوج
... شششششششنو اليوم أهد الديرة فوك رؤوسهم وانعل ساس اهلهم
... خالي طلع يركض متت خوف صخام الصخمني اني شسويت لج نجوى بس لا راح يتعارك
. عززززا اي والله
اصيل...يولن شبي شاهر، طلع يركض
.. راح يهد على بيت ابو زايدان
الله عليج لاتخلي يتعارك سوي شي
اصيل. . فان حظج شحجيتلوا وخليتي بتخبل
.. حجيتلوا سبب العركة محد بيكم سمعني بس هو
.... خلي اروح اخابر قادر ولولد يلحكوا وبعدين اجي افهم السالفة قفلن الباب لا نافع يسمع ويتخبل بالزايد
... ظليت رايحة جاية بالغرفة خايفة يتعارك ويصير بي شي
وره وين يلا سمعنا حسوا يصيح ومتعصب
نجوى... طالعة اشوف شكو الله عليج ابقي بمكانج لاتجين
.. ماشي يلا روحي شوفي شكو
... وره شوية هدء البيت جني امي ونجوى
هااا شبي خالي
اصيل..عليش ماحجيتي السالفة من اول ماسألتج خليتي ام زيدان تهد وتصير هي صاحبة حق برؤوسنا
... هو من نطاني مجال افك حلكي وكعتولي طاخ طيخ
شبي خالي خما تكاون
.. هاد عليهم متكاون ويا زلمهم الزلم وام زيدان ناكرين الكلام
شاهر، كايل عجل بنتك اذا ماسامعة من الكبار منين تعرف شلون ماتت ام نجوى
زيدان صايح بنتوا سألها جدام شاهر البنية خايفة وتتراجف كاتة الأول والتالي كايلة سمعت جديتي وامي هيج يحجون
زيدان واخوانة ظالين يتعذرون من شاهر ويحبون براسو
كايلين نجي البيتك ونعتذر منك وشتفصل احنا نلبس بس لا تكبر السالفة
... ما اريد شي بس ضبوا لسان حريمكم هالمرة راح اعديها الخاطركم اذا نعادت ونجاب طاري عرضي واهل بيتي يصير دم بينا
... وهسه خالي وينو
... سودة عليه من عصبيتوا حتى غدة ماتغدة صعد نام
تعالي احبج لاتزعلين مني ومن ابوج يولي غير نخاف عليج لو وسن مضربة براسها لو بسمار من الرحلة داخل بعينها شجان سوينة
... هذا هو بعد ما اعيدها
.. عجل امشي اتغدي لاتظلين جوعانة
... لا ما اريد من يگعد خالي نتغدة سوة
... ههههه ماشي بعد عمري
. . راحت نجوى تغدت وجت نامت
ظليت مجضوعة بالي يم خالي نام وهو ضايج
عفت الفراش وصعدت الغرفتوا فتحت الباب نايم على ظهروا وايدوا على عينوا
جيت كعدت بسدوا صافنة عليه شبية ليش صايرة انظرلوا بهالنظرة اهتم بادق تفاصيلوا
هزيت راسي شگاعد احجي يمكن تخبلت هذا خالي
دغيتوا بجتفوا يواش شال ايدوا وفتح عينوا
.... شرايدة
... كوم نتغدة جوعانة
... روحي اكلي احد گاضبج
.. ما احط الاكل بحلكي اذا ما تأكل وياي جريتوا من ايدوا يلا كوم
.... فيروزة روحي واصلة الهين واشر الخشمو
عوفيني ولاتلحين
.... خليت ايدي على وجهي وبجيت
.... لا أله الا الله عليش جاعد تبجين
....انت مقهور بسببي
... مو بسببج بنيتي بطلي بجي وامشي نتغدة
... مسحت دموعي بفرح جريتوا من ايدوا عجل يلا كوم
.. ههههههههه هساع الدموع جانن عشرة عشرة شبسرعة گلبتي ادري بيج ملعبة تعرفين نقطة ضعفي دموعج
... نزلنا جوة حميت الاكل وكعدنا نتغدة بعدني مثل قبل من اشوفوا زعلان بيدي اوكلوا
امي وجدة يكولن انتي كبرتي مايصير تكونين قريبة منو هالكثر ما جنت افهم شقصدهن
من بلغت امي طلبت مني ما احضنو وابوسوا
گوتلها عجل نجوى ليش ماتكوليلها هالحجي اتكول نجوى غير عنج انتي مايصير هالشي حرام
ويمكن بسبب هالكلام احساسي اتجاهوا تغير.
حتى هو قبل الصلاة اذا طخيتوا او گضبت ايدو يروح يعيد الوضوء من جديدة
مراهقة وكل تصرف وحركة تطبع براسي
كملنا الغدة شلت الصينية صبيت الجاي وجيت بسدوا اريد افجرلوا القنبلة الثانية
خالي..
... يبعد خالج اي فيروزة شبقى ماحجيتي ادري بثمج سالفة
... هااا اي مو المديرة
.. شبيها منعولة الوالدين اني اعلمها شلون تضربج
... مو بس ضربتني
.. عجل شنو بعد
... نقصت درجات من سلوكي وفصلتني اسبوع
... خوش يجي باجر ويصير خير
ثاني يوم اجة خالي للمدرسة وتعارك ويا المديرة هددها يشتكي عليها شلون تضربني والضرب ممنوع واحنا متوسطة مو ابتدائية
المديرة خايفة كايلة لعد تقبل تضرب زميلتها وطلع دمها البنات امانة يمنا اي شي يصير احنا نتحاسب
شاهر... اذا غلطت دزوا تبلغ النة واحنا نحاسبها مو تضربيها وتعيبين تربيتها وتنزلين درجات من سلوكها
... المديرة متفاهمة ويا لغت الفصل وقرار تنزيل درجاتي
رجعت اداوم عادي
.اليوم العصر طلعت من الغرفة افرك بعيني بعدني الهسة نعسانة
اصيل... شوكت تبطلين نوم المغارب
... هذا يا مغرب الدنيا عصر. أكلج منو هين
تا اسمع صوت نسوان
...بنت عمة ابوي وبنواتها هين عدلي كفشتج وفوتي سلمي
...اشو ما اعرفهم اول نوبة اسمع بيهم
... اي مايختلطون جثير ابوهم الله يرحمة عازل روحة من گرابة حرمتة من مات يلا صارت تختلط وتزورنا
... هااا عجل خوش رايحة اغسل وامشط واجي اسلم
نجوى.. يولي فيروزة اكفي تا اسولفلج
... شبيج تلهثين اليشوفج يكول جلب راكض وراج
... يمنا خطار
.. اي ادري
.... سمعت جدة وماما يريدون يقنعون بابا تا ياخذ تهاني
.... زتيت المشط من ايدي صديت عليها بسرعة
اكفي شگاعد تحجين منو ياخذ منو
... يولي بابا شاهر يريدون يقنعوا يتزوج تهاني
... ومنو هاي تهاني ومنين طلعت انوب
.... فوتي للربعة وشوفيها يولي من الله ماحبيتها ولا رتاحيتلهن
... طبيت للربعة خالاتي كلهن كاعدات وياهن
بالكوة سلمت وعيني ادور الهاي الماتتسمى تهاني
اصيل... هاي بنيتي الجبيرة فيروز
ام تهاني... مو هاي بنت المرحومة لمياء
. الف رحمة ونور تنزل على روحها اي هي
... تعاي يمه خلي احبج
بيج شبه منها بس انتي احلى
... بوستها وكعدت بسدة خالة ابتسام
وأخيراً عرفت منو منهن تهاني
سمعت صوت سيارة خالي لو تخبلت هذا شجابوا بهالحزة
حفزت من مكاني طلعت اركض وكفت باب المطبخ سديت طريقوا
شجابك روح ارجع لاتفوت نسوان اهنا
. وخري من الطريق يولي وشعلي بالنسوان
... لا لاتفوت انت مو ماتريد تزوج؟!
... اي
... جدة وخالاتي گاعد يتفقون يريدون يروزجونك البگرة ( البقرة)
... ول يابة شبيج مصخنة زواجيش ومنو البگرة
... تهاني بنت بت عمة ابوك
... وخري من جدامي اريد افوت ابدل معزم على العشا
... خرب عافني وفات
انوب جدة سمعت صوتوا صاحتوا يسلم عليهن
فات سلم واني اكل بيدي مدري شصابني
شاهر.. ارحمي اصابيع يابة
امشي اكويلي القميص بين ما اسبح
صعدت ويا راح يسبح واني طلعت القميص اكوي
فات للغرفة لابس بجامة والفانيلة وشعروا مبلل عيني عليه احس الگاعد يصير بيه والاحساس الأحسوا اكبر من عمري وتفكيري
... يولي شبيج اليوم بس تتصفنين
انطيني القميص مو راح تحرگينوا
... ناوشتوا القميص وحدرت جوة
الوب رادن يروحن جدة گالت اكفوا اشوف شاهر بلجي يوصلكم
صحت من يمي. خالي مو هين راح
نعيمة... مو صعد فوك يبدل وسيارتوا بالحوش
.. هااا اي جة صديقوا وطلع ويا وعاف السيارة احجي وعيني على الدرج خاف ينزل وتنكشف جذبتي
غافلتهن وصعدت اركض فتحت الباب لكيتوا مبدل وواكف يتعطر
اكولك خالي لاتنزل هسه.
.... انتي ششبيح اليوم نوبة لاتصعد وهالنوبة لاتنزل
... هااا مو جدة رادتك توصل الخطار واني عبالي نزلت گوتلهم ماموجود
صد عليه خزرني
شفتوا شال التلفون وباكيت الجگاير عرفت راح يطلع
بسرعة سحبت المفتاح من الباب سديت الباب وقفلتوا من برأ اعرف بنفسي گاعد العب بالنار بس يلا عادي المهم مايوصلهم
حرك يدة الباب يريد يفتحوا
انعل ساس اهلج افتحي الباب لا اخش بخطيتج اليوم
.... حدرت وعفتوا
طبيت للغرفة الخوف ماكلني اني شگاعد اسوي بروحي
جت نجوى سألتها راحوا لو بعدهم
... اي هساع طلعوا يولي شبيج ترجفين ووجهج غادي نومية
... هاج هذا المفتاح روحي افتحي باب غرفة ابوج
... وعليش قافلة الباب والمفتاح يمج
... يولي روحي فتحي الباب مو وگت هالحجي واذا سالج خالي عني گوليلوا هجت ماتت اي شي
... صخام الصخمج يولي شفينتي
. . قوزلقورط لاتصيحين
قفلت الباب علية هسه ارتاحيتي
طلعت نجوى تركض جيت قفلت باب غرفتنا وختلت جوة البطانية
نضربت الباب دفرة جفلت
... افتحييييييي الباب لاتخليني اكسسسسسروا واكسر راسسسج ويا
اصيل...بروح أبوك اهدي شمصخة هالعرمة ومعصبتك هالكثر
نعيمة. عجل المثبورة مو گالت طالع مو بالبيت .
شاهر... صوووووجي اني كله من ايدي انطيتها عين وخليتها تنجلب بسسسيطة فيروز قابل لشكثر راح تظلين حابسة حالج اني اعلمج
نجوى.. بابا عيونوا بگصتوا عاف البيت وطلع
ابتسام.. يا محمحمة فتحي الباب راح خالج
... كولي والله
. هههههه اليسمعج يگول هاي شكثر تخاف
والله راح
.. فتحت الباب وطب الفيلق
امي وخالاتي هم زين جدة مو وياهن..
اصيل.. شبيج ويا خالج
.. مابية شي عبالي طالع من سالت جدة عليه صعدت لكيتوا بعدوا استحيت يحدر والخطار، يگولون عليه جذابة كوتلوا لا تحدر ما قبل قفلت الباب عليه
احلام... هههههههههه قفلتي الباب عليه وتكولين مامسوية شي
ابتسام... هههههههه. والله لو منو أگضبج ووين اليوجعج
اصيل... بالحرام تعبت من سوالفها خايفة على ساعة من مصايبها يموتوها الي
ولج بنتي گولي لشوكت تظلين هيج عمرج صار ١٤ سنة ماعدتي زغيرة خالج بكدج وتحبسينوا
احلام.. يولي اني بعمرج تجوزت مو كلشي تاخذبنوا لعب وشقى فكري الف مرة قبل لاتسوين الفاينة
.... ماشي بعد ماسوي شي
اصيل... هاي كل نوبة تكولين بعد ما اسوي وترجع حليمة العادتها القديمة
... شبعوني رزايل
باليل اهلي وجدة فاتوا ناموا وخالي الهساعوا ما راجع
نجوى... امشي تا نام باجر دوام من الصبح
.. روحي انتي بعدين اجي
ظليت گاعدة انتظروا سمعت صوت السيارة فوتها للحوش
طب جوة من شافني طبگ الحواجب
اخاف اتقرب منو
خالي لساعك...
... اششش لاتكملين احمدي ربج ما شفتج بحزتها والخلقج جان گصبتج
ولي من جدامي ما اريد اشوفج
...عافني وصعد بقيت للصبح ابجي من القهر ثاني يوم ماداومت اهجس حالي تمرضت هاي اول نوبة خالي يزعل مني.
نايمة بالفراش جة للغرفة
بس شفتوا ضميت راسي بالمخدة وبجيت
شاهر... هههههه والله شر البلية ما يضحك
وانتي البلوة بحالها شو دحجي علية عليش تبجين يبعد عمر شاهر
... غصيت بالبجي انت زعلان مني وما ترضى تحجي وياي
.... ول يابة واذا ازعل منج تتمرضين وماتخلين الزاد بحلكج
... انت صاير ماتحبني وتتعصب مني
... منو هذا المايحبج انعل شيب الخلفوا
اكو اب مايحب بنيتوا يولو انتي ونجوى وحدة عيني اليمنى والثاني اليسرى
.... يعني ما زعلان مني
.... ما اكدر ازعل منج بس ما اريد الصار البارحة ينعاد
... ماشي ماعيدوا والله
اخذني من ايدي وطلعت ويا
كثرت جيات تهاني واهلها من اشوفها اغدي نار
قبل امتحانات اخر السنة جدة وضعها ادهور والضغط دوم صاعد عدها
گاعدات خالاتي يمها وهي تشكيلهن اتكول راح اموت وشاهر الهساع مايرضى يفرحني ويتجوز
احلام... عليش ماتستغلين مرضج وتقنعي
.. شلون
.. ظلي زني براسو وهو من يشوف وضعج ما يكدر يكسر بخاطرج هاي الحيلة اكثر النسوان تستخدمها
... عجل خوش من اليوم ابدي احجي ويا
فيروز.... الخوف سيطر علية من ساسي الراسي بس لا راح صدك يقنعوا ويزوج.......
يتبع
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!