_وشاء الحب_
( بقلم بسمة البياتي)
_البارت السابع عشر _
.... گاعد احجي ويا ومأخذة راحتي وصوتي شوية عالي ولان ليل وكلها نايمين ينسمع ما حسيت غير الباب تنفتح ويفوت شاهر
جة تقرب مني وحجة من بين اسنانوا
... ويامن جاعد تحجين
... جاوبت بحسن نية مدري غباء
كوتلوا ويا اشرف جر التلفون من ايدي
وأشرلي اكوم
من دحجت شلون شكلوا انگلب من العصبية خفت وطخت عندي عززا هذا بس لا فهمني غلط
صديت على نجوى تا تنقذني من هالورطة لكيتها
بسابع نومة جانت عايزة والتمت هاي شوكت نامت المحمحمة
ما انتظر اكوم جرني من ايدي وعصرها جيت اكع من الجرباية على وجهي
سحلني و طلعني من الغرفة
اكف وين ما اخذني ترى ماسويت شي
.... حسسسج ما اسمعة امشي جدامي وانتي ساكتة
... گاضبني قوي راد يصعدني فوك جلبت بالمحجر
فك ايدي ششششبيك ما اصعد وياك
.... تمشششششين الا انزل الأمة هسسسساع وانعل ساس أهلج
... من الخوف گضبتني الراجفة سحلني مثل الطلي فتح باب غرفتوا وزتني بيها
اول مرة أشوفها وياريتني مشايفتها
نسيت المشكلة والورطة الأني بيها عيني ظلت تفتر بكل ركن بيها
الجرباية الفرشة مكياجها الي على ميز التواليت
شاهر... سولفي
... صحيت من صفنتي وحاولت اركز ويا شنو شسولف
... لاتكفريني احجي شعندج تحجين ويا هالناقص نص الليل
.... ما حجينا شي بس خابر يسأل علية وترى توها ساعة ١٢ يا نص ليل
.... هاا يسأل عنج وأكيد دوم يخابرج ويظل يسولف وياج
... اي مرات
حجيت هالكلمة ما احس غير كفني بترس ايدوا على راسي
يمكن جنت اريدها من الله يمد ايدوا علية تا اطلع القهر البگلبي
بجيت بصوووت عالي تخبلت من حلات روحي صرت اضرب بي
انت منووووووو وتمد ايدك علية ششششرايد مني عوووووفني بحالي الله ياخذني واخلص منك ومن الگاعد تسسسسسوي بية
گضب اثنين ايدي يريد يسكتني تهسترت بالزايد
فكيت ايدي منو وگعدت بالگاع
شششششرايد مني بسسسس فهمني شششرايد دمرتني وبعدك مو جايز مني
... كافيييييييي يعنيييي اسمعج تحجين ويا ابن خالج نصاص الليالي ولأزم اسكت
احمدي ربج ما اكدر أأذيج من عاب گلبي المخليني جدامج وجدام دموعج اضعف خلق الله
.... انت جذذذذذذاب كل هذا وما مأذيني جاعد تموتني وتكول ما مأذيني ساحلني الغرفتك العايش بيها وياها وتكول ما اكدر اأذيج يعني بنظرك الأذية بس ضرب وزگح
.... وتالي وياج شوكت تنسين
... دحجت بعيونوا ودموعي تجري
حجبت بغصة
من تفك ياخة مني وتعوفني بحالي
وحق الله اذا ظليت بنفس هذا وضعك اول واحد يدك الباب ويريدني اوافق علية
ضربني راشدي فر راسي
رجعت صديت علية بحقد اضرب بعد
وروح جدة الا اسويها
.... جاعد تتحديني مووو وتحلفين خوششش
عجل اسمعي هذا اليمين وحق رباتي الج وخوفي عليج وحق كل يوم عشتي بي هين جدامي وتحت جناحي ما ألج طلعة من هالبيت يا فيروز وابن امة وابو اليگرب ويفكر يأخذج
.... فتحت عيني هذا شبي مو راح اتخبل من تصرفاتة
جاوبتة بستهزء هه عجل خما اظل مكابلتك العمر كولو يا خالي
مو اني بنيتك اكو اب مايتمنى يشوف بنتوا عروس وتستقر بحياتها
تحسر وحجة
... انتي الي لعبتي بالنار وخليتي نظرتي الج تتغير لاتلوميني لومي حالج
....اليوم الصدمات وحدة ورة الاخرى
يعني شنو نظرتوا تغيرت
دك تلفوني بيد شاهر اشرف يتصل خفت لايروح يتكاون
فتح الخط
شاهر بس كال الو وسكت مدري اشرف شگاعد يگولو
عيوني تراقب وجهو
... خلصت لو عندك بعد حجي
عجل اسمعني انت جبير مو زغير وادري بيك زلمة شهم وما تطلع منك العيبة
بس هذا تصرفك انحسب نقطة سودة عليك
يا ابن الأصول ترضى واحد من ولد عمامك لو خوالك ياحجي ويا وحدة من خواتك نص الليل حتى لو بدون قصد هالشي مامقبول
حجيك على عيني وجدتك الله يرحمها من وصتك عليها خما گالتلك خابرها باليل بدون علم اهلها
هساع سكتت وما حجيت شي لان اني الربيت فيروز وواثق بيها
وبنفس الوكت ماعندي شك بحسن نيتك
راح اعتبر الموضوع منتهي
و اذا انعاد هذا التصرف
الحجي راح يصير غير واتعنالك للرمادي وساعتها محد يگدر يگضبني عن الراح اسوي بيك
من تريد تسأل عليها خابر ابوها وجدامو احجي وياها بهاي الحالة ينگص لسانوا اليحاسبك
فاهم عليك لاتتعذر الله وياك
... اووف الحمدلله ماتكاونوا ردت اخذ تلفوني مانطانيا
... تلفون بعد ماكو
... ما ناقشتوا تركتوا وحدرت خشيت بالفراش وظليت ابجي
الصبح بالگوة فتحت عيني رأسي ثگيل من البجي
دحجت ساعة تسعة ونص اووف هساع ماما وحدها گاعد تشتغل
شلت شعري. وغسلت طبيت للمطبخ
ماما گاعدة تسوي شيخ محشي
صباح الخير
.. صباح النور يولي شبلاج خما مريضة شو بالگوة فاتحة عيونج
.. هااا لا مو مريضة البارحة ما جاني نوم وظليت سهرانة الوجه الصبح يلا نمت
... اوووووف من عنادج لو راجعة للدوام مو احسن من گعدتج بالبيت يولي ريحي گلبي وارجعي دام بعد وگت بلجي نحجي ويا المديرة تا تخليج اداومين وهالسنة نجوى وياج بنفس الصف
... يووو ماما هم رجعنا النفس السيرة كوتلج مالي خلك للدراسة من الله يسهل امتحن سادس خارجي
.... محد متعبني بهالبيت غيرج سوالفج تبط المرارة امشي احمي الجاي وگعدي تريكي
... جم مرة كايلتلج لا تشتغلين وحدج انتظريني أكعد
... البيت نظيف ماتعبني اتتي ونجوى من الليل منظفاتوا
بس لملمت خفايفي وگاعد احضر الغدا امي اليوم مشتهية شيخ محشي
.... عجل هي وينها شو ماكو
... راحت التهاني تا ياخذوها للسيد
.... اووي مدري منين طالعين بهالسوالف تابعة ومدري شنو
... لاتستهزئين جثير نسوان مايصير عدهن حمل بسببها وهي بشهرها الأول وضعها يخوف
.... هساع قابل شحجيت الله يحفظوا الهم
عجل انتي بيا شهر ما شاء الله بطنج كبرانة
... بعد يومين افوت للشهر السادس بطني جاعد تثگل
... جيت بسدها وخليت ايدي على بطنها صايرة مثل الطوبة وقوية
... يولي امشي تريگي
... ماشي كمت حميت الجاي وگعدت اتريك
شاهر... صباح الخير
اصيل... صباح النور خوية
الصبح نافع گال شاهر دك علية كال ما اطلع اليوم للشغل
.. اي تعبان اريد ارتاح
... سلامتك من التعب خوية اكعد تا تتريگ انت وفيروز
... كعد بمسافةزغيرة عني ما طايقتوا صبيت الجاي وخليتوا جدامو
فاتت خالة احلام للمطبخ
احلام.. شعجب اليوم شاهر هين ما طالع للشغل خما مريض
... لا خيتي مابية شي ما نايم زين صار عندي وجع راس
... من تخلص ريوگ انفض رأسك بلجي ترتاح
.. ان شاء الله خيتي
... عجل امي وين اريدج انتي وياها تتهيرن تا نروح نخطب العامر
اصيل... هذا الحجي الحلو بالخير ان شاء الله
ومنو العروس
. هبة بنت عمو
شاهر... وال يابة عجل مو جنتوا حاجزينها القادر وهو فاين الحظ الهساع مايرضى يجوز لان ما يريدها
... اي. والله علعل گلبنا هالوليد وفشلنا ويا اهلها.
اخير شي حجيت ويا عامر كوتلوا شنو رايك اخذها الك البنت حلوة وصغيرة وفقيرة
كال شكو بيها
... خيتي هذا جواز مو لعب لاتضغطين علية يمكن هو ما رايدها وكال هيج الخاطرج
.. لا خوية حجيت ويا كال ما الكي احسن منها توكلي على الله
خلي ازوجوا تا التفت الهذاك الشالع گلبي
فيروز... والله هبة حلوة بس قادر مدري شبي يگول فطور رجلها يختل بي بريعصي
. فان حظة مضروب الچلوة
والله البنية نظيفة ومثل الوردة لان تحني. رجلها عبالوا بيها فطور
اصيل... ههههههه والله مدري منين يجيب هالسوالف
شاهر... عوفي هو يختار تا نشوف ذوقوا
احلام... ابالي وحدة الله يجعلها من نصيبوا
... منو هي شو محاجيتلنة عليها
فيروز... خالة غمزت الماما واشرت بعينها علية
صخام الصخمني هاي خالتي شبيها.
شاهر هم شافها ظل صافن
ما خليت السالفة بالي لان ادري بقادر ما يريدني شلون ياخذني وهو يعرف بمشاعري اتجاه شاهر
شاهر اخذ السويج وطلع
الظهر جت نجوى من الدوام صبينا غدة تغدينا
والعصر ماما وجدة وخالاتي راحن خطبن هبة
واهلها انطوها وحددو المشية
جنت اشوف اهتمام هبة بقادر ودوم تسأل عنو
شلون وافقت بسهولة على اخو
المغرب جة قادر جايب علبة حلويات
نجوى...ول قادر يمكن راح تموت شو هالايام الكرم ينگط منك
... هو اني صوجي اصرف. على هالشكولات
شاهر... شنو المناسبة وحايب حلويات ومحتفل ترى اخوك الراح يعرس مو انت
... فرحان الأخوية حبيبي عدكم اعتراض
... لا عليش نعترض الله يديمك الأخوك
فيروز... طبيت للربعة گعدت يم نجوى
قادر... شنو مشترين صخلة
نعيمة... يا صخلة يول
هساع فاتت من هين وتخرخش
فيروز... هاي علية
.. عجل على أبوج
حنج صخلة اليربطون جرس برگبتها
... ماما سمعتي شگاعد يگول ومن ارد علية اتكولون عيب أكبر منح
اصيل.. يول وتالي وياك معليك بيها
... كلما اكوم واكعد الحجل يخرخش وقادر يصنف علية
ملاوي جدة دوم بيدي واليوم حبيت البس الحجل
اني ونجوى كمنا نصب عشا
اصيل... فيروز انزعي الحجل من رجلج وانطينيا باجر من نروح نشتري ذهب الهبة
اودي للصايغ لو ابدلو لو اخلي يشيل الجرس ويخلي شي ثاني بمكانوا
... اني احبوا مثل ماهو ما اريد تغيري
... يولي خالج دزني عليج مايقبل تلبسي يگول يلفت الانتباه وهي مو زغيرة
.. هااا هاي سوالف خالي
هو شعلي بيه قابل وين مولية اني
والله حلوة هاي تزغروني بالوكت اليعجبكم ومن اسوي شي يضوجكم اتكولن كبرتي
... الخاطري يولي
... استغفر الله نزعت الحجل خليتوا بيدها ما اقبل تبدلي بس شلي الجرس
.. ماشي ان شاء الله
... مشية عامر والعقد صارن بسرعة وحددوا يوم العرس هالأيام
نجوى.. راجعة من الدوام تعبانة جت رغد كعدتني كالت تعالي ماما تصيحج اتكول جديتج هين تريد تشوف
رحت. للربعة لكيت جديتي وخالاتي ونسوان خوالي استغربت شجابهم.
وخالة ام اشرف شوكت جت من الرمادي يمكن علمود عرس عامر
سلمت عليهن وگعدت بسد جدة
.... يولي عليش هالكثر كاطعة لاتجين لاتسألين علية وعلى جدج
... والله عندي دوام من ارجع من المدرسة بس اريد انام ومن الواجبات والقراية
ماعندي مجال اطلع من باب الغرفة
.. هذا مو عذر تكدرين الجمعة تجين اني وجدج هم النة حگ عليج.
.. ان شاء الله اجي لاتزعلين مني
عفتهن وطلعت ادور، الفيروز ماكو مدري وينها
مدريت راسي من باب المطبخ صار عمران ابن خالي جدامي صديت تا افوت صاحني
... اكفي انتي نجوى لو اني متيه
...هاا اي نجوى
.. يولي هاي شوكت كبرتي وصرتي حرمة بالگوة عرفتج متغيرة جثير عن گبل
... ما اعرف شجاوبوا بس اريد اخش جوة
... عليش ماتجين البيت جدي خلينا نشوفج لاتگطعين بينا
.. گصني گص بعينوا من يوم يومي ما ارتاحلوا ولا اطيق شوفتوا
نقذتني فيروز من صاحتني
يولي وين جنتي جنت ادورلج
.... بذاك البيت اگولج بيت جديتج شعجب جايين وصاحوني سلمت عليهن واستلمني دك بوس
.... والله مدري اني هم تفاجأت صارلهم جثير، ما جايين
...وره شوية راحوا
صاحتني جدة
.... تعالي هين والله كبرتي والخطاطيب صارت ادك بابنا
... هاااا
. شبلاج فكيتي ثمج
ام اشرف جت تخطبج الأشرف
... انعگد لساني مدري مستحى لو خوف لو رهبة
... هاا شو سكتي
اصيل.. يمة عوفيها خلي بلآول احجي ويا نافع وبعدين ناخذ رايها
خليها تفكر براحتها هم مامستعجلين على الجواب راح يظلون هين الورة عرس عامر
.... عفتهم وخشيت للغرفة
اريد اوافق تا اخلص من شوفة شاهر بس گلبي مانعني حب شاهر مزروع بنصوا
نجوى.. هاا فيروزة راح توافقين
... ما ادري عوفيني هساع الله عليج
... ماشي فكري عدل ولاتتسرعين
اصيل.. من جة نافع باليل حجيت ويا
...اشرف خوش شاب ما نلگي احسن منه بس صعب انطيها الغير محافظة اريدها اهنا گدامي
.. اني هم ما اريدها تفارگني
... عوفي الموضوع هسة ما ندري منا الباجر شيصير
فيروز.. موضوع الخطوبة انسد محد حجة بي
خالتي امنة وگرابتنا بالرمادي كلهم جوي علمود العرس
بيتنا وبيت خالاتي ماظل بيهن محط رجل من الخطار
بيوم العرس بالگوة قنعت ماما تخليني اروح ويا البنوات للصالون اخلي مكياج خفيف
مراهقة واكيف بهالسوالف حالي حال باقي البنات
لبست فستان حلو وشعري شسورتوا وبقيتوا مفتوح
شعري طويل يوصل الجوة خصري بحياتي مامخلية علية مگص ماما ماتقبل نگص شعرنا لا اني ولا نجوى
خليت مكياج خفيف تغير شكلي بالكامل طلعت اكبر من عمري بجثير ونجوى بس خلت كحل خافت من شاهر
من رجعنا من الصالون لبسنة عبايات اسلامية
وصلنا البيت خالة احلام الفرع مايبين من السيارات والهوسة الشباب كلهم برا
طبينا جوة
صار وكت الزفة بيت العروس يبعد فرعين عن بيت خالتي
كل النسوان طلعن بعدني بالحوش ويا نجوى جة اشرف يمنا
ارتبكت هذا شگاعد يسوي
اشرف... ماتحتاجين للمكياج انتي حلوة بدون شي فيروز ابوج عليش رفضني؟!
... هااا ما ادري
... يعني ماتدرين ابوج رجعلنا خبر بالرفض
نجوى...يلا فيروز امشي النسوان كلهن طلعن لايعوفونا ويروحون
... تعالوا بسيارتي اني اخذكم
شاهر... السيارات جثيرة توكل انت وصل اهلك
.. شاهر واشرف واحد ياكل الاخر بعيونوا
عززا بس لايكاونون
هم زين جة قادر
... اشرف عمي معن يدورلك برا
... اي هساع طالع
قادر... شاهر اجفة الشر وامشي شبلاك اليوم تكاون ذبان وجهك
... اخذ نجوى وامي بسيارتك يلا روحوا
... وفيروز هم ويانة يلا امشن بنات
... قادررررر جاعد اگلك اخذ نجوى وامي وروح لاتخليني اعلي حسي
.... لا أله الا الله يول ششششبلاك الخاطر الله خلي العرس يخلص على خير شرايد من البنية
... قابل ذابحها امشششي روح السيارات طلعن
فيروز. عيني تفتر بين شاهر وقادر
گضبت ايد نجوى ما أريد تتركني خايفة منو
قادر.. امششي نجوى وانتي فيروزة لاتخافين
خالج اكيد ماياذيج
.... قادر گاعد يبسمر شاهر اخذ نجوى وطلعوا
... امشششي جدامي
... وين
... للگبور امششي للسيارة لا احرك اجدادج
... طلعت ويا السيارات كلهن طالعات صعدت واني جسمي يرجف من الخوف
.... هاي شمفينة بحالج
... هاااا
.... جاوبييييييي تريدين الناس تنعجب بيج وتكثر خطاطيبج
.... مامسوية ششي هو مكياج خفيف ومو بس اني البنات كلهن مثلي
.. انعل ابوج لابو البنات
وهذا اشرف ششششعندوا جدام الناس واكف يحجي وياج
.... كافي ترى زهكتني كال اوصلكم وهاهية
.... لا تجذبين لا انعل سسساس اهلج سمعت كل كلمة حجاها
واكف يتغزل بيج وانتي مكيفة
ومن يگولج عليش ابوج رفض اتكولين ما ادري يعني لو ما اخذين رايج جان وافقتي
.... غديت نارر من تحكموا هو عايش واني يريد يدفتي
الف مرة كوتلك انت ششششششعليك اوافق ما اوافق شي خاص بية
تريد تسمع رأيي موووووو اي اوافق ما الكي احسن من اشرف
شاهر غدة نار ساق السيارة بكل سرعتها كمت اصرخ شششششاهر وكف السيارة والله حجيت هيج تا اغثك
احجي وابجي مايرد علية طلعنا للشارع گلت هاهي اكيد راح تنگلب السيارة بينا ونموت
ماكو سيارات جثير بالشارع من السرعة صار صوت قوي يمكن طگ التاير
انحرفت السيارة وصعدت على الرصيف
جدام المحلات اكو نشرة مال دعاية جبيرة اندعمت السيارة بيها ووكعت فوك الجامة ......
يتبع
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!