رواية وشاء الحب الفصل الحادي والعشرون 21 - بقلم بسمة البياتي

_وشاء الحب_
( بقلم بسمة البياتي)
_البارت الثامن  عشر     _

ماكو سيارات جثير بالشارع من السرعة صار صوت قوي يمكن طگ التاير
انحرفت السيارة وصعدت على الرصيف
جدام المحلات اكو نشرة  مال دعاية جبيرة اندعمت السيارة بيها ووكعت فوك الجامة

النشرة حديد وثگيلة وبيها عواميد من وكعت تكسر الجام والحافة دخلت للسيارة
من الضربة اهتزيت وحافة النشرة والكزاز وكعن على راسي

هجست دماغي تحرك وجع قوي وحرارة تنزل من شعري عيوني غوشت
شاهر يصيح باسمي ويحركني

نجوى... رحنا البيت العروس اخذناها وطلعنا نفتر شوي ونروح للمصور

بالي يم بابا وفيروز الهساع محد بيهم بين
كلساع ادحج على قادر بالمرآيا واشرلوا بعيني وينهم وهو يهز راسو بالنفي

مشينا مسافة زغيرة دك تلفون قادر

قادر.. هاي وين ظليت يمعود الزفة طلعت وهساع بالطريق تا نروح للمصور

هاا ششنو هاي شوكت اي اي هساع جايك

.. قادر صوتوا تغير والقلق بين بوجهوا انگصيت من النص اكيد صاير شي

نعيمة... ول قادر شبي شاهر اشو مو ويا الزفة ما گالك وينو؟

... سيارتوا عطلت وفيروز ويا خابر تا اروح اجيبوا

... عجل اخذنا الو
... لا يمة هساع اوكف وحدة من السيارات تاخذكم واني اروح علية يجوز نتاخر بين مانسحب السيارة

... ما اصدك كلاموا شكلوا وخبصتوا الي انخبصها اتكول غير شي
خابر زوج خالة امنة ووكف بالشارع تا ياخذونة وياهم

نزلت جدة اني ظليت

... انزلي عمر ينتظركم
.. ما اتحرك من هين اجي وياك

...بطلي خبال امشششي حدري الرجال واكف يريد يلحك على الزفة ما ظل وكت
.
...وداعت بابا ما انزل ادري صاير شي لاتجذب علية احجي بابا وفيروز شبيهم

.... خرب ابوج عليش تبجين راح تخلين جدة تشوفج كفي دموع راح اخذج ولاتخافين ماكو شي

..... مسحت دموعي بس الشهكة بصدري قادر دار السيارة ورجع
دحجت سيارة ولد عم بابا جت تمشي بسدنا

قادر.. بيدوا التلفون يحجايهم

.... اي انتوا روحوا للشارع العام يم اسواق ابو محمد واني رايح للمستشفى بس لاتحجون الاحد شي اذا خابروكم

.... صرخت ششششنو يا مستشفى احجي بابا وفيروززز شششششبيهم الله عليك احجي

... بالحرام اذا تظلين بهالحال هساع انزلج هين واخلي نزار يرجعج
گاعد الغي واكولج مابيهم شي لاتخافين السيارة مضروبة بالنشرة وشوية صايبتهم جروح من الكزاز

..... سكتت بس الدموع تجري
قادر وكف السيارة جة نزار ابن عمة ابتسام
وابن عم بابا صعدوا ويانة والبقية راحوا يم السيارة
لان سمعت المرور جايين وصايرة هوسة
يريدون يحلون السالفة

وصلنا للمستشفى حدرت اركض امشي واعثر وقادر يزگخ وراي

.... اكفي وتالي وياج شتندلين وجاعد تركضين

... وكفت ومشيت ويا ظل يخابر بابا ويسالوا وين مكانهم دلانة
رحنا عليهم

بابا جاعد وزلم يمو
دحجت علية مخلي ايدوا على راسوا
ملابسوا دم وايدوا مجرحة

ر من لجحنا ما گدر يكوم

قادر.. هاي شصاير بيك  عجل فيروز وين

.... جوة جاعد يفحصون راسها وينظفون الجرح

نجوى.... گعدت بسد بابا ابجي
عليك الله گول فيروز خما بيها شي

... ان شاء الله ماكو شي لاتبجين
ول قادر عليش جبت نجوى وياك

... هو. منو اليگدرلها راسها يابس مثلك

... حجة زلمة گال احجوا ويا تا يروح يداوي جروح ايدوا ورگبتوا من جينا لهساع معاند مايقبل يتحرك من مكانوا

نزار... خالي گوم وياي اشوفلك احد يضمد رگبتك جاعد تنزف يمكن كزاز بيها موزين تظل هيج

.. مابية شي خلي اطمن على فيروزة وبعدين اداويها

قادر... لا تسمع منو امشي شوف دكتور يجي هين

.... بابا بالگوة يحجي الزلم ترخصوا وراحوا

قادر... شلون صار الحادث بس گلي شوكت تبطل خبااااااااال ششششرايد بس فهمني ششششرايد

... وال يرحم اهلك عوفني بضيمي البية مكفيني وزايد
مو ناقص كلامك شايف هذا الدم الي بملابسي منها اذا صار عليها شي اخليكم تدفنوني وياها

.... راح اسكت مو الخاطرك الخاطر بنتك ما اريدها تسمع مني كلام مو حلو بحقك

... كافي شششبلاك

نجوى... قادر اسكت مو گاعد تشوف حالوا

انتظرنا طلع الدكتور  گال الضربة قوية براسها واكو كزازة داخلة بالعمق بالكوة طلعناها وخيطنا الجرح وهسة راح ياخذونها تسوي مفراس الراسها

طلعت فيروز سودة ماتكدر تفتح عينها
كملوا فحص ورجعت الحمدلله مابيها شي بس رجة بسيطة
. ماقبلوا تطلع اليوم گالوا اذا ظلت حالتها مستقرة الصبح طلعوها

بابا من سمع الكلام شوية ارتاح وراح ويا نزار يعالج جروحوا
المستشفى اهلية والاهتمام بيها فول

جوي الشرطة يحققون بالحادث بابا گايللهم عدنا عرس طلعت للشارع طك التاير وانحرفت السيارة

كلاموا مطابق التخطيط المرور الهذا راحوا ونسدت السالفة 

فيروز.. من بديت اوعى وافتح عيني الوجع برأسي فضيع
اول شي جة على بالي الحادث. وشاهر جفلت
نجوى وقادر يمي

حجيت بتعب وخوف ششاهر وينوا خما صارلوا شي

قادر... شوف البطرانة ول يابة حيري بحالج مو بشاهر ابو المصايب لاتخافين مابي شي

... نجوى الله عليج احجي خما صابوا شي عجل وينوا

.. قبل لا اجاوبها فات بابا مداوين رگبتوا وايدوا

شاهر.. شلونج يبعد شاهر خما متوجعة

..... راسي يوجع انت شلونك

.... زين من شفتج بخير

..... من طمئنيت علية ارتاحيت رجعت غمضت وسكتت

قادر... كل شوية واحد متصل شراح اكوللهم

... ارجع للبيت وفهمهم بهدوء، تا مايخافون واخذ  نجوى وياك

... لا ما اروح ابقى هين يم فيروز

.... روحي ويا ولاتعلين گلبي

قادر.  انت ارجع واخذ نجوى وياك شوف حالك بالگوة واكف اني ابقى هين

.... يعني اسكت نجوى تحجي انت روحوا بدون عناد

... والله محد العنودي بهاي الغرفة غيرك

... بوست فيروز ورجعت ويا قادر للبيت ماما وعماتي استلمنا من الباب مدري منو كايللهن

قادر حاول يطمنهن ما قبلن دكن رجل يروحن للمستشفى

وفعلاً راحن
ماما. من شايفة حال فيروز  رايدة تتتخربط

عاد   شايفة وضعها زين وحاجية  وياها شوية مطمنة
وبالكوة قابلة ترجع  للبيت وعمة امنة ظلت اهناك

وبابا هم راجع وياهم

توهم فاتوا
سمعنا صياح اشرف فات جوة غادي نار
وتهجم على بابا
وبابا تخبل جابوا بوكس وتلازموا
بسرعة الشباب فكوهم

اشرف... اذا يصيبها  شي مايكفيني جتلك
انت منو وتحاسبها ومسوي حالك ولي امرها
عم وليد  خال بنية وحاشر حالك بيها

.... ابن الكلب غصب عنك وعن عششيرتك من الجبير للزغير فيروز تخصني ورجال لي يگرب منها

نافع.  اشرف ترى زودتها هاي بدال ما تتحمدلهم بسلامة جاي تهد وتحاسبة الصار قضاء وقدر والحمد لله على كل حال

..... لا عمي مو هيج السالفة هو من شافني احجي وياها تخبل عرفت راح يسوي شي ترى اني ابن خالها مو غريب واذا وكفت حجيت وياها
شاهر زودها وانت منطي مجال

نافع.   شوف اشرف شاهر اله حق بفيروز اكثر مني هو الرباها وتعب عليها
بالوگت الي الكل تخلى عنها وهي بنت انفاس شاهر واصيل خلوها تحت جناحهم وداروها

الهسبب من عمرها اشهر وكلت  امرها اله بدراسة بزواج بكلشي  وكلامة اليمشي عليها مو كلامي

اشرف... لاتخبلنيييي ششششلون تسوي هيج هو منو وتخلي ولي امر عليها

شاهر... امششي اطلع برا گبل لا اطلع خبالي عليك واجيب السلاح اترس صدرك رصاص
بعد ما اريد اشوف وجهك بكل سامرى واذا گربت منها اشرب من دمك

اشرف... بروح جدة ما اتركها ويجي يوم اخذها ومن عيونك بسيطة شاهر الأيام بينا وهي التحكم

نجوى.... بابا تخبل رجع هد علية بالگوة لزموا وطلعوا اشرف برا

فيروز...ثاني يوم طلعت من المستشفى الوجع بعدوا براسي من الضربة اهجس راسي يريد يطك وبالگوة فاتحة عيني

الكل مهتم بية وخايفين علية حتى جدة يمكن بوكت المصيبة تعرف غلاتك عند الناس

بابا جاب ذبيحة ذبحوها لوجه الله

نمت بفرأشي والكل يمي

اصيل... لاتنامين شويتلج معلاك وسويت شوربة اكلي تا تأخذين علاج

... مانفسي تريد راسي يوجع بس اريد اغمض

امنة... هو من تأخذين العلاج يسكن الألم اكلي شوي الخاطر امج دحجي حالها
شفايفها يابسة والوجه مصوفر من الخوف عليج

.... دحجت صدك ماما وجها تعبان اصريت تگعد تأكل وياي تسويلي واهس
اكلت شوية واخذت العلاج ونمت

ما ادري اشكد نمت هجست  ايد دافية على كصتي فتحت عيني بثگل
شاهر گاعد بسدي بطارف  الجرباية
بعدت ايدوا عني وغمضت

... شلون صرتي بنيتي

..من تتركني بحالي ذاك الوكت اصير زينة

... وهساع شمسويلج اني

... فتحت عيني ودحجت علية بغضب
كل هذا ومامسويلي شي؟!

ردت اموت بسببك واتكول مامسوي
تطعن بتربيتي واخلاقي واتكول مامسوي

... ومنو الحاجي على تربيتج يولي احجي عدل لا اكص لسانج

... عجل الصار بسبب شنو مو لان اشرف وكف وياي

كافي ترى تعبت من تصرفاتك الما گاعد افهمهن
اني مو مثل ما مفكر لا عبالك لان جيت اعترفتلك بمشاعري اتي مو خوش
الصار طيشششش جنت معمية من الغيرة ولو مگصوص لساني بحزتها ولا حاجية

... اول شي اني الربيتج واذا اطعن  بتربيتج معناها اني الماعرفت اربي
والجاعد اسوي حرص وخوف عليج مو اتهام ولا شاك بيج وال يابة افهمي اليشوفج واكفة ويا مايحجون علية يحجون عليج

وحتى لو هو ابن خالج محد يفهم هالشي راح يگولون شوف الأستهتار واكفة جدام الكل ودك سوالف ويا

.... ماعلية بالناس المهم اني ما غلطانة
وأسمعني زين من هالحزة بعد مالك كلام وياي وبحياتي ماراح اسامحك
ولساني مايطخ على لسانك و لو الي ذرة معزة عندك بعد لا تگرب مني

...خوش براحتج

... عافني وطلع متعصب
نزلن دموعي وزاد وجع راسي

نجوى... هاااا يولي عليش تيجين خما بابا تكاون وياج

... لا بس تعبت منو ما اريد احجي ويا ولا اشوفوا

... شلون ترهم واحنا عايشين نفس البيت

.   هي هاي المصيبة عايشين سوة

... كولي يا الله بلكي تنسين وترتاحين

... ما اظن اكدر انسى وهو جدامي تعبت بالقرآن تعبت

... حضنتها اصبر بيها اوووف الله يساعد گلبها

... رجعت عزلت حالي مثل قبل اكمل شغلي وارجع الغرفتي الي بالمشتمل
ووكت الغدا اتحجج اكول تريكت متأخر تا ما اكعد وياهم

اما وكت العشا شاهر، ماموجود يرجع باليل
هو هم صار مايگعد بالبيت يطلع الصبح يرجع يتغدا ويرتاح ساعة وراها يطلع مايرجع غير لليل

اشرف رجع طلبني وهالنوبة بابا رفضوا بشكى قاطع
بعدين عرفت اشرف بيوم الحادث متكاون ويا شاهر والهسبب بابا ضايج منو

نجوى... يولي فيروز ايات راح تجي تعيش هين يمنا

.. منو ايات
... بنت عم بابا ابو كامل

. هاا اي تذكرتها
عجل اهلها وين وعليش تبقى هين

.... گبل مدة شايلين البغداد وهي معلمة مقدمة نقل. وماصاير راح تبقى هالسنة اداوم هين وعلى السنة التجي تنقل

... هااا خوش هلا بيها بس شعجب تبقى هين بالذات مو يم باقي عمومتنا

.... جدة اتكول كل گرابتنا عدهم ولد عزابية ماترهم تظل يمهم

... هههههه على اساس بيتنا شلونوا اشو ابوج حالوا حال العزابية وقادر يومية يمنا

... شمعرفني
.. عوفيلها عرفتج وتعالي يمي  گاعد اضوج وحدي هين

... اليسمعج يگول مفارگتج هو بس وكت الدوام والقرأية مو يمج
اووف لو مداومة جان هسة احنا بنفس الصف

.. سدي السيرة لا تسمعج ماما وتأكل گلبي

نجوى... جت ايات يمنا
بالبداية ماتوالمت وياها لان ما عندي اختلاط بيها
بس هي لبقة ولسان بسرعة خلت الكل يتعود عليها

تهاني فاتت للشهر الثاني بالحمل ووكع الجنين
هالنوبة صدك انقهرت عليها وعلى بابا
جدة وماما شبعن بجي

بابا گال الحمد لله على كل حال
الله مكاتبوا النة لا اعتراض على حكمتوا

تهاني وراها بيومين رجعت للبيت من شكلها مكسورة وحالتها تقهر
امها وياها وتوصينا عليها

نعيمة... هي جانت اطبق اليگول علية السيد لو لا

... والله شيكول تسوي وشوفت عينج هم راح
جيرانة گالوا اكو حرمة سيدية تكشف بطشت المي وتكدر تشوف شنو سبب التابعة

.... اي جان رحتي عليها

  .. بلي البارحة اخذتني جيرانة البيتها
الحرمة گالت التابعة جاية من عمل والعياذ بالله

.... عززا العزاج نعيمة ويا فاين الحظ المسوي

... والله خية عليش اجذب عليج ماقبلت اتكول الأسم تا ماتصير مشاكل
بس الحجي بينا وما اريد تزعلين مني گالت المسوينوا من طرف زلمتها

اصيل... ومنو المن طرفنا يسوي ويريد يهجم بيت اخوي الحمدلله گرابتنا وعمامنا ما عدهم هالسوالف

.... والله يمه مدري هذا كلام الحرمة
والمسوي الله يهجم بيتوا ويحرگ گلبوا على بزرتوا مثل ما حارگ گلب بنتي

نعيمة... حسبي الله ونعم الله لايوفق كلمن يمشي بهالدرب

فيروز... كلام ام تهاني ما عجبني هجستها تقصد احد منا
سكتت وما ادخلت بالموضوع
ام تهاني من يوم الجتلت تهاني تباوعلي بحقد لوبيدها تشرب من دمي

نجوى... من جت تهاني وشافت ايات لو هي غدت نار والغيرة اشتغلت
كل ظنها جايبينها هين تا نقرب بينها وبين بابا

و حتى ايات ما اتحب تهاني من يگعدن وحدة ترادد الثانية عبالك ضراير

جدة حجت على تهاني اتكلها عيب تحملي بين ماتخلص السنة ايات ضيفة عدنا مايصير تسمعينها كلام ما حلوة

وماكو فايدة الغيرة مسيطرة عليها رغم تهاني احلى من ايات
بس ايات مرتبة وانيقة تهتم بحالها

فيروز... بشريني الضراير شلونهن

. سكتي وخليها خايفة  لايوم يتمالخن من الرؤوس

.... ههههههه والله ابوج عندوا حظ عبالك بس هو زلمة بهالدنيا

.... هاااا ولج صايرة تحجين علية
ترى حقهن اي وحدة تريد الزلمة المعدل  والحنين وكريم  وبي كل صفات الرجولة وحلووو

.... ممممم اي خوش
.  شو مو عاجبج عجل انتي عليش حبيتي

... تحسرت ما ادري طفلة نزرع حبوا بگلبي حتى لو جان حب بنت الأبوها بس يبقى حب ومن وعيت تغيرت مشاعري ونطرتي
كوليلي الشجرة من تنزرع من سنين وجذورها تمتدد بالعمق شلون نكدر نقلع الجذر

... كصي الشجرة لان الجذر مايسوة شي بدون الجذع والاغصان

.... يمكن لان مو مبين بنظرج مايسوة شي بس يبقى بالأرض ويتغذى من التربة حتى لو حفرتي وطلعتي شوية منو راح تلكي لين مو يابس  لان الماي والمطر يسگي

.... هههههههههه عجل ابقي هيج يتورط اليناقشج مايحصل منج لا حق ولا باطل

... تنهدت وسكتت صارلي شهرين ما احجي ويا ولا شايفتوا
دايسة على روحي تا ما اضعف واستسلم اريد اظل هيج بلكي الله يشيل هالحب من گلبي

نجوى. . باجر جمعة بالكوة جبت فيروز تا تعلل ويانة بالغرفة
جبتها وتندمت ايات ماعدها سيرة غير بابا وتهاني
وادري فيروز گاعدة على اعصابها

ايات. ما ادري شاهر اشاف بتهاني واخذها اشو الوجه ليل ونهار يلطم وتكاون زياگها ولاتهتم بنفسها بس المهم عدها تحبل وحايرة بين الدكتورات والسادة

فيروز.... عجل التتزوج شتريد؟!
غير تريد طفل لو هذا شي عجيب
وترى تهاني حلوة ونظيفة
مو الا تطمس بالمكياج تا تبين مرتبة

نجوى... طككت عيوني على فيروزة هاي منو الگاعد تمدح بتهاني عجل منو الجتلتها بالجفجير
هههههههه بس والله الغيرة مصيبة

ايات... ترى مو قصدي ما حلوة ووسخة بس هم لأزم تهتم بحالها لاحكة على الخلفة ودوخت الجهال عليش هالكثر جاتلة روحها

نجوى.  اكول بنات خلي نگوم نسوي شامية ويا هاي الحلويات والببسي ونشوفلنا فلم حلو نسهر علية

فيروز.... روحوا انتوا اني اظل هين

.... گضبتها من ايدها كومي ويانة ما اتحرك بدونج

... كمت واني، روحي طالعة اكيد هسة هو هين شلون بية بس لا اشوفوا

طبينا للمطبخ صوت اغاني بالحوش مشينا يم باب المطبخ واااخ صار، جدامي گاعد ويا قادر بالسيارة
لجحني وجت عيني بعينوا بسرعة وخرت

ايات... منو بيهم يحب ياس خضر؟

....بابا
... الله ذوقة حلو ولو هالشي مو غريب علية

... فيروز واكفة وصافنة
قادر صاح دام گاعدات سولنة جاي

ايات..... انتوا سووا الشامية واني اسوي الجاي

... واكفة على اعصابي بس لشوكت اظل اتهرب من شوفتوا غصب عني لأزم اتقبل عيشتي ويا هين

شاهر اكبر اناني دوم افعالوا تأذيني حتى لو مو قاصدهن

شغل اغنية وولو تزعل الياس خضر
گلبي انلجم ما ادري يقصدني لو لا بس يشهد الله ادمرت

الكلمات عذاب نفسي من وصل المقطع زعلت مني وكلت هيهات مايزعل
رفع حس لأغنية 

زعلت مني وكلت هيهات ماتزعل
وفي وطبع الوفي مايوم يتبدل
خصام البينه مهما طال
حجي ومن سبة العذال
طبع كلبي
على بعادك يضل صابر
احبك حتى من تزعل واتاني تعود
تدريني گلب عاشگ
اجيك بالهفة  مفارك المفارگ
طبع گلبي على ابعادك يضل خاسر

ماتحملت اظل واكفة عفتهن ورجعت للمشتمل صعدت الغرفتي خشيت بالفراش ابجي

نجوى. من صدك بابا زودها رحت ورة فيرزز لكيتها شابعة بجي تركتها براحتها اصلآ ماعندي كلام اكولوا الها

.. وراها بيومين صديق بابا وقادر
يشتغل وياهم جان بغداد من  راجع مسلبينوا وجاتلينوا

بابا من سمع تخبل
قادر وبابا نافع وكل شابنا يعرفونوا تخبلوا علية

يطلعون للفاتحة من الصبح يرجعون المغرب

بابا سودة علية بالگوة يقبل ياكل لكمة گاضيها جگاير وجاي

خلصت الفاتحة وبعدوا على نفس الوضع

رجعوا المغرب هو وقادر

نعيمة... يمة شلون كباب شاوين يستاهلن ثمك يلا تعال تا تتعشى

... بالعافية مو جوعان رايح اسبح وارتاح.

... بابا عافنة وصعد

... ول قادر احجي ويا بلجي ياكل مو گلبي  خلص من عنادوا

... والله يمة حگو هساع مرينا الأهل رحيم  الله يرحموا
لو تشوفين حال امو وابو تموتين قهر

... الله يصبر گلبوهم مصابهم مو هين حگهم

ول تهاني روحي احجي ويا تا ينزل يأكل

... من الح علية يزكح بية مالي خلك المشاكل هو منج مايسمع الكلمة تريدنوا بسمع مني

فيروز... گلبي طاك  وضعوا مايسر عدوا ولا صديق
نزل شاهر صاح قادر كال ربعنا بالباب تعال.

نعيمة... ول جنية ماكو غيرج تخلي يگعد ياكل

... منوو اني
  عجل ابوج اي انتي

.  واني شعلية
منج ومن حرمتوا مايسمع تريدينوا يسمع مني

... يولي لاتسوين روحج فقيرة
من يوم يومج بكلمة تأثرين علية محد يگدرلوا غيرج

... هااا لا ماعلية هاي گبل من جنت زغيرة مايحب يكسر خاطري مو هساع
جدة لادخليني عندوا حرمة خلي تحجي ويا

احلام.... يولي ما خسرانة شي احجي ويا بلجي يگعد ياكل التدخين والجاي راح يضعفن گلبوا

نعيمة... الخاطري شنو جديتج ماعدها خاطر يمج

تهاني.  شكو تلحون عليها على اساس يسمع منها اني اشكد يحبني ويريد خاطري وماقبل ياكل مو عاد هي نجوى وين خلي هي تحاجي

اصيل. نجوى عدها امتحان جاعد تقرأ
وترى فيروز ونجوى ماكو فرق بينهن اثنينهن بناتوا

نعيمة. تهاني تسكتين لا بالطاسة على ثمج بيج خير جان خليتي ينزل يتعشى مو بس فالحة بالحجي

.فيروز...اختنكت ادري بيهم يحجون على نيتهم ما يدرون الي بالگلوب
تهاني وأيات بودهن يأكلني

رجعوا شاهر وقادر
راد يصعد جدة صاحتوا يگعد وياهم شوية.

كمت للمطبخ حضرت صينية الأكل شلتها وطبيت للربعة العيون علية اخذت نفس وحاولت ارجع فيروز الطفلة وانسى كل البداخلي

خليت الصينية جدامو رفع راسوا صفن علية

... شنو هاي شيليها يابة مو جوعان

.... همست اني جوعانة اريد نگعد نأكل مثل گبل تذكر
حجيتها وعيوني لمعن بالدموع

سكت واشرلي اكعد جدامو
اهجس مو بس گلبي يرجف لشتي كلها ترجف  تاكدت مستحيل الفات يرجع

جنت منطية ظهري للكل ما اريد اشوف احد
جة قادر گعد ويانة

قادر. .. المايعزمك انت اعزم نفسك صدك لو گالوا عگب البطون تعمى العيون

شاهر... ما تأكل احد گاضبك

... خف التوتر من گعد قادر نسيت نفسي سويت لفة ومديتها الو متعودة من اني زغير اذا نگعد سوة بيدي اخلي الأكل بحلكوا
اخذها من ايدي وابتسم بعتب

راد يگوم ماقبلت سويت لفة ثانية.وانطيتوا

. ول يابة شبعت اكلي انتي

... مااه الخاطري بس هاي اخذها من ايدي اكلها

من كملنا وصديت عيون تهاني غاديات دم
وايات تباوع بطرف عينها.

اخذت الصينية للمطبخ

تهاني... اگلج فيروز

.. اي گولي الصار گبل شوي ما اريدوا يتكرر بعد حتى لو خالة هي اتگولج انتي موزغيرة تمدين الأكل اليم ثموا

... جان صرتي نادرة وخليتي يأكل وياج
شوفي تهاني نصيحة لاتگربين مني مو انتي التعلميني الصح من الغلط

... وشحجيت اني زلمتي وما اقبل والله حلوة هاي

....ماتقبلين روحي احجي ويا وامنعي لاتجين علية خوش

... تركتها وطبيت للعرفة

مشت الأيام شاهر من يوم التعشينا سوة بعد ما تصادفت ويا ظليت على نفس عزلتي وبعدي عنو

اليوم العصر گاعدين بالربعة وتهاني فوك.

فات شاهر غادي بارود زگح بعلوا حسو  وييييييييين تهاني

قادر فات ورة گضبوا من ايدوا

.... تهدى شحجينا احنا يول لاتتهور

نعيمة... يولو شصاير شبيكم الوجوه مگلوبة

... شاهر نفض ايدوا من قادر وصعد يركض ثواثي وسمعنا صراخ تهاني ملى البيت.......... 

يتبع