وشاء الحب_
( بقلم بسمة البياتي)
_البارت السادس عشر _
رجعت للبيت مكسورة فراگ جدة هد حيلي
حبست حالي بالغرفة
نجوى وماما وخالاتي والبنات ماتركني وياي ويحاولن يخففن من الحزن البگلبي
بطريق رجعتنا من الرمادي گولت البابا
اني تنازلت عن ورث جدة الخالي ايهاب
... زين سويتي بعد الفضيحة السووها خالاتج وخوالج حلفت ما تأخذين منهم فلس
وحتى هاي الفلوس العشر ملايين لو ما جدتج مخلية عليج ذمة جان رجعتهن
اني ورثي من اهلي من صارت مشاكل ما طالبت بي مو عاد ورث امج
.. بابا فقير ومايحب المشاكل الهسبب كافي خيروا شروا
شاهر لهساع ماشايفتوا
وحتى للبيت الجبير ما واصلة تا ما اشوفوا
تهاني عند اهلها تخاف لا هذا الجاهل هم يروح منها لان وضعها ما تمام
وفعلاً ورة اسبوعين جتي نجوى
كالت
... يولي سمعتي شصار
... خير شصاير
... تهاني خابرت بابا تبجي اتكول راح الجاهل هم واكع
... بسم الله شبلاها هاي خطية الله يساعدها ويساعد ابوج
... الله يعوضهم ان شاء الله
.. امين
... عليش ماتجين الهذيج غرفتي
يولي لشوكت تبقين حابسة روحج
.... خليني هين احسن الدنيا طالعة من عيني ما عايزة مغثة
.... كافي فيروز جدة مرة جبيرة ومريضة
تعبت جثير الموت راحة الها
تذكرين شلون جانت تتعذب وتتوجع
.... اوووف نارها نار بگلبي وجها ما يفارگني والله موبيدي القهر عاصر گلبي عصر
... الله يرحمها
اصيل... شاهر راح جاب تهاني امها وياها گالت راح اظل هين ادرايها
واشو صار العكس اني الداريتهن اثنينهن هههه
تهاني دموعها تجري گعدنا اني وخواتي نصبرها
احلام... عليش هالبجي قابل خاشين بالعمرين
راح هذا يجي غيروا خلي ايمانج بالله قوي
تا يعوضج
ابتسام... من يتحسن وضعج راجعي دكتورة شوفي شنو السبب الي يخلي الجهال يگعون
تهاني... من سقطت ذيج النوبة راجعت جثير الدكتورة كالت وضعج تمام وماكو سبب طبي
يمكن تعب لو شايلة شي ثگيل
... عجل هالنوبة عليش وكع مو جنتي بس نايمة وماتتحركين
ام تهاني... تهاني اتكول تحلم بحرمة لابسة اسود شكلها يخوف تجي تجفص بظهرها
نعيمة.... فان حظج عليش ماحجيتي تا نأخذج للسيد يقرأ عليج يمكن عندج تابعة
ام تهاني... قبل لا يكع ردت اخذها
ما ادري هالتابعة منين لفتها سودة علية
اصيل... كمت حضرت العشا وتعشينا
ام تهاني ظلت يومين يمنا
هي وامي اخذوها للسيد قرأ عليها وسوالها حجاب بلجي هالمرة من يصير حمل يثبت بطنها
نجوى... الضغط زاد على ماما
بالكوة تقبل اساعدها لان بدن امتحاناتي وهالسنة بكلوريا
تهاني اخ يا تهاني وصلت بيها المواصيل اذا گعدت تاگل تعوف ماعونها بالگاع
فيروز ما تجي الهذا البيت باقية بالمشتمل ماتدري بالگاعد يصير هين
فيروز... وضع ماما مو عاجبني من ترجع من ذاك البيت تعبانة وبالگوة تمشي
من اسألها شبيج ماتحجي
نجوى عدها امتحانات ما عدت أكعد وياها جثيير
تنظيف المشتمل علية ما اخلي ماما تسوي شي ووكت الأكل
ما اكعد وياهم اكل وحدي
اليوم ماما مريضة من اسألها شنو اليوجعج اتكول مابية شي يمكن ضغطي نازل
جت نجوى يمي
... اووووف دماغي راح ينفجر من القراية زتيت روحي بالفراش
.... الله جابج عندي سالفة وياج والنبي اذا جذبتي وما جاوبتي ما أبقي ماكان صاحي بجسمج
... يمة شبلاج يولي گاعد تهددين والله خوفتيني
.. كلمة ورد غطاها شنو الضاماتوا علية انتي وماما
.... يولي شضامات شگاعد تخربطين
... هاااااا بدينا بالجذب نجوووووى تحجين لو لا
ماما شبيها عليش ليل ونهار بذاك البيت ومن ترجع مهدود حيلها وضايجة
... هاااا ما ادري اني كل الوگت بغرفتي ما اطلع
.... اخر مرة اسألج واذا ما حجيتي بعد ما اريد اشوف وجهج
لج جم مرة افوت عليها الكاها تبجي ومن اسالها
اطلعلي الف عذر مايخشن العقل
احجي جدة گاعد تغثها مووو
... نزلن دموعي على حال ماما
لا مو جدة تهاني دوم تغثها
.شششنو شلون يعني تغثها
... جم مرة تعاركت وياها وردت أكول البابا بس مامت وجدة مايقبلون
يولي مسويتها. خدامة الها والأهلها
خبز طبخ تنظيف واذا ماما اتكوللها كومي سوي فلان شغلة
تتعصب اتكول ظهري مو تمام اذا اشتغل واطلع حبلة يگع
انتي اشتغلي ردي جميل اخوج المگعدج ابيتوا
....اهجس انضربت سجينة بگلبي ملختوا تملخ
وانيييييي ليش ما ادري وما حاجيتلي يولي شلون ترضين يصير كل هذا بماما
... شششسوي هي حتى وياي ما زينة والله من ارجع من الدوام المواعين والتنطيف علية بس هسة ماما حلفت ما امد ايدي بين ما اخلص امتحانات
.. وجددددددددة وين ششششلون تقبل بنتها تنهان
....تدرين بجدة تخاف على بابا ماتريدوا يتعصب وينهجم بيتوا
اتكول علعل گلبي يلا تزوج اذا طلگها ادري بي يتعقد بالزايد
... ماشي يصير خير
.. شراح تسوين
.. ما اسوي
... والله ما اصدك
... كيفج لاتصدكين
عجل ابوج وينوا عن كل هذا الگاعد يصير معقولة ما يداري با افعال مرتوا
..بابا ما يگعد بالبيت مثل گبل يطلع الصبح يرجع يتغدا يناملوا ساعة وانوب هم يطلع ما يرجع غيرر باليل
... هااا خوش
... سكتت ادري بيها ماراح تترك السالفة وخلي بعد احسن بلكي تلكي حل التهاني واهلها السابينة سباية بس باقي يجون يعيشون ويانة
كل يومين هين وماما تطبخ وتقدملهم
.... لاتكولين الماما حجيتلي شي مفهوم
. ماشي يلا رايحة اكمل قرأية
... ظليت الوب لوبيدي هساع اروح املخها
بس اتعوذ الشيطان
الازم اصبر أريد اشوف كلشي بعيني
طار النوم من عيني ما اكدر انام اريد بس الصبح يطلع تا روح الذاك البيت واشوف الگاعد يصير بي
بطلعان الروح غفيت والنومة نومة فزيت ساعة، ٩ كعدت مثل المخبلة ظليت الوم بروحي شلون ما گعدت من وكت غسلت وطلعت ادور ماما مالكيتها اكيد اهناك
فتحت الباب الداخلي وخشيت
البيت هدوء والكاع مبللة ونظيف
دحجت من شباك المطبخ ماما مشكلة الصوندة وگاعد تغسل الحوش وهو جبير يطبب سيارتين
طلعت عليها
صباح الخير
... صباح النور بنيتي
.... عليش ما گعدتيني تا أساعدج
.... ما عندي شي كملت
... صفنت عليها الوجة غادي نومية وبالگوة واكفة
جريت منها الصوندة
روحي ارناحي اني اكمل
.. يولي ماظل جثير خلي اكملوا وانتي روحي تريگي
... بعدين عود
يلا روحي بدلي ثوبج كولوا ماي
اخذت الماسحة من ايدها وكملت الباقي
رجعت للمطبخ جت ماما مبدلة ثوبها فتحت الثلاجة وطلعت مسواك
ماما وتاليييييي مو گوتلج روحي ارتاحي
.... شبلاج اليوم مابية شي غير اسوي غدة
.... غمضت عيني اطلب الصبر وطولة البال من الله
جبتلها كرسي.
كعدي هين وعلميني شسوي
... هههههه هاي من شوكت راح تطبخين
... عادي بس اطبق التكولين علية
كبرت بنيتي وتريد تتعلم تطبخ
... ابتسمت لبتسامتها
يلا احجي شسوي
... راح اكعد وجيبي اللحم والبصل اني اكصكصهن خاف تنجرحين
. . هي كاعدة كملتهن وانطتنياهن خليتهن على النار
التشريب لأزم يومية السفرة ماتخلى بدونوا
طلعت باميا من المجمدة وظليت اسوي التگلي علية
هجست ايدها بيها شي وتلوب منها بس ماتحجي
جيت جريتها وكشفت ردانها شهكت من المنظر
جوية شكبرها. هااااي شنو
اشششش لاتعيطين ماكو شي انلجعت بالتنور
... طبعا تنلجعين اذا انتي بالكوة فاتحة عينج
ركضت جبت مرهم دهنتها
يلا روحي ارتاحي التشريب والباميا على النار وبعد. وكت للتمن
. اووووف من عنادج يلا رايحة
.. راحت ماما وكفت اغسل المواعين التوسخن.
جت تهاني العيون منفوخة من النوم
البرنسيسة گاعدة بالعشرة وماما تگعد من الستة
ما حجت ولا كلمة فتحت الثلاجة طلعت بيض وشكو اجبان وخاثر ترست الصينية
جابت كاسة طرگت ( خفقت) بيها البيض والگشر زتتهن بالسنك
البيض دارتوا بماعون والطاوة الزفرة والكاسة ظلن على الطباخ
صبت الجاي وكعدت تعلف
بالگوة مسيطرة على اعصابي اريد اشوف لوين توصل وياها
كملت شالت الصينية
خلتها على السنك
لا رجعت الأجبان للثلاجة ولا غسلت المواعين
لزمت تلفونها وفاتت للربعة.
ظليت انتظر ما اريد اتهور
يجوز تجي تشيلهن
فاتت ماما
. هااا شصار من الأكل
... گاعد يفورن
.... خوش
...جت شالت الصينية تريد ترجع كلشي المكانوا وهي تغسل المواعين.
گضبت ايدها اخذت الصينية
تركي من ايدح اني اشيلهن عليش ماتسمعين الكلمة مو گوتلج روحي ارتاحي
... يولي ما احب نومة الفراش تمرضني بالزايد
خليني هين
... لا تنامين بس ارتاحي بالقران اذا ماتركتي من أيدج ورحتي ازعل منج
.... شلون بيج شيخلصني من اوامرج. يلا رايحة وعينج على الجدر لاتغفلين عنو
... ماشي
راحت ماما والأميرة لهساع ماجتي
گضبت الجفجير وطبيت للربعة اني اعلمج اليوم
متمددة والهيتفون باذنها ما ادري تحجي ويامن وتتمضحك
جدة ماموجودة مدري وين مسيرة
تخوصرت والجفجير بيدي
عيني برنسيسة
كومي شيلي الأكل الي اكلتي ونظفي زبالتج
...من تكفين جدامي اكفي عدل واحجي بأدب لاتخليني أسوي بيج شي مايعجبج
امشي انتي شيليهن شنو ايدج تريد كروة
... اخر نوبة أكلج كومي شيلي السم الهاري الطفحتي احنا مو خدامات يم الخلفوج
كامت الحيلها متعصبة
.... سم اليترس افادج مگصوفة العمر
غصباً عليج تلمين وراي هم نزل وهم يدبجون على السطح
... فكيت عيني معقولة هاي تهاني نفسها الفقيرة المطيعة
يمكن اختها على الخط
تهاني ضحكت وحجت
هههههه عجل شعبالج تربيتج
.. فاتت من يمي دفعتني بتك ايدها
.. وخري من جدامي عاب هالخلقة التگطر سم
... بهذا كلامها وحركتها قضت على اخر نقطة صبر ظالة عندي
مندارة تريد تطلع من الربعة گضبتها من شعرها من وره ومددتها بالگاع
ولزمتها دك بالجفجير وين اليوجعها
صراخها شال البيت
كلما تگضبني تريد تدفعني اگرمعها بالجفجير على ايدها ماخليت بيها مكان صاحي
بنت الفگر اليوم انعل اهل اهلج اني امي تخدمج
انتي واهلج الفگر عاميكم هساع جيتي اهنا ادورين دلال
خايفة على هاي ايدج موووووو ماتريدها تتعب اليوم اكسرهن الج
وكعتلها دك على ايدها.
.... يبوووووووو وينكم الحگولي وخرررررري بنت القندرة اليوم اخلي شاهر يخلص عليج ويزتج بالشششششارع.
...فاتت جدة تركض رادت تگضبني زگحت بيها من خوفها رجعت ليورا
انوب طبت ماما بالگوة شالتني من فوگها
اصيل... هساع غفيت جفلت صوت صريخ ترس البيت هذا صوت تهاني
منا اني مريضة وبالگوة حاملة حالي وانوب من الخوف والهبطة رجلي ما عادت تشيلني تا اروح اشوف شكو
ظليت اكضب الحايط تا اصل اهناك
لكيت تهاني بالكاع وفيروز فوكاها واكعتلها جتل بالجفجير امي غاد منهم وتضرب ايد بيد
يوووولي فيروز شگاعد تصخمين
كووووووومي
.... عوووووووفيني اربي هالمامترباية اليوم اشرب من دمها
تهاني.. والله اليوم اهجم البيت فوك رؤوسكم وينووووو تلفوني خلي يجي شاهر يشوف حالي
نعيمة... يمة هساع امها تادبها لاتخابرين شاهر وتقلقينوا مانريد مشاكل
فيروز.... لا اششششششو اني اريدها تخابر. وانتيييييي سسسسسسكتي كولوا منج بنتج خدامة الجنتج وانتي ساكتة
اصيل... گعدت بالگاع الطم على وجهي كافي ششششبلاج اني هيج ربيتج يولي عليش تفشليني ويا اخوي
... هااا هساع الصوج مني عجل خوش ممنونة منج
طلعت من الربعة طبيت للمطبخ
تهاني اسمعها تصيح عليهم
خابرت شاهر
اصيل ... هساع ارتاحيتي راح يجي شاهر اذا تعصب ومد ايدوا عليج اني شسوي
.. خلي يجي ما خايفة منو.
جت جدة تريد تعزل السنك وتلم الغراض
زگحت بيها بالحرام الي يشيل شي من مكانوا
اسوي البيت عزززا اليوم
... فان حظج يولي گصري الشر فوك ما جتلتيها واختها سامعة الصراخ انتي ام الراهي
... طبهم مرض
ماما زعلت عافتني وخشت الغرفة نجوى.
جدة تلوب تريد تغسل المواعين بس تخاف تتقرب
راحت يم تهاني تقنع بيها تا تسكت
جيت يم ماما من شافتني صدت للجهة الاخرى
...وصلت بيج المواصيل حتى على امج تعلين حسج روحي من جدامي
.... من ضيمي شلون اتحمل اشوفج تتعبين وتنهانين واظل ساكتة
.. ماشكيتلج عندي لسان واكدر ادافع عن نفسي
. عجل ليش ما دافعتي عليش ما وكفتيها عند حدها من البداية
ماما انتي قدوتنا ونتعلم منج اذا تبقين بهالضعف والرايح والجاي يتامر عليج احنا شنطلع
مافكرتي بنجوى اشكد گاعد تتأذى من تخدم حرمة ابوها
... الفقير ومايحب المشاكل بنظرج ضعيف وماعندوا شخصية
... هاي حقيقة لاتزعلين مني
ظليت اتوسل بماما تا تحجي وياي وهي ابد حتى ما ادحج بوجهي
سمعت صوت شاهر يحجي ويا جدة وتهاني ردت اطلع ماما گضبت ايدي
.... بروح جدتج ابقي هين خلي اقفل عليج الباب لايجي يضربج
... لاتحلفيني لازم اطلع وشيريد خلي يسوي
عفتها ومشيت للربعة
اسمع الحية تشكيلو
... ترضى فيروز تمد ايدها عليه واني اكبر منها ما خلت شي ما حجتوا لوما خالة واصيل ماتفكني من ايدها مثل الجلبة المجلوبة
اريد حكي منك شاهر وحگ اهلي السبتهم
.... عليش تكاونتوا
... تريگت من خلصت اختي خابرت عفت صينية الريوك بين ما اجاوبها واجي المها
ما اشوف غير فيروز هادة علية بالجفجير هاك شوف حالي وجسمي
.... عيوني صعدن الراسي فوكاها جذابة طبيت للربعة ركضت عليها ولزمتها من شعرها
يالجايفة فوكاها جذابببببببببة موتج على ايدي اليوم
تهاني. هاك شششششششوف بعينك ولج يمة لحكيلي
.... شاهر صار بنصنا فك ايدي من شعرها وگضبني جتفني اريد ارجع اهد عليها ما اكدر
شاهر.. الحد هسسساع مطول خلگ وما اريد اسوي شي اندم علية احجولي السالفة عدل گبل لا اضرب راس براس
ييييييييمة انتي سولفي ششششنو الجاعد يصير هين رحمة الوالديج
.. هااااا والله ما ادري ما جنت هين من جيت لكيتهن يتمالخن
تهاني... خالة احجي الحگ مو لكيتها هي التضربني وزگحت بيج من ردتي
تخلصيني من جوة ايدها
الا جت اصيل وخرتها مني
... نفضت روحي من شاهر ودحجت بعينوا اي صح اني الجتلتها وهساع لو تعوفوني ارجع افين حظها من جديد
... وتحجيها بفخر ومو خايفة
... هه من منو اخاف منها لو منك
... فيروووووز گضبي لسانج طولت خلگ وياج احجي عدل لا اخلص عليج
.. لا اشو ما اسكت وشتريد تسوي سوي
اصيل.. صخام الصخمني عزززا بعيني يووووولي كافي مو راح راگع واموت منج
نجوى.. السايق تاخر يلا جة رجعني للبيت
سيارة بابا بالباب
طبيت للحوش صوت هوسة. من خوفي سويت الدرب خطوتين طبيت اركض.
ادحج الوجوه ماتتفسر تهاني مكفوشة شكلها محصلة جتلة من هاي التسوة
ماما تبجي وفيروز غادية نار
وبابا صافن عليهن
فيروز... هااا ماما بعدج الهساع ماتريدين تحجين شي
عجل خوش اني راح احجي
شاهر... فضوني عاد ترى وصلت الهين
تالي احرگ الأخضر واليابس سوة
اصيل.. انجعمي ولا كلمة امشي جدامي للبيت.
.
.. لا والله ما اروح هالنوبة عذريني ما راح اطيعج
دحجت على شاهر
اسسسمعني زين امي مو خدامة عد احد مفهوم واليگرب منها ويقلل من قيمتها اكص لحمو وازتوا للجلاب واخلي جلب ياكل جلب
.... بالحرام الحرم راح افيض حلگج دم منوووو الخدامة
... اي طبعاً ماتدري نايم ورجليك بالشمس وامك اطمطم الحرمتك حتى حضرتك لاتتعصب وتضوج
نعيمة.... انگص راسج يا مگصوفة الرگبة كافي هديتنا الله يهدج
شاهر. اكفي يمة كلمة ما اسمع من اي وحدة بيجن عد فيروز
احجي شصاير
اصيل.. خوية مصاير شي معليك بحجيها جاهلة وتحجي شيش، بيش
.. اششش وال يرحم اهلج
يلا فيروز احجي عاد
تهاني. الطم اشك هدومييييي انجتلت وانهانيت وانت واكف تسمعها هاي تاليها شششاهر
فيروز... وعليش خفتي مو انتي الخابرتي تا يجي ياخذ حقگ ويزتني بالشارع
شاهر.... منو اليزتج بالشارع يولي
... هه عجل اسمع الأقوى منها
حرمتك بنت الحسب والنسب اتكوم وتگعد تعاير اختك بعيشتها هين ابيتك
مسويتها خدامة الها اذا تسممت تعوف الماعون ماتشيلوا لان اكو من يخدمها
اختك الدوم اتكول اصيل امانة برگبتي تگعد من الفجر تعجن وتخبز وتنظف البيتين وتطبخ
ومن غير خدمة اهل تهاني الرايحين وجايين هين
مريضة مابيها حيل تكف وهم تكرب ومحد بحالها
هاااك دحج ايدها جيت سحبت ايد ماما شوفتوا الحرك
لو واكعة يم التنور ومحتركة مجان كافني مووووتكم والله
تأكل وتكولي انتي شيليهن بمكاني هم نزل وهم يدبج على السطح
تهاني... جذااااااابة مو هيح السالفة بس من تمنعني الدكتورة من الحركة ما اشتغل واصيل وخالة هما مايقبلون
هااااا اني جذابة مووووو جريت نجوى وكفتها جدامو اسأل بنتك خدامة مرتك الثانية كوللها كلام فيروز جذب لو صح واذا تريد حلفها
نجوى. تشجعت وحجيت لا مو جذب والله ماما عايشة بضيم وتعب. وفوك هذا كلما اتكول التهاني عاونيني تهاني اتكلها فوك ما مگعديكم هين تريدون نخدمكم
....تهاني تكمز وتحلف كل يمين يكسر الظهر، استلمها شاهر غداها جنازة
ماما وجدة ونجوى يريدون يفكوها من ايدوا ما يكدرون
شاهر.. بنت الكلب اني اختي تخدمج من انعل سسسسساس اهلج تروحين فدوة لتراب رجليها
البيت بيتها وانتي الضيفة عدها
مسويج ادمية ومحترمج وانتي تلعبين من جوة ليجوة مو زلمة اذا بقيتج لحظة وحدة هين
... جرها من شعرها اخذها للسيارة الكل لأزمينو ما فاد اخذها وطلع
ماما وجدة اكلن گلبي عفتهن وطبيت للغرفة ظليت انتظر جيت بابا تا احجيلوا يطلعنا من هالببت الأكشر
نجوى... ماما وجدة زعلن من فيروز كل وحدة خشت الغرفتها وبعد ماطلعت
فيروز... اكولج يعني صدك الغلط بية اني مو بيها
كل الگاعد تسوي بيهم والهساع ضايجات عليها وماينطون بيها
... يولي مو علمودها علمود بابا سمعت من جدة اتكول شاهر اذا طلگ تهاني يتعقد من النسوان بالزايد وبعد بحياتوا مايزوج
... يولي والله گلبي احترك على ماما مريضة وما تگدر تكف وادك شششغل
... هههههه ماقصرتي بتهاني زوعتيها حليب امها
اكول فيروز بس لاتتعصبين مني
انتي جتلتيها بس علمود ماما لو لان تغارين على بابا
... بروح جدة ولا فكرة بسالفتي ويا ابوج
كل الي بالي من البارحة كلام تهاني ويا ماما وشلون مستغلتها
... عليش تحلفين اكيد مصدكتج
يلا اكوم اسوي التمن ماظل وكت
... ابتسمت عجل اني عليش ما اتعلم مثلج
... شسوين تتعلمين خليج بالاكشن الأنتي بي
... امداج
طلعت نجوى ورة شوية فات شاهر للغرفة بالگوة يتنفس من العصبية
عززا بس لا جاي يجتلني مثل ما جتل تهاني يبووو
... عندي كلمتين وياج أسمعيهن عدل وحطيهن ابالج
كلمة من الصار اليوم اذا وصلت الأبوج
وحق لا أله الا الله يافيروز
لشوفج شي بحياتج مشايفتوا
اخليج تتمنين الموت وماتحصلينوا
... عزززا هذا شلون عرف اريد اكول البابا
جفلني صوتوا زگح بية
... مووووو جاعد الغيييييي وياج
.. هاااا شلون تريد اسكت وتهاني تعاير امي بگعدتنا هين
... انعل ساس اهلها هذا بيتكم گبل لايكون بيتي واذا لأزم احد يطلع منو اني مو انتوا
... سكتت شجاوبوا مجبورة اسكت خفت من عصبيتوا
طلع شاهر صعد فوك حتى على الغدا ما نزل
ماما وجدة بالگوة گعدن ياكلن حتى بابا لايحس بشي
العصر جني خالاتي ومن سمعن بالكونة ايدني وصفن وياي حجن على ماما وجدة
احلام... عاشت ايدها بعد طولي الف نوبة حجيت وكلت لأزم شاهر يعرف بتصرفاتها. تا يلوي اذنها واجر عدل محد سمع مني
ا وهاي نتيجتها شاخت عليكم وصارت ماتنجرع
أبتسام... ول فيروزة معليج بيهن امج وجدتج الظاهر عاجبهن الحال المايل
اصيل. هي بدون شي وما اكدرلها وبهذا تشجيعكم تصير بعد انجس
فيروز. عز علية زعل ماما جيت حضنتها جدامهم وابوس بيها
الله عليج لاتزعلين مني والله گلبي احترگ عليج هي منو وتنظفين زبالتها
... يولي اني خوفي عليج انتي لو صايرة كونة جبيرة وخالج ضاربج جدامي شجان صار بيه
بغلاتي عندج بعد لاتعيديها
... هذا هو حتى لو ترجع ماعلية بيها
... اي احسن
... بس هاا ما اقبل تشتغلين بدالها
.... هههههه اظلين وكحة
باليل جوي قادر وشاهر متاخر اهلي فاتوا ينامون بس جدة گاعدة تنتظر شاهر بالها يمو وخطية كل شوية تغفة وهي گاعدة
جة قادر كعد قريب مني يتمضحك مدري شبلاه
شششبيك شنو قردة جدامك
... ههههههه لا محمد علي كلاي جاعد هين
من رجعتي من الرمادي خفت عبالي مبدلبنج ودازين شبيهتج من الأربعين
بس اليوم تاكدت انتي فيروز بشحمها ولحمها
. هساع اني شفهم من كلام مدح لو ذم
..الاثنين سوة ووياهم الثلاثاء والأربعاء اما الجمعة استراحة
.... هههههههه خبال
... الخبالج يولي بالجفجير يا ظالمة هههههههههه هساع لو الجمجة يمكن ارحم
.... شاهر گاعد يگلب بتلفونوا ومبتسم
ماحبيت اظل گاعدة جدامو
طبيت للغرفة
وراها بيومين ام تهاني جابت تهاني رجعتها
كالت الشاهر تهاني معذورة التابعة مخليتها ماتعرف تتصرف والضغط جثير عليها تخاف لا مايصير عدكم جهال
شاهر...اذا تريد ترجع اول شي اتكوم تحب على راس امي واصيل وتعتذر من اصيل
گبل ما جنت ادخل بسالفة شغل البيت اكول زحمة احجي بيها
بس هساع مضطر اصيل ما مسؤولة عن هذا البيت ماعليها غير الطبخ لان ما احب اكل من ايد غيرها
.... تهاني وافقت وحتى الخبز تگعد هي تخبز وتعجن
تهاني من تشوفني بودها تأكلني
رجعت اطب واطلع بالبيتين عادي ما اريد اظل حابسة روحي
ماما بعدها تعبانة من حللت طلع حامل هههه
نجوى خلصت امتحانات
وارتاحت
اشوف دوم يتصل يطمئن علية ماتركني ابد ومن يحجي بحترام ما يجاوز حدودو وياي
تهاني حبلت للمرة الثالثة جدة واهلها دخلوا انذار خايفين عليها يومية ماخذينها للسيد
ومثل كل نوبة راحت ظلت يم اهلها
اليوم باليل گاعدة ويا نجوى بغرفتها نسولف
گبل لا انام دك تلفوني اشرف يتصل صارلي اكثر من اسبوعين ما حاجية ويا
شلونج بنت عمتي
... الحمدلله انت شلونك
...على الله جنت مسافر عندي شغل اليوم رجعت
... هااا الحمدلله على سلامتك واني اكول شعجب ما مبين
.... مشتاگلج بنت عمتي من يوم التركتي الرمادي واهجس شمسها غابت
.... تلعثمت هذا شگاعد يحجي هااا الرمادي منورة بناسها واذا شمسها غابت بروحت الحنية ام الخير والبركة
... الله يرحمها
.... گاعد احجي ويا ومأخذة راحتي وصوتي شوية عالي ولان ليل وكلها نايمين ينسمع ما حسيت غير الباب تنفتح ويفوت شاهر...........
يتبع
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!