رواية وشاء الحب الفصل الأربعون 40 - بقلم بسمة البياتي

_وشاء الحب_
( بقلم بسمة البياتي)
_البارت السابع و الثلاثون   _

اليوم الظهر  گاعدة بغرفتي
سمعت حس صراخ جوة البيت انگلب كمزت من مكاني طلعت اركض

فيروز صارت جدامي طلعت من غرفتها خايفة

... هاي شكو شنو هذا الصراخ
... ما ادري حدرنا بسرعة طبينا للربعة
دحجنا جدة وماما املخات حالهن يلطمن من ضمير
بابا مخلي ايدو على راسو وگاعد
وبابا نافع نفس الحال

حجيت بخوف شبيكم شصاير
محد يجاوب ملتهين بالبجي واللطم

ايات واكفة على صفحة گالت

... هساع خابروهم من الرمادي
زوج امنة وابنها رعد لاكينهم مجتولين

فيروز... صرخت يعني ششنو ميتين لو عايشين

... اكولها مجتولين اتكول ميتين لو عايشين
شيعيشون  جسمهم مزرف بالطلقات ومزتوتين بالطريق  هو وابنو رايحين خطار الگرابتهم باطراف الرمادي وبالطريق جاتلينهم وماخذين السيارة والفلوس هم زين باقي تلفون رعد من لايكينهم داكين على اهلة

....ماظل بية حيل گعدت بالگاع  ابجي بقهر واضرب على رجلي
ما گاعد اصدك يعني شنو عمو عمر ورعد ماتو منو بلغكم خاف جذب

.. لا مو جذب اخو عمر اتصل وبلغهم

نجوى...گابلتهم وكعدت الخبر هد حيلنا
الله يعين گلب عمة امنة
ببتنا انگلب وياهو التفوت تصرخ من الباب

بابا التلفون بيدو
حضرو السيارات تا نطلع للرمادي
التمو گرابتنا وطلعنا

فيروز...من القهر وحرگة الگلب خفت لا على ساعة واجيب
رحنا للرمادي تعبت منا ثگل الحمل ومنا ثگل الهم البگلبي

وصلنا الفرع بيت خالة الدنيا مگلوبة السيارات مالية الشارع الزلم والشباب  ملمومين

حس الصراخ ينسمع من بداية الفرع
دوم اول مانفوت البيتهم يتلاكنا عمو عمر بالباب
ببتسامتو الهادئة الماتفارك  وجهو

ورعد اوف يارعد يطير بينا يحير شبجيب وشيودي
يطب ويطلع يحب راس جدة وخالاتي
حنان الدنيا كلو بيهم

طبينا جوة زاد الصراخ واللطم صميت اذني
تلكتنا رسل الشعر مكفوش ومهلس تكمز بمكانها
وتصيح راح بابا راح رعد وراح انخسر امي هم
موقف يصعب على الكافر ويفطر الگلب

جانوا بعدهم ماجايبنهم
لساعهم بالطب العدلي لان تحقيق وسين وجيم
خالة امنة من سامعة بالخبر مامتحملة وواكعة
ماخذينها للمستشفى ضاربتها جلطة وحالتها خطرة

ماما وخالاتي وخوات عمو عمر ملخن حالهن
من جابوهم المنطقة انگلبت شما احجي ما اكدر اوصف الموقف
اصدقاء رعد وولد عمامو جايبين
مزيقة تا يزفونو
بس الفرق مو زفو  العروس لابسة بدلة بيضة الزفة الحفرة بالگاع

اخذوهم يدفنوهم خالة المسكينة حتى باخر لحظة الهم هين ما كدرت تودعهم

ماما راحت ظلت بالمستشفى واحنا. بقينا هين
ايام ثگيلة بثكل الجبل
ما نعرف بيهن شي غير الحزن والسواد

خلصت الفاتحة وخالة لهساعها بالمستشفى
عدت مرحلة الخطر الحمدلله
خايفين من تطلع وتجي هين وتلجح مكانهم الفارغ ترجع تنتكس وتسوء حالتها وهالنوبة اذا وكعت صعب تعدي منها

اصيل...امنة شحالها من كعدت ماتكدر تحجي ثمها شوي معوج وتك ايدها
من تفتح عينها الدموع تجري بدون حس

اليوم الدكتور كتبلها خروج
من طلعنا وصعدناها بالسيارة حجت بالسان ثگيل
گالت ودوني لكبورهم
حجت الكلمة وغصت بالبجي

شاهر... خيتي بروح ابوي اخذج بس مو اليوم هساع ارتاحي وخلي صحتج شوي تتحسن

... عساها لاتحسنت الي يحبني يدعيلي اروح انام بسدهم عليش ما متت خوية بداعة اعزاز گلبك وديتي اشوفهم

...عمرج طويل يبعد اخوج اذا تريد اخذج قوي حالج

... اخذناها للمگبرة من اشرلها شاهر عليهم
تخيلت اجت نامت بنصهم
تشيل من التراب وتخلي على حالها
حضنت گبر رعد تون بوجع وتحجي ويا

... يبعد امك النوم ماتلوگلك كوم خليني ادحج  طولك الحلو
يول گبل جم يوم حاجيت ابوك تا ازوجك وافرح بعرسك هيج گلبك انطاك تترك امك

صدت على عمر كووووم وگوم ابنة ابو بيتي المنو تركتني وتركت جهالك

خوية شاهر گولهم يكومون
ودعوني وما ادري
گبل لايطلعون حبوني من راسي
ورعد من الليل يگولي مشتاك الجدة الخالاتي وخالي
وخابري رسل هم تجي مشتاك لوليدها

.... بجينا على حالها شاهر شالها شيل من كبورهم. واخذها للسيارة

نجوى... جابوا عمة بابا گبل لايطلعها وصانة
گال من تجي ما اريد احد يصرخ جدامها
لو الحس العالي يرجع الميت جان الناس خسرت حسها الخاطرهم

جتي عمة من طبت للبيت ولجحت مكانهم تخبلت بجت الحد ما تخربطت من صحت
تون وتگول اريد اموت

بناتها تخبلن گابلنها وگالن
اذا انتي هم تتركينا شيصير بينا بابا راح رعد راح
وانتي هم تريدين تلحگينهم فكري بينا منو النة غيرج 

من دحجت بناتها انهارن شوية سكتت
ماظل شي على رجعتنا بابا گال امنة بعد مالها عيشة هين لازم تجي ويانة

بالبداية ماقبلت بعدين بالگوة رضت لان ابنها وبناتها صغار مو مال تعيش الحالها

عمام الجهال ماعترضو لان هما گرابتنا
عمو عمر الله يرحمو يصير ابن اخو جدة

فيروز.. بالفاتحة شفت خالاتي وخوالي سلمت عليهم حالهم حال الغربة
من يوم التزوجت تلفون مارفعوا يسألون بي علية
ماعدا خالي ايهاب بين كل مدة ومدة يخابرني

جت سارة حرمة اشرف كعدت بسدي
سالتني يا شهر بالحمل
كوتلها بالثامن

... اي مبين لان بطنج جبيرة ونازلة
اني هم حبلة بالخامس بس الهساع بطني مامبينة

.... الله يتمملج على خير واتكومين بسلامة
... تسلمين اجمعين يارب

.. صايرة عاقلة سبحان الله
المغرب واكفة ويا نجوى بالمطبخ فاتو الشباب ومن ضمنهم اشرف الكل راحوا للأستقبال
اشرف اجة وكف جدام باب المطبخ وصاحني

جيت وكفت جدامو
هلا اشرف
... هلا بيج فيروز شلونج

... الحمدلله على كل حال
... اعرف هالحجي مو وكتو بس ماراح الگي  غير هاي الفرصة تا احاجيج واريح ضمير

.. رفعت حاجبي خير ان شاء الله
.. بيوم من الأيام  بدون وعي دعيت عليج ومابريتج الذمة
وهساع اكولها الج من گلب راضي الله يوفقج ويسعدج مبرية الذمة خيتي
انتي امانة جدة وصتني عليج گبل لاتموت لاتتصورين اكدر أأذيج

.. الله يرحمها
مشكور خوية الله يسعدك

.... راح اشرف رجعت المكاني الحمدلله هساع ارتاحيت دعوتو جانت كاسرة ظهري

نجوى... طلع خوش اشرف
ولا عبالك هو وعمران گرابة فرق بينهم فرق السما عن الكاع
الله لايرحمو

... شذكرج بي سدي حلكج يولي
رجعنا السامراء وهالنوبة خالة ويانة
جهالها تركو المدارس هالسنة ما الهم خلك بسبب الهم
رسل متزوجة ابن عمها ظلت اهناك

خالة عدها ولد اثنين وثلاث بنات
رعد الله يرحمو الجبير جان ثالث كلية
وبعدو رسل
واسماء و وعد ومها 

شاهر انطة الخالة غرفة فوك وكال من تروح ايات الغرفة الأخرى هم الكم
خالة ماقبلت گالت اريد ابقى بغرفة امي هساع بعدين عود ارتب وضعي
تركها براحتها مايريد يضغط عليها 

رجعت ورجعت معاناتي ويا شاهر
گبل اذا بس يزكح هساع  صار يترك الغرفة وينام بالصالة الفوك ودوم يشكي من وجع راسو اقل كلمة لو حس يغدي بركان
ماظل شي على ولادتي وحالتي النفسية زفت 

محد بالبيت يعرف بالمشاكل البينا غير نجوى
ما اريد احجي واشمت ايات بية
نوبات من يسمعون حسو عالي اكلهم ماكو شي اني عصبتو ورجعنا تراضينا 

طبيت. بشهري رحت للدكتورة كالت هالأيام تصير عندج ولادة بطنج نازلة
جنس الجنين شاهر ما قبل اعرفو مايحب هالسوالف.
ماما جهزتلي ملابس عليك يا الله

اليوم من العصر عندي وجع والوب
الوجع يروح ويجي
ماما وجدة گالن هاي تشاليع بعد سالفتج مطولة

باليل طبيت للغرفة
شاهر مجضوع ويكلب بتلفونو
اكثر  وكت محتاجة حضنو هو هساع
الأفكار السودة معشعشة براسي
اخاف اموت مثل امي بالولادة  والبطني يتيتم
جيت علية  طبيت بحضنو خليت راسي على صدرو
عافني براحتي مو مثل كل نوبة بسرعة يصد ويتركني

مختنكة اريد ابجي وبالكوة مانعة دموعي تا ماتنزل
عشر دقايق وماتحمل وخر راسي من صدرو وكعد يفرك بوجهو
معد  أكدر اصبر كمت اشهك بالبجي هم من الوجع وهم من القهر

... اهووو وتالي ترى عليتي گلبي بسبب وبدون سبب تعوعين هساع عليش جاعد تبجين

.... معقولة ماتعرف البية شاهر ريح گلبي وجاوبني شبيك ليش مو طايقني دحج علية لاتصد راسك اني فيروز بنيتك وحبيتك
وين راح حبك وحنانك علية

... نفس الحجي ينعاد باليوم الف نوبة مليت وجزعت  اكوم من هين اشرفلي

... مسحت دموعي لا عليش تطلع ظل بمكانك اني طالعة
تركتو وطبيت الغرفة نجوى

نجوى... گاعدة احجي ويا نزار بالتلفون طبت فيروز بالگوة تجر النفس والدموع تجري

نزار بعدين نحجي يلا باي

... اكفي وين رايحة بعدني مامكمل سالفتي
... ميخالف هساع مشغولة بعدين نحجي
... ماشي براحتج حبيبتي اي وكت يصيرلج مجال دكي علية عسا ما الفجر

. ماشي باي
جيت كعدت جدام فيروز هاا يولي شبيج هم تكاونتي لو بطنج توجعج

... زتيت حالي بحضنها وأشهك گلبي يوجعني
گاعد اموت بدون ما اطلع حس شاهر اكيد عندو غيري

... اششش منين جبتي هالكلام بابا يموت عليج مستحيل يفكر بغيرج

... المستحيل صار واقع شاهر ما عاد يريدني
من البجي گضبني وجع قوي
ظليت اتلوى من الألم 

... يولي شبلاج لاتخوفيني
... بالگوة حجيت ساعديني احدر جوة

... سندتها وحدرنا ركضت صحت ماما
عمة امنة وجدة هم جني

امنة... كعدي شاهر بسرعة عدها ولادة

نعيمة...جيبو غراض الجاهل وشي تلبسو بالعجل

اصيل...انخبصنا مانعرف شنسوي
فيروز گعدت بالگاع تصرخ من الوجع
من خوفي كعدت ابجي وياها تذكرت امها
ياربي احفظها النة بنيتي امانتك ردها الي سالمة

نجوى.. حدر بابا يركض خوف الدنيا كلها بعينو عجل عليش گاعد ياذيها
راد يگومها نفضت ايدو وصرخت وخر لاتگضبني ما اريد اشوفك روح من جدامي

الكل عبالهم ماتريدو بسبب وجع الطلوگة لان اكثر النسوان بهذا الوكت يشبعون زلمهم غلط

عمة امنة تعبانة ماتكدر تروح ويا ماما
خابرو على عمة ابتسام تروح وياهم
اخذوها وراحو
كعدت ابجي وادعي الله يسهل عليها وتكوم بسلامة

فيروز... وصلنا للمستشفى فحصوني عندي ولادة لازم افوت الصالة الولادة بسرعة

گبل لا اطب دحجت على ماما والدموع بعيني
ماما الله عليج خاف يصير بية شي ويجي الجاهل سليم انتي ربي مثل ماربيتني اني ونجوى

... لاتخليني املخ حالي لاتحجين هيج وتحركين گلبي

.. راد شاهر يگضبي ماقبلت
اخذوني الصالة الولادة شفت الموت بعيني
اهجس على ساعة يگف گلبي خلصت طاقتي
وبعد عذاب ولدت وسمعت حس الجاهل
من التعب فقدت الوعي

أصيل... طلعت السستر بشرتنا جابت ولد  وهي والطفل بخير 
فرحتنا ماتنوصف الف الحمدلله ياربي شاهر طلع كرامية انطة للسستر رحت وياها تا البس الجاهل

ابتسام.. الف مبروك خوية يتربى بعزكم ان شاء الله هساع من صدك امي راح تفرح

.. الله يباركلج خيتي شوكت نكدر نشوفها
... اصبر شوي بين ما ياخذوها للغرفة

.... من صحيت عرفت جايني ولد اخذوني للغرفة
ماما وخالة جدامي
جة شاهر باسني من راسي
...الحمد لله على سلامتج بنيتي.

... مجاوبتو
جابو الجاهل زغير گلبي متلهف علية اريد اشيلو واخلي على گلبي
خلو بيد شاهر كبر باذنو وباسو
سآلو شراح تسمي گال سيف

انطونيا من ضميتو الصدري نسيت همي نسيت الوجع التوجعتو كلشي نسيتو بهالحزة ماكو أعظم من احساس الأمومة غير عظمة الخالق الي ماتتقارن  بشي 

نجوى... ننتظر على نار وكل شوية نتصل
گالو جابت ولد وهي ويا بخير صرت مثل الخبلة اضحك وابجي

جدة من الفرح تصلي على النبي ولوما احترام المصاب عمة امنة يمكن تهلهل
فرشت السجادة وگعدت تصلي حمد وشكر لله 

ثاني يوم طلعوهم من المستشفى فرشنالها بالربعة
جتي هي واخوي الزغير
جدة من الصبح خلتهم يجيبون ذبيحة ذبحوها جوة رجلها
وبابا هم جاب ذبح وسوو غدة وزعو للمنطقة

الوحيدة المبينة الضوجة عليها ايات الي يشوف شكلها يگول ميتلها عزيز

فيروز.. اول ايام تعبت جثير خطار رايحين رادين
ومن غير سهري ويا سيف صح الكل يساعدوني بس لازم ارضعو من صدري
الحليب قليل ومايشبع يگضيها بجي

جدة ما جانت تقبل ننطي حليب قواطي  من دحجت حالتو يلا رضت
شاهر رجع شوي احسن داراني ودارة ابنو 
رغم هذا ظل گلبي جافل منو وماخذ موقف

ماطول اسبوع ورجعت حليمة العادتها القديمة رجع نفر مني وهالنوبة اكثر من گبل صار يضوج حتى من بجي سيف
الكل بدو ينتبهون علية بس ساكتين

رجعت الغرفتي بالنهار اهلي يدارون سيوفي وباليل اني ونجوى
شاهر ينام بالصالة الفوك مايطب للغرفة

  نجوى.. . مسطورة من حس سيف هارج البيت هرج بالبجي
شادة راسي بيدي كتابي وافتر اريد اقرأ ما اكدر

نزار... شنو حبيبتي رايحة تبيعين گيمر

... جفلت صديت علية واكف ومتجتف
استحيت شلت الربطة من راسي
هااا هاي شجابك بهالحزة

.... يعني مايصير أجي
... هاا لا مو قصدي بس استغربت ادري بيك هيج وكت بالصيدلية

... صديقي گعد بمكاني صار عندي شغلة گضيتها ورجعت
اشتاگيت وجيت اشوفج گبل لا اروح للبيت

... هلا بيك فوت عليش واكف بالباب
... ههههههه شعجب ماكو حس اخوج الزغير

... اسكت وخليها شادة راسي بسببو عفية جاهل ليل ونهار يبجي
حتى من اروح للدوام نعسانة بسببو

... يوم النة ويجي اليترس البيت بحسو

.. هااا فوت لاتظل وأكف
.. هههههههه اموت على خجلج يولو

... طبينا جوة جدة موجودة ظلت گاعدة شوي بعدين كامت. نزار اخذ الكتاب مني گعد يشرحلي والحمد لله اقل من النص ساعة فهمت

زت الكتاب گعد بسدي وگضب ايدي باسها
وخرر شگاعد تسوي لا احد يفوت ويشوفنا

... قابل شمسوي حتى من هالبوسة اليتيمة تريدين تحرميني يا ظالمة مو كافي علية زواجنا التأجل الى اشعار اخر

... عجل خما تريدنا نزوج وعمة بهذا حالها

... لا طبعآ ما اسويها  رعد الله يرحمو صديقي يولي جان مكيف ويتحضر العرسي راح گبل لايشوفو

... ماتحملت بجيت نزار حضن راسي وظل يمسح عليه
شو هذا اخذوا الواهس نزل باسني من رگبتي
دفعتو وخرر شبلاك يمعود

... هههههههه من اكول ظالمة تعترضين
تركني بس ظل شابك اصابعي بين اصابعو

قادر... السلام عليكم خما ازعجناكم يابة

...  صدينا علية اثنينا

نزار... وعليكم السلام
لايمعود قابل شمسوين دحجنا شلون گاعدين عقال

... هه اي صح
دحجت سيارتك بالبا گولت اكيد هين  ردت نطلع نفتر شوي

.... والله تعبان اريد اروح اسبح وارتاح خليها على غير وكت

.... اي براحتك يلا اودعناكم وديربالكم لايفوت احد انتو مو وحدكم هين

نجوى.. قادر يحجي وعيونو دم لو بيدو يشرب من دمنا
نزار سلم وراح طبيت الغرفتي ضايجة بعدني الهساع من اشوفو اختنك وگلبي يعصرني

فيروز... شاهر حتى على سيف الي جان متلهف على شوفتو ويعد الأيام تا شوكت يجي وياخذو الحضنو صار ماعندو حنية بس اول ايام كيف بي بعدها حتى مايدحج بوجهو
تعبت من المشاكل والعتب اخير شي التزمت الصمت بلكي يجيب نتيجة

باليل نجوى يمي بالغرفة
سيف تعبنا يبجي بجي من ضمير موكفنا على رجل وحدة من التعب نحير شنسويلو بس تا يسكت شوي
واخير بعد عناء نام على رجل نجوى.

يولي تعبت الگيها منو لو من ابو المدري على تالي وكت شصابو

... والله وضع بابا يحير اكبر واحد  ابد موطبيعي
خاف احد معبي براسو عليج ومصدك

.. لا ما اعتقد قابل شعندي ويحجون
گلبي يگولي وره هذا التغيير حرمة ثانية لان مو معقولة بين ليلة ويوم هيج تنگلب احوالو

... اذا صدك لازم تتأكدين ويصير عندج دليل تا تواجهي هساع اذا حجيتي الكل يجذبج لان يدرون بابا ماعندو هالسوالف خصوصا يعرفون شكثر يحبج

هههههه بعد شتريدين گاعد اكص بأبوية الخاطرج وكولي نجوى ماتحبني

... ابتسمت تنگص لسانها التحجي هيج
ما اعرف شكولج المصيبة ما اكدر الزم علية شي گبل يومين گضبت تلفونو فتشتو مابي شي وحتى الرمز نفسو مامغيرو
يولي وصلت مرحلة حتى ملابسو افتشهن خاف بيهن عطر لو اثر وهم كلشي ماكو

... عجل اكيد ظالمتو يجوز عندو مشاكل بالشغل ومايگدر يحجي

. لا ابد السالفة مو سالفة شغل
نافر مني
گبل لا اجيب حرت شسوي وشعمل بحالي تا اغري وابد عبالك احجارة
ولا عبالك نفسو شاهر الي يموع من كلمة

.. حتى اني دخت وياج وصرت اخاف اذا ازوج نزار يسوي بية نفس الشي

.... انجعمي خما كل اصابعج سوة

فات شاهر ورگع الباب من الهبطة كمزنا هم زين سيف ما وكع من حضن نجوى

شاهر... نجوى اخذي سيف واطلعي من هين

... هااا مو شسمة نايم بحضني بس اتحرك يگعد

.... اسسسسمعي الكلمة يلا بسساع

... حاولت ابقى ماقبل زكح بية خايفة على فيروز هذا مو بابا حتى شكلو مدري شلون صاير من العصبية..
شلت سيف وطلعت ماكدرت اتركها ظليت واكفة بسد الباب

... اول نوبة اخاف من شاهر واهجس حالي بخطر الجدامي مو هو عبالك شيطان بلعت ريك ورجعت ليورا
شبيك عليش متعصب

.... تريدين تعرفين البية مو خوش

... فتح تلفونو وخلة بوجهي

... يابنت الأصول هاي شنو

...فكيت عيني صورتي واكفة ويا اشرف من اجة حجة وياي جان قريب مني
مانصدمت من الصورة بكثر صدمتي منو المأخذها التة ودازها الشاهر...........

يتبع