رواية وشاء الحب الفصل الحادي والأربعون 41 - بقلم بسمة البياتي

_وشاء الحب_
( بقلم بسمة البياتي)
_البارت الثامن  و الثلاثون   _

...فكيت عيني صورتي واكفة ويا اشرف من اجة حجة وياي جان قريب مني
مانصدمت من الصورة بكثر صدمتي منو المأخذها النة ودازها الشاهر

رفعت رأسي علية منو الدزلك الصورة؟!

... هو هذا الهامج منو الدازها بس وكفتج جدامو عادي واني مانعج من الحجي ويا طز بشاهر بحجيو

...لاتزكح الكل نايمين
ثاني شي وين الغلط بوكفتي ويا اجة سلم علية خما نگلبت الدنيا الي يدحج  هاي عصبيتك يگول مصوريني ويا بموقف مخل بالشرف

رفع أيدو وكفني بكل قوتو على راسي
كتمت صرختي بداخلي

... بنت الكلب وجاعدة اجادلين وتحجين حجي اكبر من لشتج فلا ينلأمون من يگولون محد مطلع عينج غيري بسسسييطة

... زكحت بي احجي واجادل ونص ماسويت شي غلط العيب مو من وكفتي العيب من وكفتك هاي
جان استحيت على حالك يصورون ام ابنك ويحجون عليها
بدل ما تروح تشوفو منو الدزها الك وتحاسبهم گاعد تحاسبني

صار مثل الخبل رجع ضربني اكثر من نوبة خليت ايدي على راسي تا احمي حالي
حتى على ظهري ضربني واني لساعني نفسا

.... انعل ساس اهلج بنت القندرة صار العيب مني حجيج صح اني لو حوك ما جان طولتي لسانج علية

نجوى.. سمعت كل الحجي  حس بابا صار عالي عرفت گاعد يضربها ماتحملت فتحت الباب وطبيت رگض خليت سيف على الجرباية وجيت وكفت بالنص گضبت ايد بابا
ابجي وأرجف
لا بابا الله عليك لاتضربها
والله ما سوت شي اني جنت وياها بالمطبخ من اجة سلم  بالقران جنت وياهم عوووفها

فيروز... من حرگة گلبي حتى دموع ماكو
طبت نجوى تتوسل بي
وخر من جدامنا وظل يفرك بوجهو
تركنا وظلع

... خما تأذيتي
... معد أكدر اتحملو اذا ما يلگولي حل ويا بالحرام اهج من البيت وما أخلي احد يندلي درب

....  اخذتها الحضني انفجرت بالبجي
كافي لاتبجين موزين عليج

... عجل والگاعد يسوي أبوج بية زين تعبت والله تعبت

... حقج شما تحجين وتسوين فلا ألومج
اخذتها للحمام غسلت ورجعت للغرفة
طلعت ادور البابا لگيتو بالحديقة گاعد يدخن

شاهر.... شطلعج بهالحزة فوتي جوة باردة
.... بابا عليك الله صدگني وداعتك فيروز ماسوت شي

... لو مسوية شي ما جان حاجيتها بالساني جان خليت الرشاشة هي التحجي

... عجل عليش متعصب وضربتها وهي لساعها نفسا موزين الضرب والمغثة الها

... مانعها تحاجي الف نوبة گايللها اذا لجحتي اشرف بمكان تصدبن وتفوتبن جوة
بس الظاهر كلامي مايمشي عليها

... منو الصورها
... ما ادري يلا فوتي جوة

... تركتو وطبيت الله يستر من الجاي الوضع بينهم ابد مايبشر بخير
رجعت للغرفة فيروز متلفلفة بالبطانية مغطية راسها
من حركتها ادري بيها گاعد تبجي الله يساعدها
تركتها براحتها اخذت سيف الغرفتي اني سهرت علية

فيروز... الليل كلو ابجي تعبت واحتاريت وخلص صبري لازم الگي حل

نجوى..صباح الخير گلبي هاج سيوفي تا اروح ابدل تأخرت على الدوام

... اكيد تعبج وسهرج للصبح
... تعبو راحة شعدني غيرو اخوي وابن اختي

... فدوة العمرج
... عيونج منفوخة عليش هالكثر باجية يولي

... عجل شسوي ماعندي غير الدموع
يلا روحي لا تتأخرين

... طلعت من يمها گلبي مفطور وحاقدة على بابا
جان نايم بالصالة

.. فيروز گاعدة انطي ممة السيف فات شاهر طابك الحواجب ومكشر بدل وطلع بدون ماينطق كلمة
ظليت بالغرفة الحد ما جدة دزت مها تريد سيف
بقيت گاعدة وحدي ما اريد احدر

اصيل.. ظل بالي عليج عليش ما حدرتي تا تتريگين
.. هلا ماما مو جوعانة اسم الله عليج مالي خلگ
... شو دحجي علية شبلاج خما باجية عيونج حمر

... لا مابية شي حمر من السهر
... هااا عجل يلا گومي لاتظلين گاعدة الحالج هين

.... ظلت تلح علية حدرت وياها
بقيت ساكتة ما حجيتلهم شي
الظهر من رجع شاهر گعدوا يتغدون ما گعدت وياهم تحججت بسيف
كمل غدة  صعد نام والعصر بدل وطلع ولا هامو حالي عبالك ماموجودة

جني خالاتي والبنات يشربن جاي العصر يمنا مثل كل يومية ايات هم زين صارلها يومين بيت عمها

نجوى... فيروز گاعدة على صفحة وصافنة حتى الي يحاجيها ماتجاوبو

رنا...الشاغل بالج يتهنى
صارلي ساعة احاجيج وانتي بغير عالم

فيروز.. هااا مانتبهت راسي شوي يوجع
عالية...حقج ابن النفاس يرادلو بدل الحيل حيلين

... تنهدت اي صح
امنة... البيج اكثر من التعب منو الموضوجج البارحة سمعت حسكم انتي وشاهر عالي
بس ماحبيت ادخل

... من جابت طاريو اريد اگضب دموعي ما اكدر جرن مثل النافورة

... الكل نخبصو بفيروز يريدون يعرفون شبلاها

أصيل...عجل الصبح من سألتج عليش جذبتي
احجي عاد شصاير بينكم

فيروز... ماكدرت اسكت طلعت كل البگلبي
تعبت شوفولي حل ويا معد اتحمل تصرفاتو
من گبل لا اجيب وهو متغير علية كلمة مايطيق مني يولو بالقرآن بوجهي ما يدحج
البارحة حتى ضرب ضربني هذا مو شاهر لا والله ابد مو شاهر
حجيتلهم كلشي ودموعي تجري

اصيل...كل هذا صاير بينكم واحنا غافلين عليش ماحجيتي من البداية

   شمعرفني عبالي يوم يومين ويرجع الطبيعتو شو هذا گاعد يزيد ماينقص

احلام. .. أكص ايدي من هين اذا ماطلع مسويلهم شي

نعيمة.. مثل شنو يولي؟!

.. يمة لاتغشمين حالج تعرفين شنو قصدي
الزلمة يعشگها وهي روحو من الدنيا بين ليلة ويوم تغير عليها برأيكم هالشي طبيعي

ابتسام.. رأي من رأيج

نعيمة... حاسة  بوضعو مو طبيعي بس ماعبالي واصالة بينهم الهيج
وتدرون بية ما امن بهالسوالف قابل منو يسويلو

اصيل...اذا صدك هالحجي السواها معروف
الي تگتل حالها وتسوي فنون تا تجي تظل هين  كلشي توقعي منها

ابتسام..فيروز احجيلنا وضعو بالتفصيل تا نعرف شنتصرف

... حجيتلكم كلشي مو طايقني ومايكدر يدحج بوجهي بسبب وبدون سبب يزكح ويتعصب
دوم يشكي ومن وجع راسو ومن اقل حس يضوج حتى بصلاتو ملاحظة يخربط ويعيدها اكثر من نوبة ويظل يستغفر
صار يضوج حتى من حس سيف ومايصل يمو ابد

نعيمة... فان حظج عجل عليش ماحجيتي من الأول

... خفت احجي ايات تسمع وتتشمت بية

امنة... لاتخجلين منا وسولفي صارلو شكثر ما مگرب منج

.... من گبل ولادتي بشهرين يمكن
گام حتى نومة ماينام بالغرفة يطلع ينام بالصالة

نعيمة.. يولن گلبي غدة نار هساع شسوي وشعمل وين انطي وجهي
ادري بي اذا سمع ماراح يقبل يروح للشيخ  مايصدك بهالسوالف

أحلام... تركي السالفة برگبتي
ابو قادر صديقو سيد ويفهم بهالسوالف مو حاجيتلكم عنو گبل
راح اخلي يجيبو الهين شاهر ماراح يكدر يحجي شي خما يطردو من بيتو

... الله ويدج يمة لاطولين
.. إن شاء الله اليوم اخلي يحاجي بلجي يوكع على علتو
اذا جت الحية لاتحجون شي جدامها

فيروز... مأيسة وغاسلة ايدي ما اتصور شاهر يرجع مثل گبل ظليت ساكتة وهنا گاعدات يخططن
وجدة تعد وتصف الايات

  ثاني يوم رجعت الحية للبيت لومو مانعيني أصل يمها بالحرام اروح ازوعها العافية

بعدها بيومين
أجتي خالة احلام گالت باجر السيد يجي على الغدة

باليل جدة بلغت شاهر
... يمة باجر عدنا خطار على الغدة لاتبطي بالرجعة للبيت

شاهر... هلا بيهم منو الخطار

....صديق ابو قادر
اخيتك طلبت مني نعزمو هين
خما بيها شي وليدي

... البيت بيت ابو قادر يعزم اليحلالو كل الهلا بيهم من الصبح ادزلكم المسواك تا تقومون بالواجب

.. لا تجيب شي طلعت اني واحلام تسوكنا
... هذا هو ان شاء الله گبل لايجون. نرد للبيت اني ونافع

.  صعد شاهر اخذ مخدة وبطانية ونام بالصالة صرنا اني ويا مثل الغربة  حتى الكلمة مايحجيها وياي
ابنو الجتل حالو علية ومتلهف الشوفتو
تاركو ومايدحج بوجهو معقولة اكو سحر يغير البشر هيج يبدل الحب للكره
مگاعد اگدر اصدك

ثاني يوم گعدنا من الصبح
خالاتي جني من وكت تا يساعدن بالطبخ  الشبخ ماراح يجي الحلو اخو وولدو ويا
للظهر ازواج خالاتي وولدهم وشاهر وبابا الكل
موجودين

اجة الشيخ وطلعوا للباب تايستقبلونهم
احنا وكفنا ندحج عليهم من الشباك
سبحان الله شنو من هيبة شنو من وقار شنو من وجه مريح يجيب العافية
كلهم نفس الهيبة والشكل
فاتو للأستقبال

احلام.... يلا يبنيات هيرو الغدة بسرعة

... صبينا وجوي الولد نگلوهن للاستقبال
گاعدة على نار والوب
اجتي الحية الرگطة من الدوام

أيات... خطار هين

... ماعليج فوتي الغرفتج ولاتدخلين

... ترى زودتيها هساع شحجيت  تا هيجي تجاوبيني

.... مثل ماسمعتي  مو بيت الخلفج تا تسألين

.... مدري عليش هالكثر نافخة حالج

... لسانج طولان تردين وأنتي مسبطرة

... الي يدك الباب يلگي الجواب انتي البديتي مو اني

.. ردت اهد عليها عالية گضبتني وسدت حلگي
ايات شالت جنطتها وفاتت للغرفة

عالية... فان حظج مالگيتي غير هالوكت تتكاونبن بي  وياها البيت متروس زلم غربة

... مدحجتوها شلون تحجي

رنا.  واضحة مثل عين الشمس
گاعد تستفزج تاتخليج تعلين حسج وتهدين عليها والزلم وخالي يسمعون وتطلعين انتي العايلة  وغلطانة

... يولن گلبي راح يطك تحجي وهي مسيطرة لو ما مالية ايدها من شاهر ماتجاوب هيج

.. اصبري بلجي السيد يسوي شي  وربج يزيل الغشاوة من عين خالي
الظاهر عامية عينو وگلبو بالسحر 

.. خلصو الغدة
اجوي الولد ياخذون الجاي والفواكه
سالت عامر
هاا السيد حجة ويا شاهر لو بعدو

... هساع كملو غدة بعدهم بسم اصبري شوي 

... اووووف معد اتحمل اريد اعرف شبلاه شو تخبل وراح يخبلني ويا

... عليش ماتگلبينها تطلع اصح گولي الزلمة اخذ مخبلة وتخبل وياها

... امششي من جدامي ماينطي بخالو
... هههههه اصبري ماظل شي هساع يحجون وشيصير أجي اكولج بس اركحي شوي

وهاا گبل لا اروح التجي تتنصت وره الباب بالحرام أگص رجلها كل شوي جاعد نفتح الباب لاتفضحونا

رنا.. شلون عرفت اريد اجي اتسمع عليكم
.... حافظ سوالف النسوان

نجوى... جدة وفيروز يلوبن وحدة تگوم وحدة تگعد
ومحد اجة منهم تا يسولفلنة شگاعد يحجون

أبتسام.. يمة شبلاج مو سكرج وضغطج صعدن اهدي شوي

... شلون تريدون اهدء ووليدي مثل الشمعة جاعد يذوب جدامي

احلام.. گولي يا الله شاهر ملتزم بصلاتو من هو وزغير وماعندو سوالف تعبانة الله ماراح يتركو تعدي ان شاء الله وتصير حجي وسوالف

.... الله يسمع منج نذر علية بس يخلص من هاي الشدة اخذو واروح البيت الله

قادر... العجايز شبلاهن يتلاطمن

نعبمة...مو وكتك احجي شصار شگال السيد
... لهساع مگال شي
اخذ گلاص ماي مدري شقرأ علية وقدمو الشاهر

بالبداية شاهر استغرب
السيد... لاترد ايد عمك
شاهر... معاش اليريدها

اخذ الگلاص وشرب الماي ظلينا نسولف بسوالف عادية
عينا على شاهر حالو تغير الوجه غدة دم وكل شوي يگضب رگبتو يفرگها ماتحمل ترخص وطلع للحديقة

السيد گال اتركو الحالو
وطلب منا نبلغكم تفتشون غرفتو ماتخلون زاوية وزاغور ( زرف)  ماتبحوشون بي
يمة عليش جاعد تبجين گولي يا الله وليدج سبع لاتخافين علية

...جدة فتحت زيجها ورفعت راسها
حسبي الله ونعم الوكيل على كلمن سعى بأذيتو
ربي ماعندي غيرك اكف ويا وليدي

فيروز.... انهد حيلي وصدري انقبض دموعي تجري ويا جدة

اجني البنات گومني وصعدنا فوك ويا خالاتي
اهجس ماظل بية حيل گعدت على طرف وهنا يدورن مابقن مكان مافتشنو وما لگو شي
الغرفة انگلبت گلاب لاظل ملابس لا غراض حتى الاخشاب حركوهن من مكانهن

دوشك الجرباية من شالو خلو قريب مني عيني جتي علية
ويا الحافة اكو زرف بالگوة يبين استغربت الدوشك جديد وبيتنا مابي فار وحشرات منين اجة هالزرف
خالة ابتسام بسدي دغيتها

... هااا
.. دحجي هذا الزرف بالدوشك
خالة عدلت الدوشك مدت اصبعها
رفعت حاجبها

... اكو شي طخ اصبعي ناوشوني مگص

اصيل... وين نلگيلج المگص بهالهوسة
.... القماش قوي ما اكدر أكبر الزرف بيدي
.
نجوى.. عندي واحد بغرفتي هساع أجيبو
رگضت جبت المگص ناوشتو العمة

شگت شوية من الدوشك
طلعت ورقة ملفوفة مثل القلم ومسدودة بتيب شفاف
لشتنا گزبرت
مضبوبة ضب بالتيب تا ماتنفتح

اجلام... دخيل الله شنو هاي يولي لاتفتحينها خلي السيد هو بمعرفتو يفتحها

امنة.. دحجو شعر جسمي كلو وگف

فيروز... مدري شبلاني انهاريت بالبجي حتى الهوا انًگطع ماما گادتني من ايدي اخذتني جوة

ايات الله يلعنها بعد ماطلعت من الغرفة

نعيمة... هاا يمة ليگتو شي شياتين
احلام... بس هاي وماندري شني هي

قادر...شو ناوشينياها خلي السيد يفتحها

اخذها وراح
. نعيمة... اذا طلعت ايات المسويتها محد يفكها من ايدي اليوم

أحلام... هساع لاتحجين شي خلي نتأكد بالأول

نجوى... اكثر من ساعة ومحد طلع منهم من الأستقبال واحنا گاعدين على نار
حسهم گامو دحجناهم واكفين بالحوش يريدون يروحون
سلمو وطلعوا
فات عمو ابو قادر وبابا نافع والولد للربعة

نعيمة... بطيتو جثير واني جاعد اكل بحالي اريد افهم شصار عجل شاهر وينو

ابو قادر... مجضوع بالأستقبال ابو نزار، وعامر ويا لاتخافين مابي شي
خلو الحالو يرتاح شوي

... هساع غير تفهمونا شصار، ومن شنو يرتاح

.. حسن سد باب الربعة
الحجي الراح احجي لاتحجو الطير البشر ولاتسوون مشاكل ببن مايطيب شاهر ويرد الوضعو الطبيعي

السيد فتح الورقة ظل يستغفر
بيها عمل تفريق وكره بين شاهر وفيروز وأسمائهم مكتوبة وطلاسم وخرابيط

... جدة رادت تعيط عمو ابو قادر سكتها بسرعة

...شحجيت گبل شوي مو گولت ما لأزم احد يدري  الخاطر وليدج اتحملي وسكتي
اذا ظليتي هيج بالحرام فلا اكمل

... سكتت كمل ولاتشل حالي

... اكو عمل ثاني منطينو الو ويا الأكل ماثر بي وگالب احوالو
من رجع شاهر للأستقبال

السيد... ابو سيف تأمن  بوجود السحر والشعوذة لو لا؟!

... السحر مذكور بالقرآن
بس عندي يقين  ( قل لن يصيبنا إلا ما كتب الله لنا)

... حجيك عدل وعين العقل
والله بعد يگول المؤمن مبتلى
وذكر بكتابو  بسم الله الرحمن الرحيم

(واتبعوا ما تتلوا الشياطين على ملك سليمان وما كفر سليمان ولكن الشياطين كفروا يعلمون الناس السحر وما أنزل على الملكين ببابل هاروت وماروت وما يعلمان من أحد حتى يقولا إنما نحن فتنة فلا تكفر فيتعلمون منهما ما يفرقون به بين المرء وزوجه وما هم بضارين به من أحد إلا بإذن الله ويتعلمون ما يضرهم ولا ينفعهم ولقد علموا لمن اشتراه ماله في الآخرة من خلق ولبئس ما شروا به أنفسهم لو كانوا يعلمون

صدق الله العظيم

شاهر دحج على السادة بحيرة
...لوين تريد تصل سيدنا

.... الجاعد اشوفو انت زلمة مؤمن ومتمسك بفروضك وتخاف ربك
ولهذا السبب الله واكف وياك وماتاركك رغم الجاعد تمر بي
وليدي انت جاعد تصارع وتكاون حالك وموداري

... وضح اكثر سيدنا يعني هساع اني بية شي
ههههه أستغفر گول غيرها

... لاتقشمر حالك تدري بوضعك موطبيعي مخنوك وصلاتك تخربط بيها وجسمك ثجيل وما مرتاح لا بنومتك ولا بگعدتك صح لو اني غلطان

... حشاك من الغلط
صح بس الكلام ما جاعد يفوت الراسي محد باهلي وعشيرتي عدهم هالسوالف منو يسوي الي

... اعتبرو  مس حسد لاتعتبرو سحر خليني اساعدك
راح ترضى بعمك يقرأ عليك
ايات من القرآن الصاحي والمريض يحتاجهن
راحة للگلب ودوة للمعلول

.. شاهر للنوبة الثانية خجل وما گدر يگول لا
السيد واخو تگابلو علية
على النص وماتحمل اختنك راد يرد من معدتو بس ما گدر
السيد گال اتركو هساع يرتاح وغير نوبة نكمل
من التعب نام

نعيمة... ما گاللكم منو المسويتو الو

   لا ما حجة
.. ماكو غيرها اليوم انعل والديها

... لا عمة ديريالج تحجين شي السيد مايقبل خلي يطيب خاف تعرف وتروح تجدد السحر ويمكن تسوي اقوى من هذاك
بنيتي فيروز النوبة الجاية يريد يقري عليج الان السحر عليكم اثنينكم

... مابية شي بس نوبات اختنك واشوف كوابيس

... اي لان العمل بالغرفة من هاي ماترتاحون بالنومة بيها وتتكاونون

...اي صح
عمو الله عليك السيد گال راح يطيب لو لا

.... ان شاء الله بنيتي خلي ايمانج بالله قوي الحمد لله
الله سهل ولگيتو العمل بسرعة
والسيد اخذو ويا تايفكو
بس ظل البمعدتو ومن يجي يقرأ بلجي يخلي يزتو من معدتو

... اووووف ان شاء الله

... ظلو يسولفون واني بالي عند شاهر
گلبي مثل الطير يرفرف علية واخاف اروحلو لان منعوني

نجوى. طلعو الشباب برا ورة شوي صار حس صياح
طلعنا تا نشوف شكو
لكينا نزار وقادر متگاضبين
واحد واگع للاخر دك ضرب  والشباب تفك بينهم

عمر ابو قادر وعمو ابو نزار دخلو بالنص وفاككوهم

ابو قادر... فان حظكم واحدكم بگد الثور وجاعد تتكاونون مثل الجهال ياحيف الشوارب التارسة وجوهكم

قادر... ول ساقط تمد ايدك علية اليوم انعل شيب اهلك

ابو قادر... النعلة تنعلك الظاهر كبرت وزحت الاحترام ابوك جدامك وانت جدامو تهد وتفشر

ابو نزار... اول تالي توكف تتگاون ويا ابن خالتك
اكبر منك وبحسبة اخوك شبلاك هاي عود انت الثجيل التباهى بي بين الناس

نزار.. طلعني من الاهدوم العلية
الف نوبة كبرت عقلي وسكتت الهين وبس كل حجيو تبسمر واستهزاء، اريد افهم قادر شششرايد مني يطلبني بثار وما ادري

نجوى... صافنة عليهم
والقهر ماكلني قادر راد يجاوب ابو سكتو
فوتوهم مدافع للربعة
مارادو بابا يكعد ويدحجهم

بالگوة گعدو عيونهم تتكاون
عمو سأل عليش تكاونتو ناس تجر بالطول وناس بالعرض مافهمنا شي غير الهوسة
عمو زكح بيهم سكتو

نزار... بعد اذنكم خلوني احجي واذا بية غلط هساع اعتذر منو واحب على راسو

ابو قادر... احجي وليدي

.... واكفين بالباب اجة جيرانة ابو توفيق سلم
گال صارلي جم يوم عندي وجع بصدري بلجي تنطيني علاج

گوتلو حجي مايصير انطيك من كيفي، لأزم تروح الطبيب مختص يشوف شنو سبب الوجع ويكتبلك العلاج

الزلمة گال عجل انت مو تبيع علاج للناس

قادر بستهزاء هههههه عمي مالكيت غير نزار جيت علية هذا شفهمو مدري شلون تخرج يمكن بالغش والواسطات

بربكم بدينكم ترضون هاي حجايتو
وصلت بي يشكك بشهادتي

قادر... لاتأكل تبن تدري بية جنت اتشاقى

.... زلمة مريض وجاعد يسألني برأيك هذا.وكت شقاك

نجوى... نزار يحجي بگلب محروك وقادر مامهتم مصر على موقفو يگول اني ماغلطان جنت اتشاقى
الكل لامو قادر وحجو علية  ضاج ترك الربعة وطلع

فيروز... شاهر العصر يلا وضعو صار، احسن بدل وطلع ا
الحو بالبيت متكهرب.
الحية گعدت من النوم فاتت للمطبخ تعلف
جدة ضغطها وسكرها صعدن اخذوها للمستشفى للمغرب جابوها

ثاني يوم من ولت ايات للدوام ماما وخالاتي مسحن البيت بالملح والخل وشغلن قرآن

شاهر عاند مايقبل السيد يرجع يقرأ علية شكثر حجو علية ماكو فايدة

عمو ابو قادر گال اني اجيب السيد وغصب عنو نخلي يقرأ

نجوى...  گاعد احجي ويا نزار بالتلفون ساعة وحدة ونص باليل
سمعت حس بالصالة ادري بابا ينام اهناك. كمت فتحت شوي من الباب دحجت ايات گاعدة بالگاع يم رجل بابا لابسة ثوب قصير ربع ردان وفاكة الشعر ومكياج
وبابا بيدو قمجي النرگيلة يدخن

ظليت فاكة عيني مذهولة بدون ما احس على حالي سديت الخط بوجه نزار
ركزت اريد اسمع شگاعد تحجي

أيات... كافي شاهر ابوس ايدك ورجلك ارحمني صبرت جثير وتحملت جثير ماظل عندي صبر شوكت تحس بية وترحم بحالي احبك والله احبك من اول يوم جيت بي هين وكعت بحبك

.... حدري جوة وبطلي هاي السوالف مو حلوة گعدت هين بهذا منظرج

.. لا شو ما اتحرك شاهر راضية بكلشي مستعدة اصير خدامة تحت مداسك بس انطيني امل
والله راضية انزل على ضرة ماراح اسوي وياها مشاكل حتى لو هي تعيل بية المهم ننجمع اني وياك وتصير زلمتي وتاج راسي وسندي

.. ول يابة الثگل حلو جاعد اكولج روحي من هين

.نجوى...شو هاي كامت من الكاع كعدت بسدو وحضنتو
منظر مقرف ابوية الجبل الرزن ضعف جدام اغراها باستو وصار يبادلها البوسة غمضت عيني
حتى مافكر بفيروز الي غرفتها جدامو
لو طلعت وشافت شراح يصير بيها

فكيت عيني ايات جرت بابا من ايدو وحدرو جوة يمشي وياها بدون وعي

طلعت اركض دحجت فاتو الغرفتها
ظليت اكمز بمكاني ما اعرف شسوي لو شعمل

ماعندي غير حل ركضت الغرفة فيروز طبيت لكيتها نايمة وسيف بسدها
هزيتها قوي جفلت

   بسم الله رعبتيني شبلاج عليش تبجين

.. اريد احجي اريد انطق ما اكدر

... يولي حاجيني مو يبس دمي
.... ايات جت اخذت بابا وفاتو الغرفتها.
حجبت الكلام بسرعة تا ما اتراجع..

... فكيت عيني وحلگي دفعت نجوى وطلعت اركض
ردت انجبح على وجهي من الدرج نار شابة بية
وصلت للغرفة لزمت يدت الباب مقفولة.
والله لو ميتة ولا هذا الموقف الأني بي
دكيت الباب بأثنين ايدي واني اصرخ من كل گلبي شششششششاهر.......
  
يتبع