_وشاء الحب_
( بقلم بسمة البياتي)
_البارت السادس و الثلاثون _
بالحظة قهر وغضب حجيتها
هذا هو عمة اذا اهلي موافقين اني هم ماعندي اعتراض ...
العيون علية مستغربين موافقتي بهاي السرعة
ما كدرت اظل گاعدة هم من الاحراج وهم من القهر تركتهم وخشيت الغرفتي
ثواني وجني ماما وعمة ابتسام وفيروز
ابتسام.. بالحرام مو مصدكة تعالي احضنج واحبج يولي
... عمة ظلت تبوس بية
ماما مكيفة بس فيروز ادحج علية بستفهام
ابتسام... ما اريد انطول
ان شاء الله بعطلة نصف السنة نسوي العرس
..لا عمة ما اكدر صح وافقت بس مو معناتو بهالسرعة
ماكو زواج اذا ما اكمل هاي السنة ما اريد التهي ولاتنسين هذيج السنة تركت لأزم اعوض واشد حيلي
وثاني شي اريد فترة خطوبة تا اتعود على نزار صح هو دوم جدامي بس كلامنا قليل وحاسبتو مثل اخوية
اذا ماتكدرون تنتظرون براحتكم
... ننتظرج العمر كولو ولا يهمج هذا هو هساع بس خطوبة وعقد والزواج على العطلة الجبيرة اذا الله راد
اصيل... بالمبارك عليج بنيتي اذا تروحين يم ابتسام اطمئن عليج لان ادري بيها شكثر تحبج
ونزار درة لايگين واحد للاخر
... ساكتة. وأهز براسي راسمة ابتسامة جذابية على وجهي
طلعوا وجت فيروز گابلتني
.. احجيلي من الأخير شنو الخلاج تغيرين رأيج وتوافقين اكص ايدي من هين اذا ما تطلع ورة موافقتج سالفة
.... فتحت التلفون طلعت الرسالة وخليتها بوجه فيروز هاج اقري
ششرايد مني عليش گاعد يهددني
بالقرآن تعبت من هالسالفة ياهو الجاي مستقوي علية لان فقيرة وما اكدر ادفع عن حالي
مو مزوج مو حرمتو حبلة عليش مايهتم بيها ويتركني أشوف حياتي
يولي دحجتي الأنكسار بنظرات سمر شنو ذنبها ويعاملها بهذا البرود.
.... قريت الرسالة تعصبت ونقهرت بنفس الوكت
ادري بي عاشكها وتصرفاتو مو بوعيو
وصعب الي ياخذها ابن خالتو وقريب منو
كلام نجوى هم صح حرمتو شنو ذنبها مابيها اي قصور عليش مايخاف الله بيها
سمر هم يتيمة
مات ابوها وهي بعمر الثلاث سنوات مالحكت تشبع من حنانو وتحفظ ملامحو
نجوى اني وياج قادر غلطان ومالو حق يهددج
بس هذا زواج مو لعب جهال
مو مال تاحذين هيجي قرار مصيري بحزة غضب وانفعال
... موبيدي گلبي احترك ومالكيت جدامي غير هالحل تا أنساه واخلي ينساني
... ونزار.
..شبي نزار
... مافكرتي بي هو شنو ذنبو تأخذينو تا تنسين قادر بي بلكي مانسيتي شراح تسووين
فكري عدل بقرارج دام الموضوع بعدو بأولو
.... نصيت راسي ودموعي وكعن على خدي ما اكدر اتراجع صعب
هذيج النوبة وافقت على قادر وبعدين رفضت
هساع شيگولون علية اذا اسويها بنزار هم
ما اريد اخلي بابا بموقف محرج ويا خواتو الكبار
ادعيلي الله يدحج الحالي ومايخليني اتندم على قراري
... حضنتها وبجيت وياها
الله يسعدج ويوفقج اذكر جدة حسنة من درت بية احب ابوج دعتلي دعوة حلوة بس بداخلي رفضتها
گالت اذا شاهر مو من قسمتج الله يمسح على گلبج وگلبو ويشيل هالحب من گلوبكم
تبات نار وتصبح رماد وان شاء الله تطفى هالنار ومايظل منها اثر
... ياربي واني ما رايدة شي غير اطلع من گلبو ويطلع من گلبي
... طلعت من غرفة نجوى گبل لا افوت الغرفتي سمعت حس بجي جوة
مديت راسي دحجت حسن واكف
يول شصاير هين حس منو هذا
... سمر مدري شبلاها جت تبجي وهساع هي ويا جدة
طلعوا شاهر ونجوى من الغرف حدرنا
جوة سمر حاضنة جدة وغاصة بالبجي
ماما بيدها كلاص المي تريدها تشرب وتهدء
شاهر... شبيها سمر عليش جاعد تبجي
نعيمة.. والله يمة ما ادري يمكن متكاونة ويا قادر من جت بس تبجي وتريد مني اخابر امها تا تجي باجر تاخذها
شاهر.. بنيتي اهدي شوي وفهمينا. شبلاج شمفين هالملعون وياج
نجوى...واكفة على طرف ايدي على گلبي خايفة لا اني سبب كونتهم اوووف يسويها حظي الفاين
سمر... الله عليكم خابروا امي تا تجي تاخذني ماعدت اتحمل العيشة هين تعبت من المشاكل مارايدني ويكرهني خما اظل طول عمري باقية عندو گوة
شاهر... ميخالف اخابرلج امج واذا تريدين اني اخذج بنفسي للرمادي بس بالأول فهميني عليش تكاونتو
... بروح ابوي ماسويت شي تاخر بالطبة على البيت طلعت للحوش تا اشوفو بالباب لو لا
من فات وشافني گلب الدنيا علية زگح وفشار من دافعت عن حالي
وجاعدة احلقلو طلعت علمودو لان تاخر
بدون تفاهم ضربني لوما عامر فكني من ايدو يمكن حتى الجاهل يوگع
فيروز...شاهر ترك الربعة لحگتو
كضبتو من اكف وين رايح
.. وخري فيروز طبي جوة ومعليج
... شنو معلية غير افهم وين رايح
.... اربي ذاك السا..... وانعل ساس اهلو
..زلمة وحرمتو احنا شعلينا ترى زايدة منه ندخل بينهم
.... جاعد اكولج وخررري من جدامي لاتزهگيني
أصيل... خوية استهدي بالرحمن وين رايح
اكيد اهلو ماراح يقصرون ويا
... شلون أظل ساكت واني اعرف البي وعليش خلى قهروا بهالمسكينة صبرت علية جثير وما عدت اتحمل اذا مايصيرلو درس راح يتمادى
.... ميخالف هالنوبة عديها
لاتخلي اختك الجببرة تاخذ على خاطرها منك
فيروز... شاهر بالگوة اقتنع تركنا وصعد للغرفة
اجتي خالة احلام ويا عامر رادت تاخذ سمر ماقبلت تروح
جدة كالتلها تركيها الليلة عدنا وباجر يحلها الحلال لاتخافين مانخليها تحجي ويا اهلها
خالة احلام تطمنت وراحت
نجوى... سمر كومي وياي الغرفتي تاترتاحين
حجت وياي بدون ماتصد علية
... ما اريد راح اظل هين يم خالة
نجوى... لحيت عليها جثير بالگوة قبلت تصعد وياي
اخذتها الغرفتي فرشتلها فاتت للفراش
اريد احاجيها بس مترددة
فاتت فيروز تا تطمن عليها
استغليت وجود فيروز وحجيت
سمر ادري بيج تعبانة والوكت متأخر مو مال سوالف بس عندي سؤال واريد تجاوبيني علية
... شنو هو
.... عليش مو طايقتني وبالگوة تحاجيني هم بيوم صدر مني شي ضوجج
... لا ابد
... عجل شبلاج
.... اعرف مو ذنبج بس موبيدي غصب عني اغار منج واحسدج
.... تحسديني؟!
... اي لان قادر يحبج اتمنى لو نظرة منو مثل ما ينظرلج لو كلمة وحدة تطلع من گلبو مو مجاملة وواجب
هم شايفة هيج شي اني حرمتو احسدج انتي
... سمر بالقرآن مابينا شي ولا بيوم انطيتو امل رادني ورفضت وانتهت السالفة
.... ادري بروح ابوي ادري بس شسوي فهميني
لو انتي بمكاني وبنفس موقفي شراح تسوين زلمتج يحب غيرج متلوع بحبها
حتى لو هي مالها ذنب هم راح تحسدينها وتغارين منها ويمكن حتى تكرهينها
فيروز... صافنة عليهن الله لايخلي وحدة بموقفهن اثنينهن
سمر.... تدرين قادر گبل لا اجي تكاون ويا نزار
... شنوو عليش تكاون
.. اكيد من نار الغيرة
طلعت للحوش سمعت حسهم بالباب قادر ونزار وعامر وابن عمهم
قادر ظل يستفز بنزار وذاك ساكت
بس فادر زودها يطلع سوالف من جوة الگاع تا يغثو
... حقدت على قادر مو مكفي العاملو بهالمسكينة انوب صد على نزار هساع صرت متاكدة قرار موافقتي على الخطوبة عين العقل
فيروز ... سمر بعد جم شهر من تجيبين بسلامة قادر بس يشوف الجاهل يتغير وينسى الأول وتالي ونجوى راح تنخطب خما تظل عينو على عرض ابن خالتو تهدي بالرحمن وانطي فرصة اخيرة بلكي ينصلح حالو
..... لشوكت اظل انطي فرص من زواجنا الهذا اليوم صابرة ومتحملة
يولن والله حالي مثل حال غراض الغرفة
مايحاجيني غير وكت اليريد مني شي من اقل كلمة يتعصب ويزگح
حتى من يريد يتقرب مني بس وكت الغريزتو تحكمو تعبت ماعدت اتحمل عليش مجاعد تفهموني
...فاهمتج والله حگج ومقدرة الأنتي بي
گاعد اكولج انطي فرصة اخيرة الخاطر البطنج
واذا ظل نفس حالو انعل امو وابو الي يعتب عليج اذا تركتي
... اوووف الله كريم
نجوى.. لاتضوجين مني والله العظيم ما احب اشوفج بهالحال ولا رايدة كل هذا الگاعد يصير بيج
...يولي والله ما اكرهج بس الغيرة من تشعل الگلب معد نگدر نتحكم بحالنة
فيروز.. صح اسألي مجرب من اغار اصير زومبي براس الزلمة
يلا كافي سهر تصبحون على خير
.... وانتي من اهلو
ثاني يوم اجة قادر وابو وخالة رجعوا سمر
هاي الأيام التهينا بتحضيرات العقد والخطوبة مال نجوى
نجوى...مگاعد افهم الأني بي رفض خوف رهبة عقدة الطفولة من غير وجع گلبي
كلهن مجموعات بية
اروح واجي وياهم بدون روح ماكو سعادة بداخلي
طلعنا اخذنا الذهب بالبداية شيشوفني اكول بكيفكم
اخير شي عمة ضاجت گالت هو منو الراح يلبسهن احنا لو انتي
خجلت منها وشلون ماجان اختاريت
وطلعنا اخذت فستان ومستلزمات المهر
نعيمة... وليدي راح تنطي خبر البيت جدها وخوالها تا يحضرون لو لا
... لوبيدي فلا اخليهم يوصلون العتبة بيتي
بس الخاطر نجوى راح اخابر جدها وابلغو
... اي زين تسوي مانريد مشاكل وياهم اذا بعدين يسمعون مخطوبة وماكايليهم بصيرون هما اصحاب الحق ومانخلص من حجيهم
نجوى... بابا خابر جدي بلغوا گال ان شاء الله نجي
اليوم المشية
گعدت من النوم مختنكة والهم جاتلني
فيروز... صباح العسل هم زين گاعدة يلا گومي غسلي وتريگي فد شوي تجي عليج رنا تأخذج للصالون
... صباح النور
والله مالها لأزمة روحتي للصالون قابل عرس ومخبوصين. جنت اكدر ارتب حالي هين
... الله عليج فكيها عاد لاتظلين گالبة الخلقة
يولي خالة فرحانة لا تكسرين فرحتها بوليدها الجبير
... نزلن دموعي موبيدي خايفة
.. من شنو خايفة
.. من كلشي
من الماضي من قرار ارتباطي المفاجئ من مشاعري القديمة اتجاه قادر
خايفة لا اظلم نزار وهو مايستاهل
...الصار بالماضي الف نوبة گوتلج انسي وكانو ماصاير
... الحجي سهل ذكريات الطفولة المرة مو بسهولة تنمحي
... كلشي يروح ويا الزمن بس انتي لاتظلين تفكرين بي
اما مشاعرج القادر متأكدة من تعاشرين نزار وتتعلقين بي راح تنسين قادر
... ان شاء الله ادعيلي محتاجة للدعاء
.. الله يريح بالج ويسهل امورج حبيبتي
اجتي رنا اخذت نجوى للصالون
شاهر من گعد من النوم اعصاب ويزگح على اقل شي
بدو الگرابة يجون صعدت ابدل وارتب حالي
شاهر... هاي وينج ادري ماتگولين هذا الزلمة شمحتاج ما محتاج
ملابسي وين
... همممم مصارلك عشر دقايق من صعدت وملابسك هذن مكويات ومعلگات بعد على شنو هالعصبية گاعد تگاون حالك اهدى حبيبي
... فيروز احجي عدل لا أگص لسانج شنو مخبل وأكاون حالي.
... جريت نفس جيت گعدت بحضنو وعلگت ايدي بركبتو
حبيبي ترى فاهم السالفة بالمگلوبي
نجوى اليوم مشيتها مو عرسها بعد جثير للعرس
وحتى من تتزوج ماتروح بعيد كلها مسافة زغيرة بينا وبينهم
... من هسة شلت هم لفراگها ما اكدر اتخيل اطب للبيت وهي مابي
.. هاي سنة الحياة عجل خما تريدها تظل طول العمر هين
لازم تتعود يمكن البطني هم بنية واكيد يجي يوم تتزوج وتروح
...شاهر ببتسامة
جاعد ترفعين معنوياتي لو تكأبيني بالاكثر يولي
... من شنو تكأبت اذا تجيك بنية لو لان تتزوج
... ماحبيت هالحجاية من ثمج
تدرين بية شكثر احب البنوات وشيجي من الله نعمة وفضل المهم الخلقة الكاملة والعافية
... متأكدة نعومة تضوج ههههههههه
... معليج بيها
بنية وتشبهج ونفس خبالج يا محلاتها
... احبك ول يابة
... اعشگج واعشگ تفاصيلج ول يابة
...باسني قوي ولزك عرفت اذا ما اتلحك حالي السالفة مراح تنختم بس بالبوسة
بالكوة وخرت منو
حبيبي ترى ماظل وكت گوم بدل الزلم على جية
.... صوجج منو گالج كعدي بحضني وتحارشي بية ماكو طلعة من هين اذا ماترضين زلمتج ودللينو
...يمعود گول غيرها والله جدة اذا درت تحبسني بغرفتها
... وشعليج بجدتج عليج بزلمتج وبس
راح تظلين تحجين شو تعالي
من يجي يمي شاهر اظل ايدي على گلبي اهجس باي لحظة جدة تفتح باب الكنتور وتطلع
مسويتلي رعب هالنعامة ههههههه
... رايح اسبح احضري ملابسي بسرعة تاخرت
... والله يا شاهر اذا جدة عرفت وحجت علية شي اكولها روحي على ابنج المايگعد راحة.
...هههههههه اي ميخالف ترى دخلتي بالرابع عليش هالخوف بعد
... گول الأمك هالكلام لاتكولو الي
تركني وهو يضحك
كملنا وحدرنا البيت انگلب
ورة شوي جابو نجوى من الصالون
صلوات على النبي لعابة
خالة ابتسام حسها راح من الهلاهل
جيت يمها يولي شطالعة وين جنتي ضامة كل هالحسن والجمال
.... كافي لاتخجليني ترى من گاعي خجلانة
... ههههه عليش تخجلين ترى بس عقد ماراح يگضبج من ايدج وياخذج للغرفة بالجثير تحصلين منو بوسة مو اكثر
عالية...فان حظج خالي مطلع عينج
يمكن بخطوبتج شعبتي بوس واحنا غافلين
يولي گاعد اتگولج خجلانة عليش تخوفيها
... ليش اكو افقر مني ومن خالج
يابوس يحظي هو تزوجنا واشهر احنا ماتجمعنا غير البوسة الأخوية
رنا. وشلون صايرة هاي البوسة الأخوية
... من خدي لو راسي واذا راد يشد حيلو ويتوكح ييوسني من رگبتي
عالية... ههههههه وهساع تعديتو هاي المرحلة
.. لا أستغفر الله مو عيب ليش احنا شكول
هالشغلات
رنا... بركاتج شيخة فيروز عجل هاي بطنج منين جتي
.... قولون خيتي قولون
نجوى... شكثر جنت خجلانة بس سوالف فيروز خلتني انسى الخجل وانطلقت بالحجي
شنو بابا بطل يسولفلج على قيس وليلى
... هههههههههههه لو ظالة خجلانة احسن
شذكرج يا محمحمة
لا گلبي هساع اطورنا انتقلنا للقصص العالمية روميو وجوليت وغيرها
رنا... بربج شنو سالفة قيس وليلى
.... مو وكتها بعدين احجيها الكم امشو النسوان گاعد يتانون نجوى
اخذنا نجوى وطلعنا كعدت بالربعة
نجوى.. البنات مختارات فستان جثير مشلح
هم زين ويا شال تا استر حالي
جدة گالت غطوها وجيبوها تا يگطعون مهر
لفلفوني بثوب الصلاة واخذوني العند باب الأستقبال
بد الشيخ يعقدلنا گلبي يريد يكف من سرعة دكاتو رجلي غدن خيوط
گضبت ايد ماما قوي تا ما اگع
طلب موافقتي اريد انطقها ما اكدر حسي اختفى
بالنوبة الثانية يلا انطيت الموافقة
هلاهل وهوسات واني منصية راسي
مدري ليش بگلبي غصة شكبرها
رجعت المكاني وبدت الحفلة
البنات شغلن اغاني وگعدن يرگصن
رادن يگومني وكفت بالجذب وياهن تالي رجعت المكاني
فيروز گاعدة بسدي ممنوع تتحرك وهاي اوامر جدة
نور... شيلي هذا الشال مخرب موديل الفستان
... گضبتو قوي شنو لا ما اريد مرتاحة هيج
ابنسام... تركيها على راحتها
راح يفوت نزار يلبسها الذهب
... من سمعت اسمو گضبتني الراجفة
ظليت منصية راسي
فات نزار والهلاهل ملت الربعة من الخجل والخوف اريدلي مكان اختل بي
جة گعد بسدي مادحجت علية
قرب راسو مني وحجة بحس ناصي
.... رفعي راسج بنت خالي خليني امتع نظري بنعمة الله وادحج على هالحسن
...هذا منو معقولة نزار الثگيل ولا گاعد اعرفو
اذا جنت خجلانة قاط من حجة هيج خجلت قوط
فيروز... خف عليها امرؤ القيس مو گاعد تشوفها غدت طماطة
. انعل يومج حتى بهاي اللحظة هم الگيج جدامي بغلات خالي فارجينا خليني اشوف دربي
.. دربك اخضر ومتروس ورد ابن خالتي
يعني حبكت الا بهالحزة تشوف دربك وامة لا أله الا الله كلها هين
... هههههههه عمي سكتت
ابتسام.. يول مو وكت سوللف لبسها الذهب
نجوى.. اخذ ايدي ولبسني الحلقة وباسها
وأخيراً كدرت ارفع راسي وادحج علية
لابس قاط والشعر مصفف بطريقة ليكتلو نزار وسيم ومتاكدة جثير بنات حاسداتني علية
بس للأسف ما املك اي مشاعر اتجاهو غير هو ابن عمتي وبس
اخذت الحلقة لبستو
ولبسني باقي الذهب وباسني من راسي
جدامنا كيكة گصيناها ولازم اشبك ايدي بيدو وتأكل مرسيم وحركات هدت حيلي من كثر الخجل اهجس راح افقد الوعي
نزار... يمة شتگولين دام صارت حرمتي هساع اگضب ايدها واخذها واروح
ابتسام... يولو ابني الثگيل استخف
اكعد راحة لا تطفر البنية من اول يوم
فيروز... اول نوبة اشوف نزار فرحان ومنطلق بالسوالف بالگوة قبل يتركها ويطلع
ورة ما خلصت الحفلة استاذن من شاهر تا ياخذها يگصون صور شاهر كال عادي
البنات وياهم
نجوى رادتني اروح وياها ما كدرت تعبانة وبنفس الوكت خلگي ضايق
ايات طول الحفلة گاعدة بين النسوان وعاملة حالها من صدك حرمة شاهر
صعدت الغرفتي مدلغمة وما اتحاجى
فات شاهر گال طلعيلي غير هالملابس اريد اطلع
... مو گاعد اتشوفني تعبانة طلع انت
.... شنو هذا الأسلوب
كولي تعبانة عليش هذا النتر بالحجي
... شاهر اجفى شري مطايقة حالي مو عاد انت
... خير ان شاء الله وشنو السبب المخليج مو طايقة حالج
.. ماكو سبب من كيفي تخبلت عندك اعتراض
... اذا على الخبال هالشي مو جديد
اريد سبب ثاني طلعي البگلبج گبل لا اروح
... شششوكت اخلص من الحية ماعدت اكدر اتحمل راح اطك واموت وخطيتي بركبتكم گاعدة مثل الأميرة بين النسوان عود هي حرمتك
... واني اظل اعيد بنفس الموال
بنيتي حبيبتي بعد روحي معليج بيها تركيها يطبها طوب كلها فترة وتولي من هين الجهنم وبئس المصير لاتبقين يومية غاثة حالج بسبب حشرة مثلها
... موبيدي والله مو بيدي عليش مگاعد تفهمني.
... فاهمج وحاس بيج اليوجع گلبج ويغثو يوجعني
ماعدنا غير الصبر الخاطري تحملي
.. سكتت قابل شريد اكول
نجوى.. فوك خجل اللقطات الأخذهن وياي انوب مجلب بيدي مايرضى يتركها
من رجعنا بالگوة راح البيتهم
من اليوم دخل نزار الحياتي يتصل بكل وكت
يومية يجي وجايب اشگال الوان اكولو مامحتاجة
يگول ميخالف دام صرتي على ذمتي هساع انتي مسؤولة مني
نوبات اذا عندي مادة صعبة يگعد هو يشرحلي
بديت اتعود علية مو حب انما تفاهم وانسجام
قادر اووف يا قادر من يوم خطبتي بيتنا مافاتو
حتى بالمشية ماحضر تحجج بالشغل
بيوم مشيتي جدي وخوالي الوسطاني والزغير جايين وره ماخلصان العقد طالعين
البقية محد جة لا جدة ولا خوالي الكبار ولا خالاتي
هما من موتت عمران گطعو صلتهم بية فدنوب
والحمد لله مو بحاجتهم اهلي مكفيين وموفين
فيروز...هم راح تتاخر مثل كل يوم
.... ما ادري انتي نامي لاتظلين جاعدة اتانيني وتضوجيني منج
... هااا هساع صرت اضوجك موو
شششاهر شبلاك منتبه على حالك وعلى معاملتك الي شششبيك فهمني شنو المغيرك علية
.... اهوووو بدت رحمة الله اروح من هين جثير احسن
... لا شو ماتطلع گبل ماتفهمني
... فيروززز اجفي الشر وولي من جدامي لاتخليني اطلع جنوني عليج وامد ايدي
.... جفلت من حسو تركني وطلع
شبعت بجي
نجوى...عادي افوت
... ماجاوبتها مسحت دموعي
... شبيج بعد عمري عليش گاعد تبجين وحس بابا ليش عالي
.... تعبت نجوى ما عدت اكدر اتحمل ابوج متغير كلمة مايطيق مني واقل شي يزكح يولي لو ما حبلة حتى ضرب يضربني
.... خاف تعبان اكو شي مضايقو گعدي وسالي بهدوء بدل الحس العالي والعصبية
.... الف نوبة حجيت وسألت وماكو جواب يبرد گلبي يولي حتى بوجهي مايدحج
ابد مو هذا شاهر القديم عبالك مبدلينو بغير واحد
.... كعدت ابرر وانطي اعذار وبداخلي الومو بابا فعلاً متغير وما اعرف شنو السبب
مر يومين ووضعهم متكهرب
وحسهم دوم عالي
اليوم الظهر گاعدة بغرفتي
سمعت حس صراخ جوة البيت انگلب كمزت من مكاني وطلعت اركض...
يتبع
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!