رواية وشاء الحب الفصل الثاني والأربعون 42 - بقلم بسمة البياتي

_وشاء الحب_
( بقلم بسمة البياتي)
_البارت التاسع  و الثلاثون   _

.. فكيت عيني وحلگي دفعت نجوى وطلعت اركض
ردت انجبح على وجهي من الدرج نار شابة بية
وصلت للغرفة لزمت يدت الباب مقفولة.
والله لو ميتة ولا هذا الموقف الأني بي
دكيت الباب بأثنين ايدي واني اصرخ من كل گلبي شششششششاهر

صراخي يوصل السابع جار مثل صراخ وحدة مفجوعة بعزيز گلبها

نجوى... الكل گعدو على حسها
عمة امنة وجدة طلعن يتراكضن من الغرفة

فيروز...شاهر فتح الباب گلبي راد يوكف من منظرو بالسروال الداخلي والفانيلة وأيات اخ ايات بالفراش و تعدل بثوبها القصير
رجعت اصرخ بدون وعي راد يسد حلكي تخبلت

شاهر.... اششش فضحتينا مصار شي لاتتخبلين خلي نصعد ونتفاهم

.... غلطت غلط يمكن بحياتي ماتصورت اغلطو عليه
شاهر ابوي الرباني حبيبي الحبيتو بالفطرة فكيت عيني على حبو صارلي سند وامان 
أبو ابني ثمرة عشگنا الجان يگول ماكو شي بالدنيا يگدر يشيل حبج من گلبي

أبن الكلب وخرررر لاتگضبني مامسوي شي مووو وانت بغرفتها وبفراشها انصاص الليالي
با ناقص الغيرة يا عديم الشرف
اتگول على أبوها طلي يول طلعت انت الطلي يا عارررررر

نجوى... اجتي ماما وبابا نافع على العكازة لان نازع الرجل
الكل واكفين بمكانهم مصدومين فيروز لابت روحها
بابا بالاول يريد بس يسكتها
من غلطت عليخ تخبل گضبها من شعرها
ماما وحسن وعمة امنة فكوها من ايدو

نافع.... ااااااخ لو ما هذا حالي جان شوفتك شلون تضربها گدامي
اشكد جنت جبير بعيني
وهسة أنت والماكو سوة شاهر الرزن الي يخاف الله يزني لوما شايفك بعيني ماجان صدكت

.... الحايط يجاوب بابا مايجاوب
ماما وعمة يجرن بفيروز وترجع تهد

.... ولكم هدونيييييي  مو راح اموووت
زلمتي  بغرفة ويا سا.. ومقفول عليهم الباب شششتريدون اسوي
من كثر ما روحي مفرفحة فكيت حالي من ايدهن
وركضت على الكح.... عود صايرة شريفة خاتلة جوة الغطا تاتستر حالها جريتها من شعرها وكعتها من الجرباية للگاع
ضربتها ضرب من گلب مفرفح وغادي نار
شالوني شيل من فوكاها
تعبت ونهد حيلي نزلت للكاع الطم على خدي

امنة... يولي كافي مو گلبج راح يگف

.... ياريتو يگف وارتاح خالة بالغرفة ومقفول عليهم الباب طلعلي بالملابس الداخلية ويگول ماسويت شي
راح اتخبل معد اتحمل گولولي شسوي احجو شي بردو بي گلبي المعلوك

أصيل... امشي وياي اذا ماخليتو يحفة عليج فلا اتسمى امج
كل دمعة ولوعة لعتيها أطلع حيفها من عيونو

نجوى... بابا فات للربعة
جدة الهساع بس ادحج بعيونها
گضبتها من ايدها
جدة بيج شي عليش ساكتة

حجت بصوت تعباني سنديني تا افوت رجلي مجاعد تعيني على المشي
طبينا للربعة. جدة گعدت بالجهة الأخرى مقابيل بابا
ماما وبابا نافع اخذوا فيروز الذاك البيت

امنة... مو هاي المرجية منك خوية مجاعد اصدك العيب والحرام يطلع منك انت

شاهر... ول يرحم اهلج سكتي مو ناقص
واذا هذا الجاتلكم  العيب والحرام اطمئنو قررت اعقد عليها وتصير حرمتي حالها حال فيروز

... خوووية شبلاك الخاطر الله اصحى على حالك جاعد ادمر حياتك ومو داري

نعيمة.... جلمة جاوبني عليها اخذت الماتتسمى؟

. . لا
.. هاا عجل عليش تريد تعقد عليها

...گلبي هواها وحتى لا أگع بالحرام ازوجها هذا احسن حل
زواجي منها ماراح يأثر على فيروز ولا راح اقصر وياها بشي حرمة ما تأكل حرمة

... يعني مخطط ومقرر واحنا لأزم نرضى مو
.. حياتي مو حياتكم مو زغير تا آخذ الأذن منكم

.... صح مو زغير زلمة طول بعرض الناس تحلف برأسو يخاف الله ومايگرب للحرام
أسمع هالحجاية وليدي بيوم التعقد على هالكح... لا انت أبني ولا اعرفك ومتبرية منك اليوم الدين

... يييييمة لاتكفريني حياتي مالكم شششغل بيها

نجوى... جدة بالگوة تحجي لونها تغير وصارت بالگوة تجر النفس
جينا يمها نحجي وياها لسانها ثگيل وماتگدر تفك عينها

شاهر....يمة فكي عينج جاعد تسمعيني
امنة تهيري صاعد ابدل تا نأخذها للمستشفى

... بابا صعد يبدل
جدة بالگوة حجت گالت ماتحرك ويا شاهر منا الهين

امنة.. يمه مو وكت عناد دحجي حالج
... بروح أهلي ما اطلع ويا
امنة... ول نجوى خابري نزار بلجي جاعد

... اي هسة
التلفون بجيب التراكسود طلعتو بي جثير مكالمات من نزار
دكيت علية ثواني وجاوب من حسو مبين جان نايم

نزار... هلا حبيبي عليش گبل شوي سديتي دكيت عليج ومجاوبتي

... نزار تعال البيتنا جدة تخربطت ومگاعد تقبل بابا ياخذها للمستشفى

... شششبيها هساع جاي
... بابا نزل مبدل راد يشيلها خلت يمين علية مايگضبها

امنة.... جاجينا نزار راح يجي هو ياخذها

.. عليششش خابرتو يمة الخاطر الكائنات كووومي عليش تعاندين بصحتج

... جدة گامت ماتكدر تجاوب
اجة نزار وعمة ابتسام وعمو
مايدرون شكو التهو بجدة
نزار قاس الضغط والسكر معلگات

نزار.... خلي ناخذها بسرعة للمستشفى وضعها يخوف مو مال تظل بالبيت
على السريع اخذوها وراحو وبابا وياهم
ايات السكط قفلت بابا الغرفة عليها عود خايفة الشريفة

سمعت سيف يبجي يبوو نسينا الطفل باقي الحالو بالغرفة  صعدت جبتو
رحت الذاك البيت فيروز بحضن ماما بجيها يگطع الگلب

فيروزة سيف گاعد يبجي خطية

...   ما اريدو وخري من جدامي ما أريد اي شي يربطني بشاهر حتى ابنو ما أريدو

اصيل... الطفل شنو ذنبو على كيفج ويا حالج راح يصيبج شي

... مگاعد أكدر انسى شكلهم اااااخ گلبي راح يطك من الوجع

نجوى... دموعي تنزل وياها ماما اشرتلي اخذ سيف واطلع

رجعت گعدت بالربعة الهم جتلني منا حال فيروز ومنا وضع جدة ومنا تصرفات بابا
عجل فيروز لو تدري يريد يزوج ايات شتسوي من صدك گلبها يطك

للفجر وهما ماراجعين خابرت نزار گال
هم زين لحكنة عليها لوما ستر الله تضربها جلطة

ساعة خمسة الصبح طلعوها من المستشفى
فوتوها للربعة نامت
نزار راح البيتهم بس ظلت عمة ابتسام

اصيل... جيت حبيت رأس امي بعد عمري شلونج هساع

....على الله
فيروز شلونها

... نفس حالها تسكت شوي وترجع تصرخ مثل المخبلة والله خايفة عليها

ابتسام... شصاير وشبيها فيروز؟!

... شنو امنة ماحجتلج على سواية اخوج السبع

امنة... التهينا بامي واذا انتوا ماتحجون ما اكدر أكول شي

ابتسام... مو وكت هالحجي فهموني شصاير وشنو الضامينو علية

.... نايمين صحينا على صراخ فيروز جينا لكينها ادك باب غرفة ايات
من انفتحت الباب شاهر جدامنا بالهدوم التحتانية
والگ... بالفراش

.... عززززا العزززاني يولي گولي غيرها لا مو معقول شاهر يسويها

... كفيلج الله سواها وبعينا شفنا
وهساع فيروز حالها يصعب على الكافر

نعيمة... ما اريد الحجي يطلع من هين مو ناقصين فضايح اذا طلع الحجي برا غصب عنو لأزم يزوجها

امنة.. مو جدامج گال راح اعقد عليها وتصير حالها حال فيروز

اصيل...شششنو شوكت گال هالحجي
.. گبل لاتتخربط امي

... بروح ابوي اذا سواها لحظة ما ابقيها على ذمتو

أبتسام... الس.. وين؟!
... بالغرفة قافلة على حالها الباب

...  نجوى... الوجه الصبح يلا نامن ماما وجدة وعماتي

سيف يمي گعد يدور لعب شلتو وحدرت افتر بي جوة
طبيت للمطبخ ايات مبدلة تريد تروح للدوام واكفة تسوي ريوك ولا مهتمة بالصار شبيت من القهر

يا گواة عينج علگتي الدنيا وهساع واكفة ولا عبالك مسوية شي وگاعدة تعلفين

... لا طولين لسانج ولاتدخلين بشي مايخصج ابوج يحبني ورايدني عليش ضايجين فيروز يوم يومين وترضى بالأمر الواقع

... عشم ابليس بالجنة تاخذينو
بعيني شفتج شلون زتيتي حالج علية تتوسلين وتبوسين الرجلين وتغرينو كلمة سا.. .  قلبلة بحقج
عود معلمة وتربين اجيال نصيحة بالأول علمي حالج الأدب والاخلاق الفاقدتهم

ششاهر... نجوى ششششنو هالحجي

.  صديت علية
العفو بابا ماحاجية شي غلط

...امشششي فوتي وحسابج بعدين

.... تخبلت شجرالو بحياتو مامحاجيني هيج
لمعن الدموع بعيني تركتهم ومشيت
وكفت بسد الحايط اريد اسمع شراح يحجون

ايات...جاعد ترضى بالسوو بية مابقو كلمة ما حجوها علية والخاطرك ساكتة ومتحملة

... روحي ظلي بيت عمج بين مايهدى الوضع والگي حل

... ايات بدموع تريد تتخلى عني ليش شاهر شسويت وتريدني اترك البيت

... جاعد أگلج ظلي جم يوم ما گتلج تركي البيت من تهدي النفوس اعقد عليج وتنحل السالفة

....ياعمري هذا عشمي بيك ادري بيك زلمة گدها وكلمتك وحدة غديتلك فدوة

نجوى... بابا زودها مو شوي جثير راح يخسر حتى حالو علمودها هساع شسوي بهاي المصيبة ياربي حلها

فيروز.. . احساس الخيانة صعب والمصيبة من اقرب الناس الي غلاتو من غلات روحي وأزود  أريد صورتهم تروح من بالي ثواني تا اكدر اغمض لكن هيهات انوشمت بعقلي صعب تنمحي

كرهتو وكرهت حالي وكرهت أبني
اختنكت ظليت افتر بالغرفة تالي ماتحملت گرفصت بالگاع خليت ايدي على رأسي وبقيت أصرخ

نجوى...سوينا الريوك علمود جدة وگعدنا وياها بلكي تأكل
سمعنا صراخ فيروز
من الخوف ماعرفنا شلون وصلنا للغرفة
لگينها بالگاع تبجي وتصرخ

اصيل.... نزلت للگاع حضنتها بس يبعد عافية أمج حسبي الله عليج يا أيات عساها بعافيتج

ابتسام... اصيل مو وكت هالحجي هساع گوميها من الگاع

فيروز.... اريد انسسسسسى منظرهم گولولي شششلون خاني جدامي ششسويتلو بشنو قصرت ويا تا هيج يجازيني حبيتو حب اكثر من حب جدة الو مستعدة افدي بعمري
خالة گوليلي وينو غلطي يجوز غلطانة ومادارية على حالي احجو وريحوني

ابتسام.... الغلط مو منج ومابيج اي قصور
الله ينتقم منها
ياما بيوت عمرنا نهجمت من امثالها خلي عينج بعين الله يبرد گلبج ويأخذ حگج منها

.... لا تكولون مسسسحر ومايدري بحالو لاتزتون اللوم عليها وطلعونو مظلوم ياسحر هذا الي يخلي ينسى أخلاقو ودينو
شششاهر لو ما راغبها مايضعف جدامها
لطمت على خدودي. بعد ما أريدوو
شششاهر دمرني شاهر جتلني بيدو

نجوى.. ماما گضبت ايدها خدودها صارن دم
من البجي والصراخ حسها طمس معد ينسمع
عجل لوتدري يريد يزوجها شتسوي

عمة ابتسام گعدت يم رأس فيروز تقرأ قرآن الحد ما من التعب نامت
رجعنا للربعة
نعيمة.. هاا يمة شلونها

امنة... الله يساعد گلبها منو بينا تتحمل الصابها

ابتسام... السيد شوكت يكمل علاج شاهر لاطولون ابنج جاعد يتخبل بالزايد

... اليوم اخلي أحلام تحاجي ابو قادر تا يجيبو

... اي ستعجلي لاتظلين ساكتة
   المصيبة شاهر معاند مايقبل يقرأ علية
....غصب عنو مو كيفو والله لو منج اخلي الولد يربطونو تا يرقي

... الله كريم

اصيل.. الظهر فات نافع الغرفة ضايج
... شلون صارت فيروز
... على الله
.... راح ادور بيت نطلع منا وفيروز ويانة ما ابقيها اهنا

... بكيفك الي تشوفو مناسب سوي اني من أيدك هاي الايدك هاي
اروح اصبلك الغدة واجيبو هين

... اي احسن ما اريد اطلع منا

نجوى... بابا ما اجة على الغدة
سيف يبجي خبلني اني وعمة امنة حايرين بي
اليوم حتى دوام ما داومت

الورة الظهر فات بابا
اجة گعد بسد جدة راد يبوس رأسها منعتو

شاهر.... شلون صرتي
.... ما عليك مني
...ول يرحم اهلج كافي الگيها منج لو من نافع الي يريد يترك البيت

... گرت عينك راح نطشر بسبب الحية
... يمة ايات راح تصير حرمتي مايصير تظلين تحجين عليها اذا مو الخاطرها الخاطري

...دحج يابن بطني
بيوم التعقد عليها وتصير على ذمتك تنسى امك
وتراب ابوك اتركلك البيت والحد ما اموت ما اخليك تندل دربي
وگبلها اجمع العشيرة وأصيح الحشا منك جدامهم كلهم
وحتى فيروز اني الأسعى بطلاگها منك

....گبل جنتي گالت فيروز وعملت فيروز وهساع صارت عزيزة

.... اليسمعك يگول اكرها
فيروز حفيدتي ربت جدامي غلاتها من غلات نجوى من احجي عليها مو معناها اكرها
يول اصحى لاتخلي الشيطان يلعب بيك
ارجع  شاهر الأولي گبل لاتخسر اعز ناسك واولهم امك وحرمتك الربيتها على أيدك ونافع اخوك وصديقك واصيل اخيتك العايشة بسدك الي ادحج عليك مثل ما جانت ادحج على ابوك الله يرحمو

دحج وليدي گدامك خيارين ياتختارنا يا تختارها
وبعد بكيفك
اذكر تعبي عليك تذكر خوفي وحبي الك فضلتك على حالي
وجهك مرآيتي من تضوج اضوج ومن تفرح الدنيا ماتسعني
لاتجازي تالي تعبي وكسرة ظهري بالنكران وتصد وتنطيني ظهرك

....بابا ظل ساكت عافها وگام
معقولة حجي جدة ما اثر بي
هساع تآكدت بابا حالتو صعبة وملعوب بحالو لعب

ثاني يوم اجة السيد تا يقرأ علية
من گعد يرتل بالأيات بابا ماتحمل ترك السيد وطلع وبعدها عاند مايقبل يخلي يقرأ

فيروز تمرضت نايمة بالفرأش ساكتة وماتحجي وفجأة تظل تصرخ وتلطم وتصيح مگاعد يروحون من بالي راح اموت
سيف تاخذو شوي الحضنها ومن تتعب تنطينيا ماعدها قابلية حتى لوليدها

محد يدري بالسالفة غير عماتي 
جدة توسلت بابا نافع تا مايترك البيت
گالتلو بس ظل هالمدة بين مايتعالج واذا ظل على نفس حالو محد يلومك اذا اخذت اهل بيت وطلعت

بابا نافع انقهر على جدة ماحب يكسر خاطرها خصوصا هالايام صحتها تعبانة ودوم ضغطها وسكرها مرتفعات
لوما نزار مخلي بالو عليها وهو ملتزم بعلاجها يمكن تسوء حالتها بالأزود

طبيت الغرفة فيروز گاعدة و بحضنها سيوفي
شلون الحلوة اليوم

.... تنهدت الحمد لله
... يولي عليش ماتگومين اساعدج تسبحين دحجي شعرج شغادي حالو مكفوش

...حتى للسبح مابية حيل اهجس ماظلي واهس الشي ولوما سيف اظل ليل ونهار ادعي على حالي بالموت

... اششش ديربالج تعيديها
الله يحفظج الي والسبف والكل الناس التحبج
يلا دام سيف نايم كومي واني اسبحج بيدي وامشطلج شعرج

بالگوة اخذتها للحمام حيل مابيها سبحتها بيدي
وبالگوة فكيت شعرها
الي يشوف حالها ولايصدك هاي نفسها فيروز المرحة الي تضحك للهوا
ودوم تهتم بحالها وشكلها
هساع حتى سبح مابيها حيل تسبح
بابا وايات دمروها

تركتها بالغرفة وطلعت تا اجيبلها اكل
لكيت ماما وعماتي مخبوصات

هاا هاي شكو

امنة... السيد گال بخرو البيت وامسحو بالخل وانطانة ماي قرآن نخلي بالبراد تا شاهر يشرب منو بدون مايدري

.. هااا خير ان شاء الله

من كام بابا يشرب من الماي ودوم نشغل قرآن
بحس ناصي ويسمعو يتخبل
وجع راسو زاد وعصبيتو صارت تخوف
نوبات من يسمع سيف يبجي لو بيدو يضربو
تخبل
قادر ظل ويا حتى يبات هين خاف بابا يتخربط فجأة
السيد بين كل خمس ايام يجي يقرأ علية بالغصب

مر شهر كامل على هذا الوضع وماكو تغيير
  بابا حالتو زادت مانقصت تعب وتمرض نام بالفراش

فيروز ماتطلع من ذاك البيت ووضعها مو اخير منو
ومن تجي سيرتو جدامها تتخبل
حتى من درت مريض ماهتمت بالسانها كلمة وحدة شاهر انتهى بالنسبة الي

اليوم گعد شوي حالتو احسن
نعيمة... شلونك وليدي خما شي يوجعك

... مابية شي
... عليش مبدل ارتاح ولاتعب حالك

... يعني شلون اظل حابس حالي مثل النسوان تاترتاحون

...براحتك لاتضوج هساع شحجيت وتعصبت

قادر... يمة لاتخافين علية وليدج مثل ااحصان
السبع لو يأكل بي شهر مايخلص لحمو

.... فان حظك دحج على خشمك لاتحسدو

.... هههههههه خشمي زغير مايبين

شاهر... يلا كوم اختنكت من گعدة البيت
.قادر..امرك رجلي مو تدلل شعندي غيرك

... يول بطلهن مالي خلك سوالفك
.... سكتت يلا امشي

اصيل.... الظهر واكفة ويا امنة بالمطبخ نهير الغدة
فاتت ايات للمطبخ

.... السلام عليكم
امنة... عساج لاسلمتي

اصيل... والله عمي صلفة وبزود جاية هين وواكفة جدامنا

.... ماجاية من كيفي شاهر گالي تعالي

امنة... ارجعي منين ماجيتي گبل لا اخلي دمج بطولج

... هدي حبيبتي لايطگلج عرج العصبية مو زينة عليج
ابو البيت گال تعالي شنو تريدون تكسرون كلامو عدكم حجي گولو الشاهر مو الي

اصيل... بنت الكلب وتراددين بعد ولو عادي كلشي اتوقع ومن وحدة سا.. مثلج

... ما اجاوبكم اخلي شاهر هو يحجي

...اخر نوبة أكولج اطلعي من هين
... اعذريني حبيبتي ما أكدر اطلع بعد شوي شاهر يجيب الشيخ تا يعقدلنا.......

يتبع