_وشاء الحب_
( بقلم بسمة البياتي)
_البارت الثامن و العشرون _
... انصدمت من طلبو
ايات رافعة الحاجب وتبتسم بحقارة
ششنو اعتذر بابا من كل عقلو گاعد يحجي
... يلا فيروز مو جاي احجي وياج لاتبقين واكفة مثل خراعة الخضرة
.. لو اموت ما اطخ راسي الها
ردت احجي واهد الأول والتالي
شاهر.. ماكو زعل بين الخوات
وايات جبيرة وعاقلة ماتزعل من اختها الزغيرة مو صح خيتي
.... هاا اي صح
... يلا فيروز امشي ساعدي امج بالعشا
..... شاهر اكثر واحد يفهمني يمكن قرأ البعيني عرف لو تنگلب الدنيا ما اعتذر
طلعت بسرعة طبيت للمشتمل صعدت الغرفتي القديمة
بجيت مقهورة حتى لو ما خلاني اعتذر منها يبقى هو السبب بالصار راح جابها غصب عني
خلاها تشيخ وتحسب حالها ملكة
نجوى... شنو هالخبال شو سويتها صدك وجيتي هين
.. عجل عبالج اتشاقى يولي ابوج كسر خشمي ورجعها ما راح اسامحو ابد
.... لاتكولين هيج دحجتي شلون ما قبل تعتذرين منها ما تحمل يشوفج تنذلين
.. شنو الفايدة وهو الذلني
.... يعني راح تظلين هين
... اي
... اووف من عنادج
اروح اجيب العشا تا نتعشى سوة
... ما اريد
.. مو كيفج غصب عنج
الظاهر اني هم راح اتنقل هين وياج فاين حظي من وراج يومية بمكان مثل ام البزازين ههههه
... ولي من جدامي مو وكت خفت دمج
...گبل لا انصب العشا بابا سألني على فيروز
كوتلو راحت الذاك البيت ما حجى شي تركنة وطلع برا
فيروزة هم ماقبلت تأكل خشت بالفراش ونامت
فيروز... كعدت من النوم
ظليت بفراشي ما حدرت جوة مو طايقة احجي ويا اي واحد بيهم
عدا نجوى وماما
رنا.. هلا هلا الأميرة النائمة شوكت ناوية تكوم من الفراش
... شجابج
... رجلي ونعالي
... ماتضحك
... اي ادري هساع گوليلي عليش مكشرة وجاية هين مو عندج غرفة لو حنيتي الأيام العزوبية
... هذيج الغرفة خلي خالج يشبع بيها ويجيب حرمة جديدة
.... عجل راح ادورلو وحدة جديدة خما تريدين اعوف خالي المسكين يحضن المخدة وينام
... لا مايحتاج ادورين أيات موجودة تكفي وتوفي
... اشكد ثولة
فاينة الحظ بهذا تصرفج جاعد تنطينها مجال تتقرب منو وترمي شباكها علية
لو منج اظل هناك جاعد على خوانيگها وبنت ابوها التگرب منو
... هه انتي شگاعد تحجين هو منو يگدر يدوسلها على طرف الكل يصيرون ضدج ويطبگون وياها واولهم شاهر
... تصرفج جان غلط امنعيها تگرب منو حاسبيها لاتخليها تخدمو مو تگومين تطردينها وتخلينها تطلع هي المظلومة
... اوووف ما أدري كلشي ما ادري
نجوى... طبيت بيدي صينة الريوگ اي خاتون راح تتركين لو مثل العشا مثل ما جبتو رجعتو
.... گعدت تريكت وياهن عليش جاتلة روحي من الجوع وللقهر الخاطرهم
طبن ماما وخالة ابتسام مامرتاحة الجمعتهن وراهن سين وجيم
بالبداية استلمتني رزايل على نصايح واني قافلة
رجعة الغرفتي ما ارجع
ابتسام... أجة وكتها ولأزم تسولفين وشحدج اتجذبين بكلمة
... يا ساتر صار بيها تهديد
.... شاهر ماخذج لو لا؟!
.... وين يأخذني
.رنا...دحجو البراءة نغة نغة
ابتسام.... وكلام الله ما اتركج اليوم اذا ماتحجين
.... هسساع انتوا شعليكم بهالسالفة ترى والله ميصير هذا شي خاص بينا ياخذني ماياخذني حياتنا وحرين بيها
نجوى.. . اروح اكمل شغلي
.
... كعدي لج عود استحيتي
وانتي وياها تجتلن وتدفنن سوة
..... غمضت عيني قوي ادري ماراح اخلص منهن اذا ما احجي
لا مصار شي
كون هساع يرتاح فضولكم
ابتسام...صارلكم اشهر تضحكون علينا عليش اتزوجتو اذا هذا حالكم
... عليش ماتفهمون علينا وتقدرون وضعنا
ترى الشغلة مو بهالسهولة مثل ما انتوا متصورين
ماما ساكتة الدموعها تجري
شبيج عليش تبجين
أصيل.... شكثر حجيت واشكثر توسلت محد سمع مني عرفت هاي الزواجة فاشلة وبنبتي راح ينكسر بختها اااخ منك نافع
يولي مو گوتلج اذا ما تريدينو معليج بيهم مستعدةاكف وياج حتى لو ببتي بنهجم
ابتسام.... صلي على النبي خيتي هساع انتي شفهمتي ونصبتيها مناحة
.... شفهم اكثر من هذا زلمة هو الرباها وبحسبة ابوها
عرفت ماراح تگدر تتقبلو
... انقهرت على ماما الظاهر فهمت السالفة بالمگلوبي عبالها رافضتو لان مو متقبلة زواجي منو
هي من گاعها خربانة خلي احجي المضموم وشيصير خلي يصير
ماما ترى فهمتيني غلط
دحجي راح احجيلج سالفة
وعديني ماتتعصبين
ابتسام... ههههههه ما يلوگلج دور الفقيرة الي تخاف من خيالها ترى احنا انخاف من لسانج يمثبورة
... ترى ابطل ما احجي
اصيل... احجي ولاتظلين تعلين گلبي
....صح اني رفصتو من خطبني بس مو لان ما اريدو
.. عجل ليش؟!
... مقهورة منو
.. اي وبعدين
... هي غير تطلع من حلكي السالفة اهجسها عاصية بلاعيمي
.... شليتني مو بصينية الريوك على راسج
... ادري شطلع راسي من فولاذ شتشوفين حدامج تريدين تضربينو براسي
.. يبوووو وتالي
.. لا تالي ولا ثالث
من عمري ١٤ سنة احب اخوج
حجبت الكلمة وخليت المخدة على وجهي خاف تجيني كفخة طايرة
خالة جرت الطخدة من وجهي
ماما فاكة عينها مصدومة
ابتسام.... مگصوفة الرگبة احجي عاد يا حب قصدج
.... لا ادحجون علية هيج ترى هساع هو زلمتي
بوكتها مراهقة وحلى بعيني غصب عني مشاعري تبدلت اتجاهو
رنا... يمة هاي منو ولا اعرفها زين وهو يدري لو لا
.... من راد يخطب الحية الأولى تهاني تخبلت مدري شلون وكفت جدامو وحجيتها
اصيل... اهجس گلبي گام يوجعني اني وين عن كل هذا الصاير معقولة اني ام فاشلة وماهتميت بجهالي
ابتسام... شاهر شگال
.... يعني شيكول تخبل جتلني جتلة من هاي التعجبج
وحتى اصحى على حالي واطلعوا من بالي راح خطب وتزوج
وبحزتها بقيت يم جدة الله يرحمها
من رديت شاهر احوالو متغيرة
للأمانة مايوم حسسني هو رايدني والدليل قبلت انخطب الأشرف لان عبالي مايريدني
ومن اجة خطبني صارت السالفة مثل الغصب انقهرت منو بالزايد ورفضتو
ابتسام... اذا تحبي ويحبج عليش لساعو ما مگرب منج
... صح احبة ويحبني بس يبقى الماضي بيني وبينو
مو بسهولة نعيش عادي
احجي وعيني على ماما مصدومة
عافتنا وطلعت من الغرفة خالة لحكتها
نجوى... انگص راسج على هالجرئ العندج
... احسن خلي. يعرفون
ما اريد ماما تبقى تلوم بحالها عبالها زواجي من شاهر ظلم الي
رنا... صدك تنصدمت
اذا هالكثر تحبي عليش جاعد تنطين فرصة الأيات تخرب بينكم وتاخذوا منج
.... اجضعت وابتسامة على وجهي
اتحداها وارفعلها القبعة اذا كدرت تأخذ مكاني من گلبو
... يولي الثقة الزايدة والغرور نوبات يعمن على صاحبهن خليج فطنة ولاتعوفين كلشي للحظ
.... منو يگولج اعوفة
هساع زعلانة لان ضربني ورجعها من انسى الزعل عود يحلها الحلال
... بالحرام ولا جاعد افهم عليها
... احسن
اصيل... خشيت للغرفة الهساع صافنة ومصدمة منو هاي التوهة جانت تحجي معقولة بنيتي المحاوطتها مثل ظلي
.... هااا يولي شو جيتي هين
... سمعتي شحجت بنتي عشگت الزلمة الرباها البحسبة خالها
فهميني اني وين عنها شلون ما حسيت بيها
اي صح وضعها تغير تمرضت ودوم ضايجة
شلون ما شكيت هذا وضعها سببو الحب
اني ام فاشلة ومو بعيد حتى نجوى ورغد عدهن أسرار ما اعرفهن
... مراهقة وعقلها زغير اكو جثير نفس حالها
نجوى ورغد شعليهن
تربيتج احسن تربية
الصار بين شاهر وفيروز مقدر ومكتوب
لان هي قسمتو
يولي المثل فيروز بالحرام ماينخاف منها
البگلبها على لسانها تحجي الي الها والي عليها
حتى بيوم الحاسة بمشاعرها راحت اعترفت لا خافت من ردت فعلو ولا فكرت بعواقبها
وهساع جدامنا حجت رغم جانت تكدر تحتفظ بهالسر الحالها
تامحد ياخذ عليها نظرة
لاتزعلين منها الحمدلله ماصار بينهم شي يغضب الله واتزوجو بالحلال
فيروز... ماما زعلت مني حاولت احجي وياها ماتقبل تحاجيني
انعزلت بالغرفة ذاك البيت ما افوتة.
نجوى من تخلص شغل تجي يمي ونوبات بنات خالاتي يجن
شاهر تاركني حتى ما كلف حالو يجي يراضيني
ايات ظالة تسرح وتمرح بكيفها. الغيرة اكلتني أكل وكرامتي ماتسمحلي اتنازل.
نجوى... تلفوني من يوم الحادث مقفول
بابا نوبة سألني عليش غالقة تلفونج
كوتلو جدة من تخابر تظل تقنعني تا اخذ عمران واني مليت من هالسالفة.
.
وفعلاً هي بالبداية حاولت جثير تقنعني من تشوف خطي مسدود ادك على ماما تا تحجي وياي
ونوبة عمران اخذوا منها ورجع هددني تا اقبل بي
اليوم باليل گبل لا اروح للغرفة
وكفت بالمطبخ اسوي جاي وبتيتة تا نأكل اني وفيروز طفيت الطباخ
شلت الصينية وصلت الباب المطبخ دحجت ايات صعدت فوك
عزززا بعينها هاي شتفين فوك بهاليل وبابا وحدو وادري بي بهالحزة يكعد بالصالة يشرب نركيلة
عفت الصينية من ايدي وصعد يواش.
سمعت حسها تحجي ويا وتتنعوص
... ادري بيك جاعد ماتنام هالحزة جيت احجي وياك
... عليش ما اجلتيها للصبح من احدر
... هاا الصبح لأزم اطلع للدوام من وكت وين الحك اشوفك
... اي خيتي شنو سالفتج
... بخصوص حرمتك من يوم الرديت وهي ضايجة مني وما تحاجيني
والله مامسويتلها شي عليش هالكثر تكرهني
.... تكاونتو انتي وياها نوبة اخرى
. هااا لا بس تصرفاتها العدوانية واضحة انجاهي
اني طبعي ما احب المشاكل الهذا السبب جيت وگولتلك ادري بيك ماترضى بالغلط
... الي اعرفو فيروز مجاعد تفوت هين شوكت صار كل هذا
. . هااا انت اكثر وكتك مو هين شمدريك باليصير
نجوى... عززززا بعين الخلفها شوف الجذب
صعدت بسرعة صرت بنص الصالة ايات وجها صوفر
شاهر... هلا بنيتي
... هلو بابا
خير ايات شو هين
ماكو شي حبيبتي جنا ندردش وهساع احدر انام
.... هااا اي خوش بعد من عندج سالفة صيحي وحدة منا تصعد وياج
...هااا اي خوش تصبحون على خير
.... صديت على بابا يبتسم.
... خبالات فيروز منتقلات الج
... ترى سمعت حجيها والله العظيم جذابة فيروز صارلها خمس ايام مفايتة هين
...ادري بنيتي مايحتاج اتكولين
.. عجل اذا تدري عليش مبقيها ماتطردها
... ما ظل شي وترجع الأهلها مجبورين نتحملها هالفترة
من تحدرين نبهيها بعد لا تصعد هين
.... ماشي
.... فيروز شلونها
... ههههههه راح اطك وتالي من صدك تجي تكفش ايات ويمكن تجتلها بالجفجفير مثل الگبلها
ابتسم وگال الله يهديها.
حدرت جوة طبيت للغرفة آيات بعدها مانايمة
اكولج حبي ترى مايصير تصعدين بهالحزة وانتي تدرين بي وحدو
بابا نوبات ياخذ راحتو مايتقيد بالملابس
هذا الطابق خاصي بي وبفيروز.
.... شدعواج قابل شسويت عندي سالفة حجيتها وحدرت خما انگلبت الدنيا
... ههههههه اي سمعت سالفتج
هزيت ايدي وطلعت ما حجيت الفيروز ادري بيها راح تتخبل
فيروز.... بالتواسيل يلا ماما قبلت تحجي وياي
خالاتي من يجن يجبرني افوت الذاك البيت بس وكت اليريد يجي شاهر ارجع للمشتمل
ايات من تشوفني تتعمد تحسسني هذا بيتها ماخذة راحتها
بالگوة گاضبة حالي تا ما اموتها.
نعيمة... لشوكت تظلين عايفة وليدي
من وراج رجع يتأخر باليل
... شعلية بي
.... عليش تخليني اكسر خشمج العالي واجيب التترس حضنو وأنتي ظلي بزعلج
... هاي انتي وذاك ابنج يلا روحي زوجي
... هااا مو خايفة.
... لا
..خوش
.... ههههه تعصبت ضربتني بالريمونت وكامت.
اني وشاهر صرنا نتلاگة
لا احجي ويا ولا يحجي وياي
عمو عمر زلمة خالة امنة مسوي عملية استئصال المرارة
وحالتو تعبانة. تهيرنا تا نروح للرمادي . وهالنوبة الكل يجون
خالاتي وأزواجهن وبابا والولد
الوحيدين الي يظلون شاهر وعامر ابن خالة احلام
ما كدرو يتركون الشغل
الجهال اخذولهم اجازة اسبوع
تهيرت تا اروح وياهم .
ايات من سمعت شاهر يظل لو بيدها تظل ويا
جدة وخالاتي گالن روحي البيت عمج بين مانرد
شاهر.. اصيل گوليلي الفيروز ماكو روحة وياكم تظل هين
.. خوية اتت تطلع للشغل وين يرهم تتركها الحالها وتدري بيها اجبن من اسماعيل ياسين
... حرمة عامر هم باقية من اطلع للشغل تجي يمها
... هاا خوش هساع اكوللها
فيروز... لا ماما شنو اظل هين مشتاگة الخالة والبنات اخوج مو يدري بية متحضرة عليش هساع رفض
.... ما ادري عندج اعترض روحيلو لا توجعين راسي
نجوى... اشم بالسالفة ريحة غيرة اكيد مايردج تشوفين اشرف
... اهوووو هساع وكت غيرة اشرف خطب وعاش حياتو السالفة انتهت وراحت
اصيل...مثل ما حضرتج تغارين من ايات أكيد هو هم يغار ويجوز من تجين ويانة ايات ماترتاح بيت عمها وتجي تظل هين..
... هاااا والله عاد اتسويها قابل ما ادري بيها
يلا ميخالف ابفى بس كوليلو لا يحجي وياي
نجوى. اني وماما خربانة ضحك عليها بس سمعت باسم ايات بطلت
تهيرنا تا من الصبح نطلع
محد گال الايات فيروز راح تبقى تا تلزك يمهم
وعاد هي وفيروز شلون متفهمات ووحدة تحب الأخرى اذا بقن وحدهن يمكن وحدة تطعن الاخرى بالسجينة
المغرب اجة ابن عمها اخذها
واحنا من الصبح طلعنا للرمادي
قادر ويانة ما ادري شلون راح اتحمل ادحج على. طولو بدون ما گلبي يوجعني
فيروز... جت هبة يمي تا ما اظل وحدي عدها بنية عمرها سنة ترست علينا البيت بضحكها وحركاتها
هبة.. بعدج ماتتحاجين ويا خالي شاهر
.. لا
...مو اكول وكت الغدا ساكتين محد يحجي
... اي هيج احسن
.. ههههه اتشوف لشوكت تظلون هيج
.... صار اليل جوي ولد عم شاهر يتعللون اهنا.
عامر كل شوي يجي ياخذ صينية جاي
الحد ما راحوا
عامر وهبة اخذوا بنتهم طلعوا
جلبت بهبة ما قبلت كالت ما نرتاح بالنومة اذا مو بفراشنا.
شاهر راح يقفل البوب واني طبيت جوة
حايرة وين راح انام مستحيل اصعد ويا فوك
ولا اكدر انام وحدي اخاف
خشيت الغرفة جدة جبت غطا من النضدة. اخذتهن للربعة
خليتلو بطانية ومخدة
رحت للجهة الأخرى نمت وتغطيت مسافة جبيرة بينا.
اشو هذا دحج للفراش بتك عين
دار راسة تركني وصعد
عزززا بس لا يعوفني انام الحالي
بقيت انتظر هساع يحدر هساع يحن وهو ماكو
ايست بقيت الضوا معلوگ .
دكيت على نجوى تا التهي وياها بلكي الوكت يمشي.
تلفونها مقفول اووف منها تفتحو خمس دقايق وتسدو
من الخوف اهجس اذا النملة فاتت من يمي اسمع حسها
شاهر.. بطلي عناد وامشي فوك اريد انطمر ورأية گعدة من الصبح.
... جفلت من حسو بسم الله شبلاك خوفتني
... اعذريني نسيت ادك باب الربعة گبل لا افوت تا ماتجفلين
يلا كومي بالحرام اذا رجعت صعدت بعد ماعلية بيج
... تعال نام هين مو حطيتلك فراش
.... الصبر ياربي
ما اكدر اغير مكاني تجين لو اروح
...ابد مو مال اعاند وادور كرامة
كمت من الفراش اريد اخذ البطانية
كال شسوين بيها..
اتغطى يعني شسوي لا عبالك راح اصعد معناها رضيت بس شسوي مجبورة
. ههههههه أستغفر الله
محد گايلج ارضي اكو بطانيات جثير فوك
... تفشلت صعد گبلي
طب للفراش نام
طلعت غطا ونمت بطارف الجرباية. اووف الحمدلله هساع اكدر انام مرتاحة
عابتلة حتى ما حاول يراضيني بسيطة شاهر
الصبح حس شاهر يگعدني بالگوة فكيت عيني
هااا شتريد
... كومي سويلي ريوك
... ساعة بيش
.... سبعة ونص
...شهكت يا ظالم من هساع مگعدني ارجع نام بعد وكت غمضت وغطيت راسي
... ول يابة لأزم اطلع من وكت الولد مو هين تا هما يروحون گبلي
..... اوووف كمت بكسل
حدرت جوة
خليت القوري على النار وفرشت بالمطبخ
اجة شاهر شعل الصوبة وگعد
..طلعت اجبان وبيض وادري بي ماياكلهن
.. سويلي مخلمة
.. وهاي شلون تصير
... ماتعرفين
. اعرف اكلها بس ما اعرف شلون يطبخوها
... عجل شتعرفين
.. كلشي ما اعرف
.... لا اكو سالفة شاطرة بيها
شنو هي
الوكاحة وطولت اللسان
... مجاوبتو ظل يعلمني سويتها الو هو يحب وياها لحم مثروم كملتها وخليتها جدامو
... هساع حسيت بفراغ اصيل
...اي طبعاً مدللتكم خبز حار واشكال تكعد تسوي من الصبح
انجضعت جدام الصوبة
.... شبلاج تعلمي منها
... عاجبني اظل هيج
اندكت الباب كام فتحها طبو هبة وعامر
هبة. جبتلك خبز حار
... عاشت ايدج بنيتي
... عامر كعد ويا شاهر ياكل من ثاني لكمة طلع الأكل من حلكو
... هاي منو مسويها
.... اني قابل خالك سواها
....اول نوبة اشوف البيضة تنطك ويا كشرها
ادري ياخالي شلون جاعد تاكل
.... كلشي من ايدها ينوكل
.....دصير مثل شاهر اكل وانت ساكت نعسانة موزين ما خليتلكم شكر بدال الملح
.... حشا نعمة الله ماتنكال يولي.
هبة....ههههههه اكيد ثاني نوبة تتعلم
تركوها اسوي غيرها
.... عامر ظل يصنف صاير دهري مثل قادر
شلت حنين بنتهم ظليت اعضعض بخدوها
كملوا ريوك وطلعو بقينا وحدنا والنهار مشى عادي وباليل هم جوي ولد عمو يتعللون
نجوى.... گاعدين بيت خالة امنة نتريك تا ورة الريوك نروح البيت اخو جدة معزومين يمهم
وباجر نروح البيت جدة صفية
احلام...يمة شتگولين خالة صفية تنطي سمر لو لا
... عليش ما تنطي وين تلكي احسن من قادر هي من گبل تتمناه الوحدة من بنواتها
نجوى. جيت اغص باللكمة لو ما ستر الله نصيت راسي تامحد يحس بالصار بية
هساع فهمت عليش قادر وابو جوي يريد يخطب
شسوي وين انطي وجهي شلون راح اتحمل اوووف من حظي الفاين
بقيت طول اليوم مختنكة
جدامهم اضحك ومن الكي مكان فارغ تنزل دموعي
ثالث يوم رحنا البيت جدة صفية تمنيت
ما اصل ولا اشوف بيتهم
استقبلونة الكل ملمومين حتى ولدها وبنواتها الكبار الظاهر عدهم علم بالسالفة
ورة الغدا گبل لا ينفتح الموضوع جنت گاعد بسد نور
من بين الكل قادر رفع عينو ودحج علية
مدري عيون منو البينا تتوسل بالأخر
هو يطلب فرصة واني اطلب مايصير الغيري
طالت نظرتة سوة حركة بوجهو معناها اكو امل
والله الصار بية بحزتها مايعلم بي غير الله
نار وشبت بگلبي وبين ضلوعي.......
يتبع
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!