رواية وشاء الحب الفصل الثاني والثلاثون 32 - بقلم بسمة البياتي

_وشاء الحب_
( بقلم بسمة البياتي)
_البارت التاسع  و العشرون   _

من بين الكل قادر رفع عينو ودحج عليه
مدري عيون منو البينا تتوسل بالأخر
هو يطلب فرصة واني اطلب مايصير الغيري

طالت نظرتة سوة حركة بوجهو معناها اكو امل
والله الصار بية بحزتها مايعلم بي غير الله
نار وشبت بگلبي وبين ضلوعي.

تريد امل واني حتى بعيشتي ما عندي أمل
الجدامك اذا لبست البدلة البيضة
بنفس الثوب تتجفن وتندفن

ذنبي الوحيد بهاي الدنيا ماغندي ذنب
طفلة وجار عليها الوكت وكعت بيدي المايخاف الله  ذيب تجرد من الأنسانة لان بكل بساطة هو مو انسان

نهضت من مكاني طلعت بدون ما اصد على احد
طبيت للمطيخ ادور الهوا
ماتحملت طلعت للحوش اتنفس سريع
وادعي الله ينطي القوة والصبر تا مايخليني اضعف جدامهم

رنا... يولي فوتي الجو بارد والشباب طابين طللعين

.... جريت نفس طويل
اي اجيت
رحت ويا البنات الغرفتهن
ورة ربع ساعة فاتت جدة صفية وماما وعماتي
جت عين عمة احلام بعيني نصيت راسي

گعدوا يحجون ويا سمر ويأخذون رأيها

صفية... هااا بنتي شگولتي مو مال تبقين تفكرين الجماعة مستعجلين وقادر ماتلكين احسن منو

سمر. هاا بكيفكم

احلام... كللوشششش الله يتمم على. خير ويجعلها زواجة الدهر وان شاء الله مانقصر وياج ونخليج بعيونة

صفية... مايحتاج اتكولين ندري بيكم گول وفعل

... الله يحفظج خالة
ابو قادر يريد اليوم يگطعون مهر سيد شنو رايكم
.. براحتكم هي بنتكم التشوفو مناسب سوو

.نجوى.. كل هذا الگاعد يصير جدامي
اتمنى اتبخر واختفي من هين تا ما اشوف شي ولا اتعذب
كلشي صار سريع اسرع من البرق
جة السيد گطعلهم مهر
واتفقوا العرس بداية العطلة لان سمر طالبة

طلعت روحي وانهد حيلي الحد ماخلص الوكت ورجعنا البيت عمة أمنة
قادر بعد ما شفتو ولا اريد اشوفو
كل الي اتمنى هساع يجي وكت النوم تا اخش بفراشي واطلع الحسرة الكاتمتها بگلبي

فيروز...  المغرب من رجعوا شاهر وعامر

عامر... اليوم قادر خطب وگطع مهر

هبة...بالمبارك عليه
العصر دكيت عليهم تا اسأل محد جاوب

... اي مشغولين

فيروز... اكف شگاعد تحجي يا خطبة؟!

....لا تكولين ماتدرين اليوم مشو القادر

... اشو اني ما ادري محد حاجيلي  احجي منو خطب

..هي الشغلة صايرة بسرعة محد يدري.
من رايحين البيت خالة صفية خاطبين بنتها سمر

... ظليت فاكة حلكي وصافنة
عجل مو يحب نجوى شنو التغير

وهو شلون يخطب ويگطع مهر وانتوا ماحاضرين

... عادي هي بس مشية خما عرس الموجودين يسدون بمكانة المهم انفكت الجبسة وراح يتزوج

.... هاا اي بالخير عليه
شاهر تلفونو ما وكع من ايدو كل شوية واحد يدك
صبينا العشا نفسي ماتريد
اريدهم يخلصون تا اصعد فوك احجي ويا نجوى
گلبي يگولي نجوى تريدو بس عليش رفضتو هو هذا المحيرني

شلنا المواعين
خما ولد عمك اليوم هم يجون يتعللون

.... واذا جوي بشنو ضارتج جيتهم

... لا يابوي بشنو تضرني بس انظل محبوسات بالمطبخ نصب بستكاين الجاي ومانلحك

.عامر....متعاجزة من استكان الجاي عجل اشكثر نادرة
اطمني محد يجي يروحون للكوفي

... اي حسن خفتاً وراحة

راحو هبة وعامر
صعدت للغرفة گضبت التلفون دكيت على نجوى
مغلق اوووف شلتني هالبنية عليش تغلق الصخام ما ادري

دكيت على ماما سلمت عليها.
سالتها على نجوى گالت گبل شوي فاتت للغرفة يمكن نامت

شوفيها اذا گاعدة انطيها التلفون تا احجي وياها

نجوى.... خشيت للفراش البنات يمي مدري شوكت يطفن الضوة وينامن

جت ماما بيدها التلفون گالت هاج فيروز تريدج

هلا فيروزة

.... من صوتها عرفت البيها مجربة هالأحساس گبلها
هلا بعد عمري يولي مو گوتلج لاتقفلين تلفونج

.... مابي شحن
... شلونج
... الحمدلله
....منو يمج
.. البنات بفراشهن

....شبي صوتج يبعد احتج

.... ياريتها ما سألتني هالسؤال غطيت راسي وخليت ايدي على حلكي ودموعي جرن

....ادري بيها گاعد تبجي ماتحملت بجيت وياها خلي تفرغ البگلبها احسن ماتظل كاتمة

اكثر من عشر دقايق ظلينا على هالحال
همست وعد نجوى من تجين غصب عنج راح اعرف شنو البيج

ابجي هساع براحتج
ومن يصبح الصبح اياج تنزلين دمعة جدام احد لاتخلين احد يشوف ضعفج خصوصاً انتي الرفضتي

.... ما اكدر اجاوبها دموعي بللن وجهي والمخدة سديت الخط
عضيت طرف ثوبي وبجيت من كل گلبي

فيروز... فات شاهر انصدم بحالي ظل واكف
يدحج عليه مسحت دموعي وصديت راسي

.... منو وياج
... محد
.. عجل عليش جاعد تبجين

... معليك بيه
.... لازم طبگن الفيوزات بهاليل

... گعد قريب مني راح يسحبني الحضنو
دفعت ايدو

.... ههههههه كل هالدموع لان زعلانة مني
.... لا طبعآ
..عجل شبيج

.... انجضع خلة ايدو جوة راسو وصفن عليه ينتظر جواب

قادر مو جان يريد نجوى عليش خطب سمر.

....اذا ابتلي بيج بهاليل هم يجي كلب ابن كلب يلومني مگطعة حالج من البجي الهذا. السبب

... اي اني ايدو ياخذ نجوى عليششش أخذ غيرها عليشششش هو مو...

ردت اجفص واكول يحبها مدري شلون تلحكت حالي عزززا بعيني هذا ابوها شگاعد اخربط اني

...بكيفج وتريدنو الها
رادها وما صارت القسمة وابوج الله يرحمو
كفي دموعج ومعليج بهالسالفة
سمر مو غريبة اتمنيلهم الخير.

... هساع اني شحجيت
قابل متمنيتلهم الشر لو داعية عليهم
گوتلك حبيت يصير من قسمة نجوى هو خوش زلمة وهي فقيرة لايگين البعض
تدري بية شكثر احب نجوى واتمنالها القسمة الزينة وقادر هم احبو ما اريد يصير الغيرها

.... جاعد تلاحظين صاير جثير تعيدين كلمة احبو واني مغلس بمزاجي

.... دحجت عليه بغضب
واذا گولت احبو اكيد مثل حبي الحسن خما احبو مثل ما احبك

لا لا يييييع شنو احبك اصلآ اكرهك

شاهر جرها ضحكة طويلة
... ههههههههه اي ادري بيج تموتين مني

.... لاتضحك ليش عبالك انسى سوايتك
خلي ايات تفيدك مو رجعتها غصب عني
اي طبعاً ترجعها وين تتحمل فرأكها
نص يوم ماكدرت بلياها رحت تركض جبتها
وكسرت خشمي فيروز طز بيها وبزعلها ومشاعرها هي بيش الكيلو واهتم بيها المهم ايات هين ومنورة البيت وتدلع وتتنعوص وتصبح وتمسي بشوفة طلعتها البيهية والوجه اليبخ سم

شاهر صاد عليه مخلي ايدو جوة خدو وصافن

.... اي بنيتي خرطتي البگلبح لو بعد ناسية شي منا منا

... لا احجي ولا افتح حلكي عليش اتعب حالي بكلام مامنو فايدة اسكت احسن

.... لا بدينج يعني كل هذا وماحجيتي شي عفية عليج اشكد كتومة اصلا منيلج لسان

... دحجت بطرف عيني انطيتة ظهري ونمت
هو هم سكت
ورة شوية ما كدرت اتحمل رجعت صديت عليه

تريد تنام حتى لاتسمعني اجيب طاري حبيبة الگلب اي أكيد الي يهينها يهينك
عجل شلون متحمل بعدها عنك صار ثلاث ايام
اي روح جيبها اكيد مشتاگلها

... استغفر الله فيروز ضبي لسانج ونطمري

.... انغيت علمودها مووووو
.. وتاليييييييييييييي

... زكح بية بعلو حسو جفلت غطيت رأسي وسكتت بس گلبي يفور أريد اتكاون
لوين يلا عيني شكلت وغفيت
بين النايمة والگاعدة تحركت تا انام على ظهري ما احس غير متكومة بالگاع وبس صوت الطبة

شاهر گعد مثل المخبل من الصوت يدورلي
اجة لكاني متمددة بالگاع من الفشلة سويت حالي دايخة ومتوجعة گضبني تا يگومني

.... خما بيج شي شنو اليوجعج
يولي بطلي بجي وفهميني

... وخرررر لا تگضبني كله من وراك

..... قابل اني الوگعتج من الجرباية نايمة بالطارف. وتكاونين زياگج
كل سوالفج عوج

.... طكيت بجي وهو حاضني ويضحك

... هههههههههه لاتبجين ماكو شي جت سلامات الكاع مفروشة وانتي متلفلفة بالبطانية يلا بنيتي تكبرين وتنسين.

..... ضربتو بثنين ايدي لاتضحك
.... هههههههه  سكتت تعالي الحضني هساع تنسين

... ما أريد وخر
حضني قوي وطوقني بيدو ورجلو
اتركني انت صاير ماتحبني

.... ول يابة دخيل الخلقج بطلي خبال لو ما احبج شيجبرني اتحمل هذا خبالج لاعبة بحالي لعب وما اكدر احجي شي

... عجل ليش رحت جبت  ايات وقهرتني

... انعل ساس اهلها هم ردينا الها
الخاطري تحمليها هالفترة بين ما تخلص وترد الأهلها لاتفشليني جدام ابوها واخونها

..... ماشي الخاطرك راح اصبر بس والله اذا السنة الأخرى هم لگت لعبة ورادت تبقى اطردها
حط رأسو بركبتي يبوس. بيه

.... ميخالف عود طرديها

.....اشو هذا مدري شبلاه احم يلا خلي انام نعست وأنت مو گولت عندك گعدة من الصبح

.... اششش ول يرحم اهلج خليني اشوف دربي صبرتلج جثير ومعد اكدر اصبر اكثر

.... ما ناقشت قابل لشوكت اظل مانعتو مني
شال رأسة من رگبتي وخلى گصتة على گصتي

... بيج حيل نگوم ننوضى ونصلي
أريد بدايتي وياج الله يبارك بيها
ويجعلها زواجة العمر ومانضوك طعم الفراگ غير وكت الي الله يأخذ امانتو

... كلشي موجود بية بهالحزة خوف خجل ارتباك
هزيت راسي بمعنى اخذ ايدي بين ايدو وكمنا توضينا رجعنا للغرفة لبست أخرام الصلاة فرشنا السجادات وكفت وره

صلينا ركعتين
كملت وهو لساعو ساجد
ظليت گاعدة بمكاني
خمس دقايق وهو على هالحال مايتحرك

الأفكار السودة ركضن الرأسي.
اي سامعة جثير ناس الله يحسن خاتمتهم على سجادة الصلاة

اهجس گلبي كمز من الخوف ماظل بية حيل اريد اتحرك ما أكدر
مدري شلون زحفت على ركبتي وصلت العندو
هزيتو من ظهرو

ششاهر ارفع راسك لاتخوفني
من تحرك وشال راسة
الهبطة بينت بية
مديت رجلي وارتجيت على حافة الجرباية
لأزمة گلبي وبالگوة اتنفس

كمل صلاة واجة عليه
... عليش گعدتي هالگعدة شبيج دحجي  لشتج جاعد ترجف

... اااخ گلبي وخرررر مايجيني من ورأك خير الا تموتني يلا ترتاح

... أسم الله عليج شمسويلج يولو مو جاعدين نصلي مثل الأوادم وندعي الله يبارك بهاليلة المدري شلون راح تخلص

... انت بقيت بيها ليلة بقيت بيها صخام
نعلت ابو ابوها
متحنط بالگاع لا حس ولا نفس كول هاي راح تخاف راح تصخم

... هههههههههههههه  عليج سوالف ماموجودة عد بشر  ول يابة راكع قابل شمسوي حتى ويا ربي ما اكدر اسولف وادعي

.... اي ارفع ايدك وادعي مو تهبطني
كومني من الكاع راح جابلي مي شربت

... دحجي بنيتي حتى بعد لاتخافين اكثر وكت احب ادعي بي بالحزة الأكون منصي وساجد الريي

... يتقبل الله
.... أجمعين ان شاء الله

خشيت للفراش
غمضت عيني

.... سوالف انهبطت نعست مابية حيل انسيهن صيري عاقلة ويلا فتحي عينج

... ابتسمت الظاهر اليوم ماكو مفر منك
.. ابد ايسي

....حضني وقرب وجهو مني وطبع أول بوسة على شفايفي
بهاي الحزة شكو حاجز انشال
رجع باسني وطول بيها

أيده تجراءت اكثر وأكثر لا أكدر امنعة ولا أريد امنعة
ويا كل بوسة يطبعها يگول
الله خلقج الشاهر يبعد شاهر وعافيتة

جنت متوقعة ليلتي تكون صعبة بس صار العكس الحب البينا خلى كلشي سهل

صرت مرتة وملك كل ذرة ومسامة بيه وگبلهن جان مالك گلبي وروحي وعمري
باسني بكل مكان بوجهي وأبتعد مني

.. خما اذيتج يبعد العافية

.  ختلت بحضنة وضميت رأسي بصدرة
همست الوكت الوحيد الي اتوجع بي من تفكر تتركني لو تخلي غيري تدخل  گلبك

.... حلاوة الدنيا انتي ومرارها فرگاج
اذا اريد الموت وكتها افكر اتركج
الي يفوت للجنة مخبل اذا يطلع منها.

.... ابونا ادم طلع من الجنة..

.... ول يابة غير انطرد منها خما برضاتو
والسبب حبو الحواء ما كدر يكسر، خاطرها وما ياكل وياها التفاحة

.... هههههههه احبك
... اعشگج من جدمج الشعر راسج

.. مدري لشوكت ظلينا گاعدين
تالي غلبنا النعاس ونمنا

نجوى.. بجيت جثير جوة البطانية
بعدين مسحت دموعي وغصب عني حاولت ما ابجي ما اريدهم الصبح يحسون بية باجية ومقهورة
كلام فيروزة صح جدام الكل اني الرفضت لازم اصير قوية وارضى بقسمتي
قادر يستاهل كل خير الله يسعدو ويهني

الصبح كعدت ويا البنات ماما وعماتي ماموجودات

نور گالت حدرن للسوك ويا سمر وخالة صفية يأخذون الذهب

ما علقت على كلامها كعدت وياهن على الريوك اغصب حالي على اللگمة
من خلصنا
فتحت التلفون دكيت على فيروزة ماتجاوب يمكن لساعها نايمة قفلت التلفون وكمت اساعد البنات بالشغل تا التهي شوي

فيروز...فكيت عيني بكسل لحيتة الخشنة وبوساتة اداعب وجهي

ابتسمت واني افرك بعيوني صباح الخير حبيبي

....الخير أنتي والعافية انتي ول يابة شحلات هالصياح المتكحل بشوفة هالوجه البي كل العافية

.... مشيت اصباعي بين لحيتة
خف عليه قيس ابن الملوح ترى مگاعد اكدر اجاريك بالغزل بعدني بزونة مغمضة

.....اكو اغنية قديمة الأم كلثوم  اسمها ان كنت ناسي افكرك

كوووومي نتريك يالبزونة يمكن نافع جة وكف جدامي وگال ول شاهر لا تتزوج اني احبك

... عضيت شفتي وغطيت وجهي بيدي اهووووو. عاد شراح يخلصني يعني شلون ماراح تنسى وتبقى على كل كلمة تذكرني

ظل يبوس بيه ويضحك يكول احب اشاقيج
دحجت ساعة ١٠
هاي شنو شو مارايح للشغل
وهبة شعجب ما جاية

....ول يابة عريس خلي اشوف دربي الشغل ماطاير
الصبح خابرت عامر كوتلو ما اطلع يمكن الهالسبب هبة ما اجتي

... هممم ماشي يالعريس يلا اتركني اروح اسبح
اخذت ملابس طبيت سبحت وشاهر حدر جوة
كملت وجففت شعري وحدرت وره
لكيت الريوك جاهز جايب گيمر وكاهي
هاي شوكت جبتهن

....گبل شوي من جنتي نايمة

.... گبل لا اكعد سويتلة المخلمة ادري مايعترف بهالريوك
تريكنا وكملنا
گضبت تلفوني لكيت نجوى داكة عليه
رجعت اتصلت تلفونها مغلق

بعدو بيدي هي اتصلت حجيت وياها صوتها مايفرق شي عن البارحة
ما جبت سيرة الموضوع تا ماتبجي
حجينا شوية وسديتة
رجعنا نمنا للعصر يلا گعدنا

شاهر جوعان وما يحب الأكل البايت
گال تعالي ساعديني نسوي تشريب
شيطلعني تا اروح اجيب اكل جاهز

وكفت اساعدو والله طلع يعرف يطبخ احسن مني التشريب صار طيب هههههههه

... بالحرام اذا فكيتي ثمج جدامهم وگلتي شاهر طبخ زياي يا ويلج مني

... هههههههه لا لا ما اكول
.. عفية بنيتي

نجوى. گبل لا نرجع بيومين
مخنوكة خنكة مايعلم بيها غير الله
العصر اجتي سمر ويا خالة صفية

عمة امنة دخلتها للأستقبال وصاحت قادر راح گعد وياها

گعدتة وياها الحالهم  أذتني والله أذتني

من رجعت سمر الوجه مورد من الفرح والعين تلمع  مو حسد ولا والنبي مو حسد بس غصب عني انقهر غصب عني اغار غصب عني گلبي يوجعني

سمر طول الگعدة تسولف بي ماكو بالسانها غير اسمو
البنات بالشقى حجن عليها
گالن يولي كافي اثگلي شوي شبساع وگعتي هالوگعة

جاوبتهن سمر معليجن. بيه هو صار زلمتي بعد

ساكتة وبس اسمعهن
باليل رسل ونور واكفات بالمطبخ يغسلن مواعين
تركتهن وطلعت للحديقة رغم برودة الجو ما احس بي من النار البگلبي

اكو كرسي كعدت عليه رفعت راسي ادحج على النجوم

قادر... عساج مرتاحة هساع

.... جفلت صديت عليه بسرعة
أنت من شوكت هين

... جاعد قريب من الشباك ادخن دحجتج طلعتي
جيت اسألح عن احوالج

.... الحمدلله بخير
ردت اكوم گال اكفي
شرايد عليش گاعد توكفني

... جاوبيني گبل لا تروحين

.. شجاوب
... شنو المضيگ خلكج ومطير النوم من عينج

... متوهم كلشي مابية وبعد وكت على النوم

. ظلي جذبي بنت شاهر واضحكي على حالج
وهاي نتيجتها دمرتيني ودمرتي نفسج
واثنينا خشينا بخطية سمر

... هه لا ما انخش بخطيتها سمر صارت حرمتك ويجي يوم تحبها لا تستعجل

تصبح على خير مشيت تا افوت حجة بصوت مكسور

.... ادعيلي الله يطلع حبج من گلبي بلجي تخمد ناري الشعلتيها بدون ماتدرين

..... غمضت عيني احبس دموعي طبيت سريع خشيت للفراش ابجي
شوكت ارتاح من هالعذاب ما ادري

فيروز.... شاهر من يومها بعد ما طلع للشغل وكتة كله الي
دللني مثل ما متعودة دوم على دللو
ايامي ويا احلى من الشهد
العصويات يطلعني نفتر شوية ونجيب عشا ونرجع

هبة بعد ما جتي لان شاهر وياي بالبيت

اليوم كملنا عشا وكفت اسوي جاي اندكت باب الحوش
طلع شاهر يفتحها واني ظليت ادحج من شباك المطبخ

فاتت حرمة لابسة عباية اسلامية  ركزت زين 
هاي ايات لو غيرها
اي والله هي عزززا بعين الخلفها هاي شجابها بهاليل

هي تدري محد بالبيت غير شاهر حتى اني عبالها مسافرة وياهم

حسها تبجي  طبت للمطبخ صرت جدامها
من شكلها انصدمت ظلت مصفصفة بمكانها وعينها ادحج عليه من فوك ليجوة

جنت لابسة ثوب فانيلة قصير ومكياج طوخ
وشعري منزلتة على طولة

... هااا انتي هين

... الگلوب سواجي هساع ردت اسألج نفس السؤال شعجب جيتي بهالحزة

كامت تبجي بمكر
.. تكاونت ويا حرمة عمي وطلعت زعلانة ماعندي مكان اروحلو غير هين

.... هااا بس الي اعرفوا گرابتنا تارسين المنطقة وانتي تدرين شاهر الحالو بالبيت

شاهر. . خيتي طبي جوة ارتاحي

  ... مشت من جدامي واني افور
اجة شاهر خلة ايدو وره ظهري وقربني عليه همس بأذني

...الخاطري بنيتي لاتسوين مشاكل وعيونج اني هم ضجت من هالوضعية والحل عندي بس يردون من الرمادي  اخليهم يحجون وياها تا تروح تظل يم عالية بين ماتخلص السنة.

.... برطمت حدي بس هاليومين  اصبر عليها

.... عفية يبعدي واني ما رايد اكثر

.... رحنا يمها من شكلها تريد اطك ومدري شلون ادحج علية

ظلت تحجي على كونتها ويا حرمة عمها تجيب وتسفط بالحجي كلشي ما فهمنا

ايات... عجل ليش ما گولتي تبقين هين تا أظل وياج

.... بأخر لحظة شاهر ما قبل أروح تدرين بية متعلق بيه ما يتحمل فراكي

... هاا اي خوش
... يلا عيني تصبحين على خير زلمتي صعد گبلي هساع أكيد گاعد ينتظرني

... وأنتي من اهلو

.... ظليت الوب مامرتاحتلها شاهر نام تركتو وحدرت جوة

البيت هدوء مبين نامت طبيت للمطبخ افتر ضجت اريد اصعد سمعت حسها تحجي بالتلفون
بالبداية الكلام عادي ردت اوخر

سمعت گالت يولي كلشي خرب هساع شسوي لكيت العگربة هين

لأزم الكي حل ثاني گبل لاتجي العطلة.............

    يتبع

مساء العافية حبايبي

اعرف البارت قصير ومقصرة وياكم
لكن الله يشهد على كل كلمة احجيها
عيوني تعبانة حيل والنبي بالگوة اكتب
من وجعها حتى دوخة صارت عندي  رغم هذا جنت انشر ما اريد اتركم بدون بارت

حبايبي راح اخذ استراحة خمس ايام مو أكثر ابتعد عن التلفون وان شاء الله بعدها وعد اعوضكم وما اقصر وياكم اذا الله راد

التمسولي العذر ولاتضوجون لان فعلاً وجع العين لايطاق

تحياتي للجميع احبكم..