_وشاء الحب_
( بقلم بسمة البياتي)
_البارت السابع و العشرون _
الخوف والقلق أگل گلبي
معقولة يأخذ غيري اي عليش ما معقولة هو اشاف مني تا يبقى ينتظرني
ضربت على رأسي نجوى طلعي من رأسج أنتي ماتصلحين تكونين لا الو ولا الغيرو ارضي بقسمتج
بس ااااخ يا وجع گلبي حبيتو شلون وشوكت ما ادري
عساها بحظك وبختك عمران كون ماتشوف يوم عدل بحياتك دمرتني الله يدمرك
حسبي الله ونعم الوكيل عليك
وره يومين الظهرية گاعدة ويا فيروزة فات قادر
... السلام عليكم
... عليكم السلام
... شو ماكو احد شنو هجو وتركوا البيت للعصابة
فيروز.... ظهرية نايمين قابل مثلك مأخذ الشارع طول وعرض
... وين طالع يولي شو گضيت عمري شغل وتعب لحكتني على هالشوية الأجي بيهن هين
.... ايباه أشكد مسكين عجل وسهرك ويا ربعك باليل
وكل شوي ادك على شاهر تعال خوش گعدة وخوش عشا
... ههههه اهنا السالفة طلعت خايفة على شويهر مو علية
غير اريد اكسب بي اجر واخلي يطلع يتونس مايظل مگابلج لأزم تشكريني
... وعلى شنو اشكرك
... الجاعد اسوي المصلحتج تا مايمل من شوفتج ويهج منج بيومين
...وفر نصايحك الحالك مشكور مامحتاجة مساعدة
... بومة ماعليج عتب
...قادر اشرلي بعينو تا اطلع
عطشت اشرب ماي واجي
طلعت اركض گعدت بالمطبخ وعيني على الدرج خاف ينزل شاهر وتصير سالفة
نجوى... ردت اكوم گال ظلي عندي سالفة وياج
هاا شرايد
... سؤال ورايدلو جواب يريح گلبي ويرسيني على بر
... بلعت ريگي اي تفضل
.. يزيد فضلج بنت خالي
گوليلي عليش عيونج تحجي شي ولسانج يحجي شي اخر
... مافهمت شنو قصدك
... نجوى الجدامج مو جاهل ومن عيونج ادري بيج تميليلي عجل ليش ماترضين بية
.... اريد ابجي من القهر شحجي وشفهمك
اذا حجيت. مو بعيد تفوت للمطبخ تجيب سجينة وتذبحني
... ول يرحم اهلج لاتسكتين جاوبي ترى وصلت حدها وما اكدر اظل ساكت
... حجيت بغصة ماكو شي السبب گولتو العمة ما اريد ازوج اريد اظل هين يم اهلي وأكمل دراستي
... ما مصدگج كلامج مو من گلبج
... بكيفك لاتصدك وياريت بعد ما تحجي وياي بهذا الموضوع
بابا اذا عرف يزعل منك واني ما اريد تصير مشكلة بينكم بسببي
... هذا اخر كلام عندج
.. اي
.. خوش اطمني بنت خالي من هالحزة راح تنسد السيرة وبخصوص ابوج اني مامسوي شي غلط ولا مجاوز حدودي جيت استفسر واخذت الجواب
....عافني وطلع مشيت سريع واني اعرج طبيت للغرفة وختلت بالفراش ما اريد فيروز تجي تسألني شي
.. طلع قادر ضايج عرفت نجوى رافضتو ماحجيت وياها ما اكدر اضغط عليها
... قادر ما عاد يجي جثير البيتنا ولو جة حدو للحوش مايفوت جوة
ظليت اترقب الوضع تا أشوف صدك راح يخطب
الحد هساع السالفة سكتة
بديت اطمن أكيد قادر مايرضى بغيري
مشت الأيام ومصار، شي
فيروز... العصر گاعدين نلف كليجة
خالاتي والبنات وحرمة عم شاهر وبناتها كلهن هين يساعدونا
عاجنين ثلاث طشوتة
جدة ماتقبل قليل لان نصها تتوزع للجيران والگرابة
من التعب ظهري انقسم نصين ابتليت على عمري گلت اااخ ظهري اهجس انكسر من الوجع
حرمة عمي سالم گالت يولي خاف حبلة
وما تدرين بحالج
... هااا لا خالة مو حبلة من التعب ظهري وجعني
نعيمة...وانتي شفهمج تركي من ايدج ورتاحي باجر من الصبح خلي اصيل توديج تحللين
.... من بين الكل حجت أيات بضحك
... ههههههه منين تحبل اذا هي وزلمتها مثل الأخوان
.... الكل صدو عليها من ضمنهم اني فكيت عيني
احلام... بنيتي هيج سوالف مابيهن شقى
... هااا لا مگاعد اتشاقى عبالي تدرون
اني على نيتي سمعتها اتكول منين يجون الجهال واحنا اخوان
نعيمة... فيروز ششنو هالحجي الگاعد اسمعو
.... هااا ماكو هيج حجي الظاهر ايات سامعة غلط
دحجت عليها بغضب
نوبة اخرى من تريدين تعرفين شي خشي واسالي لاتظلين تتسنطين وتحللين بكيفج
اصيل... فيروززززززز گضببي لسانج لا بالشيبك على راسج
.... ترى ما جنت اتسنط ردت اخش للغرفة وسمعت كلامج ويا نجوى
وهساع من حجبت عبالي الكل يدرون اعذرزني مو قصدي افتن
..ايات سوت حالها ضاجت تركت الربعة وخشت للغرفة
العيون علية بودهم يأكلوني
نعيمة. اخر نوبة اسألج شنو معناتو هالحجي
.... گاعد اكولكم مو صح أكيد مفتهمة غلط
نجوى احجي احنا حاجبن بهيج موضوع
دحجت عليها بتوسل
... هاااا لا ماكو هيج شي ايات مدري منين الفت هالسالفة
.. شو لعب گلبي يولي اذا طلع كلامها صح ومانعتو منج اطين عيشتج
. كافي جدة من يجي شاهر اسألي
سكتن وادري بيهن ما صدگني
جدة وخالاتي سون حالهن مصدگات وكعدن يسولفن على التفاهم البيني وبين شاهر
وشلون اذا اغيب عنو يتخبل
ومن يرد للبيت مايخليني اطلع من الغرفة
وكل هذا تأليف منهن تا يسكتن حرمة عمي
يعرفن بيها راح تشرنة على الحبل ووين ماتكعد تحجي بالسالفة
ايات تقصدت تحجي جدامها تا تفضحنا
وگرابتنا يجلبون بالسالفة ويحجون علينا
لان تدري الزلمة المبأخذ حرمتو من اول ليلة ينگال علية أشكال وألوان الكلام
خلصنا الكليجة راحت حرمة عمي سالم
ردت افلت استلمني جدة وخالاتي
نعيمة.. اكفي وين تريدين تولين عبالج نسيت السالفة
... اهووو هم ردينا مو گوتلكم ماكو هيج حجي عليش مگاعد تصدكوني
.... من البداية شاكة بوضعكم وحجي ايات أكدلي شكوكي
احلام...احجي ولا تخافين خما راح نذبحج بس نريد نفهم السالفة تا نحلها
ابتسام... المصيبة وگعتوا بثم حرمة عمي. شراح يفضكم من القال والقلت
.... يجي شاهر وسألوا تعبت واني اعيد بنفس السسرة وانتوا مامصدگيني
نعيمة.... خوش وهاي جاعدة هين ومنتظرة بالحرام يا فيروز اذا طلعتي مامخلية وليدي يگرب منج محد يخلصج من ايدي ومن عين باجر الگيلو حرمة وأزوجو واكسر خشمج
.... طك گلبي عفتهن يدردمن وصعدت فوك گضبت التلفون دگيت على شاهر
.. هلا بنيتي
.... شوكت ترد للبيت
...نفس كل يوم رايدة شي اجيبو بيدي
.. هااا لا بس ردت اكولك
... اي گولي
... شسمة هاي ايات ما ادري شلون سامعتني احجي ويا نجوى واكول اني وياك مثل الأخوان
.. عيدي الحجيتي يولي شگايلة النجوى
... عضيت شفتي من الخوف من حسو مبين تعصب
والله بدون قصد حجيت وهي مدري شلون سمعت وگبل شوي فضحتني جدام الكل
.... دخلي اصل اذا ما حرگت شيب الخلفج ما اتسمى بأسمي
... سد التلفون بوجهي ظليت اروح وأجيمن الخوف
الله ياخذج ايات منين طلعتيلي بهالسالفة
اخذت اهدوم طبيت سبحت بلكي يخف التوتر
نجوى... فات بابا العيون تجدح نار جدة گاعدة تنتظرو
.... هلا يمة تعال هين عندي حجاية وياك
...خير ان شاء الله
... بروح ابوك احجي الصدك انت ماخذ المصگوعة لو مانعتك منها
... يعني خلصن السوالف ماظلت عندج غير هاي وگعدتي تحجين بيها
خو حطي كاميرات بغرفتنا تا ادحجين اليصير بينا
يييييمة اليصير بيني وبين حرمتييييي شششعليكم بي اخذها ما اخذها شي خاص بينا عيب جاعدة وتحجين بي
.... لا مو عيب ولا عبالك تاكلي بحسك وتخليني اترك السالفة من يوم الأخذتها واني اعد الأيام تا تحبل اجي هساع وانصدم وليدي الزلمة الحوك ما ماخذ حرمتو يول هلكدوتها ما گدرت عليها
... لاتكفريني واطلعيني من طوري فيروز حرمتي وزواجي منها ماناقصو شي والي يجيب سيرة الموضوع مايشوف مني خير
.... من اول نوبة گولي جوازكم كامل عليش تزكح ومتعصب ياوليدي گاعدة احجي من ضيمي اريد اشوف جهالك
.... يمة الخاطر الكائنات تركيني بحالي ليش اني من دون خلق الله ماعندي خصوصية اذا الله كاتبلي يصيرلي جهال منها يجون ان شاء الله شكو مستعجلة
... هذا هو بعد ما احجي لاتضوج
الله يسعدك ويرزقك بالولد اليشيل اسمك ويصير سند لبنيتك
... الله يسمع منج
فيروز... سمعت حس شاهر جوة ماتجراءت احدر
فات عاگد الحواجب ولوجه مايگصو السيف
مشى بتجاهي انهزمت من جدامو للجهة الاخرى الجرباية صار حاجز بيني وبينو
... هساع اريد تعيدين الحجي الگلتي بالتلفون
المنو حاجية گايلة ماصاير بينا شي
... هااا والله ما حاجية الأحد بس النجوى انت مو وصيتني ما اكول
... وصيتج ماتكولين ورحتي حجيتي النجوى موو
وما لكيتي غير نجوى تحجين وياها بهيجي سالفة
...اني مامتعودة اضم عليها شي الله عليك لاتتعصب بعد ما اعيدها
.... من انعل ساس اهلج لو حاجية جدام امج ولا حاجية النجوى
ااااخ هو هذا اليامن بحجي النسوان وفوكاها زعوطة
... كمت ابجي كافي تزكح حجيت بدون قصد خما انگلبت الدنيا هي ايات وحدة ادبسز انقصدت تفضحني جدامهم تا تخرب بينا
... اخر نوبة احذرج اليصير هين يظل هين مايطلع من الباب مفهوم
جاوووووبي بدون بجي
... مفهوم كافي تعيط
تركني وطلع شبعت بجي بعد ما حدرت جوة
نجوى جابتلي عشا ما اكلت
شاهر النص الليل يلا فات للغرفة
زعلان ما يحجي وياي واني هم ما حاجيتوا
كل واحد بينا نام بطرف
ثاني يوم الوضع زين والحمدلله جدة صدكت بينا
ولا شجان خلصني منها
بس ماما مدري شلون ادحج علية
ايات الصلفة من رجعت من الدوام تتشاقى وتضحك ولا عبالك مسوية شي
ظلينا اني وشاهر ما نتحاجى
وهم طلع يتعلل ما رجع غير نص الليل
ثالث يوم اعصابي زفت اكاون ذبان وجهي
المغرب وكفت ايات تسوي بيتزا
كملنا عشا وغسلنا المواعين وتقريبا الكل ناموا
فات شاهر اجة كعد بسد نجوى متعود من يفوت يسألها عن احوالها خما رجلها توجع وشمحتاجة هذا طبعو يومية نفس الأسئلة
ايات راحت للمطبخ رجعت ببدها ماعون مخلية بي بيتزا وقوطية ببسي
.... هاي اني سويتها تنغصتها الك وشلت حصتك
صارلك يومين ماتتعشى هين
... مشكورة خيتي متعشي الحمدلله
.. لا الله عليك لاترد ايدي ضوكها وانطيني رايك
فيروز.... لوبيدي اشيل الماعون واضربو براسها غديت بركان عيني عليهم
جنت متوقعة ما يأكل اشو هذا اخذ الماعون جر قطعة واكل
گاللها عاشت ايدج وهي مكيفة
يعني السوتو بينا عادي ما ضاج منها بس وياي مايحجي
دحج علية شافني صافنة علية ابتسم كمل القطة وگام غسل وصعد
لا والله مو اني الأسكت
گبل لاتكوم وكفتها
انتظرني عندي احجاية وياج
.. اي تفضلي
.. يزيد فضلج عيني دحجي ايات اذا تريدين نظل حبايب بطلي سوالف المراوغة والتخطيط من جوة ليجوا كفيلج الله ماتحصلين شي غير التعب والقهر
.... شنو قصدج مگاعد افهم عليج
.... معليج بزلمتي مفهوم
... هههههه كل هذا الحجي لان قدمتلوا اكل ترة عادي مابيها شي
.... يولي مو علية هالسوالف لا عبالج زغيرة وعقلي على گدي والخلقج بهذا عقلي اوديج للبحر وارجعج عطشانة ترى سكتت عن سوايتج وتنسطج علية بمزاجي لا تخليني اغير موجة وياج
... الزمي حدودج وثمني كلامج شدعواج خبصتي الدنيا علمود قطعة بيتزا واصلا منو المتنسط عليج على العموم ماعندي حجي وياج
يكعد شاهر واسولفو اريد اشوف يرضى لهذا كلامج
... صكيت على اسناني هم كالت شاهر اكولج وين كرامتج عليش ماتولين منا
.... تطرديني
... اي وياريت لو تحسين وتروحين
...ماشي الصبح اخذ غراضي واروح
.. الله وياج
نجوى... ايات طبت للغرفة وسدت الباب
عزززا بعينج فيروز شصخمتي يولي
اذا عرفوا شراح يخلصج منهم
... شيسوون خلي يسوون المهم تولي من هين انبطت مرارتي من تصرفاتها
... والله خايفة بالأخيرر تعمين على حالج
الله يهدبج ويعدي السالفة على خير
اروح انام. وانتي الج الله
... هههههه اشكد جبانة
تصبحين على خير عمري
... وانتي من اهلو گلبي
صعدت فوك طبيت الغرفتي
نمت بفراشي ردت اغمض شاهر حضني من ظهري
اريد اوخروو ما اكدر
شگاعد تسوي اتركني
.... اشش ول يرحم اهلج نصي حسج اريد انام
... اي اتركني ونام ما اريد اطخني صارلك يومين ماتحجي وياي هساع حنيت شنو نسيت الرزايل الرزلتني
..... تستاهلين حتى لاتعيدها من اكلج شي تنفذي مو تروحين تحجين هين وهين
... اليسمعك يگول حاجية الغريب هي بس النجوى
.... هو هذا الموضوع الحالو سالفة ماتنبلع
يولي صيري فطنة لاتظلين تتصرفين مثل الجهال حتى لو نجوى اقرب وحدة الج بهالبيت مايصير تحجيلها شغلاتنا الخاصة
اول شي اني ابوها واكفة من تسولفيلها اليصير بينا
والاهم من هذا نجوى مامزوجة مايصير تفطنينها وتفكين عينها على هالامور لساعها مراهقة انوب تتأثر
... شدعوة يعني شحاجية ترى بس كوتلها ماصار شي بينا محاجية التفاصيل
.... ماحجيتي التفاصيل وخليتنا علج بحلوك حرمة عمي وبنواتها عجل لو حاجية شلون
بنيتي احنا ناس عرب واهنا مقياس شرف البنية
ورجولة زلمتها باليلة العرس
من احد يسمعع ما مأخذج يألفون سوالف جثيرة
على شنو زلمتها مو رجال ما دبرها لو البنية بيها شي وماخذها تا يستر عليها ومصار بينهم شي
... يييع شنو هالتفكير الوسخ
... هذا وأقع حال للأسف العقول الجاهلة هذا تفكيرهم
.... ماشي معد احجي شي الأي احد يلا وخر بعدني زعلانة منك صاير تتاخر بالسهر وماتجي تتعشى وياي
وگبل شوي ايات تتنعوص وتنطيك أكل وانت مكيف وعاشت ايدج
... هههههه عيب خما اردها
بسج عاد اريد انام بعدين اني حاضن حرمتي انتي شعليج عليش ضايجة
....هههههه حرمتك ماتريدك زعلانة
... اذا تظلين تحجين اسوي غير شي
... انلصمت خلي انام احسن
الصبح تحرك يريد يگوم فتحت عيني لكيت حالي غايصة بحضنو راد يتحرك ماخليتو رجعت ضميت رأسي بصدرو
.... عجل منو البارحة زعلان والليل كلة ما اريد وما أريد
... حجيت بنعاس بدون ما ارفع راسي
نايمة بحضن زلمتي انت شعليك
... هههههههه زلمتج راح يتأخر
بهالحزة صرتي رومانسية لو هذا حظي الفاين
.... عادي واذا تتأخر قابل موظف ويسجلونك غياب
.... عندي طلبية لأزم استلمها بنفسي
ضمي هذا الدلع لليل. بعد مابيها مجال الهين وخلصن اعذارج
.... كوم روح راح تتأخر
...رايح يابة وباليل نتفاهم.
....غطيت راسي بالبطانية شاهر ظل يضحك
أصيل... واكفة اهير الريوك طبت أيات للمطبخ مبدلة وبيدها جنطة جبيرة شعدها مأخذة جنطة اهدومها وياها
... صباح الخير
... صباح النور
عليش مأخذة جنطتج
.... رايحة البيت عمي ما اكدر اظل هين
..... شبلاج من صباحيات الله يولي
وعليش الوجه مكشر احد مسمعج شي لو غاثج
اذا بسبب الصار ذاك اليوم السالفة انتهت وراحت الحالها
... ما اكدر ابقى بمكان انطردت منو
....بصدمة منو طردج
.. فيروز
.... شجاعد تحجين مامعقولة فيروز تسويها
.... قابل جاعد اجذب عليج مو مصدكتني اسألي نجوى جانت شاهدة وسمعت كلشي
... حشاج من الجذب يولي
فهميني شصاير بينكم وعليش طردتج
.... اجة شاهر بدون قصد قدمتلوا من البيتزا السويتها ومن صعد گضبتني فيروز ماخلت شي ماحجتوا حتى تهمتني اتحارش بية وتالي طردتني
ايات بدموع وبجي بنتج اشايفتني ما عندي اخلاق وحاطة عيني على زلمتها ابوية واخواني اذا عرفوا تصير موحلوة
.... صخام الصخمج فيروز ام الفواين
ظليت اتوسل واقنع بيها تا ماتطلع
عاندت اخذت هدومها وراحت
الله يعدي هالسالفة على خير وماتكبر
وره ما طلعوا شاهر ونافع صعدت للمثبورة
طبيت للغرفة
ام الفواين عالگة الدنيا ونايمة
كومي من طلايبج راح اهج بليلة ظلمة
... رفعت راسي وفكيت تك عين
ترى نايمة مامسوية شي عليش گاعد تتكاونين
... سودة علية اشكد فقيرة نايمة مثل الملاك ولا هي نفسها المسوية فاينة اكبر من راسها
ايات تركت البيت اليوم شراح يخلصج من امي وشاهر اذا عرفوا
.... اووووف گلعة عساها لا ردت
علمود هاي المحمحمة هادة علية
.... انتي واعية للسويتي عقلج وين بنية اهلها مأمنيها عدنا تنطرد نص لليل هاي جبيرة وعيب علينا
بالحرام اليوم محد يگدر يخلصج من ايد شاهر
.... هااا يعني الغلط كلة مني وهي ماكو منها عجل گبل جم يوم منو السوالي مشكلة
وانوب عيني عينك زاتة حالها على شاهر
... سوالفج اذا عبرت على امي ترى ماتعبر علية
جاعد انتظر يهدا الوضع وتفرغلج
... هااا يا سوالف ماما فهميني شبيج وياي من الصبح
.... ماتعرفين مو
رفعت حاجبي اكول اكو حرمة تنام بسد زلمتها بالتراكسود
.... يبووو اخلص من سوالف نعيمة تطلعلي بنتها
فهموني شبيكم ويا التراكسود
گاعد تحسسوني المزوجة عدها لبس خاص
... كلاواتج عبريهن على غيري
خلي اشوف الفاينة الصخمتيها وين تصفى وتالي اتفرغلج
..... حدرت ماما متعصبة اووووف هساع شسوي شو من صدك خفت
الظهر ملمومين على الغدا
والوضع تمام التمام
نعيمة... شو ايات تأخرت مو من عوايدها تظل هالكثر بالدوام
... ردت اغص باللگمة من جابت طاريها
ماما ونجوى دحجو علية
نجوى... يجوز عدهم اجتماع مجلس الأباء لو يمكن راحت الگرابتها
... اي يجوز بعدين اخابرها أشوف وين ظلت
... كملنا الغدا شلنا المواعين ماما بالمطبخ شبعتني غلط. ورزايل
وكفنا اني ونجوى نغسل المواعين
صاح شاهر عبية بحس يبس الدم بعروگي
نجوى... أكيد عرفوا جاك الموت يا تارك الصلاة
... يولي لاتخوفيني
.... على اساس تخافين دروحي گاعد يصيحونج
... مشيت للربعة وجوه الكل مگلوبة
نعيمة... مگصوفة العمر شمفينة لا بارك الله بيج على هالسواية
نافع... لششوكت تظلين بهالوكاحة ازوجتي وبعدج نفس وضعج فهمينا شنو دواج مو راح اتخبل من افعالج
.... هساع غير افهم شمسوية وعليش گاعدين ترزلوني
شاهر.. عليش طاردة البنية من هين
.. هااا
.. جاوبي لا بالحرام اكوم اخلص عليج
اصيل... على كيفك خوية الموضوع ماينحل بالزگح والعصبية
نافع... عوفي يأدبها لان من صدك تعبنا من مصايبها
.... بجيت بخوف
هي تتقصد تضوجني وتدخل بحياتي ما اريدها تظل هين خما گوة مو عدها عمام خلي تبقى يمهم
نعيمة... من تالي وكت خطارنا ينطردون لان مو عاجبينج والله خوش بعد من نريد نعزم احد نأخذ رايج بالأول
شاهر.... من وراج خشيت بهدومي
أبوها يدك علية يعاتبني يگول خليتها امانة عدكم تجي حرمتك تطردها نص الليل لو كايليلي ما نكدر نستقبلها ما أزعل واقدر ظرفكم
الي اعرفو عنكم انتوا اهل كرم وتقدرون خطاركم
.... بابا وشاهر لعبوا بية طوبة زگح ورزايل
بس باقي يضربوني
صرخت ما اريدها اكرها ما ارتاحلها خما كوة
تركتهم وصعدت الغرفتي اركض
طبيت للغرفة ابجي طب شاهر وركع الباب وراه
.. فوك شينج وكاحتج
هساع شسويلج اريد شي يبرد گلبي بيج
واذا انطتني زقنوت اتكومين اطردينها
... هي ادبسز وماتستحين ما اريدها هين ما اتحملها خما گوة
.... رايح ويا امي اردها بالحرام الحرم اذا فكيتي ثمج وحجيتي وياها كلمة جدامها اخش بخطيتج
....صحت بحس عالي اذا اجت ارجع اطردها لا عبالك اخاف
شال ايدو وكفخني على رأسي
اكو علب مكياج وعطور على ميز التواليت قريب منو بحركة وذوحده كلهن طرهن بالگاع
اصيل. صعدت اركض حس شاهر شال البيت
طبيت للغرفة متخبل يشيل ويكسر بالغراض صرت جدامو
بروح أبوك اهدي قابل جديدة عليك فواينها الموضوع ماينحل بالعصبية
.... الله مايجرعها عيني عينك تريد تزغرني وتكسر كلامي بدال ماتبلع لسانها وتسكت واكفة بعين وكحة تجادلني
.. حدر خوية اني احجي وياها
فيروز... رعم عصبيتو ما سكتت. تخبلت لان ضربني علمودها. ماما واكفة حاجز بيني وبينو
اندار تا يطلع حجيت بغضب
والله العظيم اذا رجعتها للبيت ما ابقالك بالغرفة عود بحزتها خلي ايات تجي بدالي
اصيل... فان حظج على هذا اللسان
صد شاهر راد يجي عليها گضبتو اتوسل
. بالف لا أله الا الله يلا طلع والوكحة لساعها تغرد
... مخايفة على حالج ادحجينو غادي بارود بدال ما تسكتين تزيدين النار حطب
وياريت لو الحق وياج الغلط البيج من ساسج الرأسج
.... الغلط بي هو مو بية ضربني الخاطرها ويريد يروح يرجعها
... يولي استهدي بالله عجل شتريدينو يسوي ابوها عاتبو وسمعو كلام يسم البدن
عيب يا بنتي بروح ابوية عيب السويتي اذا احد سمع طردنا خطارنا الناس ياكلون وجوهنا
.. ما جاوبت ظليت ابجي
نجوى... بابا وجدة راحوا يراضون أيات ويرجعونها للبيت
صعدت يم فيروزة لكيتها مفرفحة من البجي
... راحولها مو
.. اي
... خوش يصير خير
.... يولي كافي اول نوبة اشوفج بهالتهور كبرتي السالفة وخليتي الكل يلومج ويطلعونها صاحبة الحق
... عجل شلون تريدين اتصرف
مثل الحية تبخ بسمها ومحد يحاسبها
.... لان ذكية والي ترسمو يمشي الصالحها
ترى الگاعد تسوي مقصود وذكاء منها
تذكرين جدة من حجت جدام الكل گالت اني خطبت الشاهر وخليتوا جدام الأمر الواقع
...اي حتى لحد يحجي علية ويگول مخلي عينو على بنية هو رباها
.. اي وايات عبالها الكلام صدك ومن سمعتنا نحجي وانتي اتكولين عايشين مثل الاخوان
عبالها بابا مغصوب عليج ومايريدج
الهسبب بدت تخطط وتحاول تلفت انتباهو.
جدام الكل زبنة وماكو بفقرها
وجدامج تسوي حركات تا تخليج تضوجين
وهاي نتيجتها طلعتي انتي الموخوش وهي الزينة
.... ايا بنت الكلب اااخ لو اكضبها اكلها بسنوني
... صيري مثلها ولا تتهورين استخدمي نفس اسلوبها
... ابد ما اكدر يولي ضربني وراح يرجعها غصب عني
والله بس تجي ارجع الغرفتي القديمة بذاك البيت وبعد ما ادحج بوجهو
... الغيرة عاميتج حتى الحجي وياج ما منو فايدة. احدر اساعد ماما بالعشا احسنلي.
... كلام نجوى صح بس ما اكدر اتقبل وجودها وأتصرف عادي موبيدي گاعد احترك بنار
نجوى.. المغرب جابوا ايات وجوي
ملامحها زايدة حقارة وجدام جدة وبابا تتمسكن وتتنعوص عود مكسورة وضايجة
فيروز... من عرفت رجعت طلعت من الغرفة حدرت جوة تا اروح للمشتمل
الربعة جدامي الكل ملمومين ومن ضمنهم الحية ايات
صديت تا اروح
صاحني بابا
نافع... فيروز تعالي اهنا.
جريت نفس طويل اصبر بي حالي تمشيت يواش طبيت للربعة
نعم بابا
.... ايات اكبر منج ومثل اختج
والبارحة غلطتي بحقها اريدج تعتذرين منها وتبوسينها
... انصدمت من طلبوا
ايات رافعة الحاجب وتبتسم بحقارة
ششنو اعتذر بابا من كل عقلو يحجي
... يلا فيروز مو جاي احجي وياج لاتبقين واكفة مثل الصنم........
يتبع
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!