_وشاء الحب_
( بقلم بسمة البياتي)
_البارت الثاني و العشرون _
هاج بابا يريدج ويگول اذا ماتجاوب يجي هساع عليج
... خليت ايدي على حلگي اشهك وارجف.
اخذت التلفون بس سمع شهكتي
زگح بصوت عالي جفلت ولشتي رجفت.
....بنت الكلب ما صدكتي سافرت تا تأخذينوا
من انعل ساس اهلج مكيفة وجاعد تحجين ويااااااا
ااااااح لو جدامي مايكفيني موتج
احجي جاوبي. خليتي يگضبج
فرحانة بي وبخطبتج منو وحق الحق دام خشمي يشم الهوا ما اخلي فرحتج تكمل
.... كافيييي لا تزگح شعليك بية ترى مايصير الگاعد تسوي
بسببك بابا ترك البيت
من البارحة عليتنا
عليش ماتتركني اشوف حياتي بعيد عنك لاترحم ولا تخلي رحمة الله تنزل
احجي واشهك بالبجي
.... ما الج عيشة خارج هالبيت سسسمعتي لو اعيد
على جنازتي يأخذج من انحط بالگبر ذاك الوكت سوي التريدي
ورب العزة يا فيروز ما راح اخليج تصيرين الو
وكولي شاهر گال واذا بعد لكيت التلفون مشغول اجي النص البيت وأدوس ابطنج
... فهمني وريح گلبي عليشششش هالكثر مجلب بية كل هذا لان تكره اشرف.
... لاتجيبين اسمو على لسانج
كل البية منج انتي الي لعبتي بالنار الجاعد اسوي محد سبووا غيرج دمرتي حالج بحالج ودمرتيني وياج غضب من الله انتي غضب
... ماتحملت زتيت التلفون على نجوى وخشيت بالفراش ضميت وجهي بالمخدة وشبعت بجي
... حس بابا عالي سمعت كل الحجي معقولة يحبها ومن الغيرة گاعد يسوي هيج اووووف يا بابا هساع اذا صدك تحبها عليش ماتحجي ظال بس تزگح وتهدد
... شلت راسي من المخدة
هساع شسوي كلام شاهر يخوف واشرف مايرضى يتركني يولي خايفة واحد بيهم يموت بسببي
... لا اسم الله مو الهدرجة هساع لان متعصبين هيجي يحجون منا الباجر بلكي يهدون وتحل السالفة بدون مشاكل
.... اشرف متغير مو نفسوا اشرف القديم.
وشاهر متخبل ومحد وأكع بيها غيري
.... بسج عاد لاتبجين عيونج راح تنعمي من البجي
والله مايصير شي لاتخافين
... الله يسمع منج يولي كرهت الزواج بسببهم عندي استعداد ابقى طول العمر هيج ولا هالعبان النفس
.... هسة يطلع بابا يحبج ومن غيرتوا گاعد يسوي هيج ههههه
.. حبتوا حية ما اريد شي بس خلي يجفيني شروا دمرني عايشة برعب بسبب خبالوا
... ايا محمحمة لاتحجين علية ترى ازعل يولي
.... وخري من جدامي لا اخلي قهر ابوج بيج
.... ههههه جيت حضنتها بطلي بجي بداعتي ان شاء الله باجر تلكين كلشي محلول
... يارب
الوجه الصبح يلا گدرت عيني تغمض شوي
فزيت بالتسعة على حس تلفوني يرن
عيوني مغوشة بالگوة ركزت هذا بابا
جاوبت بسرعة
.. هلا بابا هاي وينك رجعت للبيت لو لا
... هلا بنتي لا اني بالمحل
خابرت اريد أسألج
صدك طالبة من اشرف تفسخون الخطوبة
... عدلت گعدتي وشلت شعري من وجهي جاوبت بخوف هاا اي صح مو شسمة ما اريدتصير مشاكل نفسخ الخطوبة احسن
... جاوبيني بصراحة شنو السبب
... هاا ما ادري احس تسرع بهذا القرار
.... بنتي انتي تريدي لو لا
لو بسبب المشاكل تريدين تعوفي
... اذكرت تهديد شاهر
وكلام اشرف وياي
تنفست بعمق لا بابا ما اريدة وما ادري شلون وافقت كله بسبب زن جدة براسي
... الله يسامحها كل المصايب بسببها
... بابا شبي صوتك ومنين عرفت اريد افسخ الخطوبة؟!
... اشرف اتصل علية يلا هسة روحي اني احل الموضوع
... مافهمت شي اووف خلي انتظر واشوف بابا شراح يسوي
.... طلعت للمطبخ الوجوه تتباجى والكل ضايجين
ماما سودة علية العيون حمر
وجدة نايمة بالربعة مريضة
خطية خالة امنة مبتلية واكفة تسوي الأكل
صباح الخير
... صباح النور
بلا تريكي ويا البنات
.... كعدت وياهن دحجت على ماما گاعدة ترضع جنة
ماما بابا گبل شوي خابرني
.. صدك وشگال هساع هو وينو
من البارحة ادك علية مايجاوبني
... اهدي على كيفج الطفلة غصت
لاتخافين بخير الحمدلله وهساع هو بالمحل
... الحمدلله
عجل شراد منج
... سألني صدك اني طالبة من اشرف افسخ الخطوبة كوتلوا اي
امنة... ايا مثبورة عليش تريدين تفسخين يولي مصارلج يومين من انخطبتي الناس شتكول
... شعلية بالناس ما اريد مشاكل تعبت ونفسيتي تعبت
... الولد شنو ذنبوا مافكرتي بية عليش تكسرين فرحتوا.
اذا ضايجة علمود خالج وأبوج
يوم يومين ينسون الزعل ويرجعون ماكو شي يظل على حالوا
... ما اظن احد ينسى
اشرف مخابر بابا وما اعرف شحاجين
الظاهر متكاونين لان بابا يحجي بعصبية
كالي اني اتصرف. وسد التلفون
امنة؛. اوووف عود مكيفة وجاية تا اتونس هين
واني اجازتي من العطلة للعطلة
.نجوى....والله مقهورة عليج المشاكل صارت ويا جيتج
..... حظي فاين شسوي يلا تريكوا وساعدوني تا نكمل الشغل بسرعة
قبل الظهر فات قادر
نعيمة... ها يمة بشر شاهر وينوا وشوكت يرد للبيت
... هلا يمة شاهر بخير لاتخافين علية خافي على حالج شوفي شغادية بالكوة تحجين
ولو كل الفواين منج
... انجعم هو هذا الي يسوي زين ويجمع اثنين بالحلال ينذم ويطلع غلطان
.... وال يسلمج عوفي الناس بحالهم ولاتجمعين ماراح تنقرض البشرية اذا ماجمعتيهم
العصر يجون أهل اشرف وعماموا هيروا الضيافة ورتبوا الأستقبال
اصيل.. هاا شصاير عليش يجون
... ما ادري نافع كال بلغهم هو فد شوي يجي
.... اووويلي بطني مغصتني من الخوف الله يستر وماتضير مشكلة
نجوى... قادر جوة ويا جدة
وكفت بالمطبخ مختنكة من اسمع حسو نار تشب بية
فات للمطبخ وصار جدامي عيونوا بيها الف سؤال والف عتاب
بسرعة دنگ راسوا وعافني وطلع
الحرگة ابلاعيمي حتى دموعي ما اكدر انزلهن اخاف احد يلجحهن ويگولون مو انتي الماردتي عليش تبجين
نوبات اهجس حتى الدموع مو من حقي اني بالذات ماكو اي شي من حقي غير الظلم والعذاب
اصيل. جة نافع گبل فات للغرفة جيت علية گعدت جدامو اخذت ايدوا تا احبها
سحبها مني
كافي نافع بروح اهلك كافي صارلي يومين اريد اموت من عذاب الضمير جاعد اكل بنفسي والومها شلون سويت هيج ما ادري
.... كومي اصيل لاتگعدين هاي الگعدة رغم الصار مقامج عالي بگلبي زعلان منج اي بس مستحيل اقبل تذلين نفسج علمودي
... بجيت بقهر بس غلطانة والغلط من ساسي الراسي
سحبني الحضنوا ومسح على راسي بجيت بالأكثر
.. كافي ام حسن الصار صار وان شاء الله هذا درس الج حتى بعد لاتمشين بحجي غيرج
انتي فقيرة مايلوگلج الحيل والألاعيب
.... توووبة والله توبة بعد ما اعيدها بس لاتتركني
.... مخبل واترك ام بيتي
... فدوة اروح العمرك
.... الله يطول عمرج يابعد عمري
... ظليت بحضنوا اخاف اسألوا عليش يجون اهل اشرف كولت اذا هو ما حجة اني هم ما احجي ما صدكت رضى عني
.... هسة اخواني يجون وازواج خواتج
... هاا اي قادر گال اهل أشرف هم يجون
.... اي اني طلبت منهم حضريلي ملابس اسبح وابدل ما ظل وكت
... من بطن عيني
فيروز. اريد اساعد البنات ايدي متأخذ شغل
الف سالفة براسي عليش راح يجون وبابا بشنو يفكر خايفة لا شاهر هم يجي وتصير كارثة
جت ماما سالتها هاا بشري ماعرفتي عليش راح يجون
.. لا والله ما سألتوا خفت بالگوة تصالحنة ما اريد اذكروا ويرجع يزعل
امنة.... ياخبر هساع بفلوس بعد حزة يصير ابلاش ننتظر ونشوف قابل شكو ورانا
... للعصر جوي عمامي وزلم خالاتي وولدهم
وعمام شاهر الأستقبال انترس
من الخوف
اليضربني مايلكي بية قطرة دم.
جة اشرف وخوالي وعمامو
الحد هساع الوضع تحت السيطرة وماكو مشاكل والحمد لله شاهر ما جة
وراها بربع ساعة على حسهم او بالأحرى حس اشرف رج البيت
كضبت نجوى يولي شگاعد يصير
... والله ما ادري مافهمنا شي صبري بلكي عمة امنة سمعت لان واكفة يم باب الأستقبال
ورة شوية جت رسل بنت خالة امنة گالت اشرف راح
بعدها بشوية الكل طلعوا
بابا متعصب مايتحاجى طلع ويا عمامي
اصيل...ول امنة ما عرفتي شصاير وعليش تكاونوا
... اشرف الصبح مخابر على نافع گايلو اريد اخذ فيروز تا نعقد بالمحكمة
نافع كايل أجلها هسة مو وكتها وماعندي مجال
... عليش ماتحجي الصراحة انتوا جاعد تتهربون وطلعوا اعذار تا ماتخلوني أعقد عليها
هذا تعلوم شاهر مو
.... وشدخل شاهر بينا كتلك ما اكدر هسة شبيك اشرف اشو صرت تخربط بالحجي
...عمي وال يرحم اهلك مو طفل جدامك وتقشمرني
بنتك البارحة تريد تفسخ الخطوبة وانت هساع بالگوة تحجي وياي
ادري هاي سوالف شاهر لعب بعقلكم اعرف بي رجع من السفر
امنة.... نافع متكاون ويا وساد التلفون وهساع جمعهم تا يخلي اشرف يطلگ فيروز
اشرف طار عقلوا كلب البيت بالصباح يكول طلاك ما اطلگ لو تنگلب الدنيا وفيروز گبل رمضان اخذها غصب عن اليرضى والمايرضى
نافع تخبل بالزايد وكلمة منو وكلمة منه تكاونوا الزلم بالكوة هدوهم اشرف عافهم وطلع
نافع حلف غصب عنو يخلي يطلگها
احلام.... اشرف يحبها من لوبة روحوا جاعد يتكاون عليش ما نافع يطول خلك ويا
....هو بطيشوا خسرها لو لأزم حالوا ما جان وصلت الهالمواصيل بسبب تهوروا خلى نافع يحلف يطلگها منو
... زكحت بصوت واني هسساع شسوي ترى تعبت من هالسالفة ادري شورطني وقبلت عضيت اصبعي ااااخ منج جدة كل الگاعد يصير من افكارج وخططج التودي ورة الشمس
ابتسام. اششش مصگوعة نصي حسج دحجيها شغادي حالها لاتزيديها عليها كلشي ينحل بالتفاهم لاتخافين
ابو اشرف گال تركوا السالفة علية اني اخلي يطلگها مانريد مشاكل
... الوضع متوتر اشرف معاند مايقبل يطلگ وشاهر لساعوا ما رد للبيت وجدة مريضة
بابا يطلع من الصبح يرجع المغرب يخش للغرفة بعد مايطلع منها
اليوم العصر اتصل خالي معن گال راح أجيب اشرف واجي تا نحل الموضوع ونفض السالفة
وصدك ورة ساعة جوي
بابا گعد وياهم هو عامر
بعدها صاحوني طبيت للاستقبال
سلمت وجيت گعدت بسد جدة
معن.... اي بنيتي مابيها مجال تتعوذين من ابليس وتتراجعين
اشرف شاريج ماتلكين احد يخاف عليج ويسندج مثلو
... بلعت ريگ من التوتر گصتي تقطر ماي عرگت
هاا لا اريد اطلگ
... براحتج وان شاء الله الصار ميأثر علينا نبقى اهل وحبايب وانتي تبقين من ريحة اختي
يلا وليدي ارمي اليمين عليها تا نروح
... اشرف شابك اصابعوا ويهز برجلوا والوجه يطير شرار دحج علية بغضب
ورمى يمين الطلاگ
كمل كلاموا ترك الأستقبال وطلع
سلمت على خالي وطلعت
لكيت اشرف واكف مشيت دافوت جوة
گضبني من زندي
.... عساج لاتتهنين مثل ما عطبتي گلبي
ظلت نفسي بيج صدكي بحياتج ما راح تتهنين ولا راح تشوفين السعادة والراحة
وشاهر اااخ شاهر لو يوگع بيدي اشرب من دمو ومايشفى غليلي
.... من سمع حسهم فريب من الباب تركني وراح
انقهرت علية كل هذا الگاعد يصير بسبب شاهر ما ادري لوين يريد يصل بهذا تحكموا بية
نجوى.. تطلگت فيروز وبابا معاند مايرد للبيت
جدة تخابروا تتوسل وماكو فايدة
استلمت نتيجتي ناحجة بس بالدفرات لوما التحضير اليومي جان رسبت من شافوا درجاتي انصدموا سكتوا وما حاسبوني
ما ظل غير يومين الرمضان بابا نافع وزوج عمة ابتسام و عم بابا راحوا حجوا ويا وخلوا يرد للبيت
زعلان مايحجي ويا جدة وماما وفيروز
بس وياي وويا عماتي
واذا يريد حاجة يطلبها مني لو من عمة امنة
هم زين عمة وره العيد يلا ترد للرمادي
أصيل... اول يوم رمضان سوينا السحور گعدنا نتسحر من كملنا جيت على شاهر گضبت أيدوا تا احبها سحبها مني
وحبني من راسي
خوية زعلك كاسر ظهري لا ليلي ولا نهاري نهار
... ما زعلان اخذت على خاطري من عملتكم والسالفة راحت وانتهت الله لايجيب الزعل بينا
.. اللهم امين يارب العالمين
شاهر راح حضن امي وحب ايدها وراسها والحمد لله رجع الوضع طبيعي بينا
فيروز... شاهر من رجع للبيت ما يدحج بوجهي واذا صادفني كل خزرة يخزني تيبس الدم بعروگي
تراضى ويا جدة وماما الا وياي بكلمة مايعبرني وبصراحة اني هم ماطايقة احجي ويا بعد السواه بية نظل هيج احسن
ثاني يوم اول يوم بالصيام گعدت ساعة أربعة العصر الوجه منفوخ من النوم والكفشة شكبرها طلعت افرك بعيوني ريحة الأكل دوختني بالزايد
أصيل... عليش جاعدة هساع ارجعي كملي نومتج ووكت الفطور، نگعدج
... اووو ماما شبيج وياي غير ورة السحور يلا نمت
بعدين شلون اخلص النهار غير بالنوم تا يجي وكت الفطور بسرعة اذا اكعد من الصبح من الحر العطش يجتلني
امنة.. مصگوعة ليش الصوم بس عن الأكل والشرب غير تصلين تقرين قرآن
الصوم عبادات مو اكل ونوم يمثبورة
اصيل... البنوات من الصبح ويانة بالمطبخ مكسور ظهرن بس حضرتج مثل الخاتون
... اذا گعدت شراح تستفادون مني اشو طبخ ما اعرف اطبخ
.... صوج اصيل مدللتج جثير
ماتعلمينها شبلاج ماعادت زغيرة خشت ب ١٧ سنة رسل حتى خبز علمتها تخبز
فيروز... ظلوا ظلوا احجوا علية بعد احسن خلي اخذا حسناتكم
ماتكولون هاي صايمة شلون نرزلها
ماسامعين الكيس المثقوب
لاتضع حسناتك في كيس مثقوب
” تصوم وتصبر عَ الجوع والعطش
لكن................................ تستغيب وتسب وتشتم وتلعن
كيس مثقوب
وانتوا ما شاء الله من اول ما گعدت استلمتوني دك رزايل
جيساتكم كولها مزروفة والحسنات گاعد تطاير منها
امنة... بالحرام لو عندي مثلها بيومين اهج من البيت من لسانها يمة الله يعينج عليها
.... يولي مشوفتني الويل لسانها منشار خو ويا امي معارك اثنينهن
... هساغ كافي شمسوين فطور جووووعانة
.... امشي صلي وتعالي ساعدينا
...رحت صليت وجيت اساعد بالأشياء، البسيطة
خالاتي هم يجن يمنا يفطرن
قبل المغرب مدينا السفرة انترست أكل خير من الله من غير الجابوا گرابتنا والجيران لازم ناس تودي الناس هاي عاداتنا ما نگطعت ابد
اذن المغرب صلينا ولتمينا على سفرة. وحدة
اتمنى ايام السنة كلها رمضان ولا اكو احلى من هيج اجواء
نجوى... قبل الفطور اتصلت بية جدة گالت تعالي خوالج وخالاتج كلهم هين افطري ويانة
طلعت الف حجة وعذر ما اريد اصل الذاك البيت واشوف الحيوان
جدة زعلت وسدتوا
وكت الفطور الكل مستمتع با لمة والأكل الا اني گلبي متلوع صعب ننجمع اني وقادر بنفس المكان لوما الصار جان هساع اني حرمتوا
اتوجع واموت واذبل بسكتة بالوجه اضحك ومن الداخل احترك اهجس كلشي ماظلوا طعم مثل گبل كلشي مات بعيني وغدة خراب
... ايام رمضان گاعد تمشي
اليوم گبل السحور
الكبار ناموا ظلينا اني والبنات نجوى ورسل وتور
جة شاهر من برا گعد وياهن ما اريد اظل جدامو عفت الربعة وطلعت گعدت بالحديقة
فاتوا للحوش قادر ونزار
نزار طب جوة وقادر جة گعد وياي
... ها يولو شعندج جاعدة وحدج هين
... ضوجة جوة طلعت أشم هوا
.. فان حظج هذا يا هوا يولي اشو الجو يبخ نار
.... هساع اذا حضرتك محتر عليش گاعد يمي
... دحجتج مثل البومة جاعدة كسرتي بگلبي
... سودة علية اشكد حنين
.... عجل شعبالج حناني غرگ العراق وفاض على دول الجوار
.... ههههههه عجل منا وغاد اسميك قادر الحنين
.... اي اضحكي شبلاج مثل الغراب وجهج يبجي
... ابتسمت اول نوبة اشوف طبيب يعالج الناس وهو معلول تريد تضحكني وانت ضحكتك غايبة صارلها جثير
... المتعوس يبقى متعوس تدرين اني وياج مشتركين بجثير اشياء
... شنو هنا
... سبب تعاستنا الأب وبنتوا ما جذبوا من گالوا الخلف على. الخلفوا
.. لاتخلط نجوى مو مثل شاهر
عيبها جبانة ويمكن تخاف من الزواج لو تخاف ماتخليها تكمل دراسة علمود هيج رفضتك
.... خلي تظل بخوفها وهي التربح
بعدكم انتي وشاهر ماتتحاجون
... عسا لا حجى عششتو عود هو زعلان فوك السواه بية هم اله عين ويزعل البطران
امشي انفوت جوة غديت ماي من الحر
.. طبينا للربعة
شاهر ونزار والبنات مندمجين بالسوالف والشقى
شاهر من دحجنا طبينا سوة رفع راسوا بنظرة سريعة ورجع يكمل سوالف
گعدنا وياهم
نجوى.. دغيت فيروز گومي نحضر السحور
... يولي بعد وكت اذا من هسة سحرناهم يكتلهم الجوع باجر
نزاز... فيروزة شوكت تقدمين للامتحانات الخارجية.
.. مو هالسنة السنة البعدها
هم زين اتخرجت تا استفاد منك
.. بشنو تستفادين
... ادرسني عجل خما تريد اگضب مدرسين خصوصيين
... بربج اني ما عولت اخلص من الكتب والدراسة اكعد ادرسج
.... مو انت مثقف العشيرة والنابغة مالتها شلون ترضى بنت خالتك يدرسونها الغربة وتخسر فلوس
قادر.... طلع اهنا الحجي الفلوس
والله لو منك اني انطيها فلوس المدرسين ولا اتورط وياها
.... هااا قادر شبيك گلبت علية مو اني احبك عليش تريد نتخارب
قادر دحج الشاهر وصاح.
... ادرري تحبيني مثل أخوج بس هم ما اشجعوا يتورط وياج
نزار... ادارسج وامري لله اذا امي تسمع طالبة مني وما قابل تهججني من البيت وكلام الله
.... شاهر ساكت ما شاركنا الكلام
اخير شي اخذ قادر ونزار وطلعوا بين مايصير السحور
نجوى... جدي وجدتي زعلوا مني لان الهساع ما رحت فطرت يمهم.
اختاريت يوم ماعدهم خطار واهم شي بيت خالي ابو عمران مايجونهم.
اخذني بابا فطرت وبعدها خابرتوا جة رجعني من اني وازغيرة روحتي الهذاك البيت مثل الجبل على گلبي
گبل العيد بأيام بابا انطاني فلوس تا نشتري ملابس اني وفيروز
جيت عليها تهيري ورة الفطور ماما وعمة يحدرن للسوك تا نروح وياهن
بابا انطانة فلوس
... رفعت حاجبي ومنو يگولج بعد اخذ من ابوج شي امشششي رجعيهن الو فلس ما اريد منوووو خلي يجفيني شروا واني بخير
.. اشششش يولي نصي حسج لايسمعون
اني وياج متعودات مصروفنا وملابسنا كلها علية شنو التغيير هساع
.... اني التغييرت وما اريد شي منو اذا ماترجعين ازتهن بوجهوا والله
..فان حظج سكتي رايحة
جيت الغرفة بابا ومديتلوا الفلوس
.... عليش رجعتيهن
. هااا لا مو فلوسي هاي
.. النطيتهن الفيروز؟!
... اي ماقبلت تاخذهن.
... خوش اخذيهن انتي.
... جثيرات شسوي بيهن
... بالعافية عليج بنيتي
.... بابا ضاج بس ما حجة شي
... خلص رمضان واجة العيد
الصبح راحوا الزلم للجامع يصلون صلاة العيد
ومن رجعوا حضرنا الريوك گيمر، وكاهي وخير من الله
قبل لا نتريك عايدت الكل الا شاهر گلبي شايل منو
كملنا الريوك وجتي احلى فقرة العيدية ههههه
صغار كبار ناخذ عيدية
شاهر اول واحد يوزعلنة هالنوبة من انطاهم طلعت من الربعة تا مايصل السرة الي وينطيني
من كمل رجعت
هو هم ماعبرني
من اول يوم استلمونا الخطار رايحين جايين
الحد ما خلص العيد كلشي ما فهمنا منو
حتى الهدوم النشتريها مانستفاد منها
حدنا نطلع نعايد عمام ماما
وبيت عمي نبيل
ونجوى تروح تعايد بيت جدها
نجوى.. من رحت البيت جدي هم زين بابا وجدة وياي ظليت وياهم ماتحركت عمران النذل لجحتوا من بعيد يبتسم بحقارة وسمانية
ما عولت بابا كال يلا نرجع طلعت اول وحدة صعدت للسيارة
خلص العيد ومشت الأيام وجة موعد الدوام
تفاجئنا بجيت ايات الظاهر، هالسنة هم تظل هين
جدة ماتجوز من سوالفها عينها تحوم ورة ايات وشايلتها بالصلوات
وهذيج مكيفة
تهتم بجدة حتى رجلها تجي تفركهن الها اليشوفها مأخذة راحتها يگول وحدة من اهل البيت.
ايات.. أكلج نجوى فيروز عليش فسخت خطوبتها.
..ماكو قسمة وما توألموا
.. هااا الله يعوضها بالأحسن..
...امين يارب
...من ارجع من الدوام اريد اني اسوي العشا خما احد يضوج
... ما ادري بس بابا وجدة وبابا نافع متعودين على أكل ماما مايحبون يأكلون من ايد وحدة غيرها
... هااا بس والله أكلي طيب واعرف جثير اصناف
.... احجي ويا ماما وساعديها
... خوش.
.... ايات بدت تساعد ماما بالطبخ.
عيونها مفضوحة تفتر وره بابا من يرجع
أصيل... الصبح جت حرمة عمي گعدت ويا امي
انعزلن اثنينهن وتبسبسن
اني، جاعد بمسافة عنهن
الف كبة بالبداية مانتبهت من ركزت على حجيهن بقيت فاكة ثمي
نعيمة... يولي دبريني شسوي حرت وحتاريت بزماني ويا هالوليد نشف زردومي ( ريگي) واني اقنع بي تا يجوز حرت شسويت وشوفة عينج
ما گعد وياها جثير وطلگ
ورجع عزابي مثل گبل بقت حسرة بگلبي اشوفلوا جاهل گبل لا اموت
... اخطبيلوا وخلي جدام الأمر الواقع عليش محيرة حالج هالكثر وجاعد تأكلين بروحج.
... يبوووو غير يهد البيت فوگ رؤوسنا ادري زعلوا ثجيل واخاف يفشلني
.. لا شاهر مايسويها يهموا حجي الناس يمكن يزعل منج بس مايفشلج
اتحملي زعلوا جم يوم هو من يشوف الحرمة ينسى الأول والتالي انتي منو رايدتلوا.
.... ايات مناسبة الو من كل النواحي ففيرة ولسانها حلو ومرتبة وام بيت ومثقفة عمرها مناسب العمر شاهر
... يولي شاهر احلى منها
بنات عماموا حلوات اخذيلوا منهن
... ايات خاشة دماغي محد تناسبوا غيرها
.... عجل جسي نبضها واذا قابلة حاجي ابوها
... خوش من تجي اشوف ميها واخذ رقم ابوها اطلبها منو
... اي زين تسوين
اصيل... الطم اشك زيجي من سوالف أمي الجيش وكت الحروب مايخططون بگدها
ايدي بردت اريد أكمل ما أكدر هساع شسوي ادري اذا احاجيها ماتسمع مني وتحلفني تا اسكت
بالكوة كملت الكبة من جت ايات من المدرسة بدلت وجت للمطبخ تساعدني بالتگلا
جت امي يمنا
.... هلا بالنادرة يولي مايخسر اليحويج ابيتوا
.... بعد عمري خالتي جاعد اخجل من حجيج
... لاتخجلين ان شاء الله تصيرين وحدة من أهل البيت عن قريب شنو رايج.
فيروز... صديت على جدة رجعت نعيمة لسوالفها القديمة
ايات عود خجلت والوجه يضحك
ماما ضايجة مدري شبلاها
جة بابا وشاهر صبينا الغدة
تغدينا وكملنا نجوى وايات تعبانات من الدوام راحن نامن
اصيل... شاهر صعد تا ينام وامي انجضعت
استغليت الفرصة البيت هدوء صعدت فوك.
لأزم احجي ويا
هاا خوية خما نمت
. لا خيتي بعدني تعاي فوتي
.... عندي سالفة وياك وحايرة شلون ابدي بيها والله لو ما سوالف امي زادن عن حدهن فلا احجي تدري بية مو من طبعي الفتنة ونقل الكلام
.... وال يابة شبلاج احجي بدون مقدمات قابل ما اعرفج شبيها امي وياج
... لا هالنوبة مو وياي وياك
تريد تخطبلك ايات من ابوها وتخليك جدام الأمر الواقع
.... صدك تحجين؟!
... اي بداعة جهالي
هي وحرمة عمي خضر خططن واليوم الظهر جست نبض ايات ومن خجلها مبين موافقة
هساع بس ظل تاخذ رقم ابوها وتحجي ويا
... زين سويتي بلغتيني لاتشغلين بالج الموضوع صار يمي
.... ماريد تعرف اني حجيت ادري بيها تاكل راسي
.. اطمني محد يجيب سيرتج
.... ان شاء الله
فيروز.. الظهرية مايجيني نوم اظل احوم بالبيت. نجوى تنام واضوج وحدي
طبيت للربعة جدة لأبسة المناظر ومگابلة الشاشة ادحج فلم مصري قديم
ا عفية حرمة ماتنامين ترتاحين كل النسوان البعمرج نومتهن المفضلة الظهر
... مگصوفة العمر مبين جلدج يحكج تريدين جتلة
.. راسي يوجع ودايخة فركيليا احسن من هالفلم الصاير شوربة
.. ولو ماتستاهلين شو تعاي
... جيت اجضعت وخليت رأسي على رجلها
گضبت الجديلة فكتها ونثرت شعري
عليش فكيتها شراح يشيلياها
.. انجعمي ما اسمع حسج
.. جت ماما هم گعدت
مممم اليوم اصولة هم گاعد شنو المطير النوم من عينج يا حلوة
... غفيت ومن فزيت بعد ما گدرت ارجع انام
... اي عفية جدة منا يوجع
لوما بعدني مامزوجة جان شكيت بروحي حبلة على هالوجع والدوخة
بعدني مامكملة كلامي جاني قبغ جدر الخبز طاير من ماما
ونكفخت على راسي من جدة
عطت اااااخ شبلاكم مايصير واحد يتشاقى وياكم
اصيل.... فان حظج على هالسالفة يولي مو اجي بالنعال على حلكج شو طالعة عينج
. . من اكولج وكحة وصلفة ماتصدگيني شعرفج بعراض الحبالة يامگصوفة الرگبة .
... يبووووو علية يمعودات شبلاكم غير اشوف بالمسلسلات البطلة من ادوخ يكولوها مبروك حامل
. بروح ابوي اذا بعد عدتيها أكطع المداس على جلدج
.... انجعمت بس سكتووو
اكولج جدة ترى طلبت منج تفركيلي راسي مو تفليني احد كايلج بية گمل
... انجعمي وخلي افليج
الكفشة شكبرها شمدريني ماتلملم
.. جة شاهر گعد هاي شبيهم اليوم اريد اكوم جدة مجلبة بشعري وتحجي ويا
... هااا يمة شو مو نايم.
. سمعت حسكم كلت احدر يمكم
. زبن سويت
.... شجاعد تسوين
.. افلي هاي المصگوعة
.. هتهههههههه
.... خرب حظي فضحتني شاهر وماما يضحكون
جدة بسسج عاد تركيني
حتى وجع راسي طار تورطت كوتلج فركيلي
... راح اكفج اركدي عاد يولي يمكن هاي گملة
... شنووووو گملتييش منين جتني. مامااااااا خلصيني منها
.... وال اصيل تعالي طلعيها
... جت ماما من القهر والفشلة اريد ابجي
اصيل.... ههههههههه يمة صدك تحجي شعرها نظيف مثل الوردة هاي شامة برأسها
... فان حظها اكو وحدة تطلعلها شامة بصماخها
. هذا حظي تا تفضخيني وخرررري بعد بحياتي ما اكعد جوة ايدج
كمت والكفشة شكبرها
شاهر من الضحك وجهو غدة دم
نعيمة.. امشي سوي جاي
.... اوووو هساع شگعدكم بهالظهرية
جدة شالت فبغ جدر الخبز وضربتني
ااااخ ادري شصار هالقبغ كلساع مضروبة بي
هو منو رجعوا هين مو شلتوا ويا مواعين الغدا
.... حسن جوعان صب وكعد هين اكل
امشي ولي ولاتظلين تحجين زايد
... طبيت للمطبخ واني ادردم بگلبي عليهم
خليت القوري على النار حميت جاي الظهر بية حيل اسوي جديد
صبيت ووديتلهم
شاهر اخذوا من الصينية بدون مايرفع عينوا علية عششتو وره ماشبع ضحك رجع گلب الخلقة وزعل والله يا الله
شاهر.... يمة شنو رايج تخطبيلي ......
يتبع
مساء العافية حبايبي
أعتذر منكم راح أوقف القصة يومين
خطار عدنا صعب اكتب
ان شاء الله السبت اعوضكم
تحياتي للجميع
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!