_وشاء الحب_
( بقلم بسمة البياتي)
_البارت الواحد و العشرون _
وافقت بالساني اما عقلي وگلبي رافضين الكلمة ويصرخون من الوجع ادري بحالي راح اظلم اشرف بهاي موافقتي
جدة بسرعة خابرت خالي بشرتوا تخاف لا اتراجع
اصيل...يمة اكفي شبلاج شلون تنطينهم الموافقة وأبوها الهساعوا مايدري منو يگول يقبل بالحرام ادري بيج راح تورطيني وبيتي ينهد فوگ راسي
... بس كرميني بسكوت ومعليج بالباقي اليوم احجي ويا نافع وغصب عنو اخلي يقبل
... وشاهر شلون والله اذا يسمع يگلب الدنيا فوك رؤوسنا
... ومنين يسمع وصيت خواتج وولدهم محد يجيبلوا سيرة بين مايتم العقد وبعدين يحلها الحلال
فيروز... شگاعد تحجون يعني بابا وشاهر ماعدهم علم بالخطبة
وتريدون يتم العقد بدون ما شاهر يعرف
... انجعمي موزين جاعد افكر بيج وبمصلحتج
... يا مصلحة الگاعد تحجين عنها جدة ششسويتي بية
عليش تورطيني وتورطين حالج
بابا من يعرف اكيد يبلغ شاهر
مستحيل ينطيني بدون مواففتوا
....شبلاج تنغطين مثل البومة الماكلين عشاها
مايصير شي لاتخافين الموضوع عندي اني اتصرف
.. دحجت على ماما بعتب
نصت راسها الظاهر هي هم خايفة
ظليت اكل بروحي شورطتي وقبلت
الله اليستر من الجاي
أصيل... باليل امي حجت ويا نافع بالبداية رفض
وكاللها السالفة بيد شاهر وهو مايقبل ينطيها
... حاجيت شاهر ووافق لاتصعب السالفة انطيها كل البنوات يحلمن بهيج قسمة
اشرف مايتعوض
... شوكت شاهر قبل
... اليوم حجيت ويا كال عادي انطوها
... اذا هيج بكيفكم بس اخذوا موافقتها
... حجيت وياها ووافقت الجماعة يريدون العقد بهاليومين خما عندك اعتراض
... شكو هلكد مستعجلين غير يجي شاهر بالأول ويحضر العقد
...شاهر گال التريدوا سووا وليدي لاتصعبها وهي سهلة
... لا ميصير لأزم احجي ويا وأشوف شوكت يجي بلغيهم العقد على رجعت شاهر من السفر
.... هساع شلزكت بي عوف الزلمة متونس لا تحجي ويا
ادري بي اذا عرف معطلين الخطبة علمودوا يعوف السفر ويجي الخاطرك قابل ماتعرف بشاهر
... والله مدري شكلج دوختوني هذا هو التشوفوا مناسب سووا
اصيل.... ايدي على گلبي امي ناوية تهجم بيتي مدري شبلاها
طبينا للغرفة نافع راد يحجي ويا شاهر ماخليتوا
عدت نفس كلام امي الحد ما اقتنع و لف راسو ونام
ظليت خايفة يحجي ويا ويكشف اللعبة
هم زين شاهر مايفتح تلفونوا جثير وباليوم مرة يتصل بأمي
تحددت موعد المشية بهاليومين عشت برعب ماصاير وخايفة من تاليها
نجوى... فيروز لشوكت تبقين حابسة حالج هين
.. وين اولي عوفيني بضيمي
.... حجيت بگلبي ماكو ضيم مثل ضيمي
فيروز عليش وافقتي اذا مو گدها
...يولي المشكلة مو بموافقتي المصيبة بالسوتوا جدة
والكل مطاوعينها
.... خالج ايهاب واشرف اتقصدوا يخطبونج بهالحزة
... شلون يعني
... سمعت عمة امنة من جتي گالت الماما اشرف من عرف شاهر مسافر اتفق ويا ايهاب تا يقنعون جدة وكدروا ياثرون عليها وخلوها تنطيهم كلمة
ماتشوفيها سوت المستحيل تا تجمعكم سوة
... تالي محد بوكع بيها غيري
... لا ان شاء الله مايصير شي امشي اطلعي عمة امنة وماما يريدونج تروحين للسوك وياهم تا تاخذين ثوب للمهر
.... ما أريد شي وما اتحرك من هين
اجني خالة وماما ماقبلت اروح وياهن هنا حدرن للسوك يجيبنلي
ثاني يوم روحي ممرودة اليوم راح اصير على ذمة اشرف
وحبي الشاهر غصب عني لأزم انساه واشيلوا من گلبي
ضايجة والدنيا طالعة من عيني من غير الخوف الگاضبني
الظهر جني البنات يرتبني
لبست قفطان بيجي وبي خيوط ذهبية مستور مامبين من جسمي شي
رنا شسورت شعري ونزلتوا على طولوا ومكياج خفيف
حواجبي البارحة خالة عدلتهن الي اخذت منهن شي قليل
عالية... يولي شبلاج مكشرة الوجه ابتسمي افرحي اليوم خطوبتج مو مشنقتج
.... هي كل التنخطب لازم تضحك وتكمز مو يگولون الثگل هيبة اليوم قررت اثگل
.... ومالكيتي غير هاليوم تثگلين بي عجل المكرود المتعني علمودج وماصدك ياخذج راح تگابلينوا بهاي الجهرة
... عجل شسويلوا مثلاً
رنا... عوفيها من يحصرها بالزاوية عود انشوف شلون راح اتظل ثگيلة
... ههههههه اي بالحرام جربناها قبلها
.... اشكد ماتستحن
... يمة وعليش نستحي قابل مسوين شي بالحرام كولوا بالحلال يا اختي
نجوى.. عمامج اجوي
...هما بس. بالفواتح والمناسبات يبينون
خالة امنة مدت رأسها من الباب
اذا كملتي يلا تعالي للربعة
... النسوان من شافني هلهلن گعدت بالربعة لجحت ماما واكفة بعيد وعيونها حمر
ابتسمتلها صدت وفاتت للمطبخ ادري بيها كامت تبجي
نجوى... طبيت للمطبخ حضنت ماما وبجينا سوة
شلون راح نتحمل فرأكها
گبل من بقت اهناك جنت اعد الأيام الرجعتها
هساع راح تفارگنا بدون رجعة واذا جت تجي مثل الخطار
ابتسام... شبلاجن يمعودات ترى اليوم العقد مو زفتها عليش هالدموع البجي موزين
اصيل... يولي ليش بيدي من هساع انقبض گلبي عجل شلون من تطلع من هي فيروز مالية علينا البيت بسوالفها فراگها صعب والله صعب
... هاي سنة الحياة محد تظل ابيت اهلها البنية خطار الحد ما تروح الببت رجلها
بسج الخاطر نجوى دحجيها شلون مفرفحة
نجوى... مسحت دموعي ورحت يم فيروزة جوي اهل اشرف وعماموا وگرابتوا
صارت هوسة كعدوا شوي بعدين طلبوا فيروز تا يگطعولهم مهر
.... گضبت ايد ماما ما اريدها تتركني
ظليت اقدم رجل وارجع الأخرى وصلت الباب الأستقبال جة الشيخ وبابا وشهود
وكلت بابا حتى يتم العقد
رجعت المكاني ارجف شوية وهلهن النسوان گالن كطعوا المهر
كلشي مشى سريع العقد الحفلة
حتى فوتت اشرف للربعة تا يلبسني الذهب
مادحجت بوجهوا وهو هم ماحجة وياي استحى من النسوان
لبسني الذهب وباسني من راسي وطلع
خلص العقد وگرابتنا والجيران راحوا بس ظلن خالاتي
جة بابا باسني وباركلي
امنة.. اشرف يريد يحجي وياج
... شيريد مو خلص العقد واهلوا راحوا
... يولي الولد شفتهم منج يريد يشوفج ويكعد وياج گبل شوي جان يستحي من النسوان
... هساع قابل مايعرفني ولا شايفني راسي يوجع اريد افوت ابدل وانام
عالية.... اششو تعالي بالحرام مو مال واحد يسألج
.... كضبتني من ايدي وفوتتني للأستقبال
اشرف گاعد من شافني وگف الحيلوا
... فوتي عليش واكفة يم الباب
... هاا اي مشيت گعدت على القنفة ام النفر تا مايگعد بسدي
... هههههه يولو شبلاج عليش هالكثر خايفة مني
... لا من شنو اخاف
.. عجل تعالي هين
... مرتاحة بمكاني
... خوش
... راج جاب طبلة وجة گعد جدامي
.. دحجي علية خليني اتمتع بشوفة هالوجه الحلو
اوووف فيروزة شكثر حلمت بهاي اللحظة
اكعد جدامج وانتي حلالي والحمدلله تحقق حلمي وصار واقع
..... ساكتة ماعندي حجي اكولوا
... ماعندي صبر لوبيدي هساع اخذج وياي
... وين تاخذني
.. هههههههه البيتنا
... اي هم عايزة
... اول وتالي تجين يلا عادي صبرنا جثير
قابل بقت على هالجم يوم
... گضب ايدي سحبتها منو
... فكيها عاد گبل جنت اسولف وياج اكثر من هساع
... قابل بيدي غير مستحية مو كل البنات يخجلن بهيجي يوم لو اني راس ابوية اكرع
.... ههههههههه اي هاي فيروز الأعرفها
يولي فرحان والفرحة مو سايعتني
.. دوم ان شاء الله
.... اخذتج غصب عن اليرضى والمايرضى
خلي يجون الشماتة ويشوفون شلون صرتي حرمتي وصار الردتة واخذتج من عيونهم
..... كلاموا مثل الكفخة القوية الجتي براسي وصحتني وطيرت الخجل مني
منو قصدك؟!
.... حسبة ابالي لاتشغلين راسج الحلو بيها
.. ما احب اللف والدوران والحجي المبهم من اتريد اتكول شي وضحوا
.. شگاعد تحجين ترى ما احب هذا الأسلوب اني مو جاهل جدامج ولا خايف تا ما اوضح كلامي
.... زفرت بضجر عجل گول منو قصدك
خالي شاهر موو
... اذا عرفتي بعد عليش تسألين
... نار شبت بية
ومنو السمحلك تحجي علية جدامي خالي شمسويلك وسويتوا شمات واخذتني من عيونوا
... الاخر مرة اكلج احجي عدل وياي
بعد كل السواه وجاعد ادافعيلوا. نسيتي شلون ردتي تموتين بسببوا
لو نسيتي كلما اطلبج يرفضني
هساع صرتي على ذمتي ورجال اليفتح حلكوا وياج
... فاكة عيني ومصدومة عجل اشكد حاقد علية
ويمكن اخذني بس حتى يكسر خشم شاهر
اسمعني زين شاهر واهلي اياك بيوم من الأيام تجيب سيرتهم بسوء جدامي
خالي ولي امري وشيسوي بية مرخوص
... لاتخليني اطلع من طري بهيجي يوم
منين جة ولي امرج شششاهر مالو اي حكم عليج مدري عليش هالكثر مكبرين راسو
اتسي وبعد حتى حجي ما اقبل تحجين ويا بين ما اخذج وتطلعين من هين
.. شگاعد تخربط شنو تاخذني واطلع وانساه وبعد ما احجي ويا
انت واعي للگاعد اتكولوا
محد بهاي الدنيا يكدر يمنعني من بيت اهلي ومن الحجي ويا لان شاهر كل دنيتي
.... فيروز اتجفي الشر بالحرام لو ما اعرف بيج على نياتج حان عرفت شغلي وياج
... لا مو على نياتي وقاصدة كل كلمة هذا الگاعد تمنعني منو عرفتوا گبل لا اعرف أبوية تربيت تحت جناحوا صارلي اب واخ وخال
من اريد ابجي ابجي بحضنوا من اسوي فاينة اختل بظهروا من أحتاح شي اطلبوا منو
احجي علية ولاتحجي علية
اشرف عيونوا غدن نار عافني وطلع بدون مايرد علية
مشيت للغرفة الكل يسألني شصار ووين اشرف
هه عبالهم گضيناها غزل واحضان
خلصن گلبي زكحت بيهن كافييييييي اريد ابدل راسي راح ينفجر
رنا.... يمة فلا تنجرع الله يعين المسكين عليها
امشي نطلع. قبل لا ننكفش
نجوى... طلعن البنات فيروز وكفت تمسح المكياج بغضب
شبيج اشو گاعد تتكاونين ويا حالج
.... شجابني على الخطوبة والصخام اخ منج نعامة
كولوا منها
... يولي شصاير
.... لج ما صارلوا ساعة من عقد علية گعد يتشمت بشاهر جدامي ويحجي علية
.... انگص لسانوا الحيوان يروح فدوة البابا
.... خلاني اشك هو مأخذني بس حتى ينتقم من شاهر
... لا مو الهدرجة هو من البداية جتل حالوا تا يأخذج
.. ما ادري لعبت نفسي
حتى لو ما عندي مشاعر اتجاه شاهر ما اقبل احد يحجي علية
... بهاي هم حقج حتى اني ضجت منو
يلا ارتاحي ولاتشغلين بالج اكيد بعدين يراجع نفسوا ويحس بغلطوا ويراضيج
.. الله كريم
نجوى...امشي صبوا عشا
... ما اريد
.. يولي امشي هساع اذا ما گعدتي تأكلين شيخلصج من ماما وعماتي يجيبن الحرمل ويبخرنج عبالهن انحسدتي
.... ههه اي والله يسونها
هنا من الصبح مستلماتني بالبخور
... حقهن دحجي حالج صايرة تخبلين
.... القرد بعين امو غزال
... فان حظج هساع انتي قرد عادي
بس سويتني امج واكيد هم قرد
امداج
... ههه يلا جدامي خلي اكل لكمة وارجع انام راسي غدة طبل
طلعنا للربعة ااكل هين خالاتي وولدهم وبناتهم.
وجدة صفية وبناتها كلنا التمينا على السفرة نتعشا سوة
دك تلفون بابا
نافع... هلا والله شخيار العاش من سمع هالصوت
... بابا سكت وشكلوا تغير
اكيد هذا شاهر جدة وماما الوجوه اصفرت
نافع... يمعود فهمني شبيك ليش متعصب الله وكيلك من صياحك كلشي مافهمت
... بابا يسمع والوجه احتقن
بسرعة فتح المايك
شاهر... هاي تاليييييييها تكسر حجاية اخوك مو جدام الكل وگفت وكلت شئئاهو هو مسؤول عن فيروز وين راح حجبييييييك انتظرتني اسافر وانطيتها وحتى ماكلفت حالك ترفع التلفون وتبلغني
صرت مثل الغريب ابن عمي يحجي وياي ويگولي جنت بمشية اشرف وفيروزززز
نافع.... شنو هالكلام انت مو منطي موافقتك العمتي وعلى هذا الأساس تمت الخطوبة
عمة صح هالكلام لو لا
نعيمة... هاا اي اني كوتلك موافق لان ادري بي مايعترض الينية جت قسمتها خما تظل هييييين
شاهر... ييييييييمة ششششوكت اني وافقت صافة ويا أشرف علية بسسسسسيطة خلي ارجع الا اهجم البيت فوك رؤوسكم
.... شاهر سذ الخظ
نافع.. اطفال گدامكم وتضحكون علينا زواج ومستقبل تبنوا على جذبة
وانتي ام بيتي وجهالي بعد هذا العمر تقشمريني
... اكف وليدي اصيل ماعليها اني الكوتلها تسكت هي رادت تحجي ومنعتها لا تلومها لومني اني
... بابا عاف الأكل وگام
ماما عيونها تجري
... ها يمة مو كوتلج گلبي لاعب ولاتسوينها شاهر ما راح يسكت
هساع اني شسوي راح اخسر رجلي واخوية
... شاهر شدعواه هالكثر ضايج لاتخافين يوم يومين وينسى لاتكبرين السالفة.
اصيل. كمت رحت وره نافع لكيتوا بالغرفة لوجة غادي دم من العصبية اول نوبة اشوفوا هيج متعصب
نافع
... اشش ولا حرف روحي منا ما اريد اسوي شي اندم علية افضل شي عوفيني هسة
... بروح اهلك اسمعني وبعدها شتريد تسوي سوي
.. ششششتحجين وشتبررين تضحكووون علية اصيل ولج صرت هلكدوتني بين خواتج وازواجهن
... والله ما ردت اسوي هيج امي ظلت تزن على راسي گالت شاهر من يعرف انخطبت مايحجي شي هو هساع لان ضايج مايقبل ينطيها
تقشمرت ومشيت وراها بداعة جهالنة لاتزعل مني
.... بهالبساطة تريدين اتصرف عادي وما ازعل تجفصون بمصاريني وتكولون لاتضوج
لج خططتوا الخطوبة وزواج ووكعتوني. ويا ششاهر
اصيل نسيتي شاهر اخوج احزام ظهرج الماتركنا بيوم يفضلنة على نفسة
شايلنة بروموش عينة هذا جزاتة هيج نصغرة
.... كافي لاتكول شئشئي ارحمني والله القهر جاعد يأكلني كولوا من امي ساعة السودة الطاوعتها بيها
. روحي منا الخاطر الكائنات اذا ماتطلعين اني اطلع
... عفت الغرفة وجيت يم خواتي ما ادري شسوي وشلون راح اراضيهم
فيروز... صياح شاهر لساعوا يرن بأذني گرفصت بالفرأش خايفة
شاهر غادي بركان واشرف يكره شاهر
الله يستر من الراح يصير
ثاني يوم گعدت راسي يوجع ظليت بفراشي ماتحركت
نجوى بعدها نايمة
أمنة... صباح الخير هم زين گاعدة گومي غسلي وبدلي
. شعندي مبدلة من صباحيات الله
... أشرف هين يريد ياخذج تا تسوون تحليل علمود عقد المحكمة
... وشكو مستعجل البارحة انخطبنا
... يولي نصي حسج البنوات نايمات
الولد يريد يعقد عليج گبل لا يرد للرمادي
... خالة بروح ابوج هساع وگتوا ما دحجين المشكلة الصارت روحي واصلة الهين وراسي يريد ينفجر خلي يأجل العقد هساع غير نوبة عود نعقد من تخلص المشاكل
.... هو صدك مو وكتها ابوج زعلان طلع من الصبح بدون ريوك وأصيل الدموع تجري
وشاهر من يدگون علية مايرد على احد
هم زين قادر طمنا علية
وامي ام الفواين ضغطها معلگ
... كل هذا الگاعد يصير وتريدين اتصرف عادي
... هساع تورطت شگول للولد
... گوليلوا راسها يوجع وتعبانة اخذت مسكن ونامت لو يضرب مدفع يم راسها ماتگعد
... ماشي خلي أشوف شيگول
أصيل... اشوف واخوا طلعوا ضايجين
البيت وضعوا متوتر
نافع حتى على الغدا ما جة
للمغرب ويا جيت نافع فاتوا شاهر وقادر
تفاجئنا بجيتهم المفروض بعد أسبوع يرجعون
امي جت تسلم علية اشرلها تكف
... لاتگربين مني
... شبلاك وليدي غير مشتاگتلك
.. وليدج الصغرتي مو الدستي على كرامتوا وخليتوا كلمتوا قدرها وقدر المداس سوة
... يمة عليش مكبر السالفة الصار حزة شيطان
انت واشرف گرابة لاتخلي الغضب يعمي عينك وگلبك
... من انعل ابو لابو هييييج گرابة
لاتكفرينييييي
جدام الكل تهجم علبة وهددني ياخذها غصب عني
وانتي ششششسويتي ساعدتي وكسرتي كلامي
نافع.... شاهر بروح اهلي ما جنت اعرف انت ماتدري للأسف انلعب علية مثل ما انلعب عليك
... شششلون صدگتهن عليش ما اتصلت تا تسمع الموافقة من ثمي
... وداعت جهالي ردت اتصل بس اخ من كيدهن
نجوى.... بابا تخبل شكو غراض بالمطبخ كسسرهن قادر ورجل عمة امنة بالگوة گضبوا
دار راسة وطلع
گال بعد مالي بقية هين وبحياتكم متشوفون وجهي
جدة تتوسل بية ماسمع منها ترك البيت وطلع قادر طلع وراه
بابا نافع
كال اني هم مالي مكان اهنا
للاسف اصيل انخدعت بيج عبالي فقيرة وعلى نياتج طلع تحت السواهي دواهي
اصيل. صخام الصخمني هسسساع زين يمة دحجتي الصار اخوي ورجلي تركوا البيت مو كولتي تطمني مايصير ششي فهميني شسوي وين انطي وجهي
امنة.. يولي بسج دحجي حالها لاتروح تتخربط ول نجوى ناوشيني علاجها وجيبي ماي
يمة گعدي شاهر هساع متعصب من يهدي يرجع
.... ناوشت العلاج العمتي جدة شفتها ترجف ماتكدر تحجي بالكوة گدرت تخلي العلاج بحلگها
دورت الفيروز ماكو من سمعت حس بابا ختلت بالغرفة وقفلت الباب
افتحي الباب لاتخافين محد هين بابا راح
فيروز... انهزمت للغرفة وقفلت الباب كل الحجي سمعتوا صياحوا صم اذني
نعلت الساعة الوافقت بيها شورطني
جنت منجعمة وگاعدة شجابني على هالطلابة
فتحت الباب النجوى
.. هاا سمعتي الصار
... اي
.. اوووف لاتبجين بلكي من يهدون يرجعون
... خايفة تكبر السالفة ويروح يتكاون ويا اشرف ويصيرون عداوات.
... لا ما اظن بابا عقلوا جبير
بس هساع مدري شبلاه.
... هذا حظي الفاين
... سكتنا اثنينا رغم الهوسة الصارت
جنت مركزة بقادر اااخ يوجع گلبي كل المصايب تهون الا مصيبتي
فيروز... الوضع بالبيت متوتر جدة تخربطت عمو عمر وخالة امنة اخذوها للمستشفى نزلوا سكرها وضغطها وجابوها للبيت.
باليل الكل فاتوا ينامون
اخذت رقم اشرف من خالة امنة
فتحت تلفوني من البارحة قافلتوا اخاف لا شاهر يدك
اتصلت على اشرف
... الوو
... هلا اشرف
.. هلا بست الحسن شعجب دكيتي يمكن وأخيراً صحيتي على روحج
.. شبيك اكلتني وشربتني على شنو اصحى على روحي
... عبالي عرفتي غلطج وخابرتي تعتذرين
. .. اكولك انت شبيك اشو جثير متغير مو نفسوا اشرف القديم
من سوالفج اكو وحدة بيوم خطوبتها تتكاون ويا زلمتها وتتجاوز بالكلام علية الخاطر شخص مايعودلها بشي
.... هاا يعني هم راح نرجع النفس السيرة
على العموم اني ما خابرتك حتى احجي بهالسالفة
... عجل ليش مخابرة مشتاگتلي هه هم ما اصدك الصبح طلعة ماطلعتي سلمتي علية
... شبلاك يمعود خليني احجي الكلمتين العندي واولي
.. اي گولي
بدون مقدمات اريد افسخ الخطوبة
.... الظاهر نعاسة روحي نامي ولا تدوخيني بهالسوالف التعبانة الناس باليل تتغازل واني اشبع مغثة
.. اشرف مگاعد اتشاقى اريد افسخ الخطوبة وكل واحد يروح الحالوا
اني وياك مانتوألم من اول ساعة بديناها مشاكل
... الحد هساع صابر عليج لاتخليني اسمعج كلام مايعجبج بطلي خبال بنتي
وتهيري منا الشهر انتي يمي تصبحين على خير
... الوووو خرب سد التلفون بوجهي
شلون راح اخلص منو ما ادري
موبايلي بعدوا بيدي دك شاهر
رجفت لا ابد ما اكدر اجاوب
ظل يرن مكالمة ورة الأخرى
ويدز رسايل متعصب
كاتب جنتي تحجين ويا جاوبي لا انعل شيب اهلج
كومة رسايل سب وفشار كمت ابجي من الخوف
نجوى... واگفة بالمطبخ ويا سهاد بنت جدة صفية
دك تلفوني بابا يتصل جاوبتوا
حجة بعصبية امشي انطي التلفون الفيروز وخلي تجاوب لا اجي هساع اخش بخطيتها وانعل اهل اهلها
ركضت للغرفة فيروز گاعدة تبجي مديتلها التلفون
هاج بابا يريدج ويگول اذا ماتجاوب يجي هساع عليج
... خليت ايدي على حلگي اشهك وارجف.
اخذت التلفون بس سمع شهكتي
زگح بصوت عالي جفلت ولشتي رجفت........
يتبع
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!