_وشاء الحب_
( بقلم بسمة البياتي)
_البارت الثالث و العشرون _
شاهر.... يمة شنو رايج تخطبيلي .
.. يمة جاعد تحجي صدك لو تقشمرني
.... شوكت مقشمر عليج حتى هساع اقشمر
... لا محشوم وليدي بس بالحرام من الفرحة مو مصدگة
شاهر بنفسو جاعد يطلب يتزوج يول هذا حلم لو علم
... هالكثر عال گلبج وما ادري
لوما تجوزت بدال الحرمة حرمتين واثنينهن من اختيارج
اصيل.... صفنت على شاهر معقولة هو هم عينوا من ايات وكيف تا يأخذها
نعيمة... هساع عوفك من هالحجي شوكت اروح اخطبلك عندي الك شلون عروس
فيروز....عيني تفتر بين جدة وشاهر
احساسي هالنوبة يختلف عن هذيج النوبة ما حسيت بوجع يمكن گلبي تعود على الصدمات
شاهر يحجي بدون مايصد على الجهة الگاعدة بيها
.... منا الجم يوم واجي أگلج توكلي ومشيلي
.... يايمة شنو سالفك كل نوبة اتگولي
نفس الكلام بس لو اعرف شتسوي بهالجم يوم يرتاح گلبي خلي امشيلك دام الشغلة حامية خير البر عاجله خاف انوب تتراجع
.... شنو جاهل جدامج واتراجع شوكت منطيج كلمة ومتراجع عنها
بنفسي جاعد اكولج خطبيلي اريد استقر بحياتي
هساع اريد ارتب اموري وافض الشغل العندي تا اتفرغ للخطبة والجواز
.... لاتضوج هذا هو التشوفوا. بس لا تتأخر علية
الله يفرح گلبك وليدي مثل مافرحتني اهجس قالب ثلج نزل على افادي
.. عساج دوم يالغالية يلا صاعد اناملي شوي گبل لا ارد للمحلات
فيروز... صعد شاهر مشيت بكسل طبيت للغرفة انجضعت بسد نجوى
عيني جت على ايات راحت تهاني وجة دورج
خايفة لا يرجعلي نفس الأحساس بيوم خطوبتوا وارجع اتعذب من جديد من ادحجهم سوة
اااخ يا شاهر خشيت بخطيتي وخليتني افسخ خطوبتي وهساع راح تتزوج للمرة الثانية جدامي
اهجس اختنكت ضميت راسي بالمخدة وبالگوة نيمت حالي
نجوى.. فتحت عيني
فيروزة بسدي نايمة اخذت خصلة من شعرها مشيتها على وجها واذانها
انزعجت ظلت تحرك براسها ههههه
يولي گومي جوعانة خلي نروح انسوي عصرية ونأكل
.... فكيت عيني ما اريد مو جوعانة
دحجت ايات مو بالغرفة صديت على الحهة الأخرى وغمضت
.. يولي شبلاج شو مكشرة الخلقة الظهر عفتج مابيج شي
... كلشي مابية اطمني
... والله جذابة قابل ما اعرفج كولي شبلاج خما تكاونتي ويا جدة لو بابا
... تحسرت لا ماتكاونت أبوج يريد يتزوج
.... هههه يولي بس لا گاعد تفكرين بكلام جدة من گالت الأيات عن قريب تصيرين وحدة منا
.... ولا خليت كلامها بالي
ابوج بنفسوا جة الظهر تحاجة ويا جدة وگاللها بعد جم يوم روحي مشيلي
.... عاا تمشيلوا على منو
... ايات قابل اكو غيرها
... لاتضوجين والله بعدج زغيرة وان شاء الله تاخذين الأحسن من بابا
.... القاهرني جدامي يطلب تخطبلوا
يريد يفرح ويتزوج واني ياهو اليدگ الباب يريدني يرفضوا بدون سبب واخر نوبة خلاني افسخ خطوبتي لان يكره اشرف
عليش ماتركني اكمل خطوبتي واتزوج واطلع من هين تا آرتاح وانساه
.... ماعندي جواب اني هم حايرة بتصرفات بابا ما اعرف شنو اليريدوا بالضبط
شنسوي هذا الله وهاي حكمتوا الظاهر مكتوب علينا شلعان الگلب وما نضوگ طعم الراحة
.... اااخ يانجوى لو بس اعرف شنو الضامتوا علية جان أرتاحيت حزن الدنيا بعيونج ولو تقشمرين الكل ما تكدرين تقشمريني بيج شي والخلقني وخلقج بيج شي
... ارتبكت وعرگت گصتي اريد اضيع السالفة
هااا يولي شو نسيتي عمايل شاهر وركزتي على بنتوا شعندي تا ضموا عليج امشي ناكل وطز بالدنيا
.... اي اي ظلي تهربي يجي يوم و;عرف قابل اطيرين صايرة مثل ابوج ما اعرف شنو البراسكم
.... كوووومي ادري بيج راح تستلميني حاصل فاصل
طلعنا سوة ايات گاعدة بسد جدة ودك سوالف وضحك
الله يعينج فيروز لشوكت تظلين متحملة تشوفين كل هذا جدام عينج
فيروز... مر خمس ايام على السالفة جدة تلوب بس تريد تاخذ الموافقة من شاهر تا تخطبلوا
ايات زاد اهتمامها بحالها وبجدة
من ترجع من الدوام ايدها وايد ماما بكلشي
حتى اهدوم شاهر هي التكويهن وترتبهن الو
أصيل... باليل طبيت للغرفة بيدي جنة اريد أنومها نافع صافن عقلوا مو هين
رضعت جنة وخليتها بالكاروك
وكفت تا اطفي الضوا
.... عوفي وتعالي گعدي كدامي عندي سالفة وياج
... جيت گعدت جدامو اي گول
.. اجوني خطابة على فيروز
.... ول يسلمك سد السالفة ما ناقصين وجع راس ما صار شهرين من فسخت خطوبتها وتريدها ترجع تنخطب عوفها هساع خلي تكبر شوي عليش مستعجلين على زواجها
.... هسة غير تسأليني منو الرادها وتستفسرين قبل لا تنطين جوابج
.. ياهو الجان مايفرق عندي الگبلوا ابن خالها وبيومين انتهى كلشي ما حصلنا غير وجع الرأس والمشاكل
..... زين اذا كتلج اني انطيتها شنو ردت فعلج؟!
... لا أكيد جاعد تتشاقى ليش الموضوع
بيدك وبيدي وتنطيها هاي حياتها خما تريد نغصبها
تعال هين وگولي منو هذا البسرعة انطيتها الو بدون مقدمات
.... شاهر
.... منو شاهر؟!
.... شنو منو شاهر بس لا صار بيج زهايمر ونسيتي اسم اخوج
... ههههههه بالحرام عليك سولف تخرب ضحك واني الفطيرة جاعدة اناقشك ومعلوك دمي هههههه
..... هههههه أستغفر الله فهميني ليش الضحك ترى مجاي. اتشاقى
.... غابت ضحكتي دحجت بعينوا مبين جاعد يحجي جديات
اكف وحدة وحدة تا ما اكع من طولي بهاليل
شاهر اخوي خال بنتي شبي
.... شاهر اخوج بس مو خال بنتج هذا امر واقع مانكدر نضحك على روحنا بي
اي شاهر طلب مني فيروز وانطيتها اله
.....شششلون فهمني شششلون اخوي يطلب بنتي الي هي بعمر بنتوا وهو الرباها هساع شسوي اشك ثوبي واطلع للشارع
بروح اهلك گلي الگاعد تحجي جذب اهجس گلبي راح يغيب علية
.... اهدي شجاج الطفلة راح تگعد شبيح تخبلتي شاهر اخوج مو غريب شنو هاي ردت فعلج
..... عجل ششلون تريد تكون ردت فعلي واني جاعد اسمع اخوي يريد بنتي
نفسي گامت تلعب من السيرة
..كافي اصيل ماكو داعي للبجي والصياح
فيروز بنت بت خالتة لا اختة ولابنتة ولا بنت اختة ولو ادور الدنيا كلها ما الكي احسن منه الها
... طيييبن براسي من صخام بوجهيييييي نافع اصحى على حالك لاتخلي حبك الشاهر وصداقتك بي تعمي عينك هاي بنتك شششلون جاعد تحجي برود يول تصيحلوا خالو اكبر منها ب ٢٠ سنة متجوز مرتين الناس شششراح اتكول هي يول هي شراح تحجي من تسمع فكر بيها
لا هذا مو شاهر ابد شششلون نفسوا تدني عليها شلون گدر يفكر بيها
منين اجتوا الجراءة ووكف جدامك وطلبها
مجاعد أكدر استوعب الكلام اهجس راح اموووت
... اذا تظلين تصرخين وتبجين اكيد يصير بيج شي دكافي يا عيني
ليش دتحسسيني السواه. شي حرام
طلبها على سنة الله ورسولة
ما طمع بيها بالحرام شاهر ذهب و علم
لو غير واحد بنفس هذا الموقف ويطلبها مني يمكن اخلص علية
بس شاهر بالذات ما اكدر لان معاشرة وأعرفة مثل ما اعرفج
بنتي يمة تدلل ماتضيع
الخاطري اهدي ولاتكبرين السالفة
... هي جبيرة من گاعها امووووت وما اتقبلها ولا راح أخليك تظلم بنتي سسسمعت شگاعد اكول اموت وما اخليك تظلمها
... هااا هيج صار الحجي ماشي اصيل لعد سمعيني زين بروح اهلي اذا سويتي مشكلة ويا لو عاتبتي وتعاركتي اعوف البيت وأطلع ولهنا وتنتهي عشرتنا
.... گعدت اضرب على راسي هساع سشوي وين انطي وجهي
شاهر شلون كدر يفر عقل نافع دخيلك ربي مجاعد اكدر اهضم الموضوع
للصبح ابجي عيني ما غفت كام نافع يبدل ظليت بالفراش ما كمت حضرت الريوك ولا خبزت
هو هم ما طلب مني عافني براحتي
فيروز.... گعدت ساعة بالتسعة
ماما مو بالمطبخ مثل عوايدها
بس جدة گاعدة
اكول جدة عجل ماما وين
....لساعها مگاعدة نافع گال مالها خلك يمكن متمرضة
حتى العجين مختمر وظل على حالو خابرت رنا تا تجي تخبزوا
... هسا وگت العجين شبيها ماما اروح اشوفها
طبيت للبيت فتحت بابا الغرفة لكيتها نايمة عفتها ترتاح ما گعدتها
تريكت وكملت الشغل جت رنا خبزت ووكفت تسوي الغدة ..
فاتت ماما الوجة تعبان وشادة رأسها
هاا ماما شلون صرتي جدة گالت مريضة
... مابية شي بعد عمري شوية وجع راس من السهر جنة جثير تگعد باليل
... انطينياها واكعدي تريكي تا تاخذين علاج
... ما اريد معدتي مو متقبلة الماي مو عاد لأكل
رنا.. خالة بس شوية حتى لو لكمتين دحجي حالج شغادي
... ماما الخاطري يلا گعدي معلية لأزم تأكلين ترى أوكلج بيدي والله
.... العبرة خنگتني واني ادحج عليها والله زغيرة شراح تسوي اذا عرفت خالها رايدها ربي اعيني على هالبلوة الوگعت فوك راسي
من ملحتهم اكلت لگمة ورجعت للغرفة جنة ظلت يمهن
نجوى... هلا والله اليوم رنا هين
.... زلمتي راح يطلگني من كثر ماظالة افتر هين وهين
.... لا مايسويها المسكين وين يكدرلج
اكول عجل وين ماما شو مو مبينا
فيروز... سودة علية صبحت مريضة
.... يووو شبيها خلي، ابدل واروحلها
.. لا تركيها گبل شوية مديت راسي بغرفتها لكيتها نايمة
اصيل... جة نافع حجة وياي ما جاوبتوا مل تركني وطلع
صاحوني على الغدة ما ردت ما اكدر أگعد جدام شاهر واتصرف عادي كانوا مو صاير شي
فيروز.. صبينا الغدا وگعدنا ناكل
بابا وشاهر مدري شبلاهم
مبينا الضوجة على وجوهم اكلوا شوي وگاموا
ورة الجاي غسلنا المواعين وطبينا للغرفة
من نامن نجوى وأيات اني هم عيوني شكلت وغفيت
اصيل... ما اكدر اظل ساكتة لأزم اسوي شي
من نام نافع شلت التلفون وطلعت من الغرفة دكيت على احلام وابتسام گوتلهن تعالن عندي سالفة ضرورية
ورة شوي جني جنت واكفة باب المطبخ ماخليتهن يطلعن حس طببتهن للربعة وسديت الباب
دغيت امي على كيف تا تكعد
احلام... يولي احجي عاد مو هديتي حيلي من الخوف
ابتسام... بالحرام نفس حالج مگصوصة من هين
انوب من دحجت شگلها والربطة المشدودة براسها خفت بالزايد
نعيمة... يولي اصيل شبلاج اليوم وعليش مدربة (دازة) على خواتج
اصيل.. جمعتكم تا تلگون حل المصيبتي گبل لا اتخبل لو اطك واموت
احلام... هساع غير تحجين وتفضينا كلساع مهبطتنا
.... يولن شحجي وشكول البية مايتسولف ماكو عاقل يتقبل السالفة وحتى المخبل مايعقلها
نعيمة... بالحرام اذا ماتحجين اكوملج بالمداس ازرك جلدج بطيتي مرارتي
.... اخوي العاقل الرزن الي الناس تحلف بعقلوا وتفكيروا
مدري شبلاه انضرب على راسو وطلب فيروز من نافع
ابتسام... ههههه يولي شلج بهالسالفة اكيد المرض مأثر على عقلج ومفتهما غلط ومجرجرتنا بهالظهرية وموگعة گلوبنا
... هااا دحجتوا محد بيكم صدگ لان السالفة من گاعها ماتخش العقل عجل اني شگول من البارحة نار شابة بية
احلام... يعني معنى كلامج صدگ وشاهر رايد فيروز؟!
.... اي اخوي يريد بنتي الرباها البعمر بنتوا الي تنادي خالي كولولي اكو مثل مصيبتي احجوا بردوا گلبي المعلوگ بنار
ابتسام... وكلام الله الحد هساع مو مستوعبة السمعتوا شاهر وفيروز لا هاي جثير واكفة
احلام... شاهر طلبها منج لو منين؟
... من ابوها واليگتلني بالزايد نافع منطيها الو حتى بدون ما ياخذ موافقتها ورأينا
ابتسام... يمة شبلاج صافنة احجي شي يولو بس لا ارتفع سكرها من الصدمة
نعيمة... كل هذا الدك واللطم والبواجي لان شاهر خطب فيروز
اخوج الي يخاف عليج من نسمة الهوا الباردة هساع صار وحش وجاعد ينهش بلحم بنتج
الي هي اصلآ مو بنتج
.... فكيت عيني وحلكي من جواب امي ابد مامنتظرة هذا الرد
يمة يعني انتي قابلة على السواه شاهر
... وعليش ما اقبل دام هو رادها بنفسو فيروز الو
يولي مرتين تجوز بالتواسيل مني يوكع لساني يلا يقبل هاي اول نوبة يسويها وهو يختار
وشبي شاهر مو عاجبج عين الله التحرسوا
الله يحبها التصير من نصيبوا
نسوانو گبل رغم عيبوبهن تحملهن جثير ودللهن
يولي عمامكم يتمنون ياخذ منهم واتحداج هساع لو اروح اطلب بناتهم البعمر عشر سنوات يگولولي گبعي وأخذي
ابتسام....يمة الخاطر الله شگاعد تحجين زين والناس اليسمعون شيگولون وگرابتنا بالحرام يالفون اشكال والوان الحجي علية
على ان رباها مثل بنتوا وتنادي خالي وتالي طمع بيها واخذها
... وجعة امي وابوي بگلب اليحجي هو منو اليخلص من كلام الناس بشي وبدون شي يحجون
والحمد لله الجاعد نسوي لا يغضب الله ولا حرام
يوم يومين ويطببون لسانهم بثمهم ويسكتون
اصيل... وين انطي وجهي ردتج عون تالي صفيتي ويا هساع المن اشكي ضيمي ومنو يساعدني
نافع خلى يمين علية ما احجي ويا شاهر ولا اعاتبوا
... طلع زلمتج اوفى منج وغزر بي الزاد والملح الأكلوا ويا شاهر الويل والباقي عليج
مستكثرة السعادة على اخوج الوحيد
.... احلام انتي مو جنتي تريديلوا ايات شبسرعة گلبتي واقتنعتي بفيروز
.... هذا الحجي گبل وهساع تغير من عرفت گلبوا يميل للمصگوعة
واذا تجون للصدك محد يناسبوا غيرها
من يوم يومها جنية محد يگدرلوا غيرها لو غادي نار بكلمة منها يبرد
هو رباها وحافظها يفهم عليها وتفهم علي
يولن اخوجن تعب جثير لاتستكثرون بي الراحة
وانتي اصيل وروح الميتين اذا حجيتي شي وعترضتي
اغضب عليج اليوم الدين ومن اموت اخلي امانة وذمةبرگبة الكل
مايخلوج لاتحضريلي فاتحة ولاتوكفين على جنازتي وگبري
... بجيت من كل گلبي اخر امل عندي ضاع غصب عني ابلع قهري وأسكت
احلام... كافي اصيل لاتكبريها كلام امي صح
ماتلكين الي يخاف على بنتج ويدللها غيروا ولاتفكرين بالعمر يولي شاهر يخبل اليشوفوا يگول بالعشرين لايگلها ولايگتلوا
.... طلعت من الربعة ظهري مكسور انسدت جميع الأبواب بوجهي
طبيت للغرفة امسح بدموعي الجاعد تنزل بدون ماتوكف
نافع فتح عينو دحج علية استغفر وصد للجهة الأخرى
فيروز... العصر گاعدة ويا البنات نشرب جاي ويا الكليجة
ماما صافنة والهساع مبينا مريضة
نجوى... ماما حبيتي شلون صرتي
... الحمدلله مابية شي لايظل بالكم
... جت جدة الوجه يضحك تربعت جدامنا
ايات. خالة اصبلج جاي
... ما اريد اتعبج بنيتي
القوري قريب من فيروزة هي تصبلي
... لا خالة شنو السالفة قابل شمسوية اخدمج بعيوني واني الممنونة
... اصيلة وبنت اصل الله يحميج ويحرسج
فيروز...اشتغلن بالصبغ
جريت القوري صبيتلها وحطيتوا جدامها.
.... عفية ببنيتي النادرة
... فكيت عيني هاي منو النادرة
نجوى...دغيت فيروز هاي من شوكت جدة تمدح بيج الله يثخن لبنكم
... يولي ما ادري اني هم انصدمت
جدة مو طبيعبة شبعتني مدح شكيت مبدلينها انوب گلبي لعب اسم اخاف جاي تودع
باليل بابا وماما راحوا ينامون شاهر بعدوا ما جاي ظلينا گاعدات ويا جدة
ندري بيها ماتنام اذا ماتشوف شاهر جة للبيت
فات شاهر گعد بسدها
عين ايات طايرة علية
جت رغد گالت فيروز تعالي بابا يريدج
نجوى... هااا يولي خما مسويتلج فاينة منا منا ودز عليج.
... فان حظج يعني بس من اسويلي مكسورة يدز علية
... اي والله قابل مجذبة
نعيمة...يمة كومي شوفي شيريد واسمعي كلاموا لاتعلين گلبوا شيگولج گولي حاضر
... هاي شكو عليش تخوفيني شو حجيج مدري شلونوا
نجوى... والنبي اني من يمي خفت مبين جدة تعرف شيريد منج
... يولي روحي عاد لاتظلين واكفة مثل التمثال
... رايحة
نجوى... راحت فيروز
اهجس الوضع غريب جدة فرحانة وبابا على وجهو ابتسامة خفيفة
ايات.... شاهر اصبلك عشا
... لا خيتي مشكورة تعشيت ويا الولد برا
نعيمة... مظل شي وتجي حرمتك تا تبطل السهر برا
شاهر... ههه يعني اذا اتزوج احبس حالي بالبيت شلج بهالسالفة يمة
... لا مو تحبس حالك بس تقلل سهر عجل خما تترك حرمتك وتسهر ويا ربعك
..الظاهر عرفتي بالسالفة
... هههه اني امك ماينضم علية شي
.... الغريب ماتوقعت تكيفين جنت محسب احساب افوت بحرب الها اول مالها اخر
... الله لايكولها وليدي اني شعندي غيرك الشي الوحيد اليهمني اشوفك مرتاح بحياتك
.... بوجودج ان شاء الله
نجوى. بابا باس جدة من ايدها وراسها وكام صعد. اني وايات اندحج عليهم ومو فهمانين شي شبلاهم اليوم الكل يتصرف بغرابة
فيروز.... هااا بابا صحتني
... اي بابا تعالي فوتي
.... طبيت ورديت الباب وراي
ماما گاعدة ومخلية ايدها على راسها حتى ما دحجت علية
... ادري بيج عقلج جبير مو صغير وبسرعة تستوعبين الكلام لهذا راح ادخل بالموضوع بدون مقدمات
بنتي اجوج خطابة واني
... جفلت ماخليتوا يكمل عفيييية بابا ما اريد مو كافي الصار بية هذيج المرة ما اريد اعيد نفس الغلط مرة ثانية
...حبيبتي هسة انتي شفهمتي وگبل رفضتي خلي اكمل كلامي بالأول
.... سكتت ورجعت گعدت
..... الشخص الرايدج ما الكي احسن منه أأمنج عنده اذا تأخذي اطمئن عليج
اعرف محد يحبج ويخاف عليج بگده واني انطيتج اله
... شنو انطيتني اله
عفية بابا انت شجاي تحجي ومنو هذا المكيف علية هلكد
... شاهر
.... يمكن هسة اذا احجي الصابني بوكتها الناس راح اتكول تبالغين شايفين من شي حاد يخترق الجسم هذا الصابني هجست الكلمة مثل السهم نبت بگلبي شاهر نفسو لو غير شاهر حتى الكلام ضاغ مني
... ها بابا شو سكتي
....جريت نفس طويل وزفرت
همست وشنو التريد احجي انت مو اتكول انطيتج الة بعد ليش جاي تسألني عن رأيي
... ميخالف هم حاب اسمع منج
.... دحجت بعيون مليانة دموع
اذا الموضوع بيدي لا ما موافقة ولا راح اوافق هه نسيت شاهر خالي
.... انتي مو صغيرة وواعية وتدرين شاهر مو خالج يابنتي صدگيني ماتلگين احسن منه ويجي يوم تدعيلي لان خليتج تصيرين من قسمتة
... عيون ماما تجري وتنود مثل الميتلها عزيز
هساع عرفت شبيها وشنو سبب مرضها
اصيل... مو كافي نافع خلي عندك ضمير لاتظلمها ترى هاي بنتك ما لاكيها بالشارع خاف الله بيها
.. اصيييييل وتالي شحجينا.
... عفتهم يتكاونون
وطلعت من غرفتهم صعدت الغرفتي ردت ابقى الحالي
طبيت بفراشي وبجيت.
بعد كل هذا السواه بية هساع جاي يريدني عجل السالفة اذا هالكثر سهلة عليش ما اخذني گبل تهاني عليش عذبني
مثل اللعبة بيدوا يتركني وكت اليريد ووكت الي يريدني الكل يوكف ويا غصب عني لأزم اقبل
نجوى... مديت راسي من باب الغرفة
ايا محمحمة انتي هين واني گاعد ادورلج
اكفي عليش گاعد تبجين خما بابا نافع ضربج
طبيت اركض واحاجيها
... شهكت بالبجي خليت ايدي على وجهي
... يولي احجي شبلاج عليش تبجين.
...شاهر طالبني من بابا وبابا موافق
... هاااا تحجين صدك لو تتشاقين.
.... بربج هاي حالتي مال شقى
.... يعني راح تتزوجين بابا مو مصدگة حضنتها الف مبروك عمري
.... عليش كاعد تباركيلي ما اريدوا مو طايقتوا
الهساع بعدوا مايحاجيني
شبعت ضيم بسببوا ليشششش من الأول ما اخذني كوليلي ليششش بسبب انانيتوا اشرف دعى علبة دعوة تكسر الظهر
... يعني من صدك ماتريدينوا عجل وين راح الحب الجنتي تحجين عنو
.... موجود هين واشرت على گلبي بس مو هيج ياخذني يولي ماكلف نفسوا يطيب خاطري بكلمة
اني مووووو لعبة بيدوا عندي استعداد ادوس على گلبي ولا ارضى بهذا الذل
... يا ذل بابا كل تصرفاتوا ادل على حبوا الج
ويمكن ما راد يحجي تا ما يأملج خاف لا ابوج يرفضوا
.... ما اكدر اقتنع بهذا الكلام شاهر كسرني شنسى يولي من ضربني بيوم العترفتلوا لو انسى الصار بية بيوم خطبتوا
لو انسى سهري للصبح بسبب غيرتي من تهاني
جبت وجدامي اشوفهم سوة
لج لوما يصير عدها اسقاط جان هساع عندوا ثلاث جهال منها وعايشين مرتاحين
واني الي الله
... اهدي حبيبتي والماضي انسي وافتحي صفحة جديدة لاتخلين الحقد يعمي گلبج.
بربج سؤال اذا رفضتي واخذ ايات راح تتحملين هالشي.
.... سكتت ماعندي جواب مشاعري متخربطة مگاعد اكدر افكر عدل
بقيت الثاني يوم بالغرفة ما طلعت منها ولا رحت الذاك البيت
ماما الصبح جتي حجت وياي
كالت اذا ماموافقة محد يگدر يغصبج لو اعرف اطلگ من ابوج ولا اخلي يدمر، حياتج
اختنكت بالزايد حتى علاقة ماما وبابا راح تخرب بسببي
باليل رجع بابا حجة وياي وهالنوبة بصيغة امر
.. حضري نفسج الجمعة التجي العقد
... ماما تخبلت تكاونت ويا وصار مصايح بينهم
جنة من الصوت خافت كامت تبجي جيت شلتها تا تسكت
صحت بيهم كافي الخاطر الله كافي
ما اريد تتكاونون بسببي اني موافقة خلص سدوا السيرة
... يولي معليج بيهم محد يكدر يجبرج
نافع.. أصيييل وتالي
.... بس الطفلة راح يصيبها شي من الخوف
موافقة وهاهية
عفتهم وطلعت
نجوى.. اليوم العصر عماتي يمنا
صاحوا ماما وفيروز هم جني گعدن
جدة سألت ماما
.. هااا يولي شصار من السالفة شو ظلت سكتة
...ايات جاعدة ماكدرت اطلع البگلبي
التريدونوا صار شنو شاهر مابلغج العقد يوم الجمعة.
.. جدة هلهلت بعلو حسها وصلت على النبي
البنات وايات يريدن يعرفن شنو السالفة ظلن يستفسرن
نعيمة... ول مصگوعة تعالي احبج
وهاي جدام الكل شتطلبين يجرالج بس فكي ثمج واشري
فبروز.... جدة جرتني تبوس بية
الحد هساع ما گاعد افهم على حالي شبلاني مو هذا الجنت اتمناه عجل عليش مو فرحانة
رنا.. هسسساع غير تفهمونا شجاعد يصير هين مو الفضول جتلني
نور.. يمكن فيروز راح تتزوج ماادحجون جدة هلهلت وجاعد تباركلها.
احلام... شاهر خطب فيروز والعقد الجمعة
نجوى. البنات ولا وحدة نطقت فاكات حلگهن
بس عالية وضعها عادي الظاهر عدها علم
أيات... شلون يعني فيروز وشاهر هاي شلون رهمتوها
نعيمة.. وعليش ماترهم فيروز تحل علية جوازهم لا هو عيب ولا حرام
.. هااا قصدي مو عايشين سوة وهي بعمر بنتو وتنادي خالي
... جثير زلم تجوزو بنوات ازغر منهم وعايشين احلى عيشة
شاهر مو جبير لساعوا بعز شبابوا عين الله التحرسوا
... هاا بيها الخير
فيروز.. البنات محاوطاتني يسالن ونجوى تجاوبهن
ايات ضاجت فاتت للغرفة.
نعيمة... هساع الخبر اكيد راح يطش بين عمومتنا والجيران
اي واحد يسألكم شلون صارت گولوا امي خطبتها الو
احلام... وشمعنى
.... ما اريد احد يحجي علية ويالفون سوالف ما الها داعي
اصيل... هو هذا كل الهامج شاهر وبس وهالجاهلة محد يفكر بيها
ابتسام... كافي اصيل اتمنيلهم الخير بدال هالحجي
.. تحسرت ونزلن دموعي الله يسعدهم
نجوى... ايات بيوم العرفت عبالك انضربت طلقة بگلبها لصبح اسمع حس بجيها
الله يعينها الظاهر هاي هم حبتوا
ثاني يوم الخبر طش وياهو اليسمع ينصدم ويجي يسأل تا يتأكد
جدة ذكية من جت حرمة عمو خضر
گالتلها انتي مو نصحتيني اخطبلوا بدون علموا وأخلي جدام الأمر الواقع واني اخذت بشورج وسويت الگولتي علية خطبت فيروز من ابوها
.... عجل مو گولتي ايات تناسبوا اخطبها الو
.... فكرت بحجايتج من گولتي شاهر احلى منها
عيني جت على فيروز زغيرة وحلوة وهو الربها من ياخذها شمايصير بينهم ما يكدر يتركها مالگي احسن منها الو
.... السويتي عين العقل بالمبارك عليهم ان شاء الله يوم التفرحين بشوفة جهالهم.
..... الله يسمع منج امين يارب
نجوى.... حرمة عمي خضر طششت الخبر والكل عرف جدة هي المختارتها الو و خاطبتها
فيروز... بابا خابر عمامي وخوالي بلغهم حتى اذا بيهم احد يريد يجي مايتحجج ويگول محد بلغني
اني وشاهر من يوم العرفت بي طالبني بعد ماشوفتوا ولاتصادفت ويا
گبل العقد بيوم حدرنا للسوك اخذنا ملابس للمهر وشترينا الذهب
رجعنا المغرب تعبانات
وكالعادة ما رحت الذاك البيت حتى الاكل نجوى تجيبوا الي للغرفة
كاعدة والبنات باليل
وخالاتي وازواجهن وولدهم گاعدين ويا شاهر وبابا وجدة بالربعة
عالية... تعالي گابليني تا احفلج
ما اريد هو عقد خما عرس
.... يولي تعالي لاتخليني اربطج واحفلج
... بالكوة جيت كعدت جدامها بدت تحفلي روحي شايغة من الوجع
صار حس صياح قوي برا وصوت مراكض
عفنا الغرفة وطلعنا نركض تا نشوف شكو گبل لا نصل للمطبخ
سمعنا حس طلقة عبالك بنص البيت وزاد المصايح.........
يتبع
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!