_وشاء الحب_
( بقلم بسمة البياتي)
_البارت الثاني و الثلاثون _
نجوى... بابا هو وصلنا للدكتورة وراح بالگوة حابسة دموعي كلمة ما حجيت ويا ماما ما أكدر أدحج عليها خجلانة منها
أدري الصار مو ذنبي بس يبقى موقفي صعب الله لا يحط وحدة بمكاني وتضوك الگاعد اضوگو
زعلت من فيروز وما ادري عليش زعلت منها وهي الگاعد تسوي المصلحتي
عقلي متخربط والدنيا طالعة من عيني
صارت عيادة الدكتورة جدامي وگفت مابية حيل اكمل الدرب رجلي انشلت
فيروز... صديت لگيت نجوى واكفة
رجعت عليها شبكت ايدي بيدها
نجوى قوي حالج الگاعد نسوي المصلحتج صح صعب بس احسن ما نظل گاعدين وحاطين ايدنا على خدنا بلكي نكدر نلكي حل وترجعين تعيشين حياة طبيعية حالج حال كل البنات خلي نفوت ونگطع الشك باليقين تا نعرف شلون نتصرف
.... لاتتركيني خايفة والله خايفة
أصيل.. عليش واكفات يلا خلي نفوت
نجوى دحجي علية شما جان وضعج تاكدي راح اكف وياج وما اخلي الهوا يصيبج فوتي وانتي رافعة راسج امج بظهرج حياتها ترخصلج
... مسحت دموعي الگاعد تنزل بغزارة
طبيت وياهن رغم جايين من وكت بس نسوان جثير موجودات
گعدنا ننتظر سرانة كلما يقرب السرة گلبي دكاتو تزيد
فيروز... اجة سرانة ماما گالت انتظروا هين خلي افوت گبلكم
تركتنا وفانت
اصيل... خشيت للدكتورة دحجت عليها تقريباً نفس عمري
سألتني عن حالتي
ما ادري شلون ابدي وياها بالسالفة
... تفضلي عزيزتي ليش ساكتة
.... عندج بنات
دحجت علية بستغراب
... ممكن اعرف شنو الدافع من سؤالج عيوني ترى برا هواي مراجعات دينتظرون سراهن مو مال نگعد نسولف
... اخذيني على گد عقلي وجاوبيني حجيت وياها بدموع
... اي الحمدلله عندي وحدة
... هساع راح اجاجيج من ام الأم
بنت اخوي يتيمة ماتت امها وهي بعمر السنة
ربيتها وصارت بنتي واغلى من حالي
واليوم عرفت بيها مكسورة
مالها ذنب ولا سوت الحرام نغدرت وهي بعمر الست سنوات من ابن خالها
الدكتورة زتت القلم وركزت وياي
حجيتلها وضع نجوى وفهمتها الصايبها
احجي وابجي واتوسل اي اتوسل وعندي استعداد ابوس ايدها ورجليها تا تساعدها
احلفج ببنيتج ساعدي بنتي احنا عرب واذا احد درى بالصار محد يصدكها
والله العظيم ماغلطت وماكو بفقرها وأخلاقها والناس تشهد بهالشي بس اخ من غدر الدنيا
.... وينها لأزم افحصها واشوف وضعها والأضرار المسببة الها
.... طلعت صحتهن
... گاضبة ايد فيروز ما اكدر اتركها
اهجس نفسي لعبت ودخت دموعي غوشن عيني
الدكتورة عينها عليه وعلى فيروز لان هذيج هم حالها أمر من حالي
ماما اشرت للدكتورة علية طلبت مني اروح انجضع على. السدية تا تفحصنني
صرت اناشغ مثل الجاهل وماما وفيروز يشجعن بية
لحظات صعبة موقف مخجل احساس بشع
شكو كلمة بقاموس اللغة العربية ماتوصف. حالي الدكتورة عاملتني بعطف
كملت فحص دحجت علية ببتسامة كالت عدلي ملابسج وتعالي
اصيل... جت للدكتورة مبتسمة اريد اسألها اخاف
الدكتورة....تعالي نجوى
ماكو داعي الهذا الخوف بنتكم سليمة وغشاءها موجود الظاهر كانت متعرضة الجرح ولان طفلة طاب بسرعة
نجوى... لشتي رجفت وشعر جسمي قشعر
يعني شنو بعدني بنية
... غشائج سليم
لاتخافين من شي تكدرين تتزوجين وتمارسين حياتج بشكل طبيعي
فيروز... نجوى گعدت على ركبتها بالگاع تبجي بحس عالي ماما نزلت المستواها گعدت يمها وحضنتها
بهاي اللحظات من الفرحة گلوبنا تريد تگف نجوى ماتحملت تخربطت بحضن ماما
بالگوة صحت گعدناها على الكرسي
الدكتورة... هواي حالات تجيني مثل حالتج اب يتحرش بنتة اخ بأختة جد بحفيدتة عم خال ابن عم ابن خال زوج اخت زوج عمة زوج خالة
واكو بنات خسروا حياتهم
والسبب الأول والأخير من الأهل
حتى لو كانت طفلة شلون أأمن اخليها تبقى بغير بيتها مهما كانت ثقتي بيهم لكن الحرص واجب
الوحوش البشرية والنفس الدنيئة موجودة بكل مكان
اكو بنات سكوتهم يعم عليهم واكو تجي تشكي الأمها الأبوها بدال ميصدگوها تنضرب وتتعنف ويگولون هاي طفلة اكيد دتكذب وتتخيل
حتى الأولاد ميرهم يبقون بغير مكان
والتوعية مطلوبة
الأم مدرسة تعلم تنصح توعي تفهم اطفالها الصح من الغلط
مو بس تهتم بالأكل والملابس والنظافة
اصيل... والله لا اني ولا ابوها نقبل تظل
بيت جدها بس اوف من جديتها وعمايلها
... المهم خلي يكون هذا درس الكم تتعلمون منه
بعد ومتثقون حتى بأصابع ايدكم
فيروز... تشكرنا منها طلعنا والگاع مسايعتنا من الفرحة الكل يدحجون علينا
مستغربين وضعنا ودموعنا
اكو حمامات قريبة من العيادة رحنا غسلنا
نجوى... الله عليكم خما هذا حلم واگعد منو والكي حالي بنفس القهر والضيم والحسرة
اصيل... لا يبعد امج مو حلم يولي عليش ماحجيتي من البداية ماجان تعذبتي ولا ذبلتي وشلتي هالحمل الثگيل على جتافج
... لاتعاتبيني لهساع خجلانة منج والله ويا نفسي اخاف اسولف
فيروز... كافي مو وكت عتاب المهم عدت على خير الف الحمدلله
اكلكم امشو نروح للسوك
اصيل... كل عقلج يولي ياسوك دحجي حالنة من الهبظة لهساع لشتي ترجف
... عجل خما تريدين اخابر شاهر ويجي يشوف شكلنا ويشك تدرين بي ماتفوتو فايتة
خلي نفتر شوية وبعدين ندك علية
يلا امشو ما اريد كسل
نجوى.. اهجس حالي مثل المسجون محكوم علية بالأعدام
واليوم ثبتت برائتو وطلع افراج
ياربي لو اشكرك عمري كولو هم اكون مقصرة الف الحمدلله ماتركني وحشى تترك عبادك بضيجة بدون ما يجي الفرج
فيروز... دورت محل حلويات مالكيت وكفت سألت دلوني على واحد لازم نمشي مسافة
اصيل... حبكت الا تشترين يولي خلي نرجع للبيت ووصي شاهر يجيبلج
... مااا هساع اريد
امشو ولاتكثرون حجي
... امرنا لله
... فلوسي النطتهن الي جدة الهساع موجودات يم ماما قبل لا نطلع اخذت منهن جنت حاسبة حساب اذا نجوى بيها شي لو اعرف ادفعهن كلهن تا اخليهم يرجعوها مثل گبل
وصلنا المحل الحلويات
كتلهم هاي صينيتين البقلاوة الكبار طلعوهن جدام المحل واي واحد يفوت خلي ياخذ
بالبداية استغربو بعدين طلعوهن برا
حتى المواعين السفري اشتريتهن منهم
بيدي احط بالمواعين وانطي للناس المارة
اكو جثير من يشوفون الحلويات يشتهوهن وما يكدرون يشتروهن العين بصيرة والأيد قصيرة
اصيل.. عززا فيروز يولي تركي من ايدج خلي الولد يوزع لا يروح احد يصورج وينشر الصور بالحرام شاهر يذبحج
نجوى.. ماتحملت رجعت ابجي موقف فيروز يمكن بسيط بس عندي شكبروا لو اختي من امي وابوي ماتحاف علية بكثرها ولا راح تسوي الهي جاعد تسوي نست حالها ووكفت توزع بيدها
بالكوة ماما سحبتها
اصيل.... خابري شاهر عاد يولي مو صرنا فرجة للناس
... ههههه يلا ماشي هساع اخابر دكيت على شاهر گال قريب منكم شوية واصل
رجعت اخذت علبتين حلويات كبار. ومشينا
للمكان اليوكف بي شاهر وصلنا وره خمس دقايق اجة
شاهر... شگالت الدكتورة
... مابية شي الحمدلله
... يستاهل الحمد
اشو حالكم مدري شلونو
اصيل...هاا لا ماكو شي تدري بيهن يحبن التفرفر تعبني بالمشي
.... الله يساعدج عليهن
فيروز...ازدحام وگفت السيارة اكو جهال جثير ونسوان
بيهم الي يجدون وبيهم الي يبيعون كلينس ومي وهالشغلات.
شلت علب الحلويات وفتحت الباب
شاهر... اكفي لج وين مولية
... ماسمعت منو حدرت فتحت العلبة وصحت للجهال سودة علية جوي يتراكضون
نجوى.. خرب غيرتها بابا غدى نار حدر متعصب راح عليها
شاهر... امشي اصعدي لا انعل ساس اهلج
... خفت منو انطيتو العلب گوتلو عجل انت وزعلهم بدالي
حطيتهن بيدو وفلتت ههههه
اصيل.... اليوم فلا علية بيج انتي ويا تنجازون
.... هاا ماما شو تبريتي مني
... يولي دحجي السيارات الواكفة شلون حدرتي جدام الناس
... نذرت اوزع بيدي الله عليج دحجي فرحت الجهال
اصيل... ابتسمت الله ينطيج على كد نيتج
.... امين يارب
السيارات الورانا ظلن يدكن هورن لان مشى السير اجة شاهر مو جر نار
ما حجة شي وسكوتو خوفني
نجوى... همست الفيروزة تعالي نامي يمي اليوم شكل بابا مايطمن يمكن يسويج قطع زغار ويشويج
... بدون ماتكولين اليوم ما اشوف حالي الو اول مانصل للبيت اختل منو
وصلنا للبيت
شاهر على اساس يرجع للشغل شو هذا حدر اني بهالحزة صرت اسرع من البرق طبيت اركض
هم زين خالة احلام هين ادري بي يحترمها لان اختو الجبيرة جيت ختلت بسدها
مو مال اختل يم نعيمة ادري بيها تغدرني
نعيمة... شمفينة وجيتي ختلتي
احلام... ها يولي شبلاج مو جنتو يم الدكتورة عليش جاية خايفة
... غير من سوالف اخوج مدري عليش متعصب
أصيل... كعدت تعبانة وعيني على ام الفواين واضحك
شاهر.... فيروززززز تعالي
... هاا وين اجي تعبانة مابية حيل اكوم وبطني الهساع توجعني
زكح بية جاعد اكولج كووووومي
احلام... صلي على النبي خوية عليش تزكح ومتعصب شسوت المثبورة
نعيمة... اكيد فاينة من فواينها الماينعدن
فيروز.... اني احجيلج اشتريت حلويات ومن وصلنا للتقاطع دحجت اكو جهال فقرة گلبي انكسر عليهم حدرت انطيتهم الحلويات بيها شي
شاهر.... شششششلون تكفرني وعليششش ما گلتيلي اني احدر انطيهم الشارع من اولو الأخرو سيارات. وسيارة المرور وشرطة وامة الثقلين اهناك وانت محدرة تتمخترين جدامهم
... سكتت ما اكدر اجاوب لان صدك متعصب راد يجي يسحبني من يم خالة
حطت علية يمين يتركني ومايسويلي شي
... خوية تدري بيها طايشة وتصرفت بدون وعي
والسوتو من طيبة گلبها اكيد بعد ماتعيدها
سايمة الله عليك لاتسويلها شي
.... هذا هو خيتي الخاطرج
.... شاهر بالگوة گضب حالو عافنة وطلع
استلمتني نعامة ترزل بية عفتها وصعدت بدلت
باليل رجع شاهر مدلغم مايتحاجة صعد گعد بالصالة الفوك يشرب نرگيلة
اني هم لا صعدت ولا حاجيتة شنو قابل مارايدة روحي
نجوى.. ههههههه اليوم هم تنامين هين
... اي مشتاگتلج
... مشتاگتلي لو تخافين اعترفي ماكو احد غريب
.. اني ادري أبوج شبلاه عبالك طابة موزعة بحمام الزلم
.... ههههههههه اشكثر احب سوالفج
....ابتسمت واني اشكثر احب ضحكتج
.... حضنتها قوي احبج فيروز عسى الله لايحرمني منج
... ولايحرمني منج يبعد عمري
نجوى تحبين قادر
... اووووف فيروز قادر جرحي الثاني ادعيلي انساه واتحمل شوفتو عريس الغيري
.... انتي كدها والي تحملت هذيج المصيبة راح تتحمل كلشي
... المهم شرفي محفوظ وبابا راسو مرفوع بية ماكو اهم من هالشي عندي
عفية عليج حبيبتي
اصيل... باليل حاجيت نافع گوتلو اريد تشتري ذبيحة وتوزعها للفقرة
...صار شنو عندج نذر
... اي نذر قديم جنت ناسيتو والبارحة حلمت وتذكرتو
... ماشي باجر ان شاء الله اروح اشتري
... ما أريد فطرة لحم تفوت للبيت كولو يتوزع
... الله يتقبل نذرج حبيبتي
... أمين يارب
فيروز... الثاني يوم شاهر مايحاجيني الظهر وره الغدا ما صعد فوك نام بالربعة هففف اشكد عنودي
طبيت لكيتو غافي دحجت بالطرف الأخر جدة بسابع نومة
جيت يواش خشيت وره ظهرو حس بية بس ماتحرك وظل مغمض خليت راسي بركبتو
حبيبي مو كافي زعل والله اشتاگيتلك صارلي يومين مو نايمة بحضنك
.... روحي من هين وحمدي ربج ماسويتلج شي كلما اتذكر وكفتج بالتقاطع اغدي نار
... والله بعد ما اعيدها
... عوزج بعد تعيدها بالحرام اذبحج واگطج للجلاب
... مجرم
... تركيني انام
... امشي نام فوك اريد احضنك واراضيك
... ما اريد
... هممم متأكد
جدة رفعت راسها وگالت
... يمة اصعد وياها دحجها راح تموت
.... شاهر ضحك بصوت عالي
ظليت فاكة حلكي
ادري مو جنتي غاطة بالنوم شگعدج لو هذا حظي حتى بجدر المرگة تطلعيلي
... هو حسج يخلي الواحد ينام
...هذا ياحس گاعد اهمس بأذنو
بس اووف منج اذاناتج اذنات الفارة
شاهر كفخني يواش
... مگصوفة الرگبة مو اجي اكص لسانج
يولي اثگلي عشنا وشفنا النسوان هي تطلب الزلم جبت خمس بطون واني الأخر يوم بعمرو اخجل منو
... ايباه عجل منين جوي الخمس بطون
تخجلين وهالكثر لوما خجلانة اشكثر تجيبين
شاهر.... هههههههههههه انعل ابليسج انجعمي ول يابة
نعيمة... يول دكفخها على ثمها لو منطيها العين الحمرة تجر عدل محد مفين حظها غيرك
... اگضبلها العودة تا ترتاحين
حتى النومة طارت شلون بلوة هاي گومي نصعد فوك
نعيمة... وياريت لو ختلاتكم بالغرفة بيهن فايدة
...شاهر حجة بحس ناصي انعل ساس اهلج وگعتينا بثمها
... اني شعلية من البداية گوتلك كوم ظليت تتعزز علية
سد حلكي بيدو واخذني وصعدنا
الكل التهو بالتجهيز العرس قادر عيني على نجوى. تتصنع الا مبالاة جدامهم وادري بگلبها گاعد يحترك. محد يحس بيها غيري مريت بنفس المرت بي
قادر نفس حالها شكلو مابي قطرة فرح اعصاب ومايتحاجى يكاون ذبان وجهو
وضعي هالأيام مدري شلونو وين ما الكي فراش ومخدة انجضع واغفى
خالة امنة صارلها اسبوع يمنا جت من الرمادي
گاعدات هي وماما جيت جريت المخدة ونمت
امنة. فيروزة شبلاج كل شوية غافية
... جسمي متكسر واهجس نحلانة بس اريد أنام
.... يولي يمكن حبلة مببن على شكلج التعب
.. هااا والله مدري بس ماعنذي اي اعراض الحمل غير النوم
أصيل... صارلي يومين شاكة بيج بس ماججيت
امنة.. موعد الشهرية شوكت
... بعدلها يومين
اصيل... من يفوت موعدها أخذج تحللين اخاف اخذج هساع ومايبين شي
... عفية لاتحجون شي جدام جدة والله تخبصني خبيصة اذا طلع ماكو شي
امنة.... ههههههههه يبوووو والله اذا درت تأخذج حافية تا تحللين.
..... والله تسويها هي بدون شي ماكلة گلبي
وره شوية صعدت الغرفتي نمت
نجوى.. گومي يولي صار المغرب
... بعدني نعسانة
... دگومي شكثر تنامين الخاطر الله
اجة بابا
... عجل وينو
.. گاعد بالاستقبال ويا عمو عمر
وقادر گولت اسمو وتحسرت
... هاا خوش طلعت غسلت وجهي وحدرت وياها
ماما وخالة بالمطبخ يهيرون العشا
جدة بالربعة بيدها السبحة تسبح
رحت يمهم بالمطبخ دحجت من الشباك عمو عمر وقادر طلعوا
رسل. هاا وين رايحة تعالي سوي الزلاطة لو هاي هم ماتعرفيها
... اشرتلها بعدين
عفتها ورحت للأستقبال شاهر بيدو التلفون مدري شگاعد يسوي رفع راسو وابتسم
شاهر.. گبل شوي لگيتج نايمة ماگعدتج
... گعدت بحضنة خليت رأسي على صدرو حضنتو قوي
بادلني الحضن وباسني من راسي
شگاعد تسوي بالتلفون
... يعني جيتي الحضني تا تشوفين شجاعد أسوي
.... لا مو بس هاي شو صايرة مدمنة على حضنك وعطرك لوبيدي ما أخليك تتحرك من هين الهين
فاتت جدة غمضت عيني بقهر وتالي ويا هالحرمة وين ما أروح ورأية
وخرت من حضن شاهر گعدت بسدو وشبگت يدو
نعيمة... ادري ماتستحون حبكت الا هين گولو خطار عدنا والولد رايحين رادين
.... والله هو محد يروح ويرد غيرج انتي بس باقي تجين تنامين بنصنا
شاهر.. كافي عاد بالكائنات مليت من سوالفكم كوناتكم گلها جدامي من وره هالسوالف راح اترك البيت ألج والها تا ارتاح وترتاحون
... يمة حرمتك وكحة وادبسز ماتحترم انت لو تلوي اذنها تجر عدل
هساع مو هذا موضوعي اريدك تتسوك للعرس ما اريد قادر يصرف شي ضيوفنا احنا المسؤولين عنهم
... اكيد وبدون ماتگولين من باجر المسوك تلگينو هين
...الله يرزقك من اوسع ابوابو ويتطيك الوليد الي يفرح گلبي وگلبك
... الله يديمج النة بوجودج ان شاء الله
فيروز... أشو بس يفرح گلبج وگلبو واني گلبي، مركون على صفحة
.... انتي تنجعمين بيج خير جيبي مو بس فالحة باللسان والوكاحة.
اي تدللين هساع اجيبو واجي بس ادوس الدگمة
... جاعذ تصنف المصگوعة
... شاهر استغفر بحس عالي سكتنا أثنينا
ظل يگلب بالتلقون خليت راسي ويا وأدحج
مديت ايدي على طلبات الصداقة هم اكو بنات دوم اصفي وهم الكيهن دازات
هاي مو ذاك اليوم دزتلك ورفضت الطلب شو هم راجعة دازة
... شعرفني
.. هاا شو جيب جريت التلفون وانطيتها حظر
نعيمة... الغيرة الزايدة عن حدها مو حلوة راح تعم عليج لاتصيرين مثل الگبلج شاهر مايحب الحرمة التخنگو بغيرتها
.... معلية بغيري وشاهر ماضايج ولامشتكي من غيرتي دغيتو بيدي ها حبيبي تضوج اذا اغار عليك
شاهر.. الي قصر بالجنة من عيشتي وياجن
... هاا شنو قصدك ماتريد اغار موو
... غاري يابة غاري هي ظلت على الغيرة
.. هاا نعومة سمعتي وليدج شگال
.. من أگول لاعبة بحالو ومخبلتو محد يصدگني
... الزلم مايتأمنون لأزم تظلين ادورين وراهم وتغارين
شاهر گضبني من شعري ورفع وجهي علية
... منو ذولة المايتأمنون
... شبلاك حبيبي مو عليك على الزلم
فك عينو وزگح شگلتي ولج
خليت ايدي على حلگي عززا هاي شجفصت
نعيمة.. فان حظج والچلب عضج ونگص لسانج
على هالدگة الماتتسولف
... عززززا والله مو قصدي الظاهر جفصت
شاهر يعرف بية ما قاصدة سكت جدة ظلت ادردم من تعبت طلعت
خليت راسي على جتف شاهر خما زعلت مني والله مو قاصدة مدري شلون حجيتها
انت زلمتي وتاج راسي
گومني من مكاني ورجع گعدني بحضنو
.. مايحتاج تحلفين ادري لسانج فالت منا غاد انتبهي من تحجين شي خصوصاً جدام احد
.... رجعت خليت راسي على صدرو وحضنتو
صار حبيبي تدلل
... شبيج بنيتي شكلج تعبان خما مريضة
...حجيت واني مغمضة يمكن يمكن مو اكيد راح تصير أب للمرة الثانية
صار هدوء ماجاوبني فتحت عيني رفعت راسي علية صافن بوجهي وعيونو تلمع
... شلون عرفتي
... گوتلك يمكن مو أكيد ما اريد تتامل ويطلع ماكو شي
ماما وخالة يگولن من وضعج وشگلج مبين حبلة بعد يومين أروح احلل
... گومي البسي صاية وتعالي
... عاا وين رايحين
.. ول يابة لاتكثرين حجي طالع انتظرج بالسيارة
.... يمعود اكف صارت ظلمة وماما اتكول يمكن الحمل هساع مايبين
.... وتالي فيروز عليش ماتسمعين الكلام
.... ماشي رايحة اصلآ ضوجة خلي نفتر شوي
صعدت بسرعة لبست صاية وحدرت
سألوني وين رايحة
كوتلهم ضوجة اريذ اطلع اشم هوا ويا شاهر
عفتهم وطلعت هم زين نجوى مو بالمطبخ ما اريد تضوج عبالها صدك طالعين نفتر وهي مو ويانة
... صعدت بالسيارة شاهر گاعد يخابر
كمل وگال
... حجبت ويا نزار اكو مختبر قريب من صيدليتو الولد صديقو راح ينتظرنا
... ماشي شاهر اذا ماكو حمل أكيد راح تضوج
.. لا ما اضوج لاتفكرين بشي اذا الله قاسملنة يصير واذا ماكو هاي حكمتو والحمد لله على كل حال
وصلنا للمختبر اكو بنات اثنين وولد
شاهر سلم على الولد وگالو اني من طرف نزار
اجت البنية اخذتني سحبت مني دم وگعدنا ننتظر النتيجة
خايفة ومتوترة عبالك صارلي عشر سنوات مزوجة وماعندي جاهل
جت المحللة جايبة النتيجة كمت تلگيتها ابتسمت وگالت مبروك حبي التحليل أيجابي أكو حمل
صديت على شاهر بفرح وهو فرحتو يمكن أكثر مني
اتشكرنا منهم وطلعنا صعدنا للسيارة
اخذ اديني الأثنين وباسهن وجه وگفة
... هساع شلون اريد احضنج يبعد عمري وعافيتي
... ههههههه مو هسه خلي نصل للبيت واحضني للصبح
.... اطلبي كل التريدي وتتمني هساع يجرالج
... ضحكت ممممم أريد رمان
... هههههههههههه جاعد أكولج التتمني اتكوليلي رمان
... حنت اتمناك وصرت الي بعد ماظل شي بنفسي
... اذا اكو شخص محظوظ بهالدنيا هو أني يولي الله يحبني قسمج الي
...احبك
أعشگج ول يابة
. يلا لاتغلس أريد رمان
. هههههه جنج على رمان صار وتأمرين
..وكف اشترالي رمان وبعدها حدر جاب حلويات وكيكة
ماتحملت أنتظر أصل للبيت خليت علاگة الرمان بحضني وگعدت أكل
شاهر كل شوية يصد علية ويضحك
وصلنا للبيت
اكولك شاهر هساع لاتگوللهم شي
... عليش ماتريذين أكول اول وتالي لأزم يعرفون خلي أمي تفرح يولي
.... والله مستحية
وصلنا للمطبخ صوت خالاتي وولدهم والبنات اكيد جايين يتعللون
دحج الكل هين والله استحي
... ههههههه ماشي يلا فوتي
... بقت الرمانة بيدي مايجي من گلبي أزتها
طبينا سلمنا
صاحوني جيت گعدت بسد رنا وخالة امنة
رنا. شهيتني انطيني شوية
.... انطيها. اكلت شوية وظلت تمطك
... فان حظج يولي حامظة شلون جاعد تاكلينها
.... شبيها اطيب من الحلوة
هجست العيون علية وخالاتي يتبسبسن ويا ماما
رنا همست خاف حبلة وجاعد تتنسين
امنة... اي يمكن اني واصيل هم شاكين بيها
رنا... خالة دكي على نزار خلي من يجي يجيب تحليل منزلي
.. خاف مايبين
.... نجرب عادي
..... يمعودات شگاعد تسوون مايحتاج
حللت گبل شوي وطلعت حامل ارتاحو
خالة امنة صاحت صلوات وجرتني باستني
صاحت يمة افرحي راح يجيج الحفيد التتمني ان شاء الله
شاهر دحج علية وضحك
صارلي ساعة اوصي بي تا مايحجي تالي اني فضحت حالي
الكل يباركولنة خو جدة لو بيدها تگوم ادبج من الفرح
نجوى... هساع اني حايرة
رنا... عليش حايرة
.. الراح يجي اني اختو لو خالتو
اهجس السالفة مثل بطتنا بطت بطن بطتكم
... ههههههههه والله حقج
فيروز.... خالتة خالتة غصبا عليج اختي معليج بأبوج
امنة.... الله يديم هالمحبة البينجن
.. فيروز. ونجوى امين ان شاء الله
جدة من اليوم فرضت علية اوامر اول شغلة ممنوع نحجي جدام احد ونكول حامل بين مايثبت الحمل بطني
ممنوع اتحرك لا اروح ولا اجي ولأزم اظل مجضوعة ومعلية لابشغل ولا شي
وصلت درجة طلبت مني باليل انام يمها
شاهر گاللها عاد مو الهدرجة لاتخافين ماسويلها شي
وهي اتكول لا والله لا انت ولا هي تتأمنون ختلاتكم جثيرة كل شوي متسحبين وصاعدين فوك
شاهر من كل عقلة يتعصب هههههههه
والمصيبة اني نساوتي صارت بي لوبيدي ما اوخر من حضنو
وهو مكيف يگول هم يجي بطران يلومني عليش اعشگج هالكثر شنو البيج مو حلو
ول يابة حتى نساوتج عسل مثلج
اكثر النسوان ينفرون من زلمهم وانتي مكانج بحضني
اجاوبة بفخر اي حتى تعرف شكثر احبك ومتعلقة بيك
ماظل غير اربع أيام العرس قادر راحوا جابوا خالة وسمر من الرمادي
بيتنا امتلى بالخطار خواتها وعمات سمر من غير باقي گرابتنا
نص يمنا ونص بيت خالة احلام
نجوى... يوم بعد يوم قوتلي تتحول ضعف گاعد اتعب من المكابرة لو حجر هم يهتز جدامي التحضيرات
جدامي ادحج سمر تتهير القادر الي المفروض هذا عرسنا هاي فرحتنا هذا يومنا
لكن حكمة الله اقوى من كلشي
تجري الرياح بما لا تشتهي السفن
فيروز وياي ماتركتني من اضوج واريد ابجي اصعد الغرفتها
غرفتي البنات بيها
اليوم حنتهم خالي حال البنات بدلت وترتبت ما اريد احد يشوف الحزن الي بعيوني لأزم ادوس على گلبي واكمل للنهاية
سمر من فرحتها ماگعدت گضت الحفلة ترگص
للمغرب گالو قادر راح يجي تا يحنيها
تركتهم وخشيت الغرفة ما أريد يشوفني وينقهر ولا اريد اشوفو يگعد بسدها ويحنيها
صعب والله العظيم الموقف صعب
بس حظي الفاين عمة امنة صاحتني طلعت وصار قادر جدامي دحج علية بقهر ونزل راسو
مشبت سريع وطبيت للمطبخ
اجن البنات گالن قادر طلع گبل لايحنيها مدري شبلاه
من بين الكل سراب صاحتني رحت يمهن هي وسمر
سراب. أكولج نجوى هو قادر گبل مو جان رايدج
.... ترى ماكو داعي الهذا الكلام هساع
.... اي ادري بس شو من دحج عليج ضاج وطلع اخاف باجر بالعرس هم يضوج
لو تبقين هين احسن
... سمر من شكلها مأيدة كلام اختها تركتهن وطبيت للغرفة
فيروز....من دحجت ايات وأهلها جوي صار عندي لعبان نفس هالخلقة ولا اطيقها
دحجت نجوى حجت ويا سراب ومن شكلها صار شي طبيت للغرفة لگيتها تبجي
هااا يولي عليش تبجين
... ماكو شي
.. شحجيت اني مو گوتلج ممنوع تضمين شي علية
.... حجيتلها كلام سراب واني ابجي
شو هاي تركتني وطلعت وره شوي جابتهن ورجعت
ووياهن رنا وخوات سمر لكبار
فيروز... العرس عرس ابن عمتها مو من حق بشر يمنعها تحضرو
واذا قادر ضايج هاي مو مشكلتها مفهوم
متوليتها وتحاسبنها على يا اساس.
.. ليش شصاير
... اسالي خواتج گاضبات نجوى ومانعاتها تحضر العرس
تدرين لو يصل هالحجي، القادر شيسوي يهد الأول والتالي
سمر.... اني معلية هاي سراب حجت
سراب. ول جذابة هاي مو جانت فكرتج وحجيج عليش زتيتها براسي
رنا. سمر من خطبج اخوية لان فقيرة وماعندج مكر عليش تخلينا نغير نظرتنا عنج
.... سمر وسراب وحدة تزتها براس الثانية
سراب عدها فيوز بعقلها تخبلت من دحجناها راح تتخربط سكتنا
بس الشهادة لله
خواتهن لكبار لعبن بيهن لعب وگعلهن دك رزايل واعتذرن من نجوى
ثاني يوم العرس اني ونجوى والبنات رحنا للصالون اريد اشغل نجوى با اي شي تا ماتضوج
أصيل... ورة الظهر البنات موهين بس النسوان الكبار
فات شاهر وكف حجة ويانة وگال اريد اصعد اسبح
هدومي محضريهن لولا؟!
... اي خوية فيروز حضرتهن گبل لا تروح
... صعد شاهر ورة عشر دقايق سمعنا حس صراخ يجي من فوك الكل ركضو يريدون يشوف شكو ومنو الجاعد تصرخ
الحس مو غريب هذا حس أيات ........
يتبع
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!