_وشاء الحب_
( بقلم بسمة البياتي)
_البارت الثالث و الثلاثون _
صعد شاهر ورة عشر دقايق سمعنا حس صراخ يجي من فوك الكل ركضو يريدون يشوف شكو ومنو الجاعد تصرخ
الحس مو غريب هذا حس أيات
أمها وخواتي وحرمة أبوها الثانية صعدن گبلنا
صعدنا لگيناهم جدام الحمام
بدلولها وطلعوها نسألها شبلاج ماتجاوب وتبجي بحس عالي
حدرنا جوة گرابتنا التمو عليها
شو هاي وكعت من طولها خربت
ظلينا نصحي بيها شكلها مو مال وحدة خربانة مببنا تمثل
حرمت عمي زكحت بيها گالت لوتحجي لو تنجعمين وتسكتين
ايات گالت شاهر فات علية للحمام واني مايستر جسمي غير الباب الجان مسدود
صارت تصرخ وتملخ بحالها
سنطة لكل صافنين
ام أيات.. كافي بنيتي يمكن الزلمة ما يدري بيج بالحمام شاهر متطلع منو الشينة قابل خما متقصد فات عليج
ابات.. يمة جاعد اكولج فات علية واني ربي ماخلقني معقولة ما سمع حس الماي يجري
... ايات تضرب على خدها قوي واختها گاضبتها
حرمة ابوها زكحت بأمها
منال . بنتج انفضحت جدام خلگ الله وانتي جاعد تبررين عملتو وين ابوها وأخوانها خلي يجون يدحجون شرفهم الي انداس بالرجلين وصار فرجة للزلم
نعيمة... لهين وبس سكتتلجن جثير مو شاهر الي يدحج على عرض الناس ظلت يمنا سنتين مايوم دحج على طولها ومن يحاجيها مايرفع راسو بوجها احجي ايات عليش ساكتة هم يوم شاهر دحج علية بنظرة موزينة
... گبل شي وهساع شي اليوم وليدج
كشف ستري ومتأكدة متقصد
شنو اطرش ماسمع حس الدوش جان يكدر يدك الباب مو يفوت عليه گبل
ام أيات... ايات سدي السيرة الزلمة فايت بالغلط
عرس وهوسة اكيد دايخ ومو دريان على حالو
منال.. ششلون تريد تخبلني يولي هاي بنتج الي يمسها يمسج الحجي وياج ما منو فايدة يجي ابوها وهو يتصرف
امنة... وهي شصعدها فوك مو اكو حمام جوة فارغ مابي احد عليش ماسبحت بي
ايات..الباب مسدودة ما ادري منو الجانت تسبح
نعيمة... البنوات مو هين والنسوان محد طبت كلهن جاعدات يمي
جنتي عايشة هين وتدرين الطابق الفوك خاص الشاهر وحرمتو محد يفوت الحمامهم
وفرضا صدك اكو احد بهذا الحمام اذا هالكثر خايفة على حالج وسترج عليش ماقافلتي الباب وهو بي قفل من جوة
.... جاعد اكلگم هذا الحمام ما ادري منو بي اضطريت اصعد فوك
والباب عبالي قافلتو طلعت ناسية خالة الصوج بأبنج لاطلعينو بريئ وتزتين اللوم عليه
اصيل... واحنا جاعد نگولج محد سبح والحمام الجو فارغ عليش صعدتي فوك
منال... هااا اني جنت بالحمام
ام منير... يولي مو صارلج ساعة جاعدة جدامي شوكت طبيتي للحمام
... شنو قصدج جاعد اجذب عليكم
توليتونة ولية تا اطلعون الصوح من بنتنا الله اكبر عليكم هيج شرف الناس مو هامكم
اصيل... امي تزكح ومنال تزكح والنسوان يهدن الوضع
ام ايات حرمة فقيرة تريد تسد السالفة بس ايات ومنال متقصدات يكبرنها مدري على شنو ناويات
منال.. امشو نطلع من هذا البيت ونعوف زلم هما الي يتصرف وياخذون حگج
.... راحوا اهل ايات وضع البيت تكهرب والنسوان تتهامس
صعدنا اني وأمنة فوك تا نشوف شاهر
طببنا للغرفة
شاهر جاعد والعيون دم
امنة... هاا خوية
... عليش ما گتولي اكو احد بالحمام
... بالحرام ماندري بيها من صاعدة
خوية الظاهر ايات وحرمة ابوها طابخات الطبخة سوة ويريدون يزتوها براسك
امنة... ايات اتگول شاهر سمع حس الدوش وماهتم فات عليه
...لا اكو حس ولا شي الحمام سنطة ومن خشيت بس لجحت وجها صديت ما دحجت عليها
... عجل لو سامع كلامها اتگول شاهر كشف ستري وشافني بهذا حالي
... مو احدر ادوس برأسها خلي تضب لسانها
جاعد تبيع شرف برأسي وهي اخف من الريشة
... ا راحوا مو هين
گوم اسبح وبدل وحدر اكف ويا الزلم بعرس ابن اختك لاتنطي مجال الأحد يجيب سيرتك
حدرنا جوة نحاول نخلي الوضع طبيعي بس مبينا علينا الضوجة
شاهر بدل وطلع
فيروز.. وينكم ياقوم جووووعانة
أمنة.... شبلاج تعيطين من الباب
... جووعانة وظهري يوجع وتعبانة
... گولنالج گعدي بس اووف من غوى البنات
... عجل ماما وين
... راحت تبدل
...گعدت ومديت رجلي
بروح ابوج خالة صبيلي شوية حتى لو بارد عادي المهم يسد جوعي گبل لاتجي الزفة
نجوى... طبيت ويا البنات للغرفة
مو طايقة حالي شوكت يخلص العرس اهجس الوكت مگاعد يمشي
رغد..جتي العروسة
رسل.. تعالي نطلع نشوفها
... تعبانة خلي ارتاح واجي
طلعن البنات رغد تحوص
هااا يولي شبلاج
... صارت عركة
... ويامن
جت گعدت جدامي وخرطتلي السالفة من البداية للنهاية
بهالخزة نسيت قهري ونسبت العرس ونسيت قادر انشغل فكري بعملة ايات اكص أيدي اذا ماتطلع متقصدة
ديربالج تحجين شي جدام فيروز
... لا شعلية بس النسوان كلهن عرفن أكيد تسمع منهن
... ضبي لسانج
منين ماتسمع خلي تسمع المهم انتي ماتحجين
فيروز...طبيت للغرفة انجضعت بفراش نجوى
والله لو بيدي اجرها نومة منا الباجر
نجوى. هو حياتج صايرة أكل ونوم
.. بربج خلي أخذ غفة من تجي الزفة گعديني
.... يولي والمكياج
... شيروحو لاتخافين ماعلية شي
... اخذت رغد وطلعت دحجت بالربعة سمر گاعد بالنص بالبدلة البيضة طالعة مثل الأميرة جمال ونزاكة
جريت نفس طويل ما اريد انظرلها بحسد الله يهنيهم
دحجت جدة وماما وعماتي ضايجات اووف حقهن
والله فيروز لو درت يمكن تتخبل
ورة ساعة جتي الزفة لبسنا شالات وصايات فوك ملابسنا
فات قادر گعد بسد سمر وكفت ادحج عليهم من بعيد خليت البنات جدامي تا مايشوفني
الأبتسامة بالگوة تطلع منو
گالوا يلا گومو السيارات برا
بابا سودة علية وأكف على اعصابو
اني وجدة وفيروز صعدنا ويا
فيروز... عيني بالمرآيا ادحج على شاهر مدري شبلاه مو على بعضو وجدة كذالك
همست أكولج نجوى شبيهم شو شكلهم مدري شلونو
... هااا ما أدري ترى كلشي مابيهم
.. والله مدري گلبي، مامرتاح
... وصلنا للأستوديو حدرو العرسان يگصون صور اريد فرصة احجي ويا شاهر ماكو راح وكف ويا ولد عمو واحنا ظلينا بالسيارة
كملوا صور افترينا شوية بعدها رجعنا البيت خالة احلام جايبين فرقة برة ومخلين كراسي والشباب يلعبون جوبي
نجوى وجدة حدرن گبلي من السيارة
... عليش بعدج جاعدة دحجي الشارع متروس شباب يلا امشي فوتي بسرعة
...اي ماشي رايحة
حدرت ضايجة بدت الحفلة جدة مكعدتني بسدها ماتقبل اتحرك
جت حرمة عم شاهر تسولف ويا جدة بالأول مانتبهت على كلامهم بس من أجة اسم شاهر وأيات فتحت اذاني وركزت بكل حواسي
لشتي رجفت من الگاعد أسمعو
تذكرت كلام ايات من جانت تحجي بالتلفون
عزززا بعينها والله سوتها ولعبت لعبتها
اختنكت اريد الحفلة تخلص تا احاجي وافهم منو الحد ما صبو العشا وكملوا اهجس روحي طلعت
جدة ظهري گاعد يوجعني شوكت نرجع للبيت
.... كومي وياي
خلي اشوف وين شاهر تا يأخذج للبيت
... اي والله ياريت
راحت جدة صاحت شاهر واجتي گالت
عدلي حجابج واطلعي ينتظرج بالباب
اكفي اصيح نجوى
... تركيها تتونس عليش مأخذتها وياج
يولي امشي الزلمة ناطرج
.... بسرعة طلعت شاهر گضب ايدي واخذني للسيارة
... خما بيج شي امي گالت ظهرج يوجعج
... اي من التعب والگعدة من ارتاح اكيد يروح الوجع
البيت قريب بسرعة وصلنا
صعدت بدلت وغسلت
فات شاهر
خما هم راح تطلع
... لا شعندي طالع العرس وخلص
...اجة گعد بسدي على الجرباية
شاهر شنو الصار اليوم
.. مثل ماسمعتي
... معلية بالسمعتو اريد اسمع منك
بدون مايبدل انجضع على ظهروا خشيت بحضنو
حجالي السالفة
اجذب اذا أكول ما خفت الشغلة مو هينة اخاف لايسونها سالفة ويعگلون ايات برأسو
... بنت الكلب گلبت الدنيا واتكوللهم اني متقصد فايت عليها
... تذكر من گوتلك سمعتها تحجي واتكول خربت الخطة والأزم افكر بخطة جديدة وهاي النتيجة فكرت وخططت وجتها خوش فرصة للتنفيذ بس ابد ماتوقعت الهدرجة شرفها رخيص عدها
... طبها طوب شتفين خلي تفين محد ينضر غيرها صارت علج بحلوك النسوان ليش عبالج
من تصرخ وتبجي الناس راح تصفگلها بالعكس ينطوها تف ونعلة
ابوها العار خابرني يعاتبني
اول نوبة اشوف هيج بشر يشترون الفضايح بفلوس
... لاتغث حالك ان شاء الله مايصير شي وتعدي السالفة على خير
.. ان شاء الله
نجوى... اخذوا سمر الغرفتها
تا يزفون قادر
يمكن من كثر الحزن العايشتو جسمي تشبع وما عاد شي يأثر بية
دورت فيروز مالگيتها
سألت ماما گالت ظهرها يوجعها شاهر اخذها للبيت.
عليش ما اخذتني وياها اني هم تعبانة
.. رادت تجي تصيحج جدتج ماقبلت گالتلها تركيها ترجع ويانة خليها متونسة
... اوووف هاي يا ونسة
رنا.... تعالي وياي ساعديني
.... گضبتني من ايدي واخذتني وياها
يولي وين ما اخذتني وبشنو اساعدج
.... نصي حسج وامشي اني الله غاضب علية السوالف العوج ادورلي وتركض وراي
.... شگاعد تحجين
... تخبلت تالي عمري تخبلت
.... عزززا هاي شبلاها
امشي وما ادري شتريد مني
وصلنا يم الحمامات اكو جدامهن باب خلفي يطلع على ترك البيت
فتحت الباب وسحبتني
يولي رنا لاتخوفيني عليش جايبتني للترك
انصدمت بقادر واكف يدخن ردت ارجع زكح بية
... اكفي خلي احاجيج
... دحجت على رنا بعتب
... لا ادحجين هيج بالحرام مو راضية بالغصب خلاني اجيبج الهين
قادر...فرحانة بعرسي
..... هااا. اي أكيد افرح
... عجل اني عليش مافرحان
.... قادر شرايد مني ترى عيب الگاعد تسوي الي يدحجنا سوة شراح يگول علينا
تارك عروستك تنتظرك ومگابلني
.... جنت الرايدو تصيرين حلالي
ردت هذا عرسي عليج مو على سمر
ردت الي تلبسلي البدلة البيضة انتي مو هي ردت اكمل نص ديني وحياتي وياج مو وياها
ردت جهالي منج مو منها
هذا الردتة بس كلشي صار الها مو الج
... اختنگت بعبرتي
قادر كافي حرام الگاعد تسوي ماكو قسمة بينا خما گوة
زت الجگارة من ايدو واجة گضبني من راسي شعري انجر ويا الحجاب
رنا... قادر اتركها اني صووووووجي
... وخري من جدامي
وانتي جاوبي عليش كاشخة تاتحضرين عرس الجتلتي بيدج
متمكيجة تا ادحج عليج واتحسر
عروستي بسدي ما كدرت ادحج عليها عيني عليج دمرتيني تدرين بحالج لو لا
... بجيت بقهر دست على گلبي، وحجيت
ما أريدك خما گوة افهم هالشي اني ما اريدك
ما واعدتك بشي ولا بينا حب عليش مجلب بية روووووح السمر وبعد لاتگرب مني
رنا فكت راسي من قبضتو وحضنتني
قادر وكف يتنفس سريع وبغضب
... رايح العروستي ومن هالحزة راح انعل ابو گلبي الحبج واخلي ينساج غصب عنو
... تركنا ومشى
صرت اناشغ من البجي ورنا حاضنتني
... كافي يولي الصوج مني مجان لأزم اسمع كلامو واجيبج تعالي نفوت
... مسحت دموعي
شلون افوت وهذا حالي راح ينتبهون علية
... امشي وياي اعدل وجهج
.... رنا عدلت وجهي ورجعت گعدت بسد جدة
اكولها گومي نرجع اتكول خلي ننتظر شوي
حدر قادر من فوك الكل يباركلو وعلت اصوات الهلاهل هه صارت سمر حرمتو
خلصت الهوسة ورجعنا للبيت
الليل كله ابجي جوة البطانية
ماعندي غير الدموع اطلع بيهن قهر گلبي
فيروز.. ثاني يوم الكل يسولف بسالفة ايات وشاهر ابوها واخوانها مصدكين الحجي وجوي هدو على شاهر وكلمة منو وكلمة منهم رادو يتگاضبون الزلم الكبار ادخلو وفضو الكونة
امنة.. اريد افهم شعجب ايات وحرمة ابوها دهن ودبس حتى مفضلتها على امها
ابتسام... حرمة عمها سولفتلي اتكول منال مسوية ابو ايات مثل الطلي تمشي بكيفها
وايات تا ادري مصلحتها مصادقتها من تستلم الراتب تنگللها هداية وتنطيها فلوس
... ايات طلعت طلعت حية من تحت التبن
الله يستر من كيدهن
... خطارنا رجعو للرمادي بس ظلو بيت خالة امنة
تقريبآ ساعة تسعة باليل
أجة عامر يدور القادر گال من العصر طلع وماراجع ندگ علية مايرد
نعيمة.. ما صارلو ثلاث أيام من متجوز عليش تارك عروستو اووف زلم أخر وكت
شاهر... خاف يم ربعنا
... سألت ماكو
امي ظال بالها وجاعد تلوب علية
نجوى... گلبي ملخني عزززا هذا وينو
بابا گضب التلفون خابر جماعتو ولا واحد شايفو
الكل توتر
بابا وعمو عمر طلعوا ويا عامر يدورولو
للساعة ١١ ومحد منهم بين القلق والخوف أكل گلوبنا عمة احلام جتي علينا
گعدت باب الحوش. ويا جدة وماما وعمة امنة
المسكينة قطرة دم ماكو بوجها تربعت بالگاع مخلية أيدها على رأسها وتبجي
أصيل.. يا الله ذيج سيارة شاهر
اخلام وامي وكفن الحيلهن
طبكت السيارة وحدرو منها
جة شاهر فتح الباب وجر قادر
احلام.. ليش هيج يمة هاي هم دكة تسويها بينا يبست دمي
و گلبي راد يگف من الخوف عليك
عمر... فوتو جوة عليش واگفين بالباب
نجوى. بابا غادي بركان گاضب فادر من زندو ويجر بي وهذاك مدري شبلاه بالگوة فاك عينو ويمشي
اول ماطبو للحوش
بابا قبض أيدو وضرب قادر بوكس خلاه يتكوم بالگاع
عمو عمر وعامر گضبو بابا
عمة احلام وجدة صرخن وجن يم قادر الي لهساع گاعد بالگاع وماينطي اي ردت فعل
احلام.. مامرجية منك خوية قادر مو زغير عليش ضربتو
... مو بس اضربو ادفنو هين
ابنج العود الصايم المصلي سكران ومايندل دربو لگيناه مجضوع بالشارع ويا واحد زايعتو الگاع افرحي خيتي ابنج الجبير تاليتو يطوطح بالشوارع
... عمة تخبلت لطمت على صدرها ومن حرگت گلبها بقبضة أيدها تضرب على جتف قادر وتبجي
... هاي تاليها يول سسسكران من صخام بوجهي
ابني الجبير الي اتباهى بي بين الناس هذا حالو ليش يول من شوكت گضبت درب السكر والعربدة
قادر.. يجر بالحجي
كولو منج أنتي السبب
يول بشنو اني السبب تاجاعد تزت عملتك الشينة برگبتي
... گوتلج تركيني بحالي ما اريد اتزوج هساع ارتاحيتي من فينتي حظ سمر وياي
ما اريدها مالي نفس بيها دمرتيني شبيدي اذا گلبي متعلعل بحب غيرها
نجوى... خليت ايدي على حلگي وابجي بحس مكتوم
قادر يحجي ويبجي
بابا ماتحمل جر قادر من ياخة القميص
سحب صوندة المي وصاح على حسن يفك البوري
خلى راسو جوة المي وقادر يرافس يريد يفك حالو من ايد بابا
عمو عمر بالكوة جر بابا وفوتو للبيت
قادر ظل گاعد والمي يقطر منو
عامر گومو واخذو لبيتهم.
ماتحملت كل الگاعد يصير جدامي طبيت للغرفة خشبت بفراشي أبجي
فيروز... حرت عليمن اروح على شاهر الصعد فوك غادي نار لو على نجوى الي ادري بيها گاعد تبجي
طبيت الغرفة نجوى ردت احاجيها گالت الله عليج تركيني اريد اظل. الحالي
تركتها وصعدت لكيت شاهر يدخن بالصالة
. فوتي للغرفة
... اريد اظل گاعدة وياك
... فيروز سمعي الكلام موزين الدخان عليج فوتي شوي وأجي
... تركتو براحتو طول جثير بالكعدة برا
شاهر.. شو لهساعج جاعدة ول يابة عليش مانمتي
.... شلون انام وانت ضايج
... ماببة شي لاتشغلين بالج
... تعال نام بحضني
... ابتسم شنو راح نغير الأدوار واني أجي مو انتي التجين الحضني
.... ماكو فرق يلا تعال.
.... جسمي ثگيل استري على حالج
... جريت رأسو وخليتو بحضني
مشيت اصابعي بشعرو
... من تضوجين گوليلي أوخر
.... ما اتعب لاتخاف
شاهر سولفلي كل التفكر بي لاتضم بگلبك شي.
... الحمل على جتافي جاعد يثگل منين ما اصعد تجيني ضربة على راسي كلما اكول خلص راح ارتاح تطلعلي سالفة جديدة تهد حيلي
... خلي نبدي من البداية گبل شوي عليش ضربت قادر وادري بيك هاي اول نوبة تمد أيدك علية
... لأزم يصحى على حالو اذا گضب هذا الدرب الأعوج صعب يرجع منو
يولي جدامي جاعد يبجي ويصيح احبها والمصيبة يقصد بنتي بالحرام لو ما اعرف قادر ورابي وياي جان محد خلصو من ايدي
هاي المسكينة حرمتو مصار ثلاث ايام من اخذها شنو ذنبها تاركها وگاضب البطل يشرب تا ينسى غيرها
... بعد الصار اليوم ما اظن يعيد السواه
قادر غلط وماكو بشر، مايغلط دحجتو من بده يصحى شكثر خجل من حالو.
... الله يهدي
... اي وبعد شنو الشاغل بالك
... ماكو شي بنيتي كافي خلي انام
.. بداعتي احجي ولاتضم شي شاركني تفكيرك
هاي اول نوبة گاعد تضم علية
ول يابة عليش تحلفيني تدرين بية ما احب هالسوالف.
... الخاطري احجي
... سالفة ال**** أيات مجاعد تفض اخوانها كل شوي يجيني واحد يهدد
تعبت من الكونات والمشاكل
خايف بحزة غضب اجتل واحد بيهم واگضي الباقي من عمري بالسجن
... جفلت لا عفية الله عليك لاتفكر تسويها
اذا ماتفكر بحالك فكر بية وبنجوى وبالجاهل البطني منو النة غيرك
... محد كاسر ظهري غيركم
يجفصون بطني ومتحمل الخاطركم مدري شوكت تفض هالسالفة الگشرة
ان شاء الله تخلص وتصير حجي وسوالف
.... ان شاء الله
ورة يومين اتصل ابو ابات بشاهر انطاه خبر ورة المغرب راح يجون
شاهر وبابا وعمو عمر گعدوا ينتظروهم
من جوي تفاجئنا ابو أيات جامع اخوانة وولدة والشيخ وياهم..........
يتبع
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!